2004 Fasnachtsausgabe - Fuege-Fäger

Dr Breesibricht
Liebi Bassiv- und Aggtivmitgliider,
Genner und Frynde vo de Fuege-Fäger.
Bereits sin d' Fasnacht und d'GV hinter
uns und mir sind schon wieder am plane
vom neue Joor.
Aber an däm Punkt möcht ich wie jedes
Joor nonemol Ushole und s Vereinsjoor
03/04 ressumiere lo.
Agfange hets, nit speggtakulär, sondern
wie alli Joor mit de Probe im Mai. In
däm Joor wiederemol in der Liebrüti in
Kaiseraugst. Nach enere Summerpause
im Juli isch es denne ab em 18 Auguscht
mit de wüchentlige Proobe witergange.
Aber richtig losgange isch es eigentlich
scho viel friener, nämmlig mit unserem
Doppelufftritt am 9.Auguscht bi dr
Fürwehr in Blätzbums und an dr Hochzyt
in Oberwil.
Aaschliessend im Auguscht hämmer
wiederum mit öbbe 20 Nase dr Service
am Jazzsfeschtival Oberwil yberno.
Denn, zum erschtemol in der FF-
Vereinsgschicht dien mir zäme mit de
Giftschnägge Spezi vom 26.-
27.Septämber 03 s’erschte
Rambazambafescht durefiihre und das
isch e absolute Knaller gsi. Näbe dene
super Gaschtguggene und em Käpten
Klug mit sinere Bänd, isches absolut
Rambazamba gsi, e super Stimmig, e
super Aalass. E paar Wuche spöter im
Oktober isch Gewärbusstellig in Oberwil
als Serviceufftrag uffem Programm
gstande. Au dä hämmer wiederum
hervorrangend gmeischteret.
Puuh nonem vile schaffe und organisiere
het natürlich au s Muusikalische nit
dörfe z’kurz ko. Im Novämber sin mir
wieder mit Sack und Pack in d’ Bärge
disloziert, genauer gsait uffe Stoos ins
Sporthotel, richtige Sport hän mir dört
zwar nit dribe aber musikalisch und
kameradschaftlich isches wiederum e
super Weekend gsi. Wie gsait
Musikalisch gstärkt hän mir den kum
wieder zruck in Basel no die zwei Ufftritt
bi der Firma Rhenus bestritte. Bevors
den wiedergange isch mit em
Källerabstieg. Wo mir in däm Joor s
Patronat für dä ganz Allass gha hän, es
sind doch immerhin 24 Fasnachtverein
wo an däm Fescht mitmache. Näturligg
isch dr Käller bi däm Aloss wiederum
brächend voll gsi und es isch mit
Garantie nit numme Mineralwasser
drungge worde. Das hektische Joor het
sich langsam zum Aändig gneigt,
bimene gmitligge Nachässe im
Dezämber hän mir uns den uff d
Wiehnachte igstimmt..
Bereits sin mir im Joor 2004. Am
16.Jänner 2004 starte mir in unserem
Gliggekäller unser Jubeljoor. Mit
usgibigem Spiis und Trank, pikant
serviert von dr Frau Aenishansli, wird
grindligg gfeschtet. E Huffe sin
Morgestunde unterwägs gsi und hän,
nodäm der Stainlemer uf Grund gloffe
1

Dr Inhalt
S Impressum
Dr Breesibricht 1
Dr Moorgestraich 5
Dr Mäntig 7
Dr Zyschtig 9
Dr Mittwuch 11
Ufftritt am Keehrus 15
Dr Bummelsunntig 19
D' Termin 21
D' Laag vo dr Nation 23
Das isch die zwait vo drey
Ussgoobe im Joor 2004
mit ere Ufflaag vo 400 Stigg
Uusegää vo dr
Fuege-Fäger Gugge-Muusig Basel
Boschtfach 242, 4010 Basel
info@fuege-faeger.ch
praesident@fuege-faeger.ch
D Redaggtion fiehrt dr
Marc Suter, Spitzwaldstrooss 212
4123 Allschwil, Tel. 061 481 71 66
redaktor@fuege-faeger.ch
S Titelbild het gmacht:
s Ateliee Harlekin, Basel
Dr Inserate-Aquisitöör isch dr
Pit Friedli, Fiechtenweg 40
4147 Aesch, Tel. 061 751 53 58
Inserate-Bryyse fir ai Joor
e ganzi Syte 240.–
e halbi Syte 180.–
e viertel Syte 120.–
Farbzueschlaag (Umschlag) 40%
Dr Speedy Print Basel het s druggt
Dr Redaggtions-Schluss fir die
näggscht Nummere isch am
15. Oggtober 2004
www.fuege-faeger.ch
2

Dr Breesibricht (d'Fortsetzig)
isch, am Schluss none sichere Hafe im
Club 59 gfunde.
witer gohts…
Am Spale-Itärne im Volkshus hän mir e
super Ufftritt kah. Und wo mir den dr
Sans Souci gspiilt hän sin sie wiederum
völlig durrestartet. Näturligg isch dr
Jänner noni verbi den bereits stohts
tratitionelle Skiweekend in Adelbode
wieder uffem Programm. Und wie jedes
Joor isch das e super Alass. Mit viiil
Neuschnee viil gueter Stimmig, viiil
Käse und sälbstverständli viiiil
Schwarztee. So langsam aber sicher
gohts richtig Fasnacht, der erscht Stopp
hän mir in Schwäbisch Gmünd vom 13.
bis am 14 Februar 04 gha. Es isch wider
wie jedesmol absolut spitze gsi, es het
alles gstumme, sogar Wodkabrause isch
gnuegend vorhande gsi.
Dr zweit FasnachstStopp hän mir z
Allschwil verbrocht mit eme Ständeli im
Altersheim Muesmatt und em
aschliessendem Ufftritt und Nachtässe
bim Wärdebärg Heinz.
Und ändlig isch d Basler Fasnacht und
die isch wiederum total perfekt gsi, sogar
der Petrus het mitgmacht und het unser
Jubiläum bi sunnigem Wätter mitgfiihrt.
Es isch wirgglig e super Fasnacht gsi. I
dängg do nur an die verschiidene
spezielle Jubi-aaläss wo während dr
Fasacht organisiert worde sind: z.B. dr
Start im FF-Käller mit de Aktive und
Passive am Mändig, oder dr Apero bi dr
CS hoch über de Dächer vo Basel, oder
s Guggeduell mit de Räppli, unserem
Fuege-Fäger Drink in roter und griner
ussfiirg, und nit z’vergässe s Ständeli
vo d BMG und d Schränz-Gritte. Und no
ganz speziell dr Cüpliapero im Casino
mit absolut sensationeller musikalischer
Begleitig vom Remy. Im Aaschluss an d
Fasnacht isch no dr Häxekessel „Kehrus
im Volkhus“ uffem Programm gstande.
Und e Häxekessel isch das im worschte
sind vom Wort. I glaub bi däm viile
Fachpublikum sin sämtliggi FF e weeneli
nervös gsi, aber nach de erschte paar
Tön hämmer der Saal im Sack ka.
Genial! Der Abschluss vo dr Fasnacht
2004 dörfe mer wiederum mit emene
super Bummel abschliesse.
An dere Stell dank ich allne
Organisatore, stille Hälfer, Spänder und
sämtliche Teilnähmer für die super tolli
Mithilf. Und dängget drä unser Jubeljoor
isch no lang nit verby. Im Septämer gön
mir no uff unseri Jubelreis nach Köln.
Am 8. Oktober fyyre mir unsere offzielle
Geburtstag zäme mit de Passive in
unserem Gliggekäller. Und am Aendi
vom unserem Jubioor wärde mir zäme
mit unserne Läbenspartner s Joor mit
emene gsellige Schlussobe beähnde.
Mit fägerische Griess
Eyre Breesi
Stefi
3

Dr Morgestraich
Oder "Aliens im Dunggle"
Me glaubtis jo fasch nid, aber am
disjöhrige Morgestraich het Basel
bsuech vom e Päärli Usserirdische
bickoh (Y ha scho immer gwüsst,
dass d'Basler Fasnacht wyt umme
bekannt isch, aber grad soo wyt...?)
Und eso het sich das abgschpiilt, an
däm 1. März: Y bi scho mim
Schyssdräggzygli iigstande und bi
dämentschprächend zimlig närvees
gsi. Mini Händ han zitteret, und das
nid nummä wäg dr Kälti, wo i mit
em Zundhelzli mi Stäggeladärnli
zum Lüchte erweggt ha. Es kenne
numme no e paar Sekunde vor em
Vierischlaag gsi si, wo i ändlig das
ver*** Kerzli zum brenne brocht
ha. Und erst denne isch mir ufgfalle,
dass sich zwei unbekannti
Gschtalte eifach in dr Vortrab vo
unserem Schyssdräggzygli iigreiht
hän. Doch bevor ich richtig realisiert
ha, was ych do eigentlig seh,
isch au grad s'Licht usgange und
alli rund umme händ afo pfiffe und
ruesse.
Vor luter Uffregig über dr Aafang
vo dr Fasnacht han y denne die
Erschiinig wieder vergässe gha. Y
ha jo schliesslig als Ladärneträger
au e wichtigi Uffgoob und ha
nümme witer drüber nochedänggt.
Erscht im Schiin vo ere bsunders
grosse Ladärne, es isch glaub die vo
dr JBC gsi, sind mir die Fremde wieder
uffgfalle. Y ha denne glägehait
gnutzt, mir die Beide e bits genauer
aazluege.
Sie hän e grieni, runzligi Hut gha,
grossi, spitzi Ohre und so guet wie
gar kei Hoor. D'Kleider sind e bits
zerlumpt gsi, fasch so als hätte si die
nur zur Tarnig aa. Und denne sind si
no so komisch gloffe...I ha scho e
bits e mulmigs gfühl bikoh, wo i
gmerggt ha, dass die nid vo dere
Wält könne si. Die mien us eme
ganz e andere Teil vo dere Galaxie
härkoh; so öbbis han y no nie gseh.
Y ha mir denne fescht vorgnoh, die
Usseriirdische e bits genauer
aazluege, sobald d'Dämmerig
aafoht. Aber es isch koh, wies het
koh miesse: Kumm isch dr erscht
Silberstreif vo dr Dämmerig vo däm
wunderscheene Fasnachtsmäntig
am Horizont uffdaucht, hän sich
die Zwai us em Staub gmacht. Und
ich has nid emol bemerkt.Y bi hüt
no sicher, die hän sich eifach wägbeamt,
oder so.
So het sich das zuedrait. Es kas
glaube wär will, aber an dr
neggschte Fasnacht wird ich d'Auge
offe bhalte...
s'Dum-Dum
5

Dr Mändig
Wenns am Vieri Basel schlooht
Denn isch's in Basel none sw(b)isseli
dunggel, reschbeggtiif lescht me de
Basler s'Liecht ab. Worum waiss me im
Momänt aigedlig nit e so rächt. Alli
ringsum sin nerves. Jetzt, e flaggere
vomene Liechtli, vomene Keerzli. Aber
d'Schtrosselampe brenne immer noni.
Pletzlig gseeht me iberall glaini und
grossi Liechter, aber die effentliggi
Belichtig blybt immer no uss.
So kaas immene nyd Basler goo, wenn er
am Morgestraich vomene Nachtbummel
heimwärts wott.
Am Nommidaag aber hets denn
Dagesliecht und me geseht s'ganze viel
besser.
Und usgrächnet an däm Nommidaag sin
merkwirdigi Gselle unterwägs. Sie
draage ganz komischi Hiet, nei Kappe
sin das. Die rote Auge sin verschlosse
mit-ere Schweissbrille und um dr Hals
draage si e Schnupfduech fascht so lang
wie e Bruddschleppe. D'Jagge isch im
ainhaitlige Konkurs-Fly-Swiss-Blue. An
Patte fählts ebesowenig wie an dr Aazahl
Lyt. Ee Kampfbomberhoose und
Gamasche derfe nit fehle und bilde dr
unteri Abschluss vo däre Schtumperauchende
jämmerlig abgschtyrzte
Figur, wo sicher aimool in Ihrem Läbe
scho besseri Zyte gseh het. Aber ebbe,
sits mit ihm abwärts gange isch, hett au
sy yssers glidde. Joo, zer Zyt wos Ihm no
guet gange isch, hett är jede Daag, oder
ämmel fascht jede Daag, derfe im Sässel
blatz neh. Alli Schalter und Bedienigselemänt
hett är usswändig kennt. Au uff
sini Top-Mitarbeiter hett är sich kenne
verlooh. Es isch ihm und syne Lyt nie
langwilig gsih. Binere wältwyt
renommierte Firma het är gschafft und
mit sym Yykomme het-er e guets
Verhältnis ghaa. Aines Tags isch's denn
dere Firma nymme eso guet gange. Dr
Arbetgääber isch pletztlig an allne Egge
und Aend vo dr ganze Wält in
Misswirtschaft gschtande und die
Aagschtellte sin ganz pletzlig uff dr
Schtross gschtande. Jetzt hänn die
Aagschtellte nur no d'Wahl kaa,
äntwäder Usswandere oder e neue Job
sueche. E mänge hett denn glii wieder
Arbet ghaa. Aber de maischte hett
d’Arbet nid gfalle. Dr soziali
Abschtyyg hett bi viele ze ihrem Alldaag
ghert. Kurz vorem Verlumbbe hett denn,
aine uss dr Byggse, middene Erbarme
ghaa und heddene Arbet aabodde, aber
zue Dumpingpryyse. Do sin denn halt au
nyd qualifizierti Lyt ko und hänn welle
by dr ney grindete Blächbyggse-Firma
schaffe und e swisseli Gäld verdiene.
Joo, viel Bruch ( Pilote ) hänn sich by
dere neye Firma gmäldet. Am Aafang
het die Firma alli Aarbetskreft gnoo und
bald druffabe hett in dere Firma au die
CEO-Dose miese goo. Zumindescht
heddis dr Dose bis noch dr Fasnacht,
bezyglig Sujet, wenigschtens nid im
Schtich gloo.
Die roti Kappe

Dr Zyschtig
Mehr oder weniger ussgschloofe hän
mir uns alli am halbi zwei bi dr
Elisabethe-Kirche troffe. S isch nit
lang gange do het s Konzärt fyr uns vo
de Kinder uf em Platz agfange. Nit
ruhiger isch es worde wo mir uns
denn uff dr Stäge positioniert hän und
e paar Stückli zum Beschte gäh hän.
Mit etliche kliine und au scho grössere
Kinder hän mir uns uff e Wäg gmacht
richtig Martins-kirchplatz.
Untwerwägs isch es au durchus emol
vorko, dass wäge däre riesige Masse,
die in de vordere Reihe nüm ghört hän
was die Hinde spiele.
Uff em Martinskirchplatz sind mir
denn vo heissem Tee und Wienerli in
Empfang gno worde, was alli
Aawäsende erfreut het. Nach ere
kurze Verschnuufpause hän mir uns
uffgstellt und gspannt gwartet was
mir ächt wieder spiele. Nach eme
sensationell tönende Platzkonzärt sin
mir denn witer in Richtig Glaibasel,
genauer gseit in Richtig Mohreloch in
dr Klybeckstroos. Nach eme feine
Nachtesse isch d’Nervosität
langsam grösser worde, vorallem wo
mir uns nach de Achte parat gmacht
hän und uns uff dr Stross uffgstellt
hän. Spielend und stolzierend isch es
vom Claraplatz über die Mittleri
Brugg zum Märtplatz gange wo mir
denn au nomol e kurzi Pause iglegt
hän.
Ändlech isch es denn sowit gsi, d
Fuege-Fäger laufe wie jedes Joor in
Schmiidehof i, und wie jedes Joor isch
es au diesmol wieder e riesigi Mängi
an Lyt gsi wo uff uns gwartet
het. Nach eme schweisstriibende
aber au sehr schöne
Konzärt hän mir uns alli bi
Wyssem und Bier
wiederemol könne stärke.
Spöter isch es denn mit
Gässle witer gange und au s
eint oder andere Konzärt het
nit dörfe fähle.
An dere Stell möcht ich ganz
härzlich bedangge bi alle
Organisatore vom
Kinderguggeplausch, allne wo unter
em Joor duure viellicht au emol e paar
schlooflosi Nächt gha hän wäge däm
ganze Vorhabe und natyrlig
mindestens au e sone grosses
‚Dangscheen’ an d’Hälfer wo am
Zyschtig Nomidaag in dr Stadt
mitgholfe hän.
Moritz

Dr Mittwuch
Dr’ dritt Yberflug !
Es wär glooge, z'sage y sig nervees
gsi. Aber e klaiweneli s flattere im
Buuch hanni scho bikoo, wenn y dra
dänggd ha, was an sällem
Mittwuch het sotte bassiere.
Aigentligg isch es vielmeh gsi, wie e
liebliggs zieh in dr Maagegägend.
Grad wie bimmene frisch verliebte
Tschumpel. Was das usgleest het
frogsch? Dängg unsere dritte
Yberflug!
Fyr jede Pilot isch's fliege ebbis
speziells. Aber wenn de kasch mit
ere vierziggjöhrige Maschine wie
die vo uns ummegondele isch das jo
scho quasi dr Gipfel, d'Kreenig oder
aifach s'ultimative Erläbnis wo dr
kasch genne. Also hopp hopp ind
Wucheschiesser gstande, d'
Gamasche azooge, d'Sturmhuube
montiert . . . halt! dr Schaal nid
vergässe . . . . und ab zem
Träffpunkt vor em Rollfäld. Uff em
Wäg zem Träffpunkt (dr'
Stainlemer) sinn mer denn no die
ainte oder andere Co-Pilote
begägnedd.
Ändligg – am Viertel vor drey Jöhrli
uff em Buckel halt aifach nümmi
s'Neuscht isch, het is dr Jämpeli (au
aine vo de yber Fuffzigg Co-Pilote)
nid e Technoband als Yberraschigg,
sondern e klaini aber ganz feyni
Dixie-Combo yyfliege lo. Die hänn
is mittere super Show zem super
z'Nachtässe unterhalte. Wo mer
wieder so langsam hätte sotte
abfliege isch denn plötzligg sälle
Cessna-Pilot wieder ko und hett is
resolut druff higwiese, as in
unserem Motor ebbis nid ganz rund
lauft (Es hett sich bi däre Glägehait
au grad usegstellt, as sälle Pilot jo
aigentligg dr Groundfloor und
Skyguide in Personalunion isch).
Tatsächlich hänn den d'Mechaniker
11

Dr Mittwuch
D' Fortsetzig
so gege die halbi Zwölfi z'Nacht
au feschtgstellt, as mer unbedingt e
baar Ersatzteili bruche. Dr
Ersatzteil-Produzänt BMG (Basler
Maschinen Gesellschaft !) hett is
denn kurzfrischdigg mit e baar
Trummle (-brämse) und Querstab-
Luft-Ventil kenne usshälfe.
S'hett denn nach em erneute Start
numme no so kesslet und brätschdd
bim fliege. Drfyr hämmer jetzt
gnueg Kraft gha, um yber dr
Rümmelinsblatz z'ko. Bim Hotel vo
de drey Keenige hett's denn wie
allewyl e klaini Pause gä, bevor
mer mit unserem Flugzüg bis in die
friehe Morgestunde ummegfloge
sin. Kurz vor de viere am Morge
hämmer denn die draumhafti
Maschine wieder im Hangar
müesse verrume, wo si hoffentligg
guet duet yberwintere. Bevor y
denn mied aber gligligg hai gange
bi, han y no mit de andere Pilote
zämme e gmietliggs z'Morgeässe in
dr Pilotebaiz deerfe gniesse. Und
denn . . hett au ändligg das kaibe
kribbele im Buch uffgheert!
Bim Revue passiere lo… han'y mer
denn no yberleggt wie das eso isch
mit emene Fluugi - bsunders mit aim
wo Vierzig isch! S'git Glaitflüg wo
ruhig verlaufe, s'git Turbulänze,
s'git söttigi wo stüre und s'git söttigi
wo mitfliege. Mängmol isch
s'Flugzüg eher ruhig und d'Strecki
schiind lang, mängmol isch's lut und
d' Strecki schiind kurz. Aber
d'Hauptsach isch doch aigentligg
as me immer wieder gsund landet!
Oder? Ich für mi Tail flieg sie gärn;
d' Fuege Fäg-Air mit ihrer vierzig
Joor alte Maschine.
d' Quietschkommode
13

Ufftritt am Keehrus
Bi de Schotte, Schränz Gritte und Grunzis
Zerscht isch dr Adam und d'Eva
gsi, denn hän e paar glatti sieche
d'Basler- Fasnacht ins läbe gruefe.
Und was kunt bekanntlich nach dr
Fasnacht? Bravo, sit es paar Jöhrli
dr Keehrus im Volgshuus.
Ebe dert an sälem Samschtig het me
sich vor em Voolgshhus, am siebeni
droffe (Isch jo loogisch das i wieder
zwai stund z'frieh deerte gsi
bi).Nach däm mir unseri Tröötene
und andery wärkzyg deponiert hän,
het uns s'Flugi bis am fünf vor nüni
Uusgang gäh. Khum het s'Flugzyg
das gsait bin ich und die andere
Bruchpilote unseri Spielpyschte go
besichtige. Nadierlyg hän mir au
s'Bode-personal und Flugbegleiterine
betrachtet.
S'Wichtigscht, wo mir nadirlig nit
vergaässe hän, Keerosin
tanke!Nach däm mir uns im Saal
aklimatisiert hän, und e huffe
Flugbegleiterinne beguetachtet hän
(Gäll Schuti), isch es gli fünf vor
nüni gsi. S'Flugi het uns gli mit samt
em tütü und bum bum ins Foyer
g'floge. Dert hän mir den in
d'Warteschlaufe müesse go.
Plötzlich schnappe sich zwei Schotte
unsers Flugi, damit är sicher abe uff
d'pischte kho isch.
Und hindedri e paar wenigi Pilote
(wo d'Flugschlacht um Basel
überläbt hän), wo mit em Flug
FF007 uf dr gliche Pischte glandet
sin (Sogar ich ha gwüsst mit was mr
ihnelaufe, ok dr Whisky hät mr scho
besser gfalle). Nach em 007 sin mir
durch s'Repertoire gfloge (Natirlig
het dr Sans- Soucis nit dörfe fähle).
Nach ebbe 5 Stiggli sin mir denn
mit em Whisky im ene Düsejet-
Tempo us däm, mit Emotionen
gfüllte, Saal us gloffe. Nach eme ne
ganz churze Bier, sin mir den in
erschte Stogg. Khum sin mer dert
uff dr Bühni gstande, het au säll
Publikum vor Emotione fascht nim
kenne ghalte wärde. E Anekdote
dert drzue isch sicher sälle momänt
wo uff dr Bühni e Attentat statt
gfunde het. Ziel Person vo sällem
Attentat isch dr Lt. Marc „Schuti“
Suter, vo Bruef Bruchpilot bi de FF-
Airways, gsi. Jo das isch wohr, däm
arme Kärli isch e diggi Schrube vom
Himmel kheit (Wahrschienlig lygt
das derte dra das d'Pauke zlutt gsi
sin, oder d'Bühni z'schwach baut ).
Au anderi Mitglieder vo dere
Ehrenwärte Rhythmus Gsellschaft
sin von loose teile troffe worde.
Nach däm uns s'Flugi sicher au
durch däm Gfoohreberiich gleitet
het, sin mir zum wohl verdiente Bier
übere gange. Was denn in sällere
Nacht no alles gange isch.....
15

Ufftritt am Keehrus
D' Fortsetzig
jähhh wär nit drbi gsie isch dä isch
sälber Schuld.
I wot mi numme no bi folgende lüt
für d'Fasnacht-Saison '04
bedangge:
Dr Pit wo uns gfüert het (mir sin nit
immer eifach), dr Steffi fir's ganze
Joor, dr Bosti: Thank you for the
Music, mine Paukekollege (Schuti,
Tobi, Thomi) fir… jo das isch epis
bsunders, em Petrus firs Wätter, dr
Gmünder Bevelkerig fir alles, dr
Frau Fasnacht (isch jo klar für
was), em Heinz für's Aesse in
Allschwil, dr BMG für die magische
Momänt und s'Jubel- Ständli, Em
Stainlemer- Team für's do si, Em
Käller- Team für's hüete, mim
Arbetgäber für's Zahle und frei
gäh, unserne Fäns für's Fän si, de
Schotte, Grunz-Gaischter, Schränz-
Gritte (au für's Ständeli) für's
Organisiere vom Keehrus, em
Mischa für's veröffentliche vo däm
bricht, und natürlig allne andere wo
drzue bitrait hän das es e glungeni
Fasnacht gsi isch. Dangge, Dangge,
Dangge....
E Fliegendi Pauke
Fir alli wo meh wänn wysse:
Uns gyts au im Internet.
Dört kamme jewyls aggtuelli Termin
vo de Fuege-Fäger aaluege,
me kah die neyschte Föteli vo unserne Aaläss gseh,
me kah sich im Gäschtebuech mit interessante Lüt unterhalte,
und viiles meh.
Kömmed uns doch koh bsueche uff:
www.fuege-faeger.ch
17

Dr Bummelsunntig
Wenn dr zwaiti Sunntig chunnt
nach dr Fasnacht isch es Zyt, dass
au mir unsere Bummel durefire. Das
mol isch am Nüni Besammlig gsi im
Bahnhof SBB bi dr Good Bye Bar.
Tröpfliwis sin si denne cho, mit oder
ohni Ahang.
Wo denn alli e Bummelabzeiche
becho hän, e Schal wone chli
„Gfizzerlet„ het isch plötzlich e alte
Fuege Fäger ufftaucht, dr Wälti wo
au scho nemol bi uns in dr Gugge
gsi isch (wär nid?).
Uff dr andere Site vo dr Passarelle
het e BVB Trolleybus gwartet.
D’Instrument hämmer chönne
bim Sven in Trucker ine lege und ab
isch es gange.
Im Wätter het me nonig so chönne
traue, es isch e chli alles grau in
grau gsi.
Durch Stadt sin mer denne in
Rhyhafe abe gfahre. Womer
usstigge sin und s’erschti Mol
gspielt hän het sich plötzlich au
Sunne zeigt und dr Himmel isch
blau worde, ganz nach em Motto
„wenn Aengel reise, schiint au
d’Sunne“. E mega feins Apero-
Buffet het denne uff is gwartet. An
däre Stell, nonemol rächt härzliche
Dangg dr Familie Nicolet, wo nis
das offeriert het.
Die wo hän welle hän denn chönne
mit em Lift ins Turmzimmer uf 65
Meter uffe fahre, vo döt Obe hesch
e super Ussblick über dr ganzi Hafe
und d’Umgäbig gha. Nach eneme
wittere Ständeli het ys denn dr Bus
scho zum Mittagässe ins Restaurant
Schützmatt gfahre. Im ene
prächtige Saal hets denn öbbis
warms ghä.
Mit de foorige Chindersaxsophönli
vom Zischtignomidag Chinderguggeplausch
usgrüstet sin mer
dene spielend in Formation laufend
ins Bowlingcenter an d'Güterstroos
gwächslet. E huffe hän scho gmaint
es git hüt di zwäiti Lektion im
Tango-danze. In däm Bowlingcenter
het e Dessertbuffet uff uns
gwartet wo jo mega gewaltig gsi
isch. Me het gar nid gwüsst wo me
söll afo mit schöpfe. Es het aifach
alles gha. Grüppliwis het me denne
chönne zwai Schtund Bowling
spiele, wobi dr Beschti am Schluss e
Prys gwunne het. Das isch dr Andi
Grünefelder gsi. (was macht de
äggscht dr ganzi Dag, wenn er nid
im Chäller isch???)
Will mittlerwile scho fünfi gsi isch
hämmer denn chönne richtig
spielend in Stadt laufe. In dr Staine
hets, will jo jetzte au s'Wätter schön
gsi isch, e huffe Lüt gha und mir
hänn jo alles gä, dass es au Super
19

Dr Bummelsunntig
D' Fortsetzig
guet tönt het. Nach e paar Böge
häm mir denne dr näggscht Halt in
dr Aeschevorstadt gmacht, will jo
das viele Spiele scho wieder e grosse
Durscht verursacht het.
Am Sächsi hämmer denne im
Restaurant Aeschetörli no e Suppe
becho und me het sich nonemol
richtig gstärkt für die grossi
Schlussparade d'Freye durab.
Ais Stüggli nach em andere hänn si
miesse spiele in dr Freyestross und
es het au wieder Super guet tönt.
D'Termin
Wie's witergoht
Bravo an alli Musikante. Nach em
obligatorische Halt bi dr
Safranzunft häm mir no wie jedes
Johr e Abschlusständeli vor
unserem Chäller ghä, und pünktlich
am Zäni ha ni abwungge, womit au
dä Bummel e guets Ändi gfunde het.
I möchte mi nonemol bim Bummel
OK bedangge mir hets. Mit liebe
Griess und bis am näggschte
Bummel wo ich sälber sicher derbi
bi wenn's Gott will.
Euere Major
Pit
Esi sch Jo klar, die Fasnacht isch sicher nid s'Ändi gsi. Es goht no witer, und
zwor wie folgt:
28. Mai Ussdringgede und Spargelessen im Keller
13. Aug Schnörrliheuete Schränzgritte in Aesch
10.-13. Sept Jubiläumsreise
17. Sept Sujetsitzung
8. Okt Geburtstag Fuege-Fäger 1964 - 2004
15. - 16. Okt RambaZamba-Fescht in Oberwil
29. Okt Saufest Glorimore, Hofstetten
5. Nov Kellereröffnung
13.- 14 Nov Musikweekend Stoos
4. Dez Chlauseplausch
17. Dez Jubiläumsschlussbouquet
Meh seht sich!
21

D'Laag vo dr Nation
oder "Fasnacht à la USA"
So, jetz hogg ych doch scho 3
Meenet in mim 'Work Assignment'
do ääne im Land vo de (un?)
beschränggte Meegliggkaite imene
Örtli namens Morristown, in New
Jersey. Däre ihre Oberdotsch
names "Schorsch Busch" het sich
do au scho zaigt und e so es Verkehrschaos
usglöst, das schaffe nid
emol unseri Waggis und Schwoobe
wo daagdägligg nach Basel ine
kemme.
Anyway (wie de Yankee z'sage
pfläggt), letschte Samschtig bin ych,
uff em Wäg zum Shopping, doch
glatt yber dene ihri Fasnacht
gstolperet und zum Glügg han ich
mi Digicam drbii kah....
So, und jetz liebi FFs und Passivi ....
voilà: "Fasnacht" à la USA !
Dr Aafang vom 'Cortège' het die
örtligi Fyyrwehr gmacht, denn meh
weiss jo nie und presänz zaige isch
wichtig... Ganz schnittig, ganz
schnittig und e soo e scheene Waage,
mit viele rot/blau/wysse Liechtli,
Tröte, Hörn und Rätsche, het so
richtigg schön krach gmacht. Wär
ebbis fyr unsere Kinderguggeplausch
zum platzmache uf
dr Route ....
Et voilà, do chunnt scho die erschti
Gugge, d' Morristown 'Suburb-
Hyyler'. Meh beachti d'Eleganz um
die gschlosseni Formation. Au bi dr
Goschtümierig het meh diesjohr alles
gäh, d'Farbuuswahl (rotschwarz)
isch exquisit. Chapeau!
Nur d'Susafon's (wie ybligg) hän
wiederemol pennt und sich in d'mitti
iigreiht... Die hän halt kai Pit(-bull)
als Major....
Und wieso het's mi nid erschtuunt
wo ych's gesh ha.... d' Schotte,
gschickt tarnt als US-Combo,
wurschtle au do ääne mit. Ha noh
22

dänggt ob ich die als Terrorischtegrubbe
aazeige söll, denn wäre mir
die an de näggscht Basler Fasnacht
los. Aber ebbe, meh isch jo
menschligg...
So, do isch au scho die erschti
Scheese. Die mien
wohl Irischer
Abschdammig sy...
denn meh het 'Guiness'
vertailt. Und statt
Pfärdli setze die Bursche
hytzudaag uff e
Chevi V8 5.7Litter
Schluggspächt als
Aatrieb. Alles in allem
glunge ...
Jä und denn das, e
Waage! Und die
fuule Sägg
druffoobe sind
n i d e m o l
goschtümiert,
hogge aifach
umme, verteile
nyt, wingge drfyr
aber wie die Wilde .... meh merggts,
d'Konjunggtur isch wirgligg
schlächt do ääne.
He jo, wo d'Schotte sin, kah
d'Konkurränz nid wyt ewäg syy ....
d' Highlanders sin ebbefalls presänt
gsi, hän gfäggt und dudelet dass dr
aawäsende Masse anderscht worde
isch. Und so schnäll die ufftaucht
sind so schnäll sind die au wieder
verschwunde ..... unhaimligg ....
Und denn het die gröschti lokali
Gugge, d' Morristown-Grytte, mitsamt
em Voortrab, d'Ufwaartig
gmacht. Statt s'klassiche 'Weisse
Rosen' vo unserne Grytte, hän die
grad mehrmols 'Born in the USA'
gschränzt. Es isch comme toujour dr
helli wahn gsi und d'Masse het tobt.
Au das Goschtüm isch e Wucht,
im klassische Schwarz-wyss,
dr Chäpper mitsamt
Befääderig e Creation
do chunnt dr Dior
sogar ins Schwärme.
Dr Vortrab
ganz in rotschwarz
(wo die
d e z ä n t e ,
vollschlangge
Scheenhaite stilsicher
hervorghoobe het) het
für Fahneschwingendi
unterhaltigg gsorgt.
S'Volk het gjublet! Us
guet bekannte Kreis
han ich denn noh
vernoh, dass es zu
kaine nennesswärte Ketchupschlachte
koh isch .... d'Cops (ami
fyr Schugger) hän nid miesse ygriffe
....
Jo, und scho isch es denn au bald
duure gsi, dr Schluss vom 'Cortège'.
Dä het die benoochbarti Fyyrwehr
gmacht, denn meh weiss jo nie ob
die Lokali zu däm Zytpunggt noh
nuechtern isch und ..... und au do:
presänz zaige isch partout wichtig...
!! Aber ob au die noh 'trogge'
23

sind isch froogligg...
So, das isches ebbe gsi. E Putzkolonne
het's au nid bruucht, do
Räppli ebbis unbekannts isch. Leider
isch in de Baize nochhär aber au
gar nid viel los gsi, keini Gugge wo
iineplatze, keini alcopopsvolldröhni
Teenager, keini Bängg,
kei Schunggle zu 'Anton aus Tirol',
kei Intrigiere, keini Schränzer- und
Häxekaffi, kei Lutz, kei Holdrio,
kei Fäldschlössli und scho gar kai
Uelibier (drfyr Budweiser... Light !!)
und erscht rächt kai Mählsubbe.
Ebbe, do ääne weiss me was
abfyyre haisst ! Dass ich nach unsere
Drei Scheenschte Dääg noh ha
dörfe das miterläbe isch wie
d'Kröönig uf dr Low-Carb Torte
gsi! Aimoolig!
Ich hoff Ihr alli hän durch mi Bricht
d' "good Vibrations" vo däm Umzug
mitbecho und wär weiss, viellicht
lauft mir dr Oschterhaas au
noh ybere Wäg ! Das würd mi denn
nomol zumene Bricht verlaite....
Anyway, wynsch euch allne d'ääne
in good ol'Basel witterhin e tolli Zyt
und e gueti Summerpause !
So long from New Jersey!
D'Lyra-Cynelle
PS: So, und jetz han ych Haimweh!
Aber ebbe ...
24