wt1333130616 n Tr 3

Dithero tsa Tirelano mo Kutlwanong
00/2013 Thero ka Sontaga wa 03 morago ga moletlo wa Borarobongwe, e le
ka 16. 03. 2013
MO LEINENG LA MODIMO O E LENG RARA LE MORWA LE MOWA O O
BOITSHEPO!
1. Sefela sa 255 - 237/247
2. Thapelo: Morena, Mopholosi wa rona, yo o dirafaditseng tiro ya ga Rrago yo o
mo legodimong ka boikokobetso jo bogolo, re lebogela pholoso e re e
baakanyeditsweng ke wena, e e gorogileng le mo go rona. Re kopa go etelelwa
pele ke wena, le go tlhokomelwa ke wena gore o itshekise dipelo tsa rona gore
re tshegetse ditaolo tsa gago. O re femele ka metlha gore mewa ya rona e
tlhomame mo go wena Jesu Keresete, Morena wa rona ka ntlha ya loso le tsogo
ya gago. Amen.
3. Epistolo ka fa thulaganyong ya 2 e kwadilwe mo go 1 Timotheo 1:12-17;
Efangele ka fa thulaganyong ya 1 e kwadilwe mo go Luka 15:1-10.
4. A go ipolelwe tumelo ya bokeresete!
5. Sefela sa - - 254/261
6. Thapelo ya mmadi wa thero.
7. Efangele ka fa thulaganyong ya 5 e kwadilwe mo go Luka 19:1-10, e re:
"Jaanong a fitlha kwa Jerigo, a ralala motse. Ga bo go le monna teng, leina la
gagwe e le Sakeo, e le mogolo wa bakgethisi, mme a humile. Yoo a batla go
bona gore Jesu ke mang, mme a palelwa ka ntlha ya batho ba bantsi, ka a ne a
le mokhutshwane. Ka moo a tabogela kwa pele, a palama setlhare sa motlhatsa
gore a mmone, ka a tla feta ka tsela eo. Ya re Jesu a fitlha felong foo, a lelala, a
mo raya a re: 'Sakeo, akofa o fologe! Gonne ke tshwanetse go tlhola mo ntlong
ya gago kajeno.' Yoo a akofa a fologa, a ba a mo tshola ka boitumelo. Ya re
16. 06. 2013 / ka Sontaga wa 03 morago ga moletlo wa Borarobongongwe - 1 - 33/2013

otlhe ba bona, ba ngongorega ba re: 'O gorogetse kwa monneng wa moleofi go
tlhola teng.' Sakeo a ema, a raya Morena a re: 'Bona, Morena, bontlhanngwe
jwa tse ke nang natso ke bo naya bahumanegi; mme fa ke tseetse mongwe
sengwe ka patiko, ke tla se mmusetsa gane.' Mme Jesu a mo raya a re: 'Kajeno
pholoso e dirafaletse ntlo e, ka le ene e le morwa Aborahame; gonne Morwa-
Motho o tsile go batla le go pholosa se se latlhegileng.'" Amen.
8. Thero: Ditsala tse di rategang tsa Morena wa rona Jesu Keresete, Jesu Morwa
Modimo o tlile go rona. Ke ene tota yo e leng motho, yo o nang le sefatlhego,
setshwano, le bagologolo jaaka batho ba bangwe, a tsalwa ke lekgarebe. Fa a
ne a tsalwa, a phuthwa ka masela e le ngwana wa ga mmaagwe, a gola e le
motho. Mo loetong lwa gagwe o ne a lapa, a ikhutsa mo sedibeng sa ga Jakobe,
ya re a nyorwa, a kopa mtesi mo go mme yole wa Mosamaria. A sena go rera, o
ne a lapa, a robala ka boroko, a thulamela mo mokorong, fa ba ne ba
kgabaganya lewatle wa Galelea. Ke motho tota jaaka batho ba botlhe. Go na le
se le sengwe fela sa pharologanyo, o ne a se na boleo. Mokwadi wa Lokwalo lwa
Bahebere a re: “O ne a raelwa mo dilong tsotlhe fela jaaka rona, mme a se ka a
leofa.” Ka moo o ne a kgona go didimatsa dira tsa gagwe, a di botsa, a re: “Ke
ofe wa lona yo o ka supang boleo mo go nna?”
Ka moo, le fa e le motho ruri, o gaisa botlhe, ke yo mogolo go feta botlhe,
gonne ga a na boleo. Ke nnete, o mogolo go feta ba bangwe, gonne diphefo tsa
lewatle tsa mo utlwa, tsa didimala, fa a ne a di didimatsa. Mewa e e bosula ya
mo utlwa, ya tswa mo go ba ba neng ba tsenwa ke yona, fa a e boleletse go
tswa. Balwetsi ba alafega ka go fodisiwa ke ene. Le loso lwa mo ikokobeletsa, a
tsosa baswi, ba bowe ba phele, Ke nnete Jesu ga se motho fela, ke Modimo ruri,
le motho ruri, ke peresona ya bobedi ya Modimo o o Borarobongwe. Ke Modimo
ruri, jaaka go kwadilwe mo Beibeleng. Ke MORENA yo o tlileng mo lefatsheng le
le senyegileng la boleo. Morwa Modimo a fitlhelwa a le mo mmeleng wa motho,
jaaka re ipolela mo boipolelong jwa kwa Nitsea, re re: A nna motho.
Ke ka ntlha ya eng, fa a ne a tlwaetse go ipitsa ka leina la Morwa Motho? O ne a
dira jalo gore re itse gore jaaka e le Morwa Motho ke Mopholosi wa rona. Re
16. 06. 2013 / ka Sontaga wa 03 morago ga moletlo wa Borarobongongwe - 2 - 33/2013

ntse re na le tsholofetso ya bogologolo, fa Mesia a tla yo o ikaeletseng go
pholosa ba ba latlhegileng. Kwa a buang teng a re: Ke Morwa motho o ne a
gatelela gore bosaitsiweng jo jo bo sa tlhalogangweng jo re bo senolelwang bo
raya ene yo o se nang tshimologo, le e seng bokhutlo, a tsalwa gore e nne
motho, a nne mongwe wa rona, e nne Morwa Rraetsho tota. Jaaka wena le nna,
a tsalwa ke mmaagwe, a gola, a ja, a nwa, a robala, a dira, a lela, e le motho, e
seng tsala fela, mme le morwa-Rraetsho.
Kgorogo ya ga Morwa-Rraetsho e naya tsholofelo. Go tshwana fela le mo go
bomorwa-Rraabo Josefa kwa Egepeto, ba ba neng ba tshaba, ka ba mo
rekisitse, ba mo dira motlhanka, ba gopola gore o sule, Mme Josefa a ba raya, a
re: “Ke nna Josefa. ... A lo ko lo nkatamele.” Ga feta ka pele poifo le pelalelo mo
dipelong tsa bomorwa-rraabo. A ga go re itumedise, fa Jesu a ikopanya le rona,
a re bolelela gore ke ene Morwa-Motho, ka jalo e le Morwa-Rraetsho? Molaetsa o
ke o o siameng o o reng: Modimo ke Morwa-Rraetsho jaanong.
Mo Lefokong la thero ya kajeno re bolelelwa gore “Morwa-Motho o tsile go batla
le go pholosa se se latlhegileng.” Ba ba latlhegileng ke bomang? Ke bana le
ditlogolo tsa ga Atame, Jesu a tlela bone, ke bone ba ba latlhegileng. Ke bafe
bana bao? Ke bakgethisi, batsietsi, ke boSakeo, diaka, jaaka mme yole wa
Mosamaria, babolayi jaaka Dafita, bakopi le difofu jaaka Baratimeo. Jesu a tlela
dinokwane jaaka sele se se neng sa bapolelwa le ene mo sefapaanong. Re ka
tshwaya fano le maleo a batho ba ba mo lefatsheng la rona ba ba umakiwang
mo go kalo mo dikuranteng, e bong babeteledi, bakabeledi, le ba dikeletso tsa
thobalano, le ba ba umakiwang mo lokwalong lwa Baroma 1:26-27 ka gore “Ka
ntlha ya moo Modimo o ba neeletse mo dikeletsong tse di tlhabisang ditlhong;
gonne mokgwa o e leng wa tlholego, basadi ba bone ba o fetotse o e seng wa
tlholego. Fela jalo le banna ba tlogela go dira le mosadi ka fa mokgweng wa
tlholego, ba tukelana ka dikgatlhego tsa bone, banna ba dira matlhabisa-ditlhong
le banna ba bangwe, ba amogela tuelo e e tshwanetseng timelo ya bone mo go
bona ka bosi.” Mo malatsing ana re buisa tse dintsi mo makwalongdikgang ka ga
tseo. Go na le tse di tshwenyang. Bangwe ba re: Ba patelediwa, ke raya, fa go
nyadiwa kereke ka gore e kgetholola ba thobalano ya bong bo le bongwe. Tse
16. 06. 2013 / ka Sontaga wa 03 morago ga moletlo wa Borarobongongwe - 3 - 33/2013

tsotlhe tseo ga di farologane le tse Paulo a di re bolelelang mo lokwalong lwa
Baroma, fa Jesu a tletse botlhe, gonne o tletse ba ba latlhegileng, a tlela le nna,
le wena. Ke ona molaetsa o o siameng mo go rona.
Go a hutsafatsa tota, fa ba bantsi ba sa lemoge gore ba latlhegile, le gore ba
tlhoka Mopholosi. Ke bofofu jo bo botlhoko thata, ke botlhoko, gonne bo supa
tlhokego ya tumelo. Yo o sa dumeleng ga a ka ke a nna mo Modimong. Ba ba sa
dumeleng ba a itsietsa, ba re: Ga ba tlhoke Modimo le pholoso ya ona. Ga ba
ipolele, fa ba latlhegile. Ga ba rate, le e seng go batliwa mo timelong ya bone.
Ka moo ba tla nna e le balatlhegi ka metlha. Ba gana Mopholosi yo ba mo
rometsweng. Ka moo ba tla atlholwa ke Mopholosi yo ba mo itatolang, ba
latlhwe go se tlhole go le phatlha go batliwa gape. Jaanong phatlha e sa le teng.
Ka bopelotlhomogi jwa Modimo go sa ntse go ka diragala gore ba amogelwe ke
ene, fa ba tlhabologa, ba hutsafalela maleo, ba amogela Mopholosi. Ke fa
Modimo o tla ba itshwarela maleo ao a bone ka ntlha ya ga Jesu yo o sa lapeng
go batla ba ba latlhegileng. Go na le ba bangwe ba ba gopolang gore ba
latlhegile mo go kalo, fa ba sa ka ke ba batliwa mo tatlhegong ya bone. Ka moo
ba mo kotsing e kgolo, ba se na tsholofelo, fa Jesu a ka tla le mo go bone. Ga
go na motho yo o sa ka keng a batlwa ke Jesu mo tatlhegong ya gagwe. Jaaka
Jesu a amogetse Sakeo mo tatlhegong le mo maleong a gagwe, Jesu o ka batla,
le fa e le mang, le rona o ka re batla, le fa re le fa kae, a re ka molomo wa ga
Jeremia: “‘A motho o ka iphitlha mo maiphitlhong, ke sa mmone?’ go botsa
MORENA. ‘A ga se nna ke leng gongwe le gongwe mo legodimong le mo
lefatsheng?’” Ga go na ope yo o sa ka keng a batlwa ke leitlho le le bophara la
Modimo. Jesu o tla go bona, e le Modimo o o gongwe le gongwe. Ke ona Modiri
wa digakgamatso, Mong-wa-thata-yotlhe. O gorogetse mo lefatsheng gore a
batle botlhe ba ba latlhegileng. Ga go na pharologanyo fa gare ga yo o
latlhegileng go le gonnye, gongwe yo o latlhegang ka nakonngwe: “Botlhe ba
leofile, ba tlhoka tlotlo fa pele ga Modimo.” Jesu o tlile mo go ba ba latlhegileng,
ba ba se nang tsholofelo, ba ba tlhokang fela Morwa-Motho, bopelotlhomogi jwa
gagwe, le thata ya gagwe go ba batla.
16. 06. 2013 / ka Sontaga wa 03 morago ga moletlo wa Borarobongongwe - 4 - 33/2013

Ka moo, fa o gopola gore maleo a gago a bosula go feta tekano, o tshwanetse
go itse gore ga a kitla a gaisa madi a ga Jesu a a botlhokwa, a o a
tshologeletsweng. Fa o gopola gore o setse o tlodile molao wa Morena thata-
thata fela, o tshwanetse go itse gore ga o ka wa o tlole, le e seng go latlhega
mo go kalo gore Modisa yo o molemo a palelwe go go batla kwa o leng teng. A
tla gore ka leitlho la gagwe la Bomodimo a bone motlhala wa gago, le go go sala
morago gore Morena a go bone, a go busetse, o gorosiwe mo go Rara, o
pholosiwe.
Rotlhe re na le dithaba le dikgwa kwa re neng ra fapogeletseng teng. Re leofile mo go
maswe, re mo botennye jo bo lefifi, re meditswe mo maleong a rona, mo go kalo gore
re gopole gore ga re ka ke ra tlhola re kgona go thusiwa ke Jesu. Ke gona re
tsoselediwang kajeno ka mafoko a Morena a a reng: “Ke tshwanetse go tlhola mo
ntlong ya gago kajeno. Kajeno pholoso e dirafaletse ntlo ya gago, gonne Morwa-Motho
o tsile go batla le go pholosa se se latlhegileng.”
Jesu ga a ka a fologa fela mo setulong sa kgalalelo ya ga Rraagwe go itseela kemo ya
motho, a tshele mo lefatsheng leno la baleofi, o tlile gore e nne setlhabelo sa moleofi
mongwe le mongwe gore a mo emele mo katlholong ya ga Rraagwe. Fa ba ne ba
mmapolela mo sefapaanong o bapotswe mo boemong jwa rona, a tlhajwa gore madi a
gagwe a tshololwe ka ntlha ya maleo a a dirilweng ke rona. Fa a ne a swa, a re swela
mo boemong jwa rona. Lorato lwa gagwe ke lo logolo mo go kalo gore a nne a tswelele
go batla ba ba latlhegileng. O rata go ba busetsa mo go Rara yo o sa rateng gore go
swe moleofi, mme o rata gore botlhe ba tle mo tlhabologong. Ke gona Jesu o sa ntseng
a re bitsa ka lorato lo logolo gore re tswe mo sekgweng, a re: “Tlaang kwano go nna
lotlhe ba lo lapileng, ba lo imelwang; nna ke tla lo lapolosa.” Le rona, ba re leng
phuthego ya gagwe, re sa ntse re laleletsa batho go Jesu, Morwa-Motho, yo o neng a
tla go batla le go pholosa se se latlhegileng. A tlotlo e nne go ene jaanong le ka
bosakhutleng. Amen.
9. Thapelo: Morena Jesu Keresete, re a leboga, ka o ne wa sikara melato ya rona.
Re lebogela lorato lwa go re rata, le go re femela mo bosuleng. Re a kopa gore
o re itshwarele, ka re sa rate ka botlalo, le e seng go ikgaoganya le bosula, ka re
16. 06. 2013 / ka Sontaga wa 03 morago ga moletlo wa Borarobongongwe - 5 - 33/2013

sa ntse re ngaparetswe ke boikgogomoso. O re rute go ratana, le go ikokobetsa,
o re abele tumelo. Wena yo o re tlhabanelang. O re direle tseo ka
bopelotlhomogi jwa gago. Amen.
Thapelo ya Morena: Rara wa rona yo o mo legodimong ...
10. Sefela sa 210 - 194/ -
A kagiso ya Modimo e e fetang tlhaloganyo yotlhe e boloke dipelo tsa rona le maikutlo
a rona mo go Keresete Jesu, Morena, Morepholosi. Amen.
Thero eno e kwadilwe ke M. N. Mntambo,ka ngwaga wa 2013
Kgatiso le go rongwa ga dithero tseo go tshegediwa ke kopano e e bidiwang The Lutheran Heritage
Foundation.
16. 06. 2013 / ka Sontaga wa 03 morago ga moletlo wa Borarobongongwe - 6 - 33/2013