JADRAN PISMO d - Daily Local News on Board

<strong>JADRAN</strong> <strong>PISMO</strong> d.o.o.
Information service for seafarers • Rijeka, Franje Brentinija 3
Tel. +385 51 403 188, 403 185 • Fax +385 51 403 189 • email: news@jadranpismo.hr www.micportal.com •
www.dailynewsonboard.com
KARAPATANG MAGLATHALA © 2011 – Ang maiikling ulat na ito ay nakalap mula radyo, telebisyon at pahayagan sa Pilipinas.
Sa pamamagitan nito, hinihimok ng ahensya na ipamahagi ang siping ito sa mga kababayang nagnanais na makibalita. Maliban lamang
sa mga impormasyong walang bayad, ang mga bagay na direktang kopiray ay hindi maaaring sipiin, gamitin, kopyahin o paramihin sa
kahit anong paraan ng walang lisensya o pahintulot mula sa tagapaglathala, o ipamigay, o ipadala sa mga indibidwal o mga barkong
hindi suskritor nito.
FOREX
P43.480 sa US$1 (P43.570 Martes)
ANG MGA PANGUNAHING ULAT
Filipino/Tagalog <strong>News</strong>
MIYERKULES, 29 HUNYO 2011
MAGANDANG UMAGA, PILIPINAS!
Ang mga sumusunod na balita ay nailathala sa mga
pangunahing pahayagan sa Pilipinas ngayong araw.
19 katao nasawi sa naganap na flash flood sa Davao City
UMABOT na sa 19 katao ang kumpirmadong nasawi sa naganap na flash flood sa Davao City nitong
Miyerkules ng madaling araw dahil sa biglaang malakas na buhos ng ulan. Iniulat na 15 sa mga nasawi ay
nakilala na. Limang iba pa ang patuloy na hinahanap. Sa ipinatawag na press conference ni Davao City Mayor
Sarah Duterte, pinayuhan nito ang mga residente na nakatira sa mga mababang lugar na lumikas kapag
nagkaroon muli ng pag-ulan at tumagal na ng 30 minuto. Dahil sa naturang pagbaha, 40 na bahay umano ang
nawasak, at tinatayang 15,000 katao ang apektado. Magpapatawag naman ng pulong ang Konseho ng lungsod
para isailalim sa state of calamity ang apat na barangay. Kasabay nito ang pag-apruba sa P40 milyong calamity
fund para magamit sa pagtulong sa mga biktima ng baha. Karamihan sa mga namatay ay mga bata. Napagalaman
na lumubog din sa baha ang maraming sasakyan sa siyudad. Sa ngayon ay naghahanda na ng relief
operation ang lokal na pamahalaan para sa mga biktima at may itinalaga na ring mga evacuation centers sa mga
ito. Ayon kay Duterte, umapaw umano ang Matina river dahil sa malakas na buhos ng ulan dahilan para
pumasok ang tubig sa mga kabahayan. Apat umanong barangay sa kaniyang area ang nalubog sa tubig-baha
kung saan 40 mga bahay ang totally washed-out. Napag-alaman na tumagal ng tanim na oras ang malakas na
buhos ng ulan na nagsimula bandang alas-9 kagabi, subalit "lagpas bahay" umano ang dala nitong baha. Ang
pangyayari ay labis namang ikinagulat ng maraming mga residente.
Pamahalaan hinamon ng CBCP na kasuhan ang mga taong simbahan na sangkot sa anomalya sa PCSO
HINAMON ng isang opisyal ng Catholic Bishops Conference of the Philippines (CBCP) ang pamahalaan na
kasuhan ang mga sangkot sa umano’y maanomalyang paggamit ng pondo ng Philippine Charity Sweeptakes
Office (PCSO) noong panahon ni dating pangulong Gloria Macapagal-Arroyo. Ayon kay Manila Auxiliary
Bishop Broderick Pabillo, chairman ng National Secretariat for Social Action Justice and Peace ng CBCP,
dapat pangalanan ng pamahalaan ang lahat ng tumanggap ng espesyal na pabor sa PCSO, kabilang ang mga
alagad ng Simbahang Katoliko at miyembro ng media. “Kung sinuman ang mga taong nabanggit diyan sa
katiwalian na ‘yan, including bishops ay dapat isama sa lahat ng imbestigasyon para malaman ang buong
katotohanan at kasuhan na kung dapat kasuhan," pahayag ni Pabillo sa panayam ng Radyo Veritas. Ayon sa
Obispo, ang gagawing imbestigasyon ay magagamit ding pagkakataon ng mga inaakusahan ng kasalukuyang
pamunuan ng PCSO na maipagtanggol ang kanilang sarili. “Hindi ko lang alam kung paano nakinabang ang
mga obispo diyan. Kasi ang iba ay nakakatanggap ng tulong para sa mga project sa mga mahihirap at disaster
preparedness and related assistance," paliwanag niya. “Ang iba naman ay hindi alam kung ito ay galing sa
sugal. Hindi ko lang alam kung paano nangyari ‘yan. Kaya nga isama sila sa imbestigasyon at
makapagpaliwanag na rin ang mga obispo dito," dagdag na pahayag ni Pabillo. Sa ulat nitong Martes, sinabi ni

Margie Juico, kasalukuyang pinuno ng PCSO, na namigay umano ng mga dating miyembro ng PCSO board,
ng mga sasakyan sa mga alagad ng Simbahan. Kabilang umano sa mga nabigyan ng mga sasakyan noong 2009
ay obispo sa Mindanao, pari at monsignor.
DOJ inamin na hindi na maaring makasuhan muli si Hubert Webb kaugnay ng Visconde Massacre
INAMIN ni Justice Secretary Leila de Lima na wala silang katibayan na nasa pinangyarihan ng krimen ang
grupo ni Hubert Webb nang mangyari ang Vizconde Massacre, noong June 30, 1991. Sa kabila ito ng
masusing reinvestigation at paglutang ng anim pang testigo sa Vizconde massacre case. Gayunman, sinabi ni
de Lima na sa pagsisiyasat ng NBI ay lumitaw na nasa bansa si Hubert nang patayin ang mag-iinang Estrellita,
Carmela at Jennifer sa kanilang bahay sa BF Homes, sa Parañaque City. Aminado rin si de Lima na hindi na
maaari pang kasuhan sina Hubert Webb at ang iba pang pinawalangsala ng Korte Suprema sa Vizconde
Massacre dahil sa prinsipyo ng double jeopardy. Gayunman, mayroon na aniya silang lead batay sa mga
ebidensya, upang habulin ang iba pang mga suspek kabilang ang magkapatid na sina Eduardo at Rommel
Villadolid. Nananatili pa rin aniya na nakalalaya sina Joey Filart at Artemio Ventura, kaya’t ang prescriptive
period laban sa kanila ay nasuspinde at maaari pa silang litisin.
Think tank nabahalang hahantong sa digmaan ang suliranin sa South China Sea
NAGBABALA ngayon ang isang policy think tank group ng Australia sa paghantong sa digmaan ang mga
territorial dispute na kinasasangkutan ng China. Ayon sa Lowy Institute, ang ugali ng Chinese military, yaman
at pagpipilit ng China sa pag-angkin ng mga teritoryo, ay daan ng giyera na maaari umanong masangkot ang
Amerika at iba pang world powers. "The sea lanes of Indo-Pacific Asia are becoming more crowded, contested
and vulnerable to armed strife. Naval and air forces are being strengthened amid shifting balances of economic
strategic weight," ayon sa report nina Rory Medcalf at Raoul Heinrichs. Ang tensyon ng China sa US, Japan at
India ay posible umanong lumala at maaaring magkaroon ng diplomatic crisis o giyera. Inihayag nina Medcalf
at Heinrichs na dahil sa mga maritime patrol ng China sa mga pinag-aagawang teritoryo, mahirap nang
mapagkasundo ang mga bansang may pinag-aagawang teritoryo. Dahil dito, naging danger zone na umano ang
Asya. "All of these factors are making Asia a danger zone for incidents at sea: close-range encounters
involving vessels and aircraft from competing powers, typically in sensitive or contested zones," dagdag pa ng
report. Dapat umanong magkaroon na ng panibagong effort para mapanatag ang mga bansa sa banta ng China
at dapat na ang Beijing ay palaging sumali sa mga military dialogue kasama ang Estados Unidos at Japan.
Output ng mga pabrika bumagsak
NAGPATULOY sa pagbagsak ang factory output ng Pilipinas. Batay sa April report ng National Statistics
Office (NSO) nagkaroon lamang ng 2.6% na paglago sa tinatawag na volume of production index (VOPI); mas
mababa ito sa 9.7% na naitala noong Marso. Sa taya ng NSO, ito ang pinakamababang paglago ng nasabing
industriya buhat noong Oktubre ng taong 2009 kung saan naitala ang 5% growth rate. Iniuugnay sa mababang
growth rate ang mahinang produksyon sa sumusunod na pangunahing sektor na kinabibilangan ng leather
products, transport equipment, furniture, chemical products at fabricated metal products. Samantala, mula sa
libu-libong factory sa bansa 17.8% lamang sa mga ito ay nag-operate ng “full capacity.”
Mga kongresista walang balak umurong sa panukala sa diborsyo
WALANG plano ang ilang kongresista na i-urong ang laban sa Divorce Bill. Ayon kina Gabriela Partylist
Representatives Emmi de Jesus at Luz Ilagan, ito lamang kasi ang natatanging pag-asa ng mga mahihirap na
mag-asawang naghiwalay na. Binigyang diin pa ng mga ito na walang dahilan para i-atras ang kanilang House
Bill 1799 o Divorce Filipino Style dahil marami naman ang sumusuporta dito. Sa ngayon anila ay tanging ang
mga may pera lang ang nakakatakas dahil may kakayahan ang mga ito na magbayad para sa kanilang
annulment. Kasabay nito ay nanawagan naman si Ilagan sa mga Anti-Divorce Group na unawain ang mga
mahihirap na napagkakaitan ng lipunan ng kaligayahan.
Visayas hindi na kakapusin ng kuryente---Aquino
HINDI na umano kukulangin sa supply ng koryente ang Visayas. Ginawa ni Pangulong Aquino III ang
pahayag kasabay ng inagurasyon sa 200-megawatt power plant ng Korea Electric Power Corporation (KEPCO)
sa Naga City, Cebu. Ayon sa Pangulo, ang KEPCO ay inaasahang tutugon sa kakulangan sa supply ng
koryente sa Cebu, Panay Island at ibang bahagi ng Visayas region. Tutustusan umano ng KEPCO ang Visayas
grid na kamakailan lang ay naharap sa power crisis. Mahalaga umano ito para hindi maantala ang takbo ng
mga negosyo tulad ng pamosong Cebu lechon at ang pagsasagawa sa mga sikat na festivities na gagamitan ng
koryente. Ipinagmamalaki naman ng korporasyon ang pagiging environment-friendly nito dahil sa mga

makabagong teknolohiya para makontrol ang polusyon. May itinayo pang water treatment para gumamit ng
tubig-dagat imbes na fresh water sa kanilang operasyon.
Dept of Agriculture binalaan ang mga negosyante ng manok laban sa pagsasamantala
NAGBABALA kahapon ang Department of Agriculture (DA) na mapipilitan itong umangkat ng mga manok
sakaling magpatuloy ang pananamantala ng mga negosyante na pasiritin ang presyo ng naturang bilihin. Ayon
kay Agriculture Secretary Proceso Alcala, hindi nila nagugustuhan ang ginagawang diskarte ng mga supplier
ng manok na maituturing na pananamantala sa taumbayan. Tablado para kay Alcala ang paliwanag ng mga
negosyante na tumaas kasi ang demand ng manok dahil sa insidente ng fishkill sa Batangas at magkasunod na
pagbayo ng bagyong “Egay” at “Falcon” sa bansa. “Hindi ito pwedeng ikatwiran. Hindi naman apektado ng
malaking porsyento ang supply ng bangus at tilapia dahil sa fishkill sa Taal Lake. In fact, balik agad sa normal
ang operation ng mga fish cages. Tapos sinasabi pa nila dahil sa bagyo, wala namang malaking epekto si
“Egay” at si “Falcon” sa palaisdaan at gulayan natin. I want deeper investigation on this. Hindi pwedeng gawin
nila ito kung kelan nila gustuhin,” giit ng kalihim. Ayon pa sa kalihim, hindi apektado ang supply ng feeds na
pinapakain sa mga manok kahit may bagyo dahil sapat ang produksyon ng mais sa bansa. Uminit ang ulo ni
Alcala nang malaman na pumalo na sa P135 hanggang P140 ang kada kilo ng manok sa pamilihan, gayong
dapat ay nakapako lamang ito sa P130/kilo.
Test webcast ng Maguindanao massacre trial isinagawa
MAGSASAGAWA ngayong araw ng test run ang Supreme Court (SC) hinggil sa planong i-daan na lamang sa
web streaming ang coverage ng kontrobersiyal na Maguindanao massacre case. Sa harap ng pag-alma ng mga
media networks sa sinasabing mahigpit na panuntunan ng Korte para sa live coverage, una ng ipinag-utos ni
SC Chief Justice Renato Corona sa Public Information Office ng Hukuman na gamitin na lamang ang live
video webcast ng paglilitis. Sa nabanggit na kautusan kasi ni Corona, maari ng ma-access ng mga viewers saan
mang panig ng mundo ang daloy ng paglilitis, sa pamamagitan ng official website ng SC, gamit ang mga
computers o mobile internet devices, gaya ng mga cellphones. Ayon naman kay SC spokesman Atty. Jose
Midas Marquez, nagdo-double time na umano ang kaniyang tanggapan para makamit ang mga technical
requirements na kakailanganin sa web streaming coverage. Kung wala umanong magiging aberya sa live
webcast, posibleng sa mga susunod na araw ay masimulan na rin ang live media coverage sa tinaguriang "trial
of the century."
Hacienda ng pamilya Arroyo matagumpay na naipamahagi
MATAGUMPAY na na-install ang 68 na mga beneficiaries ng Comprehensive Agriarian Reform Program
(CARP) ng Rivulet Agro Industrial Corp. sa Hacienda Bacan sa Brgy. Guintubhan, Isabela Negros Occidental
na pag-aari ng pamilya Arroyo. Ito ay sa kabila ng pagtutol ng pamunuan ng hacienda dahil sa umiiral na
temporary restraining order ng Korte Suprema dahil sa pending action for conversion ng 148 ektaryas na
lupain sa Department of Agrarian Reform (DAR). Ang installation ay pinangunahan ni Provincial Agrarian
Reform Officer (PARO) Felix Servidad kung saan batay umano ito sa kautusan na ipinalabas ni DAR Usec.
Narciso Nieto matapos maipamahagi na ang certificate of land ownership award (CLOA) sa mga farmers.
Tinangka pang pigilan ng tagapamahala ng hacienda ang pagpasok ng mga CARP beneficiaries ngunit
nagmatigas si Servidad at pilit na pinasok ang lugar. Ang Hda. Bacan ay pag-aari ng pamilya Arroyo lalo na ng
magkapatid na Rep. Iggy Arroyo ng Negros Occidengtal at dating First Gentleman Mike Arroyo.
BALITANG OFW/MARINO
40 “distressed” na seaman at mangingisda binigyang kasiyahan ng DFA
APATNAPUNG Pilipino na marino at mangingisda ang binigyang kasiyahan ng DFA noong nakalipas na
linggo bilang bahagi ng pagdiriwan ng National Seafarers’ Day. Ang mga Pinoy nagsagawa ng pagdiriwang sa
Pier 17 sa Honolulu, Hawaii nitong nakalipas na ika 18 ng Hunyo. "Most of these Filipinos do not have entry
visas to the United States and are constrained to remain within the vicinity of the pier, and are subjected to
strict monitoring by Immigration and Customs Enforcement (ICE) authorities," ayon sa DFA. Dagdag pa ng
ahensya, ang Philippine Consulate, kasama ang mga Filipino-owned companies sa Hawaii, ay regular na
nagdadaos ng nga aktibidad para sa mga Filipino seaman at mga trabahador upang matingnan ang living
conditions ng mga ito at para alamin kung mgangangailangan ng serbisyong konsular ang mga ito.
Mga Pinoy pinaalalahanan sa pagdadala ng bagahe para sa ng ibang tao

MULING pinaalalahanan ang lahat ng mga Pinoy na nasa United Arab Emirates (UAE) na huwag nang
tanggapin ang anumang hiling na pagpapadala ng bagahe pabalik ng bansa kahit na kapalit nito ay malaking
kabayaran. Ang panawagan ay nakaposte sa news site ng Khaleej Times, Philippine Consul General to the
UAE Benito Valeriano bahagi na rin ng panawagan ng Philippine Justice Department. Sa nasabing advisory,
inilahad ni Justice Secretary Leila de Lima ang 10 paalala para sa mga Filipino travelers at expatriates.
REHIYON
MMDA lang ang maaring manghuli ng lalabag sa batas sa paninigarilyo, hindi kabilang ang pulis
NILINAW ni National Capital Region Police Office Chief Alan Purisima na walang karapatan ang mga pulis
na manghuli ng sinumang lalabag sa Anti-Smoking Law ng Metropolitan Manila Development Authority.
Ayon kay Purisima, hindi dapat inaabuso ng mga pulis ang kanilang katungkulan. Kaugnay nito ay hinikayat
din ni Purisima ang publiko na isumbong kaagad sa mga kinauukulan kung mayroong mga pulis na
nagsasamantala habang naka-duty ang mga ito. Kasabay ng opisyal na pagsisimula ng anti-smoking campaign
simula sa Hulyo 1, maglalagay ang Metropolitan Manila Development Authority (MMDA) ng mga smoking
areas sa kahabaan ng EDSA. Sa panayam ng isang himpilan ng radyo nitong Martes, sinabi ni MMDA
chairman Francis Tolentino na ang mga smoking area ay lalagyan ng mga hinating metal drum at lalagyan ng
buhangin. "Magde-designate kami ng smoking area doon sa kahabaan ng EDSA, makakakita kayo diyan ng
smoking area. Ang hitsura nito ay yung nilagareng drum na may laman, yung hinati po. May buhangin sa loob
at yan ang magsisilbing ashtray, parang ashtray. So doon pwede manigarilyo kahit na sa bangketa ‘yan basta
nakakita ng ganoon," paliwanag ni Tolentino sa panayam ng dzRH radio.
Buwaya na nakapatay ng mangingisda, nahuli na
NAHULI na ang buwaya na pinaghihinalaang nakapatay sa isang mangingisda sa So. Marabajay, Rio-Tuba,
Bataraza, Palawan na nakilalang si Edwin Lucero, 36 taong gulang at residente ng nasabing lugar noong
nakaraang linggo. Ang nasabing buwaya ay isang crocodylus porosus na may sukat na walong talampakan ang
haba. Nahuli ito ng pinagsanib na puwersa ng mga tauhan mula sa Palawan Council for Sustainable
Development, Department of Environment and Natural Resource (DENR) at ng Palawan Wildlife Refuge and
Recue Center noong araw ng Sabado (Hunyo 25). Isasagawa sa nasabing buwaya ang tinatawag na gastric
lavage o ang pagpapasuka dito upang alamin at matiyak kung ito nga ba ang buwayang nakapatay sa nasabing
mangingisda. Sa kasalukuyan nasa pangangalaga na ng PWRCC sa lungsod ng Puerto Princesa ang nasabing
hayop, at patuloy pa rin ang pagmamanman ng grupo sa nasabing lugar sa Bataraza, dahilan sa may mga nakita
pa umanong ibang buwaya sa dito. Nabawasan naman ang pagkatakot ng mga residente ng So. Marabajay sa
pagkahuli ng nasabing buwaya, ngunit patuloy pa rin ang kanilang pag-iingat dahil sa marami pa umanong
buwaya na naglipana sa nasabing lugar.
Pamilya ng dinukot na Indian nanawagan
UMAPELA ang pamilya ng dinukot na Indian national sa lalawigan ng Sulu at humihingi ng tulong ang mga
ito upang matunton ang dayuhan at mabatid ang kinahinatnan nito. Hinila ng apat na armado si Biju Kolara
Veetil, 36, habang bumibisita sa pamilya ng asawa nitong Pinay na si Elena Asanji sa bayan ng Patikul nitong
Hunyo 23. “My wife and I are suffering from ill health. From the moment we learnt the news, we have plunged
into despair and grief. There is no way he can be contacted. During such dire times, we plead to you for
assistance,” ani pa ng ama ng biktima na si Narayanan K., na dating opisyal ng Indian army, sa liham na
ibinigay nito sa media. Nabatid na si Biju ay operations manager ng Kuwait Bronze Al-Tawooz Company,
ayon sa ulat naman ng Kuwait Times na nakatanggap din ng apela ng ama ni Biju. Nagbabakasyon lamang ang
mag-asawa nang dukutin si Biju. Ayon sa pulisya, nakilala na umano ang mga taong nasa likod ng pagdukot
kay Biju
Abu Sayyaf patay sa engwentro sa Basilan
BULAGTA ang isang miyembro ng Abu Sayyaf Group (ASG) habang nakatakas namang sugatan ang limang
iba pa nang makasagupa ng mga ito ang tropa ng Special Forces ng Army kahapon ng umaga sa Barangay
Bulan-Bulan, Lantawan, Basilan. Ayon kay Maj. Harold Cabunoc, deputy public affairs ng Army, nangyari
ang sagupaan dakong alas-5:30 ng umaga na nagtagal ng halos l5-minuto. Sa iba pang ulat, umaabot na
lamang sa 50 ang natitirang miyembro ng Abu Sayyaf Group na kumikilos sa Basilan makaraang maigupo ang
10 miyembro nito ngayong taon, ayon kay Col. Antonio Parlade, tagapagsalita ng Philippine Army. “Sa ating
estimasyon nasa 50 na lamang sila na naghiwa-hiwalay sa maliliit na grupo para makaiwas sa pinaigting na
pagtugis ng ating mag sundalo mula sa Special Operations Command,” ani Parlade. Sa kasalukuyan, mahigit

2,000 na sundalo mula sa Special Forces, Scout Rangers at Infantry ang naka-deploy ngayon sa nasabing
lalawigan upang wakasan ang terorismong dulot ng ASG gaya ng pambobomba at pagdukot ng simpleng
sibilyan man o personalidad para sa ransom.
Mag-ina patay matapos malason ng buteteng laot
SEMENTERYO ang kinahantungan ng mag-ina makaraang malason sa kinaing isdang butete sa kanilang
almusal sa Barangay Daan Lungsod sa bayan ng Medellion, Cebu noong Linggo ng umaga. Namatay habang
namimilipit sa matinding pananakit ng tiyan sina Remedios Apas at ang 30-anyos nitong anak na lalaki na si
Lenito. Nakaligtas naman ang dalawa sa apat na anak ni Lenito dahil tumikim lamang ang mga ito ng isdang
butete na hindi nila naibigan ang lasa subalit dumanas din ng pananakit ang tiyan na agad namang nabigyan ng
first aid. Lumilitaw na inutusan si Lenito ng kanyang utol na babae para manghuli ng butete sa Barangay
Paypay. Nakahuli naman si Lenito at iniuwi para sa almusal ng kanyang ina at apat na anak. Gayon pa man,
ilang oras matapos mag-almusal ay nakaramdam ang mag-ina ng sobrang pananakit ng tiyan at ulo, pagsusuka
saka matinding pagkahilo kaya mabilis na isinugod sa ospital. Nagbabala naman sa publiko ang Bureau of
Fisheries and Aquatic Resources (BFAR) na ang butete ay nagtataglay ng tetrodotoxin kung saan mas
mabagsik pa sa cyanide base na rin sa pag-aaral ng United States. Sa tala, ang butete (puffer fish) ay sinasabing
ikalawang most poisonous vertebrate sa buong mundo kung saan nangunguna ang Golden Poison Frog.
Minero patay matapos masulasok sa loob ng minahan
KAMATAYAN ang sumalubong sa dalawang minero matapos makalanghap ng nakalalasong gas sa loob ng
minahan sa Sitio Maca-ag, Gold Greek sa Brgy. Ucab, Itogon, Benguet noong Lunes ng umaga. Kinilala ni
P/Senior Supt. Benjamin Macli-ing Lusad ang mga namatay na sina Mario Puguon, 28; at Ronald Cayabas, 27,
kapwa tubong Sagada, Mt. Province. Lumilitaw na pumasok sa tunnel ang mga minero kahit umaalingasaw
ang tila nabubulok na gulay sa bukana pa lamang na lingid sa kaalaman ng mga biktima ay nakakalalasong gas.
Makalipas ang isang oras ay sinundan ng dalawang minero ang kanilang kasamahan pero nakaramdam ang
mga ito ng pagkahilo kaya nagmamadaling lumabas sa minahan at ipinagbigay-alam sa mga opisyal ng
barangay.
Umano’y illegal recruiter patay sa pananambang
PAGHIHIGANTI ang nakikitang motibo sa pamamaril at pagpatay sa isang 29- anyos na umano’y illegal
recruiter kahapon ng tanghali sa Tondo, Maynila. Dead-on-the-spot ang biktimang si Yonie Atanosa, ng
Mayhaligue St., Tondo, sanhi ng tama ng bala sa ulo. Inaalam naman ang pagkakakilanlan sa mga suspect na
tumakas matapos ang insidente. Sa report ni Det. Gerry Rivera ng Manila Police District (MPD)-Homicide
Section, dakong alas-12:00 ng tanghali nang maganap ang insidente sa harap ng Eliesol Store sa Masangkay
St., Tondo, Manila. Nauna rito, nakita ang biktima kasama ang misis nito na may kausap sa loob ng isang
fastfood chain. Makalipas nito, lumabas ang mag-asawa at habang papatawid na ang mga ito sa kabilang
kalsada nang lapitan ng mga suspect at walang sabi-sabing binaril sa ulo. Hinala ng pulisya na isa umano ang
suspect sa mga na-biktima ng nasawi na nagre-recruit ng mga seaman at pinapangakuan nito na makakasakay.
Inaalam din ng pulisya kung galing ang mga suspect sa probinsiya dahil sa mga dalang bag na naiwan sa
likurang bahagi ng fastfood chain kung saan nakuha ang ilang dokumento sa pag-a-apply ng seaman.
IBAYONG DAGAT
Pinoy na iligal migrant na nanalo ng Pulitzer Prize pinatawag ng US Senate
IMBITADO umano sa US Senate hearing kaugnay sa panukalang Dream Act ang award-winning Filipino
journalist na si Jose Antonio Vargas na umaming undocumented ng halos dalawang dekada sa US?Ang Dream
Act na nakahain sa US Senate ay panukalang magpapahintulot sa mga undocumented students sa US na
maging legal ang pananatili sa nasabing bansa sa sandaling makapagtapos ng pag-aaral o magsilbi sa US
military. Sa isang ulat ng television network, wala umanong katiyakang ibinigay si Vargas kung sisipot para
tumayong testigo sa Senate Judiciary Committee hearing kaugnay sa nasabing panukala.
Radiation meters ipinamahagi sa mga bata sa Japan
IPINAMIGAY ang 34, 000 radiation meters sa mga batang may edad 4-15 na naninirahan malapit sa
Fukushima Dai-Ichi Nuclear Plant. Ang nasabing pamimigay ng device ay para masiguro ang kalusugan ng
mga bata na maaring maapektuhan ng nuclear crisis sa nasabing lugar. Tinatawag ang nasabing device ito ay
tinatawag na dosimeters. Ayon sa opisyal ng nasabing lugar na si Koichi Kato ang mga supply dosimeters ay
unang ipinadala sa mga paaralan na posibleng naapektuhan din ng nucelear radiation. Matatandaang, kahit sa

Pilipinas ay nagkaroon din ng nuclear radiation scare matapos hagupitin ng tsunami ang Japan dahilan para
masira ang mga nuclear power plants doon.
12 patay sa pagsalakay ng mga suicide bombers sa isang hotel sa Afghanistan
NATAPOS na ang apat na oras na bakbakan sa Inter-Continental hotel sa Kabul, Afghanistan na nilusob ng
mga suicide bombers. Binomba ng NATO helicopters ang mga suspek na nasa rooftop ng naturang hotel. May
12 inisyal na napaulat na patay sa insidente habang anim ang pumasok na mga suicide bombers sa hotel ayon
kay Afghan Interior Ministry Spokesman Sediq Sediqqi. Dalawa sa mga suspek na ito ay napatay ng security
guards habang ang apat ay napatay sa airstrike at pinasabog ang kanilang sarili. Sa inisyal na mga report aniya,
anim na mga sibilyan ang napatay at isang miyembro ng Afghan security forces. Inako ng militanteng Taliban
ang responsibilidad sa naturang pang-aatake. Ang mga suicide bombers ay armado umano ng machine guns,
anti-aircraft weapons, rocket-propelled granades, hand grenades at grenade launchers. Mayroong 60 hanggang
70 mga guests sa hotel nang mangyari ang insidente kabilang na ang ilang mga gobernador sa Afghanistan.
Apat na malalakas na pagsabog ang yumanig sa hotel at ang ibang bahagi ng hotel ay nasunog. Dito nagbigay
ng reinforcement ang NATO at naglunsad ng airstrike sa rooftop ng hotel kung saan tatlong militante ang
napatay.
12 missiles pinakawalan ng Iran bilang bahagi ng pagsasanay
NAGPAKAWALA ng 14 na mga missiles ang Iran Revolutionary Guard sa ikadalawang araw ng kanilang war
games exercises. Ang naturang war exercises ay bilang pagpapakita ng Iran ng puwersa sa Israel at Amerika.
Ayon sa official news agency ng Tehran, sa isang target lang pinakawalan ang nasabing mga surface-to-surface
missiles na gawa mismo ng Iran at kayang umabot ng 2,000 kilometro. Kasabay nito ay binigyang diin ni
Revolutionary Guard aerospace division commander Amir Ali Hajizadeh ang kahandaan ng Iran laban sa Israel
at US na itinuturing nitong numero unong kaaway. Ang kanilang missiles ay idinesenyo umano na makaabot sa
military bases ng Estados Unidos at Israel sa rehiyon. "The range of our missiles has been designed based on
American bases in the region as well as the Zionist regime," ani Hajizadeh. Muli namang pinaalalahanan ng
Amerika ang Iran kaugnay sa sanction ng United Nations na nagbabawal dito sa anumang aktibidad may
kaugnayan sa ballistic missiles. Una nang sinabi ng Amerika na hindi nila tinatanggal sa kanilang mga opsyon
ang paggiyera sa Iran sakaling hindi umubra ang diplomatic action upang tigilan na ng Tehran ang nuclear
program nito.
15 nasawi matapos tamaan ng kidlat sa Uganda
UMAABOT sa 15 ang patay sa loob ng isang linggo, dahil sa kidlat sa Sri Lanka. Ayon sa pulisya, bukod sa
mga namatay, 47 pa ang sugatan sa kidlat. Ang pinakahuling kidlat ay siyang sanhi ng pagkamatay ng tatlong
bata na naglalaro ng soccer. Nasira rin ang transmitters ng tatlong radio station.
Unggoy ipapadala ng Iran sa kalawakan
PLANO ngayon ng Iran na magpadala ng mga buhay na unggoy sa outer space sa darating na buwan ng Hulyo.
Bahagi pa rin ito ng missile at space program ng Iran na ikinaalarma ng buong mundo sa paniniwalang
gumagawa ng nuclear weapons ang Tehran. Ayon sa Iran Space Agency, limang unggoy ang kanilang
ipapadala sa kalawakan. Isinailalim daw muna sa tests ang naturang mga unggoy bago isakay sa Kavoshgar-5
rocket. Noong nakaraang buwan lang ay inilunsad ng Iran ang Rasad 1 satellite nito. Una nang sinabi ni Iranian
President Mahmoud Ahmadinejad na plano nilang magpadala ng tao sa outer space sa 2017.
Mga upisyal pinawi ang pangamba sa plantang nukleyar na binaha sa Nebraska
TINIYAK ngayon ng U.S. Nuclear Regulatory Commission (NRC) na walang dapat ipangamba ang kanilang
mamamayan hinggil sa sitwasyon ng dalawa planta roon bunsod ng pagbaha sa estado ng Nebraska. Ayon kay
NRC Chairman Gregory Jaczko, ligtas ang Fort Calhoun nuclear power plant at Cooper nuclear power plant
kahit pa halos pasukin iyon ng tubig baha. "NRC engineers don't believe the plant is posing an immediate
threat to the health and safety of the public at Fort Calhoun," pahayag ni Jaczko. Taglay daw ng Fort Calhoun
ang "protective berm" na pumipigil sa pagpasok ng baha kahit pa malapit ito sa Missouri River. Sa ngayon ay
nananatiling safe mode ang mga nabanggit na planta sa kabila ng pagdeklara sa mga ito na nasa state of
emergency kamakailan. Maging ang mga reactors ng planta ay hindi rin daw apektado ng nangyaring pagbaha.
PALAKASAN
Pacquiao mas madaling matatalo ni Marquez

HIGIT na madali nang matatalo ni Juan Manuel Marquez ngayon ang pound-for-pound king at eight-division
champion na si Manny Pacquiao. Ito ang paniniwala ni Mexican Hall of Fame trainer Ignacio “Nacho”
Beristain sa pagsalang ng kanyang alaga kontra Pambansang Kamao sa trilogy ng kanilang epikong labanan sa
lona sa MGM Grand sa Las Vegas, Nevada sa Nobyembre 12. Kahit pa tumaas na ang antas ng Fighting
Congressman matapos ang huli nilang bangasan ni Marquez noong 2008 kung saan naagaw ng Pinoy ang super
featherweight belt ng Mehikano, ipinagyabang ni Beristain na mismong ang improvement na ito ng
Pambansang Kamao ang magpapabagsak dito. “Freddie Roach is an excellent trainer,” ani Beristain.
“Pacquiao’s improvements from a technical perspective have been incredible. But, with Pacquiao being a more
refined fighter, and jumping in and out less - Marquez will be able to handle the Filipino’s offense even
better.” Sinabi pa nito na kung tutuusin sa unang dalawang Marquez-Pacquiao fight ay kitang-kita na ang
Mehikano ang nanalo kahit pa nakasulat sa kasaysayan na ang 2004 bout ay nauwi sa tabla at pabor naman ang
split decision sa Pambansang Kamao ang rematch matapos ang apat na taon. “We fought 24 hard rounds with a
man who has been made into a mythical figure,” banat pa nito. “After both fights, I feel my fighter beat
Pacquiao, but the politics of boxing took over.” At kung minani lang ni Pacquiao ang kanyang ibang
nakalaban, si Marquez na aniya ang boxer na hindi nito kayang tibagin. Ang abilidad ni Marquez na unahan ng
counter-punch si Pacquiao sabi pa ng trainer ang magiging susi sa tagumpay ng Mexican at tatapos sa winning
streak ni Pacquiao.
Patrombon nabigo sa Wimbledon Jrs.
BIGO ang Pinoy na si Jeson Patrombon na maka-usad sa next round ng Wimbledon Junior's division. Natalo si
Patrombon sa kamay ng Belgian tennis player na si Kimmer Coppejans sa second round ng Wimbledon sa
iskor na 7-6, 6-1. Pero sa kabila ng pagkatalo ng Iligan native na si Patrombon, may laro pa rin ito sa doubles.
Lalaban ito sa Junior doubles kung saan makakapareha nito si Jaden Grinter ng New Zealand at makakaharap
nila ang Australian duo na sina Ben Wagland at Andrew Whittington.
Pacquiao payag sumailalim sa blood test sa araw ng laban kung makakaharap si Mayweather Jr.
IKINOKONSIDERA na ni pound-for-pound king Manny Pacquiao ang pagpayag sa random blood testing
hanggang sa mismong araw ng laban sa oras na matuloy ang negosasyon para makaharap si Floyd
Mayweather, Jr. Ayon sa mga source, napipikon na ang kampo ni Manny at maging ang pamilya ng
Pambansang Kamao sa mga paratang na gumagamit siya sa steroids kaya nais na nitong pagbigyan si
Mayweather. Sa ganitong paraan umano, ayon sa mga source, ay matatahimik na ang bunganga ng itim na
boksingero at wala na itong dahilan pa para umatras pa kay Pacman. “Why do I think he should agree? Well
it’s not because I think the man is doing steroids, because I don’t. I think Manny is clean, and he earned his
victories fair and square. So why should Manny have to take the blood test?” ayon sa isang sports analyst.
“Taking the random blood test up until the day of the fight will do a few things. Firstly, it forces Floyd’s hand.
If Manny agrees to take random blood tests up until the day of the fight, Floyd will be forced into a corner.
Floyd will either have to agree to fight Manny, or he will choose to not fight. If Pacquiao agrees to the random
blood testing up until the day of the fight, Floyd has no more cards to play.” Hindi pa isinasapubliko ng kampo
ang ganitong pagpayag ngunit hindi umano malayong pagbigyan na lang nito si Floyd dahil sa sobrang ingay
nito..
Arum naniniwalang si Jones ang maghahari sa welterweight division
Kumpara kina Victor Ortiz at Andre Berto, mas naniniwala si Bob Arum ng Top Rank Promotions na si Mike
Jones ang magiging kampeon sa welterweight divison. “Mike Jones is a Philadelphia fighter and he knows how
to fight. He has a great, great technical skills, takes a very good punch and he punches well,” sabi ng 79-anyos
na si Arum sa 28-anyos na si Jones, may 25-0-0 win-loss-draw ring record kasama ang 19 KOs matapos talunin
si Raul Munoz (21-14-1, 16 KOs) via second-round KO sa South Philly Arena sa Philadelphia noong
nakaraang Linggo. Si Jones ang naunang inihayag ni Arum na makakalaban ng Filipino world eight-division
champion na s1 Pacquiao sa susunod na taon matapos si Juan Manuel Marquez sa Nobyembre 12. “Well, his
performance was spectacular. I think he's the best of the young welterweights out there,” ani Arum sa
pagpapatulog ni Jones kay Munoz. “I think that he's better and that I would pick him over Andre Berto and
Victor Ortiz or any of the young welterweights.” Plano ni Arum na isama si Jones sa undercard ng pangatlong
paghaharap nina Pacquiao at Marquez sa Nobyembre 12 sa MGM Grand sa Las Vegas, Nevada. Bago ito,
lalaban muna ng 28-anyos na si Jones, nasa Top 5 sa listahan ng WBO, WBC, WBA at IBF welterwight
division sa Setyembre, ayon kay Bob Arum ng Top Rank.
Rain or Shine sasamantalahin ang apat na araw na bakasyon sa Dubai

HABANG nasa Dubai, United Arab Emirates ang Talk ‘N Text, Barangay Ginebra at B-Meg Derby Ace ay
sasamantalahin ng Rain or Shine ang kanilang siyam na araw na bakasyon. “Going to a nine-day break, this is a
good way to go to vacation. It gives you a good feeling to recharge and recover and prepare for the next
game,” ani head coach Yeng Guiao sa kanyang Elasto Painters, umiskor ng malaking 113-83 paglampaso sa
Petron Blaze sa elimination round ng 2011 PBA Governors Cup noong Hunyo 24. Kasalukuyang dala ng Rain
or Shine ang 3-1 baraha sa ilalim ng Talk ‘N Text (3-0) at Barangay Ginebra (2-1) kasunod ang B-Meg (2-2),
Petron Blaze (2-2), Alaska (2-2), Powerade (1-3) at Air21 (0-4). Ikinatuwa ni Guiao ang pagsosolo ng kanyang
Elasto Painters sa ikalawang puwesto. “We are in a good position right now and we are right on track,” sabi ni
Guiao. “We are trying to get to the semis. I think this is the best way to do it. I think to be sure you need five
wins.” Susunod na makakatapat ng Rain or Shine ay ang Powerade sa Hulyo 3 sa alas-6:15 ng gabi sa Araneta
Coliseum. Matapos ang Llamados bukas ng alas-7 ng gabi, makakaharap naman ng Tropang Texters ang Gin
Kings sa Hulyo 1 para sa kanilang dalawang sunod na laban sa Dubai. Inaasahang ipaparada ng B-Meg ang
bagong hugot na si Darnel Hinson bilang kapalit ni 5-foot-11 import Stefon Hannah, umiskor ng 23 points sa
104-92 paggupo sa Meralco noong nakaraang Linggo, laban kay Maurice Baker ng Talk ‘N Text.
SHOWBIZ
Bianca King nasanay nang hindi naglalagay ng make-up
MULA nang maging bida siya sa Sinner or Saint, nasanay na si Bianca King na huwag maglagay ng makeup
dahil isang mahirap na babae ang papel na kanyang ginagampanan. Ayon kay Bianca, malaki ang naitulong ng
hindi niya paglalagay ng makeup sa mukha dahil lumambot ang kanyang aura. Napatunayan din ni Bianca sa
mga tao na mali ang kanilang akala na suplada siya at mahirap lapitan. Malaki ang pasasalamat ni Bianca sa
GMA 7 dahil sa tiwala na ibinigay sa kanya. Pitong taon ang ipinaghintay niya bago natupad ang pangarap na
maging bida sa isang teleserye.
Anak ng namayapang si Jo Ramos binigyang laya ng ama na magdesisyon kung kanino titira
BIBIGYAN daw ng kalayaan ng aktor na si Lloyd Samartino ang kanyang 17-anyos na anak sa pumanaw na si
Josephine "Jo" Ramos, na magdesisyon kung kanino nito nais tumira ngayong wala na ang ina. Sa naging
panayam, sinabi ni Samartino na nag-aalala siya para sa nag-iisa nilang anak ni Jo na si Sergio. Lumaki si
Sergio sa kanyang ina mula nang magkahiwalay ang kanyang mga magulang. "I was very very sad for my son
because Jo and I have been apart for quite a long time already and my son grew up practically with her and this
happened very prematurely," pahayag ng aktor. Ayon sa ulat, hahayaan umano ng aktor ang anak na
magdesisyon kung nais nitong tumira sa pamilya ng kanya ina, o sumama sa kanya. Dumalaw si Samartino
nitong Lunes ng gabi sa burol ni Jo, anak ni dating pangulong Fidel Ramos. Si Jo ay pumanaw nitong Lunes ng
umaga dahil sa sakit na lung cancer.
Janice de Belen balik ABS-CBN
MAGBABALIK Kapamilya ang aktres na si Janice de Belen sa bago nitong teleserye na “Budoy”. Ayon sa
aktres ay masayang-masaya siya at excited din sa gagawing proyekto sa Kapamilya network. Dagdag pa nito
umaasa siya na makapagtrabaho hindi lamang sa teleserye bagkus ay maging parte muli ng nasabing network.
Pero nang matanong ang beteranang aktres tungkol sa kanyang ex-hubby na isang solid Kapamilya star na si
John Estrada, sinabi lang na aktres na nasa trabaho sila at yun lang ang dapat nilang atupagin.
Charice napiling umawit ng theme song ng isang Japanese TV show
SIKAT na sikat nga si Charice sa Japan kaya nga siya ang pinili ng mga Japanese producers na umawit ng
theme song ng bagong Japanese TV show titled Bull Doctor. Isang mystery/crime drama ang Bull Doctor na
magtatampok sa dalawang sikat na Japanese actresses na sina Esumi Makiko at Ishihara Satomi. Gaganap sila
bilang mga forensic scientist at police detective. Base nga ang mga istorya ng Bull Doctor sa iba’t ibang real
life stories sa Japan. Ni-record nga ni Charice ang theme song ng naturang TV show na may titulong Far As
The Sky. Tuwang-tuwa nga ang producer ng Bull Doctor na si Kayuza Toda dahil sa magandang rendition ni
Charice ng theme song. Heto ang kanyang sinabi hango sa Warner Japan’s official website: “It was shocking
when I first heard Charice’s songs. I was so fascinated by her voice which is so stretching and powerful, and
the experience got me reaching out to her and asking for a song. “I have this strong confidence and conviction
in my heart that the message of humanism this drama will give, and the emotions that Charice will bring to this
drama, will make a fantastic collaboration.” Hindi nga nagdalawang-isip si Charice na i-record ang Far As The
Sky dahil maganda raw ang mga lyrics nito at maganda ang mensaheng pinapaabot sa lahat.

Andi Eigenmann napabalitang buntis
USAP-USAPAN ngayon ang pagbubuntis diumano ng aktres na si Andi Eigenmann. Sa mga online reports,
sinasabing buntis anga anak ni Jaclyn Jose ngunit hindi pa nagsasalita ang kampo ng aktres. Noong nakaraang
linggo pa nagsimula ang mga haka-haka sa pamamagitan ng isang blind item. Sa ngayon ay nauugnay si Andi
sa anak ni dating Pangulong Joseph Estrada na si Jake Ejercito at Laarni Enriquez.
Lady Gaga itinangging ibinulsa ang bahagi ng kinita ng fund raising para sa biktima ng tsumami
UMALMA ngayon ang kampo ng pop singer na si Lady Gaga sa kinakaharap nitong kaso kaugnay sa pagbenta
ng tig-$5 na bracelet bilang bahagi ng fundraising para sa mga biktima ng lindol at tsunami sa Japan. Sa
statement na inilabas ng mga tagapagsalita ng singer, tinawag ng mga ito na "misguided" at walang merito ang
kaso. Dahil sa kaso, nababalewala umano ang magandang ginawa ng mga fans ni Lady Gaga para makatulong
sa Japan. Napag-alaman na sa kasong isinampa ng isang legal network sa Michigan, hindi raw lahat na kinita sa
pagbenta ng "We Pray for Japan" bracelet ay napunta sa Japan. Pinatungan din umano ang bayad sa pagpapaship
ng mga bracelet. Ngunit ayon sa kampo ng singer, paanong ibubulsa ito ni Lady Gaga gayong siya mismo
ay nag-donate ng sarili nitong pera para sa mga biktima ng kalamidad sa Japan.
BALITANG KAKAIBA
Babae sa South Korea na nahumaling sa paglalagay ng make-up nagdesisyon na tigilan na ang bisyo
SA pamamagitan ng tulong ng media at pananakot na mapanatilili ang natural na kagandahan, isang 20-anyos
na babae na South Korean ang pumayag na ikaksi ang nakaugalian na nitong paglalagay ng make-up. Ito ay
matapos ang dalawang taon niyang ipunin ito sa kanyang pagmumuka. Ayon kay Bae Dal-Mi nagsimula
siyang ma-enganyong gumamit ng make-up noong 14-anyos pa lamang siya at dito na nagumpisa ang malalove
at first brush niya rito. Kaya naman naalarma na ang nanay ng dalaga at isinangguni na sa isang TV
station na agad namang umaksyon at kinumbinsi ito na tanggalin na ang patung patong na make-up sa mukha
nito. Samantala nadiskubre naman ng mga dermatologist na tumanda ng dalawang beses ang mukha ni Bae
Dal-Mi dahil sa kanyang kakaibang trip.
PAUNAWA
Ang mga balita at impormasyon dito ay kinalap at iniayos ng <strong>JADRAN</strong> <strong>PISMO</strong> d.o.o – Rijeka. Kung nais na
patuloy pang makatanggap ng suskrisyon, mag-text o tumawag sa: • Tel. +63 929 669 2598 • Fax +385 51 403
189 • Email: news@jadranpismo.hr