tlhako ya molaotshepetšo wa polelo ya bosetšhaba - Saps

KAROLO YA 3: KAGO YA BOKGONI BJA BATHO
3.1 Tiragatšo ya molaotshepetšo wa polelo e tla oketša nyako ya mošomo wa
phetolelo le thulaganyo le ditirelo tša botoloki, kudukudu ka dipolelo tša tlhago.
Motheo wa botsebi bja phetolelo ka go dipolelo tše o tla katološwa ka go bobedi
dikgoro tša mmušo le ka go badiredi ba polelo ba ka ntle bjalo ka bafetoledi,
barulaganyi le ditoloki. Tlhoko ye oketšegilego ya ditirelo tša badiredi ba polelo ba
profešenale e tla nyaka hlahlo ya mabokgoni ye nngwe.
3.2 Go hlongwa ga diyuniti tša polelo ka go kgoro ye nngwe le ye nngwe ya mmušo
ka go profense ye nngwe le ye nngwe le gona go tla ba le thulano go morero wa
ditiragalo tša Tirelo tša Polelo tša Bosetšhaba. Tirelo ya Polelo ya Bosetšhaba (NLS)
e tla lebelelwa gore e gokaganye tiragatšo ya molaotshepetšo ka go nolofatša
tlhahlo ya badiredi ba yuniti ya polelo ka go ditiragalo tša peakanyo ya polelo le
thekgo ya mananeo a mošomo a diyuniti tše. NLS e tla rwala gape maikarabelo a
kgokaganyo ya tšwetšopele ya mananeo a hlahlo a bafetoledi, barulaganyi le
ditoloki, le go hloma methalohlahli ya go šoma ka dintlha tša boleng.
3.3. Dikarolo tša tlhamo ya mareo le mareo le tšona di tla amega. Koketšego ya
mošomo wa phetolelo e tla nyaka tlhabollo ye phakišišitšwego ya mareo ka dipolelo
tša semmušo le Panka ya Mareo ya Bosetšhaba yeo e kgonago go humanwa ke
badiredi ba polelo ba mmušo le ba ka ntle.
3.4 Go ba gona ga didirišwa tša Theknolotši ya Polelo ya Batho (mohlala, phetolelo
ya go thušwa ke metšhene, dimemori tša phetolelo, diphošollamopeleto) tša dipolelo
tša tlhago go tla raloka karolo ye kgolo ya thekgo ya ditiragalo tša nolofatšo ya
polelo.
3.5 Dikgetho tša bogolo bja diyuniti tša polelo di tla phethwa gomme tlhahlo ya
mabokgoni ka go karolo ye e tla beelwa pele morago ga ge palo ya dipolelo tša
semmušo tšeo di yo šomišwago e phetilwe. Diyuniti tše di nago le badiredi ba bane
goba go feta ba profešenale, di tla hloka diklereke.
3.6 Kago ya bokgoni ka go dikarolo tše šupilwego tša nolofatšo ya polelo e tla dirwa
mmogo le baabi ba ditirelo ba go swana le dihlongwa tša thuto ya godingwana tša
go ruta mananeo ao a dumeletšwego ke SAQA le dithuto tša polelo, phetolelo le
thulaganyo, peakanyo ya polelo, tlhamo ya mareo le tlhamopukuntšu.
#Sepedi