Dithero tsa Tirelano mo Kutlwanong Thero ka Sontaga o o bidiwang ...

Dithero tsa Tirelano mo Kutlwanong
Thero ka Sontaga o o bidiwang Judika, e le ka 17. 03. 2013 18/2013
MO LEINENG LA MODIMO O E LENG RARA LE MORWA LE MOWA O O
BOITSHEPO!
1. Sefela sa 216 - 201/209
2. Thapelo: Modimo Rara, re a go leboga, ka o atlhotse gore Morwao Jesu Keresete a re
swele, a re baakanyetse pholoso e e sa khutleng ka go re swela mo sefapaanong. O re
thuse gore re amogele katlholo ya gago ka tumelo, re be re go leboge ka metlha ka
ntlha ya tsotlhe tse re di direlwang ke Morwao yo o rategang ka go re itshwarela
maleo a rona ka malatsi otlhe, le ka go phutha bana ba gago ba ba faladitsweng mo
merafeng yotlhe, ka go ba kopanya mo phuthegong ya gagwe. A o ko o tsweledise
tiro eo ya go phuthela phuthego ya gagwe mo kerekeng ya gago. O re utlwe ka ntlha
ya ga Keresete. Amen.
3. Epistolo ka fa thulaganyong ya 2 e kwadilwe mo go Bahebere 5:7-9;
Efangele ka fa thulaganyong ya 1 e kwadilwe mo go Mareko 10:35-45.
4. A go ipolelwe tumelo ya bokeresete!
5. Sefela sa 110 -102/105
6. Thapelo ya mmadi wa thero.
7. Efangele ka fa thulaganyong ya 5 e kwadilwe mo go Johane 11:47-53, e re: "Jaanong
baperesiti ba bagolo le Bafarisai ba tsenya lekgotla le legolo ba re: 'Re ka dirang, ka
monna yoo a dira ditshupo tse dintsi? Fa re ka mo leseletsa jalo, botlhe ba tla
dumela mo go ene, mme Baroma ba tla tla, ba re amoga lefatshe le morafe.' Mongwe
wa bone, e bong Kaifase yo e neng e le moperesiti yo mogolo ka ngwaga oo, a ba
raya a re: 'Lona ga lo itse sepe, le gona ga lo akanye, fa go le molemo mo go lona gore
motho a le mongwe fela a swele morafe, mme go se ka ga latlhega morafe otlhe.' Fela
a se ka a bua jalo ka bogagagwe, mme e rile ka e ne e le moperestiti yo mogolo ka
ngwaga oo, a bolelela-pele gore Jesu o tla swela morafe; e seng morafe oo fela, mme
le gona e le gore a phuthe bana ba Modimo ba ba faladitsweng, a ba kopanye. Go
tloga ka letsatsi leo ba bo ba dumalanye gore ba mmolae." Amen.
17. 03. 2013 / ka Sontaga o o bidiwang Judika - 1 - 18/2013

8. Thero: Baratwa mo Moreneng wa rona Jesu Keresete, Jesu o tshwanetse go swa.
Moperesiti yo mogolo, e bong Kaifase, mmogo le lekgotla le legolo la Bajuta o ne a
atlhola jalo. Ba dumalanye gore a bolawe. Modimo Rara o ne a atlhola fela jalo. Jesu a
neelwa losong ka maikaelelo a a beilweng ke Modimo, le ka kitsetso-pele ya ona, a
bapolwa, a bolawa ka diatla tsa baikepi, Ditiro 2:23. Mme fela re tshwanetse go
tlhatlhoba gore boKaifase ba ne ba atlhola jalo ka ntlha ya mabaka le ka ntlha ya
maikaelelo a a ntseng jang, mme Modimo o atlhotse jalo ka ntlha ya mabaka le ka
ntlha ya maikaelelo a a ntseng jang? Ka tlhatlhobo e e ntseng jalo go tla bonala
pharologanyo e kgolo.
1. Ke ka ntlha ya eng, fa boKaifase le lekgotla le legolo la Bajuta ba atlhotse, ba
dumalanye gore ba bolaye Jesu? Re utlwa karabo ya potso eo mo Efangeleng eo e e
leng Lefoko la thero ya kajeno, ya Sontaga o o bidiwang Judika, o e leng Sontaga o o
kopang gore Modimo o re senolele katlholo ya ona, o e bileng e le Sontaga o o
supang pharologanyo e kgolo e e leng teng fa gare ga dikatlholo tsa batho, le
katlholo ya tshiamo ya Modimo. Re utlwa mo Efangeleng eo ya thero ya kajeno gore
Bajuta ba ne ba atlhola gore Jesu o tshwanetse go swa, ba sena go utlwa gore Jesu o
tsositse Lasaro mo losong. Ya re Lasaro a sena go tsosiwa mo losong, bangwe ba ne
ba ya kwa Bafarisaing, ba ba bolelela tse Jesu a di dirileng. Ke fa baperesiti ba bagolo
le Bafarisai ba epa pitso ya lekgotla le legolo la bone. Go a itsiwe gore pitso ya
lekgotla le legolo la bone e ne ya epiwa fela ka ntlha ya kgang e e setlhogo. Ke gore
ba ne ba kaya tse di dirilweng ke Jesu, fa e le tse di kotsi tota, fa e le tse di tla ba
senyetsang lefatshe le morafe wa bone, thata le boipuso jwa bone. Ke gona re
utlwang gore ya re ba epa pitso ya bone, ba botsanya, ba re: "Re ka dirang, ka monna
yoo a dira ditshupo tse dintsi? Fa re ka mo leseletsa jalo, botlhe ba tla dumela mo go
ene, mme Baroma ba tla tla, ba re amoga lefatshe le morafe." Ke sona se ba se
boifileng, ba boifa gore ba tla latlhegelwa ke thata ya bone. Ke ka ntlha ya moo, fa ba
ne ba atlhola gore Jesu a bolawe.
Go a gakgamatsa go bona gore ba leka go iphemela, le go femela lefatshe la bone le
morafe wa bone ka go bolaya Jesu. Jesu a tla go ba thusa, a tla go ba baakanyetsa
pholoso le kgololo. A fodisa balwetse, a kgarameletsa mewa e e bosula kwa ntle, a
tsosa baswi, a ba rerela thato ya Modimo, a ba tlisetsa puso ya Modimo, mme ba ne
ba boifa gore ka ntlha ya gagwe bone ka bosi ba tla latlhegelwa ke tlotlo mo bathong,
le maemo a bone a go busa ka fa dikatlholong tsa bone. O ka re: Fano ba ne ba
17. 03. 2013 / ka Sontaga o o bidiwang Judika - 2 - 18/2013

utlwana le Satane. Le ene o ne a ganetsa Jesu, a batla go mo faposa mo tseleng ya
gagwe, a leka gore ene a tlogele tsela ya go baakanyetsa batho pholoso ka go utlwa
Rraagwe, a itirele senkgwe ka majwe, a itire go nna kgosi e e nayang batho dijo, a
ipatlele kgalalelo fa pele ga batho, le thata ya go busa mo lefatsheng, ka go nna ngaka
fela e e alafang, e e fodisang malwetse, e se nne Mopholosi yo o baakanyetsang batho
manno a mantle mo kgalalelong ya legodimo. Ka Jesu e le ene yo baganetsi ba gagwe
ba mmoifang, ba leka go iphemela mo go ene ka go mo tlosa. Ke fa ba atlhola gore a
bolawe. Ke gore katlholo ya bone e laotswe ka poifo ya bone, ka letlhoo la bone, ka
boithato jwa bone.
2. Mme Modimo Rara o atlhotse gore Jesu a bolawe, a swele mo sefapaanong ka
ntlha ya mabaka a mangwe, le ka ntlha ya maikaelelo a mangwe. Modimo Rara e bile
o dirisitse Kaifase gore a bolelele mabaka ao a ona, le maikaelelo ao a ona. Kaifase a
re: Go molemo gore motho a le mongwe fela a swele morafe, mme go se ka ga
latlhega morafe otlhe, a bolelela-pele "gore Jesu o tla swela morafe; e seng morafe oo
fela, mme le gona e le gore a phuthe bana ba Modimo ba ba faladitseng, a ba
kopanye." Fano re utlwa gore Modimo o rometseng Morwaaona mo lefatsheng ka
ntlha ya mabaka afe, le ka ntlha ya maikaelelo afe. Modimo ga o a ka wa batla gore
morafe wa ona o latlhege, ga o a batla gore batho ba merafe e mengwe ba latlhege,
mme o ratile lefatshe mo go kalo, wa ba wa neela Morwaaona mo losong gore batho
ba merafe yotlhe ba baakanyediwe pholoso, ba phuthelwe mo pusong ya Modimo,
ba kopanngwe mo kerekeng, e nne batho ba Modimo, ba gololwe mo maleong a
bone, le mo thateng ya loso, le mo thateng ya ga Satane. Morena Jesu a ba lefele
melato ya bone, a ba ntshetse tetlanyo le thuanyo e e letlanyang, le go re ruanya le
Modimo Rara, e e phimolang bogale jwa Modimo. Modimo Rara o setse a boleletse
pele ka baporofeti ba Testamente e kgologolo gore Morwaaona e nne Kwana e e
tlang go tlosa boleo jwa lefatshe. Jesu ka esi o ne a itse gore o tshwanetse go swa
gore a kgone go dirafatsa maikaelelo a ga Rraagwe, le a gagwe, a re: "Fa tlhaka ya
mabele e sa wele mo mmung ya swa, e tla nna e le yosi; mme fa e swa, e ungwa
leungo le legolo." Ke ka ntlha ya moo, fa go ne go atlhotswe ke Modimo gore Jesu a
bolawe, a dirafatse maikaelelo a ona gore batho ba baakanyediwe pholoso, Jesu a
lefe melato ya maleo a batho ba merafe yotlhe, a swele morafe, a be a swele merafe
yotlhe gore batho ba merafe ba se ka ba latlhega, mme ba nne le botshelo jo bo sa
khutleng. Ke gona Modimo o atlhotseng gore Jesu a swe.
17. 03. 2013 / ka Sontaga o o bidiwang Judika - 3 - 18/2013

Katlholo eo ya Modimo ya laolwa ke lorato lwa ona, ya laolwa ke maikaelelo a
mantle a ona a gore batho ba phuthwe, ba kopanngwe, ba nne letsomane le le
lengwe fela.
Ke gona re tshwanetseng go itlhatlhoba gore tota-tota rona re reng ka ga Jesu? A re
tshwana le boKaifase, le ba lekgotla le legolo la Bajuta ba ba lekileng go tlosa Jesu ka
go mmolaya gore a se ka a nna le thata mo gare ga bone? Gongwe re amogela
maikaelelo a mantle a katlholo ya Modimo? Kana Modimo o rata ka pelo yotlhe gore
mongwe le mongwe wa rona a lemoge gore tota-tota Jesu o ne a atlholelwa loso, a
swela mo sefapaanong gore rona le batho botlhe re nne le thuanyo le tetlanyo fa
pele ga Modimo, maleo a rona a phimolwe, melato ya rona re e duelelwe, re se
latlhwe, re se latlhelwe mo moleteng wa molelo, mme re itshwarelwe maleo a rona
mo leineng la ga Jesu, re phuthelwe mmogo le bana botlhe ba Modimo mo
phuthegong ya ga Jesu Keresete le mo pusong ya Modimo, re baakanyediwe manno
a mantle mo kgalalelong ya legodimo. Ke re: Re dumalanye rotlhe gore katlholo ya
Modimo e siame tota. Ga go na phoso ka yona. Ke katlholo e e re baakanyeditseng
pholoso le botshelo jo bo sa khutleng. Ke ya lorato lo logolo lwa go rata mongwe le
mongwe wa rona. A re e amogeleng ka tumelo le ka tebogo! Amen.
9. Thapelo: Morena, Modimo, Rara yo o mo legodimong, re a go leboga, ka o re
atlholetse ka katlholo ya lorato lo logolo, wa romela Morwao mo lefatsheng le mo
losong gore rona re gololwe mo losong, le mo botlhankeng jwa ga Satane, le jwa
boleo. O re thuse gore mongwe le mongwe wa rona a itumelele kgololo eo e re e
baakanyeditsweng ke Jesu, re ineele mo katlholong ya gago ka boikokobetso jotlhe,
re lemoge gore rona re ne re sa kgone go ituelela melato ya rona, mme re amogele
ka tumelo le ka tebogo, fa Jesu a re ntsheditse thuanyo. O amogele thapelo ya rona
ka ntlha ya gagwe Jesu Keresete, Moreswedi, yo o atlholetsweng loso gore rona re
tshele. Amen. Thapelo ya Morena: Rara wa rona yo o mo legodimong ...
10. Sefela sa 113 - 106/102
A kagiso ya Modimo e e fetang tlhaloganyo yotlhe e boloke dipelo tsa rona le
maikutlo a rona mo go Keresete Jesu, Morena, Morepholosi. Amen.
Thero eno e kwadilwe ke E. A. W. Weber, ka ngwaga wa 1995/2001/2007
Kgatiso le go rongwa ga dithero tseo go tshegediwa ke kopano e e bidiwang The Lutheran Heritage Foundation.
17. 03. 2013 / ka Sontaga o o bidiwang Judika - 4 - 18/2013