Katalog 2020

Leidulf Melve
EI VERD I ENDRING
Den globale mellomalderen 500–1500
Globaliseringa etter andre verdskrig var av eit anna omfang enn tidlegare, men det var
ikkje noko nytt fenomen. Globalisering, forstått som aukande integrasjon og dei stadig
større verknadene av slik global integrasjon, kan sporast tilbake til dei tidlegaste sivilisasjonane.
I nokre historiske epokar aukar globaliseringstakta. Ein av desse periodane
er tida mellom 500 og 1500, som gjerne blir omtala som mellomalderen.
Gjennom utbygging av kommunikasjonar blir verda ført saman på nye måtar. Silkevegen,
eit nettverk av vegar mellom Kina i aust og Europa i vest, frakta ikkje berre
handelsvarer, men òg teknologi, kultur, epidemiar og religionar. Buddhismen kan
takke Silkevegen for den raske spreiinga frå sitt indiske opphav og austover til Kina,
medan papir og prent reiste andre vegen – frå Kina innom den islamske verda og til
Europa. Ved å ta tak i seks emne – kommunikasjon, økonomi, religion, stats- og imperiedanning,
urbanisering og lærdom – diskuterer Melve eit knippe grunnleggjande
og samanvovne endringar som gjorde verda kring 1500 heilt ulik den verda som møter
oss kring 500.
Dette er den første framstillinga på norsk som diskuterer mellomalderen i ljos av tankar
og teoriar om globalisering.
Leidulf Melve (f. 1972) er professor i historie ved Universitetet i Bergen. Han har tidligere
gitt ut bøkene Med ordet som våpen. Tale og skrift i vestleg historie (2001), Inventing
the Public Sphere. The Public Debate during the Investiture Contest (2007), Europeisk
politisk historie 400–1750. Frå førstatleg samband til einskapsstat (2009) og Historie.
Historieskriving frå antikken til i dag (2010).
15