Urdhëresë administrative nr. 2005/10 - Unmik

UNITED NATIONS
United Nations Interim
Administration Mission
in Kosovo
UNMIK
NATIONS UNIES
Mission d’Administration
Intérimaire des Nations Unies
au Kosovo
URDHËRESË ADMINISTRATIVE NR. 2005/10
UNMIK/AD/2005/10
15 korrik 2005
PËR ZBATIMIN E RREGULLORES SË UNMIK-UT NR. 2001/19 MBI DEGËN
EKZEKUTIVE TË INSTITUCIONEVE TË PËRKOHSHME VETËQEVERISËSE
NË KOSOVË
Përfaqësuesi Special i Sekretarit të Përgjithshëm,
Në pajtim me autorizimin që i është dhënë me nenin 8 të Rregullores së ndryshuar të
Misionit të Administratës së Përkohshëm të Kombeve të Bashkuara në Kosovë (UNMIK)
nr. 2001/19 të datës 13 shtator 2001 mbi Degën Ekzekutive të Institucioneve të
Përkohshme Vetëqeverisëse në Kosovë,
Duke marrë parasysh nenet 3 dhe 5 të Rregullores së ndryshuar të UNMIK-ut nr.
2001/19.
Në pajtim me Kornizën Kushtetuese për Vetëqeverisje të Përkohshme në Kosovë
(Rregullorja e UNMIK-ut nr. 2001/19 e datës 15 maj 2001),
Duke vepruar sipas kërkesës së Qeverisë dhe duke u bazuar në propozimin e miratuar nga
Kryeministri dhe ministri i Tregtisë dhe i Industrisë,
Me qëllim të krijimit të Agjencisë për përkrahjen e investimeve për t’u ndihmuar dhe
përkrahur investimet në Kosovë dhe për t’u përmirësuar mjedisi për investime në
Kosovë,
Me anë të kësaj shpall këtë Urdhëresë administrative:
Neni 1
Agjencia për përkrahjen e investimeve
1.1 Agjencia për përkrahjen e investimeve (më tej “Agjencia”) nëpërmjet kësaj
themelohet si agjenci ekzekutive në kuadër të Ministrisë së Tregtisë dhe Industrisë.

1.2 Statuti i Agjencisë përgatitet nga kryeshefi i saj ekzekutiv në konsultim me
Bordin këshilldhënës për përkrahjen e investimeve. Statutin e Agjencisë e miraton
Ministria e Tregtisë dhe e Industrisë.
1.3 Agjencia e ka selinë në Prishtinë.
Agjencia:
Neni 2
Funksionet
(a) krijon dhe bën rekomandime lidhur me linjën e veprimit dhe propozon
legjislacionin me qëllim të krijimit të një mjedisi të favorshëm për investime
në Kosovë:
(b) ndërmerr veprime në mënyrë që Kosova të perceptohet si një vend tërheqës
për investime nëpërmjet, reklamimit të planifikuar dhe, në mes tjerash,
organizimit të ngjarjeve për marrëdhënie me publikun, si ekspozitat, forumet
dhe seminaret e investitorëve dhe nëpërmjet ofrimit të informatave mediave
publike dhe bashkëpunimit me to;
(c) mbështet nismat që mëtojnë ta përmirësojnë cilësinë e mjedisit për investime
nëpërmjet, kryerjes së studimeve të tregut, studimeve të realizueshmërisë dhe,
në mes tjerash, të hulumtimit e të pjesëmarrjes në grupet punuese dhe njësitë
qeveritare e joqeveritare;
(d) ju ofron investitorëve informata dhe shërbime këshilliuese me qëllim të
lehtësimit të vendimeve për investime, të krijimit të bizneseve dhe vendosjes
së kontakteve afariste;
(e) ndërmerr aktivitete për përkrahjen e eksportit të Kosovës, në mes tjerash,
përmes kërkimit dhe identifikimit të mundësive për eksport, organizimit të
shitjes së prodhimeve vendore në aktivitetet jashtë vendit, mbështetjes së
ndërmarrjeve eksportuese dhe të shoqatave të biznesit, përpunimit dhe
shpërndarjes së informatave që kanë të bëjnë me eksportin brenda dhe jashtë
Kosovës;
(f) angazhohet në aktivitete të tjera në fushën e përkrahjes së investimit dhe të
eksportit.
Neni 3
Kryeshefi ekzekutiv
3.1 Agjencinë e udhëheq kryeshefi ekzekutiv i cili i raporton dhe i përgjigjet ministrit
të Tregtisë dhe të Industrisë.

3.2 Emërimi, shkarkimi dhe funksionet e kryeshefit ekzekutiv drejtohen me anë të
dispozitave përkatëse të Rregullores së ndryshuar të UNMIK-ut nr. 2001/19 të datës 13
shtator 2001 për degën ekzekutive të institucioneve të përkohshme vetëqeverisës në
Kosovë.
Neni 4
Bordi këshillimor për përkrahjen e investimeve
4.1 Bordi këshillimor për përkrahjen e investimeve (më tej “Bordi”) themelohet si
organ kryesor këshillimor i Agjencisë.
4.2 Bordi me kërkesë të kryeshefit ekzekutiv ose duke vepruar me iniciativë të tij i jep
Agjencisë këshilla ose rekomandime për çështjet që kanë të bëjnë me të gjitha aktivitetet
dhe funksionet e Agjencisë.
4.3 Kryeshefi ekzekutiv i merr parasysh të gjitha rekomandimet e Bordit dhe mund
t’iu shmanget rekomandimeve të tilla vetëm nëse ka arsye të mjaftueshme, duke i ofruar
Bordit sqarime me shkrim lidhur me arsyen për mospranimin e rekomandimeve.
5.1 Bordi përbëhet nga:
Neni 5
Organizimi i Bordit këshillimor për përkrahjen e investimeve
(a) Ministri i Tregtisë dhe i Industrisë;
(b) Ministri i Ekonomisë dhe i Financave;
(c) Kryetari i Odës Ekonomike;
(d) Kryeshefi ekzekutiv i Agjencisë.
5.2 Anëtarët e Bordit nga neni 5.1 më sipër, me përlqimin e tyre, plotësohen edhe me
pesë (5) anëtarë të tjerë vullnetarë, dy (2) prej të cilëve janë nga sektori publik dhe tre (3)
nga sektori privat. Anëtarët vullnetarë propozohen nga ministri i Tregtisë dhe i
Industrisë.
5.3 Secili anëtar e cakton një zëvendës i cili i kryen detyrat e anëtarit në rastet kur ky
nuk është në gjendje t’i kryej detyrat vetë.
5.4 Anëtarët dhe zëvendësit nuk marrin shpërblim për kryerjen e detyrave të tyre në
Bord.

5.5 Bordin e kryeson ministri i Tregtisë dhe i Industrisë ose përfaqësuesi i caktuar i
tij. Kryesuesi i thërret mbledhjet e Bordit së paku dy herë në vit dhe në çdo kohë mundet
të thërrasë mbledhje plotësuese, e këtë e bën në bazë të kërkesës të së paku dy anëtarëve
të Bordit. Procedurat e Bordit paraqiten në rregulloren e punës që do ta miratojë Bordi.
5.6 Një anëtar i Bordit ose zëvendësi i tij nuk merr pjesë në mbledhje të Bordit nëse
në rend të ditës gjenden çështje në të cilat ai ose ndonjë anëtar i afërt i familjes së tij ka
interes personal a financiar. Nga anëtarët e Bordit dhe zëvendësit e tyre kërkohet t’ia
paraqesin me shkrim Agjencisë të gjitha konfliktet e interesit.
5.7 Shërbimet mbështetëse të sekretarisë për Bordin sigurohen nga personeli i
Agjencisë të cilin kryeshefi ekzekutiv e cakton për këtë qëllim.
Neni 6
Financimi
6.1 Buxhetin e Agjencisë e siguron Ministria e Tregtisë dhe e Industrisë dhe, sipas
nevojës, mund të plotësohet me fonde të donatorëve.
6.2 Fondet plotësuese të donatorëve për Agjencinë derdhen në Buxhetin e
Konsoliduar të Kosovës dhe caktohen si shpenzime të lejuara të Agjencisë.
Neni 7
Hyrja në fuqi
Kjo Urdhëresë administrative hyn në fuqi me 15 korrik 2005.
Søren Jessen-Petersen
Përfaqësues Special i Sekretarit të Përgjithshëm