wz1238120729 n Tr 8

IziNtshumayelo zokuSebenzelana ekuZwaneni
Intshumayelo ngesonto 08 emva komkhosi wobuThathwemunye, ngomhla ka
29. 07. 2012 38/2012
Egameni likaNkulunkulu onguYise, neNdodana + noMoya oNgcwele.
1. Iculo 123/ 140
2. Umkhuleko: Nkosi Nkulunkulu othandekayo, siyakunxusa ukuba ube nathi
ngezikhathi zonke. Ngezikhathi zobunzima, nangezikhathi zenhlupheko nezezilingo.
Sifundise, Nkosi, ukuba silalele izwi lakho eliphilisayo, nokwazi ukuthi ngoKristu sahlengwa
thina ezonweni zethu. Yiba nathi, Baba onomusa nobubele. Amen.
3. Iphistola ngohlelo lwesibili lilotshiwe kwabase-Efesu 5:8b-14;
Ivangeli ngohlelo lokuqala lilotshiwe kuMathewu 5:13-16.
4. Isivumo senkolo: Ngiyakholwa nguNkulunkulu uYise ...
5. Iculo 125/ 142
6. Umkhuleko wakhe ofundayo intshumayelo
7. Iphistola ngohlelo lwesine lilotshiwe ku-1 kwabaseKorinte 6:9-14.18-20, lithi: “Kepha
kanazi yini ukuthi abangalungile abayikulidla ifa lombuso kaNkulunkulu na? Ningadukiswa.
Nazifebe, nabakhonza isithombe, naziphingi, nazihlobongi, nabesilisa abalalanayo,
namasela, nabahahayo, nazidakwa, nazithuki nabaphangi abayikulidla ifa lombuso
kaNkulunkulu. Bebenjalo abanye kini, kepha senahlanzwa, senangcweliswa, senalungisiswa
ngegama leNkosi uJesu Kristu nangoMoya kaNkulunkulu wethu. Konke kuvunyelwe kimi,
kepha akusizi konke. Konke kuvunyelwe kimi, kepha mina anginakubuswa-lutho. Ukudla
kungokwesisu, nesisu singesokudla; kepha uNkulunkulu uyakuqeda kokubili. Kepha
umzimba asiwo owobufebe, ungoweNkosi, neNkosi ingeyomzimba; kepha uNkulunkulu
wayivusa iNkosi, nathi uyakusivusa ngamandla akhe. ... Balekelani ubufebe. Zonke izono
azenzayo umuntu zingaphandle komzimba; kepha owenza ubufebe wona owakhe umzimba.
Kepha anazi yini ukuthi umzimba wenu yithempeli likaMoya oNgcwele okinina, enimamukele
kuNkulunkulu kokuthi anisibo abenu na? Ngokuba nathengwa ngenani elikhulu. Ngakho-ke
mbongeni uNkulunkulu emzimbeni wenu.” Amen.
29. 07. 2012 / ngesonto 08 emva komkhosi wobuThathwmunye - 1 - 38/2012

8. Intshumayelo: Bandla elithandekayo leNkosi yethu uJesu Kristu, namhla kulisonto
lesishiyagalombili emva komkhosi wobuThathwemunye. UNkulunkulu uBaba onomusa
uthanda ukuba asixwayise namhla ngezono zethu. Ngokunjalo uNkulunkulu uthanda ukuba
sazi ukuthi noma siyizoni kepha akathandanga ukusilahla ngenxa yezono zethu, kepha
wathumela iNdodana yakhe ukuba isihlenge ezonweni zethu. Umphostoli uPawulu uyasiyala
ukuba singakhohliswa yizinto zezwe, kodwa sibheke kuKristu yena ongumqali nomphelelisi
wezimpilo zethu. Izwi lanamuhla lithi: Masingadukiswa, kodwa sibambelele ezwini elithi!
1. Abangalungile abayikulidla ifa lombuso wezulu.
2. Kepha sahlanzwa, sangcweliswa, salungisiswa ngegama likaKristu.
3. Umzimba wethu uyithempeli likaMoya oNgcwele;
4. UJesu Kristu wasithenga ngegazi lakhe elinenani elikhulu
Ngakho masimbonge uNkulunkulu emizimbeni yethu.
1. Bathandekayo eNkosini, izwi likaNkulunkulu likubeka ngokuchachileyo ukuthi
abangalungile abayikulidla ifa lombuso kaNkulunkulu. Abangalungile ngabanjani na? Izwi
likaNkulunkulu kaningi liyabeka ngokusobala ukuthi abangalungile ngabanjani. Uma singenzi
lokhu okushiwo nguNkulunkulu, asibona abalungile phambi kobuso bakhe. Umyalelo
wesithupha usikhumbuza njalo ukuthi simelwe ukuba siziphathe kanjani. Iziphingi, izifebe,
izihlobongi, izidakwa nabakhonza izithombe yibona abangalungile, abangayikulidla ifa
lombuso kaNkulunkulu. Ngakho-ke masingadukiswa yilezi zilingo. Kepha zonke lezizono
ziphenduka zibe onkulunkulu kithina. Futhi ngazo lezizono kuvela izifo zezinhlobonhlobo,
ezihlukumeza umzimba, maqede kuvele ukufa. Konke lokhu kwenzeka kuwo umzimba
oyithempeli likaMoya oyiNgcwele. Ngakho-ke uma senza lezizono sisengozini yokukhishwa
embusweni kaNkulunkulu. Ngokunjalo futhi asimelwe ukuba sidukiswe, noma sikhohliswe
ngalezizono.
2. UJesu Kristu ukhona ngezikhathi zonke phakathi kwethu. Ongathi akekho phakathi
kwethu, ngabe ukhuluma iphutha. Uma sibheka umusa nothando olwavezwa kithina
esiphambanweni ngokufa kukaKristu, nokuthi wasimela phezu kokuba siyizoni phambi
kukaNkulunkulu. Esiphambanweni kulapho sahlanzwa khona ezonweni zethu, nanamuhla
uJesu usasimemela kukho ukuthethelelwa kwezono. Igazi likaKristu yilona elahlanza thina
29. 07. 2012 / ngesonto 08 emva komkhosi wobuThathwmunye - 2 - 38/2012

ezonweni zethu. Lokhu kungumusa kaKristu nothando uBaba wethu osezulwini asithanda
ngalo. Ngakho uKristu akagcinanga ngokusihlenga kuphela, kodwa wasingcwelisa ngomusa
wakhe ukuba siphile impilo ehlanzekile. Kusho ukuthini kithi, uma siphila impilo engeyona
lena uKristu athanda ukuba siphile yona na? Uma singaphili lempilo, sisengozini
yokukhishwa embusweni kaNkulunkulu.
3. UKristu ukhuluma ngomzimba oyithempeli likaMoya oNgcwele. Sizokhumbula ukuthi
kwasuka umsindo omkhulu phakathi kukaKristu kanye namaJuda. Uma ekhuluma
ngethempeli elingenziwanga ngezandla, kepha ngethempeli elingumzimba wakhe.
Wahlukunyezwa uKristu ngenxa yalawo mazwi, walinyazwa ngokunjalo, wabethelwa
esiphambanweni. Yilo lelithempeli akhuluma ngalo nanamuhla ithempeli elingumzimba
wakhe. Uma sona ngemizimba yethu, asoni kithina kuphela, kepha nakuye uNkulunkulu.
UNkulunkulu wasidala thina ngomfanekiso wakhe, kungani siphile impilo esingagunyaziwe
ukuba siyiphile na? Uma siphila impilo enjalo, sisengozini yokukhishwa embusweni
kaNkulunkulu. UJesu Kristu usasimema nanamhla ukuba sisondele kuye, ngoba thina
siyithempeli lakhe. Futhi nguye obusa lelithempeli thina ngokwethu asinamandla okulibusa.
4. Igazi likaKristu elaphalaza esiphambanweni, kwakungelona igazi nje, kodwa igazi
elinenani elikhulu. Lalingekho igazi elalingahlanza izono zethu ngenxa yobubi bethu.
ElikaKristu kuphela igazi elabanamandla okuthenga ububi bethu. Ake sibheke umusa ongaka
esawenzela iNkosi yethu. Sasingahlanganisile lutho noKristu embusweni wakhe, kodwa
ngesihawu sakhe, saphiwa intethelelo yezono. Muhle umusa kaKristu noma abanye bebona
sengathi uyize, kepha imisebenzi kaKristu iyabonakala phakathi kwethu. Futhi thina
esingamaKristu sazuza ngalomsebenzi singacelwanga ukuba sibambisane noKristu. Ngoba
ngemvelo yethu sasingebone abantu bokubambisana naye kulomsebenzi wokuhlengwa,
kepha uyena onegunya nophiwe amandla okwenza lomsebenzi. Ngakho-ke masingadukiswa
yizwe ezenzweni zobumnyama, kepha masazi ukuthi thina imizimba yethu iyithempeli
likaNkulunkulu.
Sengathi uNkulunkulu wethu osithanda sonke angasigcina njalo thina esiyizoni ukuba sazi
ukuthi nguye owasihlenga nosasihlenga namanje ezonweni zethu. Sazi ukuthi thina
asiziphileli thina, kepha owasifelayo esiphambanweni. Amen.
9. Umkhuleko: Baba wethu osezulwini, sesizwile izwi lakho, yandisa njalo izwi lakho
ezinhliziyweni zethu. Makuthi nalabo abangakaliqondi nabaphikisana nalo uthumele uMoya
wakho oNgcwele ukuba ukhanyise izinhliziyo zalabo abaphikisana nezwi lakho. Thina siyazi,
29. 07. 2012 / ngesonto 08 emva komkhosi wobuThathwmunye - 3 - 38/2012

Baba othandekayo, ukuthi ngaphandle kwakho singenze lutho, konke esikwenzayo,
kungumusa wakho kuphela. Silondoze njalo, Mninimandla onke, sifundise ukuphila impilo
ehlanzekile. Sazi nokuthi thina siyithempeli likaMoya oNgcwele. Konke lokhu sikucela
egameni leNdodana yakho ethandekayo uJesu Kristu obusayo manje naphakade. Amen.
Umkhuleko weNkosi: Baba wethu osezulwini ...
10. Iculo 122/139
Ukuthula kukaNkulunkulu odlula ukuqonda konke makulondoloze izinhliziyo zethu
nemicabango yethu kuKristu Jesu, iNkosi noMsindisi wethu. Amen.
Lentshumayelo ilotshiwe ngo-2006 ngu-W. Maphalala (✝)
Ukucindezelwa nokuthunywa kwezintshumayelo kuyasekelwa yinhlangano ethiwa: Lutheran Heritage Foundation.
29. 07. 2012 / ngesonto 08 emva komkhosi wobuThathwmunye - 4 - 38/2012