4. fundur stjórnar 2016-2018

4. fundur stjórnar Neytendasamtakanna
Fundarstaður: Neytendasamtökin, Hverfisgötu 105, Reykjavík
Tími: 15. febrúar 2017 kl. 17:00
Mættir:
ü Ása St. Atladóttir
ü Björn Þór Karlsson
ü Dominique Plédel Jónsson
ü Guðni Gunnarsson
ü Fríða Vala Ásbjörnsdóttir
ü Katrín Þorvaldsdóttir
ü Ólafur Arnarson
ü Sigurður Másson
ü Stella Hrönn Jóhannsdóttir
ü Þórey S. Þórisdóttir
Fjarstaddir:
ü Gunnar Alexander Ólafsson
ü Ragnar Unnarsson
ü Stefán Hrafn Jónsson
Fundarritari: Hrannar Már Gunnarsson
Dagskrá:
1. Skýrsla formanns
2. Skipulag skrifstofu
3. Fundarboð frá Sambandi Garðyrkjubænda
4. Fjölgun félagsmanna
5. Húsnæðismál samtakanna
6. Önnur mál
Fundargerð
1. Janúar og febrúar hafa verið annasamir hjá formanni vegna funda við
stjórnendur í íslensku viðskiptalífi, bæði til kynningar fyrir samtökin og vegna
styrktarlína. Formaður hefur fengið afar jákvætt viðmót og var t.a.m. gestur á
fundi hjá Viðreisn, þar sem rætt var um netverslun, sem var gagnlegur. Útgáfa
Neytandans gekk mjög vel og mörg þúsund manns sóttu appið á fyrstu
vikunni. Einnig hefur verið mikið um viðtöl tengd fréttum og unnið hefur
verið að skipulagsbreytingum hér á skrifstofunni (nánar í lið 2.).
Þá bendir allt til þess að ný ríkisstjórn sé neytendavænni en fyrri stjórnir, eins
og stjórnarsáttmáli bendir til, og hefur Þorgerður Katrín t.a.m. breytt skipan
starfshóps um endurskoðun búvörulaga þannig að neytendur hafi aukna
aðkomu. Nú er beðið eftir fundi með ráðherra neytendamála sem verður
eflaust fljótlega.
2. Kynnt var tillaga um að stofna lögfræðideild innan samtakanna sem myndi
taka við málum frá sérstöku þjónustuborði sem yrði einnig stofnað. Þannig
myndi starfsemi Neytendaaðstoðarinnar breytast að vissu leyti, þannig að fyrst
kæmu málin inn á þjónustuborðið en yrðu síðan send áfram til
lögfræðideildarinnar þegar mál eru þannig vaxin. Páll Rúnar fór yfir það

hvernig mikið álag væri á skrifstofunni og að ljóst væri að einhverju þyrfti að
breyta, til að stjórna álaginu. Hér á skrifstofunni eru tveir lögfræðingar með
meistarapróf í lögfræði og einn laganemi sem er að ljúka sínu námi. Stefnan
yrði sett á að annar lögfræðingurinn myndi sækja sér málflutningsréttindi til
þess að geta gengið alla leið með mál f.h. samtakanna.
Páll fór yfir það hvernig sumir veigra sér við því að leita til lögfræðinga og
lögmanna, en með þessu móti væri hægt að veita félagsmönnum samtakanna
lögfræðiþjónustu á verði sem ekki þekkist. Í raun er þessari þjónustu að
einhverju leyti sinnt nú þegar af Neytendaaðstoðinni, en þetta yrði eflt og
auglýst sérstaklega. Þetta væri til þess fallið að fjölga félagsmönnum, enda eru
þeir sem leita til samtakanna í 46% tilfella utanfélagsmenn. Lítill kostnaður
fælist í að koma þessu upp og myndi þetta styrkja fjárhag samtakanna.
Nefnd var hugmynd um að veita félagsmönnum afslætti, eins og tíðkast hjá
t.d. FÍB og fleiri félögum. Það var rætt en skiptar skoðanir voru um það og var
ákveðið að kanna málið frekar og ræða betur á komandi fundum. Í þessu
sambandi var rætt að fríðindin þurfi ekki endilega að felast í afsláttum heldur
gætu þau verið í formi ráðstefna og kynningarfunda af hálfu samtakanna um
neytendamál. Fundamenn tóku vel í þá hugmynd.
Lögð var fram tillaga um að Björn Þór Karlsson, Stefán Hrafn Jónsson og
Þórey S. Þórisdóttir, ásamt Hrannari Má Gunnarssyni lögfræðingi samtakanna,
myndu taka að sér að útbúa sérstakar siða- og starfsreglur fyrir samtökin eins
og lög samtakanna gera ráð fyrir að séu til staðar. Tillagan var samþykkt.
3. Katrín María Andrésdóttir framkvæmdastjóri Sambands Garðyrkjubænda bauð
stjórn Neytendasamtakanna til sameiginlegs fundar. Fundamenn spurðu sig að
því hver væri hvati þeirra að slíkum fundi og formaður svaraði því til að
líklega væri það t.d. upprunamerkingar matvæla og önnur atriði sem eiga
samleið með hagsmunum neytenda. Ákveðið var að Ólafur, Dominique og
mögulega fulltrúar starfshóps um landbúnað myndu hitta SG fremur en öll
stjórnin.
4. Neytandinn fjölgaði félagsmönnum svo mælanlegt sé og fjölgun hefur verið að
undanförnu. Páll Rúnar ætlar að taka saman tölfræðilegar upplýsingar og hafa
aðgengilegar fyrir stjórn, sem og að taka slíka tölfræði saman tvisvar í mánuði
svo hægt sé að fylgjast með fjölgunum og fækkunum og e.t.v. tengja við
einhverja ákveðna atburði. Formaður nefndi fund sem hann fór á með
fyrirtækinu Miðlun sem sér um símhringingar til aðila í þeim tilgangi að fá
fleiri félagsmenn. Þeir vilja samstarf við okkur. Fundamenn voru ekki vissir
hvort þetta væri leiðin og nefndu að þetta gæti pirrað fólk, þ.e. að fá símtöl
seint á kvöldin o.s.frv. og haft öfugt áhrif. Formaður tók fram að þetta væri
eitthvað sem stjórnin þyrfti að skoða og samþykkja, ef af þessu verður.
Formanni lýst ágætlega á Miðlun en er hræddur um að þeir vilji helst til of
stóra sneið af kökunni.
Aðrir stjórnarmenn nefndu að kannski væri besta leiðin til að fjölga
félagsmönnum að tækla mál sem snerta alla, eða flesta, neytendur. Þannig var
til dæmis Pósturinn nefndur sem dæmi en mikil sjálftaka á sér stað á þeim
bænum þegar við kemur sendingum frá útlöndum og einnig hafa innlendar
sendingar, bögglar og bréf, hækkað mikið í verði. Skrifstofan mun skoða það

mál betur.
5. Leigusamningur samtakanna rennur út í haust og búa þarf samtökin undir
mögulega stækkun vegna fjölgunar starfsfólks, ef vel gengur. Þetta húsnæði er
of lítið fyrir slíkt og verið er að skoða aðra kosti. Formaður ætlar að skoða
húsnæði sem Staðlaráð er í, sem mun vera alltof stórt fyrir þeirra starfsemi.
6. Þegar kom að öðrum málum byrjaði formaður á að láta blað ganga sem
krafðist undirskriftar frá stjórnarmönnum vegna ECC þar sem stjórnarmenn
voru fengnir til þess að staðfesta að Ólafur væri réttkjörinn formaður
samtakanna.
Fjallað var um starfskjaranefnd og var Ása St. Atladóttir, varaformaður
samtakanna, fengin til þess að undirrita ráðningarsamning samtakanna við
Ólaf sem var gerður á grundvelli vinnu starfskjaranefndar. Um hefðbundinn
ráðningarsamning er að ræða.
Fjallað var um vilja samtakanna til þess að útvega bifreið fyrir formann
samtakanna og skrifstofu. Páll fór yfir ýmsa kosti í þeim efnum og lagði fram
niðurstöðu um að hagstæðast er að leigja bíl á rekstrarleigu. Páll og Ólafur
höfðu fundið Citroen Cactus sem kom vel út og yrði leigður hjá Lykli, sem
virðist vera nær eitt á þessum markaði með rekstrarleigu nýrra bíla.
Fundamenn voru sumir hverjir ekki sáttir við að samtökin eigi viðskipti við
Lykil vegna framkomu fyrirtækisins gagnvart neytendum eftir hrunið. Nefndur
var sá möguleiki að leigja bíl í gegnum bílaleigu, til langs tíma, en það virðist
vera einhver munur þar á - bæði fjárhagslega og einnig eru þeir bílar eldri.
Páli var falið að ganga frá málinu og leita leiða til að nota annan
fjármögnunaraðila en Lykil/Lýsingu.
Dominique lagði til að þingmönnum yrði sendar áherslur samtakanna til næstu
tveggja ára. Vel ver tekið í það og formanni falið að ganga frá.
Að lokum var nefnt að núna ætti málefnavinna að fara í gang hjá starfshópnum
samtakanna. Það væri búið að stofna Facebook-síður fyrir hópana og að
formenn ættu nú að boða til funda hver fyrir sig. Einnig var ákveðið hvenær
næstu fundir stjórnar ættu að fara fram, en þeir eru fyrsta miðvikudag í
hverjum mánuði og verða sem hér segir:
5. apríl 2017,
3. maí 2017,
6. september 2017,
4. október 2017,
1. nóvember 2017,
6. desember 2017.
Fleira ekki gert
Fundi slitið kl. 18:50