Número 106 - Código Cero

AUTOESTRADAS DE DOUS SENTIDOS
O CPEIG cualifica a eAdministración de novo medio de
comunicación coa cidadanía
10 |
REPORTAXE
O Colexio Profesional de Enxeñaría en
Informática de Galicia (CPEIG) celebrou
en Santiago as xornadas Administración
Electrónica, Sede, Goberno e Contratación,
organizadas en colaboración coa
Axencia para a Modernización Tecnolóxica
de Galicia (AMTEGA), a Facultade
de Ciencias Económicas e o centro de
Estudos Cooperativos da USC. O evento
contou coa participación activa de persoeiros
da primeira liña de análise e investigación
arredor de cuestións como
a cidadanía dixital ou a aplicación das
TIC no día a día das institucións públicas,
como o subdirector xeral de Inspección
de Datos da Axencia de Protección de
Datos, José López Calvo; o catedrático
de Dereito Informático de ICADE, Miguel
Ángel Davara; Carlos Guadián Orta, de
Autoritas Consulting ou Juan Alberto
Ramos Cano, responsable de Contidos
Dixitais de Telefónica.
Como expertos galegos, interviñeron
María José García Sexto e Carlos Froján
Gómez, da AMTEGA; o avogado Víctor
Salgado; o profesor de Dereito Mercantil
Rafael Millán Calenti; Martín Gómez, xerente
de Bahía Software, e Benito Carballo,
xerente de Proxectos de Altia.
A inauguración das xornadas correu
a cargo de reitor da USC, Juan Casares;
a decana da Facultade, Emilia Vázquez
Rozas e o presidente do CPEIG, Fernando
Suárez. Tamén participou Mar Pereira,
directora de AMTEGA, quen resumiu o
conxunto de medidas que está a levar a
cabo o Goberno galego a través da Axenda
Dixital 2014.gal, con vistas a “avanzar
cara unha Administración electrónica
capaz de ofrecerlle á cidadanía e ás empresas
uns servizos eficientes e próximos
mediante o emprego das TIC”.
Xa na recta final dos encontros, o presidente
do CPEIG salientou a calidade
dos relatorios e a afluencia de público,
con 140 inscritos, e indicou que “a Administración
electrónica permite non só un
avance da propia Administración, senón
un maior achegamento e apertura cara á
cidadanía”. Afondou nesta idea e indicou
que se trata dun verdadeiro medio de
comunicación co cidadán, que se converte
nunha “canle bidireccional na que
se pode solicitar información xeral e persoal,
ademais de enviar escritos, suxestións,
queixas ou calquera documento
electrónico”.
Suárez referiuse tamén na súa intervención
ás iniciativas Open Data e RISP,
que, ao seu ver, constitúen “elementos
xeradores de emprego e riqueza ao abrir
a posibilidade de oportunidades de negocio
para emprendedores que poden
crear novas aplicacións, servizos e produtos
en base a esta información“ neste
xeito, explicou que o CPEIG fai explícito
o seu apoio a estas iniciativas a través da
convocatoria do Primeiro Premio Open
Data.
I Premio Open Data
No acto de clausura o presidente do
CPEIG, Fernando Suárez, aproveitou
para, entre outras cousas, anunciar a
apertura da convocatoria do I Premio
Open Data da entidade que preside, un
evento dirixido a fomentar o coñecemento
e potenciar o espírito emprendedor na
nosa Comunidade. Suárez Lorenzo apuntou
na súa intervención que as iniciativas
Open Data e RISP, “constitúen oportunidades
de negocio para emprendedores,
que poden crear novas aplicacións, servizos
e produtos en base a esta información”,
polo que convoca a tódalas persoas
interesadas en participar a que presenten
as súas candidaturas antes do vindeiro 31
de maio. Segundo se indica na convocatoria,
“o futuro encamíñase na dirección
de modelos de negocio en liña que evolucionan
constantemente para satisfacer
a inmediatez e a personalización da demanda
actual”.
Malia todo, e decidan ou non proxectar
o negocio na Rede, as persoas interesadas
en participar neste evento poden facelo
nunhas xornadas que se celebrarán
no vindeiro mes de xuño en Santiago de
Compostela, e na que os emprendedores
terán a oportunidade de defender os
seus proxectos en público no marco do I
Premio Open Data.
A dotación do premio é de 600€ para o
proxecto gañador, 400€ para o segundo
clasificado e 200€ para o terceiro, que de
entrada xa lle virán moi ben ao emprendedor
que os leve, para dar o primeiro
paso firme na súa entrada ao mundo empresarial.
Fernándo Suárez, presidente do CPEIG, e Emilia Vázquez Rozas, decana
da Facultade de Económicas, na clausura da Xornada
sobre Administración Electrónica
Código Cero Número 106