Procesverbal, datë 09.04.2013

HAPET MBLEDHJA
Edmond Spaho – Të nderuar koletë, sot në rendin e ditës kemi shqyrtimin e raportit të
Bankës së Shqipërisë për vitin 2012. Për të na paraqitur këtë raport ka ardhur zoti Ardian Fullani,
Guvernator i Bankës së Shqipërisë, zonja Elisabeta Gjoni, zëvendësguvernatore e parë dhe ekipi
i Bankës së Shqipërisë.
Mirë se erdhët në komision!
Zoti Fullani, ju lutem, na bëni një përmbledhje të aktivitetit të institucionit që drejtoni për
vitin 2012, si dhe objektivat e vitit në vazhdim.
Relator për këtë çështje është zoti Sybi Hida.
Zoti Fullani, urdhëroni!
Ardian Fullani - I nderuar zoti Kryetar i Komisionit,
Të nderuar zonja dhe zotërinj deputetë,
Dëshiroj ta filloj këtë takim, duke ju shprehur vlerësimin maksimal dhe respektin për
mundësinë e dhënë që, në emër të Bankës së Shqipërisë, t’ju bëj një pasqyrë të punës dhe
rezultateve të bankës qendrore gjatë vitit të shkuar. Por njëkohësisht ndihem vërtet i nderuar për
vlerësimin që ky komision më ka bërë ndër vite. Gjithashtu, ky takim shërben për të ndarë me ju
opinionet tona mbi zhvillimet më të fundit ekonomike e monetare, si dhe për të parashtruar disa
nga sfidat, të cilat sipas opinionit të Bankës së Shqipërisë meritojnë vëmendje në të ardhmen.
Që në fillim, dëshiroj të theksoj se Banka e Shqipërisë ka arritur të përmbushë detyrat e
saj ligjore, gjatë vitit 2012. Çmimet e konsumit kanë qenë të qëndrueshme, sikurse shprehet nga
një nivel mesatar inflacioni prej 2% gjatë vitit. Po kështu, shëndeti i sistemit financiar, në nivel
makro e mikroekonomik, është përmirësuar.
Këto dy objektiva madhorë të Bankës së Shqipërisë janë arritur pavarësisht ambientit të
pafavorshëm të brendshëm e të jashtëm, si dhe pavarësisht goditjeve që ka pësuar ekonomia
shqiptare gjatë kësaj periudhe. Përmbushja e tyre ka reflektuar në një masë të madhe politikën e
kujdesshme monetare të Bankës së Shqipërisë, si dhe masat rregullatore dhe politikën tonë
mbikëqyrëse të sistemit bankar. Ato janë favorizuar nga përmirësimi i vazhdueshëm i
infrastrukturës së pagesave financiare, nga operacionet e kujdesshme dhe eficiente të
administrimit të likuiditetit dhe nga komunikimi transparent me publikun. E gjithë puna jonë
është mbështetur nga përmirësimet cilësore në fushën e edukimit financiar të publikut, nga
3