Saúda para a XXX Edición da Exaltación do Viño da Ulla

Saúda para a XXX Edición da Exaltación do Viño da Ulla
A subzona da Ribeira do Ulla
está formada por oito concellos -5 na
provincia da Coruña e 3 na de
Pontevedra- e trátase da única zona
de producción de viño amparada por
unha Denominación de Orixe de todo o
territorio da provincia da Coruña. O
feito de que o viño da Ulla estea
protexido baixo o paraugas dunha D.O. implica que os caldos desta
terra e máis a calidade que os distingue camiñan da man. O
concepto de calidade, no sector turístico e sobre todo no
alimentario, aglutina dúas características ‘sine qua non’: a
seguridade e garantía para o consumidor e mais o goce persoal por
parte do mesmo do produto que consume. Os viños da Ulla son bo
exemplo do que quere dicir calidade vitivinícola.
Malia todo, os beneficios de contar cun produto de calidade
nunha zona de Galicia repercuten non só naqueles que os
consumen, senón tamén na área xeográfica na que se sitúan
porque implican unha revalorización da mesma, un valor engadido e
un interese social, cultural e gastronómico que converte o viño no
aliciente fundamental para disfrutar turística e culturalmente do
territorio no que se elaboran.
A gastronomía é a segunda motivación, por detrás da
natureza, que teñen os turistas que deciden visitar Galicia. O feito
de conservar e protexer a nosa oferta culinaria e as celebracións
que exaltan produtos concretos transformase para aqueles que nos
visitan nun atractivo turístico; nun signo de identidade e de riqueza
cultural.
Nun ano tan importante como o Ano Santo 2010 non cabe
senón exaltar as bondades da nosa terra e contribuír dende cada
recuncho a que peregrinos e visitantes poidan descubrir aqueles
elementos que nos definen e que conforman a realidade da Galicia
do século XXI. Galicia é un multidestino e a singularidade de cada
un dos territorios que a conforman está en tradicións como esta

Exaltación do Viño da Ulla, que chega xa á súa XXX Edición
conseguindo que os veciños destas terras compartan con todos
aqueles que se queiran achegar o mellor que teñen.
Carmen Pardo
Secretaria Xeral para o Turismo