Geagte Ouer NUUSBRIEF 1 VAN 2013 - Afrikaanse Hoër Seunskool

Geagte Ouer
NUUSBRIEF 1 VAN 2013
‘n Hartlike woord van welkom na die Desember-vakansie. Ons beste wense vir 2013!
‘n Besondere woord van welkom aan al die ouers wat vanjaar vir die eerste keer tot die
Affie-gemeenskap toetree. Ons glo dat die volgende vyf jaar ook vir u ‘n verrykende ervaring
sal wees. Die uitdrukking “Eenmaal ‘n Affie, altyd ‘n Affie!” sal weldrae vir u betekenis kry,
nadat u seun amptelik vir die eerste keer sy Affie-baadjie aantrek en sy pet opsit.
Om die jaar mee in te lei, word daar in hierdie skrywe kortliks verslag oor ‘n paar sake
gedoen, belangrike inligting word gegee en enkele reëlings getref.
1. Leerlingtal
Dit is aangenaam om u mee te deel dat Affies stampvol is. 244 graad 8-leerlinge is
vanjaar toegelaat en ons totale leerlingtal staan tans op 1220.
2. Matriekuitslae
‘n Woord van gelukwensing aan die 2012-matrieks, hul ouers en onderwysers vir
hulle aandeel om Affies se status as een van ons land se uitnemendste skole op
akademiese gebied te bevestig.
Ons kan met groot dankbaarheid getuig dat indien die aantal onderskeidings in
verhouding tot die aantal kandidate bereken word en die persentasie kandidate wat
tot graadstudie toegelaat word, in ag geneem word, dit duidelik is dat kwaliteit
onderrig by Affies aangebied word.
Soos verlede jaar het die Onderwysdepartement weer met die samestelling van hul
ranglys ‘n skool se onderskeidings getel sonder om dit met die aantal kandidate in
verband te bring. Volgens mnr. Charles Phahlane, Gauteng-onderwyswoordvoerder,
is onder meer gekyk na hoeveel leerlinge geslaag het; hoeveel toelating tot
graadstudie gekry het; en hoeveel vakonderskeidings ’n skool behaal het. (Beeld, 13
Januarie 2012) Hierdie kwantitatiewe benadering het tot gevolg dat skole met kleiner
matriekgroepe, soos Affies, oor die hoof gesien word wanneer rangordes bepaal
word.
Indien die gemiddelde aantal onderskeidings per kandidaat en die persentasie
kandidate wat tot graadstudie toegelaat word as maatstaf geneem word, is die beste
prestasie waarskynlik deur AHMP gelewer. Die 213 meisies het 688 A’s behaal –
3.23 per kandidaat. 96.7% van die kandidate slaag met universiteitstoelating.
Afrikaanse Hoër Seunkool behoort volgens hierdie benadering tweede of derde op
die ranglys te lê. AHS se 217 seuns het 484 A’s behaal – 2.2 per kandidaat. 92% van
die seuns het met universiteitstoelating geslaag. Die skool wat deur die departement
eerste geplaas is, se 305 kandidate het 726 A’s behaal – 2.38 A’s per kandidaat en
87% het met universiteitstoelating geslaag. Interessantheidshalwe kan genoem word
dat een van die skole op die departement se top 5 lys 1.94 onderskeidings per
kandidaat opgelewer het en slegs 76.1% universiteitstoelating verwerf het. Op grond
van hierdie inligting kan ons sonder vrees vir teenspraak sê dat Affies 'n plek onder
die top 5 akademiese skole verdien.

Wat AHS se vertoning egter nóg merkwaardiger maak, is die feit hierdie prestasie
slegs met ‘n span seuns, wat tradisioneel om verskeie redes swakker as meisies in
die eindeksamen presteer, behaal is.
Die Affie-seuns het, alle kandidate en alle vakke bereken, ‘n gemiddelde persentasie
van 71.2% behaal. 50 manne het ‘n gemiddelde persentasie van 80%+ en soos bo
aangedui, kwalifiseer 92.6% vir graadstudie. (Volgens Beeld van 3 Januarie het slegs
26.6% van die land se matrikulante met universiteitstoelating geslaag.)
Affies lewer 1 kandidaat met 10 A’s op, 8 met 9 A’s, 6 met 8 A’s, 14 met 7 A’s, 7 met
6 A’s, 10 met 5 A’s, 9 met 4 A’s, 17 met 3 A’s, 19 met 2 A’s en 39 kandidate behaal 1
A-simbool.
Baie geluk ook aan Affies se top 10 matrieks met puik individuele prestasies – Alpha
Wiskunde en Wiskunde 3 ingesluit:
Dewet Van Schoor 93,7 (9 A’s)
Alkmaar Swart 93,6 (9 A’s)
Henco Posthumus 93,4 (9 A’s)
Johan Conradie 91,4 (9 A’s)
Johan Kotze 91,1 (9 A’s)
Francois Lamont 90,9 (10 A’s)
Frikkie Snyman 90,9 (7 A’s)
Jean Hough 90,6 (9 A’s)
Eduard Grabe 89,4 (8 A’s)
Izak van der Merwe 89 (9 A’s)
Soos in die verlede was die twee sogenaamde probleemvakke, Wiskunde en Fisiese
Wetenskap, weer ‘n fokuspunt in die media se berriggewing oor die matriekuitslae.
Volgens Beeld was daar verlede jaar 527 335 heeltydse kandidate en 120 352
deeltydse kandidate waarvan 226 218 Wiskunde geneem het – die res het vir
Wiskundige Geletterheid ingeskryf. Slegs 35.68% van die leerlinge wat landswyd
Wiskunde geneem het, kon ‘n persentasie bo 40% behaal. 184 van Affies se 217
matrieks het Wiskunde geneem en ‘n gemiddelde persentasie van 67% (52 Asimbole)
behaal. Affies se 33 seuns wat Wiskundige Geletterheid geneem het, het ‘n
gemiddeld van 71.6% behaal. 10 Seuns het met onderskeiding geslaag. Landswyd
het daar 179 194 kandidate Fisiese Wetenskap geneem en slegs 70 076 (39.1%)
kon 40% of hoër behaal. Affies se matrieks behaal ‘n gemiddeld van 73% en 50
seuns slaag met A-simbole.
Dit is egter nie nét in Wiskunde en Wetenskap waarin ons seuns uitgeblink het nie.
Rekeningkunde spog met ‘n gemiddeld van 82% (39 A’s), Afrikaans met ‘n
gemiddeld van 73% (53 A’s), Engels Eerste Addisionele Taal met 74% (36 A’s),
Lewensoriëntering met 78% (98 A’s), Geskiedenis met 77% (19 A’s), Geografie met

72% (7 A’s), Duits met 72% (6 A’s), en Musiek met 72% (7 A’s). Alpha Wiskunde se
gemiddeld is 78% (13 A’s).
3. Personeelsake
Die volgende personeellede word tot die Affie-personeelkorps verwelkom:
Mee. Anina Brits (Afrikaans), Martina De Vos (Rekeningkunde), Ronel du Plessis
(Musiek), mnre. Thinus Boshoff (Musiek) en Nick van der Merwe (Tegniese dienste –
koshuis). Mnr. Pieter van Zyl, vroeër aan die hoof van die skool se
Musiekdepartement, skakel op deeltydse basis as dirigent van die simfonieorkes in.
4. Leerlingsake – die graad 8’s van 2013
Affies se 244 graad 8’s deurloop tans onder die leiding van die graad 12-lede van die
Affieraad en voogde ‘n oriënteringsprogram waaraan hulle met groot entoesiasme
deelneem. Alles dui daarop dat hierdie mannetjies vorentoe hulle plek in Affies met
onderskeiding gaan volstaan.
Hierdie kannetjies kom uit 85 verskillende laerskole. 37% van die seuns loop op die
spoor van ‘n oupa, pa of broer, 8% het Affies gekies op aanbeveling van vriende,
maar 55% is nuwe bloed wat ‘n eie Affie-tradisie wil begin. 96% van die graad 8’s se
woonhuis is nader aan ‘n ander skool as aan Affies.
5. Skakelpersone
Mnre. Deon Botes (adjunkhoof – deon.botes@affies.co.za) en Dirk Taljard
(dirk.taljard@affies.co.za) is vir skakelwerk verantwoordelik.
Alle navrae oor u seun se welsyn moet aan die betrokke graadvoogde gerig word:
• Graad 12: Mnr. Jan Grabie (jan.grabie@affies.co.za)
• Graad 11: Mnr. Cobus Coetzee (cobus.coetzee@affies.co.za)
• Graad 10: Mnr. David Jaquire (david.jq@affies.co.za)
• Graad 9: Mnr. Wim Mulder (wim.mulder@affies.co.za)
• Graad 8: Mnr. Rooies Andrianatos (rooies.andrianatos@affies.co.za)
Vgl. in hierdie verband ook bl. 4 tot 15 in die beplanningsgids vir meer besonderhede
oor ander saakgelastigdes.
6. Inligtingsbronne
Vergewis u asseblief van die volgende sake soos opgeneem in die 2013beplanningsgids
wat aan elke seun gegee is:
• Kerninligting (adresse, telefoonnommers, klerebanktye, ens.)
• Kloktye
• Skoolkalender vir 2013 en 2014
• Kleredragvoorskrifte

• Gedragskode
• Selfoonbeleid
• Detensie, prosedure om leerlinge tydens skoolure uit te teken en afwesigheid
tydens toetse en eksamens
• Prosedure wanneer ‘n leerling laat kom vir skool
• Jaarprogram
Bevestig asseblief dat u die beplanningsgids onder oë gehad het deur onder
aan bl. 30 te teken.
Raadpleeg ook die Affie-webwerf (www.affies.co.za) deurlopend vir verslae,
programwysigings en ander inligting. Mnr. Brown (billy.brown@affies.co.za) tree as
stelselbestuurder op. Affie-nuus kan ook op Twitter gevolg word: @ahs1920
7. Skoolfondskorting
Let daarop dat korting ten bedrae van R1 800 per leerling toegestaan word, indien
die volle skoolfondsrekening voor of op 31 Januarie 2013 betaal word.
8. Terrein en geboue
Die bouwerk aan die studentesentrum vorder flink. Die betonvlak van die grondvloer
is reeds gegooi en die binnemure begin vorm aanneem.
Deur die loop van die vakansie is uitheemse bome met inheemse bome vervang.
9. Verbetering van verkeersvloei
Om verkeersknope soggens en sluitingstyd uit te skakel, word ouers versoek om nie
in- en uitgange te versper nie. Trek asseblief by een van die parkeerplekke in terwyl
u vir u seun wag.
U word ook versoek om soggens in een van die bane van ons parkeerterrein wat
parallel met Lynnwoodweg loop te stop wanneer u passasiers aflaai. Persone wat in
die baan wat na die skoolgebou loop parkeer, veroorsaak ‘n opeenhoping by die
toegangshek en in Lynnwoodweg.
As gevolg van bouwerk moes ‘n deel van die parkeerterrein afgeskort word wat
groter verkeersprobleme veroorsaak. Die hekke sal voortaan op Vrydae toegemaak
word, wanneer alle parkeerplekke beset is. Indien daar nie meer parkeerplek op die
terrein is nie, moet u asseblief u seun elders oplaai. Ons vra om verskoning vir die
tydelike ongerief.
10. Affie-verbruikersgids
Nuwe ouers wat vir hulleself werk of gespesialiseerde dienste lewer, word uitgenooi
om hulle besonderhede vir opname in die Affie-verbruikersgids aan mnr. Dirk Taljard
(dirk.taljard@affies.co.za) te stuur. Belangstellendes kan op die Affie-webwerf
(www.affies.co.za) na die gids gaan kyk en om ‘n idee te kry van die tipe
besonderhede wat benodig word. Skakels na ondernemings se webwerwe en eposadresse
is lewendig. ‘n Kort opsomming van die diens wat gelewer word, moet

asb. in Afrikaans aangebied word. Dui asseblief ook u verbintenis met die skool
duidelik aan.
11. Veiligheid
Misdadigers teiken veral jonger seuns wat op die sypaadjies in Lynnwoodweg vir
hulle ouers wag. Ons versoek dat leerlinge eerder na ure wanneer dit begin stil raak,
op die parkeerterrein wag om opgelaai te word.
12. Bankinbetalings
Die onus rus op die ouer om seker te maak dat inbetalings na die korrekte rekening
gekanaliseer word.
Bankbesonderhede: ABSA (Hatfield), takkode 632005, tjekrekening 2140140255
In geval van bankinbetalings word u seun se rekeningnommer in die verwysingsveld
aangedui. Faks die betalingsbewys ook asseblief aan die skool – 012 344 3907
Ons sien met groot verwagting uit na nóg ‘n jaar van gesonde vennootskap tussen die skool
en sy Affie-ouergemeenskap.
Die uwe
DR. P. EDWARDS / HOOF