Everything Science Graad 10

12.1 HOOFSTUK 12. DIE DEELTJIES WAARUIT STOWWE BESTAAN
Molekuulvoorstelling ESDDS
Die struktuur van ’n molekule kan op talle verskillende maniere getoon word. Somstyds
is dit die maklikste om te wys hoe ’n molekuul lyk deur verskillende tipes diagramme te
gebruik, maar andersins kan ons eenvoudig besluit om om ’n molekule met die chemiese
formule of skriftelike naam voor te stel.
Gebruik formules om die struktuur van ’n molekuul aan te toon.
’n Chemiese formule is ’n verkorte (kort) manier om ’n molekuul, of ’n ander chemiese
stof, te beskryf. In die hoofstuk oor die klassifikasie van materie, het ons gesien dat
chemiese verbindings voorgestel kan word deur van element se simbole op die periodieke
tabel gebruik te maak. ’n Chemiese formule dui ook die aantal atome van elke element
in ’n molekuul asook hul verhouding in daardie molekuul aan. Die chemiese formule
vir ’n koolstofdioksied molekuul is byvoorbeeld CO2. Die genoemde formule word die
molekulêre formule van die verbinding genoem. Die formule vertel ons dat daar in een
molekuul koolstofdioksied een koolstofatoom en twee suurstofatome is. Die verhouding
koolstofatome tot suurstofatome is 1: 2.
DEFINISIE: Molekulêre formule
Dit is ’n verkorte manier om inligting oor die atome waaruit die bepaalde
kovalente verbinding opgebou is, weer te gee. Die molekulêre formule gee
die presiese getal van elke tipe atoom in die molekuul
’n Glukose molekuul het die molekulêre formule: C6H12O6. In elke glukose molekuul,
is daar ses koolstofatome, twaalf waterstof atome en ses suurstof atome. Die verhouding
van koolstof: waterstof: suurstof is 6:12:6. Ons kan hierdie verhouding vereenvoudig en
skryf as 1:2:1. Dit beteken dat daar vir elke koolstofatoom twee waterstofatome en een
suurstofatoom is. As ons nou die simbole van elke element gebruik, word die formule
geskryf as: CH2O. Dit word die empiriese formule van die molekuul genoem.
DEFINISIE: Empiriese formule
Dit is ’n manier om die relatiewe getal van elke soort atoom in ’n chemiese
verbinding uit druk. In die meeste gevalle wys die empiriese formule nie die
presiese aantal atome nie, maar eerder die eenvoudigste verhouding van die
atome in die verbinding.
210 Chemie: Matter en materials