JADRAN PISMO d - Daily Local News on Board

FILIPINO/TAGALOG
KARAPATANG MAGPALATHALA © 2010 – Ang maiigsing balitang nalalathala rito ay mula sa mga
nakalap na ulat sa radyo, telebisyon at dyaryo sa Pilipinas. Sa pamamagitan nito, hinihimok ng ahensya
na ibahagi ang siping ito sa mga kababayang nagnanais na makibalita. Maliban lamang sa mga
impormasyong libre, ang mga bagay na may direktang kopirayt ay hindi maaaring sipiin, gamitin,
kopyahin o paramihin sa kahit anong paraan ng walang lisensya o pahintulot
mula sa tagapaglathala, o ipamigay, o ipadala sa mga indibidwal
o mga barkong hindi suskritor nito.
FOREX
P44.26 sa US$1 (P44.135 kahapon)
MGA ULO NG BALITA
MAGANDANG UMAGA, PILIPINAS!!!
Ang mga sumusunod na balita ay nailathala sa mga
pangunahing pahayagan sa Pilipinas ngayong araw,
MARTES, 14 SETYEMBRE 2010
National <strong>News</strong>
• SC sa Kamara: Itigil ang impeachment
• Solons, nagbanta ng 'constitutional crisis' vs. status quo order ng SC
• Korte, pinapasauli sa mga Marcos ang P10-M fund ng NFA
• Bishop pipigain ng mga senador
• Walang crisis team para i-control ang coverage sa Luneta hostage -- media
• Pag-eere ng media sa blow-by-blow coverage nakasira sa imahe ng RP
• 30% lang sa mga Pinoy ang nagpapagamot
• Jueteng operators iimbestigahan ng BIR
• ARMM, ipinanukalang hatiin sa 2 rehiyon ni GMA
OFW <strong>News</strong>
• HK uminit pa sa RP
• DFA, kinumpirma ang pagkamatay ng isang OFW sa Saudi
• Pinoy, iba pang dayuhan kinotongan ng 3 Brunei police
Regional
• Simbahan may apela sa mga magulang kasunod ng nga inabandonang sanggol
• Quezon City nagpalabas ng P2 milyon para labanan ang dengue
• 13-anyos na dalagita, ginahasa sa initiation rite ng fraternity
• Bundol Gang sa NAIA, tibag na
• PNP-HPG nagbabala vs pekeng rent-a-car
• Philam Life Building sa Maynila, binulabog ng bomb threat
• Gov. Umali, inaming humingi ng tulong sa kanya si Chavit tungkol sa jueteng
Foreign
• 500,000 gov't workers sa Cuba, nanganganib matanggal sa trabaho
• 'Santo Papa, nasasaktan na sa sexual abuse cases'
• Julia Gillard, nanumpa na bilang unang babaeng prime minister ng Australia
• Singapore lalo pang paiigtingin ang English sa mga paaralan sa lugar

Sports
• US kampeon sa World Championships
• Pacquiao at Donaire, nasa 'pound-for-pound' list pa rin ng Ring Magazine
• Rafael Nadal, kampeon sa 2010 US Open
• Allen Iverson, maglalaro na sa Chinese team?
Showbiz
• Ms. Australia, nilinaw na 'di si Raj ang nanabotahe sa kanyang nat'l costume
• Lea at Gary, kakanta sa kasalang Ogie-Regine
• James Yap, makakalabas na ng ospital matapos maoperahan
• Drummer ng pop band South Border, kinasuhan ng pambubugbog ng GF
Odds and Ends
• Mga kababaihan na may mataas na sexual satisfaction, mas confident
Trivia Bits
• Sayaw na nakabubuntis
BUOD NG MGA BALITA
PAMBANSA
SC sa Kamara: Itigil ang impeachment
PANSAMANTALANG pinatitigil ng Supreme Court (SC) ang Kamara sa pagdinig sa
impeachment proceedings laban kay Ombudsman Merceditas Gutierrez. Ito ay matapos
na magpalabas ng temporary restraining order (TRO) ang SC upang bigyang daan ang
kahilingan ni Gutierrez sa dalawang impeachment complaint na nakasampa sa Kamara.
Ang ipinalabas na status quo ante order ng SC ay nag-aatas sa mga kongresista na
ibalik sa dating sitwasyon kung paano na file ang impeachment case laban kay
Gutierrez. Nauna rito, naghain si Gutierrez ng petition for certiorari and prohibition sa
Korte Suprema kahapon upang ipatigil ang impeachment proceedings na nauna nang
idineklara ng House committee on justice na sufficient in form and in substance.
Kinumpirma naman ni SC spokesman Atty. Jose Midas Marquez na majority sa mga
mahistrado ang pumabor sa en banc session para katigan ang hirit ng Ombudsman. Sa
65 pahina na petisyon ni Gutierrez, nais nitong harangin ng korte ang mga pagdinig ng
komite na pinamumunuan ni Iloilo Rep. Niel Tupas Jr. Bago magpalabas ng desisyon
ang SC nanawagan na rin ang ilang mambabatas na galangin ang tinatawag na
"separation of powers" at huwag makialam sa trabaho ng Kongreso. Sinabi ni deputy
speaker at Quezon Rep. Lorenzo Tanada III, dapat lamang ibasura ng korte ang
petisyong isinampa ni Gutierrez dahil maituturing pa itong premature. Ayon naman kay
Tupas sa panayam, nagulat siya at nasorpresa sa desisyon ng mataas na hukuman.
Aniya, malinaw umano ang probisyon ng Konstitusyon kung saan ang ipinagbabawal
lamang sa ilalim ng Section 3, paragraph 5 ng Article XI ay ang pagsagawa ng
dalawang impeachment proceedings laban sa isang public official sa loob ng isang
taon.
Solons, nagbanta ng 'constitutional crisis' vs. status quo order ng SC
NAGBANTA ngayon ang chairman ng House Committee on justice sa na posibleng
magdudulot ng constitutional crisis ang desisyon ng Supreme Court na ipatigil ang
pagtalakay ng Kamara sa nakabinbing impeachment complaints laban kay
Ombudsman Merceditas Gutierrez. Sa panayam, kinuwestyon ni committee chairman at
Iloilo 5th District Rep. Niel Tupas Jr., ang ipinalabas na status quo ante ruling ng Korte.
Maalala na kahapon, hiniling ni Gutierrez sa high tribunal na magpalabas ng temporary
restraining order matapos kuwestyonin ng opisyal ang sabay na paglatakay ng komite

sa dalawang impeachment complaints laban sa kaniya. Ayon kay Tupas, paninindigan
umano nila ang kanilang constitutional duty. Umalma rin ngayon si Partylist Rep. Arlene
Bag-ao, isa sa mga nag-endorse ng first complaint sa kautusan ng SC dahil hayagang
pakikialam umano ito sa trabaho ng Kongreso. Nakahanda naman umano si Ilocos
Norte Repr. Rodolfo Farinas, vice chairperson of the justice committee, na idepensa sa
Korte ang desisyon ng komite para tanggapin ang second complaint. Inihayag rin ni
Cong. Tupas na posibleng maghain sila ng petisyon sa Korte para hilingin na bawiin
nito ang status quo order. Sa Setyembre 28 at 29 ang susunod na schedule ng House
committee on justice para ipagpatuloy ang pagtalakay sa reklamo laban kay Gutierrez.
Korte, pinapasauli sa mga Marcos ang P10-M fund ng NFA
PINASASAULI ng Sandiganbayan kay dating first lady at ngayon ay Ilocos Norte Rep.
Imelda Marcos ang tinatayang nasa $230,000 o P10 milyon na umano'y ninakaw ng
pamilya nito mula sa pondo ng National Food Authority (NFA) noong taong 1983. Sa
desisyon ng anti-graft court, napatunayan na ipinag-utos umano noon ni dating
Pangulong Ferdinand Marcos sa NFA na ilipat sa personal nitong bank account ang
nasabing pera. Si Ginang Marcos ang tumatayo ngayong legal representative sa
naiwang kayamanan ng yumaong dating pangulo. Sa panig ni Mrs. Marcos, sinabi ng
abogado nito na si Atty. Robert Sison na balak nilang i-apela ang ruling ng korte. Ayon
pa sa abogado, nasa labas ng bansa ang pamilyang Marcos ng ihain ang nasabing kaso
kung kaya't wala umano silang pagkakataon na makapaghain ng sapat na mga
pleading.
Bishop pipigain ng mga senador
SA susunod na linggo na sisimulan ang imbestigasyon ng Senado sa alegasyon ni
retired Lingayen-Dagupan Archbishop Oscar Cruz na may ilang opisyal na malapit kay
Pangulong Benigno ‘Noynoy’ Aquino III ang tumatanggap ng jueteng payola. Ayon kay
Sen. Teofisto Guingona III, chairman ng Senate Blue Ribbon committee, agad nilang
itatakda sa susunod ng linggo ang pagdinig matapos maghain ng resolusyon si Sen.
Miriam Defensor-Santiago na humihiling ng agarang imbestigasyon para rito. “We will
set the hearing as soon as possible, next week,” ani Guingona sa interview kahapon.
Sinabi ni Santiago na ito na umano ang tamang lugar para hubaran ni Cruz ang mga
pangalan ng pitong opisyal ng administrasyon na tumatanggap umano P2 milyon
bawat buwan mula sa jueteng lords. “Hindi na siguro kailangang pilitin siya dahil doon
mismo sa hearing baka sabihin na niya,” saad pa ng senador matapos sabihin ni Cruz
na ihahayag lamang niya sa “proper forum” ang pangalan ng mga opisyal sa umano’y
nakinabang sa jueteng payola. Bukod kay Cruz, kabilang sa mga ipapatawag sa
gisahan sina Department of Interior and <strong>Local</strong> Government (DILG) Sec. Jesse Robredo at
Philippine National Police (PNP) chief Director General Jesus Verzosa. Hirit ni Santiago
sa isinampang resolusyon na hindi lang dapat matapos sa imbestigasyon ang aksyon
laban sa mga madidiing opisyal.
Walang crisis team para i-control ang coverage sa Luneta hostage -- media
IBINALIK ng mga mamamahayag ang sisi sa mga alagad ng batas kaugnay ng umano'y
ang live coverage ng media ang dahilan kung bakit humantong sa madugong
pangyayari ang hostage crisis sa lungsod ng Maynila. Sa pagdinig ng Senado, tahasang
sinabi ni ABS-CBN <strong>News</strong> Executive Maria Ressa na nabigo ang pamahalaan na bumuo
ng crisis team na siyang humawak ng media sa kasagsagan ng krisis. Iginiit ni Ressa na
nasa kapangyarihan ng pulisya kung nais nitong ipatigil ang live coverage ng media
kung sa tingin nito ay sagabal na sa pagresolba sa krisis. Bagamat sa panig ng media,
sinabi ni Ressa at RMN spokesman Jake Maderazo, nagkaroon ng limitasyon ang
kanilang coverage sa insidente. Pero inamin ng RMN na nagkaroon sila ng mali nang
ipinagpatuloy ang coverage at panayam sa hostage taker na si dating S/Insp. Rolando
Mendoza kahit pa alam ng nilang nagkakagulo at umiinit na ang sitwasyon. Ang GMA
naman ay magkakaroon umano ng sariling guidlines para sa mga kahalintulad na

sitwasyon. Sa kabila nito, iginiit naman ni Sen. Joker Arroyo na nagkulang sa self
segulation ang media. Nagbanta naman ang senador na kung magiging matigas ang
ulo ng media sa mga kahalintulad ng sitwasyon ay mapipilitan ang Kongreso na
gumawa ng guidelines para sundin ng media lalo't ang kapulungan ang nagbibigay ng
prangkisa sa mga ito.
Pag-eere ng media sa blow-by-blow coverage nakasira sa imahe ng RP
IGINIIT ni Senate Minority Leader Joker Arroyo na nakasira sa imahe ng bansa ang
pagsasahimpapawid ng international media sa mga kaganapan sa bansa hinggil sa
nangyaring hostage crisis sa Maynila. Kasabay ng ginanap ng Joint Hearing ng Senate
Committee on Public Information and Mass Media at Committee on Public Services,
ginisa ni Arroyo ang mga pinuno ng broadcast media na dumalo sa pagdinig kung saan
nanggaling ang live video footage ng international media outlets. Pawang itinanggi
naman ng mga ito na sila ang pinagkunan ng footage maliban sa ABS-CBN. Kasabay
nito ay muling pinaalalahanan ni Arroyo ang broadcast media na ang kongreso lamang
ang nagbibigay ng prangkisa kung kaya’t mayroong karapatan ang kapulungan na
kontrolin ang media industry lalo na ang mga coverage na may kinalaman sa seguridad
ng bansa.
30% lang sa mga Pinoy ang nagpapagamot
TATLUMPUNG porsyento lamang sa mga Filipino ang may kakayahang magpaospital
kapag mayroong sakit habang 70% ang nagtitiis sa kanilang karamdaman. Ito ang
pahayag ni Gabriela partylist Rep. Emmi de Jesus sa budget hearing ng Department of
Health (DOH) na nangangambang lalo pang lolobo ang bilang ng mga Filipino na hindi
na magpapagamot dahil binawasan ng halos 50% ang Maintenance and Other
Operating Expenses (MOOE) ng mga public hospital sa buong bansa. Ginawa ng
mambabatas ang pahayag dahil P13 bilyon na lamang ang MOOE ng mga
pampublikong pagamutan sa 2011 mula sa P25.9 bilyon na budget sa kasalukuyang
taon. Samantala, umapela ang Department of Health (DOH) sa mga kongresista na
maglaan ng pondo mula sa kanilang Priority Development Assistance Fund (PDAF)
upang makatulong sa mahihirap na pamilyang Filipino sa buong bansa.
Jueteng operators iimbestigahan ng BIR
KINUMPIRMA ngayon ni Pangulong Noynoy Aquino na papasok na rin ang Bureau of
Internal Revenue (BIR) sa problema ng patuloy na pamamayagpag ng operasyon ng
jueteng sa bansa. Sinabi ng Pangulo na iimbestigahan ng BIR ang mga hinihinalang
hidden wealth ng mga jueteng operators kung saan posibleng maharap ang mga ito sa
kasong tax evasion. Ayon sa Pangulo, kasama ito sa binubuong comprehensive plan, sa
layuning mabuwag ng tuluyan ang jueteng. Sa press briefing, sinabi ng Pangulo na
hindi pwedeng puro panghuhuli na lamang sa mga kabo at kolektor ang gagawin ng
pulisya, na tila pakitang tao lamang. Ang dapat daw ay mabuwag ang mismong
principal o operator. Kaya naman, kinokompleto na umano ni DILG Sec. Jesse Robredo
ang comprehensive plan at malapit na itong matapos. Kasabay nito, umalma naman si
Aquino sa patuloy na batikos ni dating Lingayen-Dagupan Archbishop Oscar Cruz sa
kanyang administrasyon dahil sa jueteng. Kulang-kulang naman umano ang
impormasyong sinasabi ni Cruz kaya hindi maayos na natutugunan.
ARMM, ipinanukalang hatiin sa 2 rehiyon ni GMA
ISINULONG sa Kamara ni dating pangulo at ngayon ay Pampanga Rep. Gloria
Macapagal-Arroyo na hatiin sa dalawang rehiyon ang Autonomous Region in Muslim
Mindanao (ARMM). Dahil umano sa tinatawag na "geographical constraints,"
ipinanukala ni Arroyo sa kaniyang House Bill No. 173, na hatiin sa dalawa - Autonomous
Region in Southwestern Mindanao (ARSWM) at Autonomous Region in Central Mindanao
(ARCEM) ang ARMM. "There are still some issues that need to be addressed. One of
which is the evident issue of geographical constraint that poses an immense challenge

in governing the ARMM," ayon kay Rep. Arroyo. Napag-alaman na mismong ang
kaniyang anak na si Camarines Sur Rep. Diosdado Macapagal-Arroyo ang co-author ng
HB No. 173. Sa ngayon, ang ARMM ay binubuo ng mga lalawigan ng Sulu, Basilan,
Tawi-Tawi, Lanao del Sur, Maguindanao at Marawi City. "The latter provinces are
landlocked by areas inhabited by other indigenous and ethnic group. This concern has
made the ARMM hard to government," dagdag pa sa ipinalabas na kalatas ng
mambabatas.
BALITANG OFW/KWENTONG MARINO
HK uminit pa sa RP
SA halip na humupa ang galit ay lalo umanong uminit ang ulo ng mga taga-Hong Kong
makaraang “maliitin” umano ni Pangulong Benigno “Noynoy” Aquino III ang kanyang
pagtingin sa isang opisyal ng pamahalaan ng Hong Kong. Batay kay Dolores
Balladares-Pelaez, chairperson ng ng United Filipino Union sa Hong Kong, itinuring
umano ni PNoy na hindi niya ka-level ang pinuno ng Hong Kong at hindi naaayon sa
protocol ang pagtawag sa telepono ni Donald Tsang sa kanya dahil ito ay isang
gobernador lamang at probinsiya lamang ng Tsina ang Hong Kong. Ani Balladares-
Pelaez, ang Hong Kong ay Special Autonomous Region o halos isang independent state
ng bansang Tsina. Lumilitaw aniya na maliit ang tingin ni PNoy sa mga taga-Hong Kong
kaya masama ang loob ng mga ito, sa kabila na ang mga OFW sa Hong Kong ay
nagbibigay ng malaking kontribusyon sa ekonomiya ng Pilipinas.
DFA, kinumpirma ang pagkamatay ng isang OFW sa Saudi
KINUMPIRMA ng Department of Foreign Affairs (DFA) na isang Filipino domestic helper
sa Kingdom of Saudi Arabia ay nasawi matapos umanong buhusan ng asido sa mukha
ng kaniyang amo. Batay sa report ni Philippine Third Secretary at Vice Consul Paulo
Saret, isinugod pa sa isang ospital sa Al-Khobar ang biktima noong Setyembre 8 pero
binawian din ng buhay. Maliban umano sa paso sa katawan bunsod ng sulfuric acid,
nagtamo rin ng saksak sa katawan ang biktima. Kaugnay nito, inatasan na ni DFA Sec.
Alberto Romulo ang Philippine Embassy sa naturang bansa na maghain ng "strong
representations" sa mga Saudi authorities.
Pinoy, iba pang dayuhan kinotongan ng 3 Brunei police
TATLONG miyembro ng Royal Brunei Police Force (RBPF) ang humarap sa Magistrates’
Court kamakailan kaugnay sa akusasyong pangingikil mula sa ilang dayuhan kabilang
ang isang Pinoy para hindi masampahan ng kasong paglabag sa batas-trapiko. Ang
unang kinasuhan ay si Police Constable Ryanneyzan Hj Mohammad na sinampahan ng
four counts ng pagtanggap ng suhol sa mga kalalakihang Indonesian na kinabibilangan
nina Nadro Rohman at Damamuri Sukri sa magkakahiwalay na insidente sa Wagino
Mursidi. Ang isinagawang pagdinig ay kasunod naman ng panibagong kasong isinampa
laban kina PC Ryanneyzan, PC Sharom Sinen na nangotong mula sa mga dayuhang
sina Amsor Nasoha, Indonesian national at Leweline Magasayo, isang Pinoy na pawang
lumabag sa batas-trapiko.
REHIYON
Simbahan may apela sa mga magulang kasunod ng nga inabandonang
sanggol

UMAPELA na ang Simbahang Katolika sa mga magulang na huwag abandonahin ang
kanilang mga anak kung hindi na kayang kalingain ang mga ito. Sinabi ni Catholic
Bishops’ Conference of the Philippines (CBCP) Executive Secretary Father Melvin Castro
na mayroon namang mga institusyon sa bansa para sa mga ito sa halip na kung saansaan
lang iwanan. Ang pahayag ng simbahan ay kasunod ng tatlong magkahiwalay na
insidente ng pag-abandona ng sanggol sa isang basurahan sa Sta. Cruz Maynila,
Pangasinan at sa palikuran ng eroplano ng Gulf Air Flight 154. Samantala nasa maayos
naman na kondisyon ang mga naturang sanggol na nanatili sa pangangalaga ng ospital
at ng Department of Social Welfare and Development (DSWD).
Quezon City nagpalabas ng P2 milyon para labanan ang dengue
NAGPALABAS ang Quezon City government ng P2 milyong halaga ng pondo para sa City
Health office upang magamit sa pagbili ng gamot at iba pang mga programa para
labanan ang sakit na dengue sa lungsod. Sinabi ni City Administrator Victor Endriga na
bukod dito, mayroon anyang P10 milyong halaga ng pondo ang nailaan na ng lokal na
pamahalaan sa pamunuan ng St. Lukes Hospital upang doon dadalhin ang ibang mga
dengue patient. Libre anya ang pagpapagamot sa ospital na ito sa anumang uri ng
sakit ng mga taga- QC bastat may reperal ng kanilang barangay chairman ng lungsod
at ng Social Services Division ng QC government. Sa kanyang panig, sinabi din ni Dra.
Antonieta Enumerable, city health officer ng QC na disiplina lamang at paglilinis ng
paligid ang susi upang mapigilan na ng tuluyan ang pag-usbong ng dengue. Mula
Enero ng taong ito hanggang September 4, 2010 may 1,776 kaso ng dengue sa QC na
may 19.84 percent na taas kung ikukumpara noong taong 2009 ng kaparehong buwan.
Sa ngayon 20 katao na ang namamatay dahil sa naturang sakit sa lungsod.
13-anyos na dalagita, ginahasa sa initiation rite ng fraternity
NAGSUMBONG sa himpilan ng pulisya sa Quezon, Isabela ang isang ama kasama ang
kanyang 13-anyos na anak na dalagita upang ireklamo ang panggagahasa ng
dalawang lalaki sa initiation rite ng isang fraternity na nakabase sa Tuguegarao City.
Ang biktima ay nasa 2nd year high school at itinago sa pangalang Brenda habang ang
mga pinaparatangang gumahasa sa kanya ay ang mga miyembro ng fraternity na
Samahang Ilocano (SI) na kinilalang sina Helimar Tagacay at Rakmel Valencia, kapwa
residente ng Minagbag, Quezon, Isabela. Sa salaysay sa pulisya ng dalagita, sinabi nito
na ni-recruit siya ng mga suspek na sumapi sa fraternity. Isinailalim siya sa initiation sa
bahay ni Louie Rayo ng nasabing lugar noong Setyembre 4 mula alas 11:00 ng gabi
hanggang ala una ng madaling araw. Pinapili umano ang dalagita kung anong uri ng
pagsubok ang gusto niya kaya hiniling niya na madaling pagsubok lamang ang
kanyang dadaanan at hindi niya akalain na gagahasain siya. Piniringan ang kanyang
mga mata gamit ang panyo bago isinakatuparan ang panggagahasa. Ayon sa dalagita,
hindi siya agad na nagsumbong sa kanyang mga magulang dahil sa takot na siya ay
saktan.
Bundol Gang sa NAIA, tibag na
ARESTADO ang sugatang lider ng “Bundol gang” kasama ang tatlo nitong tauhan sa
naganap na barilan sa pagitan ng grupo at mga elemento ng Highway Patrol Group
(NPG) ng pulisya kamakalawa sa bisinidad ng South Greenpark Subdivision sa Mervile,
Parańaque City kamakalawa ng hapon. Sa naganap na press briefing sa Camp Crame
kahapon, kinilala ni Philippine National Police (PNP) chief Gen. Jesus Verzosa ang lider
ng gang na si Robert Sia alyas ‘Tata Revo’. Sugatan ang mga tauhan nito na sina Raul
Lumantas, Junreal Abel Gumanay at Cirilo Paja. Narekober mula sa mga suspek ang
isang M-16 rifle, dalawang caliber .45 pistol at mga granada. Ayon kay Chief Supt.
Leonardo Espina, hepe ng HPG, ang grupo ni Sia ay bumibiktima sa Overseas Filipino
Workers (OFWs) at mga banyaga sa bisinidad ng Ninoy Aquino International Airport
(NAIA) at domestic airports. “Responsable din ang gang na ito sa mga naganap na
serye ng robbery-holdup pati na ang shooting sa brother-in-law ng dating presidential

daughter Luli Arroyo,” Espina. Nahuli ang mga suspek dakong alas-2:30 ng hapon
matapos ang ilang minutong habulan na nagresulta sa palitan ng putok.
PNP-HPG nagbabala vs pekeng rent-a-car
BINALAAN ni Philippine National Police-Highway Patrol Group (PNP-HPG) director Chief
Supt. Leonardo Espina ang publiko na mag-ingat sa sindikato ng pekeng rent-a-car na
namamayagpag sa Metro Manila. Ang babala ay bunsod ng paglutang ng isang
negosyanteng nabiktima umano ng grupo ng mga carnapper na umano’y tumangay sa
kanyang mga kotse noon pang Setyembre 2009. Kinilala ang biktima na si Jeane Lyn K.
Santana na inasistehan ng National Police Commissioner sa pangunguna ni Prosecutor
Del Gayatao sa Pasig Prosecutor’s Office para magsampa ng kaso. Sa salaysay ni
Santana, may negosyo siyang rent-a-car nang umarkila sa kanya ng limang kotse ng
nakaraang taon si Evangeline Protacio kasama ang dalawang lalaki na nagpakilalang
mga lehitimong negosyante at partner nito sa negosyo at nasa linya rin ng rent-a-car .
Inalok diumano ang biktima na mag-partner sa negosyo kung saan ay isa-sublease
umano nito ang kanyang mga kotse at nagkasundo. Naging maayos umano ang
transaksyon ng biktima at suspek hanggang nitong Hulyo 2010 ay nagsimulang
tumalbog ang mga tseke ng suspek at dumating ang puntong hindi na umano siya
kinakausap ni Protacio kaya binabawi na ang lahat ng kanyang kotse pero tumangging
isauli.
Philam Life Building sa Maynila, binulabog ng bomb threat
NAANTALA ang operasyon sa gusali ng Philam Life sa kahabaan ng United Nations
Avenue, Maynila makaraang bulabugin ng bomb threat. Ayon sa mga security
personnel ng tanggapan, nakatanggap siala ng tawag mula sa isang boses ng lalaki
bandang 8:00 ng umaga kanina at sinabing may bombang sasabog. Dagdag pa nito na
nakalagay ang bomba sa klinika ng mga empleyado na nasa ikalimang palapag ng
gusali. Agad namang rumesponde ang mga tauhan ng Exposives Operative Division ng
Manila Police District (MPD) ngunit kalaunan ay wala namang natagpuang kahinahinalang
bagay sa lugar. Samantala, nagbalik normal naman ang trabaho sa Philam
Life Building bandang 9:00 ng umaga habang patuloy pa rin ang pagbabantay ng mga
K-9 unit.
Gov. Umali, inaming humingi ng tulong sa kanya si Chavit tungkol sa jueteng
HAYAGANG inamin ni Oriental Mindoro Gov. Alfonso Umali na nagpasaklolo sa kaniya si
dating Ilocos Sur Gov. Luis Chavit Singson hinggil sa pagkakadawit nito sa pagtanggap
ng jueteng money. Kaugnay nito inilahad ni Umali sa Radyo Mo Nationwide kung
paano humingi ng tulong si Singson. At ayon pa kay Umali, bagama't natigil na ang
operasyon ng lotteng sa Oriental Mindoro ay napalitan naman ito ng Jai-Alai. Aniya,
mismong ang municipal mayors pa ang nagbigay ng basbas sa operasyon ng nasabing
laro sa kanilang lugar.
BALITANG ABROAD
500,000 gov't workers sa Cuba, nanganganib matanggal sa trabaho

HAVANA - Sa susunod na taon umano magiging epektibo ang anunsyo ng Cuba na
pagbabawas ng 500,000 government workers. Ngunit ayon kay Cuban President Raul
Castro, tutulungan nilang makahanap ng bagong trabaho sa mga pribadong kompanya
ang mga matatanggal . Sinasabing ito na ang pinaka-dramatic na hakbang ng Cuban
president pagdating sa employment. "As many as 1 million Cuban workers — about one
in five — may be redundant. But the government had not previously laid out specific
plans to slash its work force, and the speed and scope of the coming cutbacks were
astounding," ani Castro sa isang televised address. Nagdulot naman ng pangamba sa
mga empleyado ang kanilang kahihinatnan. "For me the problem is the salaries, that's
the root of it," pahayag ng isa sa mga manggagawa na si Alberto Fuentes, 47-anyos. "If
they fire all of these people, how can they all become self-employed?"
'Santo Papa, nasasaktan na sa sexual abuse cases'
KARAGDAGANG sakit na naman umano ang nararamdaman ni Pope Benedict XVI sa
panibagong kaso ng sexual abuse victims sa Belgium. Ito ay kasunod ng pag-atas ng
mga church leaders sa Belgium na dapat na ipagtapat ng mga paring Katoliko sa
kanilang mga superior ang ginawa nilang pang-aabuso. "We want to repeat this call
with force," pahayag ni Bishop Johan Bonny ng Antwerp. "It is to everyone's advantage
that the abuser in a pastoral relationship communicates this fact to his superior or to a
new "center for investigation, healing and reconciliation." Ayon sa tagapagsalita ng
Vatican, nasasaktan na ang Santo Papa matapos malaman na maraming miyembro ng
Simbahan ang kabilang sa dumaraming kaso ng pang-aabuso sa mga bata simula pa
noong 1950 hanggang 1980s. "The publishing of this report is a new cause of pain for
us, for the victims," ani Father Federico Lombardi. Tiniyak naman ni Archbishop Andre-
Joseph Leonard ng Belgium na sisimulan na bukas ang masusing imbestigasyon upang
mabigyan ng katarungan ang mga inabusong bata. "From the mistakes of the past, we
wish to take the necessary lessons," ani Archbishop Leonard. "In the interviews that will
be conducted from tomorrow, we will consider the relevant reflexions and proposals of
Professor Adriaenssens." Ngunit aminado itong matatagalan pa ang pagresolba sa mga
sexual abuse case sa kanilang bansa. Aniya, "It is impossible to try to resolve these
traumatic experiences too quickly." Si Pope Benedict ay nakatakdang dumalaw sa
England at Scotland sa Setyembre 16-19 para sa mga biktima ng sexual abuse ng mga
paring Katoliko.
Julia Gillard, nanumpa na bilang unang babaeng prime minister ng Australia
CANBERRA - Pormal nang nanumpa bilang bagong prime minister ng Australia si Julia
Gillard. "I, Julia Eileen Gillard, do solemnly and sincerely affirm and declare that I will
well and truly serve the Commonwealth of Australia, her land and her people in the
office of prime minister," ani Gillard. Ginawa ni Gillard ang kanyang panunumpa sa
opisina ni Governor General Quentin Bryce sa Government House sa Canberra na
siyang capital city ng Australia. Napag-alaman na si Gillard ang kauna-unanahang
babaeng prime minister ng nasabing bansa. Una rito, natagalan bago naging kampante
ang nasabing prime minister matapos na gitgitan ang resulta ng isinagawang halalan
sa Australia.
Singapore lalo pang paiigtingin ang English sa mga paaralan sa lugar
HINIHIKAYAT ngayon ng pamahalaan ng Singapore ang kanilang mamamayan na
ugaliing gamitin ang wikang Ingles bilang standard nilang wika sa pakikipag-usap.
Pursigido rin ang kanilang pamahalaan na isulong ang pagkakaroon ng “Standard
English Language” sa pag-aaral ng mga Singaporean students na pinaniniwalaan

nilang mayroon ding epekto sa kanilang ekonomiya. Nakatakda namang maglunsad ng
english speaking campaign ang mga kinauukulan sa lugar tulad ng pamamahagi ng
mga posters at fliers. Sang-ayon naman sa layuning ito si Speak Good English
Movement Chairman Goh-Eck-Kheng, ngunit huwag naman daw sanang tuluyang
ipagbawal ang paggamit ng Singlish (Singapore English) dahil parte na rin daw ito ng
nakaugalian at kultura ng kanilang bansa.
ISPORTS
US kampeon sa World Championships
ISTANBUL, Turkey --- Taas-noo si Kevin Durant habang pumapailanlang ang United
States national anthem na huling pinatugtog sa pagtatapos ng basketball world
championship 16 na taon na ang nakakaraan. Hindi “B-Team” kundi best team ang
mga katabi niya sa sentro ng medals platform. Sinikwat ng US ang unang world
championship sapul noong 1994 kahapon nang ibaon ang host Turkey, 81-64, sa likod
ng isa pang nakakabilib na performance ng tournament MVP. Umiskor si Durant ng 28
points, pinakamarami sa torneo para sa isang US player. Lumabas na siya ng court 42
seconds pa sa laro at nakipagyakapan kay coach Mike Krzyzewski na sa wakas ay
nanalo rin ng world title pagkatapos ng dalawang attempts na nag-resulta sa bronze
medals. “Our only option was to come out here and get a gold, and it feels really good
to bring this back home to the States,” ani Durant. Nagdagdag si Lamar Odom ng 15
points at 11 rebounds para sa Americans, sa pang-apat na pagkakataon ay iuuwi ang
gold sa worlds kahit wala ang superstars ng Olympic gold medal team. Hindi sumama
sa Istanbul sina Kobe Bryant, LeBron James at mga teammates noong 2008 Beijing,
tinawag na B-Team ang grupo ni Durant. Pero pinatunayan nilang mali ang mga duda
sa kanila.
Pacquiao at Donaire, nasa 'pound-for-pound' list pa rin ng Ring Magazine
HINDI pa rin natibag si 7-division world champion at Sarangani Rep. Manny Pacquiao sa
kaniyang posisyon bilang world's pound-for-pound king sa September issue ng The
Ring Magazine. Sa loob ng mahigit 350 weeks, nangunguna pa rin si Pacquiao sa top
ten boxers of the world ng tinaguriang "Bible of Boxing." Si Pacquiao ay kasama rin sa
listahan world's highest paid athlete ng Forbes Magazine, kung saan sinasabing
magkapantay ang income nito kay NBA player Lebron James. Ang kinatawan sa
Kongreso ng Sarangani ay nakatakdang lumaban kay Antonio Margarito sa November
14, 2010 sa Cowboys Stadium, Dallas, Texas. Ang kapwa Filipino champion na si Nonito
Donaire Jr., ay nasa pang-apat na posisyon. Samantala, nanatili naman sa No. 2 spot
ang mahigpit na kalaban ni Pacquiao na si American Floyd Mayweather, Jr., habang
nasa pangatlong puwesto naman si Mexican boxer Juan Manuel Marquez, ang current
Ring, WBO at WBA lightweight champion.
Rafael Nadal, kampeon sa 2010 US Open
NEW YORK - Nasungkit ngayon ni Spanish top seed Rafael Nadal ang kauna-unahan
nitong US Open title matapos na talunin si Novak Djokovic ng Serbia, sa iskor na 6-4, 5-
7, 6-4, 6-2. Ang panalo ay ika-9th Grand Slam title ni Nadal, kabilang na ang 5 French
Opens, 2 Wimbledons at 1 Australian. Una rito, mahigit dalawang oras na naantala ang
final match dahil sa ulan. Sa opening game, kaagad nakuha ni Nadal ang lamang pero
nagawang makatabla ni Djokovic bago nag-deklara ng recess ang referee dahil sa
masamang lagay ng panahon. Pagpasok ng second set, tuloy-tuloy na ang abanse ni
Nadal para masiguro ang panalo.
Allen Iverson, maglalaro na sa Chinese team?

PHILADELPHIA -- Pinagaaralan na umano ni 2001 MVP Allen Iverson na lumipat ng
Chinese Basketball Association sa kaniyang pagbabalik matapos ang anim na buwang
pahinga. Ayon kay Gary Moore, ang personal manager ng basketball star, hanggang
ngayon ay wala pang balita si Iverson sa NBA, dalawang linggo na lang bago ang
pagbubukas ng training camps. "We're very astonished, to say the least, that not one
team has contacted us with any interest. I just don't understand it," ani Moore. Si
Iverson na naglaro sa Memphis at Philadelphia 76ers noong nakaraang season bago
naghain ng leave of absence dahil sa ilang family issues. Ang 1996 No. 1 overall pick ay
kabilang sa NBA's career scoring list kung saan mayroon itong 24,368 points sa loob ng
kaniyang 14-year career.
SHOWBIZ
Ms. Australia, nilinaw na 'di si Raj ang nanabotahe sa kanyang nat'l costume
BINASAG na ni Ms. Australia at 2010 Miss Universe Second Runner-up Jesinta Campbell
ang kanyang katahimikan tungkol sa isyung sinabotahe ang kanyang national costume
noong Miss Universe pageant. Kung maaalala, isa ang ating pambato na si Maria Venus
Raj sa napaulat na nagtusok ng anim na aspili sa national costume ni Ms. Australia
dahilan upang magasgas ang likod nito. Ngunit katulad ng pahayag ng Bikolana beauty
queen, nilinaw ni Campbell na good friends sila nito. Nakasaad sa Twitter account ni
Campbell na kapwa nagwagi sila ni Venus sa MIss Universe pageant dahil sa kanilang
determinasyon kahit pa pareho silang may hindi magagandang karanasan sa
kompetisyon. Una rito, nag-e-mail na si Raj kay Campbell at nagpaliwanag na hindi nito
kayang gawin na isabotahe ang kapwa kandidata. Ayon naman sa presidente ng Miss
Universe Organization, wala silang alam sa nangyaring pananabotahe kay Miss
Australia. Sinasabing hindi na bago ang ganitong insidente sa taunang beauty pageant
kung saan noong 2004, naiulat naman ang biglaang pagkawala ng sapatos ni Miss
Ecuador.
Lea at Gary, kakanta sa kasalang Ogie-Regine
MALA-MUSICAL ang kasal nina Ogie Alcasid at Regine Velasquez, at isa sa
pinagkakaabalahan ni Ogie ay ang repertoire ng mga kakantahin sa seremonya pati sa
reception. Karamihan sa mga kakantahin ay likha ni Ogie na para talaga kay Regine.
“Siguro, lahat ng mga ginawa ko for her like Walang Iba, Ikaw ang Aking Pangarap. Ito
ang dream casting ko, ha, sa mga kantahan. I asked Lea (Salonga), nag-yes siya and
I’d like her to sing Kailangan Ko’y Ikaw. “Medyo okay na yata kami ni Gary (Valenciano)
sa Kailangan Kita. I texted Martin (Nievera) if he can sing Ikaw ang Aking Pangarap, so,
hindi pa masyadong sure kasi he’s not sure if he’s gonna be here during the time.
Hahaha! And then I asked Janno (Gibbs) and Jaya to sing their duet Ikaw ang Pangarap,
pero hindi akong gumawa nu’n, kaya lang I love their version, I might ask JayR and Kyla
to sing either Hanggang Ngayon or probably Mahal Kita Walang Iba,” kuwento ni Ogie
na mukhang exciting itong beach wedding nila na punung-puno ng kantahan. Ang
bridal march nila ay original composition ni Ryan Cayabyab na ni-rearrange para
bumagay sa okasyon. Ang gusto raw nila ay The Tux ang kakanta sa saliw ng
symphony orchestra na maliit lang naman daw. “Siyempre, our life has been full of
music. Hahaha! Hindi puwedeng mawala ang element ng music,” patuloy ni Ogie. “You
know the essence of wedding, I believe is not in how big it is or how grand, or how
expensive it is. “I think it’s nasa hearts nu’ng mag-aasawa, eh. Kung ang mag-aasawa
eh buo ang loob nila, ‘yung pagpapakasal, at nasa puso nila ‘yung talagang gusto
nilang mag-asawa,” paliwanag pa ni Ogie. Malaki ang pasasalamat ni Ogie sa dating
asawang si Michelle van Eimeren dahil aligaga na rin ito sa pag-asikaso sa flower
arrangement. “She’s doing it all, the flower arrangement. That’s a lot of work, at ‘yung
flowers namin, sponsors,” masayang tsika ni Ogie. Pagkatapos ng kasal ay dito raw

muna mag-iikot sina Ogie at Regine dahil balak daw ni Ogie na isama ang dalawa
niyang anak na nasa bansa rin dahil dadalo sila sa kasal. Mas magandang maikot daw
muna nila ang Pilipinas, pero sa susunod na taon ay gusto raw sana nilang mag-Europe
bilang karugtong ng kanilang honeymoon.
James Yap, makakalabas na ng ospital matapos maoperahan
INAASAHANG matutuloy ngayong araw ang nakatakdang paglabas ng ospital ng PBA
star na si James Yap matapos sumailalim sa operasyon sa kanyang ilong. Ayon kay
James, kinailangan niyang ipatanggal ang polyps sa kanyang ilong dahil nahihirapan na
umano siyang huminga. Sinasabing ang naturang polyps ay dulot umano ng kanyang
mga galos sa tuwing may laro ng basketball. Magkabilaan yung inopera. hindi ko alam
kung ilan. Pinatanggal ko kasi nahirapan ako huminga," ani James. Sa ngayon ay
sumasailalim pa umano ang basketbolista sa iba pang medical treatment. Samantala,
nagpapasalamat naman ang mister ni Kris Aquino na hindi nauwi sa dengue ang
pagkakasakit kamakailan ng anak nilang si Bimby. Napag-alaman na parehong ospital
lang na-admit ang mag-ama. HIndi naman naiulat kung sinilip ni Kris ang mister.
Drummer ng pop band South Border, kinasuhan ng pambubugbog ng GF
PORMAL ng sinampahan ng kaso ang drummer ng Filipino pop band na South Border
dahil sa pananakit nito sa kaniyang live-in partner. Batay sa dalawang pahinang
complaint, inireklamo ng 25-anyos na complainant ang respondent na si Benjamin
Mendez dahil sa ilang insidente ng physical at verbal abuse na dinanas nito sa mahigit
dalawang taong pagsasama. Pinakahuli umanong insidente ay nangyari sa apartment
na kanilang tinutuluyan kung saan itinulak pa umano siya sa hagdan ni Mendez.
Kasong physical injuries at paglabag sa Anti-Violence against Women and Children Act
ang kinakaharap ng defendant. Kabilang sa mga kantang pinasikat ng banda noong
dekada '90 ay ang awiting "Kahit Kailan."
BALITANG A-KYUT
Mga kababaihan na may mataas na sexual satisfaction, mas confident
NAPAG-ALAMAN sa isang pag-aaral ng trained sexologist mula sa University of the West
sa Scotland at scientist mula sa Belgium na may kakaibang paraan ng paglalakad ang
mga kababaihang may sexual satisfaction. Isinagawa ang pag-aaral sa 16 na female
university students na sumailalim sa pagsusulit na may kinalaman sa sexual behavior
ng mga ito. Nabatid na mas malaki ang hakbang ng paglalakad ng mga kababaihang
may mataas na lebel ng sexual satisfaction bagama’t hindi alam ng mga eksperto ang
sexual history ng mga respondents. Dagdag pa dito, ang mga kababaihan na
nakakaranas nito ay mas confident sa kanilang sarili at sumasalamin sa kanilang
paglalakad. Malabin dito, payo pa ng mga eksperto na ang sexual satisfaction ay hindi
lamang nakapagtitibay ng relasyon kundi nakakapagdagdag rin ng self-assurance at
malusog na mental health sa mga kababaihan.
ALAM MO BA…
Sayaw na nakabubuntis
ALAM nyo ba kung saan sa Pilipinas ginaganap ang tradisyunal na prusisyon ng tatlong
Santo na dinadaluhan ng mga taong naghahangad na magkaroon ng asawa,
masaganang buhay, at higit sa lahat - anak. Ang Pista ng Obando sa Bulacan ay
dinadayo maging ng mga dayuhang turista dahil sa maraming testimonya na
nagkaroon sila ng anak matapos sumama sa prusisyon at nakisayaw sa saliw ng tugtog

ng “Santa Clara Pinung-Pino." Ang taunang selebrasyon tuwing kalagitnaan ng Mayo ay
tatlong araw na isinasagawa upang maglaan ng araw ng prusisyon sa bawat Santo. Ito
ay sina San Pascual Baylon (St. Paschal), Santa Clara (St. Clare) at Nuestra Seńora de
Salambao (Our Lady of Salambao). Ang imahe ni Santa Clara ang pinakamatandang
patron sa Obando ay dinala umano ng mga Franciscan missionaries sa Catanghalan na
dating pangalan ng Obando. Sumunod nito ay ang imahe ni San Pascual Baylon na
dinala rin ng mga misyunaryong kastila matapos maitayo ang isang simbahan sa
bayang ito noong 18th century. Sinasabing nalambat naman ng mga mangingisda sa
laot ang imahe ng Nuestra Seńora de Salambao at dinala ito sa simbahan ng Obando.
Ang Nuestra Seńora de Salambao ang itinuturing patron ng mga mangingisda at
kasaganahan.
PAUNAWA
Ang mga balita at impormasyon dito ay kinalap at iniayos ng Brent & Strauss
Integrated Communications, Inc. para sa mga marinong Pilipino. Kung nais na
patuloy pang makatanggap ng suskrisyon, mangyaring mag-text o tumawag sa:
• Tel. +63 919 4172448 • Fax +385 51 403 189 • Email: news@jadranpismo.hr