hotuba ya mkuu wa mkoa wa kilimanjaro mhe. leonidas t. gama ...

HOTUBA YA MKUU WA MKOA WA KILIMANJARO
MHE. LEONIDAS T. GAMA KATIKA UFUNGUZI WA
MAFUNZO YA WAHESHIMIWA MADIWANI, WATENDAJI
NA WENYEVITI WA MITAA TAREHE 10/12/2012
KATIKA MANISPAA YA MOSHI.
• Mhe. Mstahiki Meya wa Manispaa ya Moshi;
• Wahe. Madiwani;
• Ndugu. Mkurugenzi wa Manispaa ya Moshi;
• Ndugu. Wataalam wa Manispaa ya Moshi;
• Ndugu wenyeviti wa Mitaa;
• Waandishi wa habari;
• Mabibi na Mabwana:
Kwanza kabisa, ninapenda nichukue fursa hii kuushukuru uongozi wa
Manispaa ya Moshi kwa kuweza kuandaa mafunzo haya na kunipa
nafasi ya kufungua mafunzo haya muhimu yanayohusu suala zima la
Utawala Bora.
Ndugu wanasemina;
Kuwepo kwa mafunzo haya kunatokana na ukweli kwamba Serikali
iliyoko madarakani inaweka mkazo katika suala la Utawala Bora kwani ni
kichocheo kikubwa cha maendeleo ya Taifa lolote lile. Dhana ya Utawala
Bora ni kuwa na Serikali au chombo kinachowajibika kwa manufaa ya
wale waliokichagua au kukiunda. Aidha Utawala Bora unaozingatia haki,
Sheria na misingi yote ya uwazi na uwajibikaji husaidia kuleta
mabadiliko chanja na ya haraka. Kwa mantiki hiyo, popote pale ambapo
viongozi na watendaji wamekiuka dhana na misingi ya Utawala Bora,
tumeshuhudia kuwepo kwa malalamiko na kero nyingi za wananchi na
kuendelea kuichukia Serikali.
Ndugu wana Semina,
Nimekuwa nikifuatilia suala zima la Utawala Bora katika Halmashauri zote
za mkoa huu na Manispaa hii ikiwa ni mojawapo ya Halmashauri hizo. Yapo
mambo mengi ambayo sijaridhika nayo kabisa. Mimi binafsi nimefanya
mikutano ya hadhara, vikao maalum na makundi mbalimbali kama vile
waalimu na nimehudhuria vikao vya WDC nimejionea hali ilivyo. Hali
1

kadhalika taarifa ya timu ya Kitaifa na Kimkoa iliyofanya tathmini ya
utekelezaji wa vigezo vya Utawala Bora inaonyesha kuwa utekelezaji uko
katika kiwango cha chini sana.
Ndugu wana Semina,
Mapungufu mengi niliyoyabaini na yale yaliyobainishwa na timu ya tathmini
yanatokana na kufanyika vikao kimtindo, vikao kukosa agenda za msingi,
vikao kusukumwa na matukio badala ya mikakati ya maendeleo, Maafisa
na Wataalamu wa Halmashauri kutokushiriki kwenye vikao vya ngazi za
kata na mitaa ili kusaidia kujibu hoja na kero za wananchi. Matokeo ya
kasoro hii ni kupotea kwa haki na stahili za watumishi na wadau wengine
wa Manispaa ama kupuuzwa au kucheleweshwa bila sababu yoyote ya
msingi, kufanya kazi kwa mazoea na kuwepo kwa mikutano ya viongozi
ambayo haipokei na kutoa majibu ya kero za wananchi. Na mahali pengine
vikao kutokuwepo kabisa.
Ndugu wana Semina,
Pia imebainika kuwa utaratibu wa kuwapima watumishi kwa njia ya uwazi
(OPRAS) hautumiki. Watumishi hawajazi OPRAS, na pale zinapojazwa
hakuna mapitio ya nusu mwaka au mwaka ya kupima kiwango cha
utekelezaji wa malengo na uwezo wa mtumishi husika. Matokeo yake ni
kushindwa kuwapandisha watumishi madaraja, kushindwa kutambua
uwezo halisi wa watumishi, kufanya kazi bila malengo, na kuwa na
mipango/mikakati ambayo kiwango cha utekelezaji hakipimiki. Vilevile
husababisha kushindwa kuwabaini watumishi wazembe ambao utendaji
wao hauridhishi na wale ambao wanastahili kuchukuliwa hatua za
kinidhamu. Kando ya kukosekana kwa mfumo wa upimaji wa utendaji kazi
kwa uwazi pia tumeshindwa kutekeleza mkataba wa huduma kwa mteja.
Hatuna sera ya huduma kwa mteja ndiyo maana matatizo na malalamiko
mengi hayapokelewi na yanapopokelewa hayatolewi majibu kwa wakati na
kutumika kwa lugha chafu na majibu yasiyoridhisha kwa wateja. Suala hili
nilishalitolea maelezo wakati wa ziara yangu na leo hii ninapenda kurudia
kutoa wito kwa watumishi wa Manispaa hii wanaoendelea kutumia lugha
chafu na kutoa majibu yasiyo saidia kutatua kero za wateja kuacha tabia
hiyo na namwagiza Mkurugenzi kuanza kuchukua hatua za kisheria na
kinidhamu kwa wale wote watakaobainika.
Ndugu wanasemina
2

Jambo lingine ambalo ningependa nilizungumzie ni suala zima la
uwajibikaji. Utawala Bora unaendana na kuonyesha njia. Tukumbuke kuwa
uongozi ni dhamana, na tumechaguliwa katika nafasi mbalimbali kama
wawakilishi wa wananchi na wengine ni watumishi tulioajiriwa kama
wataalamu ndani ya Manispaa. Hivyo basi tunao wajibu mkubwa sana wa
kuwaletea wananchi maendeleo. Hakuna namna tunaweza kufanya hivyo
bila ya kubadilisha mfumo wa kufanya kazi kwa mazoea na kutegemea
bajeti ya Serikali tu. Ni vema sasa tuanze kubadilika na kutumia fursa
tulizonazo kubuni vyanzo vya kupata fedha, ikiwa ni pamoja na kushirikiana
na Sekta binafsi, kupitia mpango wa “Public Private Partnership”
(PPP) katika kutekeleza miradi yetu ya maendeleo. Manispaa ya Moshi
imejaliwa kuwa na maeneo mbalimbali ya kuwekeza ambayo hayatumika
ipasavyo. Napenda kutoa wito kwenu kuanza kubuni njia bora ya kutafuta
wabia kama vile NSSF, PSPF na TIB ili waweze kushirikiana na Halmashauri
hii katika kuwekeza katika miradi mikubwa itakayowezesha Halmashauri
kuongeza mapato na ajira.
Ndugu wanasemina;
Napenda kuwafahamisha kuwa Serikali ya Chama cha Mapinduzi (CCM)
imekuwa ikiongeza bajeti ya Manispaa ya Moshi mwaka hadi mwaka. Kwa
mfano katika kipindi cha mwaka 2011/2012 ruzuku ya maendeleo ilikuwa
shilingi 2,122,113,200 na mwaka 2012/2013 iliongezeka na kufikia Tshs.
2,965,627,222. Madhumuni ya Serikali ni kuhakikisha kuwa huduma
zinaendelea kuboreshwa ili wananchi waweze kuishi maisha bora zaidi.
Natoa wito kwa viongozi na watendaji walipo hapa kusimamia matumizi
sahihi ya fedha za Serikali kwa kuzingatia sheria, kanuni na taratibu
zilizowekwa. Waheshimiwa Madiwani tumieni fursa hii na dhamana
mliyopewa na wananchi kuwaeleza ukweli na tusiwapotoshe wananchi
kuwa Serikali haijafanya kitu.
Ndugu wana semina;
Ni kutokana na mapungufu hayo niliamua kutoa waraka Na. 2 wa mwaka
2012 na waraka Na. 3 wa mwaka 2012 kuhusu uendeshaji wetu wa vikao
3

vya Kamati za Maendeleo za Kata (WDC) na uwajibikaji wa wakuu wa Idara
na Vitengo katika kusimamia shughuli za maendelo ngazi za Kata na Mitaa.
Ni matumaini yangu kuwa, baada ya mafunzo haya uwajibikaji na utendaji
wetu utabadilika. Tutahama kutoka kwenye kufanya kazi kwa mazoea
“Working with Experience” na kufanya kazi zenye matokeo chanya kwa
wananchi, “Working with Result Oriented”. Kwa mantiki hiyo
nategemea kupitia mafunzo haya mkazo zaidi utawekwa katika kuhakikisha
mambo yafuatayo yanazingatiwa:-
i. Vikao vyote vya kisheria vya Idara na WDC vitafanyika. Kwa mpango
wa kuwa na Kikao kimoja cha Idara kwa kila mwezi na kikao kimoja
cha WDC kwa kila kata kila robo mwaka.
ii.
iii.
iv.
Vikao vipokee taarifa za utekelezaji wa shughuli za Serikali
zilizofanywa katika mitaa na taarifa hizo zikielekezwa kisekta kama
vile Kilimo, Afya, Utawala, Elimu, Maendeleo ya Jamii, Mifugo na
Ushirika. Aidha kila mtaalamu aliyepo katika Kata atawajibika
kuwasilisha shughuli zilizotekelezwa ndani ya Sekta yake na kushauri
namna ya kutatua kero/malalamiko ya wananchi.
Sekta ambayo kwa bahati mbaya haitakuwa na mtaalamu katika
ngazi ya Kata, Katibu wa WDC baada ya kushauriana na Mwenyekiti
wake awasiliane na Mkurugenzi Mtendaji wa Halmashauri ili aweze
kutuma mtaalamu huyo kwa kushiriki vikao husika kwa ufafanuzi na
maelekezo ya kitaalamu kwa mujibu wa Sekta husika.
Wakuu wa Idara na Vitengo kuhakikisha kwamba kila mwezi
wanakuwa na ratiba ya siku chache za kufanya shughuli ndani ya
ofisi na ratiba nyingine yenye siku nyingi za kwenda katika kata na
mitaa kwa lengo la kutambua kero/malalamiko yanayowakabili
wananchi na kutafuta njia bora ya kumaliza kero hizo.
v. Mfumo wa upimaji wa utendaji kazi wa watumishi kwa uwazi
(OPRAS) utumike ipasavyo na Manispaa iwe na mkataba wa huduma
kwa mteja ikiwa ni pamoja na afisa anayeshughulika na malalamiko
ya wananchi.
4

Kabla sijahitimisha hotuba yangu napenda kutoa rai kwa Madiwani na
wenyeviti wa mitaa kuwa karibu na wananchi kwa kufanya mikutano
ambayo itatumika kusikiliza kero/malalamiko ya wananchi na siyo
kutoa hotuba na maelekezo ya mara kwa mara. Nataka
kuwadhihirishia kuwa tukifuata mtindo huu tutaweza kujifunza mengi
na kuelewa matatizo ya msingi waliyonayo wananchi.
Mwisho;
Kutekeleza dhana ya utawala bora ni pamoja na kuhakikisha mji wetu
wa Moshi unaendelea kuwa safi. Nimefurahishwa kuwa Manispaa
imetenga maeneo sita (6) ambayo yatatumiwa na wafanyabiashara
ndogondogo ambao kwa sasa wanaonekana kuzagaa kwenye
maeneo mengi ya mji. Napenda kusisitiza kuwa sheria ndogondogo
(By-Laws) zitumike kuhakikisha maeneo haya yanatumika ili tuweze
kuuweka mji katika hali ya usafi zaidi.
Baada ya kusema hayo, napenda kutoa shukrani zangu kwa mara
nyingine tena kwa uongozi wa Manispaa kuweza kunikaribisha katika
Semina hii muhimu sana kwa maendeleo ya wana-Moshi. Tumieni
muda huu wa siku 10 kujifunza kwa makini ili kupata njia bora za
kusimamia, kuelekeza na kutatua kero/malalamiko ya wananchi.
Napenda sasa nitangaze kuwa Semina/mafunzo haya yamefunguliwa
rasmi.
NAWATAKIA KILA LA HERI KATIKA MAFUNZO HAYA
“AKSANTENI KWA KUNISIKILIZA”
5