(Das isch die) Zyt Schön isch d'Stimmig wenn d'Sunne ufgoht, amne ...

(Das isch die) Zyt
Schön isch d'Stimmig wenn d'Sunne ufgoht, amne Morge wenn i ufe Berg goh
das isch die Zyt, das isch die Zyt, de blib i schtoh
Hell lüchte d'Stärne am Himmuszäut, ire klare Sommernacht
das isch die Zyt, das isch die Zyt, wo mi zfride macht
Grüen isch d'Farb vom saftige Gras, am ne chüele nasse Tag,
das isch die Zyt, das isch die Zyt, woni ou gärn ma
Schön singe d'Vögu i üsem Waud, im Früehlig, uf mim Rundgang
das isch die Zyt, das isch die Zyt, do losi Stundelang
Fiin summt dr Wind im Aehrifäud, am ne schöne Sunnetag
das isch die Zyt, das isch die Zyt, woni schtune cha
Glück isch das Gfüeu wo mi überchunnt, wenn i dänke i sig bi dir
das isch die Zyt, das isch die Zyt, wo's kribeled i mir
Dankbar und zfriede bini jede Tag, woni gsung bi und nid ellei
das isch die Zyt, das isch die Zyt, wo mir gniesse wei.

Bisch nid elei
Hesch mängisch s'Gfüeu niemer heig di gärn, gheisch ines Töif, aui sige gäge di
verlürsch dr Muet, fingsch nüt meh guet, aues macht ke Sinn, weisch nümm wo he
Verlürsch dr Job, sigsch nümme top, stohsch uf dr Stross, weisch nid wies wyter
goht,
du ziehsch di zrugg, gohsch nümme furt, gheisch ines Loch, hesch scho lang ke
Fründ me gseh
Chum usem Loch, vergiss was gscheh, und gloub a di wirdsch e nöii Sunne gseh
fass wieder Muet, das chunnt scho guet, pack nomou a, wirdsch e nöii Chance ha
Heb Geduud, wenns nid grad goht, und suech ke Schuud, probiers, pack no mou a
är isch immer do, dued di verstoh, und nie verloh, är hüuft dr eifach so
Refrain:
De dänk doch dra, bisch nie ellei, är isch gäng bi dir
de dänk doch dra, är het di gärn, du chasch Vertroue ha

Chum wieder einisch hei
Chum doch wieder einisch hei
i bi mängisch chli ellei
I stürme nüm vo aute Zyte
wott ufhöre mit dir stryte
I mache gärn dr erschti Schritt
bi dr erscht wo dir vergitt
I ha ou mini Fähler gmacht
es bloget mi no mängisch z'Nacht
Chasch nid vergässe was isch gscheh
has deizyt eifach angersch gseh
I würd hüt mängs angersch agoh
chönnt i nomou vore afo
Si dini Ching no gäng bi dir
sie si dänk shco lang us dr Lehr
I würd se gärn no einisch gseh
wett ne scho lang no öppis gäh
Los i ha nüme so vüu Zyt
wot nid müesse go im Stryt
Chumm doch wieder einisch hei
I bi immer ganz ellei

Die gloorriche Siebe
Wo si die gloorriche Siebe blibe
wo die Ungrächte hei vertribe
Wo üs vorem Ruin si cho rette
wo üs befreit hei vo de Chette
Wo üs erlöst hei vo de Schänder
und lo ärnte die eigne Fälder
Wo mit Muet und Risike aus hei geh
ohni grossi Belohnige entgäge zneh
Wo üs glehrt hei d'Angst abzboue
und Basis gleit zu Sälbstvertroue
Wo üsem Volk dr Stolz hei zrugg geh
und ghoufe hei e Zuekunft z'gseh
Wo keni Dänkmol wei hingerloh
doch unvergässlech sie blibe so
Wo si die gloorriche Siebe blibe
wo Freiheit uf üsi Fahne hei gschribe
und aues do hei as blibt eso
und Grächtigkeit für aui tuet bestoh
Wo si die Gloorriche Siebe blibe
wenn nur eine chäm wär i scho zfride!

Es Ross
I ha tröimt einisch z'Nacht, i sig es Ross uf dere Erde
und aus chlies Föhli gstudiert, was ächt us mir söu wärde
So nes Rytross si wär gar nid schlächt, de müessti nid viel schaffe
oder sogar es Zirkuspferd, de würde d'Ross niidisch gaffe.
I bi ider Hoschted ume gumpet, das het die aute Hüross ufgregt
Sie hei nid chönne verstoh asme imne Hag so guet isch ufgleit
I ruehige Mondnachtstunge hei sie verzöut vo aute Zyte
(vo blaue Flüss und grüene Wäuder, vo de Matte dene wyte)
Jedes het wöue s'Beschte gsi si, do hei sie afo strite.
D'Lüt heimer a Chomet agleit, jetz hani dörfe schaffe
Dr Bockwage hani chönne zieh dur die schmale Gasse
Gäge Sattu ufem Rügge hani mi zerscht gwehrt
Doch sie heimer Haber und Zucker gäh do hets mi nümme gstört.
Es Cavalleriepferd hani dörfe si, so ne Oberst umeträge
Doch jede tag dr glichi Tritt, das isch jo nid zum säge
I ruehige Mondnachtstunge hami gsehnt na dr aute Hoschted
und probiert z'verstoh, was ächti Freiheit choschtet.
Druf abe bini ufgwacht und ha dänkt sisch nid so schlimm
I bi zum Glück kes Ross me mit somne grosse Gring
Drum muessi nid so vüu dänke, wienes Hüross mängisch duet
a Sache wo nid so wichtig si und das tuet mer richtig guet
Cha am Chline wieder Freudha und das tuet mer richtig guet.

Familieusflug
Wotsch am Sunntig morge uf e Wissestei
wüu gnue hesch i dine vier Wäng deheim
oder dänksch die früschi Luft dueter guet
wüu's dim Bluetkreislouf sicher ou guet duet
d'Frou macht der Lunch parat du seisch de Grossching
dir bruchet Wanderschueh.
Hesch aues ipackt de fahrsch nach Oberdorf
die erschte Sunnestrahle, jetz wirsch dr Näbu los
Parkplätz hets no gnue du bisch hüt früeh do
Rucksack a schnaue, sofort bärgwärts go
Dr Chlinschti frogt ganz schüüch ob's äch im
Weberhüsli Goggi heig.
Nimmsch dr lingi Wäg zum Hinger Wissestei
De bisch im chüele Waud und sisch nid so steil
Im Beizli obe chersch de s'erscht mou i
D'Frou nimmt es Kafi du chli chüele wisse Wy
Jetz muesch ufstoh süsch vergissisch no uf
d'Hasematt z'go.
Chunnsch de dobe a stuunsch abe übers Land
Gsehsch d'Fabrike dört ganz nooch am Aarestrand
Seisch die Iklemmte si hüt cheibe guet
Worum isch d'Aare nid so blau wie uf dr Charte frogt dr Bueb
Du verglichsch die Sach und meinsch die Charte
muess en auti Usgab si.
Plötzlech ghörsch es Ruusche wie wenn wärsch am Meer
Luegsch uf und gsehsch e Säguflüger über dir
Dänksch die Freiheit dört obe wetti ou mou ha
Doch fingsch s'isch meistens besser d'Füess am Bode z'ha
Ufem Heiwäg bim Authüsli chersch vorem
Abstieg no mou i.
D'Sunne isch am abe go du bisch wieder deheim
Die vierti Rundi isch dure bim Nündlistei
D'Ching si müed und ufem Wäg is Bett
Du rüefsch guet Nach und düet eso wie ig sett
Dr Fernseh blibt hüt stüu d'Frou seit
mir sette meh uf Bärge go.

Halleluja
I singe Glory Halleluja, de i bi jetz, scho pangsioniert
ha kei Stress meh, nüt wo pressiert
I singe Glory Halleluja, muess am Mäntig nümm früeh ufstoh
winke de Junge, wo uf Büez müöi goh
I singe Glory Halleluja, cha am Zischtig i d'Läde goh
statt am Samstig, vor dr Kasse astoh
I singe Glory Halleluja, cha am Mittwuch, ufe Jura goh
und mi ir Bärgbeiz, verwöhne loh
I singe Glory Halleluja, cha am Donnstig, i Keller goh
und Kinderschpüusache, düe entstoh
I singe Glory Halleluja, cha am Fritig, uf d'Velotour
sicher hundert, Kilometer wird pedalet, do bini stur
I singe Glory Halleluja, cha Samstig/Sunndig s'Auto lo stoh
jasse und singe, bis zobe spot.

Söu i mi apasse
Worum wotsch scho wieder goh, du bisch doch erscht grad cho
Gfauts dir nid bi mir, mi fröits immer sehr
Hätti s'Hömmli no söue wäsche, und entsorge die lääre Fläsche
Hesch d'Läberwürscht nid gärn, oder luegsch nid gärn Färn
Isch dr d'Ländlermusig z'lut, oder stört di mini Runzlehut
Wetsch lieber is Museum goh, i würd scho mou mit dr cho
Isch's wäg dr Wösch ufem Tisch, oder wägem Gschmack im Sack vom Fisch
Wetsch nid no chli use goh, ig würd das guet verstoh
Isch's wäg de Holzschueh dene aute, oder wüu i aui Zitige bhalte
Hani zwenig Essänz im Kaffi, oder wetsch chli vom Räschte Gnagi
Het dr s'letschte Lied nid gfaue, i ha doch gsunge wie d'Nachtigalle
Wettisch ufe Bärg go loufe, i würdi scho e Rucksack choufe
Wei mer mou as Meer id Ferie, statt immer luege Baywatch Serie
Wetsch mou ufe Jakobswäg, statt ume hocke s'Kandersteg
Söui höre Pfiffe rouche und nümm im Küehlschrank schnouse
Söui mou mit dir cho tanze, oder hani e zdicke Ranze
Wetsch gärn as dr s'Huus vererbe, s'chönnt si asi plötzlech stirbe
Oder wotsch e Voumacht ha, as ellei chasch Gäud abha
Refrain:
Säg doch söui mi apasse, dass du mi nid duesch verlasse
I ma di eifach wie du bisch, es isch mer glich was süsch no isch
Schluss:
Säg mer was isch do nid guet, i mache aues was dir guet duet
Gang doch jetz no nid grad hei, süsch bini jo ganz ellei
Mache aus as zfriede bisch, und mer dini Liebi gisch.

Volk i Chette
Wieder klage Mönsche hinger Muure
Mönsche wo um Volk und Heimat truure
wieder roue Panzer i dr Nacht
Panzer vore brutale Macht
WIeder liit es arms Volk i Chette
niemer chas us der Chnächtschaft rette
Gwaut isch stärker aus Protescht
zerstört dr Freiheit s'letschte Rächt
Passiert das doch aues wyt wäg vo mir
frogi mi trotzdäm chani öppis drfür
dr Friede vor Heimat schützt me ir Nacht
Dr Afang hei sie uf em Rütli gmacht
Würde mi d'Nachrichte nid interessiere
chönnt i schöneri Sache studiere
doch s'loht mi nid los i muess es Lied schriibe
as i mi Frust us dr Seeu cha vertriibe
Isch üsi Wäut ou vou vo Chlage
wott i nid ufgäh wott nid verzage
ewig chame d'Volksrächt nid beschniide
Grächtigkeit wird die Gwaut besiige
Glanzvou wird de wieder ufstoh
was so truurig het müesse ungergoh
und überau wo frömdi Panzer rattere
wärde d'Freiheitsfahne flattere.

Vorbüud
Lueg doch nid uf dä obedra
was dä sech aues leischte cha
was dä aues brucht um dr Seelefriede zha
do gloubsch doch du scho lang nümm dra
Lueg doch nid uf dä obedra
was dä sech aues leischte cha
dä meint as er sogar s'Glück choufe cha
jo sogar d'Liebi sig ou so zha
do gloubsch doch du scho lang nümm dra
Lueg doch nid uf dä nebedra
was dä sech aues leischte cha
dä meint as är sogar d'Fründe choufe cha
jo sogar e Platz im Himmu sig so zha
do gloubsch doch du scho lang nümm dra
Lueg doch nid uf dä nebedra
was dä sech aues leischte cha
was du bruchsch isch für aues Gäud nid zha
drum überlegg was muesch du würklech ha
und lueg die Sach mou angersch a
Lueg doch chli uf dä ungedra
uf dä wo sech nid vüu leischte cha
wie weni sbrucht um dr Seelefriede zha
wenn aues wotsch de chasch das nid verstah
was brucht um gueti Fründe zha