PDF version extracts of Mark (53kB)

Page 1 www.jesusinmylanguage.org
Yesu - Longuda
1.1
Nyaa thiwaa a Yohana zi Baptismayang
(Matta 3:1-12; Luka 3:1-18; Yohana 1:19-28)
1 Al na yina sisingila a Zimthamahang a Yesu Kristi ri, Zwingyeng Yambawa.
1.14-15
Yesu a ar nyi hab jiungbi nabnyer
(Matta 4:12-22; Luka 4:14-15, 5:1-11)
14 A zikirthe dekir ba habri Yohana ba birii jaruyi ne, Yesu a zi thwakimda Galili nang thiw
nyaa Zimthamahang Yambawa.
15 Nang thiw bii, “Thalangwang bwanama, darawa Yambau a sikiu sikama! Kĩ zi kwalawa a
nyaa jabaa jeengyeng, kĩ ninggi nyaa hamaa Zimthamahing na!”
1.21-27
Nyir ing ni dur swambirawa a yiye
(Luka 4:31-37)
21 Ba ziw zikiye Kafiranahum. Nyalaka Satiwa warwu na, Yesu a di thangdi takir nyalye
nang marni nyib niya.
22 Nyib ab ba gan ba nuwaing dekir a mandirang niyau na, ba zi nii yalyaa cumbirki nii
marnaa yee. Zindibi a haga na ang a marni niibi bimbi ga, yin na a marni bi na ing
dimbirwu ha yina.
23 Dekir har au a mandirang na, cii nyire, ing dur swambirawa ha yiye a diw thengdiyeu ni
war nang jiw, nang thiw Yesu bii,
24 “Bi a ciuni mir na, mi Yesu nam Nazaratiya? Nã ziw nã ku jir wii? Daa na simam, a mina
nyi thithamai karkarya Yambawa!”
25 Yesu a famni durwe ma, nang thiwii bii, “Muka nyaki miki, yiwe yiye!”
26 Dur kukumawang ma a nyuki nyire ma juwa, ni war nang jiw, tibong nang yiwe yiye.
27 Nyibeu jab dai, nii yalyaa gwiba, baa zwin bingyeng bii, “Bii namau ang na? Nii marnaa
swa nii? Nyir ing na, dimbirwe yina, ungwang a famdirang dur kukumahang bin kime baa
nu nyaa yee.”
1.32-34
32 Dekir nyalaka a yara, yaa kubri ne, nyib ba ziriu Yesu gwajiw dab dab ni ab dur
kukumahing ba ha bingyeng.
33 Nyibe a zikau jab dai ba ganwung dangsika swawau.
34 Yesu a cin gwajiw birele, ni yiw gwajiwtha bingying dab dab, ni swabni dur
kukumahang. A jib ge kau bi bi thiw kaung nii ga, zindibi ba simii simama.
2.1-12
Yesu a cin ing ni yim bongziwla yina
(Matta 9:9-13; Luka 5:27-32)
1 A zikirthe swaa da kalla Yesu a kuru Kafiranahum, zimhaung ba thau yaa bi a kuru
kureme.
2 Nyib bireb ba ganwung thangdi ni ziw ni bwan thib, haga yaa ang ba jiureng cauki ga,
cib ba swi yabirya. Yesu nang thiw bi nyaa,
3 dekir a thiwrang bi nyaau na, cib nyib nabnyer ba siu cii nyire ing ni yim bongziwla yina
bi ziriiwa.
4 Zindibi birke nyibe ba fi ga kau ung bi sekireingwung Yesu ne ge. Zindibi namau na, ba
bi thangdira dee bi singgin yan Yesu hara, bi wunggin bwahatha thangdau di bi jiu
gwajiwlau kirkir yina kabra, gwajiwlau ha nii daraarau.
5 Dekir Yesu a dur nyaa hamaa a nyibe ma na, a thiwang gwajiwlau bii, “Zwing nyiyeng,
na wakam nyaa jabaa maa!”
6 Cibe marni niibiye Pahatha Musa ab ba haa wiye baa win a bungwang fe bii:
7 “Zindibi bii nyir ingyang a cindeng nyaa Yambau ndeki ne? Ham nyir ing dahang wakang
nyaa jabaa, haga na Yambau yi zwiki ga ri wii?”
8 Babadda Yesu a finyawa a nii ang ba winang ma bungwang kumbeye, a zweng bi bii:
“Zindibi bii, kã windang cumbirki nii winaa namau a jiungweng a kumbeyin deki ne?

Page 2 www.jesusinmylanguage.org
9 Bii ang a gwal na? Ni dekir ba thiwrang nyir bii, ‘Nyaa jabaa maa a wakam mile,’ ni ung
bi thiwraing bii, ‘Wun thi si yadau mu murya na?’
10 Di zindibi kĩ sim aa Zwingyeng Nyir han dimbirwe zikir ni waka nyaa jabaa.” Yina yaa
wiye a thiwrang nyir ing ni yim bongziwla yina bii,
11 “Nyine na thiwam, wun thi si nii daraa maa murya swa!”
12 Babadda nang wun nang si nii daraa yee nang ye a bungwang sibaliya. Ba zi nii yalyaa
biree, ba gwangwang Yambau, baa thiw bii, “Al dul ka du ga nii na nii ang ga!”
4.35-41
Yesu a famni yiwlin thi sir
(Matta 8:23-27; Luka 8:22-25)
35 Nyalaki namkau na, ni dumeyawa, Yesu a thiw yilahau bii, “Gala ki yaung alcile pwalali
ala.”
36 Ba e dinggishiu nyirwe ma wiye, yilahau ba di kiiwuyeu ung Yesu haa ye, bi si bi zirii a
bina. Cehing kiihi ba ha wii dai.
37 Babadda gwerze yiwla nang wunwung ni kulme, mam ni wun nang kuwe bina kiiwuye,
kiiweu nang kasi bii bwan.
38 Yesu a hawa gwarthiye kiiweu ang dau duma, ni wunggi dul ni nii wunggir dwee.
Yilahau ba hanggii ba thiwaing bii, “Mi Kuru jirwe, ha nang yarim ga wii? Jir gabama ka
kasang yaa mileme.”
39 Yesu a wun nang famni yiwla ma nang thiw bii, “Kob thi sir na!” Nang thiw tangkalhau
kime bii, “Kĩ ji kĩ dau!” Yiwlin thi sir yaau nang wun kara wurha.
40 Yesu a zweng bi bii, “Zindibi bii kã nurang gwerciu ne, daa nyuwam haga nyaa hamaa a
jine ge wii?”
41 Ba nu gwerciu juwa juwa, baa thiwnin bingyeng saha bii, “Nyir biyu ing na? Ing yiwla di
tangkalhi ba nuwang nyaa ye ne?”
5.22-24
22 Yayirus, kuredarya thangdi takir nyala Yahudaba ziwa, di dekir a dur Yesu ne, a yur yi
kabra.
23 Nang gwelii ni madi nang gwelii, nang thiwii bii, “Zwamaing nyi, ha gwajiwthii juwa a
siki yimla. Da kam kam ziw dau naa maa yira, zindibi ni fi cicinka!”
24 Di Yesu ni murii. Nyib bireb kime baa mur be, baa sikin Yesu kwam juwa.
5.35-42
35 Dekir Yesu a thiwrang nyaa ma na, cib nyi thithamab baa ziwa a Yayirus a swa baa
thiwii bii, “Zwamaing miya yimama. Zindibi bii nã mwamdirang Kumeyeng kime ne?”
36 Yesu a sirgi ga thiw nii angying ba thiwang ga, a thiwang Yayirus bii, “Nu ga gwerciu ge
ninggi nyaa hamaa takaing.”
37 Di a ara ga kaung bi bi murii ge, kara Bitrus di Yakubu di Yohana zwiniya Yakubu.
38 Ba ziw kuredarya ma swa, Yesu a nu barama, di wulhi baa ara ziwe.
39 A di bina swiwau, nang thiw bi bii, “Baramau ama bii? Zindibi bii kã thamdang na?
Zwingyeng je yim ga na yima ga, ha dumye!”
40 Ba su susum bundiyama, a swamna a yiw bi yabirya, di ni ar kurwou di kungwoung di
yilahi yehi nahakwaihau, ni dir bi thengdiyeu yan ba dauri zwingyeng ma.
41 A za a gubii a naki mil nang thiwii bii, “Talitha kumi” yaayi bii, “Mi zwing mwaing
ingyang! Na thiwam an wun!”
42 Tibong nang wun mwar nang the, nang zi nyilwe. (Kaunghing yehi ba haa nwam nyiriu
nahaser.) Dekir ba dur niyaung ma ndeki ne, yalawa a gwibi juwa!
7.18-23
18 Yesu a thiwang bi bii, “Laa ga ji dai kã ha cungwing na gwarka cib dai wii? Haa kãã
finyawa nii ga? Haga nii ang nyire jang na jaa fe din dawaing ni swirang bubwau ga,
19 zindibi haga nang di a yina swilii ge, a dang kara kumbel jarniilii nang yeng mil thanalyi
takaing.” (Yesu a thiw ndeke zindibii swithira a kaung bii nii jaau ri, ha kirkir ang nyir daha
jang.)
20 A thu kabri ni nyaa thiwau bii, “Nii ang a yengweng nii winaayeng nyire, yina
zwabraing.
21 Daa yina yaa nyire swiiyi nii winaa kukumaa ang dawang nyire zireng tham bubwama
na nii guthi kulmiithe, dibki nyirke,
22 guthi mwautha, habriwa, mwamnuwang, thuma, nyaa kelginee kwahaa cii re, dul
wunggele, nii zee biraa, di gwarka a tham kukumama.

Page 3 www.jesusinmylanguage.org
23 Tham kukumam am jam dai na, a yengweng a nyire swilye yina a zwabraing.”
9.2-8
Yaa hakinama kikaunyuwang Yesu
(Matta 17:1-13; Luka 9:28-36)
2 A zikirthire swaa nakinakwai na, Yesu a war Bitrus di Yakubu di Yohana ni bir bi swaki
sineke bi kalaka. Yina yaa yi kikaunyuwang Yesu a hakindira,
3 dim yime mil ni fir gargar, haga nyire zikir ing dahang wakang gan ni fireng ndeki ge.
4 A zikireu yilaha Yesu nahakwaiha ma baa du Iliya di Musa baa nyuni mil bina, ba
thiwnang nyaa ni Yesu be.
5 Tibong Bitrus nang thiw Yesu bii, “Mi Kurwu jirwe, ha hama dekir ka har yana! Gala jir ki
wab ji cukirhi nahakwai, naukal muwang, ciu ungwang Musa, kime ciweu ungwang Iliya.”
6 Bitrus ni garkiba cibeu ne, ba haa gwerciuye juwa. Zindibi a sim ga nii ang thiwang ga.
7 Di a zikireu limbowe thul ni ziw nang kumthi be, a zikireu baa nu ciki milke a thiwang
nyaawang thulyeu bii, “Ing na, yina Zwing zirei nyiye, kĩ nuwaing!”
8 Babadda baa duni yaa, di ba du kaungying ga, kara Yesu yi kalaki ba dwii bina.
12.28-31
Pahathi atha gwal cithe
(Matta 22:34-40; Luka 10:25-28)
28 Cii marni niyang Pahatha Musa a ha wiye ni nu nii ang Yesu ba thiwnan cibbe, a ziw
yina nang zwii bii, “Keri ge biithi Pahathi athi gwal cithi dai yina athi na ra?”
29 Yesu a ninggaing arthau bii, “Atha gwal cithe gathitha, ‘Kĩ sirgi thwaa kĩ nu, ji nyibe
Israila! Yambau Kurwu mirwa yina na Kurwu yi zwike takaing haga cii ge.
30 Zir ni Yambau Kurwu muwang ni kumbel nalkal ni siw mu bi jau dai, ni nii winaa maa bi
dai, ni kulmi mimbi dai!’
31 Madi atha mur namthau yina atha, ‘Zir ni cimim nyiswai na nii nã zireng dul mila.’ Haga
pahathi nii a gwal naserthi athi dim ge.”
14.10-11
Yahuda a ara bii ninggang bi Yesu
(Matta 26:14-16; Luka 22:3-6)
10 Yahuda Iskariyoti ciye yilahi nwam nyiriu nahaserhiye ma, a zi kuredarbi na, a pristihe
zindibii ninggib Yesu.
11 Ba nu kumbe firle a nii ang ziw bii thiw ba, di bi bwabii nyal bi bi ninggaing baa. Yina
zindibi namau Yahuda Iskariyoti aa kasir daki nii ninggirang bi Yesu.
14.44-46
44 Ing ninggaing nyibe a tham ni swithir buwa bii, “Nyir ing kĩ dwang na sumkinaing na, kĩ
habii yina namyaung wur kĩ ii gen sa jine ge.”
45 Barabara Yahuda Iskariyoti a sereu Yesu ne, nang arii bii, “Mwari!” nang sumkinii.
46 Ba hab Yesu baa gubii zub!
15.6-15
Ba zi Yesu ganwang yimla
(Matta 27:15-26; Luka 23:13-25; Yohana 18:39-19:16)
6 Kaung biiwu thalaungwang Yaungnam di, Bilatus a mahang yiwang bu nyire a jaruyi
naikal ing nyib ba kasang bin yiwii bingwang.
7 A thalaung nawungyeu cii nyir ing ba araing bi Barabbas a haa jaruyi ni gwarkiba a cib
ab ba haa jaruyeu, zindibi ba dib nyire a binawang kunglii ni gwamnatiube.
8 Di dekir nyibeu ba gandu na, ba gwel Bilatus bin zi nii ang a maha a zeng be,
9 Bilatus a zweng bi bii, “Kã kasang ma na yiw ji Kwangdiya Yahudab wii?”
10 Yin yi zwike a sim dai bi kuredarba pristihe ba ninggii Yesu zindibi habriwa.
11 Di kuredarba pristiheu ba kwala nyibeu bi ba thiw Bilatus an yiw bu Barabbas.
12 Bilatus a zweng nyibeu bii, “Di Yesu ing ji kã araing a Kwangdiya Yahudab na?”
13 Baa nyim jiwthi bii, “Kĩ kwii thilda!”
14 Bilatus a zweng bi bii, “Bii nyaa jabaau ang zi ne?” Baa nyim kara jiwthi baa thiw bii,
“Kĩ kwii thildi takaing!”
15 Zindibi Bilatus a kasang bi nyibe ma ba nu thamkin ya, a yiw bu Barabbas. Di a zikireu
ni dau bi bi ci zwirthi Yesu, din kuthir ni ninggii bingyang bi bi kwii thilda.

Page 4 www.jesusinmylanguage.org
15.33-39
Yimla Yesu
(Matta 27:45-56; Luka 23:44-49; Yohana 19:28-30)
33 Dekir nyalaka bir du sibaliya, cungwung ni je thwakimdau dai ni jaya thalamhing
nahakwai anghing ni dumeyawa.
34 Di dekir thalamhi nahakwaiha ma ba bwandi na, yina Yesu a wunggir milki di juwa nang
thiw bii, “Eloi, eloi, lema sabachthani?”, yaaye bii, “Mi Yambau nyiweng, mi Yambau
nyiweng, zindibi bii nã yiwri naa a nyi ne?”
35 Cib nyib ab ba ha wii dekir ba nurii na, ba thiw bii, “Nuwaing a arang Iliya!”
36 Ciye bingyeng a sa soso ni jiwu singki anabki jumakiye din hauwu ciciwkira ni ziw nang
thamdi din wunggi dee ni cinggii nyaki mil bin nyu, nang thiw bii, “Gala kĩ duna, wur Iliya
zangwung zam ni jiweingweng thildau di!”
37 Yesu a wunggi milki di juwa nang bu siw yiwe.
38 Di cumdir yaaka Thengdiye Yambau ni silawa dee ni jiu sima.
39 Dikirye zwakungba ingyang a thi kabra thilau na, nang dunii nyu ye, a du dekir Yesu a
yimda, a thiwang bii, “Nyaa hamaa takaing, nyir ing Zwingyeng Yambawa!”
15.42-46
Thumthwele Yesu
(Matta 27:57-61; Luka 23:50-56; Yohana 19:38-42)
42-43 Dekir yaa kureme sim na, Yusufu nam Aramathiyaya ma nang jayawa. A har nyi
darmaing hala a dwamninyabye, kime ingyang swi aa gila zizauwa darawa Yambawa.
Thalaung nawaung aa har nyalaka mil thunele, zindibii ciu kwesiweu ri Satiwa. Zindibi
namau Yusufu a zi Bilatus na kabri shwiiyye takaing nang gwelii bin jii yimla Yesu bii thwe.
44 Bilatus a zi nii yalyaa juwa, dekir a nuri bi Yesu a tham ni yim. A aru kuredarya
zwakungbi nang zwii bi wur Yesu a ma ma dele a yimdi di.
45 Di dekir a nuri arthau a kuredari na ma dai bi kwana kwanau Yesu a yimam na, di
Bilatus ni ara bi Yusufu ni zin si yimla Yesu ni thwe.
46 Yusufu a nywa katanggamawang, din jiwu Yesu a thildau ni malii katanggamauyeung ni
zin dawii bu ungying ba swaa gubalye. Ni bilgiu gubal mwarli ni ziw ni gwathir nyala
buweu.
16.1-7
Yaa wuneme Yesu a yima
(Matta 28:1-8; Luka 24:1-12; Yohana 20:1-10)
1 Di dekir nyalaka Satiwa a thur ne, Maryamu Magdaliya di Maryamu kungweng Yakubu di
Solomi ba nywa num kwarkwarma bii bi zi bi sub yimla Yesu.
2 Nyalaka Lahadiu yaa singsing takaing dekir nyalaka birengweng baa zi bureu.
3 Dekir ba har dakir ba zirang na, baa zwin bingying bii, “Di wii zi wunggeng mir gubalau a
bureu ne?”
4 (Gubalau aa haa mwarla.) Di dekir ba wunggir nyu baang di ne, baa du ba tham bi
thunggi gubalau a nyalda buweu.
5 Di bi di buyeu bi du cii zaliya a swi nahamkira buyeu ni gan fire a mile, ba nu gwerciu
juwa.
6 Zaliya ma a thiwang bi bii, “Kĩ nu ga gwerciu ge. Na sim kã kasang Yesu nam
Nazaratiyau ing ba kwii thilda. Di haga yang ga, a wuneme! Kĩ duni yan ba daurii gang.
7 Kĩ kur kĩ zi kĩ ni zimhaung yilahau, di Bitrus dai! Yesu ha jine kabra a zang Galili, yina
yaayi kĩ firaing na na nii a thiwri je.”
16.15-16
15 A thiwang bi bii, “Kĩ zi zikirliyeu jal dai, kĩ thiw nyaa Zimthamahing nyib jab dai pirpir.
16 Duke ing ninggang nyaa hamaa na, bi zeing baptismau ni fang nyimamdume, di duke
ing ninggang ga nyaa hamaa ga na, bi zireing ganwang.
16.19-20
Ba si Yesu ba birii dee
(Luka 24:50-53; Thithaungwang Nyi thithamaba 1:9-11)
19 A zikirthire dekir Kurwu Yesu a thiwri bi nyaa thiwaau na, ba si ba birii dee, a
nahamkira a Yambawa.
20 Yilahau bi yi baa thiw nyaa Yambau baa yiungdira a yaa dab dab, kime Kurwu Yesu a zi
thama bingying zindibi bi swithir ba a nyaa thiwaa baang a nyaa hamaaye, a dekir ba

Page 5 www.jesusinmylanguage.org
swithirang tham yalyama.