Lees meer - ATKV

Spesiale aanbod vir ATKV-lede: sluit aan by PRAAG se ebiblioteek
Enkele maande gelede het PRAAG die boekpryse vir die Laventelbossie-tak se
opstelwedstryd aan die Wesrand geborg. Onder andere het die graad-7-wenner 'n Prestigio
e-leser ontvang.
Die ATKV doen wonderlike werk om Afrikaans te bevorder en LAPA se kinderboeke en
gewilde fiksie verkoop soos soetkoek. Iemand moet egter in Afrikaans die hele
eboekrevolusie lei en daarom het PRAAG dié tegniese en literêre uitdaging aangeneem.
Ons ervaring met webwerwe het ons in staat gestel om ook eboeke met groot sukses vir
Afrikaanse lesers aanlyn beskikbaar te stel.
Pleks van eboeke te hoef te koop, kan lesers hulle nou net soos 'n gewone biblioteekboek
by http://www.praag.org.za/ uitneem.
Spesiale aanbod aan alle ATKV-lede: u kan teen slegs R30 per maand by PRAAG se
ebiblioteek, Klub digiTAAL, aansluit. Vul die vormpie in by digitaal.org.za of stuur 'n epos
aan inlig@praag.org. Daarmee kan u 'n onbeperkte aantal eboeke uitneem, en dra u ook by
tot die skepping van nuwe Afrikaanse eboeke.
Soos gedrukte koerante en tydskrifte is die tradisionele boek 'n duur item om te vervaardig
en te versprei. Hierteenoor bied eboeke 'n goedkoop en vinnige manier om leesstof aan
mense waar ook al ter wêreld via die internet beskikbaar te maak.
Hoewel eboeke goedkoper as tradisionele boeke is, kan so 'n reuseversameling eboeke
egter miljoene rande kos om aan te koop.
Dis hier waar PRAAG met die briljante idee vorendag gekom het om 'n ebiblioteek op te rig.
Die ebiblioteek by praag.org.za werk net soos 'n aanlynwinkel om eboeke te koop, behalwe
dat 'n mens "betaal" deur die opsie "klub digitaal" pleks van 'n kredietkaart of ander
betaalmetode te kies. Die Amerikaanse reus Amazon.com wat die markleier met eboeke is,
beskik oor 'n soortgelyke stelsel waar sekere ouer boeke gratis "gekoop" kan word of meer
onlangse boeke geleen kan word.
Tradisionele boeke beskik gewis oor 'n onnabootsbare sjarme. Wie het nie 'n paar mooi
leergebonde eksemplare van klassieke werke in sy versameling nie? Of ou Afrikaanse
boeke uit die veertiger- en vyftigerjare wat keurig met linne oorgetrek en op goeie, duursame
papier gedruk is?
Hoewel digitaal en byna onpersoonlik soos net nog 'n epos wat in jou inkassie beland, is 'n
eboek egter steeds volwaardig boek.
Trouens, dit is amper iets wat ons by PRAAG as 'n roeping beskou: dat die begrip "boek"
behoue moet bly. Amazon en enkele plaaslike Engelse nabootsers het reeds begin om
korter eboeke wat iewers tussen 5000 en 30 000 woorde lank is as 'n sogenaamde "single"
of enkelsnit te bemark. Hierdeur word die integriteit van die boek egter aangetas.
Boeke bestaan reeds sedert die vroegste tye in die Westerse kultuur. Ons lees nou nog
boeke wat 400 of 500 jaar voor Christus geskryf is. Dink maar aan die Bybel of die
beroemde epiese gedigte van Homerus, die Ilias en die Odusseia. Terloops is albei in die
1950s uitstekend in Afrikaans vertaal.

Die gevaar bestaan egter dat die boek as 'n eenheid en as 'n werk - 'n opus soos dit in Latyn
heet - deur die nuwe tegnologie verdring mag word. Daarom verg eboeke steeds dieselfde
liefde en aandag in hul skepping en voorbereiding as papierboeke. 'n Mens kan dadelik sien
as 'n boek afgeskeep of amateuragtig saamgeflans is. Dit was so in die tyd van papierboeke
en dit is tans steeds die geval.
Die voorblad, tipografie, afwerking, struktuur en lengte van 'n eboek is daarom steeds
bepalend vir sy status as "boek" en selfs as literêre werk.
Kan 'n mens 'n eboek op jou rekenaar lees? Uiteraard is dit die maklikste en goedkoopste
uitweg met die verskeidenheid gratis programme wat beskikbaar is, maar die gerief van 'n
boek is juis dat jy dit oral kan saamdra en op die rusbank, in die bed, in die trein of op die
vliegtuig kan lees. Daarvoor is 'n eleser soos 'n Kindle of Prestigio, wat albei op praag.org.za
te koop is, baie nuttig. Of natuurlik 'n tablet, maar wat effens groter en swaarder as die
eleser is. Veral elesers van die e-ink-tipe in swart en wit, is baie gemaklik op die oë, net soos
'n papierboek.
Die meeste slimfone kan ook as elesers dien, maar die kleiner skerm bemoeilik weer die
leesaksie.
Persoonlik besit ek 'n Prestigio-tabletrekenaar en 'n Kindle waarop ek ten minste 'n paar
boeke elke week lees. Soms skrik ek in die nag wakker en tas na die tablet. Met die skerm
dowwer gestel, kan ek heerlik sommer op my sy verder in die donker lees aan die verhaal
waarmee ek besig is. Om om te blaai, verg net 'n ligte tikkie van my voorvinger.
Terwyl die kenmerkende geur van papier, ink ek stof nie deur die eboek oorgedra word nie,
beskik hy oor heelwat ander voordele. Soos om jou boek te mag annoteer, of vreemde
woorde onmiddellik met 'n ingeboude woordeboek te kan opsoek deur eenvoudig jou vinger
op die woord te druk. Veral as 'n mens boeke in vreemde tale soos Italiaans, Frans of Duits
lees, kan dit nogal nuttig wees!
En weg is daardie afstof en regpak. Nou kan jy al jou boeke netjies op jou rekenaar of eleser
organiseer en presies weet watter boeke jy in jou besit het en watter nie. As jy skielik moet
trek, dan hoef jy nie 'n ekstra vragmotor te huur net om jou boekversameling te vervoer nie,
maar dra jy dit sommer in jou sak saam.
Die boek is dood; lank lewe die boek!
Dr. Dan Roodt
Direkteur, PRAAG
Posbus 3103
Dainfern
2055 Suid-Afrika
dan@praag.org