Download - IDM Albania

HYRJE
Ky manual synon t’u vijë në ndihmë organizatave të shoqërisë civile
shqiptare që operojnë në zonat rurale dhe periferike si edhe gjithë grupeve
të interesuara të qytetarëve dhe aktorëve të tjerë, të cilët kërkojnë të bëhen
pjesë e përpjekjeve për të rigjallëruar dhe forcuar më tej rolin dhe ndikimin
e sektorit të tretë në këto zona.
Manuali përbën një nga produktet e Projektit “Fuqizimi i Shoqërisë Civile
në Zonat Rurale dhe Periferike për të Promovuar Qeverisjen e Mirë dhe
Zhvillimin”, i cili zbatohet nga Instituti për Demokraci dhe Ndërmjetësim
(IDM) me mbështetjen e Zyrës së PNUD-it në Shqipëri në katër qarqe të
vendit: Gjirokastër, Berat, Elbasan dhe Lezhë. Nisma synon të nxisë shoqërinë
civile në zonat rurale dhe ato periferike si dhe të kontribuojë në qeverisjen e
mirë, në angazhimin qytetar dhe në përafrimin me sfidat e integrimit në BE
nëpërmjet ndërtimit të kapaciteteve dhe fuqizimit të shoqërisë civile, duke
lehtësuar bashkëpunimin dhe partneritetin e ngushtë ndërmjet sektorit civil,
autoriteteve vendore dhe rajonale, dhe partnerëve të tjerë vendorë.
Kjo nismë përpiqet të nxisë aksionin e shoqërisë civile në këto zona si
edhe të promovojë qeverisjen e mirë dhe përfshirjen qytetare në zonat më
të papërkrahura dhe periferike të Shqipërisë duke synuar vendosjen e një
praktike të suksesshme, që do të shërbejë si platformë bazë për shtrirjen e
saj të mëtejshme në zona të tjera të vendit dhe më gjerë.
5