JADRAN PISMO d - Daily Local News on Board

<strong>JADRAN</strong> <strong>PISMO</strong> d.o.o
FILIPINO/TAGALOG
KARAPATANG MAGPALATHALA © 2008 – Ang maiigsing balitang nalalathala sa Jadran pismo ay mula
sa mga nakalap na ulat sa radyo, telebisyon at dyaryo sa Pilipinas. Sa pamamagitan nito, hinihimok ng
ahensya na ibahagi ang siping ito sa mga kababayang nagnanais na makibalita. Maliban lamang sa mga
impormasyong libre, ang mga bagay na may direktang kopirayt ang Jadran pismo d.o.o, Rijeka ay hindi
maaaring sipiin, gamitin, kopyahin o paramihin sa kahit anong paraan ng walang lisensya o pahintulot
mula sa tagapaglathala, o ipamigay, o ipadala sa mga indibidwal
o mga barkong hindi suskritor nito.
FOREX
P47.28 sa US$1 (P47.28 kahapon)
MAGANDANG UMAGA PO!!!
Ang mga sumusunod na balita ay nailathala sa mga
pangunahing pahayagan sa Pilipinas ngayong araw,
MIYERKULES, 20 MAYO 2009.
MGA ULO NG BALITA SA WIKANG INGLES
National <strong>News</strong>
• DepEd may likely postpone June 1 school opening
• Erap’s plan to run in 2010 unconstitutional
• AFP falls deeper into Balikatan fund scam
• Palace not bothered by word war between Nograles, Villafuerte
• No foul play seen death of Failon’s wife—NBI
• Military confident Vagni won’t be beheaded
• Total gun ban in 2010 elections
• 400,000 new students this coming school year
OFW <strong>News</strong>
• 15 Pinoy seamen released by pirates
• 4 ‘undocumented’ OFWs held in Clark airport
• 2,000 Pinoy squatters displaced by fire in Malaysia
• Filipina carts away $12-M worth of gold in NY
Regional
• 37 killed, 19 missing in Compostela Valley landslide
• Solon’s van involved in highway accident
• Cop fleeces former police official
• 2 NPA rebels killed in Negros Occidental
• Plywood pins down worker to death
Foreign <strong>News</strong>
• WHO estimates 10,000 with A/H1N1 virus
• Obama changes mind in releasing captured terrorists
• Los Angeles rocked by 4.1 magnitude quake
• ‘Reserve medicines for poor countries’—WHO
• Ethiopia inches towards Somalia
Sports
• ‘Tournament for Peace and Understanding’ to be launched

• Marquez still can’t forgive, forget Pacquiao
• Race for Peace kicks off in June
• Team Filipinas in FIBA-Asia Champions Cup may land 5 th
Showbiz
• Katrina Halili to sue Hayden Kho
• Hayden denies releasing sex video
• Brothers finally accept BB
• Willie Revillame no plans of running for public office
Odds and Ends
• Banana used in hold up
Pinoy Trivia
• ‘Ukay-ukay’ as swine flu carrier
BUOD NG MGA BALITA
PAMBANSA
Pasukan sa June 1 maaaring iurong ayon sa DepEd
SINABI ng Department of Education na maaaring iurong ang unang araw ng pasukan sa
June 1 sa mga pampublikong paaralan dahilan ng swine flu outbreak sa buong mundo.
Anila kung magbibigay ng recommendation ang Department of Health ay tuloy ang
pag-postpone ng unang araw ng pasukan. Ayon kay DepEd information officer Kenneth
Tirado, ginagawang lahat ng departamento sa pakikipagtulungan ng mga health official
upang mapanatili at masigurado ang kaligtasan ng inaasahang 22.4 milyong
estudyanteng papasok sa mahigit 44,600 public at private schools ngayong June 1.
“The safety of the children is our foremost concern,” ayon kay Tirado. Dagdag pa niya,
maaring hindi pa nakikita ang kinatatakutang outbreak sa mga paaralan dala na rin ng
wala pang naiitalang kaso ng Influenza o A/H1N1 virus sa bansa sa kabila ng pagkalat
nito sa ibang bansa. “In the first place, there’s still no reported case here. We will act
based on what the DoH recommends,” pahayag niya sa isang interview. Ipinasara na
ng gobyerno ng Japan noong lunes ang mahigit 4,000 paaralan sa Kobe at Osaka sa
lumalaking bilang ng apektado ng swine flu. Ayon pa kay Tirado ang pag-postpone sa
klase ay magiging ‘worst scenario’ sa bansa kung may maitala mang kaso ng swine flu.
Pagtakbo ni Erap sa 2010 malamang mabulilyaso
UMIINIT ang pagtatalo tungkol sa posibilidad ng pagtakbo muli ni dating Pangulong
Joseph Estrada sa pinakamataas na posisyon sa pamahalaan sa 2010 elections. Dahil
sa lumalabong pag-asa na magkaisa ang oposisyon na magpatakbo ng isa lamang
pambato na itatapat sa manok ng administrasyon sa presidential elections, pinalutang
muli ni Estrada ang kanyang banta na tatakbo siyang presidente – sa ikalawang
pagkakataon. Iginiit ni Estrada na walang balakid sa kanya na kumandidato muli dahil
sa nakuhang absolute pardon mula kay Pangulong Gloria Arroyo noong 2007 matapos
hatulan ng Sandiganbayan na guilty sa kasong pandarambong. Ngunit kahit
napagkalooban ng absolute pardon, iginiit naman ng ilang eksperto sa batas na hindi
puwedeng asintahin ni Estrada sa posisyon ng presidente dahil nakasaad sa 1987
Constitution na isang beses lamang maaaring manungkulan ang pangulo ng bansa.

Paliwanag ng election lawyer na si Romulo Macalintal, nakasaad umano sa Section 4,
Article VII ng Konstitusyon na, "the President shall not be eligible for any reelection. No
person who has succeeded as President and has served as such for more than four
years shall be qualified for election to the same office at any time." Ngunit paniwala ni
Estrada – batay sa payo ng kanyang mga abogado, ang naturang probisyon ay para
lamang sa mga nakaupong presidente. Kinontra naman ito ni Romulo at sinabing sakop
ng naturang probisyon ang lahat ng kasalukuyan at mga dating presidente ng bansa.
"Maliwanag na for any reelection, whether you are incumbent, sakop ka ng reelection
(ban)," ayon kay Macalintal, abogado ni Arroyo.
AFP lalong nadiin sa usapin na hindi na-remit na pondo ng Balikatan
LALONG nadiin ang militar sa Balikatan Fund Scam na pinasabog ni Lt. Senior Grade
Nancy Gadian. Ito ay matapos kumpirmahin ng Commission On Audit na hindi nagremit
ang AFP ng 244.7-Million pesos na pondo para RP-US Balikatan Exercises. Ayon sa
COA, P182 milyon ang unremitted funds ng AFP sa taong 2006 habang P62 milyon sa
taong 2007.Ang naturang mga pondo aniya ay nakadeposito ngayon sa land Bank of
the Philippines. Sinasabing isinama rin ang naturang pondo sa Special Financial
Assistance para sa Citizens Armed Forces Geographical Units ng Western Mindanao
Command. Binubusisi na rin ngayon ng COA ang 2008 operations report ng
Sandatahang Lakas.Aminado naman si AFP Spokesman Lt. Col. Romeo Brawner Jr. na
wala sa record nila ang nasabing pondo. Samantala, naghain na sa Korte Suprema ng
Petition for the issuance of Writ of Amparo ang kapatid ni Gadian na si Nedina Gadian-
Diamante, para sa proteksyon ng Junior Officer.
Malakanyang di nababahala sa hidwaan ni Nograles at Villafuerte
KAMPANTE ang Malacańang na walang epekto sa pagsasanib ng partidong Lakas at
Kampi ang hidwaang umiiral sa pagitan nina House Speaker Prospero Nograles at
Congressman Luis Villafuerte. Magugunitang binawi kamakailan ni Villafuerte ang
kanyang suporta sa Cha-cha resolution at sinisi nito sa kapabayaan umano ni Nograles.
Sinabi ngayon ni Presidential Adviser on Political Affairs Gabriel Claudio, tuloy ang
pagsasanib puwersa ng dalawang partido sa kabila ng bangayan ng dalawang lider ng
koalisyon. Ayon kay Claudio, mismong sina Villafuerte at Nograles ang magpe-preside
kasama ang Pangulong Arroyo sa gaganaping joint meeting ng Lakas at Kampi sa May
28. Wala rin umanong nakikitang dahilan ang Malacańang o ang Pangulo para
pumagitna sa isyu lalo pa’t may kaugnayan ito sa Cha-cha.
Walang foulplay sa pagkamatay ng asawa ni Ted Failon — NBI
NAGPAKAMATAY at walang naganap na ‘foul play’ sa pagkamatay ni Trinidad Etong,
maybahay ng popular ABS-CBN broadcaster na si Ted Failon. Ito ay ayon sa isang
highly-reliable source mula sa National Bureau of Investigation (NBI). “All indications
lead to a suicide case stemming from a financial problem. It appears that the Failon’s
bank account have turned zero balance while being handled by the victim,” pahayag
ng NBI source na tumangging magpabanggit ng pangalan. Ayon sa source, sinabi na ng
NBI forensic investigators na nagsiyasat sa ‘scene of the crime’ na walang indikasyon
na sadyang pinatay o napatay ang asawa ni Failon. Aniya, masusing siniyasat ng NBI
forensic experts ang palikuran kung saan natagpuang patay si Trinidad ni Failon, ang
tama ng bala ng baril, ang ginamit na baril at iba pang ebidensiya sa crime scene.
Sinabi pa ng opisyal na ang ‘suicide note’ na nakuha ay sulat kamay ni Trinidad, batay
na rin sa esksaminasyon ng NBI handwriting experts. "We believe that this is a tragedy
sparked by the victim’s mishandling of their bank account. Na-zero balance lahat, in
short, nawala ang ipon nilang mag-asawa at sinisi niya ang sarili niya sa pangyayari
kaya inutang niya ang buhay niya. This is really an unfortunate tragedy,” giit ng source.
Binigyang diin pa ng source na inaalam pa nila kung may katotohanan ang sinasabing
pag-withdraw ng malaking halaga ni Trinidad, dahilan upang maubos ang bank account
ni Failon.

AFP kampanteng hindi pupugutan si Vagni ng Abu Sayyaf
MALAYO umanong matulad sa sinapit ng magsasakang pinugutan ng ulo sa Basilan,
ang international aid worker at Italian national na si Eugenio Vagni. Nabanggit ni Armed
Forces public information chief, Lt. Colonel Romeo Brawner na batay sa kanilang
pagtantya, wala silang nakikitang malaking banta sa buhay ng natitirang bihag ng Abu
Sayyaf group (ASG). Sa katunayan, kinumpirma rin ni Brawner na batay sa kanilang
nakalap na intelligence report, magkasama na ang mga armadong grupo at si Vagni ng
huli itong mamataan. Ang nasabing impormasyon ay malaking development sa
naunang report na iniwan na ng mga bandido ang biktima sa isang lokasyon. Kasabay
nito, tiniyak naman ng opisyal na tuloy-tuloy ang kanilang pagtugis sa mga kidnappers,
bagama't top priority pa rin umano nila ang kaligtasan ni Vagni.
Total gun ban ikakasa ng PNP sa 2010 elections
DETERMINADO ang Philippine National Police (PNP) na isulong ang pagpapatupad ng
total gun ban upang maiwasan ang pagdanak ng dugo na tradisyunal sa kasaysayan ng
maruming labanan sa pulitika kaugnay ng gaganaping 2010 national elections sa
bansa. Ito’y sa gitna na rin ng puspusang operasyon upang masupil ang loose firearms
na sa pinakahuling update ay aabot na sa 1.1 milyon. Ayon kay Deputy Director
General Jefferson Soriano, Deputy Chief for Operation, layunin nito na mapigilan ang
mga “election related violence incident” (ERVI) sa panahon ng election period kung
saan tanging ang mga law-enforcer at otorisado lang ang maaring malibre sa gun ban.
Sa 1.1 milyong mga baril na walang lisensya halos kalahati nito ang nasa kamay ng
mga crime syndicates, CPP-NPA, MILF, Abu Sayyaf at iba pa grupo habang ang kalahati
ay nasa kamay ng mga sibilyan. Batay pa rin sa record ng PNP, halos 97 percent ng
krimen sa bansa mula 2004-2008 ay ginagamitan ng baril.
400,000 na bagong estudyante madadagdag sa pasukan
TIYAK na magsisikip na naman ang mga classrooms sa mga pampublikong eskwelahan
dahil tinatayang 400,000 mga bagong mag-aaral ang madadagdag ngayong darating
na pasukan. Ayon kay Department of Education Secretary Jesli Lapus, tiyak na 2
porsyento ang itataas ng bilang ng mga estudyante ngayong enrollment sa buong
bansa kung saan noong 2008 ay umabot na sa 18.81 milyong estudyante na ang
nagpaenroll sa pampubliko at pribadong paaralan. Ipinaliwanag naman ni Lapus na
walang nagaganap na “exodus” o malawakang paglilipat ng mga estudyante mula sa
private school patungo sa public schools ngayong darating na pasukan dahil na rin
aniya sa pakiusap ng gobyerno laban sa tuition fee hike bunsod ng matinding krisis sa
ekonomiya sa buong mundo. Sa ulat ng DepEd, maraming magulang sa ngayon ang
nagpaplano na ilipat ang kanilang mga anak sa public schools dahil sa hindi mataas na
tuition fee sa mga private school partikular na sa Maynila.
BALITANG OFW/KWENTONG MARINO
15 Pinoy seamen pinalaya ng mga Somali pirates
PINALAYA ng mga piratang Somali ang German-owned cargo ship kung saan kabilang
sa mga sakay dito ay 15 Pinoy na tripulante at isang Polako na kapitan. Ayon sa ulat ni
Poland Foreign Ministry spokesman Piotr Paszkowski, ang MV Patroit ay na-released
noong Mayo 15. Bagamat ayaw na nitong magbigay ng karagdagang detalye kung
papaano napakawalan ang mga bihag, pero sa maikling pahayag, sinabi ng Poland
Foreign Ministry spokesman, balik na sa dagat ang MV Patroit. Maliban sa mga 15 Pinoy
na pinalaya na, kabilang pa din umano ang Ukrainian engineer. Ang nasabing
sasakyang pandagat ay pagmamay-ari ng Hamburg-based shipowner Blumenthal JMK,
na una ng na-hijacked nitong nakalipas na buwan ng Abril.

4 ‘undocumented’ OFWs pinigilang makalabas sa Clark
APAT na pasahero na lalabas sana ng bansa sa Diosdado Macapagal International
Airport (DMIA) sa Clark Field, Pampanga ang pinigilan ng mga tauhan ng Bureau of
Immigration matapos silang paghinalaan na “undocumented" overseas Filipino workers
(OFWs). Sa ulat na tinanggap ni Immigration Commissioner Marcelino Libanan, tinukoy
ni BI officer Heranio Manalo ang mga pinigilang OFWs na sina Cristina Turing, Rachel
Tolentino, Marilyn Abanes, at Janet Rima Buenafrancisca. Sinabi ni Manalo na aalis sana
ng bansa ang apat noong Abril 26 patungong Malaysia at Brunei gamit ang mga tourist
visa. Ayon kay Libanan, ipinalagay na niya sa immigration watch list ang apat upang
hindi makalabas ng bansa hangga't wala silang sapat na dokumentasyon sa
kinauukulang ahensiya ng pamahalaan para makapagtrabaho sa ibang bansa. “We will
only remove them from our watch list if they can prove that they are legitimate tourists
or after they have secured the necessary documents from the Philippine Overseas
Employment Administration (POEA)," ayon sa opisyal.
2,000 Pinoy squatters nasunugan sa Malaysia
TINATAYANG mahigit sa 2,400 katao na karamihan ay mga Filipino immigrant ang
nawalan ng tahanan makaraang lamunin ng apoy ang magkakadikit na kabahayan sa
Labuan island sa Malaysia.?Ayon kay Siman Casran, police chief ng eastern Labuan
Island, ang nangyaring sunog nitong Huwebes (Mayo 14, ng kasalukuyang taon) ay
puminsala sa 450 mga bahay na pawang yari sa kahoy kung saan umaabot sa 2,468
katao ang nawalan ng tirahan.?Karamihan sa naabo ay pawang squatter house na
pinamamahayan ng mga immigrant buhat sa katimugang bahagi ng Pilipinas, batay sa
ulat ng isang international news agency. Wala naman umanong napaulat na nasaktan
sa sakuna.?Base pa sa pulisya, inabot ng ilang oras bago naapula ang apoy kung saan
mahigit 120 tauhan ng pamatay sunog ang rumesponde.?Posibleng nagkaroon umano
ng electric short circuit sa isa sa mga bahay na naging dahilan ng pagsiklab at pagkalat
ng apoy.
Pinay nag-dispalko ng $12-M sa New York
ISANG Pinay ang inakusahan ng pagtangay sa $12M halaga ng ginto at alahas sa loob
ng nakalipas na anim na taon sa New York.?Sa ulat ng isang television network, nakilala
ang inaakusahang Pinay na si Teresa Tambunting ng Scarsdale, New York.?Si
Tambunting ay nagtatrabaho bilang vault manager ng Jacmel Jewelry sa Queens, New
York.?Sinasabing 28 taon nang nagtatrabaho ang Pinay sa nasabing kumpanya.?
Nadiskubre umano ng mga imbestigador ang 450 pounds ng ginto at alahas sa bahay
nito gayundin ang isang suitcase na naglalaman ng 66 pounds ng ginto na
nagkakahalaga ng tinatayang $800,000.?Pansamantalang nakalaya ang Pinay matapos
magpiyansa ng $100,000.?Itinakda ang pagdinig sa kaso sa Mayo 19 at kapag
napatunayang guilty maaari umanong makulong ang Pinay ng 25 taon.
REHIYON
37 patay, 19 nawawala sa landslide sa Compostela Valley
UMABOT na sa 37-katao ang nilamon ng putik, habang 19 iba pa ang nawawala sa
naganap na landslide sa small-scale mining site noong Lunes ng hapon sa Sitio
Boringot sa Brgy. Napnapan sa bayan ng Pantukan, Compostela Valley. Kinumpirma ni
Compostela Valley Governor Arthur “Chiongkee” Uy na nasa 37-katao na ang
pinangangambahang namatay sa trahedya at patuloy na hinuhukay ang mga bangkay
ng rescue team mula sa provincial government at ng lokal na opisyal ng pulisya. Ayon
naman kay Compostela Valley policed director P/Senior Supt. Ronald dela Rosa, aabot
sa 18 bangkay na karamihan ay minero sa minahan ng ginto ang na hukay na, habang
16 naman ang nasugatan matapos na madaganan ng malalaking tipak ng bato at

makapal na putik. Karamihan sa mga biktima ay naninirahan sa paanan ng bundok
kung saan ginawang minahan na sinasabing pinamumugaran ng mga rebeldeng New
People’s Army na sangkot sa pangingikil ng revolutionary tax sa mga minero sa
Compostela Valley. Ayon sa ulat, gumuho ang itaas na bahagi ng bundok dahil sa
patuloy na pagbuhos ng ulan na sinasabing nagpalambot ng lupa na tumabon sa mga
kabahayan sa paanan ng bundok. May 30-kabahayan ang natabunan kung saan sa
kabila ng babala ay tumanggi ang mga minero na lisanin ang nasabing lugar. Napagalaman
din na nagpalabas ng stoppage order ang lokal na pamahalaan sa lahat ng
mining operation sa Sitio Boringot noong Abril dahil sa masamang lagay ng panahon sa
nasabing landslide prone area.
Sasakyan ng kongresista kabilang sa karambola
LUMIKHA ng grabeng pagsisikip ng daloy ng trapiko ang karambola ng walong
sasakyan, kabilang ang Kia van na nakarehistro kay Ilocos Norte Rep. Roque Ablan, Jr.,
makaraang mawalan ng kontrol ang isang Isuzu Elf Truck na umararo sa mga sasakyan
kahapon ng umaga sa Makati City. Sa report ni PO3 Mardy Domingo ng Makati Police
Traffic Enforcement Branch, naganap ang insidente dakong alas-9 ng umaga sa
Osmena Highway malapit sa kanto ng Pasay Road makaraang pahintuin ng mga traffic
enforcer ang truck na may plakang WAF-860 na minamaneho ni Martin Pineda bunga
ng pagbubuga ng napakaitim na usok. Hindi umano kumagat ang preno ng naturang
truck kaya’t inararo nito ang walo pang sasakyan kabilang ang isang Mitsubishi Pajero,
(WKX-278), pick up truck (UPT-379), Corolla taxi (TWM-481), Honda Civic (WAB-558)
Toyota Sedan (ZHK-351) Civic Senad (WEW-933) at ang Kia Pregio van (UMW-965) na
nakarehistro kay Rep. Ablan. Inabot naman ng halos tatlong oras bago tuluyang nai-alis
ng mga tauhan ng Metropolitan Manila Development Authority (MMDA) sa lansangan
ang mga sasakyang sangkot sa banggaan kaya’t lumikha ito ng grabeng pagsisikip ng
daloy ng trapiko.
Bantay-salakay na pulis huli sa panghuhulidap ng dating opisyal
ISANG pulis na nagbabantay mismo sa gate ng Manila Police District headquarters ang
itinurong nangholdap sa isang retiradong pulis at ginang nito na negosyante, sa Sta.
Cruz, Maynila. Agad na dinis-armahan ni Manila Police District officer-in-charge General
Rodolfo Magtibay ang suspek na si PO2 Roderick Sena ng MPD-District Headquarters
Support Unit (DHSU) nang arestuhin ito ng mga kabaro niya habang naka-duty at naka
piit ngayon sa MPD-Theft and Robbery Section. Pormal na nagsampa ng reklamong
robbery-holdup si ret. MPD police Jorge David, 63, at asawang si Rosalinda, 60. Dakong
alas- 9:00 ng gabi ng arestuhin ang suspek sa main gate ng MPD matapos
matiyempuhan ng mga biktima na siya ang naka-duty sa gate at namukhaan na
nangholdap sa kanila. Plano lamang umano ng mga biktima na i-follow-up ang kanilang
reklamo na masuwerteng nakilala ang suspek na pulis. Una nang nagsampa ng
reklamo ang mag-asawang David noong Mayo 13, 2009, sakay sila ng kotse dakong
alas-9 ng gabi nang harangin ng magka-angkas na suspek sakay ng motorsiklo sa
ibabaw ng McArthur Bridge sa Sta. Cruz, Maynila. Pinagbintangan ang mga biktima na
bigla umanong tinutukan ni Sena ng baril ang dating pulis, hinablot ang lady’s bag ni
Rosalinda na nagla laman ng US-$9,740; men’s wristwatch; Chinese gold necklace na
nag kakahalaga ng P160,000 at mga credit cards.
2 NPA patay sa engkwentro sa Negros Occidental

DALAWANG miyembro ng <strong>News</strong> People's Army (NPA) ang patay sa nangyaring
engkwentro sa mga tropa ng militar sa lungsod ng Kabangkalan probinsiya ng Negros
Occidental. Ayon kay 1st Lt. Joselito Dalida, ang CMO ng 61st Infantry Batallion ng Phil.
Army na nangyari ang sagupaan alauna ng hapon kahapon sa Sitio Bayang Brgy.
Kamansi sa nasabing lungsod matapos na may nagbigay ng impormasyon sa charlie
company na mayroong apat na armado na nagsasagawa ng extortion activities sa
nasabing lugar. Sa pagresponde ng militar, agad silang pinaputukan ng mga rebelde.
Matapos ang halos 15 minutong bakbakan, na-recover ang dalawang bangkay na
nakilalang na sina Jerry Domingo alyas Ka Emong at Irene Barrientos alyas Ka Rea.
Dagdag pa ni Dalida na ang nakasagupa ng tropa ng militar ay mga kasapi ng Kilusang
Hukbong Bayan na pinamumunuan ni Edmund Sayo. Na-recover rin sa lugar na
pinangyarihan nga engkwentro ang isang armalite rifle, .45 kalibre ng armas, 2
granada, 3 cellphones at mga subversive documents.
Pahinante patay matapos mabagsakan ng plywood sa Maynila
DEAD-ON-THE-SPOT ang isang 21-anyos na pahinante ma tapos mabagsakan ng may
100 pirasong plywood na nahulog mula sa pagkalas nito sa fork lift, kamakalawa ng
gabi, sa Pier 10, North Harbor, Tondo, Maynila. Kinilala ang biktima na si Mark Anthony
Alliguer, truck helper at residente ng Longos, Malabon City, na nagtamo ng matinding
pinsala sa ulo nang mabagsakan ng mga plywood. Sa imbestigasyon ng pulisya,
naganap ang insidente dakong alas-7 ng gabi habang inaalalayan ng biktima ang fork
lift operator na si Arnold Guevarra, sa ikinakarga nitong plywood nang bigla umanong
kumalas ang pagkakatali ng mga plywood dahil nahiwa sa blade ng forklift. Dahil sa
takot, mabilis umanong tumakas si Guevarra na siya ay arestuhin dahil sa aksidente.
BALITANG ABROAD
Kaso ng A/H1N1 umaabot na sa 10,000 ayon sa WHO
UMAABOT na sa halos 10,000 ang kumpirmadong kaso ng A/H1N1 virus sa 40 bansa sa
buong mundo. Batay sa pinakahuling talaan ng World Health Organization (WHO),
umakyat na sa 79 ang mga nasawi dahil sa nasabing virus, habang 9,830 na ang kaso
nito. Umaabot umano sa 1,001 ang nadadagdag na kaso bawat araw, ayon sa WHO.
Karamihan sa panibagong kaso na nadagdag ay mula sa Mexico na mayroong 545, 409
sa America, 34 sa Japan, lima sa Panama, tatlo sa Chile, dalawa sa El Salvador, tig-isa
sa Peru, China, at United Kingdom. Patuloy namang inaalam ngayon kung may
kaugnayan sa killer virus ang pagkamatay ng isang batang lalaki sa New York. Napagalaman
na sa naturang US State nagmula ang ika-anim na nasawi dahil sa A/H1N1 virus
sa America. Samantala, nangunguna pa rin ngayon ang Estados Unidos sa may
pinakamaraming kaso ng A/H1N1 infection na umaabot na sa 5,123 batay sa record ng
Centers for Disease Control and Prevention. Bunsod naman ng lalo pang kumakalat na
virus, pinulong ng WHO ang mga malalaking pharmaceuticals sa mundo upang tiyakin
ang kahandaan ng mga ito na gumawa ng vaccine laban sa virus.
Obama nagbago ng isip hinggil sa pagpapalaya ng mga bihag na terorista
NAGBAGO ang isip ni United States President Barack Obama at iniutos na muling
buhayin ang Trial sa Guantanamo prisoners Sa kanyang panibagong kautusan, tiniyak
ni Obama na makakakuha ng patas na paglilitis ang mahigit dalawang daang mga
nakakulong sa Guantanamo prison sa Cuba Magugunitang ang pagpapasara sa
Guantanamo ang kauna-unahang order na ipinalabas ni Obama noong Enero nang
magsimula siyang manungkulan. Nilinaw rin ng pangulo na tinututulan niya noon ang
pamamaraan ni dating US President George W. Bush sa kabiguan na makabuo ng legal
framework at hindi naibigay ang agarang hustisya para sa mga bilanggo na pawang
mga pinaghihinalaang terorista o tumutulong sa mga grupong naghahasik ng lagim.

Los Angeles niyanig ng 4.1 magnitude na lindol
MULI na namang niyanig ng lindol ang Los Angeles bagamat wala namang napaulat na
nasawi o nasaktan kaugnay ng insidente. Ayon sa United States Geological Survey,
tumama ang magnitude 4.1 na lindol sa layong 10 milya ng timog-kanluran ng
downtown LA malapit sa Los Angeles International Airport. Paliwanag ni Fire spokesman
Brian Humphrey, walang napinsala sa naturang pagyanig kung saan lumibot na umano
sila sa bawat distrito para i-check kung mayroong nasira. Matatandaang kamakailan ay
una na ring tumama ang magnitude 4.7 na lindol sa LA kung saan ang sentro ay
malapit din sa airport. Dahil diyan kung kaya't nagkumahog ang mga emergency
workers sa LAX na i-check kung may mga nasira sa runway at iba pang airport
infrasturcture.
WHO sa mga parmasyotiko: Ireserba ang gamot para sa mahihirap na bansa
UMAPELA ang World Health Organization sa mga kumpanyang parmasyotiko na
ireserba ang kanilang pangbakuna laban sa A/H1N1 para sa mahihirap na bansa.
Gayunman, ayon sa mga kompaniyang gumagawa ng gamot, aabutin pa ng ilang
buwan bago makabuo ng vaccine. Nais ng WHO na mag-donate ang mga kompaniya ng
10 porsyento ng kanilang produksyon o hindi kaya'y bawasan ang presyo para sa
mahihirap na bansa. Paliwanag ng WHO, hindi kasi makakakuha ang mahihirap na
bansa ng bakuna sakaling lumaki ang demand. Pero alanganin naman dito ang mga
kompaniya ng gamot dahil nakasalalay na umano ang kita ng negosyo. "I don't think
that all of the answers are there yet," sinabi ni Swiss pharmaceutical giant Novartis AG
spokesman Eric Althoff. Nanawagan naman si U.N. Secretary-General Ban Ki-moon ng
global solidarity laban sa A/H1N1 virus ng makipagpulong ito sa na sa 30 major
pharmaceutical manufacturers. Ang tanging major drugmaker na pumayag sa
suhestyon ng WHO ay ang GlaxoSmithKline PLC ng Britain. Umaabot umano sa 50
milyon doses ang kanilang idodonate at magbibigay ng discount kung WHO ang bibili
ng gamot para sa mahihirap na bansa.
Ethiopia lumusob sa Somalia
MULING umaarangkada ang tropa ng Ethiopia sa bansa ng Somalia. Ito'y upang
kanilang palibutan ang bayan ng Kalabeyr na nagsilbing boundary sa pagitang ng
kanilang bansa at Somalia. Naniniwala ang mga foriegn observer na bumalik sila sa
Somalia upang protektahan ang kanilang bansa sa posibleng gawing paglusob ng
Somali Islamist rebels. Bagamat hindi pa nagbigay ng pahayag ang gobyerno ng
Ethiopia at Somalia hinggil sa nasabing pangyayari. Napag-alaman na sa pag-uulat na
ito,dalawang bayan na ang napasok ng mga rebelde simula ng sumiklab ang
panibagong engkuwentro sa pagitan ng pro-government militia kung saan umabot na
sa 113 ka tao ang napaulat na namatay.
ISPORTS
'Tournament for Peace and Understanding' ilulunsad
SA LAYUNIN na pagyamanin ang talento ng Pinoy sa larangan ng boksing, ilulunsad ni
Panguling Arroyo sa katapusan ng buwan ang isang torneong maglilinang at hahasa sa
mga amateur boxers mula sa military services, national police at sa kauna-unahang
pagkakataon- ang Autonomous Region of Muslim Mindanao. Kasabay ng pagbubukas
ng “Tournament for Peace and Understanding,” isasabay ang inagurasyon ng Philippine
Sports Commission-Amateur Boxing Association of the Philippines na gaganapin sa
Rizal Memorial Sports Complex, na tatampukan ng non-RP team boxers na may 48 kgs
to 75 kg. weight. Tinatayang kabibilangan ng 3 hanggang 6 partisipante bawat
koponan ang kumpetisyong tatagal ng 3 hanggang 4 araw.

Marquez hindi pa rin pinapatawad si Pacquaio
MATAPOS ang maagawan ng kanyang dating suot na World Boxing Council (WBC) super
featherweight crown via split decision, hindi pa rin napapatawad ni Mexican Juan
Manuel Marquez si Filipino boxing icon Manny Pacquiao. Ipinagyabang kahapon ng 35anyos
na si Marquez na takot sa kanya ang 30-taong gulang na si Pacquiao kaya
patuloy ang pag-iwas nito para sa kanilang ikatlong pagkikita sa boxing ring. “Pacquiao
keeps running from me,” ani Marquez. “And he does not want to face me a third time;
he just keeps running away.” Matatandaang tinalo ni Pacquiao si Marquez via split
decision sa kanilang rematch para angkinin ang dating hawak ng Mexican na WBC
super featherweight belt noong Marso 16 ng 2008. Nauna nang umiskor si Marquez ng
isang draw sa kanilang featherweight championship ni Pacquiao noong Mayo ng 2004
sa kabila ng tatlong beses na pagbagsak nito sa first round.
Race for Peace-First Tour of Mindanao gaganapin na
LALARGA ang Race for Peace-First Tour of Mindanao sa June 4-7 kung saan 12 teams
ang maglalaban-laban sa four-stage competition na tatahak ng 682 kilometro. Ang
bawat team ay may anim na riders na kakarera para sa temang "One Track, One
Dream, One Vision!" Ang event ay sanctioned ng UCI-recognized PhilCycling sa
pamumuno ni Tagaytay City Mayor Abraham “Bambol” Tolentino. Pangangasiwaan ito
ni PhilCycling vice president for Mindanao Salvador “Jun” Paholio Jr. Ang event ay coorganized
ng Radio Mindanao Network at Samahang Siklista Kooperatiba ng Davao.
Ang first stage ay 153-km race mula sa Davao City hanggang General Santos City, ang
second stage ay 159 kms. General Santos-Koronadal City, ang third stage ay 130kms.
Koronadal-Cotabato City at fourth stage 240 kms. Cotabato City-Davao City. Ang Race
for Peace-First Tour of Mindanao ay ang katulad ng Liquigaz Tour of Luzon Northern
Philippines at ng Padyak Pinoy 2009-Tour of Champions, na sanctioned din ng
PhilCycling.
Team Pilipinas sa FIBA-Asia Champions Cup maaaring mag-5th place
SA KABITA ng masaklap na pagkatalo sa kamay ng Qatar noong nakalipas na linggo sa
kasalukuyang ginaganap na 20th FIBA-Asia Champions Cup, bumawi ngayon ang RP
Team. Tinalo ng Team Pilipinas ang Korea kahapon, 98-78, at may posibilidad pa silang
tumapos sa ikalimang puwesto. Ayon kay RP head coach Rajko Toroman, isa sa
pinakamagandang laban nila sa Korea ang ipinakita ng national team. Umiskor si CJ
Miles ng 16 points at 16 rebounds habang malaking tulong din ang nai-ambag nina JV
Casio (14 pts.), Dylan Ababou (12 points), Mac Baracael at RJ Jazul, 10 points. Alas
singko mamayang hapon makakaharap ng RP ang Satria Muda ng host Indonesia.
SHOWBIZ
Katrina Halili sasampahan ng kaso si Hayden Kho
PERSONAL na tutungo ngayon sa Senado si Katrina Halili at dudulog sa tanggapan ni
Senator Bong Revilla upang humingi ng tulong upang masampahan ng kaukulang kaso
ang celebrity doctor na si Hayden Kho na sinasabing nagpakalat ng kanilang sex video.
Maliban kay Katrina Halili, marami pa umanong nabiktima si Dr. Kho, at isa na rin dito
ang isang commercial model na naging artista na ngayon na pinangalanan ni Revilla na
si Maricar Reyes. "Ang mabigat pa nito, hindi lang isang tao, sa isang babae ginawa.
Marami, marami pa at nagsusulputan pa ngayon. Kaya yun ung kinakalap natin, yung
mga biktima niya na magreklamo na rin against this person. I naantayan natin na
lumapit na rin sa atin itong si Maricar Reyes na isang commercial model. Kawawa
naman itong isang babae na nadadamay na rin. Mayroon pang ibang mga pangalan na
lumulutang," pahayag ni Revilla. Nabatid na sa sex video na napanood ng mga

miyembro ng Senate media, kitang-kita na alam at pinagplanuhan ni Hayden ang
pagkaka-video ng kanilang sexcapade ni Katrina. Inakusahan ni Revilla si Kho bilang
“pervert of the highest kind” at “predator who has neither conscience nor respect for
women.”
Hayden itinangging siya ang nagkalat ng sex video
ITINANGGI ng celebrity doctor na si Hayden Kho na siya ang nasa likod ng pagkakalat
ng kontrobersyal nilang sex video ng sexy actress na si Katrina Halili, commercial
model na si Maricar Reyes at iba pang personalidad. Batay sa mga report, may
binanggit daw itong pangalan ng dalawa niyang kaibigan na nasa medical profession
din. Ang mga ito umano ang may hawak ng video nila ng sexy actress. Gayunman,
hindi raw ito sigurado kung isa sa dalawa niyang kaibigan ang nagpalabas ng mga
video. Sa kabilang dako, nakalagay lang umano sa inbox ng cellphone ni Katrina ang
mga mensahe sa kanya ni Hayden na gagamitin daw nitong ebidensiya sa mga
hakbang laban kay Hayden.
BB tanggap na ng mga barakong utol
SA wakas nagkaroon na rin katuparan ang matagal nang dinarasal ni BB Gandanghari
na dumating ang araw na maluwag na tanggapin ng mga utol niyang sina Rommel at
Royette Padilla ang kanyang kasalukuyang estado. Matagal ding hindi sila nagkikitakita
mula ng aminin niya sa Pinoy Big Brother na siya ay isang gay. Naganap ang
pagkikita ng magkakapatid last May 11 sa birthday ng kapatid nilang si Rebecca sa Ka
Freddie’s Music Bar and Restaurant sa Adriatico, Malate. Unang dumating si Rommel na
galing pa pala ng Pampanga, kasama ang kanyang mga pinsang sina Jun at July
Hidalgo at ang character actor na si Mon Confiado. Hindi naman nagtatagal ay
dumating na rin si Royette kasama ang kanyang misis at masayang nakihalo sa ibang
pang bisita na miyembro rin ng pamilya. Naki-join na rin sina Ka Freddie at Maegan
Aguilar sa mesa nila. Nabanggit sa amin ni Becca na nakausap niya si Robin at sabi ay
hahabol sa naturang party at ganoon din si BB na laging napuputol ang linya habang
kausap ang sister nito. Past midnight na nang finally ay dumating si BB pero naudlot
ang pagpasok nito nang makita sina Rommel at Royette na alam nating very vocal sa
kanilang nararamdaman na hindi sang-ayon sa paglalantad nito. Marami ang nagulat
nang paupuin ng dalawa sa kanilang mesa si BB at doon nga ay bumangka na sa
pagkukuwento si Royette. Sa puntong iyon ay sinambit nito at tinawag na sister si BB,
sabay yakap dito. Samantalang si Rommel naman ay yumakap na rin at binigyan pa
nga si BB ng isang supot ng Vigan longganisa. Ang pinakamasaya sa lahat ay si
Rebecca dahil naganap ang pagkikita at pagbabati ng kanyang mga kapatid sa
mismong birthday niya. Ganun din si BB na kitang-kita sa mukha nito ang labis na
kasiyahan dahil matagal na niyang dinarasal na sana nga matanggap na siya ng
kanyang pamilya na kung ano man siya ngayon.
Willie Revillame iginiit na wala siyang balak tumakbo sa eleksyon
MULI ay nilinaw ni Willie Revillame na wala siyang intensyong tumakbo sa kahit anong
posisyon sa darating na halalan sa susunod na taon. Para kasi sa kanya, puwede kang
tumulong kahit wala kang posisyon sa gobyerno at iyon nga ang kanyang ginagawa.
Ang gusto lang naman ni Willie ay makausap kung sino man ang mananalong pangulo
ng bansa para ilapit ang kanyang matagal ng mithiin na magkaroon ng isang bahay na
magbibigay ng suporta at kalinga sa mga batang naglilimos sa kalye at nagbebenta ng
Sampaguita.
BALITANG A-KYUT
Saging ginamit ng binatilyo sa panghoholdap

WINSTON-SALEM, N.C. – Inihayag ng mga awtoridad, tinangkang holdapin ng isang
binatilyo ang isang tindahan gamit ang saging at kinain ito bago dumating ang
nagrespondeng mga pulis. Ayon sa Winston-Salem authorities, itinago ni John Szwalla,
17-anyos, ang saging sa ilalim ng kanyang shirt habang papasok sa loob ng tindahan,
at inihayag na mayroon siyang baril saka humingi ng pera. Inihayag ng may-ari ng
tindahang si Bobby Ray Mabe, agad nilang sinunggaban ng isa pang kustomer, si
Szwalla at pinigilan ang binatilyo hanggang dumating ang mga pulis. Habang
naghihintay sa mga awtoridad, sinabi ni Mabe na kinain ng binatilyo ang saging.
Gayunman, kinunan na lamang ng larawan ng mga pulis ang balat ng saging. Sinabi ni
Forsyth County Sheriff’s office spokesman Maj. Brad Stanley, nagbiro ang mga pulis na
kakasuhan nila si Szwalla ng “destroying evidence.” Nahaharap si Szwalla sa kasong
“attempted armed robbery.”
ALAM N’YO BA?
Ukay-ukay posibleng maging ‘swine flu carrier'
DAPAT mag-ingat ang mga mahilig bumili ng smuggled ukay- ukay (used clothing) dahil
malaki ang posibilidad na maging ‘carrier’ ito ng A/H1N1 o ang nakamamatay na swine
flu virus. Walang saysay ang lahat na ginagawang pag-iingat ng pamahalaan na
mapigilan ang pagpasok ng swine flu virus kung hindi kukumpiskahin at ipagbabawal
ang pagbebenta ng smuggled ukay- ukay sa buong bansa. Ayon naman kay Dr. Lyndon
Lee Suy, program manager sa Department of Health (DoH), pagmimitingan nila ang
sitwasyong may kaugnayan sa pagkahawa ng taong magsusuot ng ukay-ukay matapos
itong magamit ng isang namatay sa swine flu virus. Sinabi pa niya na tumatagal ng
anim na oras ang virus. Dahil hindi mapigilan ang mabilis na pagkalat ng swine flu
virus, pati ang World Health Organization (WHO) ay umamin na “helpless” ito sa
pagkontrol at pagsugpo ng A/H1N1 virus, na kumalat na sa 40 bansa kung saan 129
katao ang namatay at 8,500 ang dinapuan ng sakit. Dahil dito, pinag-aaralan ng WHO
kung magde-deklara ito ng pandemic o stage 6 alert level. Nagpahayag ng matinding
pagkabahala naman si WHO Director General Magaret Chan sa patuloy na pananalasa
ng swine flu virus sa maraming bansa. Ayon naman sa isang opisyal ng Bureau of
Customs, kahit may batas na nagbabawal sa pag-aangkat ng ukay-ukay, hindi nila
mapigil ang pagpapalusot at pagbebenta ng smuggled na mga kasuotan dahil
ginagawa itong negosyo hindi lamang sa Maynila at ibang urban center kundi sa buong
bansa.
PAUNAWA
Ang mga impormasyon dito ay kinalap at iniayos ng Brent & Strauss Integrated
Communications, Inc. para sa Jadran pismo d.o.o. • Tel. +385 51 403 185 • Fax +385 51 403
189 • Email: news@jadranpismo.hr