Amt Viöl AKTUELL 02-2019

V I Ö L | 3 1
Neues von den Viöler LandFrauen
Viöler Landfruen bi de Gröne Week in Berlin: Wenn Engel reisen,
lacht de Himmel oder de Mond schient rot! Ower dorvun hemm wi
rein gor nix sehn, as dat Mondag, an`ne 21.1.um Klock viertel för
süss, mit een Grunert- Bus un twee (!) Busfohrers vun de Viöler
„Hauptbohnhoff“ losgüng, groffe Richtung Berlin to de Gröne Week:
Dat weer pickendüster!
Wi, dat weern 23 Landfruen un uck Landmänner, nich bloß ut Viöl.
In Schleswig steegen de letzten in un aal tosomen störteten sick in
dat grote Obentüür „Internationale Gröne Week“.
In Berlin, so gegen Middagstied, weer dat denn hell un dor sechen
wi rechts und links Dusende vun Wohnungen in’ne Hochhüüser, so
dat unse erste Erkenntnis weer: Wat hemm wi dat doch bloß gut
bi’t Huus! Dat weer een ganz gediegen Geföhl. Denn güng dat richti
los: Dat Gewöhl in de eerste grode Utstellungshalle vun’ne weltgrötste
un international bedüdenste Utstellung för Landwirtschaft,
Ernährungswirtschaft un Gornbu weer obentüürli un gewöhnungsbedörfti.
Furts dör’t Gewöhl? Nee, Schneckentempo! Du glöövst dat
nich, ower Gülleluft rüükt meist frischer as de dicke Luft vun soveel
Minschen.
Wenn du nu all gifti as de Katt op
de Fork weerst, hars man bi’t Huus
bliewen schullt. Denn: Siet
1926 keemen bummeli 29 Millionen
Besökers un dor präsenteerten
sick 72000 Utstellers ut 116
Länder. Dit Johr fung de Gröne
Week 16. Januar an un güng bit
27. Januar. Dor weern 1750 Utstellers
ut 61 Länder. Jo, dat mutt
man belewt hemm! Wi güngen
dör de Hallen vun unse 16 Bundesländer,
dör de Utstellungen
vun Russland, Usbekistan, Ägypten,
Äthiopien, Indien, sogor Peru
un un un. Jo, un vun Finnland as
Partnerland vun de Gröne Week.
Uck de Jagdverband weer vertreden, dat Ministerium för wirtschaftliche
Tosomenarbeit, sogor Droomgornhüüser und Whirlpools harn
se dor, denn een riesige Blomenhalle, een Winzerhalle un Hoschi
bekeek sick grote Treckers un een grote Güllehänger, so grot as een
Huus. Görn ut de Stadt, de tum ersten Mull een Koh seechen,
strickelten de in de Utstellung mit de Nomen „Erlebnis Bauernhof“.
In’ne Schleswig- Holsteen- Halle geew dat: Ingbert Liebing, Soft-Is
ut DK, wat ower ut Schleswig keem, un gröne, geele un rode Cocktails
vun junge Dithmarscher Lüüd, de mit veel Hartblot mixten un
de man uck för een Privatfest in NF mieten kann. Un veel, veel mehr.
Wat dat öwerall to eeten un to drinken geew, kann man gor nich
optellen. Op jeden Fall: To bayrische Blosmusik weer dat bayrische
Beer sodenni in Ordnung un de bayrische Hauberlinge un Schnuxen
hemm uck grotarti schmeckt. Wat man uck vun de Thai- Pann
in de Markthalle un de Brodwuss, de Hoschi un Thies eeten hemm,
segen kunn.
Ower alles musste betohlt warn. Umsunst weer nix. De Knipp bleew
nich dicht!
Man kann gor nich optellen, wat wi in de 6 Stunnen alles sehn, hört
un rüükt hemm. Weniger kann uck mehr ween, ower: Dat hett sick
lohnt un um Klock halwi twölf weern wi torüch in Viöl. Nächstet
Johr schulln jemm man aal mitfohrn, denn Berlin is immer weller
een Reis wert un wi hemm uck Anke un Karl- Heinz ut K. droppen,
denn dat is je immer dat Schönste, wenn du in’ne Fremde Bekannten
drippst.
Asta Carstensen
Weitere Termine:
06.04.2019: FrauenFrühstück im „Cafe´Melkkann“ in Behrendorf
14.04.2019: Lotto auf Engelsburg
Wir freuen uns immer wieder über neue Ideen
Anregung und viele schöne Veranstaltungen mit euch
Antje Carstensen, Ulrike Hansen, Angela Ruch
Gewinnen · Sparen · Helfen – machen Sie mit bei unserem Gewinnsparen
Weitere Infos unter: www.vrbank-westkueste.de/gewinnsparen