Shkarko - Ministria e Administratës Publike

FJALA HYRËSE NGA MINISTRI
Reforma e administratës publike paraqet një dimension të rëndësishëm të prioriteteve të
Qeverisë së Republikës së Kosovës dhe të Ministrisë së Administratës Publike për të ndërtuar
një administratë moderne, profesionale dhe efikase. Zhvillimi i administratës publike dhe
reformat në këtë sektor kanë përherë në pikësynim ofrimin e administratës publike më afër
qytetarit dhe ofrimin e shërbimeve të shpejta, kualitative dhe financiarisht të përballueshme.
Shembulli më i mirë për këtë është projekti i qeverisjes elektronike i cili siguron ofrimin e
shërbimeve dhe veprimeve administrative përmes sistemeve elektronike duke ndërtuar një
urë të shpejtë komunikimi ndërmjet administratës shtetërore në një anë dhe qytetarëve në
anën tjetër. Një projeksion i tillë do të bëjë administratën publike me të qasshme, më të afërt
dhe më transparente në kuptim të plotë të fjalës.
Duke vepruar sipas rekomandimeve të projektit FRIDOM, ne kemi filluar një transformim me
dy faza të ministrisë. Fillimisht kemi transformuar MSHP-në në Ministri të Administratës
Publike, duke e bere përgjegjëse për mbikëqyrjen dhe çuarjen përpara të reformës së
administratës publike dhe kemi ndryshuar disa prej departamenteve kryesore të saj, si në
organizim, ashtu edhe në funksionet kryesore që ata kryejnë. Në fazën e dytë parashikojmë
vazhdimin e këtyre ndryshimeve edhe në disa departamente të tjera, ndryshime të cilat
kushtëzohen nga disa ndryshime ligjore. Për t’iu paraprirë këtyre ndryshimeve, ne do të
punojmë paraprakisht në ndryshimin e kuadrit ligjor përkatës.
Nëpërmjet këtij plani zhvillimor MAP synon të arrijë objektivat e saj strategjike në fushën e
reformimit të administratës publike, të cilat përqendrohen në ndërtimin e një shërbimi civil
profesional dhe të paanshëm, në ngritjen e kapaciteteve për menaxhimin dhe implementimin
e Strategjisë së RAP-it dhe në përmirësimin e shërbimeve ndaj qytetarëve nwpërmjet
thjeshtimit të procedurave administrative dhe ngritjes së platformës së qeverisjes
elektronike. Për këtë arsye, unë fuqishmish besoj se plani zhvillimor i MAP-së do të
kontribuojë në arritjen e objektivave të përcaktuara strategjike dhe avancimin e procesit të
Reformës së Administratës Publike, si një instrument i rëndësishëm për proceset e integrimit
evropian.
Prof. Dr. Arsim Bajrami
2