Charter of the United Nations

TŠHATA YA MOKGATLO WA DINAGAKOPANO
TŠA LEFASE
(Charter of the United Nations)
MATSENO
RENA BATHO BA MOKGATLO WA DINAGAKOPANO TŠA LEFASE RE
IKGAFILE go boloka moloko wo o tlago wa ka moso go kotlo ya dintwa, ye e
tlišitšego masetlapelo a go se bolelwe gabedi bophelong bja rena go batho, le
go tiišetša gape tshepo go ditokelo tša motheo tša batho, ka ditokelo tšeo di
lekanago tša banna le basadi le tša dinaga tše kgolo le tše nnyane, le go
hlama maemo ao ka ona toka le tlhompho tša ditlamego tše di tlišitšwego ke
dikwano le methopo e mengwe ya melao ya boditšhabatšhaba e ka
tšweletšwago, le go tšwetšapele kgatelopele ya setšhaba le maemo a
makaone a bophelo ka tokologong ya kakaretšo,
LE GO FIHLELELA MAIKEMIŠETŠO A ka go kgotlelela le go phela mmogo
ka khutšo le mang le mang bjalo ka baagišani ba bakaone, le go kopanya
maatla a rena go tšweletša khutšo le tšhireletšo, le go netefatša, ka go
amogela melawana le sehlongwa sa mekgwa, ya gore mašole ao a
itlhamilego ga se a swanelwa go šomišwa, go ba le kgahlego ye e swanago,
le go šomiša ditlabelo tša boditšhabatšhaba go tswetšapele tša ekonomi le
tlhabollo ya setšhaba go batho ka moka,
RE TŠERE SEPHETHO SA GO KOPANYA MAITEKELO A RENA GO
FIHLELELA MAIKEMIŠETŠO a ka tsela ya maleba, Mebušo ya rena ya go
fapafapana, ka kemedi yeo e kgobokeditšwego Toropokgolong ya San
Francisco, e bontšhitše maatla a yona ka botlalo ao a bonego a lokile e bile a
le a sebopego seo se nyakegago e dumelelana ka go hlagiša Tšhata ya
Mokgatlo wa Dinagakopano tša Lefase e bile e hloma mokgatlo wa
boditšhabatšhaba wo o tlogo tsebja ka la Dinagakopano tša Lefase.

KGAOLO YA I
DINEPO LE MELAWANA
Tema ya 1
Dinepo tša Mokgatlo wa Dinagakopano tša Lefase ke:
1. Go tšwetšapele khutšo le tšhireletšo ya boditšhabatšhaba, le go fihlelela
maikemišetšo: a go tšea magato a mohlakanelwa go thibeleng le go tloša
ditšhošetšo tša khutšo, le go gatelela ditiro tša boganka goba ditlolo tše
dingwe tša khutšo, le go tliša ka ditsela tša khutšo, le ka go obamela
melawana ya toka le molao wa boditšhabatšhaba, tokišo goba phedišo ya
dikgohlano tša boditšhabatšhaba, goba maemo ao a ka feletšago go tlolo ya
khutšo;
2. Go tšweletša dikamano tša segwera magareng ga dinaga tšeo di theilwego
go tlhompho ya molawana wa tekatekano ya ditokelo le tokologo ya batho, le
go tšea magato a mangwe a maleba go tiiša khutšo ya mang le mang;
3. Go fihlela tirišano ya boditšhabatšhaba go rarolleng ga mathata a
boditšhabatšhaba a ekonomi, a leago, a setšo, goba a maemo a setho, le go
tšwetšapele le go hlohleletša tlhompho ya ditokelo tša botho le ya ditokologo
tša motheo tša batho ka moka go sa kgethollwe morafe, bong, polelo, goba
tumelo, le
4. Go ba Senthara ya go kopanya dinaga go fihleleleng ga maikemišetšo a a
mohlakanelwa.
Tema ya 2
Mokgatlo le maloko a ona, ge o nyaka go fihlelela Maikemišetšo ao a
beilwego ka go Tema ya 1, o tla šoma go latela ka go Melawana ye e
latelago.
1. Mokgatlo o theilwe go molawana wa tekatekano ya boipušo ya Maloko a
ona ka moka.

2. Maloko ka moka, a netefatšo gore ka moka ga ona a hwetša ditokelo le
mehola ye e tlišwago ke boleloko bjo, a tla phethagatša ditlamego tšeo di
dirwago ke bona ka toka go latela Tšhata ye.
3. Maloko ka moka a tla fetša dikgohlano tša ona tša boditšhabatšhaba ka
tsela ya khutšo ka mokgwa wo e lego gore khutšo le tšhireletšo tša
boditšhabatšhaba le toka, ga di beiwe kotsing.
4. Maloko ka moka, dikamanong tša ona tša boditšhabatšhaba, a tla tlogela
go tšhošetšana goba go šomiša maatla kgahlanong le serithi sa mellwane
goba kgahlanong le boipušo bja sepolotiki bja naga efe goba efe, goba tsela e
nngwe yeo e sa sepelelanego le Maikemišetšo a Dinagakopano tša Lefase.
5. Maloko ka moka a tla fa Dinagakopano tša Lefase thušo e nngwe le e
nngwe ka tiro efe goba efe yeo e e tšeago go latela Tšhata ye, gomme a tla
tlogela go thuša naga efe goba efe yeo Mokgatlo wa Dinagakopano tša
Lefase e tšeago magato a tšhireletšo goba a semolao.
6. Mokgatlo o tla netefatša gore dinaga tšeo di sego Maloko a Mokgatlo wa
Dinagakopano tša Lefase di latela Melawana ye ka moo go ka bago maleba
go tšwetšapele khutšo le tšhireletšo ya boditšhabatšhaba.
7. Ga go seo se lego ka go Tšhata ye seo se tlago dumelela Mokgatlo wa
Dinagakopano tša Lefase go tsenatsena ditabeng tšeo di lego tša ka gare ga
naga efe goba efe goba seo se tlago nyaka gore Maloko a romele ditaba tšeo
go tla go rarollwa ka fase ga Tšhata ye, eupša molawana wo o ka se fetoše
tiragatšo ya magato a semolao ao a lego ka fase ga Kgaolo ya VII.

KGAOLO YA II
BOLELOKO
Tema ya 3
Maloko a mathomong a Mokgatlo wa Dinagakopano tša Lefase e tla ba
dinaga tšeo di kgathilego tema ka Khonferentsheng ya Mokgatlo wa
Dinagakopano tša Lefase ka ga Mokgatlo wa Boditšhabatšhaba ye e bego e
swaretšwe San Francisco, goba tšeo di ilego tša saena kgoeletšo ka
Mokgatlo wa Dinagakopano tša Lefase ka la 1 Janeware 1942, tšeo di
saennego Tšhata ye le go e tiišetša go latela Tema ya 110.
Tema ya 4
1. Boleloko ka go Mokgatlo wa Dinagakopano tša Lefase bo buletšwe dinaga
tše dingwe tšeo di ratago khutšo tšeo di amogelago ditlamego tše di lego ka
mo gare ga Tšhata ye le, ka maikutlo a Mokgatlo di kgonago ebile di nyakago
go diragatša ditlamego tše.
2. Kamogelo ya naga efe goba efe ya mohuta woo go ba leloko ka go
Mokgatlo wa Dinagakopano tša Lefase e tla diragatšwa ke sephetho sa
Kopanokgothekgothe ya Mokgatlo wa Dinagakopano tša Lefase ka morago
ga ge go šišintšwe bjalo ke Khansele ya Tšhireletšo.
Tema ya 5
Leloko leo e lego gore Mokgatlo wa tša Lefase o tšere magato a tšhireletšo
goba a tiro ya semolao kgahlanong le lona ka Khansele ya Tšhireletšo le tla
fegwa gore le se diragatšd ditokelo le menyetla ya boleloko ke
Kopanokgothekgothe ka morago ga ge go šišintše bjalo ke Khansele ya
Tšhireletšo. Tiragatšo ya ditokelo le menyetla ye e tla bušetšwa ke Khansele
ya Tšhireletšo.

Tema ya 6
Leloko la Mokgatlo wa Dinagakopano tša Lefase leo le tlotšego Melawana ye
e lego ka mo Tšhateng ntle le go fetoša kgopolo le tla rakwa Mokgatlong ke
Kopanokgothekgothe ka morago ga ge go šišintšwe bjalo ke Khansele ya
Tšhireletšo.
KGAOLO YA III
DITHO
Tema ya 7
1. Di hlomilwe bjalo ka ditho tše kgolo tša Mokgatlo wa Dinagakopano tša
Lefase: Kopanokgothekgothe, Khansele ya Tšhireletšo, Khansele ya tša
Ekonomi le Leago, Khansele ya Dithrasti, Kgorotsheko ya Toka ya
Boditšhabatšhaba, le Bongwaledi.
2. Ditho tše nnyane tšeo di ka bonwago di le bohlokwa di tla hlongwa go latela
Tšhata ye.
Tema ya 8
Mokgatlo wa Dinagakopano tša Lefase o ka se beye mellwane ka ga
maswanedi a banna le basadi go kgatha tema ka bokgoni bofe goba bofe le
ka fase ga maemo a tekatekano ka dithong tša wona tše kgolo le tše nnyane.
KGAOLO YA IV
KOPANOKGOTHEKGOTHE
Sebopego

Tema ya 9
1. Kopanokgothekgothe e tla ba le Maloko ka moka a Mokgatlo wa
Dinagakopano tša Lefase.
2. Leloko le lengwe le le lengwe le ka se be le baemedi ba go feta ba bahlano
ka go Kopanokgothekgothe.
Mešomo le Maatla
Tema ya 10
Kopanokgothekgothe e tla ahlaahla potšišo efe goba efe goba taba efe goba
efe ye e lego ka mollwaneng wa Tšhata ye goba yeo e amanago le maatla le
mešomo ya setho sefe goba sefe seo e filwego ka mo go Tšhata ye, le, ka
ntle le ge go hlagišwa ka go Tema ya 12, e ka iša ditšhišinyo go Maloko a
Mokgatlo wa Dinagakopano goba go Khansele ya Tšhireletšo goba go tšona
ka moka ka dipotšišo goba ditaba tšeo.
Tema ya 11
1. Kopanokgothekgothe e ka amogela melawana ya kakaretšo ya tirišano ge
go tšwetšwapele khutšo le tšhireletšo ya boditšhabatšhaba, go akaretšwa
melawana yeo e laolago peyo ya marumo fase le melao ya dibetša, ebile e tla
dira ditšhišinyo mabapi le melawana yeo go Maloko goba go Khansele ya
Tšhireletšo goba go tšona ka moka.
2. Kopanokgothekgothe e tla ahlaahla dipotšišo dife goba dife tša go amana
le tšwetšopele ya khutšo le tšhireletšo tša magareng ga dinaga tšeo di
tlišitšwego go yona ke Leloko lefe goba lefe la Mokgatlo wa Dinagakopano tša
Lefase, goba ke Khansele ya tšhireletšo, goba ke naga yeo e sego Leloko la
Mokgatlo wa Dinagakopano tša Lefase go latela Tema ya 35, temana ya 2, le
ka ntle le ge go hlagišitšwe ka go Tema ya 12, gomme e tla dira ditšhišinyo
mabapi le dipotšišo tšeo go naga goba go dinaga tšeo di amegago goba go
Khansele ya Tšhireletšo goba go tšona ka moka. Potšišo ya mohuta woo ye e
lego gore magato a hlokega go ka tšeiwa e tla romelwa go Khansele ya

Tšhireletšo ke Kopanokgothekgothe e ka ba pele goba ka morago ga ge e
ahlaahlilwe.
3. Kopanokgothekgothe e tla nyaka šedi ya khansele ya Tšhireletšo go
maemo ao a lego kgauswi ga go bea khutšo le tšhireletšo ya
boditšhabatšhaba kotsing.
4. Maatla a Kopanokgothekgothe ao a beilwego ka mo go Tema ye a ka se
fete maatla a mošomo ao a beilwego ka go Tema ya 10.
Tema ya 12
1. Le ge e le gore Khansele ya Tšhireletšo e diragatša mešomo ya yona
mabapi le dikgohlano goba mabapi le maemo ao e filwego ke Tšhata ye,
Kopanokgothekgothe e ka se dire tšhišinyo efe goba efe mabapi le kgohlano
yeo goba maemo ao ka ntle le ge Khansele ya Tšhireletšo e kgopela bjalo.
2. Mongwaledipharephare, ka tumelelo ya Khansele ya Tšhireletšo, o tla
tsebiša Kopanokgothekgothe tulong e nngwe le e nngwe ka ga ditaba tša go
amana le tšwetšopele ya khutšo le tšhireletšo ya boditšhatšhaba tšeo di
sekasekwago ke Khansele ya Tšhireletšo le go tsebiša gape
Kopanokgothekgothe ga se ya dula, ka bjako ge Khansele ya Tšhireletšo e
emiša go šoma ka ditaba tšeo.
Tema ya 13
1. Kopanokgothekgothe e tla ithomela dinyakišišo gomme ya dira ditšhišinyo
ka maikemišetšo a go:
a. tšwetšapele tirišano ya bo ditšhabatšhaba ka lefapheng la dipolotiki le go
hlohleletša tlhabollo ye e tšwelago pele ya molao wa boditšhabatšhaba le
go o diragatša;
b. tšwetšapele tirišano ya boditšhabatšhaba ka mafapeng a tša ekonomi, a
leago, a setšo, a thuto le a tša maphelo, ka go thuša ka go fihlelela
ditokelo tša botho le ditokologo tša motheo tša batho ka moka ka ntle le
kgethologanyo mabapi le morafe, bong, polelo, goba tumelo.

2. Maikarabelo a mangwe go tšwelapelo, mešomo le maatla a
Mongwaledipharephare malebana le ditaba tšeo di boletšwego temeng ya ka
godimo di beilwe ka go Dikgaolo tša IX le X.
Tema ya 14
Go latela ditlhagišo tša Tema ya 12, Kopanokgothekgothe e tla šišinya
magato a peakanyo ya khutšo ya maemo afe goba afe, go sa lebelelwe gore
a tšwa kae, ao a bonalago a le kgauswi le go senya toka ka kakaretšo ya
mang le mang goba dikamano tša segwera magareng ga dinaga, go akaretša
maemo ao a tlišwago ke tlolo ya ditlhagišo tša Tšhata ye tšeo di tšweletšago
Maikemišetšo le Melawana ya Mokgatlo wa Dinagakopano tša Lefase.
Tema ya 15
1. Kopanokgothekgothe e tla amogela ya bay a dumela dipego tša ngwaga le
ngwaga le tše di ikgethilego tša go tšwa go khansele ya Tšhireletšo; dipego
tše di tla akaretša pego ya magato ao Khansele ya Tšhireletšo e tšerego
sephetho ka ga ona goba ao a tšerwego go tšwetšapele khutšo le tšhireletšo
ya boditšhabatšhaba.
2. Kopanokgothekgothe e tla amogela ya bay a dumela dipego tša go tšwa go
ditho tše dingwe tša Mokgatlo wa Dinagakopano tša Lefase.
Tema ya 16
Kopanokgothekgothe e tla diragatša mešomo yeo e amanaga le tshepedošo
ya boditšhabatšhaba ya Dithrasti ka ge e filwe yona ka fase ga Dikgaolo tša
Xii le XIII, go akaretšwa go amogela ditumelelano tša Dithrasti tša mafelo ao a
sego a hlangwa bjalo ka ao a sego a leano.
Tema ya 17
1. Kopanokgothekgothe e tla amogela ya ba ya dumela ditekanyetšo tša
Mokgatlo.

2. Ditshenyagalelo tša Mokgatlo di tla lefša ke Maloko ka ge go beilwe ke
kopanokgothekgothe.
3.Kopanokgothekgothe e tla amogela ya ba ya dumela dipeakanyo dife goba
dife tša ditšhelete le tša ditekanyetšo tšeo di tlišwago ke dietšentšhi tša go
ikgetha tšeo di fiwago ka go Tema ya 57 ebile e tla lekola ditekanyetšo tša
tshepidišo tša dietšentšhi tšeo tša go ikgetha ka nepo ya go dira ditšhišinyo
go dietšentshi tšeo di amegago.
Go bouta
Tema ya 18
1. Leloko le lengwe le le lengwe la Kopanokgothekgothe le tla ba le bouta e
tee.
2. Diphetho tša Kopanokgothekgothe ka ga dipotšišo tše bohlokwa di tla dirwa
ke bontši bja peditharong bja Maloko ao a lego gona e bile a boutago.
Dipotšišo tše di tla akaretša: ditšhišinyo malebana le tšwetšopele ya khutšo le
tšhireletšo ya boditšhabatšhaba go kgetha ga maloko ao e sego a ruri a
Khansele ya tša Ekonomi le Leago, go kgetha ga Maloko a Khansele ya
Dithrasti go latela temana ya 1 ya Tema 86, go amogela ga Maloko a Mafsa
ka go Mokgatlo wa Dinagakopano tša Lefase, go fega ga ditokelo le menyetla
ya boleloko, go raka ga Maloko, dipotšišo tša go amana le mošomo wa
tshepedišo ya dithrasti, le dipotšišo tša ditekanyetšo.
3. Dipheto ka ga dipotšišo tše dingwe, go akaretša go laola mafapha a
tlaleletšo a dipotšišo tšeo di tlilego go tšeelwa sephetho ke bontši bja
peditharong di tla tšeiwa ke bontši bja maloko ao a lego gona ebile a boutago.
Tema ya 19
Leloko la Mokgatlo wa Dinagakopano tša Lefase leo le kolotago ditefelo tša
ditšhelete tšeo di ntšhiwago ka Mokgatlong le ka se boute ka go
Kopanokgothekgothe ge tšhelete ya dikoloto tša lona e lekana le goba e feta
tšhelete yeo e swanetšego go lefša ke lona mo mengwageng ye e fetilego ye
mebedi ka botlalo. Kopanokgothekgothe e tla, le ge go le bjalo, dumelela

Leloko leo go bouta ge e kgotsofala gore go palelwa ke go lefa moo go dirwa
ke maemo ao a ka se kgonego go laolwa ke leloko.
Tshepedišo
Tema ya 20
Kopanokgothekgothe e tla kopana dikolong tša ka mehla tša ngwaga le
ngwaga ka dikopanong tšeo di ikgethilego ge maemo a ka nyaka dikopano
tšeo di swarwa. Dikopano tša go ikgetha di tla bitšwa ke
Mongwaledipharephare ka kgopelo ya Khansele ya Tšhireletšo goba ya
bontši bja Maloko a Mokgatlo wa Dinagakopano tša Lefase.
Tema ya 21
Kopanokgothekgothe e tla šomiša melawana ya yona ya tšhepedišo. E tla
kgetha Mopresidente wa yona wa kopano e nngwe le e nngwe.
Tema ya 22
Kopanokgothekgothe e tla hloma ditho tše nnyane tšeo e bonago go le
maleba go di hloma gore e diragatše mešomo ya tšona.
KGAOLO YA V
KHANSELE YA TŠHIRELETŠO
Sebopego
Tema ya 23
1. Khansele ya Tšhireletšo e tla ba le Maloko a lesomehlano a Mokgatlo wa
Dinagakopano tša Lefase. Rephapoliki ya China, France, the Union of Soviet
Socialist , the United Kingdom of Great Britain le Northern Ireland, le United
States of America e tla ba maloko a sa ruri a Khansele ya Tšhireletšo.
Kopanokgothekgothe e tla kgetha Maloko a mangwe a lesome a Makgatlo wa
Dinagakopano tša Lefase go ba maloko ao a sego a sa ruri a Khansele ya

Tšhireletšo, go hlokometšwe mabaka a itšego, sa mathomo go ba le seabe ga
Maloko a Mokgatlo wa Dinagakopano tša Lefase go tšwetšapele khutšo le
tšhireletšo ya magareng ga dinaga le go maikemišetšo a mangwe a Mokgatlo,
le gape go kabelanyo ya naga ye e lekanago.
2. Maloko ao e sego a sa ruri a Khansele ya Tšhireletšo a tla kgethwa nako
ya mengwaga e mebedi ka dikgethong tša mathomo tša maloko ao e sego a
sa ruri ka morago ga koketšo ya maloko a Khansele ya Tšhireletšo go tloga
go a lesometee go fihla go a mane a tlaleletšo a tla kgethwa go šoma nako ya
ngwaga o tee. Leloko leo le tšwago le ka se be le maswanedi a go kgetha
gape ka bjako.
3. Leloko le lengwe le le lengwe la Khansele ya Tšhireletšo le tla ba le
moemedi o tee.
Mešomo le Maatla
Tema ya 24
1. Go netefatša gore go ba le magato a ka pela ao a lego mohola ka Mokgatlo
wa Dinagakopano tša Lefase, Maloko a ona a kgobokana ka maikarabelo a
bohlokwa a Khansele ya Tšhireletšo go tšwetšapele khutšo le tšhireletšo ya
boditšhabatšhaba, le go dumelelana gore go go diragatša mešomo ya
Khansele ya Tšhireletšo e šoma legating la bona.
2. Ge e diragatša mešomo ye, Khansele ya Tšhireletšo e tla šoma go latela
Maikemišetšo le Melawana ya Mokgatlo wa Dinagakopano tša Lefase. Maatla
a itšego ao a filwego Khansele ya Tšhireletšo go diragatša mešomo ye a
beilwe ka go Dikgaolo tša VI, VII, VIII, le ya XII.
3. Khansele ya Tšhireletšo e tla romela dipego tša ngwaga le ngwaga le tša
go ikgetha go Kopanokgothekgothe gore di amogelwe.

Tema ya 25
Maloko a Mokgatlo wa Dinagakopano tša Lefsae a dumela go amogela le go
diragatša diphetho tša Khansele ya Tšhireletšo go latela Tšhata ye.
Tema ya 26
Go tšwetšapele go hloma le go tšwetša ga khutšo le tšhireletšo ya
boditšhabatšhaba le go aroša go gonnyane ga dibetša tša methopo ya lefase
ya batho le ya ekonomi, Khansele ya Tšhireletšo e tla ba le maikarabelo a go
hlama, ka thušo ya komiti ya Bašomedi ba Mašole yeo e beilwego ka go tema
ya 47, maano ao a tlago romelwa go Maloko a Mokgatlo wa Dinagakopano
tša Lefase go tla go hloma lenaneo la taolo ya dibetša.
Go bouta
Tema ya 27
1. Leloko le lengwe le le lengwe la Khansele ya Tšhireletšo le tla ba le boutu
e tee.
2. Diphetho tša Khansele ya Tšhireletšo ka ga ditaba tša tshepedišo di tla
dirwa ka boutu ya tiišetšo ya maloko a senyane.
3. Diphetho tša Khansele ya Tšhireletšo ka ga ditaba ka moka di tla dirwa ka
boutu ya tiišetšo ya maloko a senyane go akaretšwa diboutu tše di kwanago
tšona tša maloko a sa ruri a Khansele ye; ge fela, ka diphetho tša ka fase ga
Kgaolo ya VI, le ka fase ga temana ya 3 ya Tema ya 52, maloko ao a sa
kwanego a ka tlogela go bouta.
Tshepedišo
Tema ya 28
1. Khansele ya Tšhireletšo e tla beakanywa gore e kgone go šoma go
tšwelapele. Leloko le lengwe le le lengwe la Khansele ya Tšhireletšo le
emelwa mo lebakeng le ka dinako tše dingwe ge Mokgatlo o dutše.

2. Khansele ya Tšhireletšo e tla swara dikopano moo e lego leloko le lengwe
le le lengwe la yona le tla, ge go hlokega bjalo, emelwago ke leloko la mmušo
goba ke baemedi ba bangwe bao ba ikgethilego.
3. Khansele ya Tšhireletšo e tla swara dikopano mafelong ao kantle le mo
Mokgatlo o dulago gona ka ge mo kahlolong ya yona e tla nolofatša mošomo
wa yona.
Tema ya 29
Khansele ya Tšhireletšo e tla hloma ditho tše nnyane ge e bona go hlokega
go phethagatša mešomo ya yona.
Tema ya 30
Khansele ya Tšhireletšo e tla bea melao ya yona ya tshepedišo, go akaretšwa
mokgwa wa go kgetha Mopresidente wa yona.
Tema ya 31
Leloko le lengwe le le lengwe la Dinagakopano leo le sego leloko la Khansele
ya Tšhireletšo le ka kgathatema, ka ntle le go bouta, ka go ahlaahleng ya
potšišo efe goba efe yeo e tlišitšwego pele ga Khansele ya Tšhireletšo nako
le nako ge Khansele ya Tšhireletšo e bona gore potšišo yeo e ama
dikgahlego tša Leloko leo kudu.
Tema ya 32
Leloko lefe goba lefe la Dinagakopano leo le sego leloko la Khansele ya
Tšhireletšo goba la naga efe goba efe yeo e sego Leloko la Mokgatlo wa
Dinagakopano, ge e gore ke karolo ya dikgohlano yeo e ahlaahlwago ke
Khansele ya Tšhireletšo, le tla laletšwa go kgathatema, ka ntle le go bouta, ka
dikahlaahlong tše di amanago le kgohlano yeo. Khansele ya Tšhireletšo e tla
dumela maemo ao ge e bona e le toka gore naga yeo e sego Leloko la
Mokgatlo wa Dinagakopano le kgathetema.

KGAOLO YA VI
THAROLLO YA DIKGOHLANO KA KHUTŠO
Tema ya 33
1. Dinaga tšeo di nago le dikgohlano, tšeo e lego gore go tšwelapele ga tšona
go tla bea tšwetšopele ya khutšo le tšhireletšo ya boditšhabatšhaba kotsing,
di tla, sa mathomo, nyaka tharollo ka dipoledišano, dinyakišišo, botseta,
kopanyo, poelanyo, tharollo ya semolao, tša nyaka dietšentshi tša dilete goba
dipeakanyo, goba ka ditsela tša khutšo tša kgetho ya tšona.
2. Khansele ya Tšhireletšo e tla, ge e bona go le maleba, ya kgopela dinaga
tšeo go rarolla dikgohlano tša tšona ka ditsela tšeo.
Tema ya 34
Khansele ya Tšhireletšo e tla nyakišiša kgohlano efe goba efe, goba maemo
afe goba afe ao a ka feleletšago ka go se kwane ga boditšhabatšhaba goba
ao a ka hlolago kgohlano, go bona ge eba go tšwelapele ga kgohlano goba
maemo ao go tla bea tšwetšopele ya khutšo le tšhireletšo ya
boditšhabatšhaba kotsing.
Tema ya 35
l. Leloko lefe goba lefe la Dinagakopano tša Lefase le ka tliša kgohlano efe
goba efe, goba maemo afe goba afe a sebopego seo se go boletšwego ka ga
sona ka go Tema ya 34, go tla go lebelelwa ke Khansele ya Tšhireletšo goba
Kopanokgothekgothe.
2. Naga yeo e sego Leloko la Dinagakopano tša Lefase le ka tliša kgohlano
efe goba efe go Khansele ya Tšhireletšo goba go Kopanokgothekgothe yeo e
e amago ge e le gore e amogela semeetseng, lebakeng la kgohlano yeo,
ditlamego tša tharollo ya khutšo tšeo di filwego ka gare ga Tšhata.

3. Ditshepedišo tša Kopanokgothekgothe mabapi le ditaba tšeo di tlišitšwego
go yona ka fase ga Tema ye di tla laolwa ke ditlhagišo tša Ditema tša 11 le
12.
Tema ya 36
1. Khansele ya Tšhireletšo e tla, mo nakong efe goba efe ya kgohlano ya
sebopego seo go boletšwego ka sona ka go Tema ya 33 goba ya maemo a
go swana le ao, šišinya ditshepedišo tša maleba goba ditsela tša tokišo.
2. Khansele ya Tšhireletšo e swanetše go amogela ditshepedišo dife goba
dife tša tharollo ya dikgohlano tšeo di šetšego di tšerwe ke dinaga tšeo di
amegago.
3. Ge e dira ditšhišinyo ka fase ga Tema ye, Khansele ya Tšhireletšo gape e
tla hlokomela gore dikgohlano tša semolao bjalo ka molao wa kakaretšo di tla
romelwa go Kgorotsheko ya Boditšhabatšhaba ya Toka go latela ditlhagišo
tša Molao wa Kgorotsheko.
Tema ya 37
1. Ge dinaga tšeo di nago le kgohlano ya sebopego seo go boletšwego ka ga
sona ka go Tema ya 33 di palelwa ke go e rarolla ka ditsela tšeo go
boletšwego ka tšona ka go Tema yeo, di tla e romela go Khansele ya
Tšhireletšo.
2. Ge Khansele ya Tšhireletšo e bona gore go tšwelapele ga kgohlano go tla
bea tšwetšopele ya khutšo le tšhireletšo ya boditšhabatšhaba kotsing, e tla
tšea sephetho sa ge eba e tla magato ao a lego ka fase ga Tema ya 36 goba
go šišinya melawana yeo ya tharollo ya kgohlano ge e ka bona go le maleba.
Tema ya 38
Ka ntle le go fetoša ditlhagišo tša Ditema tša 33 go fihla go 37, Khansele ya
Tšhireletšo e tla, ge dinaga tše di nago le kgohlano di kgopela bjalo, dira
ditšhišinyo go dinaga tšeo di nago le kgohlano ka maikemišetšo a go tliša
tharollo ya khutšo ya kgohlano yeo.

KGAOLO YA VII
LEGATO MABAPI LE DITŠHOŠETŠO GO KHUTŠO, GO SENYA
KHUTŠO, LE TIRO YA DINTWA
Tema ya 39
Khansele ya Tšhireletšo e swanetše go laola go ba gona ga tšhošetšo go
khutšo, go senya khutšo goba tiro ya dintwa gomme e tla dira ditšhišinyo,
goba ya tšea sephetho sa gore ke magato afe ao a ka tšeiwago go latela
Ditema tša 4 le 42, go tšwetšapele goba go bušetša khutšo le tšhireletšo ya
boditšhabatšhaba.
Tema ya 40
Go thibela go fetelela ga maemo, Khansele ya Tšhireletšo e tla, pele e ka dira
ditšhišinyo goba e ka tšea sephetho ka ga magato ao a filwego ka go Tema
ya 39, ya bitša dinaga tše di amegago go obamela magato ao a nakwana ao
e bonago a le maleba goba a hlokagala. Magato ao a nakwana a tla hloka
diphetošo tša ditokelo, dikgopelo, goba maemo a dinaga tšeo di amegago.
Khansele ya Tšhireletšo e tla hlokomela go palelwa ga go obamela magato
ao a nakwana.
Tema ya 41
Khansele ya Tšhireletšo e tla tšea sephetho ka ga gore ke magato afe ao a sa
akaretšego mašole ao a itlhamilego ao a swanetšego go šomišwa go
diragatša diphetho tša yona, gomme e tla kgopela Maloko a Mokgatlo wa
Dinagakopano go diragatša magato ao. Magato a a ka akaretša go emiša ka
botlalo goba ka seripa dikamano tša ekonomi le tša ditimeleng, tša lewatleng,
tša moyeng, tša poso, tša megala, tša radio, le tša ditsela tše dingwe tša
kgokagano, le tša phedišo ya dikamano tša botseta.

Tema ya 42
Ge Khansele ya Tšhireletšo e ka amogela gore magato ao a filwego ka go
Tema ya 41 a ka se be a maleba goba a bonwe gore a ka se be a maleba, e
tla tšea magato a tiro ya mašole a moyeng, a lewatleng goba a fase go
tšwetšapele goba go bušetša khutšo le tšhireletšo tša boditšhabatšhaba.
Magato a mohuta woo a la akaretša dipontšho tša boipelaetšo, go thiba
mebila, goba di ditiro tše dingwe tša mašole a moyeng, a lewatleng, goba a
fase a Maloko a Mokgatlo wa Dinagakopano.
Tema ya 43
1. Maloko ka moka a Mokgatlo wa Dinagakopano, gore ba kgone go ba le
seabe go go tšwetšapele ga khutšo le tšhireletšo ya boditšhabatšhaba, a
tshephiša gore a tla dira gore mašole ao a itlhamilego, thušo, le dinolofatši, go
akaretšwa ditokelo tša tshepedišo, tšeo di swanetšego go tšwetšapele khutšo
le tšhireletšo ya boditšhabatšhaba.
2. Tumelelano goba ditumelelano tša mohuta woo di tla laola palo le mehuta
ya mašole, maemo a bona a go lokela go tliša khutšo le moo ba ka bago gona
ka kakaretšo, le sebopego sa dinolofatši le thušo tšeo di tlago fiwa.
3. Tumelelano goba ditumelelano di tla ahlaahlwa ka pela ka moo go ka
kgonegago ka gona ge nyakwa ke Khansele ya Tšhireletšo. Di tla fetšwa
magareng ga Khansele ya Tšhireletšo le Maloko goba magareng ga Khansele
ya Tšhireletšo le dihlopha tša Maloko gomme di tla tiišetšwa ke dinaga tše di
saenago go latela ditshepedišo tša tšona tša molaotheo.
Tema ya 44
Ge Khansele ya Tšhireletšo e tšere sephetho sa go šomiša mašole, e tla, pele
e ka bitša Leloko leo le sego la emelwa go yona go aba mašole ao a
itlhamilego go phethagatša ditlamego tšeo go boletšwego ka ga tšona ka go
Tema ya 43, ya laletša Leloko leo, ge Leloko leo le nyaka bjalo, go kgatha
tema ka go diphetho tša Khansele ya Tšhireletšo tšeo di amanago le go
šomiša karolo ya mašole ao a itlhanilego a go tšwa go Leloko le.

Tema ya 45
Go kgontšha Mokgatlo wa Dinagakopano go tšea magato a bjako a sešole,
Maloko a tla diragatša magato a karolo ya sešole sa moyeng a naga ao a
hwetšagalago ka pela go ba tiro ya mašole ao a kopantšwego a
boditšhabatšhaba. Maatla le maemo a dikarolo tše tša mašole tša go lokela
go tliša khutšo le maano a tiro ya mašole ye e kopantšwego di tla laolwa, mo
mellwaneng yeo e beilwego ditumelelanong tša go ikgetha goba
ditumelelanong tšeo go boletšwego ka ga tšona ka go Tema ya 43, ke
Khansele ya Tšhireletšo ka thušo ya Komiti ya Mašole.
Tema ya 46
Maano a go diragatša tiro ya mašole ao a itlhamilego e tla dirwa ke Khansele
ya Tšhireletšo ka thušo ya Khansele ya Komiti ya Bašomi ba Mašole.
Tema ya 47
1. Go tla hlongwa Komiti ya Bašomi ba Mašole go eletša le go thuša
Khansele ya Tšhireletšo ka ga dipotšišo tše di amanago le dinyakwa tša
mašole tša Khansele ya Tšireletšo go tšwetšapele khutšo le tšhireletšo ya
boditšhabatšhaba, go šomiša le go laola mašole ao a beilwego ka fase ga
taolo ya yona, go laola dibetša, le go diragatša tlhamollo ya mašole ao ba
yago go šoma gona.
2. Komiti ya Bašomi ba Mašole e na le Baetapele ba Mašole ba maloko a sa
ruri a Khansele ya Tšhireletšo goba baemedi ba tšona. Leloko lefe goba lefe
la Mokgatlo wa Dinagakopano tša Lefase leo le sego la emelwa go Komiti yeo
le tla laletšwa ke Komiti go tla go dirišana le yona ge tiragatšo ye e šomago
gabotse ya maikarabelo a Komiti a nyaka go kgatha tema ga mošomo wa
Leloko leo.
3. Komiti ya Bašomi ba Mašole, ka fase ga Khansele ya Tšhireletšo, e tla ba
le maikarabelo a go tliša maano a tshepedišo ya mašole afe goba afe ao a
itlhamilego ao a lego ka fase ga taolo ya Khansele ya Tšhieletšo. Dipotšišo
tša go amana le taolo ya mašole ao a tla šongwa ka go latela.

4. Komiti ya Bašomi ba Mašole, ka tumelelo ya Khansele ya Tšhireletšo le ka
morago ga ge e rerišane le dietšentsh tša maleba tša dilete, e tla hloma
dikomiti tše nnyane.
Tema ya 48
1. Legato leo le nyakegago go diragatša diphetho tša Khansele ya Tšhireletšo
go tšwetšapele khutšo le tšhireletšo ya boditšhabatšhaba le tla tšeiwa ke
Maloko ka moka a Mokgatlo wa Dinagakopano tša Lefase goba ke ba
bangwe ba ona, go latela ka moo Khansele ya Tšhireletšo e ka laolago ka
gona.
2. Diphetho tšeo di tla diragatšwa thwii ke Maloko a Mokgatlo wa
Dinagakopano tša Lefase goba ka legato la bona ka dietšentshi tša maleba
tša boditšhabatšhaba tšeo di lego maloko a yona.
Tema ya 49
Maloko a Mokgatlo wa Dinagakopano tša Lefase a tla tsenela ge go fiwa
thušo ye e kopanetšwego ge go diragatšwa ditaba tšeo di tšeetšwego
sephetho ke Khansele ya Tšhireletšo.
Tema ya 50
Ge magato a thibelo goba a tirišo ya mašole kgahlanong le naga efe goba efe
a ka tšeiwa ke Khansele ya Tšhireletšo, naga efe goba efe, e kaba Leloko la
Mokgatlo wa Dinagakopano tša Lefase goba aowa , yeo e bonago itemogela
mathata a tša ekonomi ao a ikgethilego ao a tlišwago ke go diragatša magato
ao, e tla ba le ditokelo tša go ikgokaganya le Khansele ya Tšhireletšo ya
mabapi le tharollo ya mathata ao.
Tema ya 51
Ga se gona seo se lego ka gare ga Tšhata ye seo se tlago senya tokelo ye e
hweditšwego ya motho goba boitšhireletšo bja mohlakanelwa ge tlhaselo ya
mašole e dirwa kgahlanong le Leloko la Mokgatlo wa Dinagakopano tša
Lefase, go fihlela ge Khansele ya Tšhireletšo e tšere magato ao a lego

maleba go tšwetšapele khutšo le tšhireletšo. Magato ao a tšerego ke maloko
go diragatša tokelo ye ya boitšhireletšo a tla tsebišwa Khansele ya Tšhireletšo
ka bjako gomme a ka se ame taolo le maikarabelo tšeo di lego ka gare ga
Tšhata ye go diragatša magato ao ge e bona go le maleba gore go
tšwetšwepele goba go bušetšw khutšo le tšhireletšo ya boditšhabatšhaba.
Kgaolo ya VIII
DIPEAKANYO TŠA DILETE
Tema ya 52
1. Ga go seo se lego ka mo gare ga Tšhata ye seo se sa dumelelego
peakanyo ya dilete goba ya dientšentshi go šoma ka ditaba tša mohuta woo
tša go swana le go tšwetšapele khutšo le tšhireletšo tša boditšhabatšhaba ka
ge go le maleba go magato a selete, ge fela dipeakanyo tšeo goba dietšentshi
tšeo le ditiro tša tšona di sepelelana le Maikemišetšo le Melawana ya
Mokgatlo wa Dinagakopano tša Lefase.
2. Maloko a Mokgatlo wa Dinagakopano tša Lefase ao a tsenelago
dipeakanyo tšeo goba goba ao a hlamago dietšentshi tšeo a tla dira ka mo go
kgonegago go fihlelela tharollo ya khutšo ya dikgohlano tša tikologo ka
dipeakanyo tša dilete goba ka dietšentshi tšeo tša tikologo pele ba ka di tliša
go Khansele ya Tšhireletšo.
3. Khansele ya Tšhireletšo e tla hlohleletša tharollo ya khutšo ya dikgohlano
tša tikologo ka dipeakanyo tša dilete goba ka dietšentshi tšeo e ka ba ka
kgopelo ya dinaga tšeo di amegago goba ka taelo ya go tšwa go Khansele ya
Tšhireletšo.
4. Tema ye ga se tiragatšo ya Ditema tša 34 le 35.
Tema ya 53
1. Khansele ya Tšhireletšo e tla, ge go le maleba, šomiša peakanyo yeo ya
selete goba dietšentshi go diragatša tiro ya mašole ka fase ya taolo ya yona.
Eupša ga go tiro ya mašole yeo e tlago tšeiwa ka fase ga dipeakanyo tša

dilete goba ka dietšentshi tša dilete ka ntle ga tumelelo ya Khansele ya
Tšhireletšo, ka ntle ga magato a kgahalanong le naga yeo e lego lenaba, ka
ge go hlalošitšwe ka go temana ya 2 ya Tema ye, ge fela go phethagatšwa
Tema ya 7 goba dipeakanyo tša dilete tšeo di lebišitšwego kgahlanong le go
mpshafatšwa ga melawana e boima kgahlanong le naga yeo, go fihlela nako
yeo moo e lego gore Mogatlo o tla, ka kgopelo ya Mebušo ye e amegago,
fiwa maikarabelo a go thibela dintwa tše di tšwelago pele ka naga yeo.
2. Lereo le naga ya lenaba ka ge le šomišwa go temana ya 1 ya Tema ye e
ama naga efe goba efe yeo nakong ya Ntwa ya Bobedi ya Lefase e bego e le
lenaba la naga efe goba efe yeo e bego e le mosaeni wa Tšhata ye.
Tema ya 54
Khansele ya Tšhireletšo ka dinako tše dingwe e tla tsebišwa ka botlalo ka ga
ditiro tšeo di tšerwego goba tšeo go ikemišeditšwego go di dira ka fase ga
dipeakanyo tša dilete go tšwetšapele khutšo le tšhireletšo tša
boditšhabatšhaba.
KGAOLO YA IX
TIRIŠANO YA BODITŠHABATŠHABA YA EKONOMI LE LEAGO
Tema ya 55
Ka maikemišetšo a go hloma maemo a khutšo le toka tšeo di lego maleba
gore go be le dikamano tša khutšo le tša segwera magareng ga dinaga tšeo
di theilwego ka tlhompho ya molawana wa ditokelo tša go lekana le boipušo
bja batho, bjo Mokgatlo wa Dinagakopano tša Lefase o tlago di tšwetšapele:
a. maemo a godingwana a bophelo, go thwalwa mešomong ka botlalo, le
maemo a tšwelopele ya tša ekonomi le ya leago le tlhabollo;
b. ditharollo tša mathata a boditšhabatšhaba a ekonomi, leago, tša maphelo,
le mathata a mangwe a go amana le tšona; le tirišano ya
boditšhabatšhaba ya setšo le thuto; le

c. tlhompho ya mang le mang ya, le go obamela, ditokelo tša botho le
ditokologo tša motheo tša batho ka moka ka ntle le kgethologanyo ya
morafe, bong, polelo, goba tumelo.
Tema ya 56
Maloko ka moka a tshephiša go tšea magato a mohlakanelwa le ao a
aroganego go dirišana le Mokgatlo go fihlelela maikemišetšo ao a beilwego ka
go Tema ya 55.
Tema ya 57
1. Dietšentshi tša mehutahuta tšeo di nago le bokgoni bjo bo ikgethilego, tša
go hlongwa ke ditumelelano tša magareng ga mebušo gomme tša go ba le
maikarabelo a magolo a boditšhabatšhaba, ka ge a hlalošitšwe ka ditlabelong
tša tšona tša motheo, ka go mafapha a ekonomi, a leago, a setšo, a thuto, a
tša maphelo, le a magwe a go amana le ona, a tla tlišwa gore di dirišane le
Mokgatlo wa Dinagakopano tša Lefase go latela ditlhagišo tša Tema ya 63.
2. Dietšentshi tšeo di tlišwago gore di tle di amane le Mokgatlo wa
Dinagakopano tša Lefase ka mo di bitšwa dietšentshi tšeo di ikgethilego.
Tema ya 58
Mokgatlo wa Dinagakopano tša Lefase o tla dira ditšhišinyo tša go kopanya
melawana le ditiro tša dietšentshi tšeo di ikgethilego.
Tema ya 59
Mokgatlo wa Dinagakopano tša Lefase o tla, ge go le maleba, thoma
dipoledišano tša magareng ga dinaga tše di amegago go tla go hlama
dietšentshi tše difsa tše di ikgethilego tše di nyakegago go fihlelela
maikemišetšo ao a beilwego ka go Tema ya 55.

Tema ya 60
Maikarabelo a tiragatšo ya mešomo ya Mokgatlo wa Dinagakopano tša
Lefase ao a beilwego ka mo gare ga Kgaolo ye a tla fiwa
Kopanokgothekgothe gomme, ka fase ga taolo ya Kopanokgothekgothe, ka
go Khansele ya Ekonomi le Leago, yeo e tla bago le maatla ao a beilwego ka
go Kgaolo ya X a go phethagatša mošomo wo.
KGAOLO YA X
KHANSELE YA TŠA EKONOMO LE LEAGO
Sebopego
Tema ya 61
1. Khansele ya tša Ekonomi le Leago e tla ba le Maloko a masomehlanonne a
Mokgatlo wa Dinagakopano ao a kgethilwego ke Kopanokgothekgothe.
2. Go latela ditlhagišo tša temana ya 3, maloko a lesomeseswai a Khansele
ya tša Ekonomi le Leago a tla kgethwa ngwaga o mongwe le o mongwe go
šoma lebaka la mengwaga e meraro. Leloko leo le tšwago le tla ba le
maswanedi a go kgethwa gape ka bjako.
3. Dikgethong tša mathomo ka morago ga go oketšega ga maloko a Khansele
ya tša Ekonomi le Leago go tloga go maloko a masomepedišupa go fihla go
ba masomehlanonne, go tlaleletša maloko ao a kgethilwego sebakeng sa
maloko a senyane ao nako ya ona ya go šoma e felago mafelelong a ngwaga
woo, maloko a masomepedišupa a tlaleletšo a tla kgethwa. Mo go maloko a a
masomepedišupa, nako ya go šoma ya maloko a senyane ao a kgethilwego
bjalo e tla fela morago ga ngwaga o tee, gomme ya maloko a le a senyane e
tla fela mafelelonga mengwaga e mebedi, go latela dipeakanyo tše di
dirilwego ke Kopanokgothekgothe.
4. Leloko le lengwe le le lengwe la Khansele ya tša Ekonomi le Leago le tla
ba le moemedi o tee.

Mešomo le Maatla
Tema ya 62
1. Khansele ya tša Ekonomi le Leago e tla dira goba ya thomiša dinyakišišo le
dipego tša malebana le merero ya boditšhabatšhaba ka ga tša ekonomi,
leago, setšo, thuto, tša maphelo, le merero e megwe yeo e amanago le tšona
le go dira ditšhišinyo malebana le merero yeo go Kopanokgothekgothe, go
Maloko a Mokgatlo wa Dinagakopano tša Lefase, le go dietšentshi tša go
ikgetha tšeo di amegago.
2. E tla dira ditšhišinyo tša mabapi le go tšwetšapele tlhompho ya, le go
obamela, ditokelo tša botho le ditokologo tša motheo tša batho ka moka.
3. E tla beakanya dikwano tše di thadilwego go tla go tlišwa go
Kopanokgothekgothe, malebana le merero yeo e welago ka fase ga bokgoni
bja yona.
4. E tla bitša, go latela melao yeo e beilwego ke Mokgatlo wa Dinagakopano
tša Lefase, dikhonferentshe tša boditšhabatšhaba ka ga merero ye e welago
ka fase ga bokgoni bja yona.
Tema ya 63
1. Khansele ya tša Ekonomi le Leago e tla tsenela ditumelelano le etšentshi
efe goba efe yeo go boletšwego ka ga yona ka go Tema ya 57, ya hlaloša
maemo ao etšentshi yeo e amegago e tlago tlišwa kamanong le Mokgatlo wa
Dinagakopano tša Lefase. Ditumelelano tšeo di tla swanelwa ke go amogelwa
ke Kopanokgothekgothe.
2. E tla rulaganya mešomo ya dietšentshi tšeo di ikgethilego ka ditherišano le
gape le go dira ditšhišinyo go dietšentshi tšeo le ka ditšhišinyo tša go romelwa
go Kopanokgothekgothe le go Maloko a Mokgatlo wa Dinagakopano tša
Lefase.

Tema ya 64
1. Khansele ya tša Ekonomi le Leago e tla tšea magato a maleba go hwetša
dipego tša ka mehla go tšwa go dietšentshi tša go ikgetha. E tla dira
dipeakanyo le Maloko a Mokgatlo wa Dinagaopano tša Lefase le dietšentshi
tša go ikgetha go hwetša dipego ka ga magato ao a tšerwego go phethagatša
ditšhišinyo tša yona le go ditšhišinyo ka ga ditaba tšeo di welago ka fase ga
bokgoni bja yona tšeo di dirilwego ke Kopanokgothekgothe.
2. E tla hlagiša maitemogelo a yona ka ga dipego tše go
Kopanokgothekgothe.
Tema ya 65
Khansele ya tša Ekonomi le Leago e swanetše go tliša tshedimošo go
Khansele ya Tšhireletšo gomme e tla thuša Khansele ya Tšhireletšo ge e
kgopelwa bjalo.
Tema ya 66
1. Khansele ya tša Ekonomi le Leago e tla phethagatša mešomo yeo e
welago ka fase ga bokgoni bja yona malebana le go diragatša ditšhišinyo tša
Kopanokgothekgothe.
2. E tla, ka tumelelo ya Kopanokgothekgothe, phethagatša ditirelo ka kgopelo
ya Moloko a Mokgatlo wa Dinagakopano tša Lefase le ka kgopelo ya
dietšentshi tša go ikgetha.
3. E tla phethagatša mešomo yeo ka ge e beilwe go gongwe ka mo gare ga
Tšhata ye goba ka ge e tla fiwa ke Kopanokgothekgothe.
Go bouta
Tema ya 67
1. Leloko le lengwe le le lengwe la Khansele ya tša Ekonomi le Leago le tla
ba le boutu e tee.

2. Diphetho tša Khansele ya tša Ekonomi le Leago di tla dirwa ke bontši bja
maloko ao a lego gona ebile a boutago.
Tshepedišo
Tema ya 68
Khansele ya tša Ekonomi le Leago e tla hloma dikhomišene ka mafapheng a
ekonomi le leago le go tšwetšapele ditokelo tša botho, gomme dikhomišene
tša mohuta woo ka ge di emetšwe gore di phethagatše mešomo ya tšona.
Tema ya 69
Khansele ya tša Ekonomi le Leago e tla mema Leloko lefe goba lefe la
Mokgatlo wa Dinagakopano tša Lefase go Kgatha tema, ka ntle le go bouta,
ka ditshwayashwayong tša yona ka ga ditaba tšeo di nyakago šedi go Leloko
leo.
Tema ya 70
Khansele ya tša Ekonomi le Leago e tla dira dipeakanyo tša gore baemedi ba
dietšentshi tša go ikgetha go kgatha tema, ka ntle le go bouta, ka
ditshwayatshwayong tša yona le ka go ditshwayatshwayong tša dikhomišene
tšeo di hlamilwego ke yona, le gore baemedi ba tšona ba kgathe tema ka go
ditshwayatshwayong tša dietšentshi tše di ikgethilego.
Tema ya 71
Khansele ya tša Ekonomi le Leago e tla dira dipeakanyo tša maleba go tla go
rerišana le mekgatlo yeo e sego ya mmušo yeo e šomago ka ga ditaba tšeo di
lego ka fase ga bokgoni bja yona. Dipeakanyo tšeo di tla dirwa le mekgatlo ya
boditšhabatšhaba le, moo go kgonegago, mekgatlo ya bosetšhaba ka morago
ga go rerišana le Leloko la Mokgatlo wa Dinagakopano leo le amegago.

Tema ya 72
1. Khansele ya tša Ekonomi le Leago e tla bea melao ya yona ya tshepedišo,
go akaretšwa le mekgwa ya go kgetha Mopresidente wa yona.
2. Khansele ya tša Ekonomi le Leago e tla kopana ge go nyakega go latela
melao ya yona, yeo e tlago go akaretša tlhagišo ya go bitša dikopano ka
kgopelo ya bontši bja maloko a yona.
KGAOLO YA XI
KGOELETŠO YA MELLWANE YA GO SE IPUŠE
Tema ya 73
Maloko a Mokgatlo wa Dinagakopano tša Lefase ao a nago le goba tšeago
maikarabelo a taolo ya mellwane yeo batho ba yona ba sego ba hlwa ba
hwetša boipušo bjo bo feleletšego a lemoga molawana wa gore dikgahlego
tša badudi ba tlhago ba mellwane ye di bohlokwa, gomme di amogela bjalo ka
tshephego e bohlokwa kudukudu ditlamego tša go tšwetšapele kudu ka moo
go kgonegago, ka gare ga tshepedišo ya khutšo le tšhireletšo ya
boditšhabatšhaba tšeo di hlomilwego ka mo gare ga Tšhata ye, go phela
gabotse ga badudi ba tlhago ba mellwane ye, le, go latela maikemišetšo a:
a. go netefatša, ka tlhompho ya setšo sa batho bao bao amegago, tlhabollo
ya lenaneo la bona la dipolotiki, ekonomi, leago, le la thuto, go swarwa
gabotse ga bona, le go ba šireletša kgahlanong le ditlaišo;
b. go tšweletša boipušo, go hlokomela ditlhologelo tša sepolotiki tša batho
bao, le go ba thuša ka tlhabollo ye e tšwelago pele ya dihlongwa tša bona
tša sepolotiki, go latela maemo a itšego a mollwane o mongwe le o
mongwe le batho ba ona le maemo a go fapafapana a bona a tlhabologo;

c. go tšweletšapele khutšo le tšhireletšo tša boditšhabatšhaba;
d. go tšwetšapele magato ao a kwagalago a tlhabollo, go hlohleletša
dinyakišišo, le go dirišanammogo gomme, ge go le maleba, ka makgotla
ao a ikgethilego a boditšhabatšhaba ka maikemišetšo go fihlelela
maikemešetšo a leago, ekonomi, le a saetshe ao a beilwego ka mo gare
ga Tema ye; le
e. go fa Mongwaledipharephare tshedimošo, go latela mellwane yeo e
beilwego ke maemo a tšhireletšo le molaotheo, tshedimošo ka ga
dipalopalo le tshedimošo e nngwe ya sebopego sa sethekniki ya go
amana le maemo a ekonomi, leago, le a thuto ka mellwaneng yeo di nago
le maikarabelo go yona e sego mellwaneng yeo Dikgaolo tša XII le XIII di
amegago.
Tema ya 74
Maloko a Mokgatlo wa Dinagakopano tša Lefase gape a amogela gore molao
wa bona wa malebana le mellwane yeo e angwago ke Kgaolo ye, go
akaretšwa mafelo a ditoropong, o swanetše go theiwa godimo ga molawana
wa kakaretšo wa boagišane bjo bokaone, gomme go hlokoetšwe dikgahlego
le go phela gabotse ga lefase ka bophara, ka mererong ya tša leago,
ekonomi, le merero ya tša kgwebo.
KGAOLO YA XII
TSHEPEDIŠO YA DITHRASTI TŠA BODITŠHABATŠHABA
Tema ya 75
Mokgatlo wa Dinagakopano tša Lefase o tla hloma tshepedišo ya
boditšhabatšhaba ya dithrasti ka fase ga taolo ya yona go tla go sepediša le
go hlokomela mellwane yeo ka ge e tla bewa ka fase ke ditumelelano tša
yona tša go tla ka morago. Mellwane ye ka mo e bitšwa mellwane ya thraste.

Tema ya 76
Maikemišetšomagolo a tshepedišo ya dithrasti, go latela Maikemišetšo a
Mogatlo wa Dinagakopano tša Lefase ao a beilwego ka go Tema ya 1 a
Tšhata ye, a tla ba:
a. go tšweletšapele khutšo le tšhireletšo tša boditšhabatšhaba;
b. go tšwetšapele tlhabollo ya tša sepolotiki, ekonomi, leago, le thuto ya
badudi ba tlhago ba mellwane ya thraste, le tlhabollo ya bona ya go
tšwelapele go fihlelela boipušo goba go se tsenatsenwe ka ge go ka ba
maleba go maemo a itšego a mollwane o mongwe le o mongwe le batho
ba ona le ditlhologelo tše di hlagišitšwego ka tokologo tša batho bao ba
amegago, le ka ge di tla hlagišwa ke melawana ya tumelelano e nngwe le
e nngwe ya bothrasti;
c. go hlohleletša tlhompho ya ditokelo tša botho le ya ditokologo tša motheo
tša batho ka moka ka ntle le kgethologanyo ya morafe, bong, polelo, goba
tumelo, le go hlohleletša temogo ya boipušo bja tirišano ya batho ba lefase
ka moka; le
d. go netefatša tshwaro ye e swanago ka ga merero ya leago, ekonomi, le ya
kgwebo go Maloko ka moka a Mokgatlo wa Dinagakopano tša Lefase le
ditšhaba tša tšona, le gape tshwaro ye e swago ya ditšhaba tše ge go
diragatšwa toka, ka ntle le kgethollo gore go fihlelelwe maikemišetšo ao a
tšwelagopele le go latela ditlhagišo tša Tema ya 80.
Tema ya 77
1. Tshepedišo ya dithrasti e tla diragatšwa go mellwane yeo e lego ka fase ga
mafapha a ka ge a tla bewa ka mo fase ka tsela ya ditumelelano tša dithrasti:
a. mellwane yeo e beilwego ka fase ga thomelo;
b. mellwane yeo e tlago tšeelwa dinaga tšeo di lego manaba ka lebaka la
Ntwa ya Bobedi ya Lefase; le

c. mellwane yeo e beilwego ka boithaopo ka fase ga tshepedišo ye ke dinaga
tšeo di nago le maikarabelo a taolo ya yona.
2. E tla ba taba ya ditumelelano tše di tlago ka morago gore naa ke mellwane
efe ka mo mafapheng a yeo e tlago tlišwa ka fase ga tshepedišo ya dithrast le
gona ka fase ga melawana efe.
Tema ya 78
Tshepedišo ya dithrasti e ka se diragatšwe go mellwane yeo e bilego Maloko
a Mokgatlo wa Dinagakopano tša Lefase, tšeo e lego gore kamano ya tšona e
tlago theiwa go tlhompho ya molawana wa tekatekano ya boipušo.
Tema ya 79
Melawana ya dithasti ya mollwane o mongwe le o mongwe wo o tlogo bewa
ka fase ga tshepedišo ya dithasti, go akaretšwa phetošo efe goba efe goba go
e fetola, e tla dumelelanwa ke dinaga tšeo di amegago thwii, go akaretšwa
maatla ao a amanago le mellwane ye e beilwego ka fase ga thomelo ke
Leloko la Mokgatlo wa Dinagakopano tša Lefase, gomme e tla amogelwa ka
ge go hlagišitšwe ka go Ditema tša 83 le 85.
Tema ya 80
1. Ka ntle le ge go ka dumelelwa ka go ditumelelano tše itšego tša dithrasti,
tše di dirilwego ka fase ga Ditema tša 77, 79, le 81, tšeo di beago mollwane o
mongwe le o mongwe ka fase ga tshepedišo ya dithrasti, le go fihlela ge
ditumelelano tšeo di phethilwe, ga go seo ka mo gare ga kgaolo ye seo se
tlago hlathollwa goba ka bo sina sa fetoša ka tsela efe goba efe ditokelo dife
goba dife tša naga e nngwe le e nngwe goba batho bafe goba bafe goba
melawana ya ditlabelo tše di lego gona tša boditšhabatšhaba tše Maloko a
Mokgatlo wa Dinagakopano tša Lefase a ka bago karolo ya tšona.
2. Temana ya 1 ya Tema ye ga se ya swanelwa go hlathollwa bjalo ka yeo e
fago mabaka a go ditela goba go fega ga dipoledišano le diphetho tša
ditumelelano tša go bea mellwane yeo e beilwego ka fase ga thomelo le e

mengwe ka fase ga tshepedišo ya dithrasti ka ge go hlagišwa ka go Tema ya
77.
Tema ya 81
Tumelelano ya dithrasti e swanetše go akaretša melawana yeo mollwane o
tlago laolwa ka gona lebakeng le lengwe le le lengwe le go romela taolo yeo e
tlago diragatša taolo ya mollwane wa thraste. Taolo ya mohuta wo, yeo ka mo
fase e bitšwago taolo ya tshepedišo, e tla ba naga e tee goba tše ntši goba
Mokgatlo ka bowona.
Tema ya 82
Go tla ba le, ka tumelelanong efe goba efe ya dithrasti, lefapha goba mafapha
a leano ao a rometšwego ao a ka akaretšago karolo goba goba mellwane ka
moka ya dithraste yeo ditumelelano di di amago, ka ntle le phetošo go
tumelelano efe goba efe ye itšego ye e dirilwego ka fase ga Tema ya 43.
Tema ya 83
1. Mešomo ka moka ya Mokgatlo wa Dinagakopano tša lefase yeo e
amanago le mafapha a leano, go akaretšwa go amogelwa ga melawana ya
ditumelelano tša dithrasti le go fetoša ga yona goba go e fetola, e tla
diragatšwa ke Khansele ya Tšhireletšo.
2. maikemišetšo a motheo ao a beilwego ka go Tema ya 76 a tla ama batho
ba lefapha le lengwe le le lengwe la maano.
3. Khansele ya Tšhireletšo e tla, go latela ditlhagišo tša ditumelelano tša
dithrasti le ka ntle ga diphetošo go tlhokomelo ya tšhireletšo, e tla ba gona go
thuša Khansele ya Dithrasti go phathagatša mešomo ya Mokgatlo wa
Dinagakopano tša Lefase ka fase ga tshepedišo ya dithrasti ya go amana le
merero ya dipolotiki, ekonomi, leago, le ya thuto ka mafapheng a maano.

Tema ya 84
E tla ba mošomo wa taolo ya tshepedišo go netefatša gore mollwane wa
thraste o tla raloka karolo ya yona go tšwetšapele khutšo le tšhireletšo ya
boditšhabatšhaba. Mo lebakeng le, taolo ya tshepedišo e ka šomiša mašole a
boithaopo, dinolofatši, le thušo go tšwa go mollwane wa thraste go
phethagatša ditlamego tša Khansele ya Tšhireletšo tše di phethagatšwago
mo lebakeng le ke taolo ya tshepedišo, gammogo le tšhireletšo le tšwetšopele
ya molao le toka ka gare ga mollwane wa thraste.
Tema ya 85
1. Mešomo ya Mokgatlo wa Dinagakopano tša Lefase mabapi le ditumelelano
tša dithrasti tša mafapha ka moka tšeo di sego tša beakanywa bjalo ka tša
maano, go akaretšwa kamogelo ya melawana ya ditumelelano tša dithrasti le
diphetošo le go fetolwa ga tšona, di tla diragatšwa ke Kopanokgothekgothe.
2. Khansele ya Dithrasti, yeo e šomago ka fas ga taolo ya
Kopanokgothekgothe, e tla thuša Kopanokgothekgothe go diragatša mešomo
ye.
KGAOLO YA XIII
KHANSELE YA DITHRASTI
Sebopego
Tema ya 86
1. Khansele ya Dithrasti e tla ba le Maloko ao a latelago a Mokgatlo wa
Dinagakopano tša Lefase:
a. Maloko ao a laolago mellwane ya thraste;
b. Maloko ao go boletšwego ka ga ona ka maina ka go Tema ya 23 ga a laole
mellwane ya thraste; le

c. Maloko a mantši ao a kgethilwego go šoma mengwaga e meraro ke
Kopanokgothekgothe ka ge go ka ba maleba go netefatša gore palomoka
ya maloko a Khansele ya Dithrasti e aroganywa ka go lekana magareng
ga Maloko a Mogatlo wa Dinagakopano tša Lefase ao a laolago mellwane
ya thraste le yeo e sa e laolwego.
2. Leloko le lengwe le le lengwe le tla romela motho yo a nago le maswanedi
go le emela ka gare ga Khansele ye.
Mešomo le Maatla
Tema ya 87
Kopanokgothekgothe le, ka fase ga taolo ya yona, Khansele ya Dithrasti, ge
di diragatša mešomo ya tšona, di tla:
a. amogela dipego tšeo di rometšwego ke taolo ya tshepedišo;
b. amogela dikgopelo le go di lekola ka go rerišana le taolo ya tshepedišo;
c. dumelela diketelo tša dinako tše itšego tša go ya go mellwane ya dithraste
go fapafapana ka dinako tšeo di dumeletšwego gammogo le taolo ya
tshepedišo; le
d. tšea magato a le a mangwe ka go latela melawana ya ditumelelano tša
dithrasti.
Tema ya 88
Khansele ya Dithrasti e tla ngwala dipotšišodinyakišišo ka ga tlhabollo ya
dipolotiki, ekonomi, leago, le thuto tša badudi ba tlhago ba mollwane o
mongwe le o mongwe wa thraste, gomme taolo ya tshepedišo ya mollwane o
mongwe le o mongwe wa thraste ka fase ga taolo ya Kopanokgothekgothe e
tla ngwala pego ya ngwaga le ngwaga yeo e theilwego go ditlhagišo tša
dipotšišonyakišišo tšeo.

Go bouta
Tema ya 89
1. Leloko le lengwe le le lengwe la Khansele ya Dithrasti le tla ba le boutu e
tee.
2. Diphetho tša Khansele ya Dithrasti le Leago di tla dirwa ke bontši bja
maloko ao a lego gona ebile a boutago.
Tshepedišo
Kgaolo ya 90
1. Khansele ya Dithrasti e tla bea melao ya yona ya tshepedišo, go akaretšwa
tsela ya go kgetha Mopresidente wa yona.
2. Khansele ya Dithrasti e tla kopana ka moo go nyakegago ka go molao wa
yona, yeo e tlago akaretša go bitša dikopano ka kgopelo ya go tšwa go bontši
bja maloko a yona.
Tema ya 91
Khansele ya Dithrasti e tla, ge go le maleba, ba gona go thuša Khansele ya
tša Ekonomi le Leago le go thuša dietšentshi tše di ikgethilego mabapi le
ditaba tšeo di amegago.
KGAOLO YA XIV
KGOROTSHEKO YA TOKA YA BODITŠHABATŠHABA
Tema ya 92
Kgorotsheko ya Toka ya Boditšhabatšhaba e tla ba setho se segolo sa molao
sa Mokgatlo wa Dinagakopano tša Lefase. E tla šoma go latela Molao wo o
tsentšwego ka mo, wo o theilwego godimo ga Molao wa Kgorotsheko ya sa
Ruri ya Boditšhabatšhaba ebile le hlama karolo e bohlokwa ya Tšhata ye.

Tema ya 93
1. Maloko ka moka a Lekgotla la Dinagakopano tša Lefase ke dikarolo tša
Molao wa Kgorotsheko ya Toka ya Boditšhabatšhaba.
2. Naga yeo e sego leloko la Mokgatlo wa Dinagakopano tša Lefase e ka ba
karolo ya Molao wa Kgorotsheko ya Toka ya Boditšhabatšhaba yeo e tlago
laolwa mabakeng ka moka ke Kopanokgothekgothe ka morago ga tšhišinyo
ya Khansele ya Tšhireletšo.
Tema ya 94
1. Leloko le lengwe le le lengwe la Mokgatlo wa Dinagakopano tša Lefase le
tshephiša go obamela sephetho sa Kgorotsheko ya Toka ya
Boditšhabatšhaba seo se tla bego se le amago.
2. Ge leloko leo le angwago ke molato le palelwa ke go diragatša ditlamego
tša lona ka fase ga kahlolo ye e filwego ke Kgorotsheko, leloko leo le
tlišitšego molato le tla kgopela thušo go Khansele ya Tšhireletšo, yeo e tlago,
ge e bona go le maleba, dira ditšhišinyo goba ya tšea sephetho ka ga magato
ao a ka tšeiwago go tšweletša pele kahlolo yeo.
Tema ya 95
Ga go na seo se lego ka mo gare ga Tšhata ye seo se tlogo thibela Maloko a
Mokgatlo wa Dinagakopano tša Lefase go diragatša sephetho sa dikgohlano
tša bona go makgotlatsheko a mangwe a selegae ka ditumelelano tšeo di
šetšego di le gona goba tšeo di tlogo fetšwa ka moso.
Tema ya 96
1. Kopanokgothekgothe goba Khansele ya Tšhireletšo e ka kgopelo
Kgorotsheko ya Toka ya Boditšhabatšhaba go fa keletšo ka ga potšišo efe
goba efe ya go amana le molao.

2. Ditho tše dingwe tša Mokgatlo wa Dinagakopano tša Lefase le dietšentshi
tšeo di ikgethilego, tšeo di tlago dumelelwa nako efe goba efe ke
Kopanokgothekgothe, gape di ka kgopela dikeletšo go Kgorotsheko ya Toka
ya Boditšhabatšhaba ka ga dipotšišo tša go amana le molao tšeo di
tšweletšwago ke mešomo ya tšona.
KGAOLO YA XV
BONGWALEDI
Tema ya 97
Bongwaledi bo tla ba le Mongwaledipharephare le bašomi bao Mokgatlo o ka
nyakago ka gona. Mongwaledipharephare o tla kgethwa ke
Kopanokgothekgothe ka tumelelo ya Khansele ya Tšhireletšo. O tla ba
Mohlankedimogolo wa tshepedišo wa Mokgatlo.
Tema ya 98
Mongwaledipharephare o tla šoma ka maatla ao ka dikopanong ka moka tša
Kopanokgothekgothe, tša Khansele ya Tšhireletšo, tša Khansele ya tša
Ekonomi le Leagol, le tša Khansele ya Dithrasti, gomme o tla šoma mešomo
e mengwe yeo a tla e fiwago ke ditho tše. Mongwaledipharephare o swanetše
go ngwala pego ya ngwaga ka ngwaga ka ga mošomo wa Mokgatlo.
Tema ya 99
Mongwaledipharephare o tla tliša taba efe goba efe go Khansele ya
Tšhireletšo yeo go ya ka maikutlo a gagwe e tlago tšhošetša tšwetšopele ya
Khutšo le tšhireletšo tša boditšhabatšhaba.
Tema ya 100
1. Ge ba diragatša mešomo ya bona Mongwaledipharephare le bašomi ba ka
se kgopele ditaelo goba ba di amogela go tšwa go naga efe goba efe goba go
taolo efe goba efe yeo e lego ka ntle ga Mokgatlo. Ba tla efoga tiro efe goba

efe, bjalo ka bahlankedi ba boditšhabatšhaba, ye e ka bago le maikarabelo
fela go Mokgatlo.
2. Leloko le lengwe le le lengwe la Mokgatlo wa Dinagakopano tša Lefase le
ikemišeditše go hlompha sebopego sa boditšhabatšhaba sa maikarabelo a
Mongwaledipharephare le bašomi gomme le go se nyake go ba huetša ge ba
dira mešomo wa bona.
Tema ya 101
1. Bašomi ba tla thwalwa ke Mongwaledipharephare ka fase ga melawana ye
e beilwego ke Kopanokgothekgothe
2. Bašomi ba maleba ba tla romelwa sa ruri go Khansele ya tša Ekonomi le
Leago, go Khansele ya Dithrasti, le, ka ge go nyakega, go ditho tše dingwe
tša Mokgatlo wa dinagakopano tša Lefase. Bašomi ba ba tla bopa karolo ya
Bongwaledi.
3. Diphetho tše kgolo ka ga go thwalwa ga bašomi le ka go laola maemo a
tirelo a bašomi e tla ba tshwanelo ya go hwetša maemo a godimo a go šoma
mošomo gabotse, bokgoni, le serithi. Tlhokomelo ye itšego e tla išwa go
bohlokwa bja go thwala ga bašomi ba go tšwa go go phatlalala ga dinaga ka
moo go ka kgonegago.
KGAOLO YA XVI
DITLHAGIŠO TŠA KAKARETŠO
Tema ya 102
1. Tumelelano efe goba efe le kwano efe goba efe ya bodiyšhabatšhaba yeo
e tsenetšwego ke Leloko lefe goba lefe la Mokgatlo wa Dinagakopano tša
Lefase ka mo gare ga Tšhata ye e diragatšwago e tla ngwadišwa ka bjako ka
moo go kgonegago le Bongwaledi le go phatlalatšwa ke yona.

2. Ga go karolo go tumelelano ya mohuta woo goba ya kwano ya
boditšhabatšhaba yeo e sego ya ngwadišwa go latela ditlhagišo tša temana
ya I ya Tema ye e ka dirago boipiletšo kgahlanong le tumelelano goba kwano
yeo pele ga setho sefe goba sefe sa Mokgatlo wa Dinagakopano tša Lefase.
Tema ya 103
Ge go na le kgohlano magareng ga ditlamego tša Maloko a Mokgatlo wa
Dinagakopano tša Lefas ka fase ga Tšhata ye le ditlamego tša bona ka fase
ga kwano ye nngwe ya boditšhabatšhaba, ditlamego tša bona ka mo fase ga
Tšhata ye di tla šoma.
Tema ya 104
Mokgatlo o tla ba le maswanedi a maatla a molao ka mollwaneng wa Leloko
le lengwe le le lengwe ao a tlago bonwa a le maleba go diragatša mešomo ya
yona le go phethagatša maikemišetšo a yona.
Tema ya 105
1. Mokgatlo o tla ba le maswanedi a menyetla le tokologo ka mollwaneng wa
Leloko le lengwe le le lengwe tšeo di tlago bonwa di le maleba go diragatša
mešomo ya yona.
2. Baemedi ba Maloko a Mokgatlo wa Dinagakopano tša Lefase le bahlanked
ba Mokgatlo le bona ba tla ba le Maswanedi a menyetla yeo le ditokologo
tšeo ka ge di le maleba go diragatša mešomo ya bona ya mabapi le Mokgatlo
ka tokologo.
3. Kopanokgothekgothe e tla dira ditšhišinyo ka maikemišetšo a go laola
dintlha ditemana tša 1 le 2 tša Tema ye goba e ka šišinya gore go bitšwe
dikopano go Maloko a Mokgatlo wa Dinagakopano tša Lefase go phethagatša
mošomo wo.

KGAOLO YA XVII
DIPEAKANYO TŠA TŠHIRELETŠO TŠA PHETIŠETŠO
Tema ya 106
Go latela go diragatšwa ga dipeakanyo tša mohuta woo tša go ikgetha tše go
boletšwego ka tšona ka go Tema ya 43 ka ge maikutlo a Khansele ya
Tšhireletšo a e kgontšha go thoma go phethagatša mešomo ya yona ka fase
ga Tema ya 42, maloko a Tsebagatšo ya Dinaga tše Nne, ye e saennwego
Moscow, 30 Oktoboro 1943, le France, di tla, go latela ditlhagišo tša temana
ya 5 ya Tsebagatšo, a tla rerišana gomme ge maemo a nyaka, ba tla rerišana
le Maloko a mangwe a Mokgatlo wa Dinagakopano tša Lefase ka
maikemišetšo a go diragatša tiro yeo ya mohlakanelwa legatong la Mokgatlo
ge go ka ba maswanedi go phethagatša maikemišetšo a go tšwetšapele
khutšo le tšhireletšo tsa boditšhabatšhaba.
Tema ya 107
Ga se gona ka mo gare ga Tšhata ye seo se tlago ganetša goba sa thibela
tiro, kgahlanong le naga efe goba efe yeo nakong ya Ntwa ya Bobedi ya
Lefase e bilego lenaba la naga ye e saennego Tšhata ye, le e tšerego goba le
e dumeletšego ka lebaka la ntwa yeo ke Mebušo ye e nago la maikarabelo ya
tiro yeo.
KGAOLO YA XVIII
DIPHETOŠO
Tema ya 108
Diphetošo go Tšhata ye di tla diragatšwa go ama Moloko ka moka a Mokgatlo
wa Dinagakopano tša Lefase ge di amogetšwe ke boutu ya peditharong ya
maloko a Kopanokgothekgothe gomme tša tiišetšwa go latela ditshepedišo
tša melaotheo tša tšona ke peditharong ya Maloko a Mokgatlo wa

Dinagakopano tša Lefase, go akaretšwa maloko ka moka a sa ruri a Khansele
ya Tšhireletšo.
Tema ya 109
1. Kkhonferentshe ya Kakaretšo ya Maloko a Mokgatlo wa Dinagakopano e
tla swarwa go tla go lekodišiša Tšhata ye ka letšatšikgwedi le lefelo leo le tla
go beiwa ke boutu ya peditharong ya maloko a Kopanokgothekgothe le ka
boutu ya maloko afe goba afe a senyane a Khansele ya Tšhireletšo. Leloko le
lengwe le le lengwe la Mokgatlo wa Dinagakopano tša Lefase le tla ba le
boutu e tee ka khonferentsheng.
2. Phetošo efe goba efe ya Tšhata ye ye e šišintšwego ke boutu ya
peditharong ya khonferentshe e tla diragatšwa ge e tiišeditšwe go latela
ditshepedišo tša melaotheo ya tšona ke peditharong ya Maloko a Mokgatlo
wa Dinagakopano tša Lefase go akaretšwa maloko a sa ruri Khansele ya
Tšhireletšo.
3.Ge khonferentshe yeo e se ya swarwa pele ga go swarwa ga kopano ya
bolesome ya ngwaga ka ngwaga ya Kopanokgothekgothe go latela go
diragatšwa ga Tšhata ye, tšhišinyo ya go bitšwa khonferentshe yeo e tla
beiwa go lenaneothero la tulo yeo ya Kopanokgothekgothe, gomme
khonferentshe e tla swarwa ge go ka tšeiwa sephetho ke boutu ya bontši bja
maloko a Kopanokgothekgothe gape le ka boutu ya maloko afe goba afe a
šupa a Khansele ya Tšhireletšo.
KGAOLO YA XIX
TIIŠETŠO LE GO SAENA
Tema ya 110
1. Tšhata ye e tla tiišetšwa ke dinaga tše di saenago go latela ditshepedišo
tša melaotheo ya tšona.

2. Ditiišetšo tše di tla bolokwa go Mmušo wa United States of America, wo o
tlago tsebiša dinaga tše di saenago ka ga go poloko e nngwe le e nngwe
gammogo le Mongwaledipharephare wa Mokgatlo ge a šetše a thwetšwe.
3. Tšhata ye e tla bolokwa ka morago ga tiišetšo ya Rephapoliki ya China,
France, Union of Soviet Socialist, United Kingdom of Great Britain le Northern
Ireland, le United States of America, le ka bontšhi bja dinaga tše dingwe tšeo
di saenago. Phorothokholo ya ditiišetšo tšeo e tla ngwalwa ke Mmušo wa
United States of America gomme e tla romela dikhopi gomme morago ga moo
go dinaga tše di saenago.
4. Dinaga tšeo di saenago Tšhata ye tšeo di e tiišetšago ka morago ga ge e
šoma ba tla ba Maloko a mathomong a Mokgatlo wa Dinagakopano tša
Lefase ka letšatšikgwedi la go bolokwa ga ditiišetšo tša bona.
Tema ya 111
Tšhata ye, ye e lego gore dingwalwa tša Setšhaena, Sefora, Serašia,
Seisemane, le tša Sepeniše di lego tša mmakgonthe ka go lekana, di tla
dulwa di bolokilwe ka bolotelong bja dilo tša kgale tša Mmušo wa United
States of America. Dikhopi tše di saenwego di tla romelwa ke Mmušo woo go
Mebušo ya dinaga tše di saenago.
KA TUMELO YE baemedi ba Mebušo ya Mokgatlo wa Dinagakopano tša
Lefase ba saenne Tšhata ye.
YE E DIRILWEGO toropokgolong ya San Francisco letšatšing la
bomasomepeditshela la Juni, sekete-makgolosenyane-masomennehlano.