University of Cape Town Research Report 2008

VOORWOORD
In 2008 het die Universiteit van Kaapstad sy rekord
van uitnemendheid op die terrein van navorsing
gehandhaaf. Hierdie verslag onderstreep die gehalte
van ons navorsingsuitset – soos blyk uit die omvang
van ons plaaslike betrokkenheid en internasionale
mededingendheid – waardeur die Universiteit van
Kaapstad weereens in staat was om sy posisie as ‘n
toonaangewende universiteit in Afrika gestand te
doen.
In die Times Higher Education QS (THE-QS) se rangordening
vir 2008 van universiteite wêreldwyd is die UK in posisie
179 geplaas – 21 posisies hoër as in 2007, en 78 posisies
hoër as in 2006. Vir sowel die THE-QS se ranglys as
die Shanghai Jiao Tong se ranglys vir die akademiese
rangordening van universiteite wêreldwyd, het die UK sy
posisie as die universiteit met die hoogste rangordening op
die vasteland van Afrika gehandhaaf.
Op die nasionale toneel het die jaar 2008 verskeie
uitdagings gebied met betrekking tot befondsing en
geleenthede vir vennootskappe. In sowel die Nasionale
Navorsingstigting as die Departement van Wetenskap
en Tegnologie het finansiële beperkinge ‘n impak op
navorsingsbefondsing van die Hoër Onderwyssektor in
Suid-Afrika gehad. Ondanks hierdie uitdagings was die
Universiteit in staat om die topposisie in die nasionale
befondsingskaal te beklee. Dit is bereik deur die fokus
van ons navorsingspogings te versterk en ons hulpbronne
uit te brei. Dissiplinegerigte navorsing met die oog op
kennisvermeerdering vorm steeds die grondslag van die
UK se navorsingstrewe. Deur egter van vyf verskillende
samewerkingsinstrumente gebruik te maak, kon die
Universiteit daarin slaag om eksterne toekennings sowel
as beurse vir nagraadse studente en postdoktorale genote
te bewerkstellig. Hierdie instrumente is: (a) die Suid-
Afrikaanse Navorsingsleerstoelinisiatief (SARChI); (b) die
UK se Voorkeurtemas vir Navorsing; (c) die nasionale
Sentrums van Uitnemendheid en Bekwaamheidsentrums;
(d) navorsingsgroeperinge wat deur die Universiteit se
Navorsingskomitee (URC) geakkrediteer is; en (e) strategiese
vennootskappe met eksterne navorsingsorganisasies.
Vordering met hierdie inisiatiewe word reg deur die huidige
verslag gemeld.
‘n Groot uitdaging vir Hoër Onderwys in Suid-Afrika is om
met welslae die volgende geslag van geleerdes te kweek, en
om die huidige profiel van aktiewe navorsers te transformeer.
Om hierdie dringende uitdaging die hoof te bied, word ‘n
reeks ontwikkelingsprogramme vir akademiese personeel
geïmplementeer, en uit ‘n voortgaande beoordelingsproses
blyk dit dat hierdie programme reeds vrugte afwerp. Ons
is dank aan die donateurs verskuldig wie se ondersteuning
van hierdie inisiatiewe ons pogings fasiliteer om kapasiteit
te bou en om die profiel van Suid-Afrikaanse navorsers te
transformeer.
Terwyl ons poog om ons posisie as ‘n toonaangewende
navorsingsinstansie te handhaaf, sal gehalteversekering
steeds die hoeksteen van navorsing aan die UK wees.
Voeg hierby die strewe om meer ‘afropolitaans’ te wees:
‘n middelpunt van deskundigheid en kennisvorming wat by
ons posisie in Afrika pas, en wat van die UK ‘n uitverkore
vennoot vir navorsing in die Suiderwêreld maak.
Ek wil graag al ons donateurs, strategiese vennote en
navorsingsmedewerkers bedank. My waardering gaan
aan die hele universiteitsgemeenskap wie se onvermoeide
toewyding en verbintenis tot die navorsingspoging
steeds beslag aan ons rol op sowel die vasteland van
Afrika as die internasionale verhoog gee.
Dr. Max Price
Visekanselier
6