Li zite 'n galera lib.indd

Vinci: Li zite ‘n galera - atto primo
TITTA
M’abburlate? N’aggi’ auto che sta vita
Sarvatame da vuje: pegliatevella.
CARLO
T’è sore Ciommetella?
TITTA
Sigornò mm’è parente:
pecchè? La canoscite?
CARLO
La canosco sopierchio.
TITTA
(Ajemmé, che sarrà chesto?)
E che bolite?
CARLO
Che la decisse pecchè ho’ che mora,
Che non sia tanto sgrata
Co Carlo che l’adora.
TITTA
(Oh dio, che stellettata
Mm’aggio sentuta dà ‘m miezo a sto core!)
CARLO
Ched’è, te si’ mutato de colore?
Mme nnieghe sto piacere?
TITTA
Gnorsì, voglio vedè de ve servire.
(Sciorta, che cchiù mme resta da vedere!)
CARLO
Fa’ che sia mia! Non me vedé morire.
(Parte.)
Scena V°
Titta sulo.
TITTA
Vide si la desditta
jocare mme potea cchiù de ponta!
Desgrazejato Titta!
Nce volev’a lo ruotolo sta la jonta.
4
[Aria]
(Parte.)
Ammore, dimme tu
Ch’aggio da vedè cchiù!
Tu dimme si nc’è stato
Core cchiù desperato
De sto mio.
Non te vastava né
Lo sdigno de ssa perra;
Che puro mme faje guerra
Co fareme trovà
Chi mme la vo’ levà;
Dimme che buo’ da me,
che te sacc’io.
Scena VI°
Ciomma che caccia ‘na seggia fora a barcone e
s’assetta, e po’ Col’ Agnolo co lo farrajuolo e cappiello,
da la casa, che bo’ ascire.
CIOMMA
Oh bene mio, sto sole t’addecreja.
COL’AGNOLO
Oh tè! Vecco la quaglia.
CIOMMA
0 masto, schiavo, e mbè?
COL’AGNOLO
Gioja de st’arma!
CIOMMA
(Vide ch’antecaglia)
Embè, parlaste a Peppo?
COL’AGNOLO
Che nne vuo’ fare de sto svarvatiello?
Trovate n’ommo…
CIOMMA
E bia,
Che t’ha ditto?
COL’AGNOLO
Sia Ciomma, bella mia…
CIOMMA
Tu dàlle ca te frusce,