la patrie dal friûl la patrie dal friûl la patrie dal friûl

Editoriâl
Il numar
Dopo dal speciâl monografic su pre Toni
Beline o tornìn a cjapâ la riviste
cu la scansion normâl.
Di un pôc in ca ogni mês o decidìn
un argoment speciâl di frontâ e tamesâ.
No vin la presunzion di esaurîlu
di plante fûr ma o vin chê di cjalâlu
dal nestri pont di viste particolâr
di furlans e magari contâ un pâr
di robis che no si savevin.
L’argoment, viodude ancje la stagjon,
al è il turisim. O fevelìn di turisim di
mont, di mâr, storic e vie indevant,
partint de mont: chê che pre Toni
Beline e clamave «la mari dal Friûl».
Tes pagjinis «nazions» o vin un focus su
la Scozie, un puest li che i furlaniscj a
varessin di cjalâi di plui, oltre a la
Catalogne cumò tant di mode chenti.
Un teritori protagonist di une rivoluzion
autonomistiche inimagjinabil nome 20
agns za fa. Une rivoluzion moderade e
democratiche.
Par cont de atualitât autonomistiche
furlane a son tantis novitâts, ma no tant
buinis. La gnove propueste di leç
regjonâl pe lenghe furlane no je partide
ben. Pe Rai si fevele inmò di produzions
no finanziadis de aziende. Lis
produzions che si fasin, inmaneadis in
maniere atuâl e professionâl, a sticin
polemichis di bande di cualchidun
restât intune altre epoche. Dutis robis
che a samein fâi cuintri al ûs complet e
moderni de marilenghe, ma no si à di vê
pôre e no molâ. Gandhi al diseve: «In
prin no ti calcolin nuie, po dopo ti
coionin, po dopo ti scombatin… e po
dopo tu vincis». Impuartant al è però
rivâ a puartâ lis nestris istancis ae lûs
dal dibatit public e in chel sens alc si
môf. E coventarès aumentade la
pression sui media talians ancjemò di
plui rispiet al grant lavôr che si è za
daûr a fâ.
Nô o sin achì par fâlu, par contâus
e cirî di coinvolzius in cheste bataie.
L’editoriâl
Lavôr tant che maniere
par esorcizâ pôris e dolôr
DREE VENIER
E je par cont di une brute circostance che cumò
o viodês la mê firme tant che diretôr di chest
gloriôs e impuartant mensîl. Cussì mi cjati a scrivi
chestis riis cun tante dificoltât, parcè
che mi puartin a pensâ parsore a chel che
al è sucedût e su la grande pierdite e il vueit
che nus – e «mi», scusait il personalisim – lasse
la muart di pre Toni Beline. Di fat fin cumò che
o soi daûr a scrivi, o ai cirût di fâ alc altri pluitost
che rifleti. Ricevude la propueste dal incaric
o ai dit di sì par spirt di servizi e cence pensâ tant
a lis dificoltâts e a lis responsabilitâts, ma lant
indevant cul lavôr che pre Toni al mostrave simpri
plui di preseâ. Mi ven iniment un paragon
cu la nestre int dopo dal taramot che si è tirade sù
lis maniis par tornâ a fâ sù chel che al jere
sdrumât. Par volontât di ricostruî ma forsit ancje
par tignî la ment ocupade. Lavôr tant che maniere
par esorcizâ pôris e dolôr. Il lavôr che o vin devant
al è tant e impuartant: i contignûts di atualitât su marilenghe e furlanisim
a son simpri di plui e simpri di plui a domandin di vignî fûr e duncje al covente
un gjornâl che al conti, e che al conti ben, la atualitât furlaniste. Cence dismenteâ
la part storiche che fin cumò no je stade fate ben: se i furlans a san pôc de nestre
storie e dai nestris inteletuâi la colpe e je par prins di nô operadôrs de informazion
in marilenghe, che no vin rivât a contâju avonde ben. Cumò o vin un sburt
ancjemò plui grant: no dismenteâ Antoni Beline.
Se chescj a son i fats di contâ, la opinion – invezit – le savês za: o sin «furlaniscj»
che al vûl dî «sostignidôrs de identitât furlane». Chel che o cirarìn di fâ al sarà
di rapresentâ cheste identitât in dutis lis sôs diviersis sfumaduris e contâ i fats
di chest mont autonomist cui mieçs che o vin a disposizion. Jessi furlaniscj par nô
al vûl dî ancje rispietâ i altris popui e lenghis parcè che o savìn masse ben ce
che al vûl dî patî – e o patìn ancjemò – lis censuris dai nazionaliscj di altris stâts.
Tantis lis istancis furlanistis sul plat – di fat – ma, magari cussì no, a son tantis
lis resistencis. E se a son scuasit di meti in cont chês di une Italie tradizionalmentri
centralistiche e nazionaliste, a maravein chês che si riscuintrin chenti, di bande
di furlans. Resistencis une vore provincialistichis che a frenin il disvilup plen
di un Friûl multilinguistic, operôs, viert e European ad implen. Si visìn ducj
de vecje definizion retoriche di Friûl come «il piçul mont» par vie de sô
conformazion gjeografiche cun mâr, monts, culinis. Bon, a nô nus plasarès
pandi une gnove ete e une gnove definizion «alte» in contrast cun chês definizions
folcloristichis. Un Friûl «che al sa di Europe», metafore dal Vieri Continent
tant che esempli di convivence di diviersitâts, consideradis un valôr e un imprest
di disvilup.
Chestis in curt cualchidune des nestris intenzions. Obietîfs grancj e faturôs
ma nus fâs coragjo une frase che pre Toni nus scrivè – cu la solite profonditât
cubiade ae ironie – a Dicembar a proposit de Patrie che o jerin daûr a tornâ
a fâ sù: «Pe teologjie catoliche, massime in chest timp di passion, il timp tribulât
al è il plui fecont e ben spindût, parcè che ti clame a dâi une man al Signôr
par salvâ la barache».
la patrie dal friûl _ LUI 2007 _ 3