Jaarverslag 2008/2009 - NG Welsyn Noordwes

Gelukkig en geseënd is ons, want daar is mense wat daadwerklik iets doen om die seer van ander draagliker te maak. Daar
is mense wat hoop bring waar alles gaan stilstaan het en wêrelde uitmekaar gebreek is.
Daar is mense wat gaan stilstaan en wat raaksien wat in ander se lewens aangaan. Daar is mense wat die hande uitsteek en
die nood aanraak, wat nie net praat en beplan nie, maar werklik iets doen.
Dit is waar NG Welsyn werk. Ons mense loop en werk en dien daar waar die kind sonder huis en gesin verleë rondstaan,
waar die vrou geslaan word en ouer mense versorg moet word.
Ons het mense wat die armoede in die huise gaan aanspreek en die werklose se hand vat om hulp te verleen. Ons het
mense wat kos in die hand sit van die een wat honger het, wat 'n verwaarloosde kind vasdruk en na veiligheid bring. Ons
het mense wat 'n gebroke kind se lewe help heelmaak en rigting gee. Ons het mense wat by ander stilsit en verstaan as die
groot wêreld klein geword het en die klein dinge groot bedreigings word. Ons het mense wat pille aangee en die kombers
vasdruk vir die eensame.
Ons is werklik geseënd.
Ons het ook mense wat sorg dat die versorgers versorg is. Wat weer diegene wat die werk doen, help om met hul werk te
kan aangaan. Ons is bevoorreg om bestuurders te hê wat omsien na personeel wat op die grond werk. Hulle wat sorg dat
die middele daar is om die werk te doen. Agter die bestuurders het ons vrywilligers en die ondersteuners en die borge en
die kerke en die gemeentes en die lidmate en so kan ons voortgaan met opnoem.
Hoe wonderlik is die genade van ons Hemelse Vader wat op soveel maniere sorg en versorg.
Dit gaan met ons goed. Ons word op soveel maniere en deur soveel mense geseën. Ons kan nie anders nie as om met 'n
loflied op ons lippe voor ons Hemelse Vader te kom buig in dankbaarheid vir soveel wat omgee en bydra om die nood van
die mense in ons eie omgewing te verlig.
Ds Anton Mocke
Besturende Direkteur
2
JAARVERSLAG 2008/2009