Dithero tsa Tirelano mo Kutlwanong 51/2012: Thero ka moletlo wa ...

Dithero tsa Tirelano mo Kutlwanong
51/2012: Thero ka moletlo wa go gopola ntšhwafatso ye kereke, e le ka 28. 10. 2012
MO LEINENG LA MODIMO O E LENG RARA LE MORWA LE MOWA O O
BOITSHEPO!
1. Sefela sa 186 - 172/179
2. Thapelo: Morena Jesu Keresete, wena yo o re golotseng mo diketaaneng tsa molao, re a
go leboga. Re ikutlwa ka tsholofetso ya gago gore re gololesegile ka tumelo ka gore thata ya
molao le loso ga e tlhole e le teng mo go rona, gonne wena ke yo o o fentseng gore re se tlhole re
leka go atlholelwa tshiamo ka go tshegetsa dithutlaganyo tse di tshwanang le bogwera. O re
thuse, re nneele ruri ka go itshwarelela mo tsholofelong e e reng, re atlholelwa tshiamo ka thata
ya Mowa o o Boitsheo ka katlholo ya go itshwarelwa maleo a rona, le go balelwa tshiamo ya ga
Keresete ka bopelotlhomogi, e seng ka sepe se sengwe. Amen.
3. Epistolo ka fa thulaganyong ya 2 e kwadilwe mo go Baroma 3:21-28;
Efangele ka fa thulaganyong ya 1 e kwadilwe mo go Matheo 5:2-12.
4. A go ipolelwe tumelo ya bokeresete!
5. Sefela sa 183 - 169/-
6. Thapelo ya mmadi wa thero
7. Epistolo ka fa thulaganyong ya 4 e kwadilwe mo go Bagalata 5:1-6, e re: "Keresete o re
gololetse kgololesego; tlhomamang he mo go yona, mme lo se ka lwa golegwa gape ka joko ya
botlhanka. Reetsang, nna Paulo ke lo raya ke re: Fa lo ka rupa, Keresete o tla bo a sa lo thuse
sepe. Ke bolelela gape motho mongwe le mongwe yo o rupang ke le mosupi gore o tshwanetse
go dirafatsa molao otlhe. Lona ba lo ratang go siamisiwa ka molao, lo kgaoganye le Keresete, lo
ole mo boitshwarelong. Gonne rona re lebeletse se se solofelwang sa go siamisiwa ka Mowa le
ka tumelo. Kana mo go Keresete Jesu go rupa le go sa rupeng ga go thuse, go thusa tumelo fela e
e itshupang ka lorato." Amen.
8. Thero: Ditsala tsa tse di rategang, kajeno re dira moletlo o mogolo wa kereke ka go gopola
ntšhwafatso ya kereke mo ngwakgolong ya lesome le metso e le merataro (16 th century). Ka
nako eo go ne go na le dithuto tse dintsi tse di neng tsa rutwa mo kerekeng ya mopapa. Ka sekao
28. 10. 2012 / ka moletlo wa go gopola ntšhwafatso ya kereke - 1 - 51/2012

e a gopola gore go ne go na le go rapela baitshepi ba ba sa tlholeng ba le teng, go tsamaela
mafelo a a boitshepo, le go rapela mo go ona, go leba ditshwantsho tsa baitshepi, go reka
dikwalo tsa teseletso, le tse dingwe tse di ntseng jalo. Ka ditiro tsotlhe tseo ga ikaelelwa go
ratega mo sefatlhegong sa Modimo, gore o se ka wa ba balela diphapaano. Moruti Martin Luther
o ne a ganetsanya thata le dituto tseo, gonne o ne a tiisa, a re: Di bipa bopelotlhomogi jo Kresete
a bo abelang badumedi ntle le go leba ditiro tsa bone. Go itlhophela tsela ya pholoso go ne go sa
simologe ka nako eo. Le ka nako ya moapostolo Paulo go ne go na le ba ba neng ba leka go
itirela tsela ya pholoso ka go tshegetsa melawana.
1. Ba re: go tsehgetsa molao go molemo., mme ba oketsa ba re: go a tshedisa. Bakeresete kwa
Galata ba ne ba fapoga mo kgannyeng ya go tlhaloganya tiro ya molao. Paulo a goroga mo go
bone a rera Efangele ya pholoso, mme ga tla ba bangwe ba e neng e le Bajuda, ba godisa tsela e e
reng: Motho o tla pholosiwa ka go tshegetsa molao. Thuto ya Bajuda e re: Motho o balwa ka fa
tlase ga dikokomana tsa ga Aborahama, le go pholosiwa ka go rupiswa. Paulo le ene e le
Mojuda, a gatelela bontle jwa molao, mme o ne a tlhalosa kgang ya thupiso le go tshegetsa
molao. Ga a latlha molao le thupiso, a re: Go molemo, mme a kaela ba ba neng ba godisa
thupiso, a re: “Fa lo ka rupa, Keresete o tla bo a sa lo thuse sepe. Ke boelelela gape motho
mongwe le mongwe yo o rupang ke le mosupi gore o tshwanetse go dirafatsa molao otlhe.”
Motho mongwe le mongwe yo o rupang o pateletsegile gore a dirafatse tsotlhe tse di bolelwang
ke molao.
Go a utlwala gore ga go kitla go thusa motho e seng ka sepe yo o tshegetsang molao wa thupiso,
mme a palelwa ke go tshegetsa melawana e e emiseditsweng dikokomana tsa ga Aborahama,
jaaka go rewa: “All or nothing! Fa yo o rupisitsweng a fapaana mo molaong o le mongwe fela,
thupiso ga e kitla e mo thusa sepe, o tla latlhwa, le fa a rupisitswe.
2. Go dumela Efangele go botoka, go a golola. Phuthego e e rategang, lokwalo lo Paulo a lo
kwaletseng Bagalata a tseanya ka tiro ya bona ya go ngaparela mo melawaneng, le fa a ba rutile
gore go dumela Efangele go botoka, gonne go golola motho mo molaong, a re: o a gakgamala,
ka ba latlhile Keresete ka pele mo go kalo, ba fapogela mo efangeleng e nngwe e e seng
Efangele, e ba reng ka yona: E tshedisa ka go tshegetsa molao. Kana Efangele ga e bitse sepe, ga
e bitse ditiro, gongwe madi a motho, le e seng lotshwao lo lo tshwaiwang mo nameng, Bagalata
ba ne ba tsenwa, ba gogiwa mo go maswe go boela mo lotshwaong lwa thupiso gore le bone ba
ba neng e se Bajuda ba rupisiwe, fa ba rata go pholosiwa. Se se sa bitseng sepe sa motho se
nyatsega ka tlwaelo. Le Efangele e e pholosang ka go dumela mo go Keresete le yona ya
nyadiwa ke Bagalata. Paulo a re: “Lona ba lo ratang go siamisiwa (go atlholelwa tshiamo) ka
28. 10. 2012 / ka moletlo wa go gopola ntšhwafatso ya kereke - 2 - 51/2012

molao, lo kgaoganye le Keresete, lo ole mo boitshwarelong.” Le mo go rona go na le ba ba sa
dumeleng gore Efangele e botoka go feta molao, ba e nyatsa, ka e golola mo maleong ka go
itshwarelwa ka ntlha ya ga Keresete fela.
3. Bagalata le Baroma, mmogo le rona re mo kotsing. Bomorwa-Rre le bomordie-Rre, re utlwile
gore Paulo o bua thata le Bagalata ka go ikanya thupiso, mme ba paletswe go tshegetsa molao
otlhe. Gape re utlwile gore Martin Luther kwa Jeremane o ne a fapaana le ba kereke ya Roma,
gonne ba ikanya ditiro tsa thata ya bone, ba fifatsa thata ya Efangele e e pholosang badumedi. Le
rona re mo kotsing ya go ikanya ditiro tsa rona. Ga re ise re latlhe ka botlalo tsholofelo e e reng:
badimo ba re nametsa mo dikotsing, le go re naya letlhogonolo, fa re ba tlhabela dikgogo, dipodi,
le dinku, le fa re itse gore Keresete o dirafaditse tsotlhe gore re gololwe, fa re baya boikanyo jwa
rona mo go ene. Re kgaoganya mo bopelotlhoging jwa ga Keresete, fa re boela mo go tsa
bogologolo. Jesu ga a thibe ditiro tse di siameng, mme o a di batla, mme e nne tse di tswang mo
tumelong e e dirang ka tumelo. Mo moletlong ono wa ntšhwafatso ya kereke, re lebelele gore re
abetswe bopelotlhomogi ka tumelo, re se nyatse bopelotlhomogi jwa ga Keresete. A re boeleng
gae re itlhotlhomise gore ke eng tse di re kgaoganyang le lorato le bopelotlhomogi jwa ga
Keresete, re di latlhe, re itshwarelele mo go Keresete le mo Efangeleng ya gagwe, re mo ikanye,
fa e le Mopholosi wa rona ka go re itshwarela maleo otlhe ka ntlha ya loso le tsogo ya gagwe.
Amen,
9. Thapelo: Morena, re lebogela Lefoko la gago, le o re kgothaditseng ka lona ka ditiro tse
dintsinyana tse re sa ntseng re leka ka tsona go ipaakanyetsa bopelotlhomogi, O di re itshwarele,
Morena, gore re se ka ra tlhola re sala efangele e e seng ya sepe morago. Morena, re a go rata.
Tse dingwe ga re di rate. Re a go ikanya, Morena, tse dingwe ga re di batle, O nne le rona, o be o
tsamaye le rona ka thata ya Mowa o o Boitshepo gore tumelo ya rona e dirafatse ditiro tsa lorato.
Amen.
Thapelo ya Morena: Rara wa rona yo o mo legodimong ...
10. Sefela sa 185 - 171/178
A kagiso ya Modimo e e fetang tlhaloganyo yotlhe e boloke dipelo tsa rona le maikutlo a rona
mo go Keresete Jesu, Morena, Morepholosi. Amen.
Thero eno e kwadilwe ke R. P. Ntsmiane, ka ngwaga wa 2012
Kgatiso le go rongwa ga dithero tseo go tshegediwa ke kopano e e bidiwang The Lutheran Heritage Foundation.
28. 10. 2012 / ka moletlo wa go gopola ntšhwafatso ya kereke - 3 - 51/2012