30 шілде, 2019 жыл№85 (15405)
You also want an ePaper? Increase the reach of your titles
YUMPU automatically turns print PDFs into web optimized ePapers that Google loves.
4 <strong>30</strong> <strong>шілде</strong>, сейсенбі, <strong>2019</strong> жыл<br />
ӘЛЕУМЕТ<br />
САРЫАРҚА САМАЛЫ<br />
Ғаламдық эстафета - біздің аймақта<br />
«Бейбітшілік жүгірісі» ғаламдық эстафетасының алауы Павлодар<br />
облысына жетті. Өткен аптада Ресей, Беларусь және Латвия елінің<br />
оннан астам марафоншысы Қазақстан шекарасынан өтті. Отыз<br />
жылдық тарихы бар алау эстафетасы биыл Железин, Тереңкөл,<br />
Аққулы аудандары мен облыс орталығын қамтыды. Спортшылар<br />
бір айдың көлемінде Қазақстан мен Ресейдің аумағында<br />
3,5 мың шақырым жолды жүгіріп өтпек.<br />
Данияр ЖҰМАДІЛ<br />
Салауатты өмір салтын насихаттау<br />
мақсатында қолға алынған дәстүрлі ғаламдық<br />
алау эстафетасының қатысушылары Железин<br />
ауданының Ресеймен түйіскен шекарасынан<br />
өтті. Құрамында солтүстік көршілерімізден<br />
бөлек Беларусь, Латвия елінің марафоншылары<br />
бар топқа аймағымыздың спортшылары<br />
да қосылды. «Бейбітшілік жүгірісінің» алауы<br />
Тереңкөл ауданын басып өтіп, Павлодар<br />
қаласына жетті. Облыс орталығында<br />
«Қазқонақ» табиғи ескерткішінде, Мемлекеттік<br />
рәміздер, Жеңіс саябағындағы мәңгілік<br />
алау алаңында аялдады. Кейіннен Аққулы<br />
ауданына ат басын бұрды. Жол - жөнекей<br />
эстафеташылар жергілікті тұрғындармен,<br />
жастармен жүздесіп, отыз жылдық тарихы<br />
бар ғаламдық эстафетаның мақсатын,<br />
маңыздылығын айтып берді.<br />
- Ғаламдық алау эстафетасының ауқымы<br />
жылдан-жылға артып келеді. Көршілес<br />
мемлекеттер арасында зор қызығушылыққа<br />
ие болуда. Тіпті, әлемнің өзге елдерінің<br />
спортшылары да осы марафонға қатысуға<br />
ниет білдіріп отыр. Мысалы, келесі жылы<br />
біздің қатарымызға Жаңа Зеландия елінің<br />
өкілдері қосылады. Осы шара арқылы<br />
тек спорттың маңыздылығын түсіндіріп<br />
қана қоймай, халық арасында бірлік пен<br />
ынтымақты насихаттаймыз. Себебі қай<br />
елдің тұрғындары болмасын бейбіт қоғамда<br />
өмір сүргілері келетіні сөзсіз, - дейді<br />
ғаламдық алау эстафетасының үйлестірушісі<br />
Александр Арнст.<br />
«Бейбітшілік жүгірісі» 22 <strong>шілде</strong> күні<br />
Ресейдің Омбы қаласында бастау алған<br />
болатын. Ол алдағы тамыз айының 20-сына<br />
дейін жалғасады. Осы аралықта эстафета<br />
қатысушылары Омбы, Новосібір, Алтай<br />
өңірі, Павлодар және Шығыс Қазақстан<br />
облыстарының аумағынан жүгіріп өтпек.<br />
Ғаламдық алау эстафетасы жалпы<br />
3,5 мың шақырымды қамтиды. Спортшылар<br />
жолда бір-бірін алмастырып отырады.<br />
Әр марафоншы күніне орта есеппен<br />
15-40 шақырымды бағындырады.<br />
- Мен ғаламдық алау эстафетасына<br />
қатарынан алтыншы жыл қатысудамын.<br />
Бұл - жаныма жылулық сыйлайтын ерекше<br />
шара. Себебі ниеттес спортшылармен<br />
С<br />
бірге бірнеше елдің аумағынан жүгіріп<br />
өтіп, жүздеген тұрғындармен жүздесеміз.<br />
Олардың бізді достық ниетпен құшақ жая<br />
қарсы алғанын көріп, ерекше шабыттанамын,<br />
күш жинаймын. Өзім де адамдарға<br />
қуаныш сыйлауға тырысамын, - дейді эстафета<br />
қатысушысы, латвиялық спортшы<br />
Гундега Гаиле.<br />
Бір ерекшелігі, биыл аталған алау<br />
эстафетасы бір уақытта бірнеше бағыт<br />
бойынша жүруде. Соның ішінде, «Бейбітшілік<br />
жүгірісінің» өкілдері жердің оңтүстік жартышарын<br />
айналып өтетінін атап өткен жөн.<br />
Халықаралық марафоншылар Тынық және<br />
Атлант мұхитында орын тепкен шағын<br />
аралдардағы мемлекеттердің, Австралия,<br />
Оңтүстік Америка, Африка елдерінің аумағынан<br />
жүгіріп өтпек.<br />
ЛАГЕРЬ-<strong>2019</strong><br />
Шеттегі қазақ балалары - Павлодарда!<br />
Өткен сенбі күні Павлодар облысына Моңғолия мемлекетінен 14 оқушы демалуға келді. Оларды<br />
облыс әкімдігі, Дүниежүзі қазақтары қауымдастығы республикалық қоғамдық бірлестігінің Павлодар<br />
облыстық филиалы және білім беру басқармасының өкілдері салтанатты түрде құшақ жая қарсы<br />
алды. Сондай-ақ, республикалық «Батаменен ел көгерер» байқауының жеңімпазы Балтабай Сыздықов<br />
балаларға ақ батасын беріп, демалыстарын сәтті өткізуге тілектес екенін білдірді.<br />
Нұржайна ШОДЫР<br />
Шетелден атажұртына саяхат жасаған<br />
қазақ балалары Баянауыл баурайындағы «Жас<br />
дәурен» облыстық сауықтыру орталығына<br />
аттанды. Мұнда оқушылар екі апта бойы<br />
демалып, ауданның киелі әрі көрікті жерлерін<br />
аралайтын болады.<br />
- Елбасы елімізде ұйымдастырылған<br />
Дүниежүзі қазақтарының барлық құрылтайында<br />
сөйлеген сөзінде төрткіл дүниеге тарыдай<br />
шашылған қазақ балаларын қолдауға<br />
Қазақстан тарапынан жан-жақты мүмкіндік<br />
жасалатынын, олар ешқашан елеусіз,<br />
ескерусіз қалмайтынын айтқан еді. Тұңғыш<br />
Президентіміздің Дүниежүзі қазақтарының<br />
V-ші құрылтайындағы тапсырмасына сәйкес,<br />
2018 жылы «Шетелдегі этникалық қазақтарды<br />
қолдаудың 2018-2022 жылдарға арналған<br />
іс-шаралар жоспары» бекітіліп, елімізде<br />
«Отандастар» қоры құрылды.<br />
Біздің қауымдастық пен аталмыш қор<br />
тарапынан елге оралған және шет мемлекетте<br />
тұратын қазақтарды қолдау мақсатында<br />
көптеген республикалық және халықаралық<br />
іс-шаралар ұйымдастырылып жатыр. Соның<br />
дәлеліндей, осы жылдың ақпан айында Павлодар<br />
облысы әкімдігі мен «Отандастар» қоры<br />
екі жақты меморандум жасасқан болатын.<br />
Міне, нәтижесінде, облыстық білім беру<br />
басқармасының арнайы квотасы бойынша<br />
14 бала келді. Жалпы, осы жолы Моңғолия<br />
мемлекетінің астанасы Ұланбатырдан және<br />
Қобда, Баян-Өлгей аймақтарынан атажұртқа<br />
алғаш рет 80 бала мен 4 мұғалім жазғы<br />
демалысын өткізу үшін келіп отыр. Олардың<br />
қатарында 5-9-сыныптарда оқитын оқу<br />
озаттары, республикалық олимпиада<br />
жүлдегерлері, талантты спортшылар, өнер<br />
иелері және көпбалалы отбасыларының<br />
балалары бар. Атамекенін алыстан аңсап<br />
келген қандастарымыздың әр күнін көңілді<br />
өткізуі үшін барлық жағдай жасалуда, -<br />
дейді Дүниежүзі қазақтары қауымдастығы<br />
республикалық қоғамдық бірлестігінің Павлодар<br />
облыстық филиалының басшысы Болат<br />
Заутұлы. Оның айтуынша, 62 оқушы мен<br />
3 мұғалім Көкшетау қаласының Бурабайындағы<br />
«Балдәурен» республикалық оқу-сауықтыру<br />
орталығына жіберілген. Ал аймағымызға<br />
келген моңғолиялық жеткіншектер көңілді<br />
демалумен қатар, «Дүниежүзі қазақтары<br />
қауымдастығы» РҚБ-нің облыстық филиалы<br />
ұйымдастырған қызықты іс-шараларға<br />
қатысады деп жоспарлануда.<br />
- Бұл балалар еліміздің жеткен жетістіктерін<br />
көзбен көріп, Павлодар қаласындағы<br />
мұражайларға, жоғары оқу орындарына,<br />
Назарбаев зияткерлік мектебіне барады<br />
және өзге де тарихи орындарды тамашалайды.<br />
Сондай-ақ, шетелдік оқушылар үшін<br />
облыс орталығындағы Достық үйінде зиялы<br />
қауым өкілдерімен, Қытай мен Моңғолиядан<br />
келіп оқып жатқан студент жастармен түрлі<br />
кездесулер ұйымдастырылады. Осындай<br />
қызықты да мазмұнды іс-шаралардың куәсі<br />
болған балалар еліне барған соң атамекеннен<br />
алған әсерлерімен бөлісері сөзсіз.<br />
Сөйтіп, шеттегі қандастарымыздың Қазақ<br />
еліне деген құрметі артып, соның ішінде<br />
киелі Кереку өңіріне көңілдері ауып жатса,<br />
біздің мақсатымыздың орындалғаны, - дейді<br />
Болат Заутұлы.<br />
Балалар келісімен бірден қызықты<br />
шаралар басталып кетті. Олар алдымен<br />
аймағымыздағы «Ана тілі» орталығына<br />
саяхат жасады. Мұнда киіз үйде арнайы<br />
ақ дастарқан жайылып, қазақ тілі сабағы<br />
өтті. Оқушылар ән шырқап, ұлы Абайдың<br />
өлеңдерін оқыды. «Ана тілі» орталығының<br />
басшысы Шолпан Кинжикова жеткіншектерге<br />
авторлық кітабын сыйға тартты.<br />
Облыстық білім беру басқармасының<br />
бөлім басшысы Гүлнәр Ыбыраеваның айтуынша,<br />
шетелдік балалар демалыс барысында<br />
күн сайын тәжірибелі мұғалімдерден<br />
дәріс алып, мәдени-спорттық жарыстарға,<br />
ойын-сауық бағдарламаларына қатысатын<br />
болады.<br />
Айта кетерлігі, бұған дейін аймағымызға<br />
Якутиядан 34 бала келіп кеткен. Алдағы<br />
уақытта Тереңкөлге Ресейден 50 оқушы<br />
келеді деп күтілуде. Сондай-ақ, болашақта<br />
павлодарлық шәкірттердің де шет мемлекеттерде<br />
демалуларына мүмкіндік жасау<br />
мәселесі қарастырылуда екен.<br />
Аллаберген ҚҰРМЕТХАНҰЛЫ,<br />
Баян-Өлгей аймағындағы №1 мектептің<br />
оқушысы, талантты спортшы:<br />
- Ата-бабамыздың кіндік қаны тамған<br />
киелі қазақ еліне келгеніме, тарихи<br />
Отанымды көргеніме шексіз ризамын.<br />
Осындай қуанышты сәттің куәсі болғаным<br />
үшін Павлодар облысының әкімдігі,<br />
облыстық білім беру басқармасы және<br />
Дүниежүзі қазақтары қауымдастығының<br />
Павлодар облыстық филиалының басшыларына<br />
үлкен алғыс айтамын.<br />
Шетте жүрсек те, ата-анамыз<br />
Қазақстан жайлы үнемі жақсы пікірлер<br />
айтып отырады. Сондықтан да болар,<br />
атажұртты көру мен үшін арман<br />
болатын. Міне, бүгін сол арманымның<br />
орындалғанына қуаныштымын.<br />
Балжан МАХМҰТҚЫЗЫ,<br />
Баян-Өлгей аймағындағы «Зайд» жеке меншік мектебінің оқушысы, халықаралық<br />
байқаулардың жүлдегері:<br />
- Жазғы демалысымызды Қазақ елінде өткізе отырып, қандастарымыздың салтдәстүрімен,<br />
әдеп-ғұрпымен танысамыз. Сонымен қатар, егемен елдің мәдениетін<br />
көріп, көз тоймас көрікті жерлерін аралап рухани байлығымызды молайтамыз<br />
деп сенемін! Ал елге барған соң міндетті түрде достарыма, туыс-туғаныма<br />
Қазақстаннан алған әдемі әсерлерімді әңгімелеп беретін боламын. Осындай керемет<br />
демалыс сыйлағаны үшін атажұрттағы ағайынға айтар алғысымыз шексіз.
Change language