Maniffesto Llywodraeth Leol 2017 Local Government

Diwygio cynllunio
Mae’r system gynllunio bresennol wedi ei dylunio i
wasanaethu datblygwyr mawr masnachol, yn hytrach na
phobl gyffredin. Mae cynlluniau datblygu lleol yn cael eu
cynhyrchu i gwrdd ag anghenion yr Arolygiaeth Gynllunio
yng Nghaerdydd yn hytrach nag anghenion cymunedau
lleol. Pan ddaw’n fater o geisiadau i godi tai unigol,
mae’r byd fel petai ben i waered. Gwrthodir caniatâd i
ddatblygiadau bychain cynaliadwy. Mae stadau tai enfawr
yn cael eu codi ar dir glas, yn groes i ddymuniadau’r trigolion
lleol, heb y buddsoddiad angenrheidiol mewn ysgolion,
ffyrdd a gwasanaethau lleol. Mae cynlluniau yn dweud
eu bod yn ystyried yr amgylchedd, y gymuned a’r iaith
Gymraeg - ond yn ymarferol, nid ydynt yn cyfrif am fawr
ddim. Mae’r weinyddiaeth Lafur yng Nghymru ond gwneud
y sefyllfa’n waeth, gan basio Deddf Gynllunio yn 2015 sydd
wedi dwyn grym oddi wrth gymunedau lleol.
Byddwn yn craffu ar Gynlluniau Datblygu Lleol sydd wedi
eu datblygu ac sydd wrthi’n cael eu datblygu. Bydd ein
cynghorwyr yn gweithio ynghyd i’w newid a’u gwella, gan
fonitro pob cam o’u datblygiad a’u gweithredu. Lle gwelir
eu bod nhw angen newid, byddwn yn brwydro i’w hailysgrifennu,
er mwyn gwneud yn sicr eu bod yn cwrdd â gwir
anghenion cymunedau Cymru.
Mae Plaid Cymru wedi ymrwymo i sicrhau fod gan bawb
gartref diogel a chyfforddus. Bydd ein cynghorau yn cymryd
camau i ofalu bod landlordiaid preifat yn cael eu hatal rhag
gosod tenantiaid mewn tai o ansawdd isel.
Bydd Plaid Cymru yn parhau i frwydro dros system gynllunio deg ar lefel genedlaethol. Ond fe all cynghorwyr
unigol wneud gwahaniaeth ar lefel leol, a dyna wnaiff cynghorwyr Plaid Cymru. Byddwn yn brwydro dros ddatblygu
cynaliadwy sydd yn fforddiadwy, ac wedi ei wreiddio yn anghenion y gymuned.
38