Número 106 - Código Cero

REPORTAXE
ESPECIAL LETRAS GALEGAS
A INTERNET É NOSA
A Rede galega amosa múltiples maneiras de celebrar unha festa que
xa era propia, a do 17 de maio, e agora aínda máis
O Día das Letras galegas, este 17 de
maio, non é nin un día nin trata só de letras
galegas. Cómpre explicármonos: isto vén
a conto porque as celebracións pola nosa
cultura, e máis polo miúdo polo autor homenaxeado
este ano (Valentín Paz Andrade)
comezaron xa hai unhas cantas semanas e
seguirán desenvolvéndose unha vez que o
lector peche esta revista. Ademais, coincide
a celebración galega con moitas cousas a
nivel mundial que, lonxe de quitarnos protagonismo,
axúdannos a facer máis ruído.
O Día de Internet e o Día das Telecomunicacións
conflúen coas nosas letras, este
17 de maio, como unha oportunidade de
promoción do noso que vén moi a conto,
e, tamén, como unha oportunidade de reflexión
sobre as maneiras de sermos globais
e locais a un tempo, de sermos galegos e
internautas. É posible? Non só é posible,
é necesario. A continuación, damos conta
duns cantos de exemplo disto que estamos
a contar: a gran potencialidade que nos
achegan as redes para celebrar que somos
como somos, e ben está que así sexa. Iso
si, á listaxe de recursos web para informar
ao mundo das nosas Letras e dos nosos
autores, cómpre engadir a gran listaxe de
actos, manifestos, citas e mobilizacións do
máis variado que están programados estes
días para recordarnos que a lingua nunca
foi nin será incompatíbel coas redes e coa
mocidade, e que por moito que as estatísticas
nos boten abaixo
as esperanzas (segundo
o Instituto Galego de
Estatística máis do 60%
das nenas e nenos de
entre 5 e 14 anos falan en
castelán sempre), cómpre seguir aí, falando
no universo dixital coma se falaramos nos
barrios ou na aldea.
A CGENDL escolma na súa
web recursos educativos
sobre Paz Andrade
www.coordinadoraendl.org/letras2012
A Rede galega vaise enchendo estes días
de material sobre a festividade do 17 de
maio (Día das Letras Galegas e, tamén, Día
de Internet) e máis polo miúdo sobre Valentín
Paz Andrade, o autor homenaxeado este
ano. Entre o máis significativo que rexistramos
dende Código Cero atópase a guía
de recursos didácticos que vén da man da
CGENDL, a Coordinadora Galega de Equipos
de Normalización e Dinamización Lingüística.
Esta guía achega entre outras cousas
unha serie de pezas videográficas (vídeos,
enquisas, xogos, webquests, exposicións,
cronobiografías, albumes de fotos) sobre
Paz Andrade, a súa vida e a súa obra.
A guía en cuestión, con todo, forma parte
dunha achega máis ampla da Coordinadora.
En realidade, temos á nosa disposición, ao
acubillo da web do CGENDL, un máis que
completo feixe de recursos que nos van
permitir saber máis da figura homenaxeada
este ano e, por extensión, de todas aquelas
persoas
que loitaron
na
pasado
para que
hoxe
en día
podamos
gozar e
gabarnos
dunha
cultura
propia.
Segundo
sinala
o Consello da Cultura, cómpre
salientar nas achegas da Coordinadora
os moitos traballos de
raizame escolar que se recollen na
súa web, unha xanela á factoría de
creatividade tecnolóxico-cultural
que son os nosos colexios, e
tamén a arela práctica de ofrecer unha
escolma de ligazóns, bibliografías, unha
videoteca (documentais sobre Paz Andrade,
informativos, etc), unha fonoteca e máis
unha axenda de actividades a desenvolver
nos nosos centros escolares.
A Fundación Barrié propón un
webquest xornalístico entre os
estudantes
www.educabarrie.org
O Día das Letras Galegas, polo feito de
ser unha xornada cun gran compoñente
comunicativo e (tamén) por coincidir coa
celebración do Día de Internet (igualmente
o 17 de maio), ten un gran compoñente de
normalización do uso das redes. Un exemplo
deste emprego práctico e desta aposta
polo seu potencial de difusión é a iniciativa
que puxo en marcha a Fundación Barrié a
través da súa canle educativa educaBarrié e
que consiste nunha achega didáctica ao servizo
dos estudantes, que terán que amosar
o seu coñecemento arredor do escritor homenaxeado
este ano: o empresario, ensaísta
e poeta pontevedrés Valentín Paz Andrade.
A proposta da Fundación ten un compoñente
de divulgación (fálase na web polo
miúdo da vida e obra de Paz Andrade, do
que significou e do importante labor de
dinamización que desenvolveu no xornal
Galicia) e tamén de actividade lúdica. De feito,
ponse ao alcance da man dos estudantes
a oportunidade de darlle vida novamente
ao dito xornal, ao tempo que se lles convida
a amosar o seu potencial como xornalistas,
reporteiros ou até como escritores.
Nun plano concreto, a actividade en
liña que propón a institución é un encargo
especial para o devandito diario onde
haberá que incluír unha reportaxe ampla
sobre a figura do empresario e escritor
homenaxeado e máis información detallada
da nosa festa do 17 de maio. O traballo será
desenvolvido en grupo. Logo, os mellores
traballos serán enviados á dita web e participarán
no concurso: Valentín Paz Andrade e
o xornal Galicia, edición especial. O premio a
recibir será un e-book. O novo xornal Galicia
2012 está pensado para que se imprima en
A3 e se difunda de man en man, engade a
Fundación.
14 | Código Cero
Número 106