wt1247120930 n Tr 17

Dithero tsa Tirelano mo Kutlwanong
47/2012 Thero ka Sontaga o o 17 morago ga moletlo wa Borarobongwe, e le ka 30. 09. 2012
MO LEINENG LA MODIMO O E LENG RARA LE MORWA LE MOWA O O
1. Sefela sa 279 - 261/268
BOITSHEPO!
2. Thapelo: Modimo, Rara yo o mo legodimong, a puso ya gago e tle, e ate mo go rona mo
Borwa jwa Aferika! Re kopa jalo mo leineng la ga Jesu Keresete, Mopholosi wa rona.
Amen.
3. Epistolo ka fa thulaganyong ya 2 e kwadilwe mo go Baroma 10:9-18;
Efangele ka fa thulaganyong ya 1 e kwadilwe mo go Matheo 15:21-28.
4. A go ipolelwe tumelo ya bokeresete!
5. Sefela sa 221 - 206/215
6. Thapelo ya mmadi wa thero.
7. Efangele ka fa thulaganyong ya 5 e kwadilwe mo go Jesaya 49:1-6, le re: "Nkutlweng, lona
ditlhakatlhake, reetsang, lona merafe kwa kgakala! MORENA o mpiditse go tloga botsalong, a
bolela leina la me, mme a ise a mpelege. A dira molomo wa me jaaka tšhaka e e bogale, a
mphitlha mo moriting wa seatla sa gagwe; a ntira motsu o o tlhokotsegileng, a mphitlha mo
mokotlopong wa gagwe. A nthaya a re: 'O motlhanka wa me, Iseraele, yo ke ikgalaletsang ka
wena.' Mme nna ka re: 'Ke itapiseditse lefela, ka fedisetsa thata ya me boithamako fela. Mme
ruri tshiamelo ya me e mo MORENENG, tuelo ya me e mo Modimong wa me.' Mme jaanong go
bua MORENA yo o ntirileng motlhanka wa gagwe go tloga botsalong gore ke busetse Jakobe
kwa go ene, mme Iseraele a phuthegele kwa go ene - Ee, ke a tlotlega mo matlhong a MORENA,
mme Modimo wa me e ne ya nna thata ya me - a re: 'Ga go lekane, fa o le motlhanka wa me go
tsosa ditso tsa ga Jakobe le go busa ba ba bolokilweng ba Iseraele; le gona ke go dirile lesedi la
baheitane gore o nne pholoso ya me go fitlha kwa bokhutlong jwa lefatshe.'" Amen.
8. Thero: Barategi mo Moreneng wa rona Jesu Keresete, a re gakgamaleleng tumelo ya rona, re
leboge Modimo ka metlha ka ntlha ya gago, re kope ka metlha mo go Mowa o oBoitsehpo gore o
re tiise mo tumelong e e pholosang. Kgang e ntle eo e e itumedisang ka Jesu Keresete, ke raya
30. 09. 2012 / ka Sontaga wa 17 morago ga moletlo wa Borarobongwe - 1 - 47/2012

Efangele, e tabogile mo lefatsheng lotlhe, go ya e gorogile mo go rona, kwa Zulu, mo
Mathoseng, Bapedi, masarwa, le mo bathong mo merafeng e mentsi e e agileng mo Borwa jwa
Afrika. A go lebogwe Leina la Morena wa rona Jesu Keresete, gonne o setse a bonye le rona
gore le rona re utlwe pholoso e e tswang mo bopelotlhomoging jwa gagwe jo bo
baakanyeditsweng badumedi ba gagwe, ba pholosiwe, ba tshele mmogo le Morena wa barena mo
pusong ya gagwe, go ya bosakhutleng. Le kajeno Modimo o bitsa batho ka Lefoko la ona le le
reng: “Reetsang lona merafe kwa kgakala!” O ka re: Re ka dira moletlo wa thomo kajeno, re
leboge Modimo, gonne o re file Efangele la ona gore le rona re dumele mo go ona, ke raya rona
ba re tswang mo merafeng e e neng e le kgakala le Modimo.
Temana ya beke e re: “Tumelo ya rona ke yona phenyo e e fentseng lefatshe.” Ke nnete! Ka go
dumela mo Modimong o o Borarobongwe re ntshitswe mo dithateng tsotlhe tse di bosula tse di
lekang go re gatelela fa fatshe gore re tshele ka kgololesego fa pele ga Modimo o e leng Rara wa
rona yo o mo legdoimong. Ka tumelo eo ya rona re na letlhogonolo le legolo, re abetswe
boitshwarlo jwa dibe tsa rona ka loso lwa ga Jesu Keresete, Mopholosi wa rona, yo o neng a re
swela mo sefapaanong. Ka tumelo eo re fiwa phenyo e e fenyang lefatshe le le lekang go re
gatelele fa tlase ga thata ya lona, mme ka Jesu Keresete re fentse, ke gona re tshelang jaanong
mo kgololesegong e e boitshepo e e tswang mo Mopholosing yo e leng Morena wa rona yo o
nang le thata tsotlhe. A re se ka ra boifa dithata tse dingwe, gonne Morena wa rona o re abela
phenyo ya go fenya lefatshe.
Fa re leba Epistolo ya kajeno, le yona e godisa kgang eo ya tebogo ya Efangele mo lefatsheng
lotlhe, e le e e pholosang ka go dumela Lefoko la Modimo. “Fa o ipolela ka molomo o re: Jesu
ke Morena, o dumela ka pelo gore Modimo o mo tsositse mo baswing, o tla pholosiwa.”
Barategi, ka go dumela re a pholosiwa, gonne ka go dumela re ikanya Jesu Keresete gore ke
Mopholosi wa batho, wa baleofi. Lefoko la Epistolo e e kwadilweng mo lokwalong go Baroma e
tswelela, e re: “Tumelo e tla ka thero, thero yona e tla ka taelo ya ga Keresete.” Le mono mo go
rona mo Borwa jwa Aferika re utlwile mafoko a Morena a a biletsang pholosong. A re se ka ra
lebala kgakgamatso e kgolo. Ke tswa go batla leina la motho mongwe mo lokwalong lwa
phuthego e kgologolo. Nafthali Mtetwa o kolobeditswe ka 10 November 1901 kwa Umhlangeni.
Ke se segolo tota! Borraetsho ba ne ba bidiwa ke Modimo ka Lefoko la ona, ba kolobediwa gore
le bone ba tsene mo pusong ya Modimo, ba tshele mo morafeng o o boitshepo wa ona, ba
pholoswe, le dikokomana tsa bone di sa ntse di le teng, di sa ntse di dumela. A re lebogeng
Modimo, re lebogele pholoso ya rona.
30. 09. 2012 / ka Sontaga wa 17 morago ga moletlo wa Borarobongwe - 2 - 47/2012

Le mo Efangeleng ya kajeno re utlwile ka ga motho yo o neng a tswa kgakala, o ne a sa tswe mo
morafeng wa Modimo o o neng wa tlhaolwa ke Modimo gore a batlele morwadie thuso ya
Mopholosi wa batho. A re itumeleng le kajeno le ka malatsi otlhe ka pholoso ya rona, gonne pele
borraetsho ba ne ba le kgakala le morafe wa Modimo, mme jaanong re bana ba ona ka kolobetso
ka go dumela mo Mopholosing Jesu Keresete, Morwa Modimo.
Lefoko la thero ya kajeno le kwadilwe ke moporofeti Jesaya mo kgaolong ya 49. Modimo wa
roma baporofeti ba le bantsi le barongwa ba le bantsi mo morafeng wa rona gore ba rere, ba
bitse, ba goge morafe wa Modimo. Testamente e kgologolo e e boitshepo e tletse dikao tsa kgang
eo. Baporofeti ba le bantsi ba ne ba lapa mo tirong ya go bitsa morafe wa Modimo. Le Jesaya o
re bolelela kajeno, a re: “Ke itapiseditse lefela, ka fedisetsa thata ya me boithamako fela.” Ka
gongwe go na le baruti bangwe ba ba raelwang fela jalo ka nako nngwe, ka go sa bone thuso epe
mo tirong ya bone. Satane o rata barongwa ba Modimo ba ba lapang mo tirong ya go biletsa
batho mo Modimong, ka go kgalemela, le go kaela, le go gomotsa, le go tiisa morafe wa
Modimo. Ka ntlha ya moo o ba raela ka go ba tlhotlheletsa ka thaelo e e reng: Tsotlhe tse re di
dirang mo leineng la Morena mo bathong ga di thuse sepe. Mme Modimo ga o batle gore tiro ya
ona ya go pholosa batho e se ka ya dirwa, o a batla gore e dirwe. Ke ona o o reng: “Gonne
Lefoko la me le dira jaaka pula le semathana, di fologa kwa legodimong, di sa boele teng, mme
di nosa lefatshe, di le medisa, di le tlhogisa gore le nee mojwadi peo le moji bogobe; Lefoko la
me le le tswang mo molomong wa me le lone le tla nna jalo. Ga le kitla le boela kwa go nna le sa
dira sepe, mme le tla dira tse di nkgatlhang; le tla fetsa tse ke le di rometseng.” Lefoko leo ke
kgomotso e kgolo mo go botlhe ba e leng batlhanka, gongwe barongwa ba Modimo. Modimo o
fa Lefoko la ona thata le kgono.
Modimo o roma ka meltha batho mo tirong ya ona gore batho ba tlhabologe, ba pholosiwe. Re
itse kgang ya go laletsa batho gore ba tle mo moletlong wa lenyalo, mme fa ba ne ba ipata bale,
Modimo o ne a sa batle gore nama e ntle e e baakantsweng e bole, gongwe bojalwa bo senyege,
o ne a laletsa ba bangwe mo boemong jwa ba ba neng ba lalediwa pele gore ba amogele tse di
baakantsweng. Fa batho ba ntlha ba sa rate go atamela mo go ona o e leng Mong-wa-thata-
yotlhe. Modimo o laletsa ba bangwe. Le kajeno Morena o roma batlhanka ba gagwe gore batho
ba rerelwe Lefoko la gagwe.
Lefoko la Modimo le tshwana le dipolai tse di bogale, le dira tota. Mo go Bahebere 4 re buisa
Lefoko le le tshwayang sentle bogale le thata ya Lefoko la Modimo, lefoko leo le re: “Gonne
Lefoko la Modimo le a tshela, le a dira, le bogale go feta tšhaka nngwe le nngwe e e magale
mabedi; le a phololela, le ba le kgaoganya botshelo le mowa le malokololo le moko, le atlhole
30. 09. 2012 / ka Sontaga wa 17 morago ga moletlo wa Borarobongwe - 3 - 47/2012

dikakanyo le maikutlo a pelo.” Moporofeti Jesaya o ne a dirisa tšhaka eo. Lefoko la Modimo ke
sediri sa ona go fetsa tiro ya ona e re e amogetseng mo Modimong. Le ene Jesaya ka nosi e ne e
le tšhaka ya Modimo, gonne lefoko la thero ya kajeno le re: “MORENA a dira molomo wa me
jaaka tšhaka e e bogale, e mphitlha mo moritng wa seatla sa gagwe, a ntira motsu o o
tlhokotsegileng, a mphitlha mo mokotlopong wa gagwe.” A re gopoleng gore Modimo ga o nke
wa khutla go dirisa didiri tsa ona ka ntlha ya manganga a batho, gongwe ka ntlha ya bothata jwa
dipelo tsa batho, le e seng ka ntlha ya batlhanka ba ona ba ba sa rateng go dira, gongwe ka ntlha
ya batho ba ba sa rateng go reetsa, Modimo o tla tsweledisa tsamaiso ya Efangele ya ona mo
lefatsheng kwa o ratang teng.
Fa batho ba ba gaufi ba lapa go utlwa Lefoko la ona, go direlwa ke Modimo, Modimo o tla bitsa
batho ba ba kgakala, wa re: “Nkutlweng, lona ditlhakatlhake, reetsang, lona merafe kwa
kgakala!” A re tlhokomelng Lefoko leo, re le utlwe ka pelo e e bonolo, re utlwe sentle Lefoko la
Morena wa rona. Modimo o a bitsa, o a laletsa, o rata go ratisa batho le kajeno gore ba
tlhabologe, ba tle go ona, ba tshele. Modimo ga o lape go bitsa batho, go ba biletsa mo
tlhabologong le mo pholosong. Puso ya ona a e ate mo lefatsheng! Tota e ata le kajeno mo go
rona kwa re tshelang teng. Ka metlha kwa Lefoko le rerelwang teng le go abelwa disakaramente
teng puso ya ona e a ata. “Gonne Lefoko le disakaramente ke didiri tse Modimo o nayang Mowa
o o Boitshepo ka tsona. Ona o bopa tumelo, fa Modimo o ratang teng, le ka nako e o ratang ka
yona.”
Ga go na motho mo lefatsheng, le e seng motlhanka gongwe morongwa wa Modimo yo o
tshwanang le Morwaaona Jesu Kerseete, yo e leng motho, a tsamaya mo lefatsheng, e le
Motlhanka wa Modimo. Modimo o itumiseditse mo go ene ka tsela e e gakgamatsang mo
sefapaanong, ka loso le ka tsogo ya ga Jesu Keresete. Le kajeno re utlwa Lefoko la ona mono mo
tirelong.
Modimo o ne wa bitsa ka metlha morafe wa ona, morafe o o tlhaotsweng, morafe o monnye,
morafe o o boitshepo, morafe wa Iseraele. Le Jesu Keresete ka nako, fa a ne a tsamaya mo
lefatsehng ka dinao tsa motho, o ne a rongwa go batla batho ba morafe wa Iseraele pele. Re
utlwile jalo le kajeno ka Efangele e e reng: “Ga ke a rongwa, fa e se kwa dinkung tse di
latlhegileng tsa ntlo ya Iseraele.” Mo Lefokong la thero ya kajeno re utlwa le se sengwe.
Modimo o biditse le batho ba merafe e mengwe gore ba tsene le bone mo pusong ya ona. Kajeno
re itumela rona ba re neng re le kgakala tota le morafe wa Iseraele, gonne le bagaetsho ba
amogetswe le bone go utlwa Lefoko la Mopholosi, ba tsenngwa le bone go tsalwa sešwa mo
kolobetsong, ba tsenngwa le bone go dumela mo Modimong wa nnete, o o Borarobongwe, Rara
30. 09. 2012 / ka Sontaga wa 17 morago ga moletlo wa Borarobongwe - 4 - 47/2012

wa rona o o mo legodimong, le Jesu Keresete Morwaaona, le Mowa o o Boitsehpo. A re
laletseng, re bitse le ba bangwe ba ba sa ntseng ba le kgakala gore le bone ba tsene, ba pholosiwe
ke Jesu Keresete. Modimo o tla ba atametsa mo go rona, ba le bantsi ba ba tswang kgakala le
kajeno go batla tiro mo Lefatsheng la Aferika Borwa, a re se ka ra ba tima Efangele, kgang e ntle
e e itumedisang, kgang ya pholoso ka Jesu Keresete Mopholosi wa batho botlhe. Amen.
9. Thapelo: Rara wa rona yo o mo legodimong, re a go leboga, ka o re rometse Batlhanka
ba gago gore ba re bolelele Efangele ya ga Morwao Jesu Keresete, Mopholosi wa rona. O
re abele Mowa o o Boitsehpo wa gago gore re tlhoafalele le rona go fetisetsa Lefoko la
gago mo go ba bangwe, re ba bolelele gore ba tlhabologe, ba tshele mmogo le rona mo
pusong ya legodimo, Re kopa jalo mo leineng la ga Jesu Keresete, Mopholosi wa rona.
Amen Thapelo ya Morena: Rara wa rona yo o mo legodimong ...
10. Sefela sa 216 - 201/212
A kagiso ya Modimo e e fetang tlhaloganyo yotlhe e boloke dipelo tsa rona le maikutlo a rona
mo go Keresete Jesu, Morena, Morepholosi. Amen.
Thero eno e kwadilwe ke P. C. Weber,ka ngwaga wa 2012
Kgatiso le go rongwa ga dithero tseo go tshegediwa ke kopano e e bidiwang The Lutheran Heritage Foundation.
30. 09. 2012 / ka Sontaga wa 17 morago ga moletlo wa Borarobongwe - 5 - 47/2012