HS_PAR_partijprogramma_2017_PAP

HUNTU KU BO PA UN MIHÓ KÒRSOU!
Programa di akshon di Partido PAR
Pa elekshon di Parlamento di 28 di aprel 2017
Proposishonnan pa garantisá bon gobernashon i pa engrandese
bienestar di tur habitante.

Kontenido
Prólogo
Mensahe personal di Eugene Rhuggenaath
Introdukshon
Vishon, Mishon i Balornan klave ......................................................................................................7
Kapítulo 1. Bon Gobernashon……..................................................................................................... 9
Kapítulo 2. Kresementu Ekonómiko i Bienestar .............................................................................12
Kapítulo 3. Enseñansa, Formashon, Deporte i Kultura ...................................................................15
Kapítulo 4. Siguridat i Kalidat di Bida………......................................................................................20
Kapítulo 5. Asuntunan Sosial i Kombatimentu di Pobresa..............................................................24
Kapítulo 6. Infrastruktura i Logístika.............................................................................................. 27
Kapítulo 7. Salubridat, Medio Ambiente i Naturale........................................................................29
Kapítulo 8. Maneho Finansiero ...................................................................................................... 32
Kapítulo 9. Konekshon ku Mundu.................................................................................................. 35
Kapítulo 10. Maneho di energia..................................................................................................... 37
2

Prólogo
Ken por a kere ku apénas 5 luna despues di e elekshon di 30 di sèptèmber 2016 nos mester a bai urna
elektoral atrobe? Probablemente niun hende. Sigur no ora despues di e resultado di e elekshon un gran
parti di e pueblo aki a sinti su mes aliviá ya ku tabata tin bista ku partidonan por a forma un gobièrnu pa
trese trankilidat bek den gobernashon. Ku tur kos a kana hopi otro nos tur sa entretantu. Ta hopi kos a
pasa den korto tempu. Kumplimentu ku lei i prinsipionan di bon gobernashon, ku ta balornan
fundamental den nos estado di derecho ku tur siudadano den Reino mester por konta riba dje, a wòrdu
pone bou di preshon enorme pa finalmente esakinan wòrdu salbaguardiá via di un medida di alto
supervishon di Reino. Resultado di e medida di alto supervishon ta riba mesa e momento aki. Ta bini
elekshon atrobe dia 28 di aprel 2017. Den Reino Hulandes e pueblo semper tin i lo tin e último palabra.
Ta bon ku nos komo pueblo por konta riba esaki .
E elekshon aki un bes mas ta na abo komo siudadano di e nos pais pa skohe ken ta bai representá abo
den parlamento i despues den gobièrnu di Kòrsou. Pa nos di PAR ta un plaser di un bes mas konvensé
abo ku nos partido ta e mihó alternativa. Un alternativa real. Sigur ku awor nos estado di derecho ta bou
di preshon. E ta i ta keda importante pa nos tin polítikonan serio, kapabel i íntegro na mando ku por
trese Kòrsou bek dan awanan kalmu, saka e potensial di nos isla i desaroyá trayektonan ekonómiko i
sosial i asina solushoná e kantidat di problemanan ku nos pueblo ta enfrentá tur dia di nobo.
Di e último elekshon di 2016 te awe un par di kos a kambia den nos partido. E kambio di mas importante
ta ku lider polítiko Zita Jesus Leito a pasa e batuta over pa Eugene Rhuggenaath ku a demonstrá ku e ta e
promesa grandi di nos partido. E pasamentu di batuta aki tabata un akto di grandesa ku ta pas den e
historia i tradishon riku di PAR.
Bou di liderazgo di Eugene Rhuggenaath PAR ta #onthemove manera hóbennan awendia ta gusta
ekspresá nan mes. Bayendo pa e elekshon di fin di 28 di aprel 2017 Eugene Rhuggenaath a skohe pa sigui
rejovenese e lista di kandidato i pa loke ta trata mensahe bai bek na fundeshi di e partido. Den e kuadro
aki a skohe konsientemente pa saka un lema bieu for di kashi ku ta SERIO i SINSERO.
Pa loke ta trata e programa di partido di akshon aki lo no asombrá niun hende ku e no ta diferensiá
mashá for di esun di 5 luna pasá. Aki aya e lesadó atente lo ripará kambionan chikí te ku kambionan mas
grandi mirando susesonan i kambionan ku a tuma lugá den último lunanan. Un ehèmpel ta e yegada kasi
sigur di e kompania estatal di China yamá Guandong Zhenrong. Ku bista riba 2019 e plannan di e
kompanianan di estado di China lo bai trese desaroyonan positivo pa loke ta trata desaroyo di nos
refineria, desaroyo di Schottegat, desaroyo di Bullenbaai i tambe pa nos kolumna di energia. Tur
esakinan ta kosnan pa tene kuenta kuné i ku ta desaroyonan alentador.
Nos ta deseá tur lesadó di e programa di akshon hopi sabiduria. Pa informashonnan aktual i tur desaroyo
rondó di partido PAR semper por opta pa sigui nos riba internèt via www.parcuracao.com , e paginá di
FaceBook “PAR Curacao” e paginá di FAceBook “Frakshon PAR den parlamento i tambe dor di sigui e
‘hashtag’s riba FaceBook ku ta #onthemove
3

Un mensahe personal di Eugene Rhuggenaath
Apresiable lesadó di e programa di akshon aki,
Kòrsou ta pasando den tempunan turbulento den tur sentido di palabra. Na nivel di gobernashon a surgi
un lucha tenas entre bon i malu. Esaki ta duna insiguridat i deskonfiansa i sin un kambio real di direkshon
lo dirigí nos na kaida di norma i na un Kòrsou ku hende apátiko. Esei nos no por usa. P’esei e elekshon di
28 di aprel 2017 ta mas importante ku nunka. Komo komunidat nos lo tin ku bai skohe entre (mas i mas)
dekadensia òf desensia. Kòrsou mas ainda den gara di baho mundu ku literalmente ta pone tur regla i lei
un banda i ku ta pusha Kòrsou den un konflikto ku Den Haag ku e meta pa nos bira independiente òf
restourá órden, norma i balornan i kondukta síviko i mas relashonnan di koperashon den Reino Hulandes
en bes di kibra ku e lasonan aki. Asina simpel e kos ta. Pa kua abo ta skohe?
Ami ta konvensí ku mala fe no por gana di buena fe. Pero esaki no ta pasa di mes. Ta nos tur ta
responsabel i mester bringa pa buena fe semper keda mas fuerte. Nos huntu semper mester keda den
movishon pa sostené buena fe. Keda den movishon ta nos salbashon. Esei semper tabata nos salbashon.
P’esei ami, positivo ku mi ta, semper ta #onthemove! Tur dia di nobo. Abo tambe?
Lo ke mi ke yega na dje ta ku nos komo ‘Yu di Kòrsou despues di 7 aña di outonomia dirigí nos mes den e
bon direkshon atrobe. E direkshon unda tin lugá, atenshon i medionan finansiero pa tur e kosnan ku ta
na nos kurason i ku ta importante pa un komunidat balansá. Mi ta referí aki na asuntunan manera
edukashon i formashon na nivel, kreamentu di kuponan di trabou, un salubridat públiko konfiabel i
pagabel, famianan kontentu, seguridat i bon gobernashon ku mandatarionan íntegro i bon koperashon
pa ku e paisnan den Reino Hulandes.
Nos mester haña Kòrsou #onthemove atrobe. Ami ta kontribuyendo na esei un tempu kaba. I ku éksito!
Komo minister di Desaroyo Ekonómiko mi a sa di hèndel diferente problemanan fèrfelu ku mi a sa di
solushoná a largu plaso den un tempu rasonabel. Mientrastantu mi a wòrdu puntrá pa tuma liderazgo di
partido PAR riba mi. Pa ami kana dilanti komo lider pa dirigí nos isla na tempunan mihó. Físikamente i
mentalmente mi ta kla pa e reto aki. Mi ke kana dilanti pa yega na resultado konkreto. Resultadonan ku
ta na benefisio pa abo i pa ami, pa bo famia i pa mi famia, pa bo sernan kerí i pa mi sernan kerí i pa
henter pueblo di Kòrsou. E vishon ku kua lo mi kana dilanti ta skibí den e programa di akshon aki. Bo ta
kana ku mi?
Ban #onthemove
Vota PAR
Atentamente,
4

Introdukshon
Den kurso di añanan Kòrsou mas i mas a pèrdè kaminda. Parsialmente pa motibu di faktornan eksterno
finansiero ku nos no por a influensiá mashá. Pero komo pais nos mester mira nos mes tambe den spil.
Kresementu ekonómiko ya ta stanká añanan largu i komunidat i gobièrnunan, hopi biaha ku tur bon
intenshon, no por a evitá ku gruponan a keda atras i ku pobresa a oumentá. Konflikto interno i
malkontentu di hopi hende, a krea espasio i oportunidat, meskos ku den hopi otro pais, pa polítikonan
kada biaha mas populista i nan finansiadónan dudoso hasi nan entrada, krea broyo, deskonfiansa i
desunion i enrikesé nan mes riba lomba di komunidat. Esaki resultando den gobernashon kada biaha mas
malu, korupshon, stagnashon, empobresimentu, kresementu espantoso di kriminalidat, empeorashon di
nos relashon ku Hulanda unda den apénas 7 aña nos a sa di haña dos ‘aanwijzing’ for di e gobièrnu di
Reino.
Ta di komprondé ku nos komunidat no tin konfiansa mas den su polítikonan i ta konsiderá tur meskos,
apesar ku esei no ta asina. Nos poblashon ta hartá di korupshon, promesanan bashí i polítika apsurdo.
PAR ke traha riba transformashon di un komunidat dividí pa un komunidat kometé, ku rèspèt pa
diversidat kultural pero ku unidat di norma, balor i vishon. Parti di esaki ta e aspirashon pa bolbe hasi
gobernashon algu di tur hende. Pues gobernashon ku ta trata tur hende igual, sin distinshon di rasa,
kredo, preferensia polítiko, koló, orígen òf orientashon seksual. PAR ta para pa union, partisipashon i
fortifikashon di koheshon sosial.
Ku bista riba e aña krusial 2019, PAR ta konsiente ku banda di restorashon (mas aleu) di órden,
trankilidat, stabilidat, maneho finansiero responsabel, mihó enseñansa i espesialmente kresementu
ekonómiko, mester tuma algun desishon krusial tambe. Aña 2019 no solamente ta e aña den kual e
kontrato ku e gigante di petroli Venesolano PDVSA ta vense, pero tambe e aña ku nos mester kuminsá
paga nos debe na Hulanda. Mester intensivá i aselerá preparashonnan pa esaki i mester tuma
desishonnan al respekto ku e sentido di realismo nesesario. Den e kuadro aki ta importante pa nos
negoshá ku e kompania estatal di China ku ta Guandon Zengrong na un manera ku esaki a largu plaso i
den tur sentido tin un efekto positivo riba nos komunidat. No ta aseptabel pa - manera hopi biaha na
Kòrsou – nos deskuidá pa despues kai den pániko.
Goberná ta mira dilanti. Den e kuadro akí, mester sòru tambe pa e gastunan di konstrukshon di e
hospital nobo keda denter di e sumanan presupuestá. Nos no ta logra nada ku un hospital nobo si aworó
e gastunan ta muchu haltu. Un otro preokupashon ta konsekuensianan ku biramentu bieu kresiente di
nos poblashon tin pa kasnan pa kuido di ansiano, kuido pagabel, posishon sosial di hende grandi i
durabilidat di nos sistema di kuido sosial, inkluso AOV. Mester rekonosé konsekuensianan di esaki i
komuniká nan di forma kla i sinsero na poblashon. Ademas klase medio di Kòrsou mester bolbe haña un
alivio. Partikularmente e grupo akí, banda di penshonadonan, ya pa algun aña ta haña mayoria di gòlpi, i
ta sufri un preshon di impuesto relativamente haltu. Kòrsou tin mester di un klase medio fuerte pa redusí
e diferensia entre riku i pober mas tantu posibel.
5

Partido PAR ku su lider nobo i un teim multidisiplinario kapas i íntegro ta kla pa pone nan skouder bou di
tur e retonan aki. Bo voto pa PAR por pone nan den e posishon klave pa realmente kuminsá traha tambe.
Ta awor òf nunka!
Den e programa di akshon aki lo bo kontra despues di e prólogo, mensahe personal di Eugene
Rhuggenaath i e introdukshon aki, un splikashon di e vishon, mishon i tambe normanan fundamental di
partido PAR. Den e kapítulonan siguiente lo bo kontra puntonan di akshon konkreto ku PAR lo ke
ehekutá riba tur tereno di maneho. E puntonan di akshon aki a wòrdu pensá i diskutí ampliamente den
seno di PAR dor di nos peritonan teniendo kuenta entre otro ku e Plan Nashonal di Desaroyo ku a wòrdu
presentá pa Nashonnan Uni (UNDP). E importansia ku PAR ta duna na bon relashon di koperashon den
Reino Hulandes ta un parti integral di henter e programa di akshon aki.
Den e kuadro aki promé minister di Hulanda Mark Rutte a yega di hasi gobièrnu Kòrsou e proposishon pa
huntu ku Hulanda hasi negoshi den mundu i gana hopi sèn dor di traha huntu den Reino. PAR ta apoyá e
proposishon aki i lo hasi tur ku tin den su alkanse pa hasi e proposishon di gobièrnu Hulandes un realidat!
6

Vishon, Mishon i Balornan Klave
PAR tin un vishon a largu plaso. Esei no ta infleksibel i a keda adaptá diferente biaha durante e 22 aña di
eksistensha di nos partido. Pasobra un komunidat ta den moveshon kontínuo. Den tur área di maneho
tin hopi nesesidat di idea nobo i dinamismo pa pone nos pais progresá. Inovashon i kambio di mentalidat
mester haña e espasio nesesario. Nos ta konsiente ku lo no por realisá nos vishon den un solo periodo di
gobernashon. Echo sí ta ku despues di 2010, nos tin un retraso pa realisá nos potensial i PAR ke remediá
esaki ku bista riba 2025.
Vishon
PAR ta para pa un kultura polítiko positivo, konstruktivo i inovativo na servisio di poblashon kompletu.
Nos ke perkurá pa na 2025 Kòrsou tin e nivel mas haltu di bienestar i fasilidatnan di henter Karibe. Pa
logra esaki nos mester stimulá un kresementu ekonómiko signifikativo, pero duradero i harmonisá ku
nos naturalesa i medio ambiente. Frutanan di e kresementu ekonómiko akí mester benefisiá tur
habitante, na un manera sosialmente hustu. E Kòrsou di futuro akí ta habitá pa siudadanonan kometé,
responsabel, bon formá i bon informá, ku tin konfiansa den nan gobernashon i den e estado di derechi
kaminda nan ta biba. Esaki ta e soño ku nos ke realisá na un manera dinámiko, serio i sinsero huntu ku (i
pa) abo i henter nos poblashon.
Mishon
Partido PAR ta un partido polítiko di sentro, ku un historia riku, aktualmente ampliá ku karanan nobo
entusiasmá. Nos partido i nos hendenan ta un refleho di nos komunidat diverso i ta guiá pa balornan
kultural i étiko duradero. PAR ta rekonosé i ta tene kuenta ku nesesidatnan i problemanan di nos ‘Dushi
Kòrsou i na interes di nos isla i nos poblashon kompletu ta lucha pa bienestar i prosperidat. Nos tin mira
krítiko pero inovativo i progresivo i kaminda tin mester nos tin e kurashi pa tuma desishon pa kontribuí
na desaroyo sosial-ekonómiko di Kòrsou.
Balornan Klave
Komo PAR nos ta para tras di nos palabranan i ekspreshonnan i ta transformá nan den akshon i resultado
konkreto. Pa reforsá esaki nos ta asentuá: sinseridat & konfiabilidat, profeshonalidat & ekspertisio,
integridat & bon gobernashon.
Sinsero i Konfiabel: Nos por i lo duna splikashon i responsabilisá semper di kon nos a tuma sierto
akshonnan, tambe si nan no a resultá manera sperá. Nos ta kumpli ku nos kompromisonan, i si nos no
por esaki nos lo komuniká bon riba esaki. Nos ta karga responsabilidat pa nos propio aktuashon.
Profeshonal i Kompetente: Nos polítikonan, mandatarionan i representantenan ta konsiente di nan
komportashon i ta disponé di sufisiente konosementu propio i ekspertisio. Nan ta usa nan ekspertisio na
7

un manera efektivo pa (den koperashon ku otronan) atendé situashonnan problemátiko, pa realisá
resultadonan konkreto pa Kòrsou kompletu òf gruponan di interes.
Íntegro i pro Bon Gobernashon: Nos ta mantené normanan sosial i étiko generalmente aseptá, relatá ku
informashon vulnerabel, kontaktonan eksterno, posishonnan i interesnan. Nos ta konsiente di
responsabilidat grandi di nos polítikonan i mandatarionan, pasobra esaki direktamente ta mishi ku bida
personal di hende na Kòrsou. P’esei enfátikamente nos ta para pa integridat i bon gobernashon, lokual
nos ta tradusí komo komportashon moralmente korekto.
8

Kapítulo 1. Bon Gobernashon
último añanan nos pais a pasa den susesonan ku ta mina fundeshi di nos estado di derechi. Kòrda entre
otro intentonan orkestrá pa mina konfiansa den independensia di hustisia, interogatorionan tokante
konfiabilidat di nos banko sentral i limitashon di institushonnan manera Kontrolaria General i Defensor di
Pueblo. Esaki ta debilitá nos sistema kompletu di ‘checks and balances’ i PAR ta desaprobá esaki
fuertemente. Ademas nos ta ripará mas i mas ku sierto polítikonan, buskando diligentemente pa nan
bentaha propio tur sorto di buraku den reglanan, ta ignorá reglanan no-skibí. E insidentenan akí ta
pertenesé na e kategoria “hunga ku kandela” i ta trese peliger berdadero pa nos klima di imbershon, nos
reputashon internashonal, i a lo largu pa esnan ku ménos rekurso den nos komunidat.
Abitantenan di Kòrsou tin derechi riba bon gobernashon. Esaki ta enserá un bon maneho di medionan i
asuntunan di nos pais na un manera habrí, transparente, responsabel i hustu. Esaki ta nifiká rèspèt pa
nesesidatnan i libertatnan di siudadanonan. Bon gobernashon ta enserá tambe un gobièrnu ku ta aktua
konsistente i pronostikabel. Maneho arbitrario òf por ehèmpel atendementu arbitrario ku petishonnan
pa pèrmit no ta aseptabel.
Bon gobernashon ta enserá tambe pa gobièrnu karga su responsabilidat, ta enforsá leinan eksistente i
inmediatamente ta kumpli ku sentensianan di wes. Bon mirá bon gobernashon ta un konsepto mashá
hanchu ku ta mishi ku tur área di maneho. P’esei lo bo topa elaborashon di algun punto di akshon mas
detayá den otro kapítulonan di e programa di partido akí. Kaminda esaki ta e kaso, nos ta referí na esaki.
Pa fortifiká bon gobernashon di Kòrsou nos ta premirá algun akshon, klasifiká bou di tres punto di lansa:
1. Integridat;
2. Bon Gobernashon & Legislashon;
3. Gobernashon SMART
AD 1. INTEGRIDAT
Integridat di mandatarionan ta di importansia esensial pa no solamente konfiansa di siudadanonan, pero
tambe pa imbershonistanan, i en general pa bon funshonamentu di nos estado di derechi. Pa halsa nivel
di integridat di mandatarionan PAR ta aspirá logra e siguiente akshonnan konkreto:
• Realisá un kambio den Areglo di Estado, ku ta pone ku parlamentarionan outomátikamente ta
suspendé si nan a haña un sentensia pa un krímen den funshon òf un kastigu di prisòn di a lo
ménos 1 aña;
• Un esfuerso máksimo pa hasi poblashon di Kòrsou konsiente i resistente kontra e peliger di
populismo i fasismo, i kontra infiltrashon di kriminalidat internashonal i lokal, ku ta menasá
bienestar di generashon aktual i futuro;
• Screening di empleadonan públiko den funshonnan haltu riba integridat;
9

• Evaluashon internashonal regular di nivel di korupshon den nos pais. Trabou serio pa mehorá nos
kalifikashon den por ehèmpel relatonan di Transparency International;
• Implementashon di e lei enkuanto finansiamentu di partidonan polítiko i kaminda ta nesesario
adaptashon di e lei na realidat aktual.
• Lanta un Unidat kontra Korupshon, un instansia independiente responsabel pa prevení i
investigá korupshon.
AD 2. BON GOBERNASHON & LEGISLASHON
Si nos mira reglanan di bon gobernashon, e problema no ta sinta den e reglanan mes, pero den
konosementu di regla i riba tur kos den mantenshon konsistente. Pues nos puntonan di akshon ta dirigí
riba esaki i esnan mas importante bo ta haña den e lista akibou. Riba otro áreanan relatá ku legislashon,
ta eksperensiá un eskases doloroso di hurista legislativo, lokual ta alargá e temporada pa kombertí
proposishonnan di lei den legislashon vigente, demasiado largu.
• Preparashon di huristanan legislativo i bekanan pa studiante ku ke skohe e profeshon akí;
• Fortifikashon di nos institushonnan demokrátiko i Kolegionan Haltu di estado;
• Maneho Finansiero responsabel (mira kapítulo 8);
• Mantenshon di e kódigo pa corporate governance. Esaki ta enserá ku den kaso di mal
atministrashon, efektivamente ta tuma sankshon kontra mandatarionan i komisarionan. Esaki ta
konta pa empresanan di gobièrnu i pa fundashonnan ku ta dependé di supsidio di gobièrnu pa
mas ku mitar di nan entrada. Lo no permití pa komisariado ta usurpá responsabilidat di un
direktor, ni pa e direktor aktua komo komisario òf doño;
• Mas atenshon pa kalidat di komisarionan pa medio di entrenamentu obligatorio;
• Stipulashon di profilnan di tur entidat di gobièrnu i trahamentu di un registro di personanan
kalifiká i eksperensia pa funshoná komo komisario i miembro di direktiva;
• Promoshon di trabou integrá entre tur ministerio i no solamente riba e nivel mas haltu. Traha
riba kiebro di e kompartimentalishon históriko di ministerionan i duna mas direkshon pa logra
resultado i stipulashon di kriterionan di prestashon enbes di kubrimentu estrikto. Alsa kalidat ta
bira un parti fiho di plannan di maneho di tur ministerio i otro instansha gubernamental;
• Un unidat di reklamo sentral, kaminda siudadanonan por akudí na promé instante, promé ku nan
akudí na di dos instante serka defensor di pueblo;
• Introdukshon di un areglo pa bati bèl denter di gobièrnu i entidatnan liá na gobièrnu.
AD 3. GOBERNASHON SMART
PAR ke introdusí ideanan i aktuashon moderno, di siglo 21, den tur área di gobernashon. Gobièrnu mes
tin un funshon di ehèmpel i lo pasa den un proseso di modernisashon. Nos meta ta pa fasilitá tur
aktividat gubernamental i tur interakshon entre siudadanonan i gobièrnu na un manera digital. Tur bo
transakshonnan ku Gobièrnu, na kas sintá. Un gobièrnu ku ta digitalmente aksesibel ta kumpli entre otro
ku e siguiente karakterístikanan:
10

• Mester por hasi pregunta atrabes di email i haña kontesta rápido. Mester ta fásil pa tuma nota di
prosedimentunan pa haña pèrmit i otorgashon mester bai mas lihé. Meskos ta konta pa
proseduranan pa hasi opheshon kontra desishonnan atministrativo;
• Konekshon di registrashonnan básiko (drechá). Kòrda entre otro Registrashon Sivil (Kranshi),
Servisio di Impuesto i SVB;
• Aparte di digitalisashon, un gobièrnu moderno i transparente ta enserá tambe mas partisipashon
pa gruponan di siudadano ku inisiativanan di maneho ku ta toka nan direktamente. Un bon
kuadro pa esaki, ku ya tin sosten di 70 pais, ta OPEN GOVERNMENT. Bo por lesa mas di esaki (na
Ingles i Spaño) na http://www.opengovpartnership.org/about/open-government-declaration
• Ku mas uso di e tipo di kuadro i konosementu eksistente akí, PAR ke traha riba kreashon di un
organisashon gubernamental ku ta mas efikas, transparente, konsistente i konfiabel. Esaki no
solamente ta esensial pa konfiansa di siudadanonan den nan gobièrnu, pero tambe pa ekonomia
i klima di imbershon. P’esei ta elaborá esaki mas aleu den kapítulo 2.
11

Kapítulo 2. Kresementu Ekonómiko i Bienestar
Pa kresementu ekonómiko ta sumamente importante pa drecha konfiansa den liderazgo sano i positivo
di gobièrnu. Esaki ta solamente posibel ku un bon relashon ku partnernan stratégiko paden i pafó di
Reino, ku énfasis riba bentahanan komun.
Bon mirá ekonomia di Kòrsou ta stanká ya pa dékadanan largu, ku un promedio di kresementu di BPN di
0,1% anualmente, loke ta nifiká un retraso grandi kompará ku islanan rondó di nos. Tin hopi motibu di
esaki, ku ta ampliamente investigá i deskribí, mas resien den e informe di TAC di 2013. Esei tabata
mustra klaramente ku kresementu ekonómiko mester ta un asuntu di gobièrnu kompletu i no di un solo
ministerio. Ku PAR den koalishon, nos lo komuniká esaki klaramente i nos lo pèrkurá pa laga tur
ministerio responsabilisá su mes a base di su kontribushon na nos éksito ekonómiko. Pasobra
básikamente, si e situashon aktual sigui eksistí plaka èkstra lo no drenta pa resolvé tur problema nos
dilanti. Kòrda bon, kresementu ta un medio, no un meta riba su mes – a lo largu ta bai pa bienestar di tur
habitante. I esei no ta midi solamente ku bienestar finansiero, pero tambe ku bon skol, kuido di
salubridat, sintimentu di siguridat, ets. Nos ta habrí pa un sistema di midi inovativo nobo manera e
Human Development Index òf e Social Progress Index. Nos ke midí mas hanchu pa nos pais, riba otro
áreanan manera entrada desigual i bienestar general, kòrda por ehèmpel e Better Life Index di OECD i/òf
e Gross National Happiness Index. A base di un análisis amplio nos a yega na 3 punto di lansa nobo pa
ekonomia:
1. Kresementu a base di forsa propio;
2. Sosten gubernamental efektivo pa aktividatnan ekonómiko nobo;
3. Inovashon i spiritu empresarial.
Aki djis algun akshon pa hasi uzo máksimamente di nos fòrsa komo pais i pa atendé opstákulonan ku
segun nos ta esnan mas fundamental pa logra mas aktividat ekonómiko, mas kupo di trabou i mas divisa.
AD 1. KRESEMENTU A BASE DI FORSA PROPIO
Kresementu ekonómiko por wòrdu realisá dor di pone atenshon riba sektornan ekonómiko ku tin e
potensial pa krese. PAR lo konsentrá riba e siguiente puntonan di akshon:
• Sigui desaroyá nos industria turístiko dor di implementashon di e plan maestro stratégiko pa
turismo;
• Sigui desaroyá e sektor logístiko dor di desaroyo di áreanan di haf i tráfiko aéreo, entre nan
CDM, Schottegat, Bulenbaai i Airport City. Ademas transformá Kòrsou den un sentro pa
interkonektá servisio: ekspertisio pa aktua komo mediadó i fasilitadó di komersio entre Oropa,
Suramerika i China;
• Eksportashon di servisio, entre otro turístiko pero tambe ku stimulashon di eksperto
importashon di eksperto. Mira Kòrsou komo sentro di servisio pa mundu. Nos mester, pasobra
komo pais nos ta importá muchu mas ku nos ta eksportá, i esaki nos no por wanta a largu plaso.
12

“Service from Curaçao” lo bira un lema apresiá. Tambe mester stimulá mas inisiativa empresarial
serka hóbennan;
• Stimulashon di industria i agrikultura riba eskala chikitu. Produkto di Kòrsou mester bira un lema
konosí pa ta orguyoso di dje. Pa industria chikitu, nos lo duna sosten na empresarionan chikitu
ku konosementu, kontaktonan, entrenamentu, ekspertisio i hèrmèntnan fiskal pa drenta mas
merkado;
• Pa agrikultura (i krio di bestia i peskeria) tambe nos ta mira perspektiva. Pa medio di agrikultura
nos lo bira ménos dependiente di otro pais pa suministro di alimentashon i nos lo usa ménos
divisa. Ku téknika nobo di irigashon, nos por habri áreanan nobo pa agrikultura. I den un lugá
será friá ta muchu mas dushi pa traha. Lo instituí un mekanismo di merkado pa koordinashon di
pedida i oferta (e.o. pa medio di konvenionan pa kada temporada). Bentaha mayor ta ku riba
relativamente korto plaso, e sektor akí por krea hopi empleo pa personal ku ménos preparashon
eskolar. Pa duna esaki bon kontenido, a korto plaso nos ke traspasá responsabilidat pa
agrikultura, krio di bestia i peskeria (e anterior LVV) di e ministerio di GMN pa e ministerio di
desaroyo ekonómiko.
AD 2. SOSTEN GUBERNAMENTAL EFETIVO PA AKTIVIDATNAN EKONOMIKO NOBO
Problemanan nos ta mira partikularmente den e famoso burokrasia ‘red tape’ i den kapasidat di trabou i
nivel di kalidat di e organisashon públiko. Esaki ta funesto pa e klima di imbershon. Mester alsa efisiensia
i nivel di servisio i mester duna mas direkshon na prestashon i resultado di trabou. PAR lo konsentrá riba
e siguiente puntonan di akshon:
• Mester por lanta empresanan mas rápido. Ménos sentralisá, ménos pèrmit, ménos paso, mas
rendimentu;
• Re-evaluashon di e maneho aktual di pèrmit, i abolishon di lokual ta stroba desaroyo. Di
protekshonismo pa mas funshonamentu di merkado;
• Stimulashon di inisiativa empresarial di hóbennan i subimentu di atraktividat fiskal pa kuminsá
un empresa chikitu pa medio di un redukshon pa prinsipiantenan;
• Otorgamentu mas lihé di pèrmitnan laboral temporal pa perito/eksperto tékniko di afó;
• Tantu subida salarial komo retiro di empleado públiko ta bai dependé di evaluashon di
prestashon. Ta introdusí posibilidatnan di entrenamentu i profilnan kla di funshon ku eksigishon
di kompetensia;
• Kreashon di un organisashon públiko mas efikas, transparente, konsistente i konfiabel. Lo ta fásil
pa haña akseso na gobièrnu, tambe digital. Tur funshonario públiko mester ta fásilmente
alkansabel. Huntu ku esei kondishonnan i prosedimentunan pa haña un pèrmit òf un otro
desishon atministrativo mester ta transparente. Si ta trata sea di un sita pa renobá un pasport òf
otorgashon di un pèrmit di konstrukshon: proseduranan ta rápido, términonan ta kòrtiku i e
trato ta servisial.
13

AD 3. INOVASHON I ESPRITU EMPRESARIAL
Inovashon tin di aber ku ideanan, produktonan, servisionan i prosesonan nobo. Inovashon por tuma lugá
dentro di organisashonnan pero tambe dentro di kuadronan sosial ekonómiko mas grandi. E proseso di
inovashon ta e total di aktividatnan humano dirigí riba renobashon di produktonan, servisionan i
formanan di produkshon pa trese esakinan riba un plan mas haltu. Den e kuadro aki PAR lo keda stimulá
pensamentu i akshonnan inovativo komo e base pa krea kresementu ekonómiko. Den kuadro di nos
realidat komo isla, inovashon komo base pa kresementu elektróniko mester ser buská den inovashon
den servisionan internashonal ku ya kaba ta òf por wòrdu brindá for di Kòrsou, Par lo konsentrá riba e
siguiente puntonan di akshon:
• Kreashon di mas fasilidat di investigashon pa universidatnan i ku búskeda i stimulashon di
relashonnan di kooperashon ku institushonnan eksterior manera ya kaba ta e kaso den e área di
investigashon biológiko kaminda CARMABI ta hasiendo un bon trabou;
• Inovashon di aktividat ekonómiko manera organisashon di mas festival manera North Sea Jazz,i
un mihó sinkronisashon, direkshon i fasilitashon di aktividat kultural rondó di nan pa medio di
e.o. CTDB;
• Un maneho inovativo pa revitalisá sentro di siudat (biba, traha, hasi kompra, sali, etc). Nos
sentro di siudat mester bira mas atraktivo pa imbershon privá. Por ehèmpel ku institushon di un
zona ku ta liber di impuesto, tax & duty free;
• Utilisashon i eksplotashon moderno di posibilidatnan di nos zonanan liber eksistente;
• Enkurashá sentido empresarial serka e poblashon lokal, spesialmente serka hóbennan. Ta
importante pa empresario lokal nobo i fresku introdusí ideanan nobo den nos ekonomia. Mester
kambia e persepshon ku mester djis sigui un preparashon pa bai traha den un empresa, lugá di
prepará pa krea empleo i bienestar ku ideanan nobo. P’esei mester dirigí nos maneho riba
posibilidatnan pa hóbennan pa para riba nan propio pia ku lantamentu di empresa responsabel.
Por ehèmpel ku apoyo di inisiativanan pa start-up, sitionan kompartí di trabou ku bon konekshon
di internet, etc. Kreashon di kondishonnan pa empresario hóben ta un prioridat pa sostené
kresementu ekonómiko;
• Atraé i fasilitá di asina yamá ‘digital nomads’ (ekspertonan hóben) i inisio di sentronan nobo di
preparashon den áreanan manera teknologia di informashon (inkluso produktornan di apps);
• Atraé industria sinematográfiko, sektor kreativo i sektor marítimo (pues por ehèmpel supmarino
tambe dirigí riba ref di koral);
• Reformá otro áreanan di maneho. Spesialmente enseñansa (mira kapítulo 6) i maneho di
energia. Un preis mas abou i stabil di koriente, basá spesialmente riba energia bèrdè, lo ta un
kontribushon supstansial na atraktividat di nos pais pa imbershonistanan. Pa logra esaki nos
mester hasi uso máksimo di nos rekursonan natural: solo, laman i bientu. Pero tambe pa medio
di fòrnunan pa kima shushi, nos por logra dos meta den unu, esta generá energia i alabes
protehá medio-ambiente;
• Reforsá e konsumidó komo parti esensial di e área ekonómiko: aki ta trata prinsipalmente di
splika i enforsá reglanan di maneho di kompetensia i protekshon real di konsumidó via di un
bònt di konsumidó.
14

Kapítulo 3. Enseñansa, Formashon, Deporte i Kultura
Enseñansa, formashon, deporte i kultura ta forma parti di edukashon integral di pueblo. Edukashon ta
importante pa hende por funshoná den komunidat. Edukashon ta kuminsá den un fase trempan.PAR ta
kontinuá su maneho pa duna atenshon na tantu edukashon pre-eskolar, edukashon na skol i edukashon
general di abitantenan di Kòrsou. Ku e oumento rápido di globalisashon, digitalisashon i informatisashon
di komunidat mundial, i e dinamismo di prosesonan sosial ku ta kompañá esaki, ta keda un nesesidat pa
sigui siña independiente di edat. Komo pais nos mester sigui e tendensia mundial akí.
E sektor di enseñansa ta esensial pa realisá nos vishon pa un Kòrsou moderno (SMART). Pero mester bai
hasi un ke otro kambio si. Durante e temporada di 2007-2010 ya a kuminsá ku diferente reforma, pero
hopi biaha a pone nan no kompletamente den práktika, pasobra na aña 2016 te ainda nos ta mira
diverso puntonan problemátiko. E reformanan akí ta pidi pa hasi un evaluashon ku partnernan den
enseñansa i pa krea posibilidat pa hasi adaptashon pa prepará hóbennan mas tantu posibel riba nan
futuro. E lema ta keda: Skol bo ta traha konhuntamente!
E sistema aktual no ta sirbi kompletamente pa diferente motibu: demasiado dropout (segun CBS na
Senso 2011 35,5%), insufisiente konekshon ku merkado laboral (motibu pa kiko a lanta KBB,
Kenniscentrum Beroepsonderwijs Bedrijfsleven pa kontribuí na un mihó relashon entre pedida i oferta
riba merkado laboral), i skolnan ta duna muchu poko atenshon na aspektonan formativo. Hopi biaha e
material di estudio no ta kuadra mas ku nos tempu (no digital) i/òf e ta na un idioma ku sea e alumno, òf
e maestro, òf tur dos, no ta dominá kompletamente. E infrastruktura ku ta traha kuné den diferente kaso
ta kana tras di normanan moderno. I finalmente hopi mayor (tin biaha obligatoriamente) ta
insufisientemente embolbí ku edukashon di nan yunan.
Pa duna kontenido na e vishon di PAR pa Kòrsou (mira Introdukshon) den e área akí nos ke dirigí nos riba
3 punto di lansa:
1. Reforma di enseñansa i formashon;
2. Fortifikashon/reintrodukshon di enseñansa den direkshon tékniko;
3. Un Kòrsou den moveshon.
AD 1. REFORMA DI ENSENAÑSA I FORMASHON
Enseñansa i formashon ta prosesonan dinámiko den desaroyo kontinuo. PAR ta partidario di un reforma
edukashonal ku ta atendé diferente asuntu pareu. Ku e reforma akí, nos tin ku tene kuenta ku e
komunidat nobo di informashon i konosementu di e siglo aktual (e asina yamá OECD 21st Century Skills)
ku tin implikashonnan importante pa sistemanan di enseñansa.
Pa por sigui e desaroyonan nobo di e komunidat di konosementu, mester siña hubentut
kompetenshanan, abilidatnan i aktitutnan, ku atenshon pa desaroyo di entre otro kreatividat. Por duna
esaki kontenido ku programanan parti atardi. Un di e reformanan ku mayor impakto ku PAR ta para p’e,
15

ta introdukshon di programanan parti atardi na tur skol (FO, VSBO i HAVO/VWO). Esaki lo tuma lugá di e
siguiente forma:
• Muchanan ta haña na skol un almuerso salú;
• Mayornan no tin mester kore bai bini mas meimei di e dia di trabou;
• Skol ta sigurá guia te a lo ménos 5’or di atardi;
• No ta e maestronan aktual di mainta, lo guia e programa di atardi, a ménos si un kantidat di nan
ta pidi esaki;
• Parti atardi ta duna atenshon na temanan mas kreativo i formativo. Banda di guia di hùiswèrk (ta
abolí esaki pasobra ta trahe na skol) ta ofresé aktividatnan den áreanan manera muzik,
dramatisashon, edukashon físiko, lèsnan temátiko pafó di skol i edukashon síviko/filosófiko;
• Intenshon di esaki ta fortifiká kreatividat, kapasidat inovativo, abilidatnan sosial, abilidatnan
komunikativo, kapasidat pa pensa krítiko i kapasidat empátiko, pa duna nan futuro mas
nifikashon. Lo remplasá e énfasis aktual pa siña for di kabes, ku 14 Programa di Akshon di Partido
PAR e abilidat pa buska, evaluá, mehorá i kombiná informashon. Tambe lo duna atenshon
eksplísito na aspektonan manera libertat, demokrasia i derechinan fundamental di tur hende, pa
e generashonnan siguiente tambe komprondé e importansia pa apresiá, protehá i defendé nan.
E aserkamentu nobo (den fase) akí ta krea kuponan èkstra di trabou pa e.o. maestronan kompetente i
otro disiplinanan. Nos skolnan ta bai enfoká riba preparashon di siudadanonan hóben formá
ampliamente (sosial i emoshonal), ku ta krítiko i por pensa pa nan mes. E gastunan por gana bèk ku un
redukshon (pokopoko) di fondonan pa kombatí kriminalidat i trahadónan sosial. I finalmente e reforma
edukashonal akí lo nifiká un deskargo grandi pa famianan di un solo mayor (ya 1/3e parti di tur famia).
E nesesidat di 21st Century skills no tin solamente impakto riba nos hubentut, pero riba nos komunidat
kompletu. Esaki ta trese kuné ku mester introdusí tambe posibilidatnan duradero pa duna adultonan i
hende grandi por disponé di e kompetenshanan nesesario. Por hasi esaki pa medio di preparashonnan
online den un ambiente digital. Enseñansa mas i mas ta digitalisá, globalisá i fleksibilisá, i un ambiente pa
siña digital a bira un vehíkulo esensial pa traspasá konosementu.Puntonan di akshon konkreto pa
sostené e punto di lansa akí ta:
• Inovashon atraves di uso amplio di medionan digital di lès (manera tablètnan);
• Mehorashon di kondishonnan laboral di trahadónan den enseñansa i posibilidatnan pa
rekapasitashon di maestronan (e.o. pa motibu di desaroyonan digital);
• Adaptashon di e eksigensianan nobo pa èksamen di havo/vwo, konforme e eksigensianan
intensifiká, pa garantisá konekshon ku un siguiente nivel di enseñansa i tambe pa garantisá
kalidat di enseñansa. Den e kuadro akí pèrkurá pa krea kondishonnan pa hasi e prueba di
kalkulashon na èksamen final di havo/vwo posibel;
• Krea kondishonnan pa un mihó preparashon di alumnonan riba un siguiente nivel di enseñansa,
entre otro pa medio di kambionan den e maneho di pruebanan final na skol di fundeshi i
introdukshon di pruebanan di kalkulashon;
• Alsa kalidat di preparashon di dosentenan (LOFO i 2e grado);
• Mas posibilidat di eskoho di un idioma di instrukshon pa mayornan i skolnan, e.o. ku mas peso pa
Ingles;
16

• Presupuestonan poko mas desentral (un lumpsum ku e skol ta liber pa gasta);
• Stipulá un suma máksimo ku skolnan pa enseñansa avansá por pidi komo kontribushon di
mayornan;
• Ekstra sosten pa skolnan ku relativamente hopi yu di migrante (nobo/regional);
• Evaluashon di maneho di finansiamentu di estudio, i spesialmente e maneho pa kobra bèk,
teniendo kuenta ku e porshon di Hulanda. Un debe di estudio na Hulanda no mester bira un
opstákulo insurpasabel pa stroba nos studiantenan ku a kaba di studia pa regresá;
• Un maneho di ‘Brain gain’ ku kondishonnan atraktivo pa regreso i estadia pa hóbennan ku a kaba
nan estudio;
• Promové pa Universidat bira un sentro regional di enseñansa pa atraé studiante ku ta kontribuí
na e gastunan;
• Internashonalisá Universidat ku promoshon di Ingles komo idioma di instrukshon.
AD 2. FORTIFIKASHON/REINTRODUKSHON DI ENSENANSA TEKNIKO
E nesesidat di 21st Century Skills tin konsekuensia pa tur nivel di nos sistema di enseñansa. E ta pidi
desaroyo i adaptashon di kuríkulonan eksistente pa por kumpli ku e ekonomia di konosementu di e siglo
aktual. Pero nos no mester pèrdè realidat for di bista: no tur mucha por logra den e sistema aktual. Esaki
ta nifiká ku mester traha riba reintrodukshon di un direkshon tékniko den enseñansa, paresido na lokual
den pasado tabata skolnan doméstiko i skolnan di fishi. Na Kòrsou nos tin hopi hóben talentoso, ku
simplemente no ta fit bon den e modelo mas teóriko. Nos ke introdusí estudionan pa profeshonnan
nesesario manera sastre, paipfeter, lasdó, mètslá, pagadó di mosaiko, fèrfdó etc. Den e kuadro akí
mester tuma desishon tokante futuro di Feffik. Banda di esei lo fasilitá diverso skol mará na empresa. Por
ehèmpel e sentro na DAMEN ku ta duna preparashon pa e.o. sektornan marítimo i metalúrgiko.
Esaki ta un di e maneranan ku nos ke duna atenshon na e echo ku mucha hòmber ta siña distinto ku
mucha muhé- e sistema aktual ta enfatisá métodonan ménos bon pa mucha hòmber, lokual ta kuminsá
kaba den enseñansa di fundeshi. Internashonalmente esaki ta konosí komo “The Boy problem” den
sektor edukashonal. Meskos ku hopi otro pais, Kòrsou ta luchando ku e reto di un asina yamá “buraku
edukativo” entre sekso maskulino i femenino. E ehèmpel mas resien di esaki ta e studiantenan ku a
finalisá UoC. Un total di 286 studiante di bachelor en 56 studiante di master a kaba di studia repartí riba
5 fakultat distinto. 24% tabata maskulino i e parti mayor tabata femenino, esta 76%. Esaki ta eksigí
análisis mas aleu i kambionan di maneho konkreto i inisiativanan pa mengua e buraku edukativo.
Puntonan di akshon konkreto pa sostené e punto di lansa akí ta:
• Introdusí enseñansa di fishi, teniendo kuenta ku eksigensianan di siglo 21;
• Buska balanse den atrakshon di maestronan maskulino pa ekilibrá feminisashon di enseñansa;
• Maksimalisá partisipashon di mayornan den enseñansa. Regla pa lei e derechi di partisipashon di
mayornan den maneho di e skol;
• Optimalisá enseñansa di fundeshi (FO) pa medio di evaluashon i adaptashon di kontenido i uso di
e ocho áreanan di edukashon;
• Evaluashon i optimalisashon di VSBO i SBO;
17

• Reintrodusí provishonnan pa sigurá ku muchanan den edat di bai skol obligatorio por bishitá
skol;
• Mihó vigilansia i guia di kalidat durante e proseso di enseñansa i siñamentu (Inspekshon di
enseñansa - mantenshon);
• Instituí un Konseho di Enseñansa i Merkado Laboral pa konsehá minister di enseñansa i minister
di labor enkanto tópikonan importante relatá ku enseñansa i merkado laboral;
• Reinstituí e Sentro di Konosementu di Profeshon & Empresa (KBB).
AD 3. UN KÒRSOU DEN MOVESHON
Un punto di lansa importante pa PAR ta moveshon, edukashon físiko i deporte. Nan ta pilánan
importante di formashon general di hende i por tin hopi efekto personal (relahamentu, dominio,
konsentrashon, desaroyo personal etc). Ademas nan ta kontribuí na un Kòrsou mas salú (tantu físiko
komo mental), redukshon di obesidat, kompañerismo, koheshon sosial, patriotismo i e ta promové
internashonalisashon di e produkto Kòrsou i muchu mas.
Aktualmente maneho di deporte di Kòrsou ta karesé di klaridat i efektividat. Ademas e kartera di deporte
ta repartí entre 2 ministerio, lokual ta resultá sumamente desbentahoso pa maneho di tur órgano
ehekutivo di deporte i NGOnan. Partisipashon aktivo i pasivo na deporte di poblashon di Kòrsou i
spesialmente hubentut ta sumamente abou. Sobrepeso ta un di e peligernan di esaki. Resientemente
FDDK, UoC, DOS i Hogeschool Arnhem a investigá esaki. Mayoria di alumno di enseñansa di fundeshi ta
move demasiado poko. 80% di hubentut no ta kumpli ku e norma di move minimalmente 5 biaha pa
siman a lo ménos pa 1 ora. Aserkando tantu e funshon personal komo esun nashonal di deporte, durante
e temporada binidero PAR lo enfatisá riba :
• Introdukshon di un maneho di deporte transparente i efektivo;
• Stimulashon mas trempan posibel di moveshon i deporte. Kuminsando ku edukashon pre-eskolar
i evaluashon i adaptashon di e kuríkulo aktual kaminda ta nesesario;
• Den enseñansa regular, mas elaborashon i optimalisashon di e área di edukashon “Estilo salú di
bida i enseñansa di moveshon” pa duna hubentut mas chèns pa move (ampliashon di e kantidat
di ora di moveshon);
• Traha strukturalmente riba e problema di agreshon den deporte;
• Drecha akomodashonnan deportivo den e diferente barionan i buska efektonan sinergétiko
entre skol i bario pa usa e akomodashonnan na un manera óptimo;
• Fasilitá deporte pa tur i deporte riba nivel haltu (topsport), e.o. pa medio di imbershon den
infrastruktura, material, entrenamentu pa direktornan i coachnan, i partisipashon den mas
kompetensia regional i internashonal. Kòrsou ta produsí mas ku un promedio pa kabes di
poblashon, di deportista talentoso di haltu nivel, ku no solamente ta promové nos pais den
eksterior pero tambe ta sirbi komo modelo pa nos hubentut;
• Stimulá NGOnan pa promové mas moveshon di poblashon di Kòrsou;
• Introdusí un Lòto pa Deporte, ku e meta pa hasi deporte progresivamente mas aksesibel, i a lo
largu gratuito (‘Deporte Gratis’). Otro alternativanan ta pa reformá Landsloterij pa e por supsidiá
18

deporte i kultura di un forma bon, i introdukshon di rekargonan riba sierto produktonan ku ta
perhudiká salú.
Aserkamentu a korto plaso
Kousa di e partisipashon aktivo i pasivo abou, ta falta di oferta di posibilidatnan di deporte, i tambe pa
falta di interes di gobièrnu pa. Mester motivá hubentut mas tantu, kuminsando ya for di den enseñansa
di fundeshi. Huntu ku esei vários atleta Kurasoleño di nivel haltu i talentonan por hunga un papel
importante komo modelo ehemplar. Organisashonnan deportivo en general tin diferente proyekto
deportivo, pero ta karesé di tempu i guia profeshonal pa por mehorá strukturalmente e partisipashon
deportivo abou di hubentut di Kòrsou.
Potensial eventonan deportivo
Kòrsou tin hopi posibilidat pa atraé mas atleta (top) di region, tantu pa duna seshonnan di entrenamentu
komo pa partisipá na kompetenshanan na Kòrsou. Sinembargo ta muchu poko evento deportivo regional
ta wòrdu organisá na Kòrsou pa logra sufisiente atenshon deportivo di nos pueblo. Organisando mas
evento deportivo regional na Kòrsou, lo krea mas airlift i mas okupashon di hotèlnan, lokual tambe lo
kontribuí na ekonomia (turismo di deporte).
Union pa medio di faktornan komun ku ta mara huntu (kultura)
101010 Kòrsou a logra su posishon outónomo den Reino. Un posishon nobo ku a kambia nos estado
konstitushonal. Kompañá ku esaki a tuma lugá kambionan riba e.o. tereno gubernamental, relashonal i
kultural. Kambionan drástiko manera esaki, ta eksigí un proseso pa mobilisá poblashon pa su interes
nashonal nobo, ku énfasis riba lokual ta komun, kontinuidat i unisidat. Kòrsou tin e posibilidat úniko pa
konsolidá “union den diversidat” ku inisio di un proseso pa fortifiká nos metanan komun. Durante e
temporada binidero, PAR ta bai pone énfasis riba e prosesonan i tradishonnan (normanan i balornan) ku
ta mara nos huntu, pa konsolidá nan i fortifiká nos lasonan ku otro.
PAR ke stimulá e kapasidat kreativo i inovativo di poblashon, i lo pèrkurá pa lanta un Akademia di Arte.
Huntu ku esei lo fortifiká e sentro di arte pa hasié mas aksesibel pa rekreashon sano. Ademas nos ta bai
investigá kiko ta e mihó manera pa stimulá arte riba tarima en general.
19

Kapítulo 4. Siguridat i Kalidat di Bida
Siguridat i kalidat di bida ta íntimamente ligá ku otro. Nan tin un relashon direkto. Manera bo papia
diesun, bo ta papia di e otro i kontrali. Si bo alrededor no ta sigur, bo kalidat di bida tampoko no ta bon. I
pa loke ta trata siguridat, último añanan tur kos a bai robes na Kòrsou. Den tur aspekto, nos siguridat ta
bou di preshon. Sea si ta trata di siguridat na kas, na trabou, den tráfiko, den medio-ambiente, sea di e
alimento ku nos ta kumpra i konsumí. Por ehèmpel nos siguridat personal na kas i siguridat di nos
propiedatnan ta bou di preshon pisá. Notisianan tokante atrakonan armá awendia ta kos di tur dia. Si ta
kas, empresa, hende grandi, hende ku no por defendé nan mes, no tin perdon pa ningun. Siguridat den
tráfiko tambe ta bou di preshon. E kantidat grandi di aksidente pa dia i pa kabes, e kantidat grandi di
morto pa aña, ta indiká un tráfiko insigur. Siguridat di e airu ku nos ta inhalá tambe ta un preokupashon.
Esaki tambe ta bou di preshon. Barionan kompletu ku rasgunan di kapa bèrdè ta mustra un kalidat di airu
ku no por yama sigur mas. Anto asina nos por nombra muchu mas.
Kreashon i mantenshon di siguridat i kalidat di bida den tur su aspektonan, ta un tarea gubernamental
primordial. Mester atendé esaki ku dinamismo awor. PAR ta konsiente ku e problema no ta kuenta di
regulashon. Tin regla i lei de sobra ku lo mester garantisá nos siguridat. E problema ta pa enforsá regla i
lei. P’esei PAR lo hasi su esfuerso pa institushonalisá mantenshon di regla i fortalesé e aparato di
mantenshon, segun práktika di (mal)komportashon di e hende Kurasoleño aktual. Esaki ta nifiká un
movida pa un maneho di kastigu inmediato. Pasobra PAR ke krea un Kòrsou kaminda kada siudadano por
desaroyá su talento óptimamente. Pa logra esaki, e siudadano mester por sintié sigur aki. Falta di
siguridat (i pues kalidat di bida) ta paralisá desaroyo di nos isla. No solamente pa siudadanonan i
empresarionan, pero tambe pa turista, imbershonista di afó, stagiairenan i otro grupo ku ta biba aki, tin
nan kas, i ta kontribuí na nos ekonomia. Nos ta apuntá 3 punto di lansa den e área di siguridat i kalidat di
bida:
1. Kontrolá rèspèt pa regla i lei a base di zero-toleransha;
2. Mehorá i fortifiká instansianan ku tareanan di mantenshon;
3. Un esfuerso pa mehorá siguridat den tráfiko.
AD 1. KONTROLA RESPET PA REGLA I LEI A BASE DI ZERO TOLERANSHA
Kurasoleñonan di bon boluntat, ku dia den dia afó ta kumpli ku regla i lei (tantu skibí komo no-skibí)
mester bolbe haña speransa. Speransa ku komo kolektividat, nos no ta slep baha bai un komunidat ku ta
rekompensá falta di kumplimentu ku regla i lei, i pokopoko ta bira normal. Esaki ta kondusí na anarkia, i
tin bes parse na un manera spantoso ku nos ta mashá serka di esei. Komo siudadano di bon boluntat,
mas i mas nos ta sakudí kabes i ta puntra ku asombro kresiente, unda konsiderashon i rèspèt pa regla i lei
a keda. Di koredó di motersaikel sin hèlmu, te benta shushi sin tin kunes den mondi, te supermerkado
ku no ta kumpli ku preis máksimo ni eksigensia higiéniko, te polítikonan ku ta keda den funshon sin
bèrgwensa, miéntras a sentensiá nan pa aktonan kastigabel. PAR simplemente no ta aseptá e tipo di
ekseso i komportashon akí mas i lo traha duru riba un maneho pa enforsá zero-toleransha riba tur lei i
regla eksistente. Na diferente área di maneho por spera lo siguiente:
20

• Usa mas polis riba kaya pa hasi tareanan di kontròl i mantenshon na un manera visibel i
konvisente. Tantu pa loke ta trata prevenshon komo represhon. Kaminda ta nesesario, mester
hasi uso intensivo di hèrmèntnan elektróniko manera vigilansia di kámara, informashon digital
den outo polisial. Huntu ku esei polis mester disponé di mas vehíkulo leve manera (cross)
motorsaikel, quad i baiskel. Mester intensivá tambe uso di drones;
• Huntu ku Ministerio Públiko, introdusí un sistema di hustisia rápido pa delito chikitu. Esaki lo
yuda esnan embolbí pa pensa bon promé nan kometé un delito, pasobra e kastigu ta sigui
inmediatamente;
• Atenshon intensivo di polis pa redusí kiebro (den kas òf empresa), atrako, uso di violensia (armá),
di e kantidat di gang, i nan violensia mútuo;
• Kontinuá i intensivá trabou di e ‘afpakteam’ (ekipo di rekohé) ku ta funshoná bou di guia di
ministerio públiko;
• Instituí un Inspekshon di Medio-Ambiente sólido, kompañá pa polis medio-ambiental ku
outoridat amplio pa atendé violashonnan medio-ambiental, inkluso bentamentu di shushi i
polushon di tera, laman i airu;
• Kontinuá e liña pa aktua severamente kontra konstrukshon ilegal, kobamentu ilegal di greis,
dèmpelmentu ilegal di áreanan na kosta i lagunanan, i usurpashon ilegal di tereno di gobièrnu;.
• Kontrolá i aktua severamente kontra empresanan òf empresarionan ku ta peligrá salú di
siudadanonan atrabes di benta di produkto i/òf servisio ku no ta kumpli ku eksigishonnan di lei;
• Investigá e posibilidat pa rubriká atrako di turista komo atake riba un interes ekonómiko krusial
di Kòrsou i hisa e kastigu pa esei ku 50%;
• Stimulá inisiativanan kaminda siudadanonan kometé (por ehèmpel den bario) por informá otro (i
outoridatnan) rápidamente na un manera digital tokante insidentenan;
• Redukshon di violashonnan di tráfiko (mira punto di lansa nr. 3).
AD 2. MEHORASHON I FORTIFIKASHON DI INSTANSHANAN KU TAREANAN DI MANTENSHON
Diverso instansia ku konhuntamente ta vigilá i traha pa siguridat i kalidat di bida di nos siudadanonan, ta
bou di preshon. Asina p.e. nos servisio di siguridat (VDC) lamentablemente tabata negativamente den
notisia durante un temporada despues di 2010. Den e kuadro akí no solamente ta sumamente
importante pa rekobrá rèspèt i konfiansa di siudadanonan den e organisashon akí, pero tambe pa
opservá e servisio pa sòru pa mehorashon i fortifikashon, pa e por bolbe funshoná na un manera
profeshonal i konfiabel den tur sentido (lokal i internashonal).
Mehorashon i fortifikashon ta nesesario tambe pa otro instansianan hudisial, manera Kuerpo Polisial di
Kòrsou (KPC), Ministerio Públiko (OM), Korte Komun di Hustisia i Wardakosta. PAR lo tuma inisiativa pa
sostené tur e instansianan akí na un manera krítiko pa mehorá nan funshonamentu. Rekomendashonnan
di diferente relato di e Konseho pa Mantenshon di Derechi ta duna un bon pista pa esaki. Asina nos ta
sigui konstruí riba e bentahanan ku leinan di Konsenso Hudisial a trese pa nos.
Atenshon èkstra tambe ta nesesario pa e aspekto kurativo pa atendé ku kriminalidat (prison,
rehabilitashon i resosialisashon) sino nos ta sigui mòp ku kranchi habrí. Un posibel medio akinan ta e
konsepto di asina yamá “halfway houses” pa sostené resosialisashon. En general PAR ta aspirá pa duna
21

mas tantu sosten posibel na hende sosialmente suak pará, pa evitá ku nan ta bai pèrdí den kriminalidat.
Ku mihó enseñansa dirigí riba fishi. Sosten finansiero asina leu ku entrada di gobièrnu ta permití esaki,
bibienda popular sufisiente i pagabel. E punto di salida ta fortifikashon di barionan pa einan buska
solushon pa problemanan di kriminalidat, desempleo, violensia, kai for di skol i embaraso hubenil. Meta
di e maneho akí ta kreashon di un poblashon ku ta kere den progreso a base di trabou, ku ta orguyoso di
su pais, ku tin kompashon ku otro hende, ku ta sigur di su mes, ku por atendé konflikto. PAR ta duna
kontenido na esaki ku entre otro:
• Fortifikashon di kooperashon i sinergia di institushonnan dirigí riba hubentut, manera
internatnan, Konseho di Tutoria, rehabilitashon, GOG, tutoria di famia, e punto sentral di
informashon di Konseho di Tutoria i polis di bario;
• Posibilidatnan adishonal pa rekreashon den bario, manera parke, lugá di hunga, sentro di bario
ku fasilidatnan (digital) pa grandi i chikí;
• Alsa grado di integridat di tur instansia embolbí pa kita tur deskonfiansa di siudadanonan;
• Promové kombinashon di teknologia i konosementu, pa medio di interakshon direkto di
instansianan lokal i di Reino. Den e kuadro akí nos ta boga pa lanta un “criminal intelligence
group” pa kombatí efektivamente entrada di kriminalidat internashonal organisá i di arma ilegal
den nos pais;
• Fortifiká kooperashon i sinergia di institushonnan dediká na hubentut manera internatnan;
• Konseho di Tutoria (voogdijraad), rehabilitashon (reclassering), GOG, tutoria di famia
(gezinsvoogdij), sentral di informashon di Konseho di Tutoria i polis di bario;
• Lanta un instituto di preparashon pa Mantenshon di Lei i órden Públiko;
• Imbershon den infrastruktura di prisòn i sèlnan di polis;
• Mehorá kooperashon interministerial pa prevení violensia den famia i maltrato di mucha.
Ademas PAR ta konsiderá nesesario pa hasi un evaluashon di e maneho di atmishon i
deportashon. Esaki no solamente pa motibu di siguridat, imigrashon tin tambe un diversidat di
aspekto sosial i ekonómiko. En todo kaso e evaluashon mester duna atenshon na e posishon di
muchanan indokumentá, pero hopi biaha nasé na Kòrsou, ku despues di bai skol hopi aña tòg no
por haña un diploma. Prosesonan pa duna mucha “ilegal” dokumentashon formalisá i hasi
reunion di famia posibel;
• Otorgashon mas fásil i lihé di pèrmitnan laboral temporal pa personal strañero altamente
kalifiká;
• Maneho dirigí riba atrakshon di gruponan spesífiko pa krea kresementu di poblashon, ku e meta
pa krea un base mas hanchu pa durabilidat di e sistema di kuido sosial. AOV entre otro tin
défisitnan mionario;
• Renovashon di e maneho di migrashon, dirigí riba trahadónan di konosementu i servisio ( i otro
áreanan kaminda tin nesesidat di trahadó ku no por haña na Kòrsou) por mehorá proseduranan
ku ta importante pa doñonan di trabou ku tin mester di trahadó strañero, i pa desaroyo
ekonómiko di Kòrsou; • Kompaña migrashon ku un maneho pa integrashon i koheshon sosial;
• Un bahada signifikativo di e leges pa alargá un estadia turístiko (ta máksimamente 90 dia);
• Hasi e grupo di ilegal ku ta traha den e sirkuito kaminda no ta paga primanan fiskal i sosial mas
chikitu;
22

• Protekshon adishonal di derechinan humano di migrantenan. Ta trata di kombatí kontrabanda i
negoshi di hende, eksplotashon di trahadó, derechi di mucha (IVRK), derechi di identidat (IVRK), i
derechi di reunion di famia (EVRM).
AD 3. MEHORASHON DI SIGURIDAT DI TRAFIKO
Manera menshoná anteriormente, ya pa basta aña kaba siguridat di tráfiko ta bou di preshon. E kantidat
grandi di aksidente tur dia i e kantidat pa kabes relativamente haltu di víktima mortal ta mustra un
tráfiko insigur. Kompanianan di seguro tambe ta ekspresá ku e daño material akinan ta un múltiple di
otro pais. Esei no ta solamente debí na e infrastruktura tin bes mal pensá, pero primeramente na
komportashon den tráfiko. Kore demasiado duru, pasamentu iresponsabel, pasa den lus kòrá i
korementu bou di influensia di alkohòl ta na órden di dia. Kore sin seguro ta tuma lugá mas i mas. Tur
esaki ta kondusí na tristesa humano i daño material innesesario. Ultimo añanan a tuma lugá un esfuerso
pa rekuperá e retraso di mehorashon di infrastruktura (e.o. drèmpel) i na diferente krusada peligroso a
traha plenchi di tráfiko. Nos opinion ta ku mester kontinuá e liña akí di mehorashon di infrastruktura.
Huntu ku esei mester hasi kontròl regular, efektivo i riguroso pa prevení komportashon iresponsabel i
insigur den tráfiko. Esaki pa protehá e partisipante bona-fide den tráfiko i rekompens’é pa komportashon
korekto. Algun punto konkreto di akshon ta:
• Hasi kontròl kontinuo di tráfiko (e.o. riba alkohòl, arma, droga, dokumentonan i komportashon),
kámara pa vigilá pasamentu den lus kòrá;
• Adaptá lei pa pone responsabilidat pa infrakshonnan den tráfiko serka doño di e number di outo;
• Introdusí maneho pa den kaso di violashonnan grosero, un obligashon pa pasa e èksamen pa
manehá vehíkulo di nobo òf asta kita e pèrmit pa stür kompletamente;
• Introdusí un fondo di garantia pa kubri gastunan di aksidentenan kousá pa outomobilista ku no a
kumpli ku nan obligashon pa sera un seguro di responsabilisashon;
• Hiba kampañanan kontinuo den medionan pa stimulá komportashon bon i responsabel den
tráfiko;
• Lanta un Outoridat di Tráfiko ku aktivamente, pidí òf no pidí, ta yuda gobièrnu ku konseho
tokante siguridat di tráfiko.
23

Kapítulo 5. Asuntunan Sosial i Kombatimentu di Pobresa
Tur habitante di Kòrsou tin derechi pa hiba un bida digno. PAR ta para pa esaki. Esnan mas débil den nos
komunidat mester por stèns riba sosten di skoudernan mas hanchu. Solidaridat i un komunidat duradero
di siudadano kometé, ta forma parti di nos vishon. Pa yega einan komo pais, nos mester kana ainda un
kaminda largu. Tin un abismo grandi entre pober i riku. E ekonomia stanká i e desempleo liá na esaki,
mas i mas ta kondusí na situashonnan sin perspektiva, ku ta stroba hende di partisipá kompletamente na
bida di komunidat. Importashon di pobresa for di region, ta empeorá e problema. E kantidat di hende
bou di e nivel di pobresa, segun CBS na 2011 tabata 25,1 %.
Kresementu ekonómiko aselerá, kompaña pa kresementu di empleo, e añanan binidero lo resolvé un
parti di e problema. Pero kresementu riba su mes no ta bastante, mester di un aserkamentu integral,
entre otro ku enseñansa. Pa kombatí e problema di pobresa efektivamente, nos tur mester duna mas
atenshon na mas embolbimentu, mas unidat, un identidat nashonal mas uniforme, mas solidaridat.
Solidaridat entre generashonnan, entre esnan ku ta presta labor i esnan ku no ta traha, esnan apto pa
traha i esnan ku no ta apto pa traha, i entre hende di diferente nivel di preparashon i di orígen diverso.
Mester tin komprenshon atrobe pa punto di bista di otro, pa asina nos no eksperensiá sosten di otro
komo un peso, pero mas bien komo un aktividat kolektivo pa progresá komo komunidat.
Den e kuadro akí no por tolerá mas, ku algun persona sosialmente débil, ta keda pegá den pobresa
struktural i asina strukturalmente ta usurpá medionan. No por tolerá mas tampoko ku enseñansa
defisiente ta hasi imposibel pa hende sosialmente débil krese for di pobresa. Hende mester di yudansa
pa por karga nan eksistensia i haña medio pa por subi ariba. Solamente esnan ku efektivamente no tin
forsa ni aptitut pa logra nan lugá riba merkado laboral, mester por sigui konta ku solidaridat di
komunidat.
Den e área di asuntunan sosial i kombatimentu di pobresa, nos ta rekonosé 3 punto di lansa:
1. Kontinuá trayektonan di empleo eksistente i inisiá trayektonan nobo;
2. Interseptá trabukonan sosial mayor, esta bibienda, edukashon, finansa, relashonnan den
famia i informashon tokante alimentashon;
3. Engrandesé konosementu i komprenshon di i tokante mundu di hubentut i hóbennan na
Kòrsou.
AD 1. KONTINUA TRAYEKRONAN DI EMPLEO EKSISTENTE I INISIA TRAYEKTONAN NOBO
Pa interseptá e nivel aktual di desempleo (spesialmente bou di hóbennan) simplemente no por warda
ekonomia drecha. Gobièrnu mester drenta akshon i for di un brel sosial, pone hende na trabou pa un
sierto temporada limitá. Ku esaki PAR no ke krea simplemente trabou supsidiá ku ta duna e desempleado
un entrada, pero –huntu ku e aspekto humano di partisipashon den komunidat usa trabou komo medio
pa duna e desempleado e abilidatnan nesesario pa bolbe subi merkado laboral ku éksito. Lo desaroyá
trayektonan di empleo den sektor di agrikultura, krio di bestia i peskeria, turismo, arte i kultura i
konstrukshon (drecha kasnan sosial i ku potensial sosial)
24

AD 2. INTERSEPTA TRABUKONAN SOSIAL MAYOR
Segun ministerio di Desaroyo Sosial, Labor i Bienestar (SOAW) un quickscan na aña 2013 ta indiká ku
problemanan mayor di komunidat ta den e área di bibienda, edukashon di yunan, fiansa i relashonnan
den famia. E ministerio mester bai hasi tur lo posibel pa komprondé e problemanan akí, buska e
kousanan mas profundo i pensa solushonnan kreativo a korto i largu plaso. Aki ta pensa riba e siguiente
akshonnan:
• Introdusí edifisio haltu den e meskla di estilo di konstrukshon di bibienda sosial;
• Repartí i reorganisá e diversidat di bibienda sosial di hür, pa bibiendanan sosial di hür pa
prinsipiante, kasnan pa pasante di hür i pa benta, i den futuro usa esaki komo base pa
repartishon di bibienda sosial na e grupo intenshoná;
• Inventarisá profundamente kasnan bashí anteriormente habitá (mas ku 5000 segun Senso di
2011) i den kooperashon ku propietarionan si no ta gobièrnu, drecha nan i hasi nan apropiá pa
bibienda sosial;
• Entrená i guia famianan riba tereno di abilidatnan edukativo ku temanan manera balornan di
famia, traha presupuesto, alimentashon, estilo di biba, uso di antikonseptivo i debernan i
derechinan den un estado di derechi demokrátiko. Esaki saliendo di ministerio di SOAW huntu ku
NGO’nan relevante;
• Ofresé trayektonan di saniashon pa hende ku debe insuperabel no kai den un situashon sin
perspektiva; den futuro serkano atendé strukturalmente e problemátika di loansharks;
• Ofresé un diversidat di kurso pa siña hende presupuestá i tuma desishonnan finansiero
responsabel.
AD 3. ENGRANDESE KONOSEMENTU DI MUNDU DI HUBENTUT
Nos di tres punto di lansa ta trata e abismo kresiente entre e grupo di hóben ku ta bai bon i e grupo di
hóben ku ta bai ménos bon. Mas i mas tin menasa di aislashon di e grupo ku no ta bai bon. E aislashon
akí ta peligroso pasobra asina e grupo di hóben akí fásilmente ta kai den gara di kriminalidat organisá.
Efekto di esaki nos ta mira na Kòrsou ya añanan kaba. Sierto grupo di hóben ya ta asina inkorigibel i
aktivo den e mundu kriminal duru na edat hóben, ku práktikamente nan no por kambia nan bida mas.
PAR ta rekonosé esaki i p’esei ke tuma akshon efektivo pa na promé lugá para entrada den e grupo akí.
Pa esaki nos por sigui konstruí riba base di e Plan di Akshon Pa Hubentut ku ta den implementashon.
Banda di e puntonan di lansa akí, PAR ta deseá e siguiente akshonnan riba tereno di asuntunan sosial i
kombatimentu di pobresa:
• Introdusí legislashon pa un pinshon obligatorio mínimo di empresanan. Un sistema ku pinshon
komplementario ta kuadra mihó ku merkado laboral di siglo 21, den kua hende ta baha ku
pinshon mas lat, ta kambia mas biaha di trabou i ta traha outónomo mas tantu. Esaki lo perkurá
pa empleadonan gana un pinshon i no ta solamente dependiente di AOV so. Aktualmente hopi
empleado ta dekaí den pobresa ora nan baha ku pinshon;
• Lanta di nobo e Sentro di Konosementu pa Profeshon & Empresa (KBB);
• Reapertura di e Akohida Anochi di adikto na FMA den Punda;
25

• Introdukshon di kursonan obligatorio i obligashon pa buska trabou pa kobradónan di ònderstant
den áreanan kaminda tin mester di labor, manera turismo i fishinan tékniko;
• Formulá un maneho di imigrashon bon kla pa tantu e petishonario komo esun ku ta trata e
petishon, i vigilá pa imigrashon kompletá nesesidatnan di nos ekonomia sin perhudiká entrada di
trahadó lokal riba merkado laboral;
• Mara posibel subidanan di ònderstant i sueldo mínimo na kresementu di ekonomia;
• Evaluá i aktivá Fundashon Kas Popular pa kumpli mihó ku su tarea pa konstruí i mantené kasnan
di pueblo;
• Kuido ambulante i kasnan protehá pa persona ku un defisiensia físiko;
• Kontròl di kalidat di kuido den kasnan di ansiano i sosten di organisashonnan di hende grandi
den bario;
• Programanan pa fortifiká hubentut manera televishon hubenil i un Konseho (plataforma) di
Hubentut;
• Instituí un Servisio pa Informashon i Deskubrimentu (SIOD) enkargá ku investigashon (di
soborno) denter di institutonan supsidiá, supsidionan individual, i enforsamentu den kuadro di
lei di ònderstant;
• Lanta un unidat spesialisá pa deskubrí i kombatí eksplotashon (di labor), komersio di hende i
kontrabanda di hende.
26

Kapítulo 6. Infrastruktura i Logístika
Pa realisá un ekilibrio duradero entre biba, traha, transporte, naturalesa i rekreashon, mas atenshon pa
planifikashon urbano na Kòrsou ta nesesario. Nos ta duna esaki kontenido ku tres punto di lansa:
1. Mehora mobilidat riba nos isla;
2. Hasi mihó uso di nos hafnan i aeropuerto;
3. Trese òrdu bek serka bibienda popular i planifikashon urbano.
AD 1. MEHORA MOBILIDAT RIBA NOS ISLA
Ultimo añanan nos ta trahando pa kita e retraso di nos ret di kaminda, i e liña ei nos ta kontinuá. Esaki
mester forma parti si di un plan mas amplio di infrastruktura, ku ta tene kuenta ku ekstenshon di
urbanisashon ta eksigí e infrastruktura nesesario pa kapta kresementu di poblashon i fasilitá kresementu
ekonómiko.
Riba tereno di mobilidat PAR ke inová. Transporte públiko por bira mihó, uzando mas teknologia
moderno, i sobre todo mas efikas. Nos tin plan konkreto den e área akí, entre otro un distribushon
distinto di rutanan di transporte públiko pa hende mester kambia bùs ménos tantu pa yega di un bario
pa otro (sin mester pasa siudat). E plan akí PAR ke elaborá i ehekutá den fase, den bon diálogo ku esnan
embolbí (e.o. ABC i shofùrnan di bùs medio i chikitu). E plan di mobilidat akí ta parti di un totalidat mas
grandi pa habri Banda’Bou. Banda’Bou demasiado tempu a keda atras, i mester haña mas fasilidat
manera kuerpo di bombero, polis, botikanan, dòkter di kas etc. Ademas ta deseabel pa traha un di dos
kaminda di akseso (mas òf ménos paralelo na e kaminda aktual pa Wèspen) pa evitá ku un kalamidat riba
e kaminda ei mesora ta hasi mitar di nos isla inasesibel.
AD 2. MASI MIHO USO DI NOS HAFNAN I AEROPUERTO
Un bon funshonamentu di haf i airopuerto SMART, ta indispensabel pa nos ekonomia. Ademas tin
posibilidatnan supstansial pa kresementu SMART den e áreanan akí, ku espasio pa empresanan nobo.
Nos lo sigui traha riba plannan maestro pa e.o. e terenonan no usá rondó di Schottegat i Hato, pa atraé
desaroyadónan c.q. imbershonistanan ku por traha empleo. Nos ta rekonosé ademas e potensial grandi
di Bulbai, sigur despues di 2019. Pa e área ei nos ke traha un bon inventarisashon di tur senario posibel
pa hasi e mihó eskoho pa logra bentaha a largu plaso pa Kòrsou. I ku fasilidatnan ku ta kuida medio
ambiente (e.o. den lagunanan) nos por logra ganashi ku atrakshon di (mega)yatenan. I pa nos vishon a
largu término pa Kòrsou, ta esensial pa rekuperá rápidamente e sertifikashon FAA nivel 1 pa nos
outoridat di tráfiko aério. Esei ta bai huntu ku e plannan di ekstenshon di nos aeropuerto internashonal,
inkluso e plannan pa nabegashon den espasio, kual ta habri kaminda pa kreashon di trabou. Tambe nos
ta kontinuá desaroyo di Kòrsou komo sentro pa traspaso di merkansia i kargo.
27

AD 3. TRESE ORDU BEK SERKA BIBIENDA POPULAR I PLANIFIKASHON URBANO
Bibienda popular ta un tema difísil si nos mira situashonnan di abusu manera míles di kas ilegal, miéntras
na mesun momentu míles di hende tin añanan largu riba un lista di espera pa warda un kas di FKP, i mas
ku 5000 kas bashí ta para deteriorá, hopi biaha pa motibu di disputanan tokante herensianan no repartí.
Mayoria di biaha regulashon i legislashon den e áreanan akí ta na òrdu, pero aki tambe tin falta di
aktuashon. PAR ta desaprobá konstrukshon ilegal di kas fuertemente. Laga nos kuminsá ku fortifikashon
supstansial di e kantidat di trahadó na ministerio di VVRP, pa nan, despues di un bon entrenamentu, por
atendé e problemanan akí. Ta sostené e punto di lansa akí ku puntonan di akshon manera:
• Traha un plan pa eliminá e retraso di konstrukshon di kas i atendé e lista di espera na FKP;
• Alohá servisionan gubernamental huntu na un manera ingenioso (SMART). (Por ehèmpel den
monumentonan (!) lugá di edifisionan ku ta hür di persona privá). Un kombinashon asina ta trese
ekonomisashon di gastu di hür i mas efisiensia. (Aktualmente tin por ehèmpel un ministerio ku ta
alohá den 4 diferente edifisio, kada unu na un sitio totalmente distinto);
• Atenshon èkstra pa obranan públiko, por ehèmpel drechamentu rápido di mobilario di kaya dañá
(manera bòrchi di tráfiko) i mantenshon di playanan públiko;
• Enforsá aktuashon kontra bòrchi di propaganda ilegal;
• Apliká reglanan eksistente, pues hasi un evaluashon profundo di EOP (Eilandelijk Ontwikkelings
Plan), loke mester a sosodé hopi tempu pasá kaba. Mester fleksibilisá e prosedimentu pa hasi
kambio di destinashon di un tereno;
• Pèrkurá pa Fundashon Kuido di Monumento risibí e fondonan nesesario pa por kumpli ku su
tareanan manera mester ta. Esaki ta importante pa mantenshon di nos patrimonio nashonal i pa
stimulashon di turismo.
28

Kapítulo 7. Salubridat, Medio Ambiente i Naturalesa
Tin hopi malkontentu ta reina tokante nos salubridat públiko. Persepshon general ta ku mester warda
mashá pa haña trato, tin falta di atenshon pa pashènt individual, i gastunan no ta kuadra ku kalidat di e
trato. Klaramente nos tur ke un mihó bienestar (esta kalidat di bida), i esaki ta grandemente influenshá
pa nivel di kuido di salú. Kuido médiko aksesibel, di bon kalidat i responsabel, i un ambiente di bida sano,
ta derechinan básiko di tur siudadano. Sinembargo ta un reto pa por kontinuá realisá esaki, sigur ku un
poblashon ku ta embehesé. PAR ta kombensí ku tur hende por kontribuí na un salubridat óptimo denter
di e medionan ku tin disponibel pa esaki. Ku esaki nos no ke men solamente gobièrnu, pero tambe e
papel den komunidat di empresanan, institushonnan religioso, kuido médiko preventivo i den e promé
fase di tratamentu, asosiashonnan deportivo, institutonan di enseñansa i di trahadónan sosial.
Konhuntamente nos mester tuma responsabilidat pa esaki.
Riba tereno di salubridat tambe, PAR ta mira hopi posibilidat ku nos partisipashon den Reino ta brinda
nos. Nos ta partidiario di un areglo di kooperashon riba nivel di Reino, ku aspektonan manera kompra
sentral di remedi, kompartí konosementu, investigashon sientífiko konhunto i palabrashonnan tokante
spesialisashonnan médiko na diferente isla. Pa PAR tin kuater punto sentral pa e área di maneho di
salubridat, medio ambiente i naturalesa:
1. Prevenshon holístiko;
2. Mas partisipashon di aktornan relevante ku ta influensiá salú públiko;
3. Kuido asesibel i pagabel, ku kontribushon di tur siudadano segun nan kapasidat finansiero;
4. Kòntròl den e área di naturalesa i medio ambiente.
AD 1. PREVENSHON HOLISTIKO
Prevenshon holistiko ta un komponente krusial di maneho di salubridat. Ei ta rekerí
mantenshon/kumplimentu mas pro-aktivo di reglamentashon den e área di medio-ambiente,
infrastruktura, dominio di riesgo i toksisidat. Ku aktuashon dirigí i na tempu, ta posibel pa mengua
diferente forma di malesa. Kòrda e papel di faktornan den bisindario (p.e. polushon di medio ambiente i
lugá di brui di sangura) i kustumbernan di estilo di bida (alimentashon i moveshon). Tambe mester duna
atenshon na e aspekto di bienestar mental (p.e. strès na trabou òf di un alrededor insigur). Por promové
i sostené prosedimentunan preventivo holístiko ku kontròl i sankshonnan riba kumplimentu ku lei i regla
den e área di medio-ambiente i konsientisashon di poblashon di kustumbernan ku ta (perhudiká) salú.
Akibou ta kai mas punto di akshon konkreto manera:
• Promoshon di aksesibilidat di alimentashon salú pagabel i investigashon si ta realisabel i deseabel pa
introdusí un rekargo riba alimentonan dañino pa salú (manera refresko ku suku);
• Kampañanan informativo pa promové un estilo di bida salú – tantu pa loke ta trata alimentashon komo
moveshon físiko.
29

AD 2. MAS PARTISIPASHON DI AKTORNAN RELEVANTE KU TA INFLUENSHA SALU PUBLIKO
Ku PARTISIPASHON nos ke men e grado di embolbimentu di aktornan nesesario den desaroyo di
maneho. Ta importante pa tur aktor embolbí konhuntamente kana e mesun kaminda. Den kuido di salú,
e pashènt ta sentral. E pashènt por ripará esaki solamente si e sa ku ta skuch’e, por ehèmpel pa medio di
instansianan ku ta kuida su interes. Pa logra esaki nos ke lanta un Outoridat di Kuido ku entre otro tin
responsabilidat pa vigilá i enforsá legitimidat i efektividat; i tambe un aserkamentu pro-aktivo di
komportashon i salú. Por promové un enfoke mas dirigí riba pashènt, tambe pa medio di un Inspekshon
Outonómo di kuido i atrabes di harmonisashon di sistemanan di teknologia i komunikashon di e aktornan
diverso den kuido. Un punto spesífiko ta ampliashon i mehorashon di kasnan di biba i kuido di hende
grandi. Entre otro pa medio di mas sosten di institutonan ku ta prepará trahadónan pa e forma di kuido
akí.
AD 3. KUIDO ASESIBEL I PAGABEL
Tur hende ke risibí kuido korekto na e momentu korekto pa un gastu pagabel. Esaki ta konta alabes pa 26
Programa di Akshon di Partido PAR nesesidatnan di kuido di hende grandi i di hende ku un desabilidat
físiko. Pero nos komunidat mester bira konsiente ku kuido médiko no por ta gratuito. Pa optené kuido
bon i pagabel nos tur huntu mester kontribuí na e gastunan, na un manera proporshonal i segun
kapasidat finansiero, i tambe na dominio di gastunan. Si nos no logra dominá e gastunan, a lo largu lo no
por mantené e nivel aktual di kuido i sigur no alsa esaki. Un parti di e solushon lo ta redukshon di e asina
yamá ekonomia shinishi, kaminda no ta paga impuesto ni prima. PAR lo hasi su esfuerso pa realisá esaki.
Mas punto di akshon pa sostené e di tres punto di lansa akí ta:
• Nos ta bai traha pa logra konsenso entre tur aktor kon dominá gastunan di kuido di salú pero
alabes alsa su kalidat i durabilidat. A lo ménos mester hasi palabrashon tokante konstitushon di e
pakete di seguro básiko, e struktura di ehekushon, kondishonnan hurídiko, repartishon di
merkado, i e mihó manera pa sanea debenan aktual;
• Mas direkshon di kalidat di kuido pa medio di regulashon i un sistema di inspekshon i vigilansia
ku ta funshoná bon;
• Traha huntu ku gruponan di interes un plan di urgensia pa mehorá situashon di bida i kuido di
hende ku un desabilidat físiko òf mental. Mehorashon di aksesibilidat di edifisionan públiko pa
hende ku un desabilidat;
• Institushon di un liña di telefòn pa yudansa direkto pa kuido di salú mental;
• Reintrodukshon di funshonamentu di merkado, den e sistema aktual di seguro básiko, pa medio
di atmishon di mas kompetidor. Ta bini un pakete básiko igual pa tur hende, independiente di
ken ta segur’é. Pedida di kuido ku ta surpasá e seguro básiko, por kubri privá òf pa medio di un
seguro komplementario, pero lo no keda kubrí for di fondonan sosial. E pakete básiko
klaramente ta enserá tur kuido nesesario manera dòkter di kas, spesialista, hospital i remedinan
nesesario.
30

AD 4. MEDIO AMBIENTE I NATURALESA
Un faktor importante pa promoshon di salubridat públiko, ta kalidat di medio-ambiente. Nos mester
prevení mas tantu posibel e polushon kontinuo di nos airu, awa i tera (naturalesa) i redusí e polushon
eksistente. Pa hasi esaki mester apliká leinan i reglanan eksistente na un manera desidido i ku man duru,
mester amplia i drecha algun regla. Den e kuadro akí ta importante pa bolbe lanta i reorganisá e
departamento pa higiena ambiental, pa e por ehekutá su tareanan di vigilansia, inspekshon i
mantenshon na un manera adekuá. Parti di esei ta adaptashon di legislashon aktual pa e departamento
haña e outoridat outónomo nesesario pa kumpli ku su trabou.
Klaramente nos no por papia di medio-ambiente sin bisa nada tokante refineria di Isla (i BOO) i e
polushon di airu inaseptabel ku esaki ta produsí. Na un banda refineria ta representá direktamente i
indirektamente mas ku 2000 kupo di trabou ku nos no ke mira bai pèrdí.
Awor ku e insiguridat pa loke ta trata futuro di e refineria ta ménos dor ku un dil ku e kompania estatal
Chines Guandong Zengrong ta ménos, e ta bira importante pa for di awor pone atenshon fuerte riba e
eksigensia ku nos komo komunidat no ke mas polushon i ku tur kompania den futuro inkluso Guandong
Zengrong mester tene nan mes na nos leinan ambiental.
Mas punto konkreto di akshon:
• Importá fasilidatnan pa promové resiklahe di glas, plèstik, papel, bleki i otro material pa asina
redusí e kantidat di shushi ku komunidat ta produsí. Kòrda por ehèmpel buska shushi separá na
bibiendanan;
• Un estudio si ta realisabel pa inová e sistema di atendé ku shushi, ku introdukshon di fòrnunan
pa kima shushi ku alabes ta produsí energia;
• Un inisiativa di lei pa prohibí importashon òf produkshon di materia dañino (no biodegradabel)
manera ‘Styrofoam’ (baki i kùp), i prohibishon di tas di plèstik fini (konosí tambe komo t-shirt
bags) manera ta duna e.o. na minimarketnan;
• Mehorashon di e sistema di kloaka pa evitá polushon di laman i playanan. Esaki ta enserá
mehorashon, mantenshon i posiblemente ampliashon di instalashonnan pa limpia awa di kloaka;
• Promoshon di bienestar di animal, e.o. pa medio di supsidio pa asilo di bestia i kampañanan
informativo tokante e.o. sterilisashon di animal ku ta biba riba kaya. Tuma algun hende den
servisio pa vigilá i enforsá e regulashon kontra maltrato di bestia;
• Lanta un Servisio di Inspekshon di Medio Ambiente sólido ku polis medio-ambiental ku tin
outoridat amplio pa atendé infrakshonnan medio ambiental manera tiramentu di shushi i
polushon di tera, laman i airu.
31

Kapítulo 8. Maneho Finansiero
Un maneho finansiero sano ta esensial pa sigui hasi tur otro meta di maneho gubernamental posibel.
Lamentablemente nos a testiguá e impakto doloroso di a faya ku vigilansia i ignorá regla (esta durante e
temporada 2010-2012) – hopi shen mion di daño ku abo i nos tur mester kubri. I ku a stroba nos di haña
mas provishon di gobièrnu pa agrandesé nos bienestar. Despues di hopi tempu, komo pais porfin nos tin
un presupuesto balansá. E indikashon bergonsoso (di tempu di e gabinete Schotte) for di Konseho di
Minister, afortunadamente ku esei a keda resolvé. Danki na entre otro e lei di konsenso di Reino i e
Kolegio di Vigilansia Finansiero (CFT) awor gobièrnu tin un situashon finansiero salú. Nos lo kontinuá e
liña pa stabilisá un situashon finansiero públiko, pero na un manera poko mas kreativo. Espasio pa
inisiativanan di maneho no por ta simplemente resultado di un sòm “Entrada kita salario di empleado
públiko i défisitnan di SVB”. En breve, presupuesto di pais mester haña mas direkshon di maneho.
E mihó manera pa amplia presupuesto, i asina krea espasio pa e hopi reformanan nesesario den áreanan
di kuido i pa inisiativanan sosial, ta pa kobra mas impuesto. No pa medio di hisa impuesto eksistente,
pero ku mihó kobransa (kue esnan aden ku ta evadí – enforsá mantenshon) i spesialmente ku
kresementu ekonómiko (mira kapítulo 2). Kresementu ekonómiko ta generá mas kupo di trabou, pues
mas entrada di impuesto riba benta, impuesto riba entrada i impuesto riba ganashi.
PAR tin 3 punto di lansa pa maneho finansiero:
1. Maneho finansiero;
2. Reforma di impuesto i servisio di impuesto;
3. Ehekushon di presupuesto.
AD 1. Maneho finansiero
Komo pais nos tin e suerte ku pa medio di e leinan di Reino nos por fia sèn na Hulanda na un manera
barata (e asina yamá inskripshon koriente, ku kua nos ta finansiá e hospital nobo). Sinembargo esaki no
mester kondusí na flohamentu di disiplina presupuestario. Huntu ku e norma di peso di interes, nos ke
introdusí tambe un kuota di debe komo kriterio formal. Esei ta enserá ku nos debe nashonal no por
surpasá un sierto porsentahe (e norma ta 40%) di nos Produkto Nashonal Bruto. Si nos ke fia mas, nos
mester paga algu bèk promé òf ekonomia mester krese. Ayudo di Desaroyo práktikamente no ta eksistí
mas komo fuente di entrada. Lokual si nos por i ke, ta hasi muchu mas uso di e posibilidat di supsidionan
Oropeo. Te resientemente tabatin masha poko konosementu di esaki, pero danki na e Minister
Plenipotensiario di PAR na Den Haag, nos ta muchu mas mihó prepará pa esaki. Un di e problemanan di
maneho finansiero, ta ku tin demasiado poko informashon di riesgonan di entidatnan gubernamental, ku
a lo largu ta bin riba kuenta di pagadónan di impuesto. Motibu di esaki atrobe ta falta di enforsá
mantenshon i di transparensia. Simplemente mester fiha kuentanan anual na tempu, tantu di gobièrnu
komo di su entidatnan. Mester eliminá retraso i mester preshoná miembronan di direktiva i
komisarionan pa kumpli (ku sankshon). Pa fortifiká maneho finansiero, nos ta señalá e.o. e siguiente
puntonan di akshon:
32

• Traha un planifikashon i presupuesto di mas aña, teniendo kuenta ku e medionan i
posibilidatnan disponibel; • Tur luna publikashon di entrada i gastu di gobièrnu den korantnan i
riba website sentral di gobièrnu (gobernashon transparente);
• Kontinuá fortifikashon di nos institushonnan finansiero manera Deportamentu di Asuntu
Finansiero, Kontrolaria General i Servisio di Impuesto (na 2015 Kontrolaria General no por a
kumpli ku un kantidat di su tareanan);
• Ekonomisashon ku integrashon di fundashonnan ku ta risibí supsidio i ku ta hasi tareanan
paresido;
• Kompletá plannan pa baha gastunan di awa i koriente;
• Ekonomisashon a base di alohamentu mas efikas di órganonan gubernamental;
• Mas akuerdo fiskal, ku enfoke riba Latino Amérika, pa Kòrsou por funshoná komo trampolin
entre Oropa i Latino Amérika.
AD 2. REFORMA DI IMPUESTO I SERVISIO DI IMPUESTO
Un di e puntonan di atenshon di nos sistema fiskal, ta pa kontinuamente sigui vigilá pa nos keda
kompetitivo ku e paisnan ku ta rondoná nos, i evaluá nos mes a base di por ehèmpel normanan di OECD.
Ya tin grupo informal ku ta konsehá Minister di Finansas enkuanto esaki. PAR ke formalisá esaki ku
institushon di un ‘Fiscal Advisory Board’ ku diferente stakeholder. Pa fiha, kobra i kontrolá impuesto
gobièrnu tin diferente organisashon, manera Landsontvanger, Inspekshon di Impuesto i BAB. Nan tin
relashon tambe ku SVB i Duana. Tur esaki no ta pas mas den nos tempu, kaminda prosesonan mester ta
óptimamente organisá pa medio di digitalisashon.
PAR lo sigui traha riba integrashon mas aleu di tur e órganonan akí, sistemanan konektá, prosesonan
simplifiká, ku a lo largu un servisio mas rápido pa abo komo siudadano. SMART, digital, online i ku apps.
Impuesto ta e fuente mayor di entrada di gobièrnu. P’esei e sistema di impuesto mester ta simpel i mas
komprensibel posibel pa siudadanonan. Nos sistema di impuesto mester ta dirigí riba e siguiente
metanan:
• Stimulashon di siudadanonan pa traha i spar;
• Krea un base mas amplio pa baha peso di impuesto (e peso e ora ei ta repartí riba mas siudadano
ku ta paga impuesto);
• Minimalisá posibilidatnan pa evadí impuesto i mehorá kontròl (enforsá mantenshon!);
• Simplifiká e sistema di impuesto pa hasi kobramentu mas fásil ku ménos preshon riba e
organisashon gubernamental. Mester outomatisá Inspekshon di Impuesto i Landsontvanger mas
aleu posibel i mester integrá nan;
• Evaluá e organisashon di impuesto riba vehíkulo motorisá i studia alternativanan manera deshasí
di steker i deskontá entrada di esei for di preis di gasolin i disel. Esaki ta kita hopi burokrasia i
reinan largu anual (loke ta nifiká pèrdida di produktividat laboral).
33

AD 3. EHEKUSHON DI PRESUPUESTO
Manera tresé dilanti, den presupuesto di pais mester bini mas direkshon di maneho. Pero ku esei nos no
a yega ainda. Planifikashon ta un kos, ehekushon ta un otro, i esei hopi biaha nos ta falta kuné. Mester
alsa e kapasidat di ehekushon di proyektonan riba e Kuenta di Kapital. Esei ta eksigí reforma den e
organisashon gubernamental, manera deskribí den kapítulo 1 i 2.
34

Kapítulo 9. Konekshon ku Mundu
No opstante nos posishon komo pais outónomo chikitu, Kòrsou te ainda ta un refugio pa siudadanonan
for di paisnan muchu mas grandi i poderoso den region. Ounke nos ekonomia a keda atras, te ainda nos
tin un nivel di bida, infrastruktura i posibilidatnan pa bai dilanti, ku ta atraktivo pa hopi hende. Di echo
nos mester gradisí nos lasonan ku Reino pa esaki. Nan ta brinda nos protekshon kontra menasa interno i
eksterno, kooperashon, ekspertisio i sosten, un sistema hudisial konfiabel i atmishon na Oropa i na
posibilidatnan komersial i supsidionan Oropeo. Nos mester hasi bon uso di tur esaki, orguyoso di nos
kalidatnan propio, pero sin kompleho ku ta stroba nos pa aseptá sosten kaminda nos tin nesesidat di
esaki.
Ademas nos mester sigui fortifiká nos lasonan ku otro paisnan den bisindario, pa asina promové
kooperashon ekonómiko i kultural den region. Tur tempu Kòrsou a sa di usa su posishon geográfiko,
infrastruktura i dominio di idioma, pa presta servisio na otro pais, sea riba tereno di refinahe di petroli,
drecha barku, distribushon di kargo, servisio finansiero i klaramente turismo. Nos ke sigui sirbi komo
brùg entre Latino Amérika, Karibe, Oropa i Estadonan Uní, usando nos lasonan ku diferente region i pais i
alabes komo parti di Reino ku lasonan spesial ku Komunidat Oropeo. Den esaki tambe nos mester hasi
uso mas efikas di e ret di kontakto internashonal i embahadanan di Reino.
Ta importante pa nos habri nos mes atrobe pa hasi komersio aktivamente ku paisnan den eksterior,
kaminda nos ta optené nos divisanan. Den e sentido akí nos ke men tur pais eksterior – ku e
posibilidatnan nobo di internet, mundu kompletu ta un kliente potensial, en partikular di servisionan ku
nos por presta for di aki via Internet. I nos no mester lubidá tampoko nos diáspora – tin hopi Kurasoleño
den eksterior, ku stima Kòrsou i maske (ainda) nan no ke regresá, nan tin ekspertisio ku por ta
sumamente útil pa desaroyo i promoshon di Kòrsou.
BISTA RIBA MUNDU
Nos punto di lansa pa relashonnan internashonal, ta ampliashon di nos bista riba mundu. Ainda
demasiado biaha algun habitante ta konsiderá Kòrsou komo núkleo di mundu, i naturalmente esei no ta
e kaso. Ignorá tendensianan mundial ta kousa retraso i asta por ta peligroso, kòrda e problemátika di
refugiado, pero tambe posibilidatnan ekonómiko meimei di globalisashon kresiente. Asina nos por
presentá nos mes komo no solamente destinashon turístiko, pero tambe komo lugá dushi pa biba, for di
kua por ehèmpel trahadó di konosementu online por ofresé nan servisio na mundu i alabes generá divisa
pa Kòrsou. Algun punto di akshon konkreto:
• Fortifikashon di nos partisipashon na organisashonnan regional Karibense manera ACS, Caricom,
OECS, ECLAC i PAHO;
• Pa promové nos servisio finansiero, sera mas akuerdo fiskal, akuerdonan pa interkambio di
informashon i akuerdonan duanero tantu den nos region Latino Amerikano i Karibense, komo
den otro partinan di mundu. Ademas tuma tur medida nesesario pa Kòrsou komo sentro
35

finansiero kumpli ku stipulashonnan internashonal, pa evitá ku otro paisnan pone nos riba lista
pretu di paisnan ku no ta kumpli ku nan;
• Organisashon aktivo di mishonnan ekonómiko pa intensivá lasonan komersial i akuerdonan di
kooperashon (manera firmá resientemente ku Cuba) i pa atraé imbershon for di teritorionan
prometedor i evaluashon di e resultadonan;
• Utilisá chènsnan originá pa e interes di China pa imbertí den region.
36

Kapítulo 10. Maneho di energia
Kòrsou tin un rikesa di fuente energétiko natural: solo, bientu, olanan, aksesibilidat di awa friu di laman.
Esaki ta enserá ku tin hopi posibilidat pa kibra ku e dependensia aktual di energia fosil karu i shushi. E ta
enserá tambe, ku por baha e gastunan haltu aktual di utilidatnan drástikamente pa tur siudadano i
empresa. I esaki na su turno ta trese un empuhe pa ekonomia – mas forsa di kompra di siudadanonan i
ménos gastu operashonal pa empresanan.
PAR ta un fuerte partidiario di energia bèrdè, i lo apoyá i fasilitá inisiativanan den e área akí. Tambe pa
personanan privá i empresanan chikitu, mester bira atraktivo pa pasa pa bèrdè (generashon i depósito
propio) – kòrda por ehèmpel diskushonnan resien tokante e temporada pa rekobrá imbershon den panel
di solo. A yega tempu pa un instansia di vigilansia independiente evaluá e temporada pa rekobrá. Esaki lo
no tin solamente konsekuensia pa tarifanan di energia solar, pero tambe pa e maneho di adaptashon
regular di tarifanan di koriente, awa i kombustibel.
Nos aspirashon pa alkansá energia mas duradero, klaramente mester tene kuenta si ku un plan di
transishon pagabel pa Aqualectra. E ret aktual di distribushon no por soportá 100% di generashon bèrdè.
Mester alsa tambe e kapasidat pa generá koriente pa por sostené kresementu ekonómiko ku
optenibilidat stabil di elektrisidat. Ademas mester subi efisiensia di Aqualectra, entre otro pa medio di
teknologia inovativo manera ‘smart grids’ ku por yuda detektá pèrdida di lèkmentu i ekstrakshon ilegal.
Tambe nos ke informá komunidat mas tantu tokante uso responsabel di energia. Den kuadro di e
maneho energétiko, mester sinkronisá for di gobièrnu e metanan empresarial stratégiko di refineria ISLA,
BOO, Curoil i Aqualectra, mirando e diferensianan aktual di nan interesnan empresarial.
Den lus di kompleksidat i diversidat di e sektor energétiko, nos ta para pa institushon di un Kámara di
Energia. E kámara akí mester konsehá gobièrnu enkuanto diferente aspekto di e maneho energétiko,
inkluso koordinashon di eksplorashon i posibel eksplotashon di nos rikesanan natural. Algun punto di
akshon konkreto:
• Kontròl mas skèrpi riba ladronisia di awa i koriente – pa asina tur hende kontribuí i no solamente
un grupo mester paga pa uso di e poblashon kompletu;
• Ehekushon di plannan di Curoil pa krea asina yamá reservanan nashonal stratégiko di
kombustibel;
• Despues di un trabou di drechamentu, Curoil lo bai usa un kantidat di tanki komo depósito di
krudo pa komersio internashonal, pero tambe pa suministro lokal. I for di 2019 ta deskonektá
tránsito di petroli komersialmente i hurídikamente kompletamente for di refinahe;
• Un kampaña di konsientisashon pa stimulá uso mas ekonómiko di energia serka gobièrnu mes,
komunidat i usadónan individual. Esaki ta trese ekonomisashon (loke ta yuda ekonomia) i ta
kontribuí na suministro mas konfiabel di koriente. Lo bini mas proyektonan piloto manera uso di
awa friu pa fria ministerio di finansa na Pietermaai;
• Ehekushon di plannan pa uso di awa usá pa remplasá uso innesesario di awa di bebe karu. Esaki
pa stimulá e.o. agrikultura i hortikultura.
37