JADRAN PISMO d - Daily Local News on Board

<strong>JADRAN</strong> <strong>PISMO</strong> d.o.o.
Information service for seafarers • Rijeka, Franje Brentinija 3
Tel. +385 51 403 188, 403 185 • Fax +385 51 403 189 • email: news@jadranpismo.hr www.micportal.com •
www.dailynewsonboard.com
KARAPATANG MAGLATHALA © 2011 – Ang maiikling ulat na ito ay nakalap mula radyo, telebisyon at
pahayagan sa Pilipinas. Sa pamamagitan nito, hinihimok ng ahensya na ipamahagi ang siping ito sa mga
kababayang nagnanais na makibalita. Maliban lamang sa mga impormasyong walang bayad, ang mga bagay
na direktang kopiray ay hindi maaaring sipiin, gamitin, kopyahin o paramihin sa kahit anong paraan ng
walang pahintulot mula sa tagapaglathala, o ipamigay, o ipadala sa mga indibidwal o mga barkong hindi
suskritor nito.
FOREX
P42.640 sa US$1 (P42.5490) Huwebes
ANG MGA PANGUNAHING ULAT
Filipino/Tagalog <strong>News</strong>
SABADO, 13 AGOSTO 2011
MAGANDANG UMAGA, PILIPINAS!
Ang mga sumusunod na balita ay nailathala sa mga
pangunahing pahayagan sa Pilipinas ngayong araw.
DOT Sec. Lim bukas pa rin sa pagtatrabaho sa gubyerno
BUKAS parin si outgoing Tourism Sec. Alberto Lim na maglingkod sa pamahalaan sa kabila ng kaniyang
resignation bilang kalihim ng DOT. Sa interview kay Lim sinabi nitong nais parin niyang maglingkod sa
ilalim ng Administrasyong Aquino kung bibigyan siya ng pagkakataon. Paliwanag ni Lim, hindi lang kasi
siya sanay sa tila stressful na mundo ng pamahalaan kung kaya nais niyang pagtuunan nalang ng pansin ang
kanyang personal na buhay. Samantala kaugnay naman sa papalit sa kaniyang pwesto ay inihayag nitong
handa siyang magbigay ng maayos na turn over sa sinumang hahawak ng naturang departamento.
Gubyerno kinalampag sa libo-libong nursing graduates na walang trabaho
KINALAMPAG kahapon ni Senator Edgardo Angara si Department of Health (DOH) Secretary David Ona
na agarang humanap ng solusyon sa lumalaking bilang ng nursing graduates na walang trabaho na umaabot
na sa 287,000. Ayon kay Angara, napipilitan ang mga nursing graduate na kumuha ng trabaho na hindi
naman linya sa kanilang tinapos na kurso. “Everyone thinks that nursing is the most profitable investment in
education, I think that’s no longer true,” ani Angara. Sa kabila ng napakaraming nurse sa bansa ang walang
trabaho, sinabi naman ni Secretary Ona na sa kasalukuyan ang nurse ration sa bansa ay 1:30 samantalang ang
katanggap-tanggap na standard ay 1:10. Isa umano sa proyekto ngayon ng DOH ay ang RN Heals Program
kung saan nagpapadala ng mga nurse sa malalayong barangay. Pero sinabi ni Angara na hindi pa rin ito ang
solusyon sa maraming bilang ng nurses na walang trabaho dahil nasa 6,000 lang ang maaring makinabang sa
programa.
Kapakanan ng mga taga-Mindanao bibigyang pansin ni Pimentel
PORMAL ng nanumpa bilang ika-labing dalawang senador ng bansa si Atty Aquilino “Koko” Pimentel III sa
Mati Davao Oriental. Nanumpa ang bagong senador sa harap ni Davao Oriental Governor Corazon
Malanyaon kaninang umaga na ginanap sa kapitolyo ng naturang probinsiya. Sa kaniyang talumpati lubos na
nagpasalamat si Pimentel sa mga taga-Davao Oriental at nangako na magiging prayoridad niya ang mga taga-
Mindanao at uunahin ang mga pangangailangan nito. Nangako rin si Pimentel na palalakasin niya ang local
autonomy sa nalalabi niyang panahon sa panunungkulan bilang senador. Nanumpa na kahapon bilang ika-
12 senador ng 15th Congress si Senator Aquilino “Koko” Pimentel III sa Mati City, Davao Oriental.
Nanumpa si Pimentel sa harap ni Davao Oriental Gov. Cora Malanyaon matapos siyang ideklarang nanalong

senador ng Senate Electoral Tribunal kamakalawa kapalit ng nagbitiw na si dating senador Juan Miguel
Zubiri. Nakakuha ng malaking boto si Pimentel sa Davao Oriental kaya mas pinili niyang doon gawin ang
panunumpa. Ipinagmalaki pa ni Pimentel na nanalo siya pero hindi kaagad naiproklama pero pinanindigan at
ipinaglaban ang kaniyang karapatan. Inaasahan na ang pagdalo ni Pimentel sa sesyon sa Lunes kung saan sa
dating kuwarto ni Zubiri ito mag-o-opisina. Posible ring sa majority block ng Senado sumama si Pimentel
bagaman at sinabi ni Senadora Pia Cayetano, miyembro ng minority bloc na hihikayatin nilang sumama sa
kanilang grupo ang bagong proklamang senador.
Bilang ng mga nagpapakasal bumababa
KINALUNGKOT ni Retired Archbishop Emeritus Oscar Cruz ang pagbaba ng bilang ng nagpapakasal sa
bansa. Base kasi sa pinakahuling report ng National Statistics Office, sa kabila ng mataas na bilang ng
teenage pregnancy ay bumaba naman ng 0.7% ang bilang ng ikinasal mula noong 2008. Sa interview kay
Cruz, sinabi nitong nakakalimutan na kasi ng mga Filipino couple ang esensiya ng kasal dahil mas inuuna ng
mga ito ang pang araw-araw na gastusin dahil sa kahirapan.
Mga ahensiya ng gubyerno bukas sa mga kwalipikadong nais magka-trabaho
LIBU-LIBONG trabaho ang naghihintay sa mga Pilipino sa iba’t ibang tanggapan at ahensiya ng
pamahalaan. Ito ay matapos maglaan ang Malacañang ng higit 1.816-trilyong budget para mapa-sweldo ang
mga bagong empleyado ng gobyerno na kukunin sa susunod na taon. Tinatayang 67-libo ang maaaring mahire
sa pamahalaan kabilang na ang 13-libo kukuning guro at iba pang pagta-trabahuin naman sa AFP, PNP,
Kongreso, Civil Service Commission, Comelec at Ombudsman
CPP-NPA kinondena ng gubyerno kaugnay ng pagbihag sa mga empleyado ng BJMP
KINONDENA kahapon ng pamahalaan ang Communist Party of the Philippines-New People’s Army-
National Democratic Front (CPP-NPA-NDF) dahil sa paglalagay ng “prisoner of war” status sa apat na bihag
na Bureau of Jail Management and Penology (BJMP) guards at pagsasailalim sa isa pang bihag na si Surigao
del Sur Mayor Henry Lingig sa kanilang “people’s court”. Ayon kay GRP peace panel Chief Marvic Leonen,
hindi isang estado o gobyerno ang CPP-NPA-NDF kung kaya walang basehan ang prosesong ginagawa ng
mga ito sa kanilang mga dinukot na indibidwal na pawang “non-combatants”. Dagdag pa ni Leonen,
puwedeng maihalintulad sa mga karaniwang kriminal ang NPA dahil sa dami ng mga paglabag ng mga ito
sa Comprehensive Agreement on Respect for Human Rights and International Humanitarian Law o
CARHRIHL kung saan signatory pa naman aniya ang nasabing komunistang kilusan.
P153B kada taon nawawala sa ekonomiya resulta ng matinding traffic sa lansangan
UMAABOT sa P153 bilyon o US$3.6 bilyon ang lugi ng ekonomiya ng bansa taun-taon dahil sa masikip na
trapiko partikular na sa Metro Manila. Ang rebelasyon ay ginawa ni 1-UTAK Rep. Homer Mercado batay sa
resulta ng isang pag-aaral na isinulat na artikulo at inilathala sa San Francisco-based Filipinas Magazine.
Ayon kay Mercado, naaksaya ng mga motorista mismo ang P42.5 bilyon sa gasolina at elektrisidad,
samantalang ang natitirang P110.5 bilyon ay ang nawawalang benta at investment disincentives. Lumitaw pa
aniya sa nasabing pag-aaral na may karagdagan pang kabuuang lugi na aabot sa US$36 bilyon sa loob ng
sampung taon kung ang itinatakbo lamang ng sasakyan ay bumabagal sa 12.6 kilometers per hour (kph)
ngayon kaysa sa dating 18 kph. Isinisi ng kongresista ang palala ng sitwasyon ng trapiko sa Kalakhang
Maynila sa mga naglipanang kolorum na sasakyan at mga may kambal-plaka na sasakyan.
OFW/MARINO
Chief engineer ng lumubog na bulk carrier pinagsususpetsahang buhay pa
PATULOY pang kinukumpirma ng Philippine Coast Guard (PCG) sa GenSan ang report na buhay pala ang
chief engineer mula sa lumubog na MV Bulk Carrier 1 na unang iniulat na patay. Ayon kay Coast Guard
GenSan Commander Roy Echeverria, kailangan pa nilang kumpirmahin ang sinabi ng kapitan ng barko na si
Pedrito Serencio na buhay si chief engineer Juanito Minoy matapos tinawagan sa telepono ng manager ng
barko. Sinabi ni Echeverria, kailangan muna nilang makausap o makitang personal si Minoy para
makumpirma kung totoong buhay nga ito. Nabatid na unang inamin ng kapitan ng barko na kasama ni Minoy
si apprentice engineer Edward Paler na na-trap sa lumubog na barko. Sinabi ni Serencio na kinumpirma sa
kaniya ng kanilang manager na nasa Davao City si Minoy subalit hindi sinabi ang detalye kung paano
nakaligtas ang naturang crew. Nabatid na 23 ang sakay ng Bulk Carrier nang binangga ng foreign vessel na
HS Puccini sa Sarangani Bay na naging sanhi ng paglubog ng cargo ship.

Mabagal na pag-release ng pasaporte inireklamo
Hindi lamang mga ordinaryong tao kundi maging ang mga mambabatas ay umaangal na rin sa pahirapang
pagkuha o pag-renew ng passports sa Department of Foreign Affairs (DFA). Inilabas ni Albay 2nd district
Rep Al Francis Bichara, chairman ng House Committee on Foreign Affairs, ang galit nito sa hearing ng
komite sa sobrang matagal na proseso sa renewal at pagre-release ng pasaporte ng mga bagong aplikante na
inaabot ng halos isang buwan. Paliwanag ni Bichara, nagagalit na ang tao dahil sa mabagal na sistema ng
DFA kayat maging silang mambabatas na dapat makuha kaagad ang pasaporte sa maikling panahon dahil sa
kanilang legislative work ay kailangan pang pumila ng pagkahaba-haba upang makuha lang ang kanilang
pasaporte. Dahil dito kayat inatasan ni Bichara ang mga opisyal ng DFA upang magbigay sa komite ng
detalye kung paano ang mga hakbang para sa pag-imprenta ng passports sa susunod na hearing sa Agosto 16
kung saan nangako naman ito na tatapusin ang pagdinig ngayong buwan.
Tatlong Pinoy na nasaktan sa riot bibigyang kompensasyon ng UK
MAKAKATANGGAP ng kompensasyon sa British government ang tatlong Filipino na nadamay sa riot sa
London. Ito ang sinabi ni British Ambassador to the Philippines Stephen Lillie na sa ilalim ng kanilang batas
na Riot Damages Act dahil may karapatan umano ang sinuman na humingi ng kompensasyon para sa
natamong “injury, damage or loss” dahil sa kaguluhan. Una nang inihayag ni Department of Foreign Affairs
(DFA) Sec. Albert del Rosario na tatlong mga Pinoy ang nadamay sa pagwawala ng mga kabataan sa United
Kingdom, kung saan isa umano rito ay ninakawan ng sasakyan habang ang isang biktima ay nasira ang
kaniyang tindahan. Sinabi pa ng ambahador na maging siya ay nagulat sa nangyayari sa kaniyang bansa at
kaniya rin umanong kinokondina ang ginawang pag-atake ng mga suspek sa tatlong mga overseas Filipino
workers.
Welfare officer sa Jordan na inireklamo ng mga OFW pinabalik na ng Pilipinas
IPINATAWAG na sa Pilipinas ng Overseas Workers Welfare Administration (OWWA) ang Pinoy welfare
officer na nakatalaga sa Jordan na inireklamo ng limang overseas Filipino workers (OFWs) ng pagmamalabis.
Sa pahayag na ipinalabas ni Susan Ople, ng Blas F. Ople Policy Center, ang organisasyong tumutulong sa
mga OFW, sinabing nagpadala na sa kanila ng liham si OWWA head Carmelita Dimzon, upang ipaalam ang
ginawang pag-recall kay Welfare Officer Carmelita Mag-uyon. Nakasaad umano sa sulat na kaagad na ipinarecall
si Mag-uyon nang matanggap ng OWWA ang pormal na reklamo ng limang OFWs na nag-akusa ng
pagmamalabis sa welfare officer. Ayon kay Ople, sa pakikipagtulungan sa Sagip OFW Program ni Sen Manny
Villar, tatlong OFWs pa ang naghahanda ang kanilang mga affidavit laban kay Mag-uyon. "The stories of 8
repatriated workers were consistent and had a common pattern. They alleged that Welfare Officer Mag-uyon
advised them to go back to their abusive employers or pay back the cost of deployment which obviously these
women could not afford to do," pahayag ni Ople. “This goes against the mandate of a welfare officer which is
to care for and defend the rights of distressed overseas workers especially those trapped in situations of forced
labor trafficking," dagdag niya.
Transshipment ng kargamento ipinagbawal ng customs
SINIMULAN nang ipagbawal ng Bureau of Customs (BoC) ang “transshipment” o paglilipat ng mga
kargamento mula sa isang barko patungo sa isa pang sasakyang pandagat upang makarating sa isang lugar.
Ang kautusan ay ginawa ni Customs Commissioner Angelito Alvarez kasunod ng umano’y pagkalugi ng
pamahalaan. Ayon kay Alvarez, layunin ng nasabing hakbang na maiwasan ang pandaraya ng mga traders sa
pamahalaan dahil sa hindi nila pagbabayad ng tamang buwis. Ipinaliwanag ng opisyal na nakapaloob din sa
nasabing kautusan na kailangang bayaran na agad ang duties and taxes ng mga kargamento kung saan ito
manggagaling, taliwas sa kasalukuyang ipinatutupad na paraan ng pagbabayad ng buwis. Ang nasabing
kautusan ay nag-ugat sa pagkawala ng mahigit sa 600 container vans na naglalaman ng mga smuggled
assorted items na nagmula sa port of manila na hindi na umano nakarating sa port of Batangas na
nagkakahalaga ng P2 billion.
Aquino wawakasan na ang sex trafficking
PINANGAKO ngayon ni Pangulong Benigno Aquino III na mahigpit at seryosong kampanya laban sa sex
trafficking ang kinakailangang ipatupad upang matuldukan ang pagkakasadlak ng kabataan bilang sex
workers. Nangako si Aquino ay matapos matanggap ang petisyon ng humigi’t kumulang 470,000 indibidwal
na nananawagan sa pamahalaan na tuluyang puksain ang pangangalakal ng mga kabataan upang maging sex
workers. Ang naturang bilang ng mga pumirma ay ‘di hamak na mas malaki sa 150,000 na target ng mga
nag-organisa ng nasabing kampanya. Binanggit ng Pangulo ang kahandaan ng pamahalaan na isakatuparan

ang mga layunin ng Anti-Trafficking in Persons Act at ang pagbibigay proteksyon at tulong sa mga nagiging
biktima nito. Idinagdag din ng Pangulo ang patuloy na pagsuporta ng Pilipinas sa mga adbokasiya laban sa
human at sex trafficking kasabay ng pagmamalaki sa natanggap ng bansa na upgraded Tier 2 rating list mula
Tier 2 Watchlist ng State Department Trafficking in Persons (TIP) 2011 report sa Estados Unidos. Ang
naturang petisyon na inorganisa ng Body Shop at End Child Prostitution, Child Pornography, and the
Trafficking of Children for Sexual Purposes (ECPAT) sa pakikipagtulungan ng Department of Social Welfare
and Development (DSWD) ay nakakuha ng kabuuang 473,489 na pirma mula sa iba’t ibang sektor ng
lipunan. Inamin din ng Pangulo na nahihirapan ang administrasyon sa mga sunud-sunod na pagsubok na
hinaharap nito sa kasulukuyan ngunit naniniwala siyang masusugpo ang sex trafficking sa lalong medaling
panahon sa pamamagitang ng pagtutulungan ng pamahalaan, ng pribadong sektor at ng lahat ng mga
Pilipino.
REHIYON
Mga demonstrador sumugod sa Ayala Technohub sa Lungsod Quezon
GALIT na sinugod ng “Alyansa Kontra Demolisyon” (AKD) ang U.P-Ayala Technohub sa Commonwealth
Avenue, Quezon City. Ito ay para kondenahin ang deadline ng pamunuan ng Ayala Land sa National Housing
Authority (NHA) upang paalisin ang natitirang residente sa Sitio San Roque, Barangay North Triangle.
Highlight ng protesta ang pagbato ng putik sa marker ng business center bilang simbolo anila ng pagiging
sakim ng Ayala Corporation sa lupa. Ang ultimatum ay para masimulan ang proyektong Quezon City Central
Business District (QCCBD) na ilang buwang nahinto matapos ang kaguluhan sa ikinasang demolisyon.
Tinaningan naman ng hanggang katapusan ng Agosto ang mga residente ng Sitio San Roque, Barangay
North Triangle para lumipat sa inilaang relocation site, tiniyak naman ng NHA na iiwasan na nilang maulit
ang marahas na demolisyon noong nakaraang taon.
Bus sumalpok sa oner sa Bataan, isa patay
PATAY ang isang 33-anyos na lalaki matapos magmistulang lata na pinitpit ng isang pribadong bus ang
minamanehong owner-type jeep ng biktima sa lalawigang ito. Naganap ang insidente sa Roman
Superhighway sa Abucay nitong Huwebes ng gabi, kunsaan nasawi si Jonathan Naumayan, 33-anyos,
residente ng barangay Laon, Abucay. Batay sa imbestigasyon ng pulisya, umaatras ang jeep mula sa garahe ng
biktima palabas sa Roman Superhighway nang mabangga ito at suyurin ng service bus ng Maritime Academy
of Asia and the Pacific. Mistulang pinikpik na lata ang jeep at kinailangang gumamit ng dalawang wrecker
upang maalis sa pagkakaipit ang biktima. Idineklara si Naumayan na dead on arrival sa Isaac and Catalina
Medical Center sa Balanga City. Hinihinala ng mga imbestigador na mabilis ang takbo ang bus na
minamaneho ni Novo Rosal, residente ng barangay Cabcaben, Mariveles, Bataan. Tumakas ito matapos ng
insidente pero pagkaraan ng ilang oras ay nagpaabot umano ng mensahe sa kanyang mga kasamahan sa
trabaho na handa namang sumuko sa pulisya. Labis naman ang hinanakit ng misis ng biktima dahil bago
umalis ang mister ay nagbitiw ito ng katiyakan na “babalik" ng kanilang bahay. Sinabi ng mga kapitbahay na
nakarinig sila ng malakas na langitngit dakong 8:00 p.m. nitong Huwebes at pagkatapos ay nasundan ng
malakas na kalabog. Dahil sa mahabang marka ng gulong sa kalsada, hinihinala ng mga imbestigador na
posible nagkapagpreno pa ang bus pero inabot pa rin nito ang jeepney at nakaladkad ng ilang metro.
Rapist ng tomboy dinampot matapos matyempuhang gumagala ng walang pang-itaas
BINITBIT ng mga tauhan ng Manila Police District-District Special Project Unit (MPD-DSPU) ang 49-anyos
na lalaki na umano’y isa sa naitalang most wanted persons ng MPD dahil sa 3 beses nitong panggagahasa sa
18-anyos na tomboy, matapos masita sa simpleng violation na walang pang-itaas na saplot habang nasa kalye,
sa Tondo, Maynila. Kinilala ni Senior Insp. Renato Solis, hepe ng administrative at Operation Branch ng
DSPU ang suspek na si Rolando Masangkay, ng 909-C San Antonio St., Tondo. Batay sa report ng pulisya,
dakong 4:30 ng hapon nitong Huwebes nang masita ang suspek sa Del Pan at Saragoza Sts., Tondo.
Kasalukuyang nagpapatrulya sina PO2 Reynold Reyes at PO1 Acemond Villanueva sa nasabing lugar nang
mamataan ang walang damit na pag-itaas na si Masangkay. Dahil nilabag nito ang Section 819 ng Revised
City Ordinance, sinita ito ng mga pulis saka dinala sa kanilang tanggapan. Nang beripikahin ang rekord,
natukoy na kabilang ang suspek sa most wanted persons ng MPD kaugnay sa nakabinbing warrant of arrest sa
kasong panggagahasa at pambubuntis sa 18-anyos na tomboy.
15 kabahayan sa Sultan Kudarat nabaon sa putik

NABAON ang may 15 tahanan habang 13 pamilya ang nagsilikas at may isang naitalang nasawi makaraang
magkaroon ng landslide sa Purok 10, Barangay Kinayao, Bagumbayan, Sultan Kudarat kahapon, Agosto 12.
Nabatid na nasawi si Teresita Albanses habang missing naman ang anak nito na si KC Albanses at isa pang
Kristine Olivar at dalawa rin ang napaulat na sugatan sa nasabing pangyayari.
Dahil dito, pansamantalang nakahimpil ang mga inilikas na residente sa Barangay Hall ng Kinayaw
makaraang natabunan ng lupa ang kanilang mga tahanan. Napag-alamang maraming pananim at alagang
hayop din ang tinangay ng tubig-baha. Nagpapatuloy naman hanggang sa ngayon ang search and rescue
operation ng mga awtoridad sa mga nawawala sa nangyaring landslide na nagsimula bandang 6:00 nga hapon
kahapon dahil sa ilang oras na pagbuhos ng malakas na ulan.
Isa patay, sampu sugatan matapos makuryente sa Cagayan
PATAY ang isa habang 10 ang sugatan makaraang makuryente sa Tuao, Cagayan. Nabatid na nasawi na si
Samuel Soller, 40, isang tanod sa Brgy. San Vicente, Tuao habang kasalukuyang ginagamot sina Danilo
Ardiles, Danilo Frances, Mario Pacion, Andres Abella, Antiono Abara, Ronald Verson, Frank Ibunia,
Eduardo Tagacay, Mario Pinera at Pepito Baguiog. Nabatid na nakuryente ang nasabing mga kalalakihan
habang sila ay naglalagay ng arko sa kanilang lugar dahil sa kanilang kapistahan kung saan baksidente
umanong nasagi ng mga ito ang isang kawad dahilan ng insidente. Nasa mabuting kalagayan naman na ang
mga 10 sugatan
Protektahan ang mga sibilyanm utos ng AFP sa harap ng sagupaan sa pagitan ng MILF at BIFF
INATASAN na ng liderato ng Armed Forces of the Philippines (AFP) ang commander ng 6th Infantry
Division na si Brig. Gen. Rey Ardo na gawin ang lahat ng makakaya upang lubos na maprotektahan ang mga
sibilyan na naiipit na sa labanang Moro Islamic Liberation Front (MILF) at ang paksyon nitong Bangsamoro
Islamic Freedom Fighters (BIFF) na nasa pamumuno ni Kumander Ameril Umbra Kato. “Si 6th ID
commander, Gen. Ardo has been there, he’s on top of the situation. The instruction is we are also trying to
protect the primacy of the peace process. Gen. Ardo is doing his job there and we are agreeing with what he is
doing, meron siyang operational strategy diyan. We believe in Gen. Ardo’s professional ability to maintain the
situation there, he can handle that,” ani Commodore Miguel Jose Rodriguez sa naganap na press briefing sa
Camp Aguinaldo. Ayon kay Rodriguez, kanila pang bineberipika ang mga impormasyon na nasa 17 katao na
ang namamatay sa mga nangyayaring engkuwentro ng MILF at BIFF sa ilang barangay ng Datu Piang na tila
dumanak na rin sa ilang lugar sa Guindulungan. “Bale ito ang dapat pigilan ng ating ground force
commander doon. He has been given his orders to make sure that these things do not escalate and that the
situation be managed so it will be put to a stop,” ani Rodriguez. Aniya, gumagawa na rin ng paraan ang
military upang makatulong sa magkabilang panig na mag-usap na lamang at hindi dapat dalhin ang usapan
sa atakehan at barilan. “We are trying to put a stop to this,” ani Rodriguez. Samantala, ayon kay Col.
Prudencio Asto, tagapagsalita ng 6th ID, humupa na ng kaunti ang labanan ng MILF at BIFF bagama’t mas
lumaki pa ang grupo ng BIFF dahil kumampi na umano sa kanila si Datu Banarin Ampatuan at isang lider na
si Abunawas.
Counter-insurgency operations sa mga lugar para sa katutubo sa Mindanao hiniling na itigil
PINATITIGIL ng militanteng grupo na “Karapatan” sa Aquino administration ang pagsasagawa ng “Oplan
Bayanihan” sa ilang katutubong paaralan sa Mindanao. Bwelta ng grupo, walang saysay ang muling
panunumpa ng militar bilang pagkilala sa selebrasyon ng International Humanitarian Law (IHL) Day,
ngayong araw na ito. Ito ay may kaugnayan sa akusasyon ng grupong “Karapatan” na ilan mismong sundalo
at CAFGU ay pinagbabantaan ang mga paaralang itinayo para sa mga katutubo. Binabansagan rin ng mga
kinauukulan na training center ng rebeldeng New People’s Army (NPA) ang mga paaralang nabanggit. Apela
ng grupo kay Pangulong Benigno Aquino III tutukan ang problemang ito sa hanay ng Armed Forces na sa
halip protektahan ang karapatan ng mga katutubo ay sila pang sumisira.
Panganganak sa bahay ipinagbawal sa Zamboanga del Norte
PATULOY ngayong ipinagbawal ng tanggapan ng Department of Health ng lalawigan ng Zamboanga del
Norte ang panganganak ng mga buntis sa kanilang mga bahay para maiwasan ang anumang komplikasyon sa
panganganak na magreresulta sa pagkamatay ng bata o ng ina. Ito’y base na rin sa DoH Administrative Order
2008-0029 kung saan sa mga facility based-birthing center o sa mga hospital na manganganak ang mga
buntis. Sa kabilang banda, nananawagan din si City Health Officer Dr. Cecilio Siglos sa mga buntis na sundin
ang payo ng DoH para makaiwas sa anumang komplikasyon sa panganganak.

IBAYONG DAGAT
Kaguluhan sa UK hindi simpleng panggugulo lamang ng mga kabataan
KINONDENA ng Syrian ambassador sa United Nation ang hindi patas na pagtrato sa kaguluhang nangyayari
sa United Kingdom. Ayon kay Bashar Ja’afari, hindi makatarungan na ang England ay maaring gumamit ng
salitang “riot” lamang sa kabila ng kaguluhang nangyayari sa kanilang bansa habang sa kanila ay terorista
na. Kaya naman umani ng batikos si Prime Minister David Cameron dahil sa pagtatakip nito sa nangyayaring
kaguluhan sa United Kingdom. Nangako si British Prime Minister David Cameron na magbabayad ang mga
grupong gumamit ng social media sa pagpapalaganap ng kaguluhan sa United Kingdom. Napag-alaman na sa
nangyaring kaguluhan nitong mga nakaraang araw, napalaganap ang nasabing riot sa mga social networking
sites. Sa kaniyang speech sa emergency session ng parliament, tiniyak ni Cameron na mananagot ang mga
pasimuno ng kaguluhan. Ang mga negosyong naapektuhan naman ng riot ay bibigyan ni Cameron ng
konsiderasyon sa babayarang buwis. Samantala, umabot na rin sa 1,200 na tao ang naaresto sa riot sa United
Kingdom.
17 katao patay sa karahasan sa Syria
PATAY ang labing pitong katao matapos ang engkwentro sa pagitan ng mga pulisya at mga raliyista sa Syria.
Ang mga demnostrador ay nananawagan parin sa pagbibitiw sa pwesto ni Syrian President Bashar Al-Assad.
Ang naturang pamamaril ng Syrian Forces Ay Naganap Sa Mga Bayan Ng Douma, Aleppo, Homs, Hama at
Deir Ez-Zor. Nabatid na ang pag-atake ay ginawa matapos ang araw ng pagdadasal ng mga residente tuwing
araw ng Biyernes.
Batas pangkalusugan na isinulong ni Obama idineklarang iligal
ISANG dagok ngayon sa signature healthcare law ni US President Barack Obama ang naging desisyon ng
appeals court ng Amerika. Idineklara ng US Appeals Court na unconstitutional na gawing mandatory sa
bawat mamamayan ng Estados Unidos na bumili ng health insurance. Ang naturang batas ay inapela ng 26 na
estado na hindi pabor sa mandatory health insurance. Dalawa sa talong mahistrado ng 11th Circuit ng
Appeals Court ay bomoto laban sa healthcare law habang isa ang pabpr. Ang nasabing batas na naipasa sa US
Congress noong nakaraang taon makaraan ang mainitang debate ay inaasang sa US Supreme Court na
dedesisyunan. Ito rin ang tinitingnang malaking isyu pagsapit ng 2012 presidential elections dahil sasabak sa
re-election si Obama. Sa kabila ng desisyon ng Appeals Court, kampante pa rin ang White House na
babaligtarin ng Supreme Court ang naturang desisyon. Ayon sa aide ni Obama na si Stephanie Cutter, hindi
sila pabor sa desisyong ito ng Appeals Court pero naniniwala aniya sila na hindi naman ito papanigan ng
pinakamataas na hukuman. "We strongly disagree with this decision and we are confident it will not stand,"
ani Cutter
Paglawak ng oil spill sa North Sea pinipilit pigilan ng Shell
KINUMPIRMA ngayon ng oil giant na Shell at maging ng British government ang pagkakaroon ng oil spill
sa North Sea mula sa oil platforms ng naturang oil company. Ayon sa tagapagsalita ng kompaniya,
tinatrabaho na nila kung paano mapigil ang pagtagas ng langis mula sa Gannet Alpha platform nito.
Bagama't patuloy umano ang leak ng langis, malaking porsiyento na ang nakontrol. Ayon pa sa kompaniya,
nagpadala na rin ito ng clean-up vessel at eroplano na nagmomonitor sa lawak ng oil spill. Natukoy umano
ang leak sa flow line na siyang nagdudugtong sa oil well at oil platform. "We can confirm we are managing
an oil leak in a flow line that serves the Shell-operated Gannet Alpha platform. We deployed a remoteoperated
vehicle to check for a subsea leak after a light sheen was noticed in the area," ayon sa Shell
spokesman. Ayon sa Department of Energy and Climate Change ng United Kingdom, alam na nila ang
insidente at nakikipag-ugnayan na sa Shell.
Pagkakaroon ng kalaguyo nagiging popular sa mga mayayamang lalaki sa China
NAALARMA na umano ang ilang sektor sa China dahil nagiging popular na sa mayayamang lalaki ang
pagkakaroon ng mistress o kinakasama liban sa kanilang asawa. Kasabay ng pag-unlad ng ekonomiya ng
China maraming bilang ng mga nakakaangat sa buhay ay nagkakaroon din ng mga mistresses na nagiging
simbolo ng mayayaman. Ayon sa ilang observers, ang pagkakaroon ng mistress ay katulad ng paglalaro ng
golf na isang magastos na hobby. Nandiyan ang pagbibigay ng pagpapatira sa mga mistress sa mga
apartments, magagarang sasakyan at monthly allwoances. Naniniwala ang mga Chinese prosecutors na halos
90 porsyento ng mga opisyal ng gobyerno na inakusahan ng korapsyon ay merong mga mistress na kadalasan
ay mahigit sa 10 ang mga kinakasama. Ang kanilang sitwasyon sa lipunan sa China ay may kahalintulad din

na phenomenon sa South Korea kung saan ang ilang mayayamang lalaki raw ay may tinatwag na sponsor
contract sa kanilang mga mistresses.
PALAKASAN
Gilas Pilipinas pasok sa semi-finals ng Jones Cup
HINABLOT ng Gilas-Pilipinas ang natitirang slot sa semifinals ng 33rd William Jones Cup sa Taipei,
Taiwan sa bisa ng 94-78 panalo kontra Japan sa huling laro ng elimination round. Naging gitgitan ang laro sa
unang tatlong yugto bago tuluyang lumayo ang Pilipinas dahil sa mainit na three-point shooting ni Dondon
Hontiveros. Tinapos ng mga Pinoy ang elimination na may kartadang 5-2. Malaki rin ang naging
kontribusyon ng naturalized Filipino na si Marcus Douthit na siyang umangkla sa opensa at depensa ng
Pilipinas sa shaded lane. Ang iba pang tinalo ng bansa sa elimination round ay ang mga koponan ng United
Arab Emirates, Malaysia, Chinese Taipei at Iran. Nakamit naman nila ang dalawang kabiguan sa kamay ng
Jordan at South Korea.
Pulitika sa sports aaksyunan ni Aquino
IPINANGAKO kahapon ni Pangulong Benigno Aquino III na kanyang lilinisin sa pulitika ang palakasan sa
bansa. Ito’y matapos tanggapin sa Malacañang at bigyan ng heroe’s welcome ang Philippine Dragon Boat
team, kung saan ikinalungkot ng Punong Ehekutibo ang kawalan ng suporta sa koponan ng Philippine Sports
Commission (PSC) at ng Philippine Olympic Committee (POC). “Sad lang medyo napupulitika pa kayo. Sana
‘yung politics iwan na lang sa aming mga pulitiko. Pero, to those of you who really provide significant and
positive role models to our country I can assure you that the government will be behind you. We will strive
especially to remove politics from sports which should be a unifying rather than a divisive activity,”
mahabang komento ni Pangulong Aquino. Ang Dragon Boat team ay nag-uwi ng limang gold at dalawang
silver medals mula sa nilahukang kumpetisyon sa Tampa, Florida noong nakaraang linggo. Sa okasyon
kahapon sa Palasyo ay walang inimbita kahit isang opisyal mula sa POC at PSC. Isang replica ng sagwan ang
ipinagkaloob ng koponan kay Pangulong Aquino, habang presidential citation naman ang ibinigay sa mga
mga manlalaro. Samantala, sa isang panayam kay Pangulong Aquino, hindi nito matiyak kung
pagkakalooban ng reward ang koponan, dahil pinag-aaralan pa aniya ang bagay na ito sa pamamagitan ng
PSC, ang ahensyang mayhawak ng pondo ng Philippine sports.
Saludar tiklop sa boksingerong Kazakh
UUWING luhaan ang Philippine National Boxing team mula sa Asian Men’s Championship nang mabigo rin
ang pinakahuling pag-asa ng bansa sa pagsungkit ng gintong medalya na si Rey Saludar nang tumiklop
kay Kazakhstan bet Ilyas Suleimenov, 30-17. Natawagan pa sa laban ang 2010 Asian Games gold medalist
na Pinoy ng dalawang warnings ng referee (ang isang warning ay nagbigigay ng two points sa katunggali)
dahil sa sobrang pagyukod sa baba ng belt line. Sa huling round, natawagan din ng warning si Sileimenov
dahil sa panunulak ngunit sapat naman ang ginawang agwat upang hindi na maapektuhan pa ang resulta ng
laro.
Senadora kabilang sa lalahok sa Ironman sa Camarines Sur
AABOT sa 800 mga local at foreign competitors ang kumpirmadong lalahok sa 70.3 Iron-man world
competition na itinakda sa araw ng Linggo, Agosto 14, 2011 sa Camarines Sur Water sports Complex sa
lalawigan ng Camarines Sur. Ang Ironman ay binubuo ng tatlong event na paglangoy, pagtakbo at ang
pagbisikleta. Ayon kay Gov. El Rey Villafuerte, isang malaking karangalan ng Cam Sur ang muling pag-host
sa ika-tatlong pagkakataon ng prestihiyosong competition na daan upang kilalanin pa ang lalawigan na
number tourist destination. May inialaan ang provincial government sa mga kalahok na tatanghaling
kampeon. Nakatakaya sa 2K swimming event, 90K na biking at 21K run event ang halagang P50,000 para sa
kampeon, P30,000 sa runner up at P20,000 sa third placer. Inasahan din ang muling paglahok ni Terrence
Bozzone ng New Zealand ng kampeon noong 2009. Habang idedepensa naman ni Peter Jacobs ng Australia
ang kanyang korona. Tulad noong isang taon, inaasahan ang muling pakikiisa sa kompetisyon ng ilang
kilalang showbiz personalities kabilang ang actor na si Piolo Pascual at ilang politiko tulad ni Sen. Pia
Cayetano.
Pacquiao nananatiling hottest search sa Google

SA ikalawang magkasunod na pagkakataon, nangunguna pa rin si 8-division world champion Manny
Pacquiao sa "Top 100 Sports Stars" survey na isinagawa sa United States, United Kingdom, Philippines,
Germany, Japan, Mexico at Canada. Ang survey ay isinagawa gamit ang Google Keyword Search technology
para matukoy kung sinu-sino ang "most search" na mga boxing personalities sa internet. Lumalabas sa pagaaral
na umaabot ng 550,000 ang Search Average per Month ni Pacquiao sa Google habang pumapangalawa
lamang si former pound-for-pound king Floyd Mayweather Jr. na mayroong 201,700 search average.
Pumapangatlo naman si former WBA world heavyweight champion David Haye. Ang Ukrainian heavyweight
boxer na si Wladimir Klitschkoay nasa pang-apat na puwesto habang ang sparring mate ni Pacquiao na si
Amir Khan ay pang-lima.
SHOWBIZ
Kasong frustrated murder isinampa laban sa nanaksak sa Miss Earth 2008
IPINAGHARAP kahapon ng kasong frustrated murder sa Mandaluyong City Prosecutor’s Office ang suspek
na sinasabing responsable sa pananaksak kay Miss Earth 2008 winner Karla Paula Henry. Ayon kay Supt.
Armando Bolalin, hepe ng Mandaluyong City Police, ininquest na nila sa piskalya ang suspek na si Jherome
Quibuyen, 29, binata, tubong Sta. Barbara, Victoria, Tarlac at pansamantalang naninirahan sa Unit 80
Anaheim Tower, California Garden Square ng nasabing lungsod. Sa imbestigasyon ng pulisya, nabatid na ang
pananaksak sa biktima ay naganap dakong alas-5:45 ng madaling araw kamakalawa sa stairway ng Anaheim
Tower 3, California Garden Square Condominium, Libertad cor. Calbayog Sts., Mandaluyong City. Ayon sa
report, sinundan ng suspek ang biktima matapos nitong maiparada ang kanyang kotse sa parking lot at
habang naglalakad sa stairway ay walang sabi-sabing inundayan ng saksak ng basag na bote sa likurang
bahagi ng katawan. Sinasabing nakasigaw ng malakas ang biktima na siyang dahilan upang mabilis na mag -
responde ang mga guwardiya ng condominium na nagresulta ng pagkakadakip ng suspek. Agad din isinugod
ang biktima sa Victor Potenciano Medical Center (VPMC) sanhi ng tama ng saksak ng basag na bote sa
likuran bahagi ng katawan at idineklarang ligtas na sa tiyak na kapahamakan.
Anak ni Robin Padilla mahilig umano sa bawal
MARUNONG na rin umanong tumikim ng bawal ang isa sa anak ni Robin Padilla. Say sa tsika, minsan raw
kasing namataan si Kylie na umiinom ng alak sa mga gimikan. Isa raw itong paglabag sa kanilang Muslim
religion. Hindi raw ito timing dahil kakasimula lang ng Ramadan. Sana raw ay hindi na ito magtuloy-tuloy
pa.
Melissa Ricks sasabak na sa mga mature na roles
SASABAKna rin sa mature role si Melissa Ricks. Busy-bisihan ang dalaga sa kanyang
pinaghahandaang pinaka-daring na gagawin niya sa telebisyon. Kabado pa nga raw si Melissa, dahil
hanggang ngayon ay hindi pa rin niya naipapaalam sa kanyang mga magulang ang mga sexy scenes na
gagawin niya para sa bagong show.
Sarah Labati hinimok na sumali sa Miss World Philippines
INIMBITAHAN si Sarah Lahbati ng Miss World Philippines organizer na sumali sa beauty pageant na
gaganapin sa susunod na buwan, pero tumanggi ang young actress dahil hindi pa siya handa na sumabak sa
mga beauty contest. Kinumpirma ni Sarah ang balita sa pamamagitan ng text message na ipinadala niya sa
amin: “I was asked to join but I’m not yet ready. Wala po kasi sa puso ko ang sumali sa mga beauty contest.
Ayokong sumali dahil napilitan or sinabi lang sa akin pero I’ll think about it for next year. If ever I join, I
want to be ready and mature enough.” Seventeen years old pa lamang si Sarah. Ipagdiriwang niya sa October
9 ang kanyang 18th birthday. Hindi pa sigurado si Sarah kung magkakaroon ito ng grand debut party dahil
nasa “tipid mode” siya.Twenty-five girls ang maglalaban para sa Miss World Philippines title. Ang mananalo
ang ipadadala ng ating bansa sa 2011 Miss World Contest na idaraos sa November 6 at gaganapin sa Earls
Court Exhibition Centre, London.
Pagbili ng bahay ni Pacquiao sa Forbes Park, naudlot umano
TOTOO kayang naudlot ang bahay na binibili ni Manny Pacquiao sa Forbes? Sabi lang ha, nagka-problema
raw sa dollar account ng boxing champion sa bayaran kaya hindi ito natuloy. Wala raw kasi sa bansa ang
karamihan sa milyones o bilyong datung ni Pacman kaya hindi agad-agad naayos ang pagproseso. Ayon sa

narinig kong kuwento na tagaroon sa lugar ng mayayaman, ito ang pinag-uusapan na naririnig niya. Hindi ko
alam kung may ibang kuwento tungkol dito dahil may nagsabi naman na ayos na ang lahat. In fact, nasimulan
na raw ang renovation ng nasabing bahay sa lugar ng mayayaman. Wait na lang tayo kung anong sasabihin ni
Pacman sa issue.
BALITANG KAKAIBA
Artist sa Pransya nais makalikha ng taong kabayo
ISANG kakaibang expiremento ang sinubukang gawin sa Pransya ng mga kilalang artist matapos nilang
turukan ng dugo ng kabayo o horse plasma ang isang babae. Isinagawa ng Art Oriente Objet ang kanilang
expiremento na pinangalanang “May the horse live in me” sa pamamagitan ni Marion Laval Jeantet matapos
nitong pumayag maturukan ng dugo ng kabayo. Inamin ni Marion na ang dugong isinalin sa kanya ay
nagbigay ng kakaibang lakas o “extra-humanity” na naging dahilan upang maging hyper-sensitive at hyper
nervous. Samantala ayon sa Art Oriente Objet ginawa ang expiremento upang malaman kung may basehan o
katotohanan ang expiremento na tinawag na mithridatization kung saan nagbibigay ng mas malakas na
immunity laban sa alin mang lason. Ang pagha-hybrid ng human-horse ay para mapatunayan na mas mataas
pa rin ang tao sa hayop.
PAUNAWA
Ang mga balita at impormasyon dito ay kinalap at iniayos ng <strong>JADRAN</strong> <strong>PISMO</strong> d.o.o – Rijeka. Kung
nais na patuloy pang makatanggap ng suskrisyon, mag-text o tumawag sa: • Tel. +63 929 669 2598 •
Fax +385 51 403 189 • Email: news@jadranpismo.hr