JADRAN PISMO d - Daily Local News on Board

<strong>JADRAN</strong> <strong>PISMO</strong> d.o.o
FILIPINO/TAGALOG
KARAPATANG MAGPALATHALA © 2008 – Ang maiigsing balitang nalalathala sa Jadran pismo ay mula
sa mga nakalap na ulat sa radyo, telebisyon at dyaryo sa Pilipinas. Sa pamamagitan nito, hinihimok ng
ahensya na ibahagi ang siping ito sa mga kababayang nagnanais na makibalita. Maliban lamang sa mga
impormasyong libre, ang mga bagay na may direktang kopirayt ang Jadran pismo d.o.o, Rijeka ay hindi
maaaring sipiin, gamitin, kopyahin o paramihin sa kahit anong paraan ng walang lisensya o pahintulot
mula sa tagapaglathala, o ipamigay, o ipadala sa mga indibidwal
o mga barkong hindi suskritor nito.
FOREX
P47.23 sa US$1 (P47.28 kahapon)
MAGANDANG UMAGA PO!!!
Ang mga sumusunod na balita ay nailathala sa mga
pangunahing pahayagan sa Pilipinas ngayong araw,
HUWEBES, 21 MAYO 2009.
MGA ULO NG BALITA SA WIKANG INGLES
National <strong>News</strong>
• 24 million voters can make a ‘big’ difference in 2010
• Palace open to proposal of a 3-year tuition hike moratorium
• Arroyo dips fingers into Hayden Kho sex scandal
• Kristina-Hayden sex tapes selling like hotcakes
• Government employees are better off than regular workers
• Gabriela wants Alec Baldwin declared persona-non-grata
• Abu Sayyaf leader, 4 other thrown out from Malaysia
• Malacanang distances itself from Bayani’f presidential plans
• House approves P6,500 additional wage for teachers
• Navy releases ultimatum vs Gadian
• Budget deficit balloons to P8-B in April
• Senate Committee to decide on Villar’s fate
• Joker likens Villar to Ninoy
OFW <strong>News</strong>
• More than P73-M given to displaced OFWs
• Pinoy sentenced in Kuwait expected to be given pardon
• Villar helps maltreated Pinay to come home
Regional
• Solon’s staff charged for child molestation
• Kidnap-for-ransom group in Zamboanga organized
• 3 killed, 2 wounded in Laguna shooting
• CHR continues probe in Davao killings
• Government engineer arrested
• Isabela mayor ambushed
• 9 fishermen in Pangasinan still missing
Foreign <strong>News</strong>
• US reports 2 deaths linked to A/H1N1 virus
• Oil prices hits $60 level

• A/H1N1 in Japan now in Tokyo
Sports
• Pacquiao spent $600,000 in Hatton fight
• 24/7 coverage on Mayweather-Marquez fight to be aired on June 27
• Ginebra 1 win away for semis slot
• Smart Gilas slides down in FIBA-Asia
Showbiz
• Katrina Halina hopes career won’t be affected by scandal
• Kris Allen is new American Idol winner
• Asia Agcaoili shares her joy as a mother
• Sharon to give P10-M reward for evidence of Kiko’s mistress
• Aleck Bovick becomes a laughing stock at Senate probe
Odds and Ends
• 7 hospitalized for opening stinking fridge
Pinoy Trivia
• Bonifacio monument
BUOD NG MGA BALITA
PAMBANSA
24-M botante pandaya sa 2010
PINANGANGAMBAHAN ang paglobo ng flying voters sa 2010 presidential elections
matapos ilutang ng isang mambabatas na umaabot sa 24 milyon ng tinatayang 48
milyong rehistradong botante ang kwestiyonable sa listahan ng Commission on
Elections (Comelec). Dahil dito, inaprubahan ng mababang kapulungan ng Kongreso
ang isang panukala na layong linisin ang voter’s registration list upang matigil ang
pandaraya at nagkalat na flying voters sa darating na halalan. Ayon kay Rep. Teodoro
Locsin Jr. (1st District, Makati City), may akda ng House Bill 6052, ang 24 milyon na
registered voters na hindi dumaan sa biometrics process ay kinakailangang muling
magparehistro sa Comelec bago ang halalan.
Palasyo ‘go’ sa 3-taong tigil-taas tuition
SUPORTADO ng Malacańang ang tatlong taong moratorium sa tuition fee increases na
isinusulong sa Kamara. Sa ambush interview, sinabi ni Press Secretary Cerge Remonde
na sinusuportahan nila ang panukala nina Kabataan party-list Rep. Mong Palatino at
Bayan Muna Rep. Teodoro Casińo dahil isa ito sa mga isinusulong ng mga magulang
partikular yaong may mga pinag-aaral sa pribadong kolehiyo. Umapela rin si Remonde
sa mga pribadong unibersidad at kolehiyo na huwag basta magtaas ng tuition fee
ngayong papasok na school year na hindi ikinokonsulta ang nasabing bagay sa mga
magulang at mag-aaral. Aminado ang palasyo na dapat na suportahan ng Department
of Education (DepEd) at Commission on Higher Education (CHED) ang House Bill 2440
na siyang nagtutulak na ipagbawal muna ang pagtaas sa singil sa tuition fee sa
susunod na tatlong taon lalo na ngayong panahon ng global economic crisis.

Arroyo nakialam na sa Hayden Kho sex scandal
NAGPAHAYAG na rin ng matinding galit si Pangulong Gloria Macapagal-Arroyo sa
kumalat na sex video na umano'y kinunan at ipinakalat ni Dr. Hayden Kho, ang nobyo
ng kilalang cosmetic surgeon na si Dra. Vicki Bello. Sinabi ni Press Secretary Cerge
Remonde, hindi natutuwa ang Pangulo sa mga pangyayari kung saan nabiktima ang
ilang kilalang personalidad tulad ng artistang si Katrina Halili. Ayon kay Remonde,
umaasa ang Pangulo na kumilos ng mabilis dito ang mga kaukulang ahensya na
nagsasagawa ng imbestigasyon. Welcome din umano sa presidente ang mga hakbang
para palakasin ang mga umiiral na batas para sa proteksyon ng mga kabataan at
kababaihan. Sa Mababang Kapulungan, siniguro naman ni Quezon City Rep. Nanette
Castelo-Daza na mabibigyan ng hustisya si Katrina at iimbestigahan sa Kongreso ang
videos ni Kho. Pinayuhan ni Daza, chair ng committee on women and gender equality,
si Kho na ihanda ang kanyang sarili sa imbestigasyon at sagutin ang ginawa niyang
pang-aabuso sa mga kababaihan. Sinabi naman ni Justice Secretary Raul Gonzalez na
maaaring makasuhan si Kho ng paglabag sa Republic Act 9262 o Violence Against
Women and Children’s Act sa ilalim ng Revised Penal Code. May posibilidad na
mahatulan ng prison mayor si Kho na may parusang pagkakakulong ng anim na taon o
higit pa kung mapapatunayan sa korte na may kinalaman ito sa pagkalat ng kanilang
sex video. Sakaling maisampa ang kaso laban kay Kho, maaaring maghain ng
extradition case ang DoJ para harapin nito ang kasong isinampa sa kanya. Si Kho ay
kasalukuyang nasa Estados Unidos kasama ang si Belo.
Kopya ng DVD at CD ng sex video mabenta sa lansangan
MISTULANG pinagpipistahan at pinagpapantasiyahan naman ng mga parokyano ang
mga pirated CDs at DVDs ang eskandalong kinasasangkutan nina Halili at Kho, makaraang
maging sa lansangan ay kumalat na ang kontrobersiyal na sex video at ibinebenta
sa halagang P150 bawat kopya. Agad namang hiniling ni Senator Ramon
‘Bong’ Revilla sa pamunuan ng Optical Media Board (OMB) na agapan ang pagkalat ng
mga kopya ng sex video na nagsisimula nang kumalat at ibinebenta sa Quiapo. Sinabi
naman ni OMB Chairman at aktor Edu Manzano na nagpakalat na siya ng mga tauhan
upang kumpiskahin ang mga pirated DVD ng sex video, at arestuhin ang copyright
ownership ng footages, at kasuhan ng kriminal.
Mga kawani ng gobyerno mas may pera kumpara sa ibang manggagawa
MAS nakakakain ng sapat ang mga kawani sa gobyerno kumpara sa ibang
manggagawa, habang tumindi naman ang gutom na nararamdaman sa mga pamilya
na nawalan ng trabaho, ayon sa pag-aaral ng Social Weather Stations (SWS). Lumitaw
sa survey ng SWS na ginawa noong Pebrero 20 - 23 na mas matindi ang nadaramang
gutom ng mga pamilya na nawalan ng trabaho. "(The survey) found hunger higher
among the unemployed, especially severe among those who were laid-off from their
jobs," pahayag ng SWS sa kanilang website. Ang listahan ng “total hunger" ay umabot
umano sa 16.9 porsiyento sa pamilya ng mga walang trabaho na nakaramdam ng
involuntarily hunger (at least once) sa nakalipas na tatlong buwan. Mas mataas ito ng
tatlong porsiyento sa bilang ng mga nakaramdam ng gutom sa mga may trabaho (13.9
porsiyento). Samantala, naitala naman sa 12.5 porsiyento ang pamilya ang
nakaramdam ng “moderate hunger" sa pamilyang walang trabaho, kumpara sa 9.6
porsiyento ng mga may trabaho.Ang “severe hunger" sa pamilya ng walang trabaho ay
umabot naman sa 4.4 porsiyento, kumpara sa 4.3 porsiyento ng pamilya na may
trabaho. Sinabi ng SWS na umabot sa pinakamataas na 16.7 porsiyento ang “severe
hunger" sa mga nawalan ng trabaho, kumpara sa 5.1 porsiyento sa mga boluntaryong

umalis sa kanilang trabaho, 4.7 porsiyento sa mga nagsara ang pinapasukan, at 4.2
porsiyento sa mga hindi na na-renew ang kontrata.
Alec Baldwin dapat ideklarang persona non grata---Gabriela
DAPAT iban sa Pilipinas o ideklarang ‘persona non grata’ ang Hollywood actor na si Alec
Baldwin kaugnay sa ‘biro’ nito na planong pagkuha ng Pinay mail-order bride. Para kay
Gabriela Party-List Rep. Liza Maza, hindi dapat papasukin sa Pilipinas ang naturang
aktor hangga’t hindi pa ito nagpapahayag ng kanyang public apology sa mga Filipina.
Una nang napanood sa late night show ni David Letterman, ang pabirong pahayag ni
Baldwin na pinag-iisipan nitong kumuha ng Pinay o Russian mail-order bride. Sa panig
ng Malakanyang, sinabi ni Executive Secretary Eduardo Ermita na sapat na ang
inaaning kritisismo ng aktor mula sa Filipino community sa Amerika upang mapagtanto
nito ang kanyang pagkakamali. Sinabi ng kalihim na nakarating na sa Palasyo ang
report ng DFA na galit ang Filipino-American community sa US sa pahayag ni Baldwin.
Nabatid na personal na lumiham kay Baldwin si RP New York Consul General Cecilia
Rebong upang maiparating sa aktor ang pagkadismaya sa negatibong sinabi nito laban
sa mga Pinay.
Abu Sayyaf lider at 4 pang miyembro, ipinatapon ng Malaysia
ISANG mataas na opisyal ng bandidong Abu Sayyaf at apat nitong miyembro ang
inaresto at ipinatappm mula sa Malaysia pabalik dito sa Pilipinas kahapon. Pawang
nakaposas ang mga bandidong sina Mohammad Hatta Haipe, Borhan Mundos, Gulam
Mundos, Suffian Salih at Hasim Talib habang iniis-kortan ng limang Malaysian police sa
Ninoy Aquino International Airport Terminal 1 sakay ng Malaysian Air flight MH-704
dakong alas-2:10 ng hapon. Si Haipe ay kabilang umano sa mga naging kasamahan ng
nasawing na unang lider ng Abu Sayyaf na si Khadaffi Janjalani habang si Borhan
Mundos ang tumatayong finance officer ng grupo. Sina Salih alias Salip Ikak ang
pasimuno upang makapuslit ang kanilang grupo palabas ng Pilipinas at Hasim Talib
alias Jurim Abdul na inaresto sa Malaysia noong Setyembre 2003 ay pawang isina
sangkot sa Sipaddan kidnapping. Ang pagkaka-aresto sa lima ay base sa kahilingan ng
United States hinggil sa nakabinbing kasong kidnapping at warrant of arrests sa mga
kasong kriminal na naka sampa rin sa Pilipinas laban sa kanila. Isinangkot sila sa pag
kidnap sa ilang dayuhan sa Sipadan noong taong 2000. Sa kasalukuyan ay nasa
pangangalaga sila ng Philippine National Police.
Malakanyang dumistansya sa pagtakbo sa pagka-pangulo ni Bayani
TUMANGGI muna ang Malacańang na magkomento sa pagdedeklara na ni MMDA
chairman Bayani Fernando kaugnay sa pagtakbo nito bilang pangulo sa 2010 elections.
Ito’y kahit nagpapatuloy pa rin ang selection process sa hanay ng Lakas at Kampi kung
sino ang standard bearer sa darating na halalan. Sinabi ngayong umaga ni Press
Secretary Cerge Remonde, maging ang Pangulong Arroyo ay wala pang panahon para
sa pulitika. Ayon kay Remonde, mas mabuting pagtuunan muna ang economic
resiliency programs tulad ng jobs creation nat ipaubaya sa search committee ang
paghahanap ng mamanukin sa eleksyon. Kaugnay nito, mamayang hapon,
pangungunahan ng Pangulo ang meeting sa export sector para alamin ang kanilang
kalagayan matapos tamaan ng global financial crisis.
Dagdag P6,500 na sweldo sa mga guro at iba pa, aprubado na
APRUBADO na sa Kamara ang House Joint Resolution number 36 na naglalayong
baguhin ang kasalukuyang compensation and position classification system para
makatugon sa pangangailangan ng mga empleyado ng pamahalaan. Sa ilalim ng
nasabing resolusyon, ang mga pampublikong guro ay makakatanggap ng kabuuang
P6,500 na karagdagang sweldo sa loob ng apat na taon. Dadalhin ang resolution sa
Senado para sa plenary approval nito. Sa ilalim ng panukala ay magiging P18,549 sa
loob ng apat na taon ang pinakamababang sahod ng mga guro mula sa kasalukuyang

P12,000. Habang para sa mga sundalo, umaabot lamang sa halagang P4,000 sa loob
ng apat na taon o P1,000 bawat taon ang dagdag sa sahod na kanilang matatanggap o
P500 dagdag sahod ngayong taon.
Ultimatum kay Gadian inilabas ng navy
BINIGYAN kahapon ng 48 oras na ultimatum ng liderato ng Philippine Navy si
whistleblower Lt. Senior Grade Mary Nancy Gadian para kusang loob na sumuko
kaugnay ng pinasabog nitong umano’y korapsyon sa P46-M Balikatan fund. Sinabi ni
Navy Spokesman Marine Lt. Col. Edgard Arevalo na kapag nagtapos ang palugit
hanggang alas-10 ng umaga sa Biyernes at nabigong sumuko si Ga dian ay idedeklara
na itong renegade o pugante at ipapatupad na ang ‘apprehension order’ o paghuli dito,
aalisin sa roster ng AFP matapos ang 90 araw simula ng mag-AWOL (Absence Without
Official Leave) at tatanggalan ng mga benepisyo sa serbisyo. Una nang kinaladkad ni
Gadian sa kontrobersya si dating AFP-Western Command Chief ret. Lt. Gen. Eugenio
Cedo na umano’y nakinabang sa P46 M Balikatan fund na aniya’y ginawang ‘milking
cow’ ng mga tiwaling heneral na itinanggi na man ng huli.
Budget deficit, halos umabot sa P8-B noong Abril
UMABOT sa P7.9 bilyon ang Budget Surplus ng bansa nitong nakaraang buwan ng Abril.
Dahil dito, sinabi ng finance officials na umabot sa mahigit P111 bilyon ang deficit sa
unang bahagi ng taon. Paliwanag ng finance department, humina ang tax collection
maging ang expenditures. Pangunahing sinisisi dito ang sinasabing ilang tax measures
na naka-apekto sa mas matino sanang tax collection ng Bureau of Internal Revenue.
Senate Committee magdedesisyunan na tungkol sa kaso ni Villar
NGAYONG araw na dedesisyunan ng Senate Committee of the Whole ang alegasyong
unethical conduct laban kay dating Senate President Manny Villar kaugnay ng
kontrobersyal na C-5 road project. Dito malalaman kung dapat bang ituloy ang pagdinig
na maaari umanong mapatalsik sa Senado si Villar o kung dapat bang ibasura ang
kaso. Una rito, ibinasura ng Committee on Ethics ang nauna nang kaso laban kay Villar
kaugnay sa Norsagaray land grabing case. Inalmahan naman ni Senador Joker Arroyo
kung bakit idinidiin si Villar sa proyektong dumaan sa masusing proseso at inaprobahan
ng lahat ng miembro ng Senate Finance Committee.
'Di pagsipot ni Villar inihalintulad ni Joker kay Ninoy
INIHALINTULAD ni Senador Joker Arroyo nitong Miyerkules si Senador Manny Villar kay
dating Senador Benigno “Ninoy" Aquino Jr., at iba pang “martir" na hindi sumipot sa
paglilitis ng kanilang mga kaso. “There is dignity in not attending a trial with built-in
rules stacked against you," ayon kay Arroyo, na inihalintulad ang ginawang pag-isnab
ni Villar sa pagdinig ng Senado sa ginawa noon nina Aquino, yumaong negosyante na
si Eugenio Lopez Jr., at dating Sen. Sergio Osmeńa III, sa kani-kanilang mga kaso. Ito ay
patungkol sa patuloy na pagmamatigas ni Villar na idepensa ang sarili sa ginagawang
imbestigasyon ng Senate Committee of the Whole kaugnay sa usapin ng C-5 Road
Project. Ipinaalala ni Arroyo na hindi nakisali si Aquino sa ginawang paglilitis sa kanya
sa Military Commission No. 2 hanggang sa masentensyahan siya ng kamatayan noong
administrasyon ni dating Pangulong Ferdinand Marcos.

BALITANG OFW/KWENTONG MARINO
Mahigit P73M naibigay na sa mga OFW na nawalan ng trabaho
MAHIGIT P73 milyon na ang naipautang ng Overseas Workers Welfare Administration
(OWWA) sa mga OFW na nawalan ng trabaho resulta ng nararanang pandaigdigang
krisis pinansyal, ito ang ibinunyag ng naturang ahensya. Batay sa tala ng OWWA,
kabuoang P73,063,155 na ang naibigay na pautang ng ahensa sa 1,473 mga
miyembro bilang Filipino Expatriate Livelihood Support Fund (FELSF). Ang mga FELSF
loans, kung saan ang mga OWWA members ay maaring makahiram ng hanggang
P50,000 ay ibinigay sa mga OFW na napauwi o napaigsi ang mga work contract bilang
resulta ng paglugmok ng pandaigdigang ekonomiya. Ayon sa OWWA, ang utang ay
maaring bayaran sa loob ng dalawang taon sa interest rate na limang porsiyento kada
taon.
Pinoy na nahatulang mabitay sa Kuwait inaasahang bibigyan ng pardon
INAASAHANG mailigtas sa bitay ang isang OFW na nahatulang mamatay sa Kuwait sa
pamamagitan ng pagbitay matapos pumayag na ang pamilya ng kanyang biktima na
patawarin siya. Ayon sa Department of Foreign Affairs malaki ang pagkakataon ni
Bienvenido Espino na maligtas sa bitay matapos pumayag ang pamilya ni Jhayias
Gumapac na patawarin ito. Kagaya no Espino, si Gumapac ay isa ring Pilipino. Naganap
ang pagpatay ni Espino kay Gumapac taong 2007.
Minaltratong Pinay sa Dubai pinauwi ni Villar
NAKAUWI na sa bansa ang isang Pinay na sinaktan ng kanyang amo at ikinulong ng
kanyang ahensya sa Dubai sa tulong ni Senador Manny Villar, na siyang sumagot sa
US$400 halaga ng tiket sa eroplano. Dumating sa Maynila, sakay ng Gulf Air, si Maria
Caridad “Maricar” Evangelista Laganzo, 35, may-asawa at 4 anak. Sumalubong kay
Laganzo sa paliparan ang kanyang pamilya gayundin ang Senador. Noong Oktubre 3,
2008, nagpiket sa harap ng opisina ng Philippine Overseas Employment Administration
(POEA) ang mga grupong Anakpawis at Migrante International upang igiit na aksyonan
ang kaso ng mga overseas Filipino worker (OFW) na nagigipit at hindi makaalis sa mga
bansa sa Gitnang Silangan, tulad ni Laganzo na nanganganib noon sa kamay ng
kanyang ahensya sa Dubai. Sa pagdaraos sa bansa noong nakaraang taon ng
pandaigdigang pulong ukol sa migration at ukol sa pagbabago, inilatag sa Department
of Foreign Affairs ang sitwasyon ni Laganzo at nakapukaw ng pansin ng mga
mamamahayag. Hiningi ng Anakpawis at Migrante ang tulong ni Villar, kilala sa
pagtulong sa mga OFW, na agad namang pumayag na sagutin ang pamasahe ni
Laganzo. Pinadalhan siya ng tiket sa pamamagitan ng e-mail noong Mayo 15. Dumating
si Laganzo sa Dubai noong Oktubre 2007 bilang domestic helper, pero minaltrato siya
ng kanyang amo. Binato raw siya ng upuan, hindi binayaran ng sweldo at tinakot pang
ipakukulong. Noong Setyembre 2009, isinoli si Laganzo sa ahensya dahil nakatanggap
ng maraming tawag mula sa media ang kanyang amo. Ikinulong naman siya ng
ahensya sa loob ng isang buwan sa isang masikip na kusina na halos walang hangin at
pinagdamutan ng pagkain. Hindi rin nila ipinakausap si Laganzo kahit kanino at
madalas umano siyang sinasaktan.

REHIYON
Staff ng solon nanghalik ng sex organ
BAGSAK sa kulungan si John Tiu, 40, campaign staff ni Cong. Annie Susano, matapos na
akusahan siyang nagpumilit na halikan umano ang ari ng isang menor de edad sa loob
ng kanyang bahay. Si Tiu, 40, residente ng New Capitol Estate, Bgy. Batasan Hills,
Quezon City, ay nasa kustodiya na ng QCPD Station 6 at nahaharap sa kasong acts of
lasciviousness. Ayon kay Gio, nangyari ang insidente 1:30 p.m. noong Mayo 17, 2009
sa loob ng bahay ng suspek. Diumano ay niyaya si Gio ng kanyang kaibigan na Carl
(hindi tunay na pangalan) upang pumunta sa bahay ni Tiu para kunin diumano ang
mga pasalubong sa kanila ng suspek na nanggaling sa ibang bansa. Ayon kay Carl,
agad na sinara ng suspek ang pintuan. Sinabi ng biktima na nakita niya si Carl na
kumalong sa suspek at bigla na lang silang naghalikan, dahilan upang magpataymalisya
siya. Mas lalo pang nagulat si Gio nang makita niya ang suspek na hinahalikan
ang ari ni Carl. Hindi pa umano nakuntento ang suspek at hinila siya sa kamay at siya
naman ang hinalikan. Pinilit umano siya ng suspek na kumalong sa kanya at saka
binuksan ang zipper ng pantalon at hinalikan ang kanyang ari. Sinabi ng biktima na
nagpumilit siyang makaalpas sa suspek at agad na tumakas dahil hindi niya masikmura
ang ginagawa sa kanya ng suspek. Agad na nagsumbong ang biktima sa kanyang ina
at nagsampa ng reklamo laban sa suspek.
KFR sa Zamboanga organisadong grupo
BATAY sa nakuhang ebidensya ng militar, nabunyag na ang mga kaso ng kidnapping
na nangyayari ngayon sa Zamboanga Peninsula Region ay kagagawan ng
organisadong grupo. Sinabi ni Task Force Trilium spokesman Captain Neil Estrella,
natuklasan ng militar na ang nasabing mga kidnappers ay binubuo ng limang bahagi
kung saan may kanya-kanya silang trabaho tuwing may dudukuting bihag. Ang limang
grupo ayon kay Captain Estrella ay binubuo ng security at transport group, isang
caretaker na tagapangalaga ng bihag, surveillance team, ang mismong kidnap-forransom
group at ang taong makikipag-ugnayan para sa negosasyon para mapalaya
ang bihag. Aminado si Captain Estrella na modus operandi na ito ng mga kidnappers at
nagpapatunay ito na napaka-organisado ang nasabing grupo. Kasabay nito, umapela
ang militar sa publiko na agad ipagbigay-alam sa mga otoridad kung may mapansing
kaduda-dudang personalidad na umaaligid sa kanilang lugar.
3 patay, 2 sugatan sa pamamaril ng dating barangay chairman sa Laguna
TATLO katao ang iniulat na napatay samantala, dalawang iba pa ang nasugatan
matapos mag-amok at mamaril ang dating barangay chairman kamakalawa ng hapon
sa bayan ng Santa Maria, Laguna. Kabilang sa mga biktimang napaslang ay sina
Monico Aguado, Danilo Caraan at si Felipe Comia samantalang sugatan naman sina
Loreto de Guzman at Jun Ebora. Tugis naman ng pulisya ang suspek na si Gregorio
Manalo, dating chairman ng Barangay Santiago sa nabanggit na bayan. Sa police
report na nakarating kay P/Senior Supt. Manolito Labador, nag-uusap ang mga biktima
sa waiting shed ilang kilometro ang layo sa Poblacion nang dumating si Manalo sakay
ng Mitsubishi L300 van bandang alas-3:30 ng hapon. Sa salaysay ng mga saksi sa
pulisya, sinasabing pinagmumura muna ni Manalo ang mga biktima bago ito
pinagbabaril. Kaagad naman na tumakas si Manalo sakay ng van patungo sa lalawigan
ng Rizal kasama pa ang mga anak nito. Napag-alamang nasuspinde si Manalo sa
pagka-chairman noong 2008 sa hindi nabatid na dahilan. Inaalam pa rin kung ano ang
motibo ng krimen subalit may mga impormasyong nakakalap ang pulisya na political
grudge ang isa sa posibleng dahilan.
Imbestigasyon sa serye ng pamamaslang sa Davao City ipagpapatuloy

SA PANGATLONG pagkakataon muling magsasagawa ang Commission on Human Rights
(CHR) ng public inquiry sa serye ng summary killings sa lungsod ng Davao na
diumano’y kagagawan ng vigilante group. Si CHR Commissioner Leila de Lima ang
mangunguna sa inquiry kasama ang dalawa pang CHR commissioners. Nakatakdang
isagawa ito sa Waterfront Insular Hotel. Gayunman hindi pa naipapalabas ang talaan
ng mga resource persons sa public inquiry na magtatagal ng dalawang araw. Kabilang
umano sa inimbitahan ng CHR central office si dating Davao City Mayor Benjamin de
Guzman. Si De Guzman ay nakapagsilbi rin bilang city administrator sa pamahalaang
Duterte bago pa man maging city mayor.
Government engineer sa Capiz, arestado sa pagdala ng baril sa bar
NAKAKULONG ngayong ang isang engineer ng Capiz 1st Engineering District na
kinilalang si Engr. Antonio Fecundo, 48-anyos, ng Magallanes Street, Roxas City
makaraang mahuli nagdala ito ng hindi lisensyadong baril sa isang bar sa nabanggit na
lugar habang nakikipag-inuman. Ito ay inireklamo ng security guard ng bar sa Roxas
City PNP Station. Sinasabing nagpakilala pa ang nasabing engineer na agent ito ng
CIDG. Nakuha sa kanyang pag-iingat ang isang .45 na kalibre ng baril na mayroong
pitong bala.
Alkalde sa Isabela kritikal matapos tambangan
NAKIKIPAGLABAN kay kamatayan ang alkalde ng Maconacon, Isabela matapos na
ratratin ng nag-iisang lalaki sa harapan ng Alejandro Computer Shop sa Barangay
Caritan Centro, Tuguegarao City, Cagayan kahapon ng hapon. Kinilala ni P/Chief Supt.
Roberto Damian, ang biktima si Maconacon Mayor Francisco Talosig na inoobserbahan
sa St. Paul Hospital. Batay sa imbestigasyon, lulan ng Hundai van (SFA 795) si Talosig
kasama ang security escort na si PO2 Ferdinand Allauigan at dalawang Sangguniang
Bayan member nang maganap ang pananambang kung saan tinamaan sa kanang leeg
ang biktima. Kabilang sa sinisiyasat ay ang anggulong hidwaan sa pulitika.
9 mangingisada ng Pangasinan, di pa rin nakakabalik
HANGGANG sa kasakuluyan ay hindi pa rin nakakabalik sa kani-kanilang pamilya ang
siyam na mangingisda mula ng pumalaot ang mga ito noon pang May 1 para mangisda
habang sakay ang mga ito ng bangka na MT 4 Sisters. Nakilala ang mga ito na sina
Jimmy Badiag, Jomar Valdez, Israel Damas, Manuel Damas Jr, Julius Abrevir, Wilson Etak,
Ariel Samante, David Querobi, at Jay-Jay Vihayon pare-parehong residente ng Infanta,
Pangasinan. Ito ang napag-alaman mula kay Lt. Dominic Benaoro ng Philippine Navy
Northern Luzon. Ayon kay Lt. Benaoro, humingi ng tulong sa mga otoridad ang pamilya
ng mga mangingisda noong May 18, dahil sa hindi pa rin nakababalik sa kani-kanilang
mga mahal sa buhay mula. Nangangamba si Benaoro na maaaring naabutan ng
bagyong Emong ang mga mangingisda ng pumalot ang mga ito dahil upang maantala
ang mga ito sa kanilang pag-uwi.
BALITANG ABROAD
2 patay sa US sa A/H1N1
INIULAT ng Utah officials ang unang pasyente na binawian ng buhay sa kanilang estado
dahil sa kinatatakutang A/H1N1 virus. Maliban diyan, isang pasyente pa ang binawian
ng buhay sa Arizona na ikatlong biktima naman sa estado. Dahil sa naturang mga
development kung kaya't 10 na ang bilang ng mga nasawi sa US dahil sa A/H1N1 virus.
Ayon kay David Sundwall, executive director ng Utah Department of Health, ang
biktima ay isang 21-anyos na lalaki na namatay sa Salt Lake City hospital. Overweight
umano ang lalaki at mayroong chronic medical conditions kabilang na ang respiratory
problems at iba pang health issues. Sa Arizona naman, sinabi ng mga health officials

na isang 13-anyos na bata mula sa Tucson ang namatay dahil sa A/H1N1. Mayroon din
umano itong komplikasyon ng ibang sakit.
Presyo ng langis, pumalo na naman sa $60 level
PUMALO na naman sa $60 ang halaga ng bawat bariles ng langis sa pandaigdigang
merkado. Umaabot na ngayon sa $60.48 ang presyo ng light sweet crude para sa June
delivery na siyang pinaka mataas ngayong taong 2009. Ang Brent crude naman ay
umangat sa $59.65 bawat bariles para sa July delivery. Dahil dito, nakapagtala na ng 6
month high ang oil industry sa World Market. Ang muling oil price adjustment sa WB ay
isinisisi sa kaguluhan sa Nigeria.
US kinumpirma ang missile test ng Iran
KINUMPIRMA ng U.S. government official ang ginawang missile test ng Iran kung saan
ito umano ang longest-range solid-propellent missile na kanilang inilunsad. Dahil diyan
kung kaya't marami ngayon ang nangangamba na tumataas na ang sophistication ng
Tehran missile program. Ayon sa naturang US official, dati ay shorter-range solidpropellent
missiles lang ang ipinakikita ng Iran. Nakakabahala aniya ang mga solidpropellent
rockets dahil sa mga features nito na madaling iputok. Madali rin umanong
imonitor ang launching nito at mapapayagan ang preemptive strike kung
kinakailangan. Pero ayon kay Defense Secretary Robert Gates, umaabot sa 2,000
hanggang 2,500 kilometers ang range ng missile. "The information that I have read
indicates that it was a successful flight test," wika ni Gates matapos ianunsyo ni Iranian
President Mahmoud Ahmadinejad ang test-fire.
A/H1N1 sa Japan, kumalat na sa Tokyo
LALO pang kumalat ang kinatatakutang A/H1N1 virus sa Japan kung saan mula sa
western region ay nakarating na ito ngayon sa Tokyo. Ayon sa mga health officials,
isang 16-anyos na high school student ang nagpositibo sa virus. Ang naturang teenage
girl ay mula umano sa western suburb ng Hachioji, na kagagaling pa lamang sa walong
araw na biyahe sa New York kasama ang mga kaklase. Dahil diyan kung kaya't halos
250 na umano ang kumpirmadong kaso ng A/H1N1 sa Japan. Ang Tokyo ay tahanan ng
nasa 36 milyong katao at itinuturing na world's most populous urban area. Una nang
hinulaan ng mga eksperto na oras na lang ang hinihintay bago tamaan ng virus ang
capital ng Japan. "The student developed a fever while in flight from New York but she
tested negative in rapid flu tests at Narita," sinabi ni Hideo Maeda, secretary ng city's
welfare and health department. Dagdag pa nito, "She is hospitalized in Hachioji and
has a fever, cough and a sore throat. But she is recovering well."
ISPORTS
$600,000 nagastos ni Pacquiao sa laban nila ni Hatton
INIHAYAG ni Michael Koncz, ang adviser ni IBO/Ring Magazine junior welterweight
champion Manny Pacquiao na malaki ang ginastos ng Filipino champion sa mega fight
nito kay Ricky Hatton noong May 3 sa Las Vegas, Nevada. Ayon kay Koncz, umabot ng
$600,000 o nasa halos P28 million ang ginastos ng pambansang kamao sa kanyang
entourage sa laban kay Hatton kasama na dito ang mga libreng tickets na kanyang
ipinamigay sa mga malalapit na kaibigan. Dagdag pa ni Koncz, ito ngayon ang kanyang
pinangangambahan sa future ni Pacman dahil sa sobrang galante nito na kung saan ay
kaya umano nitong gumastos ng malaking halaga para sa mga kababayan. Pero sa
kabila nito, nag-iinvest na si Pacquiao ng kanyang mga negosyo, kabilang na dito ang
P1.22 milyon ($25.8 milyon) 400-hectare special economic zone. Nakikipag-usap na
din umano ang kampo ni Pacquiao sa foreign-based companies na New York-based Bio

City Development Co. sa balak nitong magtayo ng Philippine International Cancer
Centre.
24/7 coverage ng laban ni Mayweather Jr. at Marquez ipapalabas sa June 27
SISIMULAN nang ipalabas sa June 27 ang 24/7 coverage ng HBO sa training
preparations nina Floyd Mayweather Jr. at Juan Manuel Marquez. Sinabi ni Ross
Greenburg, presidente ng HBO sports, ang nasabing 24/7 coverage ng Mayweather –
Marquez ay ipapalabas ng apat na episodes at all-access series. Kasama dito ang
exclusive behind-the-scenes access at in-depth interviews sa training ng dalawang
boksingero hanggang sa July 18, isang araw bago ang labang tinaguriang Number 1 vs.
Numero Uno. Ang 24/7 ay ang pangatlong pagkakataon na ni Mayweather, habang
magiging debut naman ito para kay Marquez.
Ginebra isang panalo na lang pasok na sa semis
TINAMBAKAN ng husto ng defending PBA Fiesta Cup champion Brgy. Ginebra Gin King
ang Coca-Cola Tigers, 122-85, sa pagpapatuloy ng PBA. Umabot ng 37 points ang
kalamangan ng Gin Kings, ang pinakamalaking abanse na naitala nila sa nakalipas na
15 taon. Pinangunahan ni Ronald Tubid ang Brgy, Ginebra, sa kanyang 20 points
kabilang ang apat na 3-pointes, habang ang kanilang import na si David Noel ay
nagdagdag ng 18 points. Dahil sa panalong ito ng Gin Kings, isang panalo na lamang at
pasok na sila sa semifinals. Si Ronjay Buenafe ay nakapagtala ng 21 points habang sina
Asi Taulava at Nic Belasco ay parehong naka-12 points. Sa second game naman,
panalo sa pamamagitan ng overtime game ang Alaska Aces laban sa Talk 'N Text, 122-
115.
Smart Gilas nangulelat sa FIBA-Asia
ABOT-KAMAY na ng Smart Gilas Pilipinas ang semifinals ngunit nakawala pa at naging
daan para sa desenteng pagtatapos na ikalimang posisyon sa 20th FIBA-Asia
Champions Cup sa Britama Arena dito. Ngunit bukod sa disenteng pagtatapos,
humugot ng mas malaking respeto ang mga Pinoy. “Initially, we came here to reach
the quarterfinals. But after winning three games (in the eliminations), we wanted to be
in the semifinals. We think we deserve to be there, to be in the first four teams,” ani
RP’s Serbian coach Rajko Toroman. “But you know, there are some things we have no
control of. But the way this team is playing, the way we are fighting for the Philippine
country and the Philippine flag is really amazing.” Tinapos ng Nationals ang kanilang
solidong kampanya sa 9-day tourney na ito nang payukurin nila ang Satria Muda ng
host Indonesia, 112-107 sa overtime. Uuwi ng bansa ang Nationals upang magpahinga
at ilang araw lamang ay tutungo naman sa Japan para sa 4-game exhibition series.
SHOWBIZ
Katrina umaasang hindi babagsak ang career
UMAASA umano ang sexy actress na si Katrina Halili na hindi tuluyang babagsak ang
kanyang career sa kabila ng kontrobersiyang kinakaharap ngayon bunsod ng pagkalat
ng kontrobersyal umano nilang sex video ng celebrity doctor na si Hayden Kho.
Suportado naman ang aktres ng mga kaibigan at pamilya na hindi naiwasang maiyak
ng mapanood ang video dahil sa awa kay Katrina. Gayunman, aminado ang aktres na
ito ang pinakamalaking pagkakamali na kanyang nagawa dahil hindi na umano siya
kinakausap ng ina at mga kapatid. Nagpasalamat naman ito sa mga taong susmusporta
sa kanyang laban. Una nang tiniyak ni Katrina na haharapin niya ang lahat ng
kahihiyan sa paglaban kay Hayden at mga nagpakalat ng video para maiwasan
umanong danasin ng ibang kababaihan ang pambababoy sa kanya.

Kris Allen, season 8 winner sa American Idol
ANG laid back acoustic guitarist na si Kris Allen ang nanalong bagong American Idol.
Dahil dito, kung kaya't runner up lamang ang paborito ng mga judges na si Adam
Lambert. Si Allen ay 23-anyos students mula sa Arkansas habang ang si Lambert
naman ay 27-anyos na Theatre Actor mula sa San Diego, California. Inanunsyo ng host
na si Ryan Seacrest na 100 milyon ang natanggap na boto ni Allen matapos ang
showdown nila ni Lambert. Record breaking ang naturang mga bomoto ngayong
season ng American Idol kung saan umabot sa 624 milyon ang natanggap na boto ng
mga Pero sa kabila ng deklarasyon ng mga hurado na si Lambert ang nanalo, gitgitan
pa rin ang labanan ng dalawa at kinalaunan nga ay si Allen ang tinanghal na wagi.
Kabilang sa mga nagperfrom ay ang Black Eyed Peas, sina Cyndi Lauper, Carlos
Santana at Rod Stewart. Si Lambert ay nagperform kasama si Kiss habang nakipagduet
naman si Allen kay Keith Urban. Bago ang announcement, nag-duet pa ang
dalawang finalist sa "We are the Champions" kasama ang surviving members ng
Queen. Maliban sa "American Idol" title, magkakaroon ng record contract si Allen.
Viva Hotbabe Asia Agcaoili masaya sa pagiging ina
TOTALLY complete na nga ang feeling ng tinaguriang sex guru ng Pilipinas na si Asia
Agcaoili matapos niyang maisilang ang bunga ng kanilang pagmamahalan ng kanyang
Dutch boyfriend. Last April 20 nang ipanganak ni asia si Baby Alexander sa
Amsterdam . Super na nag-eenjoy ang bagong mommy na talaga naman daw isang
fulltime commitment. Kahit hot mama na si Asia , hindi pa rind aw siya papa-awat sa
pagpo-pose ng sexy, katwiran kasi niya – if you have it, show it. Ayon pa kay Asia –
after three weeks ng kanyang panganganak, mabilis na bumalik sa dati ang kanyang
pigura.
P10-M pabuya sa makapagpatunay sa kalokohan ni Kiko – Sharon
MULA sa isang milyong piso, itinaas na sa P10 milyon ng megastar na si Sharon Cuneta
ang reward sa sinumang maglalabas ng ebidensya kaugnay ng umano'y kalokohan ng
kanyang asawang si Senator Francis Pangilinan. Ito'y sa harap na rin ng walang
kamatayang ulat na umano'y may "mistress" ang senador. Ang paglalaan ng pabuya ni
Sharon ay dahil alam umano niyang walang katotohanan at walang basehan ang
naturang mga tsismis. Dagdag pa nito na kumbinsido siyang ang naturang mga ulat ay
produkto lamang ng imahinasyon ng mga taong walang magawa. Hirit pa nito na
ngayong sopistikado na ang paggamit ng cellphone at internet ay wala pa ring
makapaglabas ng ebidensya.
Aleck Bovick 'napaglaruan' sa sesyon ng Senado
SAGLIT mang naganap ngunit sapat na upang sumikat ang pangalan ni Aleck Bovick sa
bulwagan ng Senado kamakalawa. Nadawit ang pangalan ng dating sexy actress nang
napag-usapan si Aleck ng mga mambabatas nang magbigay si Senador Loren Legarda
ng talumpati na bumabatikos sa panlalait ng Hollywood actor na si Alec Baldwin sa mga
Pilipino. Idinulog ni Majority Floor Leader Juan Miguel Zubiri ang talumpati ni Legarda sa
Committee of Women ng Senado. Sa sesyon pa rin, pabirong tinanong ni Senate Pro
Tempore Jinggoy Estrada si Zubiri kung ang pinatutungkulan nito ay si Aleck Bovick.
Isinagot naman ni Zubiri, “Kilala ko si Aleck Bovick dahil personal ninyo siyang kaibigan
pero ang tinutukoy ko ay si Alec Baldwin.” Pinabulaanan iyon ni Jinggoy. “Hindi ko siya
kaibigan,” sabi ng senador na nagpatawa sa ibang mga senador at ibang mga tao sa
session hall. Dahil dito, tumayo si Legarda at tinanong kung sino si Bovick. “Mr.
President, humihingi ako ng paumanhin pero wala akong gaanong alam sa showbiz.
Kapanahunan ko lang sina Nora Aunor at Vilma Santos. Sino si Aleck Bovick,” tanong ng
senadora kay Jinggoy na siya ring presiding officer nang oras na iyon. “Kilalang-kilala
siya ng Majority Leader,” sabi ni Jinggoy. Ang sagot ni Zubiri, “Kilala ko?” Inamin naman
ni Jinggoy na nakilala niya si Bovick sa isang okasyon kasama si Senador Ramon Revilla
Jr. Sinabi naman ni Zubiri na pinabulaanan ni Revilla ang sinabi ni Jinggoy.

BALITANG A-KYUT
7 katao isinugod sa ospital dahil sa mabahong fridge
SAN JOSE, Calif. – Kumalat ang masangsang na amoy nang linisin ng isang office worker
ang isang fridge na puno ng bulok na mga pagkain na naging dahilan upang isugod sa
ospital ang pito niyang co-workers habang marami pang iba ang sumuka dahil dito.
Bunsod nito, inilikas ng firefighters ang mga empleyado mula sa loob ng AT&T building
sa downtown San Jose nitong Mayo 11, makaraang itawag sa 911 ang nasabing
nakalalasong amoy mula sa fridge. Agad ding ipinatawag ang hazmat team upang
siyasatin ang insidente. Nabatid nilang ang pinagmulan ng masangsang na amoy ay
ang unplugged refrigerator na punod ng bulok at inaamag nang mga pagkain. Ayon sa
mga awtoridad, nagdesisyon ang enterprising officer worker na linisin ang refrigerator,
at inilagay ang inilabas na mga pagkain sa conference room habang kinukuskos ang
loob gamit ang dalawang cleaning chemicals. Ngunit dahil sa naghalong bulok na mga
pagkain at disinfectant, sumuka at nagtae ang 28 katao. Dagdag pa ng mga awtoridad,
hindi nagkasakit ang manggagawang naglinis ng fridge dahil wala siyang pang-amoy
bunsod sa allergies.
ALAM N’YO BA?
Rebulto ni Bonifacio
ALAM ba ninyo kung ilan ang pigura na makikita sa monumento ni Gat. Andres
Bonifacio na idinisenyo ni Guillermo Tolentino sa Monumento circle sa Caloocan City?
Taong 1933 nang ipakita sa publiko ang monumento ni Bonifacio bilang pagkilala sa
kanyang katapangan. Mayroon itong 23 pigura na naglalarawan sa paghihirap at
pakikipaglaban ng mga Filipino laban sa Kastila. Kabilang sa mga pigura ay sina Emilio
Jacinto, at ang tatlong martir na pari na sina Gomez, Burgos at Zamora.
PAUNAWA
Ang mga impormasyon dito ay kinalap at iniayos ng Brent & Strauss Integrated
Communications, Inc. para sa Jadran pismo d.o.o. • Tel. +385 51 403 185 • Fax +385 51 403
189 • Email: news@jadranpismo.hr