Il Cinghiale Corazzato - Comunità Antagonista Padana

LA PROCESSION
Dessédass, giavann!”. Quand che la vós de la sóa
mama la tronava inscì el Carlin el capiva sùbit che
l’era dree combinà ‘na pirlada. “Dessédass, gh’è la
procession di Rogazion e tì te seet anmò lì in del
lecc cóme ‘na s’cena fregia ! Giudee, lévass sù che
gh’è ’l sciór prevost che’l te speccia in gesa! Varda
che ciami ’l papà…”. El sô ‘l s’era nancamò tiraa
foeura di lenzoeu e cont i sò primm sbagg el faseva
sbarluscì ‘l firmament de colór: l’era l’alba, éren
nanca i cinch ór. Carlin , con la cera da pancott tutta
riscïada de la fatiga del dormì, vardava giò de la fenestra
la gent devotta che l’andava vers el sagraa
per la fonzión; dimò on el faseva la straa dal cantón
invers: el sagrestan, el Gino. Scur in faccia cómè
la tonega di pret, el sagrista el vegniva a sbraggià
cont el fioeu: “Carlin! Andemm, el curaa l’ha
giamò basaa la stola! Metta sù la vesta de cereghett
altrimenti te catti per i oregg, malnatt d’un fioeu!”.
L’era minga on grand bell deseddàss quest chì, pien
ras d’improperi e de spégasc, ma gh’aveven nò tutt
i tort: l’era ‘l primm dì di Rogazion, tutt el paes,
sciór e poeritt, l’era prónt per andà in procession a
domandagh al Signor perdón per i sò peccaa e protezión
de sóra ai camp e ai raccolti. La gesa l’era
giammò piena cagiaa: i cónfratei aveven lustraa i sò
mantell, i tosann de Maria in genoeugg se prepara-
ven a la fonzión e ‘l sciór marches con la sóa miee
l’aveva giamò ciappaa ‘l sò post sóra
la banchetta di benefattór anca questa,
cóme ‘l rest de l’edifizi, cont i drapp
vioeula (morell per dill a l’ambrosiana),
colór de la penitenza. Mancaven domà
i orfenei che, cómè i poresin dedree a
la sóa pitta, entraven in gesa misurand
i pass de la monega. Ma ‘l Carlin l’era
on fioeu descantaa del bon e, trada via
la cispa di oeugg e infilaa ‘l vesti de
cereghett, in des minutt l’era in sagrestia
prónt per el servizzi del Signor. El
prevost, omm de pocch parol e tajaa giò
cont el folciott in di sò robb, el lassava
mai passà la cattiva creanza di sò ceregehett
ma per che la voeulta là ‘l s’è
stringiuu in di sò spall: “Hinn i cinch
ór, slarghemm el coeur per i debolezz
di bagai!”.
Dopo avegh daa la crus in man el Gin
ghe dà on ruzzon al ceregh per andà
foeura de la porta de la sagrestia. Al són
de la campana ‘l don Pinetti cont el
Carlin entraven in gesa e, fada la debita genóflession al
tabernacol, che dopo ‘l bianch de l’Ascension l’aveva
cambiaa vestii cont el vioeula di Rogazion, se metteven
en genoeugg cont tutt i ólter fedei e princippiaven con
‘l’Exsurge’ e i litani di sant. El se faseva inscì (e on quaidun
el fa ancamò): pregand i sant se prega anca ‘l Signor
perché i sant, che hinn i pussee vesin all’inizi e alla fin de
tutt i robb, sien bón de vutà i omen sù la terra; d’altronde
anca ‘l Pader el fa inscì e quand che ’l voeur dispensà ‘na
grazia, manda on sant a fà on miracol. Ma ancamò prima
de fa ‘l nomm di tutt i sant, appena che ‘l s’è sentii Sancta
Maria, la pussee granda di tutt i creatur ( pólver cómè
nunc ma senza vonceria), tutt i cattolich se levaven in
pee: comincia la procession! Drappi vioeula e mantelett,
rosari in man e ‘l vell calaa sui oeugg e ‘l prevost che
gran figuron! La cotta noeuva, tutta de pizz cómè l’opera
d’ingegn d’on ragn, la faseva vegnì in ment el bianch de
la nev, che l’aveva lassaa d’ona quai settimana i campi
del paes, e sott al pizz la tónega negra la pareva ‘l soeul
masaraa che ‘l se faseva spazzi in mezz al dislenguass,
sloffi ma costant, de la nev e del giazz ai ragg del sô
d’april. La vesta, sfilapraa ai pee per el molto innanziindree
che ‘l faseva ‘l poer pret tutt i dì, la contrastava
cont la perfezion de la cotta noeuva, ma ‘l ghe podeva fa
nagotta: l’aveva spenduu i danee per la cotta, pazienza
per la vesta, semper la stessa da quand che gh’avea vint
ann e l’era ancamò un boggia in seminari.