JADRAN PISMO d - Daily Local News on Board

<strong>JADRAN</strong> <strong>PISMO</strong> d.o.o.
Information service for seafarers • Rijeka, Franje Brentinija 3
Tel. +385 51 403 188, 403 185 • Fax +385 51 403 189 • email: news@jadranpismo.hr www.micportal.com •
www.dailynewsonboard.com
Ang maiikling ulat na ito ay nakalap mula radyo, telebisyon at pahayagan sa Pilipinas. Sa pamamagitan
nito, hinihimok ng ahensya na ipamahagi ang siping ito sa mga kababayang nagnanais na makibalita.
FOREX
P43.66 sa (P43.47) US$1 nitong Huwebes
Filipino/Tagalog <strong>News</strong>
SABADO, 26 MAYO 2012
Ang mga sumusunod na balita ay nailathala sa mga
pangunahing pahayagan sa Pilipinas ngayong araw.
Bagong Phl ambassador sa China itinalaga ni Aquino
IPINAHAYAG ngayon ng Malacaang pagkakatalaga kay Sonia C. Brady bilang bagong Philippine
ambassador to People's Republic of China kapalit ni Domingo Lee na bigong makalusot sa Commission on
Appointments (CA). Maliban sa China, mayroon ding concurrent jurisdiction si Brady sa Peoples Republic of
Korea at Mongolia. Sinabi ni Deputy Presidential Spokesperson Abigail Valte, beteranong career diplomat si
Brady at hindi na rin bago sa kanyang trabaho. Ayon kay Valte, dati ng ambassador to China si Brady noong
2006 hanggang 2010, panahon ni dating Pangulong Gloria Arroyo. Bago nito, siya ay nagsilbi ng kinatawan
ng Pilipinas sa Thailand (2002-2003), Myanmar (1995-1999) at deputy of chief of mission to Indonesia
(1994-1995) at ilan pang foreign designations. Nagsilbi na rin itong DFA undersecretary for policy at naging
director ng Asia-Pacific Affairs. Ang pagtatalaga kay Brady ay naganap sa gitna ng patuloy na paglala ng
hidyaan sa pagitan ng Pilipinas at China.
Ilang miyembro umano ng PNP, kabilang ang ilang upisyal, mga binabae at lesbyana
INIHAYAG ni Ang Ladlad national chairperson Bemz Benedito kahapon, na 22 miyembro ng Philippine
National Police ang LGBT members. “Sa mga bakla, mayroon tayong miyembrong 14 ngayon tapos sa mga
lesbiyana may mga 8 tayo,” pahayag ni Bendito, isang transgender. Naniniwala ang grupo na marami pa ang
LGBTs sa PNP ngunit hindi lamang naglaladlad. Aniya, sa 22, ang highest ranking LGBT member sa police
force ay isang colonel. Karamihan ay hindi idineklara sa publiko ang kanilang tunay na sexual orientation sa
pangambang sila ay ma-discriminate. “Nandyan ang takot na kapag sila ay nagladlad ng kanilang tunay na
pagkatao hindi sila mapo-promote dahil susukatin sila base sa kanilang sexual orientation at di natitignan ang
kanilang performance at natatakot din silang i-out sila sa publiko ng mas matataas sa kanila,” paliwanag ni
Benedito.
Francisco, Padilla, Guarina bagong CA justices
ITINALAGA ngayon ni Pangulong Benigno Aquino III ang tatlong mahistrado sa Court of Appeals. Kabilang
dito sina Renato Francisco, Maria Luisa Quijano-Padilla at Jhosep Lopez na kapwa galling sa regional trial
courts. Si Franciso ay kasalukuyang hukom sa Malolos, Bulacan RTC at siya ang pumalit kay Associate
Justice Mario Guarina II. Ang 63-anyos na RTC judge ay tapos ng Bachelor of Laws sa Ateneo de Manila
University at pang-17 sa 1973 Bar exams kung saan ito nakakuha ng 100% rating sa Criminal Law. Si Padilla
naman ay RTC judge ng Quezon City RTC mula 1999 at siya ang pumalit kay Justice Rodrigo Lim Jr.
Samantala, si Lopez naman ang ipinalit kay Justice Estrella Perlas-Bernabe na itinalaga na sa Korte Suprema.
South Luzon International Airport tatapusin sa 2014
MALAKI ang tinwala ng pamahalaan na maaabot nila ang 2014 deadline para matapos ang konstruksyon ng
South Luzon International Airport (SLIA). Ayon kay Transportation and Communications Secretary Mar
Roxas, aprubado na ang karagdagang P2 bilyon pondo para sa pagpapatuloy ng konstruksyon ng naturang
proyekto. Kaugnay nito, sinabi ni Albay Governor Joey Salceda na inaasahan niyang madaragdagan pa ang

pondo para sa naturang proyeto sa susunod na taon at makakatulong ito sa development ng Bicol region
maging sa buong bansa.
Bidding sa LRT Cavite naunsyami
NAANTALA ang dapat sanay “bidding” para sa multi-bilyong kontrata sa Light Rail Transit-Cavite
Extension makaraang magkaroon ng aberya sa sisingiling pamasahe sa mga pasahero. Ayon sa LRT
Authority (LRTA), nais ni Transportation and Communications Secretary Mar Roxas na tukuyin ang tamang
halaga ng pasahe na hindi makakaapekto ng husto sa mga mahihirap na mananakay ng train system. Dahil
dito, maaaring mailipat sa susunod na buwan ng Hunyo ang bidding sa P30 bilyong proyekto na dapat sana’y
ngayong kalagitnaan ng Mayo na naisagawa. Isasailalim sa public-private partnership (PPP) ang LRT Cavite
Extension project kung saan ang mananalong bidder ang magtatayo ng ekstensyon ng LRT Line 1 mula
Baclaran hanggang Cavite. Ang mananalong bidder rin ang mag-ooperate at magmimintina ng train line sa
loob ng ilang taon upang mabawi ang inilabas na puhunan buhat sa pasahe. Papayagan naman ng
pamahalaan ang mananalong bidder na i-operate rin nito ang LRT Line 1 mula Roosevelt hanggang Baclaran
at bibili rin ng dagdag na train cars para sa inaasahang paglobo pa ng mga pasahero na umuuwi ng Cavite.
Palasyo hindi oobligahin ang mga miyembro ng Gabinete na isiwalat ang yaman
NANANATILI ang posisyon ng Malacañang na hindi oobligahin ang mga kasapi ng Gabinete ni Pangulong
Benigno “Noynoy" Aquino III na pumirma sa waiver para masilip din ang kanilang bank account at
patunayan ang transparency sa gobyerno. Sinabi ni deputy presidential spokesperson Abigail Valte na
mismong si Aquino na nagpahayag noon na ipinapaubaya niya sa bawat miyembro ng Gabinete ang pasya
kung nais nilang maglabas ng waiver. “We asked the president that before, nagkaroon na ganitong issue dati.
The president’s reply (was), that will be up to the individual Cabinet members," paliwanag ng opisyal sa
panayam ng dzRB radio nitong Sabado. Una rito, iniulat na nagmungkahi umano ni Sen. Alan Peter Cayetano
na maging ang mga kasapi ng Gabinete ay dapat pumirma ng waiver para masilip ang kanilang mga bank
accounts. Iminungkahi rin ng senador na amyendahan ang batas tungkol sa Statements of Assets, Liabilities
and Net worth (SALN) at maisama rito ang tungkol sa waiver. Naging mainit ang usapin tungkol sa waiver
matapos pumirma si Chief Justice Renato Corona ng waiver na nagbibigay pahintulot na masilip ang kanyang
mga bank account. Ayon kay Valte, hindi pipilitan ng Palasyo ang mga kasapi ng Gabinete na pumirma sa
waiver at hahayaan na lamang nilang personal na magdesisyon ang mga ito. Kasabay nito, sinabi ni Valte na
ipinauubaya rin ng Malacañang sa mga mambabatas ang desisyon kung nais nilang amyendahan ang Foreign
Currency Deposit Act (FCDA). Ang naturang batas ang ginamit na dahilan ni Corona kaya niya hindi
idineklara sa SALN ang laman ng kanyang dollar accounts na umaabot sa US$2.4 milyon. Binigyan-pansin ni
Valte na hindi naman pinagbabawalan ng FCDA ang bawat tao na magsalita tungkol sa kanyang dollar
account at maaari din naman maglabas ito ng waiver tungkol dito.
REHIYON
Bantay-Salakay: Bangko hinoldap ng sariling sekyu sa Quezon City
HINOLDAP ng security guard ang pinagtatrabahuhang branch ng Chinabank sa E. Rodriguez Sr., Barangay
Damayang Lagi sa Quezon City, kagabi (Mayo 25). Kinilala ang suspek na si Reynante Gante ng Odysseus
Security Agency. Si Gante ay nabatid na apat na buwan pa lamang na namamasukan sa nasabing bangko. Sa
pagsisiyasat ng pulisya, ikinulong ng suspek ang 11 empleyado ng bangko at inutusan ang cashier na si
Reynante Yu na buksan ang vault. Pagkatapos limasin ang vault ay agad na tumakas si Gante lulan ng
motorsiklo na “for registration” pa lang at bitbit ang kanyang service firearm Inaalam pa kung magkano ang
natangay na pera ng suspek na tinutugis na ngayon ng pulisya.
12 naitalang patay sa dengue sa Zamboanga City
UMAKYAT na sa 12 ang kaso ng mga namatay dahil sa dengue sa Zamboanga City. Ito'y sa kabila ng
pagdedeklara ng dengue outbreak ng City Health Office, dalawang linggo na ang nakalilipas. May 800 kaso
naman ang naitalang tinamaan ng dengue ngayong taon. Mas mataas ito ng 50% noong 2011. Ayon kay
Philippine Red Cross (PRC) Secretary General Gwendolyn Pang, magpapadala sila ng mas maraming
equipment para mas mapabilis ang pagsasalin ng dugo sa mga pasyente. Patuloy naman ang fumigation sa
mga barangay na may pinakamaraming naitalang dengue cases.
Iligan bombing suspects, kinasuhan na

KINSUHSAN ng pulisya ang grupo na responsable sa grenade blast na ikinasawi ng dalawang magpinsan at
ikinasugat ng mahigit 30 sa Brgy Pala-o, Iligan City. Ayon kay PNP-10 spokesman Supt Ronie Cariaga,
natukoy na nila ang grupo na gumawa ng pambobomba noong Mayo 5 ng gabi sa nasabing lugar. Sinabi ni
Cariaga, natunton nila ang mga suspek batay na rin sa inisyal na imbestigasyon ng PNP, NBI, CIDG at DILG.
Dagdag pa ni Cariaga, hindi pa muna nila kailangang pangalanan ang mga suspek sapagkat ayaw nitong
mabulabog ang mga ito. Kabilang sa mga kasong kakaharap ng mga suspek ay double murder, multiple
frustrated murder at damage to property. Nauna nang lumalabas sa imbestigasyon ng pulisya na dahil sa
illegal logging ang sanhi sa bombing incident sa naturang lugar.
Ilang kabahayan sinira ng baha sa GenSan
UMABOT ot sa 13 kabahayan ang naapektuhan ng pagbaha sa Barangay Labangal sa lungsod matapos
lumaki ang tubig-baha mula sa Silway River dahil sa malakas na pag-ulan kagabi sa area ng Polomolok,
South Cotabato. Ayon kay Vicky Magante sa City Social Welfare and Development Office (CSWDO), tatlong
kabahayan ang totally damage at tatlo rin ang partially damage habang pitong pamilya naman ang lumikas
mula sa Purok Matinabangon at Bulaong Extension sa lungsod. Ang nasirang mga bahay ay pagmamay-ari
nina Adriana Javier, Rey Paciente at Rabia Carlos. Pansamantala munang tumutuloy sa oval covered court
ang mga lumikas na residente habang ang iba ay nagpahatid sa kanilang mga kamag-anak. Napag-alaman na
pinasok ng tubig-baha na hanggang tuhod ang lalim ang mga kabahayan kaya't nabasa ang mga kagamitan
ng mga residente. Nilinaw naman ni Magante na walang namatay sa nasabing pangyayari.
Camarines Sur nagdeklara ng diarrhea outbreak
NAGDEKLARA na ng diarrhea outbreak ang mga opisyal matapos na tumaas na sa 186 na pasyente ang
tinamaan ng sakit na diarrhea ang naitala sa 11 barangay sa bayan ng Nabua, Camarines Sur. Sa ipinalabas
na ulat ng Provincial Disaster Risk Reduction and Management Council (PDRRMC), nangunguna ang Brgy.
San Antonio Poblacion na may naitalang 98 kaso, sinusundan ng La Purisima, 24; Sto Domingo, 23; Sta
Lucia, 19; Sta Cruz, 5; Bustrac, 4; San Isidro 4, San Juan, 3; San Jose, 2; at Brgy Santiago Old, 1 o
kabuuang 186 biktima. Una ng napaulat kamakailan na dalawa ang binawian ng buhay sa diarrhea sa bayang
ito na sina Jesus Daliva, 63 ng Brgy. Sto. Domingo at Cornelio Espalmado, 7 anyos ng Brgy. La Purisima.
Samantalang sa bayan ng Oas, Albay ay nasa 52 katao ang tinamaan ng diarrhea. Patuloy naman ang
pamamahagi ng orisol o chlorine ng Rural Health Unit sa mga barangay na apektado ng nasabing sakit at
kumuha na rin ng sample ng tubig sa balon na ginagamit ng mga residente dito upang masuri.
Polusyon sinisi sa pagkamatay ng mga isda sa Danglag River sa Cebu
POLUSYON ang tinuturong dahilan sa pagkamatay ng mga isda at kulay putik na tubig sa Danglag River sa
Consolacion, Cebu. Ayon kay Rene Amoroto ng monitoring and surveillance section ng Bureau of Fisheries
and Aquatic Resources (BFAR) ng rehiyon, base sa isinagawa nilang inspeksyon kahapon ay may nakita
silang babuyan malapit sa Danglag River. Hinihinalang ang mga dumi galing sa piggery ay diretsong
itinatapon sa ilog. Kumuha na ang BFAR ng sample ng mga patay na isda at tubig para suriin. Babalik bukas
sa Danglag River ang grupo ng BFAR para kumuha ng panibagong sample ng isda at tubig. Bukod sa dumi
ng baboy ay may iba pang dumi na itinatapon sa Danglag River na maaari ring dahilan pagdumi ng
dumadaloy na tubig sa ilog.
IBAYONG DAGAT
Mga gwardiya sa preso nagsagawa ng welga, 52 bilanggo napilitang palayain ng mga awtoridad
NAKALAYA ang umaabot sa 52 mga preso na nahatulan sa iba't-ibang kaso sa Norway, bunsod ng
isinagawang strike ng mga jail guards. Napilitan umano ang mga otoridad na palayain ang naturang mga
kriminal dahil sa pag-aaklas ng mga bantay sa Bjoergvin prison. Inihayag ni Harald Aasaune, manager ng
nasabing kulungan, ilan sa mga preso ay nahatulan sa kasong drugs, sex crimes, economic crime at
karahasan. Unang pagkakataon aniyang nangyari ang ganitong sitwasyon. Ang apat sa mga pinakawalan ay
"on probation" habang ang 48 iba pa ay binigyan ng limang araw na kalayaan. Nakiisa ang mga jail guards sa
strike ng mga kawani ng pamahalaan sa nasabing bansa na pinakauna sa loob ng 28 taon dahil sa pagbagsak
ng negosasyon kaugnay sa sahod. Bunsod nito ay pansamantalang naparalisa ang mga paaralan, child care
centers, at iba pang pampublikong institusyon.
High-level enriched uranium sa Iran nuclear sites - IAEA

KINUMPIRMA ngayon ng International Atomic Energy Agency (IAEA) ang pagkakaroon ng radioactive
materials sa Iranian underground bunker. Ito'y kasunod ng pagbisita ng IAEA officials sa nasabing bansa.
Ang nasabing findings ay maaaring nangangahulugan na malapit nang maabot ng Iran ang uranium
threshold na kailangan para makagawa ng nuclear missiles. Sa report ng IAEA, inatasan nito ang Iran na
magpaliwanag. Subalit naging maingat ang ahensiya sa pag-akusa na maaaring itinaas ng Tehran ang antas
ng uranium enrichment nito at inilagay sa report na sinabi ng Islamic country na nagkaroon ng technical
glitch kaya nakitaan ng high-level enriched uranium sa bunker nito. Maging analysts at diplomats ay
naniniwalang nagkaroon lang ng technical glitch kaya may traces ng higher-enriched uranium. Ang nasabing
report ng IAEA ay nakatakdang talakayin ng IAEA board na binubuo ng 35 bansa. Sa report ng IAEA,
nagpahayag din ng pagkabahala ang UN nuclear agency sa umano'y paglilinis na ginagawa ng Iran sa
Parchin military complex. Ang Parchin military complex ay pinaniniwalaang pinagtataguan ng Iran ng
pressure chamber at iba pang kagamitan sa pagsasagawa ng nuclear test. "Based on satellite imagery at this
location ... the buildings of interest to the agency are now subject to extensive activities that could hamper the
agency's ability to undertake effective verification," bahagi ng report ng IAEA. Sinabi ng ahensiya na sa mga
nakalipas na buwan ay nakakakuha sila ng mga impormasyong lalong nagpapalakas sa hinala nila ukol sa
Parchin site. Ang Parchin site ay matagal nang hinihiling ng IAEA na bisitahin para magsagawa ng
inspeksyon subalit nagmamatigas ang Iran.
50 katao nasawi sa pagsalakay ng pwersang gubyerno sa isang lungsod sa Syria
PATAY ang 50 katao kabilang na ang 13 bata, nang maglunsad ng ground assault ang Syrian security forces
sa lungsod ng Homs sa Syria. Ayon sa Syrian Observatory for Human Rights, gumamit ng tangke, mortars at
machine guns ang puwersa ni Syrian President Bashar al-Assad sa isinagawang opensiba. Bukod sa mga
nasawi, higit 100 mga sibilyan pa ang sugatan sa panibagong karahasan, sa gitna ng umiiral na ceasefire na
ipinanukala ng United Nations. Sa kabila ng patuloy na karahasan, sinabi ni UN Secretary General Kofi
Annan na walang "Plan B" ang international community sa nangyayaring krisis sa Syria. Sa lungsod ng
Aleppo na dati ay nananatiling loyalist ni Assad, tinirgas at pinagbabaril ng security forces ang mga nagaaklas
na ikinasawi ng limang katao.
Butler ni Pope Benedict arestado kaugnay ng leak ng confidential na mag dokumento
INALERTO ng Vatican police ang butler ni Pope Benedict XVI sa akusasyong ito ang nag-leak ng mga
confidential na dokumento at sulat sa media, mula sa private study ng Santo Papa. Ayon sa Vatican, nakuha
sa pag-iingat ng suspek ang mga sikretong dokumento. Bagama't ayaw pangalanan ng Vatican, sinabi ng mga
sources na ang suspek ay si Paolo Gabriele, 46, nagtatrabaho bilang butler sa papal apartment simula noong
2006. Sinabi ng isang source na na-shock at ikinalungkot ni Pope Benedict ang pagkakadawit ng butler dahil
pinagkatiwalaan ito ng Santo Papa. Ayon kay Vatican spokesman Father Federico Lombardi, nagsagawa ng
imbestigasyon ang Vatican police at natukoy ang suspek. Sa ngayon ay isinasailalim na sa imbestigasyon si
Gabriele. "The inquiry carried out by Vatican police... allowed them to identify someone in possession of
confidential documents. This person is currently being questioned," ani Lombardi. Napag-alaman na nitong
mga nakaraang buwan ay nag-leak ang mga dokumento sa Vatican kung saan nabunyag ang mga
nangyayaring kurapsyon at iba pang kaganapan sa Holy See kabilang na ang kaso ng pang-aabuso ng mga
paring Katoliko. Limitado lang ang may access sa private study ni Pope Benedict na kinabibilangan ng butler,
apat na madre at ang dalawang secretary nito na sina Georg Gaenswein at Alfred Xuereb. Kasunod ng
nangyaring leak sa mga confidential documents ay bumuo ng special commission of cardinals ang Santo Papa
upang imbestigahan ang nangyaring pag-leak ng mga confidential sana na dokumento. Ang pag-aresto kay
Gabriele ay kasunod ng pagsibak din sa pinuno ng Vatican Bank na si Ettore Gotti Tedeschi dahil sa
corruption scandal na yumanig sa bangko. Si Tedeschi ay isa rin sa mga pinaghihinalaang nasa likod ng pagleak
ng mga confidential files ng Vatican.
38 militante patay sa nangyaring sagupaan sa Yemen
UMAABOT sa 38 militanteng al-Qaeda ang namatay sa nangyaring sagupaan sa pagitan ng sundalo sa
Yemen. Ayon sa state-run news agency na SABA, hindi naman umano bababa sa 15 militar ang nasawi sa
nasabing bakbakan sa probinsiya ng Abyan at Lahjj. Kung maalala, nito lamang nakaraang linggo
inakusahan ng Yemeni government ang al Qaeda sa Arabian Peninsula na silang nasa likod sa serye ng
suicide bombing na ikinamatay ng mahigit 100 sundalo. Sa nakapost naman sa Jihadist websites, inako ng
grupong Ansaar al-Sharia ang nasabing pag-atake sa Arabian Peninsula.

PALAKASAN
Fans ng PBA dismayado sa mistulang pag-boykot ng TnT sa PBA All Star sa Laoag
LABIS ang pagkadismaya ng mga fans ng PBA dahil sa mistulang boycott na ginawa ng management ng
Talk ‘N Text Tropang Texters, matapos na atasan ang kanilang mga players na huwag ng siputin ang 2012
PBA All Star sa Laoag City, Ilocos Norte, noong Biyernes. May order umano ang Tropang Texters
management sa mga players na sina Ranidel De Ocampo, Japeth Aguilar, Kelly Williams at Jared Dillinger
na huwag ng sumali pa sa All Star. Ilan sa mga manlalaro nila tulad ni Aguilar ay kasali sa dunk contest.
Ikinatwiran ng coaching staff na pagod ang kanilang mga players dahil galing ito sa physical na laro sa
katatapos na Commissioner’s Cup kung saan ay tinalo sila ng B-Meg sa game seven. Pagtutuunan umano nila
ng pansin ang nalalapit na pagbubukas ng Governor’s Cup na sisimulan sa Mayo 20,2012. Ang katwirang ito
ay hindi lumusot sa PBA fans na nagsabing mababaw na dahilan ito. Anila, bakit ang B-Meg na kanilang
nakalaban ay galing din sa pagod, pero nakiisa ang mga players nito gaya ni James Jap, Jonas Villanueva at
Peter Jun Simon. Ayon pa sa PBA fans, ang ipinakitang ito ng TNT ay pagpapatunay lamang na masama pa
rin ang kanilang loob dahil talo sila sa championship. Kabilang sa nanghihinayang sa hindi pagsali ng TNT
sa All Star ay si PBA Commissioner Atty. Chito Salud na nagsabing ang larong iyon ay handog ng PBA sa
mga fans.
Unang best of three semis ng Asean Basketball league tutulak na
MAGSISIMULA ngayong alas-4 ng hapon ang unang laro sa best of three semifinals ng ASEAN Basketball
League na paglalabanan ng San Miguel Beer Philippines at ng Westports Malaysia Dragons sa Olivarez
College Sports Center sa Sucat, Lungsod ng Paranaque. Llamado ang Beermen sa seryeng ito dahil sila ang
naging top seed sa regular season na may 17 panalo at apat na talo kontra sa 11-10 na marka ng Dragons.
“Playing in a homecourt different from the one we’re used to playing is out of our control. For me, the focus is
to prepare the team for our series with the Dragons,” wika ni SMB coach Bobby Parks. Dalawang beses na
natalo ang SMB kontra Dragons noong regular season ngunit kompiyansa si Parks na kaya ng kanyang
koponan na pataubin ang kalaban sa tulong ng mga imports niyang sina Nick Fazekas at Willard “Duke”
Crews, Jr.
Wade, James pinagliyab ang Heat, pasok na sa EC finals
NAGBUSLO si Dwyane Wade ng 41 points at may 28 naman si LeBron James para igiya ang Miami Heat sa
105-93 panalo laban sa Pacers sa Game 6 papunta sa Eastern Conference finals. Winakasan ng Miami ang
kanilang semifinals series ng Indiana sa 4-2 para hintayin ang mananalo sa serye ng Boston at Philadelphia.
Sinuman sa Celtics at 76ers ang makakasagupa ng Heat para sa conference finals na magsisimula sa Lunes sa
Miami. “In the regular season, we’ve had some good games,,” wika ni Wade. “But I don’t know if we’ve ever
had three in a row like that in the playoffs.” Nanggaling ang Miami sa 1-2 pagkakaiwan sa serye matapos
biguin ng Pacers, 94-75, sa Indianapolis sa Game 3 para kunin ang home court advantage. Sa pamamahinga
ni Chris Bosh dahil sa isang abdominal injury, sina James at Wade ang nagdala sa Heat sa sumunod na
tatlong laro kung saan nagtala si James ng kabuuang 98 points, 34 rebounds at 24 assists, habang kumolekta
si Wade ng 99 points, 22 rebounds at 11 assists. Mula sa isang 11-point deficit, dinala ni Wade sa kanyang
mga balikat ang Miami sa pamamagitan ng kanyang 26 points sa halftime. Pumantay ang naturang
produksyon ni Wade sa 16-year-old franchise record ni Tim Hardaway para sa pinakamaraming playoff points
sa unang dalawang yugto. Tanging sa huling bahagi ng second quarter nakaporma ang Pacers sa pagbaba ng
10-0 run upang agawin ang 53-51 lead patungo sa second half. Iginupo ng Miami ang Chicago Bulls noong
nakaraang taong Eastern Conference finals, ngunit nabigo naman sila sa kamay ng Dallas sa six games sa
championship series.
Veteran boxing referee Robert Byrd, third man sa Pacquiao-Bradley fight
IPINAHAYAG na ngayon ng Nevada State Athletic Commission (NSAC) ang magiging third man o referee
at judges para sa title defense ni WBO welterweight champion Manny Pacquiao kay Timothy Bradley Jr.
Magiging referee sa Pacquiao-Bradley fight ay ang beteranong si Robert Byrd, habang ang tatlong judges na
iiskor sa laban ay sina Duane Ford, C.J. Ross at Jerry Roth. Kung maalala, naging judge si Ford sa mga laban
ni Pacman kina Shane Mosley (2011); Joshua Clottey (2010) at Miguel Cotto noong 2009. Sa mga laban ni
Pacquiao kina Ricky Hatton (2009) at David Diaz noong 2008 ay si Ross ang isa sa mga hurado. Naging
judge naman si Jerry Roth sa mga makasaysayang laban ng pound-for-pound king sa mga Mexican boxers na

sina Juan Manuel Marquez (2008); Marco Antonio Barrera (2008) at Erik Morales noong 2006. Lahat ng
mga nabanggit na laban ni Pacman ay matagumpay niyang naipanalo. Si Byrd ay isang California-based
boxing judge at referee kung saan ginugol nito ang kaniyang 34 taon bilang California Highway Patrol.
Fil-Am Miami Heat coach Spoelstra, pinagmulta ng $25K ng NBA
PINATAWAN ng multang $25,000 (P1,075,000) ng NBA ang Filipino-American at Miami Heat head coach
na si Erik Spoesltra dahil sa naging panlalait nito sa officiating officer noong Game 5 ng Eastern Conference
semifinal laban sa Indiana Pacers. Sa inilabas na ulat sa media, sinabi ni Spoelstra na wala umanong
pakialam ang NBA sa hard fouls ng ilang Pacer players kina LeBron James at Dwyane Wade. Sa Game 6
kahapon ay tinalo ng Heat ang Indiana at pasok na sila sa Eastern Conference finals kung saan makakalaban
nito ang mananalo sa pagitan ng Boston Celtics at Philadelphia 76ers.
Bradley, titimbang ng 145 lbs. sa weigh-in vs Pacquiao
MATAPOS ang impresibong media workout ni light welterweight champion Timothy Bradley Jr. na ginawa
kahapon sa California, may part two pa ang nasabing open workout. Ayon kay Bradley, isasagawa ang
pangalawang bugso ng kaniyang pagpapakitang gilas ay gagawin sa araw ng Miyerkules. Sa media workout
na isinagawa sa harap ng international press, ipinagyabang ng American undefeated boxer ang tikas ng
kaniyang katawan at boxing routines kasama ang trainer na si Joel Diaz. Sinabi ni Bradley, sa ngayon ay
tumitimbang siya ng 150 pounds kung saan wala umano itong problema para makuha ang 147 pounds weight
limit. "This is the fight that I’ve been waiting. The chance of my life. I’m ready for this moment. I’m excited.
I’m in the best shape of my life. I’m on weight. I left the gym at 147 pounds (today). I’ll probably be coming
a little light on the day of the weigh-in, 145 or 144. I’m just eating a little bit more. I feel great, I feel
comfortable and I*m ready to deliver,” wika ni Bradley. Hindi naman naniniwala si Top Rank CEO Bob
Arum na underdog si Bradley, dahil kung pagbabatayan umano ang bilis at liksi ni Pacquaio ay natatapatan
daw ng light welterweight champion. Sa panig ni Pacman, pinadugo nito ang mukha ng isa sa mga sparring
partner nito. Ang Pacquiao-Bradley fight ay gagawin sa June 10 sa MGM Grand Garden Arena, Las Vegas,
Nevada.
SHOWBIZ
Koko Pimentel at asawang si Jewel, hiwalay na
TULUYAN nang binasag ni Sen. Aquilino “Koko” Pimentel III ang pananahimik kaugnay sa isyu ng
hiwalayan sa kanyang asawang si Jewel May Lobaton kung saan nagkaroon sila ng dalawang anak.
“I confirm my separation from my wife of close to 12 years, Jewel May Lobaton. We have been living
separately since November 2011,’ ayon kay Pimentel. “This may well be the most difficult public
pronouncement I will ever be making in my entire life. And painful too, as every separation involves a certain
degree of pain,” wika pa ni Pimentel. Sinabi pa ng senador na sinubukan nilang resolbahin ang mga isyung
namagitan sa kanilang mag-asawa, ngunit nabigo siyang makumbinsi ang kabiyak na magkaunawaan at
magkabalikan. “I tried my best to resolve our differences for the sake of our two boys but have failed to do so.
Now that we have separated, my main concern is the welfare of the boys,” pahayag pa ni Senador Pimentel.
Sa kabila ng hiwalayan ay siniguro ng senador na hindi maapektuhan ng kanyang paghihiwalay sa kabiyak
ang kanyang tungkulin bilang senador. Samantala, hindi binanggit ng senador ang dahilan ng
pakikipaghiwalay nito sa misis na si Jewel.
Grace Lee tanggap na umano ang pakikipaghiwalay kay Aquino
MISTULANG tanggap na rin ng Korean TV host na si Grace Lee na tapos na ang anumang namagitan sa
kanila ng Pangulong Aquino. Ito'y kasunod ng eksklusibong ibinunyag sa Bombo Radyo ng Pangulo na
magkaibigan lang sila ni Lee. Nang muling matanong kaugnay sa pahayag na ito ng Pangulo, makahulugang
inihayag ng TV host na may mga bagay umanong hindi maaring pilitin dahil hindi lang siya ang masasaktan
kungdi maging ang ibang tao sa kanilang paligid. Dagdag pa ni Lee, natuto na siyang mag-let go sa nasabing
bagay at nitong mga nakaraang buwan aniya ay nagiging wise na rin siya.
Hangad naman ni Lee na manatili silang magkaibigan ng Pangulong Aquino.
Jessica Sanchez kabado na hindi magtatagal ang kanyang popularidad
BAGAMA'T abala ngayon sa kaniyang career bilang bagong singing sensation, wala umanong balak ang
American Idol runner-up na si Jessica Sanchez na itigil ang pag-aaral. Sa isang panayam, sinabi ng Filipino-
Mexican-American singer na pagkatapos ng high school tutuloy siya sa college kahit pa pagsabayin niya ito at

ang pagkanta. Ayon kay Sanchez, maaaring hindi siya magtagumpay sa industriya kaya mainam na mayroon
siyang back-up plan. “I could be a one hit wonder,” ani Sanchez. “I have to have a back-up plan.” Wala ring
balak si Jessica na mag-focus lang sa pagkanta. Inihayag ng half-Pinay singer na kapag nakaluwag na, gusto
niyang magsulat ng kanta. Gusto raw ni Sanchez na magkaroon ng collaboration kina Jennifer Lopez at
Pitbull pero aminado ang singer na sa ngayon ay punong-puno ang kaniyang schedule. Sa darating na Lunes
ay sasabak sa unang concert si Sanchez kung saan kabilang ito sa mga performers sa National Memorial Day
concert sa Washington habang pinaghahandaan din nito ang nalalapit na American Idol tour. Kaugnay nito
ay muling nagpahayag ng interes si Sanchez na mabisita ang Pilipinas at Mexico kung saan nagmula ang
kaniyang mga magulang kaya sana umano ay mapasama ito sa mga mapupuntahan nila para sa American
Idol tour. Proud umano niya sa kaniyang mga pinanggalingan. "I'm proud of both of my heritages," dagdag pa
ni Jessica sa pagiging Filipino-Mexican niya. "There’s never a time when I’m more one than the other. I grew
up with both [cultures.]"
Madonna, nasa Israel para sa kick off ng world tour
DUMATING na sa Israel ang international pop singer na si Madonna para sa kaniyang concert. Sa Holy Land
ang kick off ng world tour ng tinaguriang Queen of Pop. Mula airport ay dumiretso sa Tel Aviv Dan hotel
ang motorcade ng pop superstar na kaagad pinagkaguluhan. Ang mga fans ng singer ay naka-Madonna
costume pa, para dumalo sa Madonna theme parties sa mga clubs at bars sa Tel Aviv. Bagama't hindi Jewish,
in-adopt ni Madonna ang Hebrew name na Esther at nag-aral din ito ng Jewish mysticism. Kilala si Madonna
sa Israel bilang "Queen Esther" at sa pagdating ng "Material Girl" singer sa bansa, inanunsyo ng Israeli
media na "the Queen has arrived." Inaasahang dadalawin ni Madonna ang mga holy sites sa Israel bago ang
kaniyang concert sa Tel Aviv.
Paggawa ng sariling pangalan sa music world, mahirap - Jessica
AMINADO si American Idol second runner-up Jessica Sanchez na mas malalaking pagsubok ang
kakaharapin nito sa kanyang musical career. Ayon kay Jessica, hindi pa nito nararanasan ang anumang
nangyayari sa real world dahil buhay pa rin ang American Idol fever at protektado pa sila ng mga staff ng
kompetisyon. Pero sa oras na sila ay pakawalan na talaga, malamang aniya ay magiging mahirap na ang lahat
lalo na pagdating sa paggawa ng sariling pangalan. Para kay Jessica, pinakamalaking pagsubok ang maging
independent mula sa mga simpleng bagay bago maging tanyag na mga artists. "There's a lot of things. Right
now we were in an "American Idol" bubble. We were protected by the "American Idol" staff, and we didn't
really get to see what was going on much out in the real world ... and then the fact that we are known as
"American Idol" contestants and now we can break out and become artists. * It's going to be difficult, but
we're all going to try to work hard and get our names out there as a single person."
KWENTONG KAKAIBA
Upisyal ng simbahan nagbitiw sa tungkulin para maging isang Elvis Presley impersonator
NAGBITIW sa kaniyang tungkulin bilang vicar ng isang simbahan sa Matchborough, Worcestershire,
England upang maging impersonator ni Elvis Presley. Ayon kay Andy Kelso, 64, nagpadala sa kaniya ng
mensahe ang Panginoon na sumunod siya sa Church of Elvis. "One day I was out walking the dogs in between
church services and I felt God say to me very strongly, 'Take Elvis to the Church!' ani Kelso. Kung dati ay
nagsisilbi sa simbahan, ngayon ay nagpi-perform na bilang si Elvis si Kelso, sa mga clubs maging sa mga
simbahan. Sa una umano ay na-shock ang mga nakakilala sa kaniya pero ang mga sumunod umano ay naging
interesado na ang simbahan at palaging puno ang kaniyang mga concert. "It was a shock but after one concert
there was a lot of interest from churches who wanted to connect with their communities and my tribute act
seems to connect," dagdag pa ni Kelso. "When I play, the venues are packed out and I've not looked back
since." Si Kelso ay dating vicar sa Christ Church sa Matchborough, Worcestershire sa loob ng 25 taon.
Maging umano ang kaniyang mga dating kasamahan sa simbahan at ang kongregasyon ay suportado ang
kaniyang lifestyle change.
BALITANG BIDA
“Lolong” festival planong isagawa sa Agusan del Sur
BALAK ngayon ng lokal na pamahalaan ng Bunawan, Agusan del Sur na papalitan na ang kanilang taunang
Haw-an Festival ng “Lolong Festival” bilang pagtangkilik sa higanteng 21-talampakang haba na saltwater

crocodile a na nahuli kamakailan sa Agusan Marsh na kinilala na pinakamalaki sa buong mundo. Masusi
umano itong pinag-aaralan dahil 10 taon na rin nilang ipinagdiwang ang naturang okasyon. Ayon kay Mayor
Edwin Elorde, makikipag-ugnayan muna siya sa iba't-ibang sektor ng kanilang bayan para maging lehitimo
ang lahat ng hakbang na kanilang gagawin lalo na't nabuo ang Haw-an Festival sa pamamagitan ng
ipinalabas na executive order. Ngayong summer mas dumami ang tourist arrivals kung saan araw-araw ay
umaabot na sa 600 hanggang 800 mga indibidwal ang pumupunta sa kinalalagyan ni Lolong para makita
lamang ito. Nasa P2 milyon na rin ang kanilang kinita sa public viewing ng nasabing buwaya na hinati ng
apat na beses kung saan tig-25 porsyento ang dalawang mga barangay, pati na ang lugar kung saan nahuli si
Lolong at ang barangay na kinalalagyan niya ngayon. Habang tigda-25 porsyento rin ang ibinigay na budget
para sa pagkain at maintenance ng buwaya at ang nalalabing 25-porsyento ay mapupunta sa lokal na
pamahalaan ng naturang bayan.
PAUNAWA
Ang mga balita at impormasyon dito ay kinalap at iniayos ng <strong>JADRAN</strong> <strong>PISMO</strong> d.o.o – Rijeka. Kung
nais na patuloy pang makatanggap ng suskrisyon, mag-text o tumawag sa: • Tel. +63 929 669 2598
• Fax +385 51 403 189 • Email: news@jadranpismo.hr