Kirche Aktuell - Protestantische Kirchengemeinde Gommersheim ...

18 Uff Pälzisch
De Jesus werd gebore
Wie de Augustus de Kaiser vun de Römer war, do hot er a´ des Land vun de Israelidde
rechiert. Sellemols hot er die Leit zähle losse, um zu wisse, wem er alles Steiere
abnemme kann. Do hot jeder in soi Heimat gehe misse un sich ufschreiwe losse.
Desweche is a´ de Josef mit soinere Fraa Maria nooch Bethlehem losgezoche, weil
do soi Sippschaft herkumme is. Awwer die Maria war im letschde Monat schwanger
gewest. Do war des fer die zwee net ääfach. Wie se in Bethlehem aakumme sinn,
henn se kä Dach iwwer´m Kopp g´habt. Bloß in äm Stall war noch Platz. Un do hot
dann die Maria ihr Klänes kricht un halt in ä´ Fudderkripp geleecht, weil nix anneres
do war. Die Eldere des Biewel „Jesus“ g´heeße – des määnt uf pälzisch: „Gott dut
helfe.“ Ganz in de Näh uf äm Feld is de Hirde än Engel erschiene. Der hot zu denne
g´sacht: „Eich is heit ä´ Kind gebore worre. Wann des groß is, werd´s die Welt widder
in Ordnung bringe.“ Do waren se all ufgereecht un sinn schnell zum Stall hiegerennt.
Sie henn sich vor des Kind g´stellt un ä´ großi Frääd g´habt an dem Bobbelche. Bis
uf heit is der Daach ä´ große Frääd fer alle Mensche. Desweche duh mer nämlich
Weihnachde feiere.
In de Bibel noochzulese beim Lukas 2, 1- 20; noochverzehlt vom Michael Landgraf und em Erich Hollerith
un uffgschriwwe in de „Bibel uf Pälzisch“.
Die Sterngugger aus em Morcheland
Wie de Jesus gebore worre is, hot de Herrgott schunn am Himmel än helle Stern
leichde losse. Den henn Sterngugger im Morcheland g´sehe un sinn in die Richdung
vun dem Stern losgezoche, weil se gedenkt henn: „Do werd bestimmt grad
än große Keenich gebore.“ Wie se dann nooch Israel kumme sinn, do henn se glei
dem Keenich Herodes vun dem Stern verzählt un en g´froocht, ob er grad ä´ Bobbelche
kricht hätt. Der is arich verschrogge. Er hot schunn länger Angscht g´habt,
dass änner kummt, der en absetze dut. Awwer er hot sich nix aamerge losse un so
geduh, wie wann er intressiert wär. Un wie sich die Sterngugger verabschied henn,
do hot der zu ne g´sacht: „Saache mer B´scheid, wann ihr des Kind g´funne habt. Ich
will dann aa´ kumme un´s aabeede.“ Die Sterngugger sinn dann weider gezoche
un nooch Bethlehem kumme. Do henn se dann des Kind g´funne. Sie henn dem
Bobbelche G´schenke mitgebrocht. De Äne hot Gold debei g´habt. Die Annere sollen
mit Weihrauch un Myrrhe kumme soi. Des Zeichs dut nämlich gut rieche un war
arich deier. Die Sterngugger henn dem Keenich Herodes awwer net B´scheid g´sacht,
dass se des Biewel g´funne henn. Sie henn em doch net getraut un Angscht g´habt,
dass er dem kläne Jesus was aadut. Dem Herodes hot die Sach awwer kä Ruh mehr
gelosst. Er hot soi Soldade g´schickt, um des Kind zu suche. Die henn´s awwer net
g´funne. Vor lauder Zorn hot er dann alle neigeborene Buwe in Bethlehem umbringe
losse. Än Engel hot awwer die Maria un de Josef gewarnt un die sinn mit em Jesus
rechtzeitich abg´haue nooch Ägypde. Iwwer Umweche sinn se dann späder widder
zurick in des Derfel Nazareth kumme, wu dann de Josef un die Maria all die Johre
gewohnt henn.
In de Bibel noochzulese beim Matthäus 2, 1-12 noochverzehlt vom Michael Landgraf und em Erich
Hollerith un uffgschriwwe in de „Bibel uf Pälzisch“.