xixón de novela pliegos. PDF File

Xixón de novela
un percorríu lliterariu pela villa de les milenta histories
Oficina Municipal de la Llingua
Xixón, 2007

3
Conocer Xixón ye querela
Mª Xosé Rodríguez López
La Oficina Municipal de la Llingua de Xixón quier sumase a esta Selmana de les Lletres Asturianes
dedicada a la narrativa con esti Xixón de novela: un percorríu lliterariu pela ciudá de les milenta histories,
que quier ser un primer averamientu a esta villa mariñana al traviés de les histories que los y les escritores
n’asturianu fueron posando nes sos obres nos caberos trenta años.
Pue ser qu’a lo llargo les llectures se perdiere dalgún retayu, dalguna fueya , dalgún cuentu,
dalguna novela; si asina fuere que disculpen los o les autores, nun ye intención de la qu’esto escribe
dexar nada ensin poner, pero esbillar ente más de doscientes obres les güelgues lliteraries de Xixón,
ye una xera bien prestosa pero nada fácil. Como tampoco ye fácil conocer Xixón.
Conocer Xixón ye querela y querela ye tastiar la mar dende l’Atalaya, la Escalerona o El Rinconín;
querela ye pasiar peles pindies y arrequexaes cais del vieyu y altu barriu que la vio nacer y percorrer El
Muru una y otra vuelta si ye que nun tira’l nordés, qu’entós hai qu’enfilar pa contra’l Muelle a ver españar
los cachones na Punta Lequerique si ye qu’hai suerte; querela ye perdese ensin priesa peles sos parroquies
o sentase nun bancu en Begoña; querela ye esi pinchazu de señardá que te fura l’alma cuando pienses nos
vieyos cines y cafés que yá nun esisten más que na alcordanza y nes semeyes, que nun ye poco;
querela ye saber de los sos barrios, les sos places y los sos parques;
querela ye saber de les histories de la xente que nella vivió…
Too ello escuéndese nes fueyes d’esti llibru pa que con una llectura posao o al debalu conozamos
un migayu más esta ciudá de novela.

5
Álvarez, Paco
Paséu dominical
En poques pallabres. Trabe. Uviéu, 1998
«Ella yá nun-y soltó’l brazu en tol paséu, nin cuando baxaron del cerru col Nordés xuguetón dándo-yos
achuchones. Dexáronse llevar unos minutos igual que barquinos de papel pola riada de xente vistío como pa
una boda que manaba dende la ilesia de San Pedro al afechar la misa de les doce. Finalmente, aturullaos pol
marabayu de perfumes y voces que despertaben a la salida del templu, buscaron un pocoñín de tranquilidá
camín del puertu deportivu (...)» Páx. 51
«Con falsa indiferencia pasaron per delantre de les superpoblaes terraces de dos chigres onde la clientela
se rindía, a esa hora festiva, al vermú y a los aperitivos (...)» Páx. 52
«Miráronse los dos sorriyones poniendo caún dalgo de la so parte pa maquillar nel xestu’l cansanciu de
la vieyera y el mieu al futuru cercano. Caminaron hacia El Fomentu con pasu llandiu. Quixo saber él si taba
fatigada y ella, que tamién sabía mentir a lo bonaz, retrucó-y que non.
Llegaron hasta la playa de Poniente, colonizada por cientos de cuerpos aliñaos con cremes bronceadores
que taben turrando como castañes a los pies d’un sol imponente, a toa caldera. Él, de regüeyu, cazó furtivo
na cara d’ella un llatigazu de dolor y pidió-y con elegancia la retirada (...)» Páx. 53
«(...) Los dos, cola barata felicidá de tener pactao’l menú, cruzaron cavileños la cai y afayaron fresca
solombra baxo los arcos de la Marqués de San Esteban. Ella, desahuciando de la mente cualquier mal badagüeyu,
diba pensando no guapu que quedara’l día esi domingu de xunu. Él, en que cuando-y faltara aquella
mano güesuda pa garralu del brazu yá nun diba valir la pena detenese a un pasu y mediu del despeñaderu en
dalgún paséu dominical solitariu pel cerru de Santa Catalina» Páx. 54

Álvarez Morán, Nel Ricardo
Esperances
Otros cuentos d’estos díis. Conceyu Bable. Mieres, 1981
«Aquel díi Xixón taba en calma, entavía podía güeyase la borrina upándose. Facía un momentu que les
lluces de les cais s’apagaron, mentantu nes cases diben llevantándose, sele, les persianes. Los trabayadores
entamaron a surdir de les sos colmenes, empobinando pal trabayu. Ente tantu los señores dormíen como
gochos dempués de comer. Tampoco faltaba dalguna vieya que diba a la misa les ocho.» Páx. 15
Amaro, Nel
Novela ensin títulu
Azucel. Avilés, 1993
«Pol “Cafetón” yera perconocíu Xicu-Xabel.
Pol “Cafetón”, el Café preferíu na ciudá polos poetes y escritores, porque los
pintores, que tamién paraben, a delles hores y nuna cantidá menor, escoyíen pa les
sos tertulies otru nomáu Café “Oriental”.
Tamién lu atopare delles veces más nel Salón d’Actos de la Caxa d’Aforros,
nunos recitales poéticos y llectures narratives, feches polos poetes y narraores, asín
como polos ensames poéticos y lliterarios más conocíos na rexón, col sofitu de la
Universidá Popular y l’Ayuntamientu de Xixón.
Recitales y llectures aonde taba xente como los llangreanos de “Lluna d’Abaxu”,
Albertu Vega, Munárriz y Ricardu Labra; los xixoneses de “Cálamu”, Nachu González,
A. Cuesta, Guerra y Lena G. De la Calle; los avilesinos de los “Cartafueyos de
cristal” y “Xueves lliterarios”, Felicísimu Blanco, Leopoldo Sánchez Torre, Bueno y
Marián Suárez; los d’«Oliver», Botos, García Martín, Pelayo Fueyo y Piquero, o los
del Atenéu Obreru, en castellán unos y otros n’asturianu, Rosa Espada, Manuel A.
Delgado, Xesús R. Castellano, Roxana Popelka y Bolado (…)» Páx. 28
6 7
«La ciudá, dempués de cuatru años, siete meses y diecisiete díes, más los cuatru de viaxe, por cuenta de
vinir arrodiando tolo que pude, ensin ganes d’aportar, aseméyase a la d’entós.
Y munchu.
Echando fumu, con barricaes, muyeres d’Aplicaciones Ellétriques Asturianes y Camiseríes Xixón trancaes
nes sos fábriques, escorribandes y amarraces ente trabayaores y policíes, con botes de fumu, pelotes de goma,
bales de les de foguéu y tamién de les de verdá, por un llau, y piedres, barres de fierru, boles d’aceru y torniellería,
pol otru.
De camín pal Páséu Marítimu, cola intención de dame una calonaína, pa siguir andando, daqué al
debalu y poles afueres, onde ta anguaño asitiáu l’hípicu y de rapacín suañare col ciclismu, ellí ablucáu por
cuenta’l puxu y estilu d’aquellos homes.» Páx. 137
Amaro, Nel
Les siete vides de Xulián Cuesta
Prietu Jazz. Avilés, 1993
«Gracies a la so profesionalidá, al so munchu oficiu d’años y hores garráu al guía, p’arriba y p’abaxo
peles cais de Xixón, y tamién a la so munchísima potra y casualidá, algamamos sanos y salvos el mio destín.
-Adosinda, ¿númberu…?
-Equí mesmu val . Gracies.
Naide nel portal. Anque saliendo yá del ascensor atópome col mio vecín Vicen, de camín, sera yá l’home
igual que tolos días, pal so trabayu cotidianu nel «Hispanu Americanu», antiguamente el «Xixón».
A los mios «bonos díes», él, Vicen, arrepostió con un «¿coñu, don Xulián, qué-y asocede güei?». Y
darréu d’ello, un glayíu, col qu’atraxo nel intre l’atención de la so collacia.(…) Páx. 77
«Entamando yo vivir y morrer otra vida, la tercera que sedría, de Xulián Cuesta Noriega, llonxe del
llugar, de la cai Adosinda, del númberu 4, del segundu pisu, de la lletra C, de Xixón y Asturies.
Lloñe tamién de la mio Deva. Y de tol vecindariu. De Vicen y de Tere, la pareyina de llocos qu’escriben
a toles hores cuentos y noveles de terror y fantasía, y poesíes erótiques, pa cuandu el so fíu Mauro sepia lleer
dafechu.» Páx. 80

Amaro, Nel
Segundu viaxe
Entós cuando ñevaba. Ámbitu. Uviéu, 2002
«Otru sitiu afayaízu pa los nuesos
xuegos y falancies yera’l Parque Isabel la
Católica, triándolu coyíos de la mano,
¿pa que negalo agora?, dándonos inocentísimos
besinos y masuñándo-y les
sos tetines, un par de retueyinos que
l’últimu branu, quiciás nel sesenta, que
pasáremos xuntos, yeren toa una promesa
de la moza, espolletada, guapina de
cara, unes piernes perbién torniaes y les
tetines…, que sedría col pasu d’unos pocoñinos
años más una muyer de 10, si se
me permite dicilo asina. (…)
Xixón yera’l sable y les foles, la mar y
el yodu, los xelaos y el parque d’Isabel la
Católica, el cine Robledo y Carmen Miranda y la Williams, la cai Cabrales y Cuadonga, de la que nun supe
enxamás nengún de los sos apellíos. Y yera tamién el ríu negro del mio pueblu, del cualu me separtaben pa
dir a Xixón unos díes. Albandonando les sos agües coles sos balses y fontanes y la cuadriella, col Sandunga,
el Peque, el Zapa, el Rana, llugar y collacios aonde y colos cualos naciere la mio vocación lliteraria, de
xuru qu’aquel día, alcuérdome como si fuere güei mesmu, un día 13 d’agostu del añu 1951: tábemos toos
nel agua, cuando oímos unos ruxíos y glayar a los paisanos “Tiros, ¡son tiros de fusil!” Y ensin pensalo dos
veces, cruciando’l ríu aportamos a la llera, aonde los estamplíos yá yeren tamién una riestra chispiazos.»
Páx. 124-126
8 9
Arbesú, Xulio
Misión Pelayo
ALLA.Uviéu, 2002
«Munchos soldaos protestaron con susurros a la escontra del so cabezaleru al veme coles manes ataes
al rabu del so caballu. Ensin embargu, yo diba sorriendo cuntándo-yos cuentos de les mil y ún nueches,
que-yos prestaben como agua de mayu. De Xixón, que daquella nomábase Xixia, namás yera a vese dende
lo cimero del colláu pel que llegáremos una mata tremenda al frente y enllanaes de llamuerga y caña yá más
pegaes a la mar.» Páx. 96
Bande, Ramón Lluis
La muerte de los árboles
Ámbitu. Uviéu, 2006
«- Cuasi nun hai xente pela cai.
- Fai munchu fríu. Nadie sal de casa un sábadu a estes hores si nun tien que facer.
- ¿Por qué esi edificiu tan grande tien tolos cristales rotos?
- Ye una fábrica abandonada. Ellí hai años trabayaba muncha xente. Dende que dexaron de trabayar ta
abandonada y hai xente que se divierte estrozando edificios abandonaos.
- ¿Qué facía la xente que trabayaba ehí?
- Yera una fábrica de loza. ¿Ves?, si mires bien tovía se llee naquella paré blanca’l nome: Fábrica de
Loza La Asturiana.
- Sí, yá lo veo. ¿Y qué facíen?
- Xarrones, vasos, platos….munches coses.
- ¿Por qué yá nun los fain? ¿la xente yá nun necesita eses coses?
- Sí, fíu, eses coses siguen faciéndose, pero agora fainles n’otros sitios. Tenemos que dir un poco más
rápido, fíu, asina nun llegamos. Vamos perder el tren.
- ¿Y la xente que facía xarrones, vasos y platos, qué fai agora?
- Tien otros trabayos.
- ¿Tuvieron que deprender a facer otres coses amás de xarrones, vasos y platos?
- Claro. Munchos trabayen agora conmigo faciendo barcos.

- Tien que ser mui diferente pasar de facer coses tan pequeñes a facer coses tan grandes.
- Corri nin, que perdemos el tren.» Páx. 14
Bande, Ramón Lluis
La ciudá del nuestru primer amor
Esconderites. Ámbitu. Uviéu, 2002
«L’atalaya ye la capital de les gaviotes. Un sitiu onde dalgunes persones vamos a ver si siguimos vives. A
ver si’l ritmu del corazón inda cute al ritmu de los sos xuegos. Nun hai sitiu pa la mentira. Hai sitiu pa cuasi
tolo demás. Pero ye tierra de palabres verdaderes. Como un cementeriu indiu.
Una cometa sobrevuela’l polvorín. Un polvorín en tiempu de paz. Un sitiu inútil. Una apariencia. Pa
un llau ta la ciudá. Dende equí vense les grúes d’un pasáu dignu y honrosu, les cais tán remozaes pero inda
guarden les memories de les carreres de los trabayadores y les marques de neumáticu quemáu. Dende equí
vese’l mio barriu. Esi barriu onde a les dos salíemos de clas y coincidíemos colos vecinos que teníen los
monos enllenos de grasa y llegaben famientos y alegres. Depués de sonar la sirena. La nuestra y la d’ellos.
El mio barriu yera un barriu a ritmu de sirenes que siempre tocaben los otros. Un barriu qu’agora nun soi
alcontrar. Un barriu que yá nun ta.
Pal otru llau ta’l mar.
En mediu esti cementeriu indiu, esta capital de les gaviotes, onde too pue pasar menos la mentira. Yo
deprendí a miralu pelos güeyos d’ella, a descubri-y el corazón. Ye un bon sitiu pa enfrentase contigo mesmu.
Eso deprendílo colos güeyos d’ella, que brillaben aquella nueche. Yera un poco más p’abaxo. Les foles rompíen
contra los nuestros pies. Pero l’atalaya ente les peñes tamién ye un bon sitiu pa facer l’amor.» Páx. 41
Berros, Xulio
Maxa de branu
Editora del Norte. Mieres del Camín, 1996
«Nun vos cunté entá otres cosines perimportantes. Vivo nun sitiu, que pal mio gustu nun ta mal, nómenlu
Gijón, anque a min préstame “un cachu” llamalu Xixón, más que nada pola rabia que-y da a mio ma
cuando lo siente. Vivo pa la parte del centru, con tolos problemes qu’eso tien pa una rapaza comu yo: nun
10 11
pues pisar la cai porque hai munchu tráficu, y el parque
qu’hai de cote de mio casa ye inútil porque con esto de les
drogues y eso a mio pá nun-y fae gracia que baxemos, magar
enxamás nun vimos denguna cosa rara per ehí, pero hai
delles órdenes de los pas que nun se puen discutir, val más
callar y puntu, comu a ellos-yos presta llantar.
Lo bono que tien la fastera de Xixón na que vivimos ye
que tres cais p’abaxu ta la playa y eso sí que ye una suerte,
más que nada en cuantes entama la primavera y los díes empecipien
a ser más llargos.»
«Percorriendo la oriella hai delles coses que me llamen
l’atención. La primera ta pa onde la escalera nueve y ye que
siempre hai una parte na que nun se baña la xente. Una vegada
papa desplicóme nun sé que d’unos diques d’El Musel
pero en verdá nun entendí nada de lo que me dicía. Bono,
pues nesta parte siempre paro y quedo clisada colos rapazos
que faen surf, anque la verdá al llau de lo que se ve na tele
estos nun tienen muncha idega, pero hai dalgunos que…
Llueu tiro p’alantre y dende la escalera seis, los mios güeyos
espeten nesa torre afilada con forma periscopiu, que tien
unos relós, una pequeña estación meteorolóxica y un piñu
banderes. Sí ye La Escalerona, l’estragal de la sabla que xixila de los bañistes, y enseña gayolera los sos tres
relós a la xente que caleya yá pel muru yá pela arena, y amuesa la so estación meteorolóxica toa enchipada. Ye
ún de los sitios que más presta ver de Xixón, paez l’ama la playona, amás de pocu p’acá afatáronla un poquitín,
que la probe taba fecha polvo. En pasando La Escalerona la mayoría les veces doi la vuelta, nun seya qu’a
mio ma abúlte-y que tardo muncho y vaya dar avisu a los salvamentos que se-y perdió la neña.» Páx. 22
«Al mio parecer y comu yá vos cunté, préstame de manera esti pueblu nel que vivo, y yá sabéis un par
de sitios nos que m’atopo perbién, anque tovía nun vos falé del requexu al que más quiero, por que nun sé
si vos pasará neto, pero dalgunos llugares préstente, mentantu qu’otros quieslos comu si fueren parte cimera
de la to vida. Bono, el sitiu más guapu pa min de Xixón nómenlu “El Rinconín”, y debe ser l’únicu de
Xixón que nun termina nin “-on” nin “-ona” hasta neso ye más duce, y sinón camentar nestos: Tragamón,

Molinón, Escalerona, L’Acerona. Si lu conoces ties que terminar queriéndolu, ta a lo cabero de la playa,
dempués del Piles. Ye un curviellu de pequeños pedreros. Tien unos requexos perguapos pa ver tolo que ye’l
Muru, y cuasi cuando fina tien hasta una “lloca”, sí home, la famosa “Lloca El Rinconín”, una estatua que pa
muncha xente ye de lo más espantible. La verdá ye que a min de pequeña nun me facía plizca gracia, ye más,
alcuérdome d’una vegada que facía munchu vientu y que mio pá entamó a cuntar hestories de mieu de tala
paisana, que garré-y un poco de zuna a la lloca.» Páx. 32
«Dende l’añu pasáu solemos dir los
cuatru xuntos, damos un paseín pela rodiada
de Xixón y gracies a ello conocemos
lo que mio pá noma “les parroquies rurales
del pueblu”. Nun sé bien cómu lo
fae, pero conoz toles caleyes qu’arrodien
Xixón. Al entamu nun me facíen plizca
gracia estes escursiones, porque la verdá
metíanos per ca sitiu, que llegaba a casa
frayada. Sicasí agora cuasi toi deseyando
que llegue a casa del trabayu, xinte, llea’l
periódicu y colemos, siempre que’l tiempu
lo permita.
Pa esi día, según dixo la nueche anterior na cena, tocaba dir a La Camocha y baxar llueu a Caldones,
travesando Llavandera, porque pruyía-y ver la escuela vieya pa enseñanos una placa que va tiempu punxeren
los escolinos n’alcordanza d’un escritor asturianu.» Páx. 42
«-Bono pero eso dempués, mentantu xintamos unos bocadiellos que traigo equí- tarazó María lo que yo
taba entamando a dicir mientres miraba pa un llau y pa otru de la Plaza Mayor ensin dulda buscando daqué o
daquién-.Bono, venga, vamos pal Cerru, que güei col día que fai tien de tase perbién perellí ente la yerba.
Y ehí nos tenéis a los tres camín del Cerru. Tamién ye otra casualidá, pero ésti ye otru de los sitios a los
que más me presta dir, y lo que de verdá me gusta ye llegar al Cerru al traviés de les cais de Cimavilla. Nun sé
si vos pasará lo mesmo a vós pero a min eso de ver los barrios vieyos de les ciudaes préstame pola vida, y tengo
la suerte, que non too va ser malo, de tener una ma que primero de la Ximnasia daba clase d’otres coses y
poro fartucóse de visitar Xixón colos escolinos. (…)
12 13
Bono yá vos siguiré cuntando coses de los mios que me toi
enrollando y agora trátase d’otra cosa.
Xubimos caleyando pela fastera del Club de Regates, una cai
de lo más pindio que conozo. En pasando San Eutiquio cuasi
quedo siempre ensin aliendu, pero paga la pena l’esfuerciu.
Ficimos el camín cuasi ensin falar pallabra, y acabante entrar
nel parque, María xuxurió tirar pal delláu la fonte. Nun retrucamos
nin Tato nin yo. María empobinó pela falda del Cerru y
entrugó si nos paecía afayadizu’l sitiu.(…)
Nun sé si conoces esta parte de Xixón pero ye guapa enforma,
a min préstame cuandu vamos ellí y nos tiramos ente la
yerba. Ye ún d’esos sitios nos que paez que tolo que tas viendo
ta al algame, lo mesmo’l finxu l’horizonte, que’l Musel, qu’ El
Rinconín, La Providencia, el Cai…» Páx. 65
«Mentantu xintábamos, mio pá fizo l’anuncia de la escursión
que tenía preparada pa pela tarde si yera que paraba de
llover. Cuntó que yera una salida llarga y que nos diba dexar
cansos pa unos díes. Tratábase de dir a la parte d’arriba de
Deva, a Monte Deva a un Área Recreativa que-y falaren que yera
perguapu, pero a min abultábame que debía ser la de coyer dir
hasta ellí, polo xeneral cuandu planea una salida y ye pa dir al
Monte, venimos pa casa frayaos, pero per otru llau y viendo
que’l día trescurría y les coses nun paecíen dase comu pa ver a
los nuevos collacios, cásique petecía la idega.» Páx. 86
«Enantes de sacar otru de los papelos del sobre relleo la carta d’Andrés camiento nel día que lu conocí
ellí nel bancu debaxu de la “Lloca El Rinconín” y no mal que lo debió pasar el neñu, y agora de sópitu paez
que se-y arregla un poco la cosa. ¡Cómu me presta! (…)
Acabante de lleer la carta de Tato remembro cuandu lu conocí, engarráu cola barandiella del Muru, con
aquella camiseta col dibuxu de la interrogación y fechu una llaceria.» Páx. 114

Bello, Xuan
La cueva del olvidu
Ámbitu. Uviéu, 2006
«A tres kilómetros de Xixón, nes afueres de Somió, ta la residencia d’ancianos. Llombes verdes, carreteres
que van de lo mui curiao y burgués a caleyes semiasfaltaes y comíes pola sebe onde parez inda posible la
lluz d’una tarde perdida de 1970. De xemes en cuando una casería o un llavaderu afogáu ente los xalés y les
urbanizaciones de nueva construcción. Dende hai unos meses, siguiendo una pista que me descubrió Mael
González Arias, vengo hasta esti caserón de paredes fríes y de color pizarra, cuasi azul: un color que nada diz
equí, onde ye cuasimente estranxero y desentona si lo compares cola llera amarronao que se descubre, suelto,
nos sucos de la carretera y que permite que crezan, ralos, les espigues y los artos; un color azul nocturno,
con sombres seique de lluna, ye esto que se ve nes paredes del xeriátricu, un color apropiao quiciabes pa un
símbolu mortuoriu abandonáu nuna tierra n’abertal nada hospitalaria.» Páx. 7
«Cuando salí de la residencia d’ancianos, y me dirixía a la carretera pa pañar l’autobús 10 que m’habría
carretar al centru de Xixón, fui dándo-y vueltes a aquello. La historia, por tapecida, podía ser interesante.»
Páx. 15
Caldevilla Vega, Xosé Nel
Xulgáu d’istruición
númberu 1
Lletres asturianes nº 29. ALLA. Uviéu, 1988
«A les doce y media aportemos al Trisquel.
La xente arremolinábase d’un llau pa
otru cellebrando’l nuevu añu. Tol mundiu
tiraba de champán. Yeren les doce y media,
eso yá lo dixi, ¿verdá? A esa hora quedáremos
colos demás pa dir perehí. Pidimos daqué de
beber y Beto púnxomoslo.» Páx. 72
14 15
Caldevilla, Nel
Para Pilar con todo el cariño
Lliteratura nº 12, branu. ALLA. 1997
«Garró l’avenida Schulz y enfiló pa escontra La Puerta la Villa. Al contrario d’otres veces, nun s’ocupó
de los escaparates, nin de la xente, nin de nada. La so cabeza sólo naguaba por llegar a Begoña. Nel semáforu
antes de garrar la cai Cuadonga un neñu metióse-y ente los pies. Ella miró pa él.» Páx. 13
Cobreros, Berto
Siete
Lletres asturianes. ALLA. Uviéu, 1993
«Entamó a lleer, comu fuxendo, aquellos papeles avieyaos pel tiempu (yera la primera vegada que xubía
al sobráu d’aquella casona vieya, que mercare diba un mes, a les afueres de Xixón. Porque asina vives en
Xixón y nun vives, ¿nun sabes comu ye? Vives ensin vivir, que d’eso se trata.» Páx. 39
Cobreros, Berto
Les 4:30
Lletres asturianes 80. ALLA. Uviéu, 2002
«Yeren les cuatro y cuartu d’una tarde chornosa de branu y Tino barruntaba una bona tarde comercial
con ventes masives de ventiladores. Tenía apartáu’l microondes de rebaxa pa una clienta, una barbacoa pa un
paisanu y un encargu de seis cartuchos de camping-gas (cuando s’enteraron los recargaos hebo dalgún que
s’infló un pocoñín y too). De xuru qu’esti mes diba tener otra bonificación que, dientro quince díes, diba
notase na xubilación, como tales bonificaciones que, pasu ente pasu, tenía ganaes a lo llargo de trenta y cinco
años de trabayu duru naquella tienda d’ellectrodomésticos asitiada nos Xardines de la Reina, enfrente’l
muelle.» Pax. 58

Cobreros, Berto
Blandíu (I)
Escritos de papel rosa. Editora del Norte. Mieres del Camín, 1994
«Llevaba dos hores y cuartu caminando ayenu
penriba d’aquel bancu de Begoña, y nadie nun sabía
qué facía ellí. (…)
El paséu taba ermu. O polo menos ellí nun vio a
nadie. Y taben ellí. Pero elli nun los vía porque nun
reparaba.
(Tol día maxinando. Tol día faciendo uno y otro.
Tol día retolicándome les idees. Tol día queriendo facer
daqué cosa y tol día faciendo daqué otra cosa).
La xente entamó a apetiguñase. Más que xente nun
había. Too yera “xente qu’arrodiaba”. Too yera “xente
que miraba” pero nun reparaba.
Too yera xente. Indiferente, camentaba pa sí; la
xente non: “Vaya colocón”; “non, vaya mamada”; “el
casu ye que nun paez que sea tal”; “probe”; “pues nun
viste mal, eso vese”.
Colos güeyos nel suelu infinitu, daba vueltes y más
vueltes penriba’l bancu del paséu Begoña, ausente, sin
enterase que yera’l puntu mira de tola xente. D’esmenu,
sintió ruíos de xente, pero nun sabía lo que yeren.
Cuandu paecía que finare, entamaba otra vez.» Páx. 37
16 17
Cobreros, Berto
Fausto, taxista en Xixón
Escritos de papel rosa. Editora del Norte.
Mieres del Camín, 1994
«Cuandu lu víes caminar pela cai diba selemente, comu
si ficiere muncha calor. Buenu, yo alcuérdome que cuando-y
pasó lo que a ti voi cuntar, díbemos los dos pela cai Marqués
de S. Esteban, perbaxo los arcos y, nuna d’estes, yo noté-y
daqué raro debaxo la chaqueta. Y díxi-y que qué yera eso.»
Páx. 51
Cobreros, Berto
El Saxo
Escritos de papel rosa. Editora del Norte.
Mieres del Camín, 1994
«Nun sé qué tocaba, nin quién lu tocaba. Nun m’alcuerdo
si taba nel “Cantábricu” o nel “Café Diariu” o na “Rula”,
pero ¡Cómo sonaba!
(A los diez minutos d’entamar a falar dímonos cuenta
que yá taba too dicho. Que yá nun teníemos ná que dicinos,
que yá mos conocíemos pa siempre, que yá taba too agotao,
que teníemos que colar a otru sitiu a la gueta d’otru/a amigu/
a al qu’entamar a fala-y, al minutu y mediu de conocelu/a,
con un saxo de fondo na barra d’un bar.)» Páx. 66

Cobreros, Berto
Abocaos
Trabe. Uviéu, 2004
«-. …Oye, Mario, ¿cómo nun mos cuentes lo que ti pasó aquella vez en Xixón?…¿Cuálo, ho?… Coimes, aquello que-y cuntasti a
Lin l’otru día …¿lo del Mike’s?… sí, home… Pues, ná (pa qué quería más), foi un día que pillé LSD en Xixón y garré un colocón… Metíme
nun Mike’s porque tenía fame… yeren sobre les diez, la música al altu la lleva, la xente devorando bocates americanos…La xente d’afuera
pasaba delantre l’escaparate: yo siguía colos güeyos les sos goyaes. Miraben pa dientro, pal barrullu…Había nel cristal un vieyu d’esos que la
ciudá nun quier…, qu’abría unos güeyos de fame y odiu… Unos güeyos que, mirando pa dientru, interpretaben lo qu’ellí taba pasando. Yo
quedé mirándolos y entamé a ver nellos que la mesa del requexu taba camudando en bocata americanu y los qu’enantes comíen, camudaben
en tocín de gochu y en carne picao amontonao enriba la mesa, menos ún, el neñu que camudó en cebolla.» Páx. 48
«Pero’l braeru saltu que pegó Llarina foi pa Xixón, cai l’Argandona, númberu 79, nun pisucu d’un
cazador, amigu de Xurde, que-y dexó por bien poques perres, porque non pocos yeren los trofeos de xabalí
que-y consiguiere Xurde pa la so sidrería (pues nun yera famosa nin ná la sidrería polos trofeos que tenía y
pola carne de xabalí que preparaba…).» Páx. 72
«De magar aportó a Xixón, y depués de llorar la despidía con so pá, Llarina quedó sola nel pisu y propúnxose
que nel mes d’agostu tenía que decidir qué diba facer equí, pero viose sola, ensin so pá, so ma,
los bichos, el pueblu… y púnxose a sollutar otra vuelta. Nel mes que siguió, foi abondes veces a la playa San
Llorienzu, poníase siempre a l’altura la Escalerona, ellí bañábase, secaba nel sable y camentaba, camentaba,
fasta que-y mancaben los camientos y cuando cansaba diba pa La Flor del Agua, tomaba una botellina y oyía
aquellos sones nel bar que la tresportaben pa Saliayu, pueblu qu’ella arreglábase perbién p’asitiar naquel
mapa qu’hai a la entrada, pa la manzorga, y nel que nun vien el so pueblu, nin munchos otros.» Páx. 118
«Y setiembre aportó a Xixón y los turistes, que s’averaren a la ciudá como les foles al sable: pa colar otra
vez. Y asina colaron pa Llión, pa Madrid, p’Alemania, pa… Y el día unu nel IES del Paséu Begoña, como
dicía ella, pa matriculase nun Ciclu Formativu de Técnicu Superior n’Agospiamientu, dempués de tar un
branu dándo-y vueltes na tiesta.» Páx. 122
18 19
«Cuando aportó a Xixón, Llarina tuvo que mercar un reló porque’l tiempu en Xixón nun yera satamente
igual qu’en pueblu o, polo menos, ella nun acertaba a midilu como lo facía en Saliayu. Decatóse d’esto bien
llueu. Los ruíos en Xixón enllenaben el so cerebru, el so estómadu y, ensin poder evitalo, el so cuerpu enteru.
Dende llueu nun yeren los ruíos del pueblu, nin los nocherniegos nin los diurnos; too en Xixón yera ruíos a
cualisquier hora, en cualisquier llugar, tolos díes, toles nueches y costó-y abondo avezase a ellos.» Páx. 134
Crespo, Roxelio
Pensái nos nenos
Cuentos encantaos. Trabe. Uviéu, 2006
«Si conoces Xixón, sabes que na cai Covadonga,
pa según te metes pela ilesia los campinos de Begoña,
camín a la plazuela San Miguel, enriba la primer farola
de la isquierda, hai un lletreru de fierro, pintáu de negro, pa nun desentonar
pa col restu la lluminaria, onde se llee “Automivilistes, pensái nos
nenos”.
Desque’l mio amigu vio per vez primera esta señal, enxamás la pudo
quitar de la cabeza. Facía-y gracia qu’esistiere una alvertencia como esa
nuna cai que mayormente yera peatonal y onde lo que más había yeren
pensionistes, que pasaben les sos hores de parola nos bancos, a la solombra
los humeros, los sabugos y los magnolios…» Páx. 45
Díaz, Adolfo Camilo
Satanás
Venus, occidente y otros cuentos éticos. Trabe. Uviéu, 2001
«Necesito aire. Xixón ye una ciudá ensin aire. Al pesar de la mar y del
frío l’aire ta como calentuzo y tien un tastu a mexos. Prefería tar n’Uviéu
pero les órdenes son les órdenes.

Belarmo, a les ocho la tarde, taba nel cine Robledo viendo Satanás. Teniéndolo confirmao seis espeutadores,
cuatro de dreches de tola vida, y un comunista y un anarquista y l’acomodador y la taquillera. Viéronlu
entrar, viéronlu quedar, viéronlu salir. Salió del cine a les nueve y diez. Y foi pa la casa de Xulia. Llegó
a les nueve y media y yá-y abrió la casa Donato.» Páx. 71
de Fausta, Sabel
Barriu de Cimavilla
Lletres asturianes nº 15. ALLA. Uviéu, 1985
«¡Barriu altu de Cimavilla! Llábanes de piedra. Mofu y verdín. Arumes d’ocla y raba. Finxu. Vixía.
Amante etenru de la mar Cántabra.
¡Vieyu barriu de pesqueríes! ¿Qué queda de ti? ¿Ónde tán los tos fíos? ¿Ónde los nortiegos de la mar y
la resaca? ¿Ónde aquelles muyeres, curtía l’alma por milenta singladures de soledá y espera?
¡Señeru barriu! Testigu vivu. Aniciu vivu d’hestoria viva. Ancestru. ¡Güei quiero falar contigo! Anantes
de que camuden les tos piedres. Anantes de que remocen la to cara, prieta pol fumu y la muga mariniega.
Agora qu’entavía te conozo. Agora qu’entavía yes tan asemeyáu a comu siempre te sintí: quiero falar de ti.
Caleyo poles tos aceres. Abeyo polos tos requexos cargaos de misteriu y poesía, y estos raigones míos de
playa esraigonada, visten velaúres de señardá nel to abandonu y na to dexadez. Torno a contemplate colos
mesmos güeyos mozos despiesllaos al plasmu de la neñez. Y na moviola de l’alcordanza van surdiendo los
adibuxos que quedaren prendíos no fondero del tiempu.
Y torno a xubir a l’Atalaya, enllena de redes al sol; semada de retales de llin y percal esclariaos col sudor
que les ranches del llavaderu del Campu les Monxes poníen nes vidayes d’aquelles llavanderes d’antañu. Y
ascucho’l xiblar de les cibielles d’ablanu, fendiendo l’aire al encuentru de les guedeyes de llana qu’asoleyaben
so la pación del cerru les variadores de colchones de burlete y cintes d’algodón.
Y arrodiando pola cuesta del Fuerte Vieyu, testigu mudu d’otres dómines, l’atrativu masoquista del vertederu.
Imán y torga. La casa con vocación de piedra de pedreru de los práticos del muelle, col estaramacu
de les siñales purriba’l teyáu n’etenra folixa verbenera. Y no fondero, la Punta Lequerique, escenariu de
cien mil infantiles desafíos a la espluma de les foles que derrompíen so la muria del espigón naquellos díes
de boriada y moyadura. Y na esplanada, al plasmu de los cañones de fierro, sobrevivientes de nun sé qué
20 21
alloñaes batalles, y que llantaos metá’l cementu del pisu, valíen d’atadura pa les
maromes de los bous y de los boniteros qu’atracaben na dársena del puertu.
Dexando a un llau’l casiellu del Pósito, avérome a la mole señorosa y abermeyada
de la Xunta d’Obres del Puertu; capiellu y escaparate de los endevinadores
mecánicos de la borrina y del relampiu, del Nortiegu y del Nordés. En
silenciu. Colos güeyos amoriaos pola cencia y la cibernética.
Arreblago a la pata coxa –ún sí, ún non- los varales de los carros carretadores
del pescáu qu’entavía filen pinganielles d’agua de la cabera baldiaúra y que
perfumen l’aire colos sos arrecendores.
Y metá’l muelle… la Cuesta’l Cholu. Cañu de resonancies pal ruxíu cafiante de les caxes de pescao so
los regodones del tarrén, prendíes de los ganchos esllumantes de les carretadores, nun playu asemeyu de
Capitanes Garfios de madreña y mandil d’arpillera. Y al rodiu de la Rula, agua, xelu, traxín, sardineres,
ruladores, bodegueros, carretadores, fisgones torgantes del trabayu ayenu, marineros, pescantines; y endolcándolo
too, l’arume de mar, d’ocla, de raba y de macizu, de pescao fresco y de sudor humanu, de motores
enceses y gasoil, d’aceite y brea.
¡Vieyu barriu de pesqueríes! Tan igual y tan desemeyáu! Güei tengo que dexate, pero nun tardando
muncho tornaré a caleyar poles tos cais. Abeyaré pola de l’Artillería al alcuentru de Solita, que tará xugando
les perres al chinchón o a les siete y media en cá Flora coles vecines; y falaráme de les coses del so barriu, de
la capiellina la Soledá, de les fábriques de pescao (comu si’l pescao se fabricara n’otru sitiu ná más que na
mar), de les bodegues, de les cantares nos chigres, de les habaneres y de les tonaes marineres. ¡Tantes y tantes
alcordances!
Ta llueu, vieyu barriu, comu diz la copla… “voime pero nun m’escaezo de ti”.» Páx. 57

de Fausta, Sabel
Holografíes
Lletres asturianes nº 20. ALLA. Uviéu, 1986
«Y asina, con estes «transcendentales»
y «filosófiques» idegues blincando
perdientru la testera, empobino los mios
pasos cai de L’Acacia p’arriba camín del
Muséu de Xixón, un soleyeru díe de la cabera
selmana. Y yo nun sé si sería meyor
l’ablucamientu de les probes paisanines
que tolos díes tomen pacetiblemente’l sol
nos «Poyos de D. Pepito» a la vera’l Muséu,
o’l míu propiu al ver les estrobaes de
xente –(y xente mozo)- que trotiando peles aceres del Colexu Santu Anxel y del Hotel Asturies colaben
deseguida pel portón de la Casa Natal de Xovellanos comu si, en vez de tar esperándolos ellí dientru la sombra
del insine polígrafu, tuviera aguardándolos el Gurruchaga de turnu o’l mesmísimu Spandáu Ballet “in
person”.» Páx.92
de Fausta, Sabel
Mercáu de vida, mercáu de muerte
El tren de medianueche y otros cuentos. Trabe. Uviéu, 1996
«Aquel camín yera’l que, cuantayá recorriere de venida nun martes rellumante de lluz y de calor, n’otra
camioneta ataraquitada de ganao más fornío y más gayolero. Sí, entavía s’alcordaba d’aquel lletreru que dicía
GIJÓN, anque agora ponía GIJÓN- XIXÓN-NIORT nun sabía por qué. ¡Les llocaes de los homes! Y
d’aquel otru lletrerucu nel que, per embaxu d’una pintura prieto comu’l carbón, endevinábense les lletres
de la pallabra MAREO, o d’aquel otru, allárribones, ALTO DE LA MADERA, toos recebaos d’una repla
ñegro, tan ñegro comu los ñublos del cielu y la tristura qu’amurniaba’l so coral. (…)
¡Miráilos, ellí taben, asomando les ñapies penriba les sebes, viendo pasar les camionetaes del ganáu
22 23
camín del coraderu! Grandarrasa, La Peral, Arniella, La Figarona; los lloreos y los castañales esñalaben al
empar que los lletreros recebaos de ñegro nuna carrendera alloriante.» Páx. 58-59
de Fausta, Sabel
Paragües de seda verde
El tren de medianueche y otros cuentos. Trabe. Uviéu, 1996
«Un sentimientu de placer fasta güei desconocíu, emburriábala, pente’l orbayu y la borrina, camín del
cerru de Santa Catalina.
Nes manes, el paragües de seda verde torgaba que la rapaza acolumbrara los rellumos que, no lloñe, surdíen
de les faroles del puertu d’El Musel y escuchase’l ruxir de les foles que s’esfrellaben pa escontra’l cantil
de l’Atalaya. La cuesta foi faciéndose más pindia y abegosa, y un aire xabaz que xubía de la mar pintó de roxo
les mexelles de la moza.
Nel cume, una soma de cementu y hormigón abría al aire los sos brazos de xigante comu si, dándo-y la espalda
a la llinia qu’estremaba l’agua de la mar de los ñublos del cielu, quixere abarcar nun abrazu de piedra a la
ciudá que, serpiando al pie de la llomba del cerru, aniciaba a apigazar nes solombres de l’atapecida.» Páx. 82
Faes, Quique
Una mala tarde tienla cualquiera
Concursu de cuentos pola oficialidá del Conceyu Bimenes. Bimenes, 1999-2002
«Un rayu enllenando tol ámbitu d’una claridá espectral rellumó xusto nesi momentu, y arrodió les pallabres
de Ruperto d’un daqué solemne, cásique mítico.
-¿Entendío? –insistió- Asina qu’a furrular. Arancha, dexa lo de la xata trillingüe de Caldones y póneste
darréu a golifar entre los supervivientes. Maite, escaez lo del xixonés que-y puso un emplaste a Rigoberta
Menchú. Fala con Uviéu y que pinten un bon croquis del fostiazu. (…)
Los güeyos cómplices de los sos compañeros buscáronse ente sigo de reflundiu, felicitándose de tan
rápidu afayu d’un mártir pa la causa. Llantáu de pie a la puerta’l despachu, con un piñu papelos na mano y
un xeitu repentín de guah.e con poques lluces debuxáu embaxo les gafes, el redautor-xefe Ruperto Martínez

masuñó’l bolígrafu con maneres de maniacu, tarazó a taragaños cuatro pelleyos de les uñes y a la fin faló:
-Venga, pues pa La Camocha. Garra al Rápidu y p’allá volaos-baxó la voz- y nun me llames Ruper,
home, que me pierden el respetu…» Páx. 94-95
Fernández, Xandru
El silenciu en fuga
ALLA. Uviéu, 1990
«En dellos segundos, Leo taría a soles dafechu cola carretera, camín de Xixón, con tolos cabos iguaos
pal día qu’entamaba.
Al poner la radio, fo comu si la mañana nun fuere la mesma, comu si la música-y diere otra dimensión.
Música del sieglu XX, la meyor que se fixere nunca; la qu’a Mónica tanto esprecetaba por considerala
decadente. De cualaquiera manera, el sieglu qu’escomenzaba albidrábase desganáu, fríu, con ná que ver con
aquelles notes salvaes de la guerra.» Páx. 15
«Ensin ceguñar, Mónica entrugóse qué taría faciendo ellí. Taben lloñe, perlloñe de cualuquier
llugar habitáu.
En dellos kilómetros a la redonda sólo taba’l faru.
Conocía de daqué a aquel home.
Víalu llevantar una mano comu de piedra, moviéndose nel aire durante un tiempu enforma llargu.
Al ximielgala, l’aire facía duviellos delantre d’ella. Delantre de Xabel. Comu si los tuviere hipnotizando,
quixo pensar.
-¿Cómu diz?-entrugó.
-El cielu –arrespondió l’home-. Ca vegada más gris. Vamos tener tormenta.
-Sí . Tien razón.
-¿Usté ye d’equí?
Mónica duldó enantes d’arresponder.
-Sí- dixo al cabu-. Vivo nel faru. Llámome Mónica, y ésti ye Xabel.» Páx. 23
«La sablera San Llorenzu yera un ermu, y él entá nun s’avezare a la soledá y yá Marta daba vueltes na so
memoria, comu una bisarma abandonada n’otra dómina. El so pelo prieto comu les esnales de los cuervos.
24 25
El d’aquel home yera del mesmu color y la so voz la xíriga d’un cuervu, talamente. Y tiraba’l vientu, el condergáu
vientu. Pero ná nun se movía, comu si los cuervos tuvieren adormíos. Comu si la tormenta…
-¡Baxe! ¡Toi paseando’l perru!
Yera cierto. Había un perru, el so pelaxe del color de la fueya na seronda, y los sos güeyos arroxando.
Sollertes.
-¿A qué ta esperando?
Leo dexóse llevar polos escalones. Abaxu, xunta la muria, xacíen milenta oxetos estremaos, esbillaos de
tolos requexos de toles cases de Xixón. Y Cimavilla que sonríe, esconsonando.» Páx. 34
Fernández, Xandru
El suañu de los páxaros de sable
Conseyería de Cultura. Uviéu, 2000
«Ente los mios recuerdos d’infancia nun figura nengún nome que-y poner a la muyer que vivía en
Villa Nubla y, al empar, nos suaños de Néstor. Pero teníalu, un nome: Diana Álvarez Blanco. Cómu
llegué a sabelo nun vien agora al casu. He dicir que tamién m’enteré de que viviera, a primeros de los
setenta, na villa de Xixón, nel barriu La Calzada pa ser esactos, y que dicía estudiar Drechu na Universidá
d’Uviéu.» Páx. 127

García Oliva, Vicente
Diariu d’Enol
ALLA. Uviéu, 1988
«Nunca nun fui a atalantar del too por qué coló mio Ma. Ella queríamos y nosotros queríamosla a ella.
Toos paecíamos felices, non comu esos de los qu’anuncien Seguros de Vida o Préstamos del Bancu Tal, que
se ríen y tienen tolos dientes mui ñidios. Pero felices, a fin de cuentes… Alcuérdome que díbamos muncho
al cine, al parque, onde yo montaba nos cañicones mientres ellos falaben de les coses, al Muelle a ver
los barcos. Nun sé, a munchos sitios. A lo meyor yera yo’l que lo pasaba bien, y ellos aburríense mientres
m’acompañaben, pero si foi asina, de veres que nunca fui a pescancialo.» Páx. 12
«Gueyamos en silenciu les imáxenes que desfilen
delantre los nuestros güeyos, fondamente, comu si les
sorbiéremos. Comu si mos atopáramos ganaos pola
maxa del espeutáculu. Llueu, al salir y cuasimente tovía
ensin falar, empobinámosnos a un vieyu cafetón nomáu
«El Oriental», onde asitiaos nunes meses de mármol
gastaes, y delantre d’una taza de chocolate con churros,
entamamos a cuntar y a comentar la película talo que si
l’otru nun la hubiere tamién visto. Y entós remanecen los
xuicios, los paiceres y, a vegaes, les discusiones.» Páx. 24
«Fadrémoslo nel “Rinconín”, que ye onde lo celebramos
tolos años, y ye un sitiu que nun tien ná de rinconín, al revés, ye un llugar grandón, enllenu meses, y
que ye, al tiempu, merenderu, chigre, cafetería y pel branu, baille. Nun ye que seya mui atopaízu, pero tien
la ventaxa de que si llueve (comu suel pasar tolos años), los rapazos podemos xugar per dientru ensin molestar
a daquién, y si tenemos un prau preciosu pa correr y pastiar si mos peta. Vamos, que ye completo.» Páx. 52
«En merendando, fuimos a dar una revolá pel Muru p’alantre, siempre averaos al mar. Taba una
tardi d’eses en qu’hai munchu aire, y el cielu borrinosu recórrenlu ñublones mui prietes que pasen a tou
meter.» Páx. 71
26 27
García Oliva, Vicente
El Norte
Llibros del Pexe. Xixón, 1991
«Roxeliu volvió echar una gueyada p’atrás, y vio que los tres gatos dixebrárense, fuxendo caún nuna
direición distinta. Eso tranquilizólu. “Va tener razón Marisa, toi faciéndome un maniáticu”. Doblaron pel
chigre “Alvarín” y algamaron una zona que taba meyor allumada. Más alantre taba la Plaza la Infantería,
onde Marisa garraba l’autobús a les seis y media en puntu. Otres dos persones, coles manes en bolsu y los
güeyos medio pesllaos, esperaben tamién.» Páx. 15
«Taba falando nel Atenéu Obreru del aniversariu de la muerte d’Emilio Robles Muñíz, y faciendo
un analís críticu de la so obra. Dempués tomando café col so presidente, Xosé Bolado, que me regaló,
n’alcordanza y agradecimientu, un bolígrafu d’oru. ¿Pudi facer les dos coses al tiempu? Intenté concentrame
nuna d’elles.
La tiesta dolíame abondo, pero pudi alcordame de la hora que salí pal Atenéu a dar la charla.» Páx. 52
García Oliva, Vicente
L’aire les castañes
Azucel. Avilés, 1989
«-Mario, por favor, nun andes en bromes. Pasó daqué terrible. Ven nel intre.
-¿Ónde tas?
-Equí, en «El Remediu», nuna churrería nomada «Cuadonga».
-Voy p’allá. Espérame.
Tiróse de la cama y emprincipió a vestise. Nora abrió un güeyu y entrugó:
-¿Quién ye, Mario. Qué pasa?
-Ná, tranquila. Ye Nanu. Sigue dormiendo.
-¿Qué hora ye?
-Les seis. Inda te queda media hora. Aprovecha.
Punxo los zapatos, garró la cazadora y salió del cuartu apagando la lluz. Fuera entá nun amaneciere y la
muga seguía cayendo murniamente. Llevantárase un fuerte airón. Empobinó’l coche hacia’l barriu de «El

Remediu». Aína dexó atrás les calles curioses p’adentrase nel llaberintu de caleyes qu’encadarmaba’l barriu
pesqueru, más conocíu comu «El Remediu». Mario recordaba qué guapu yera cuandu él yera neñu, coles
sos cases encalaes, y les muyeres sentaes a les puertes o falando de ventana a ventana, mientres cosíen les redes,
remendaben dalguna ropa o llimpiaben
el pescáu. Yera un barriu vivu, gayoleru
con tastu a mar y salmoria.» Páx. 33
González, Humberto
Gominoles
Anatomies de la mañana y otres histories escabroses. VTP (Colección domus nº 2). Xixón, 1995
«Les sos rayaes, ya bien de mañana,
allumaben a les calles vieyes del barriu El
Remediu, dándo-yos un sen de frescura y
xuventú que dende facía munchu tiempu
nun teníen.
De los suelos de llábanes, trupes
cortines de fumu arrecendor a yodu y
salmoria yera sopelexáu por un fuerte
nordés, dende les cercanes orielles de la
mar.» Páx. 61
«Sonia ye xirigatera y estrovertida; característica que l’aida muncho nel so trabayu d’axente de seguros.
Cuantayá que salía con Federico, dueñu d’un almacén de llambionaes que llevaba col so hermanu pequeñu,
Andresín. Conociéronse tomando copes nun antru estartaláu –poro, de moda– del barriu de Cimavilla.
Esi mesmu día, igual movíos por un especial abruxamientu qu’asemeyaba llexar nel ambiente, recibieron la
nueche fuñendo selvaxemente na playa. Les selmanes siguientes valiéron-y a Federico pa entamar les más peculiares
pantasíes sexuales p’asurar a la so amante. A Sonia prestába-y el misteriu d’estos alcuentros, masque
en dalgún acabare atacada de guyetes en virtú de les postures y esparabanes correspondientes. Una mañana
recibió nel fax la oficina un anónimu con toles traces pa ser unu d’aquellos escurrimientos.» Páx. 25
28 29
González Arias, Ismael María
En busca de Xovellanos
Trabe. Uviéu, 2006
«En realidá cada pasu que diera dientro del so Princiáu d’Asturies fuera una fiesta.
Contárannos que lu vitoreaba la xente de los pueblos, que-y rendíen honores
los alcaldes y les xusticies y que los grandes señores-y abríen les puertes de la
so casa.
Entendíamos agora que Pedro Franco lu llamara, la primer vez que-y
mentara’l nome de Xovellanos na ciudá de Granada, el padre de la patria.
La vehemencia apoderaba al familiar de Pedro Franco que nos viniera
dende Xixón cola noticia.
-Nun hubo ilesia a la que nun-y tinglaran les campanes. Los soldaos de la
Xunta Xeneral del Principáu disparáben-y salves d’artillería nel so honor.
-¿Llegaste a velu?- pregunté.
-Yo taba na rula del puertu. Entrara bien ceo. Nun saliera pa nada. Cuando lo fice, terciada la tarde,
vi les cases engalanaes y los barcos empavesaos. Al puntu enteréme qu’entraba’l señor Xovellanos. Toles
muyeres de Cimavilla echaren a andar contra la so casa paterna. Corriérase la voz que lu vieran entrar nel
cementeriu de la ilesia de San Pedro a honrar la tumba de los padres. (…)
Al puntu, entamaron a prender fogueres. Xixón entero yera una foguera. Y, como avecen facer cuando
tán allegres y felices, danzaron alredor del fueu, faciendo un corru, coyíos de les manes.”»Páx. 207
González Arias, Ismael María
La boda del añu
Trabe. Uviéu, 2002
«Lo que nun dexaba de ser tampoco un modu bien claru de desplicar a tol mundu, tanto a la mandrecha
como a la manzorga, que’l tándem de gobiernu Les Cuenques-Uviéu furrulaba. Una manera,
tamién, de mantener a raya al PP y al PSOE xixoneses. Uviéu siguía asina siendo la capital natural de Les

Cuenques Mineres y Xixón poco más qu’una playa a
les afueres.» Páx. 23
«Solíen vese munchos fines de selmana peles cais
d’Uviéu dende entós y en dalgún momentu la so relación
pareció dar un pasu más. Dalgo que se comprobó
a finales d’Agostu pasáu cuando pasaron un
puente xuntos en Xixón. Dar dieron a los amigos la
disculpa de les fiestes de Begoña, pero naide topó con
ellos polos llugares normales d’alcuentru.» Páx. 98
«Nunca diba reconocelo, pero siempre tuviera
una especial predilección poles señores mayores.
Tampoco ensin pasase. Diríase que se trataba de la
irresistible pasión de la muyer madura. Dalgo que
se-y despertara dellos branos a tras delantre de les
curves d’una amiga de la madre, vecina de Xixón y
cola que quedaben los fines de selmana previos a les
vacaciones, nel tostaderu del Piles de Xixón como pa
dir garrando color.» Páx. 137
González Iglesias, Maite
Pervera
Muyeres que cuenten. Trabe. Uviéu, 1995
«… A última hora impúsose la ufierta de Choni: Pervera, la so casa de dos plantes pa elles soles, con
pumarada onde pasiar, panera pa subir y garrar mazanes de casa, y a lo meyor, hasta castañes pa magostar,
tomar culinos de sidra, ensin menester mover el coche, y relaxase sin pensar nel cafiante’l xefe nin na
faltosa la so muyer, llevantase cuandu toca la bocina la rapaza la fruta o’l paisanu del pescao; pela tarde
averase a Xixón o Áviles, o a Uviéu, o a onde apeteza, comu diz Choni: “Pervera ye’l centru d’Asturies”.
(…) Páx. 87
30 31
«A Choni víasela bien feliz; alcordábase d’aquel calandariu grandón d’un vinoteru que reproducía un
cuadru de Romeru de Torres y aquel otru d’una compañía tresportes con una mocina albentestate, les insignies
del Uviéu y del Xixón…»(…) Páx. 88
«Yera un paisaxe decomanáu: el cielu taba abuxuracáu y besaba la mar calma y grisota. Nel puntu mediu
dibuxábase un barcu qu’esperaría pa entrar nel Musel; pa la drecha, Perlora, y más p’allá la Campa Torres;
pal otru llau, el paséu, la capiya de San Antón, el pinar, tantos besos a escondidielles…, el faru.» Páx. 89
González, María Teresa
L’afilador
La casa y otros cuentos. Trabe. Uviéu, 1994
«Fai munchos años, malpenes la mio estatura llevantaba un palmu del suelu, la primer vegada que
l’afilador apaeció peles caleyes qu’arrodiaben Tremañes, barriu onde yo ñací y crecí, práuticamente aldega
naquel tiempu, allugáu ente güertos semaos con pricuru, pastizales n’abertal y un ríu onde podíamos remoyar
los nuesos papos, encesos, y puercos. Malpenes quince o venti cases relativamente xuntes, facíen pescudar
qu’aquello yera’l centru del pueblu, onde apaeció aquel día nun atapecer d’ochobre.
Alcuérdome, porque fue tou un acontecimientu oyer les sos berríes canciando al altu la lleva, la so xiblata
sele, demientres emburriaba aquel peculiar carru, onde s’amontonaben abaruyaos una mecia de cachivaches
qu’a los más neños antoxábensenos máxicos y misteriosos.» Páx. 41

González, María Teresa
El lladrepu invisible
La casa y otros cuentos. Trabe. Uviéu, 1994
«Venancio Ordiales entró comu tolos domingos nel Café San Miguel a les diez y media en puntu de la
mañana, y algamó una de les discretes meses que taben al fondu. Con sele meticulosidá, quitó l’abrigu y acuriosólu
nel respaldu de la siella vacía que tenía de cote. Mentantu qu’esperaba pol camareru que-y apurriría
l’almuerzu, bancióse nel asientu fasta dar cola postura más afayadiza. Al tiempu, col mesmu pricuru con que
tratare al so abrigu, remanó nes fueyes del periódicu qu’acababa mercar.» Páx. 49
Maco, Alca
Al final de la barra
Lletres asturianes nº 63. ALLA. Uviéu, 1997
«Entá m’alcuerdo l’añu pasáu, naquella nueche de branu, a les tantes, cuandu tou Xixón ta na cai, y yo
aporté al Diariu solu, comu siempres, a males penes averéme a la barra, onde los mios collacios, y… vila ellí.
Bueno, tou dios la vía, y yo tamién: toos tábemos mirando pel rabigüeyu pa ella. Namái pidir el “carayín”,
quedámonos mirando fasta que’l barullu nun mos dexaba venos. Entós yo, comu faigo siempres, posé los
güeyos na barra, y sin dici-yos ná entamaron una carrera lloca p’alcontrala. Y atopáronse los sos güeyos y los
de mio. Y ellí tuvieron falándose y cariciándose y besándose: qué bien lo pasamos: salimos d’ellí más namoraos.
Fui la envidia de tol bar, eso sélo yo, pero por ella nun m’importó un res perder dalgunos amigos: que
deprendan comu hai que facer les coses.» Páx. 62
Mánfer de la Llera (Manuel d’Andrés Fernández)
Coses vivíes
Alborá Llibros. Xixón, 1998
«Manolín de Darío acuérdase de cuando nació Pumarín, perpoblada barriada xixonesa de los años
sesenta, notable pola so urbanística naquellos tiempos permoderna, con torres que yeren aprendices de
32 33
rascacielos, xunto con edificios de solamente cuatro pisos, con una gran avenida central y cais paraleles y
perpendiculares a ella, con una estensa zona verde con camperes y xardinos a estilu cine.» Páx. 177
«Llueu de delles asamblees (clandestines, nun dexaben otra opción) pa suxerir y estudiar lo más acordies
cola situación del momentu, apruébase por unanimidá entamar un encierru indefiníu nuna de les ilesies
de Xixón, por paece-yos el sitiu más seguru pal casu d’una intervención de la fuercia pública. Asina, el 16
de setiembre del 1971, a les seis y media de la tarde, más de cien pensionistes y xubilaos d’estremaes edaes y
d’estremaos conceyos de la rexón, anque la mayoría de les cuenques mineres, comiencen la reclusión voluntaria
nel templu parroquial de San Xosé de Xixón.» Páx. 189
«Al conocese l’aición protagonizada polos pensionistes, emprima l’afluencia masiva d’otros compañeros
y visitantes, tanto de Xixón como d’otros llugares d’Asturies, qu’acuden a la ilesia de San Xosé los primeros pa
sumase a los trancaos y los segundos p’aportar la so ayuda n’alimentos y cobertores pa que nun decaigan por
fame nin por fríu. Al mesmu tiempu, na prensa local y rexonal apaecen notes de solidaridá de trabayadores
de delles empreses y d’entidaes ciudadanes, asina como visites de grupos con dineru recaldao nos sos centros
de trabayu y n’actividaes culturales. Llamaron muncho l’atención les setecientes cincuenta pesetes entregaes
por un ensame de neños que ficieron una recoyida ente los escolinos d’una escuela de Xixón.» Páx. 189-190

Marín Estrada, Pablo Antón
Esperando la bolera de los ánxeles
Nubes negres. Trabe. Uviéu, 1998
«Dende la terraza víase too Xixón como una tortuga arroxada y espurrida a lo llargo la bahía. Enfrente,
los montes de Deva, les camperes qu’inda quedaben ensin construir per Biesques y el Piles secañosu, allá nel
fondo del calce qu’arrodia’l Parque hasta la Puente de la Guía. (…) Páx. 25
«El xalé d’haber tao orientáu un poco más al oeste pudiere vese tamién dende ellí l’espigón del puertu del Musel.
La panorámica de la bahía siacasu terminaba repentinamente na metada’l cerru de Santa Catalina.» Páx. 26
Marín Estrada, Pablo Antón
Agua que pasa
Diariu del hibernu de 1994-1995. VTP. Xixón, 1995
«Viniendo de la mar –díxome una vez un veteranu arrantzale d’Hondarribia- Xixón paez un pulpu recién
aventáu por una fola contra les roques. El Cerru de Santa Catalina (que los playos de nación llamen mui
propiamente L’Atalaya) había ser la cabeza y los tentáculos el caos radial de cayes que va espurriendo la ciudá
contra les primeres camperes verdes que la separen de los montes. Dende l’Altu la Madera, que ye d’onde yo
acolumbré esta villa la primer vez viniendo de La Cuenca, hebo pintáseme más bien a una mariposa coles ales
34 35
rotes varada cerca de la playa. Polo menos esta ye la comparanza que güei se m’escurre en viendo un planu de
Xixón; una mariposa de colores grises y arroxaos a la qu’una mano azarosa e inconsciente –la de un neñu o
un llocu o un criminal- pudo tener tarazao les ales.» Páx. 9
«Préstame subir hasta L’Atalaya n’hibiernu, cuando’l nordés nun anda mui revoltosu y espera l’agua a
qu’ún tea ya a techu pa caer. Suelo empezar el camín nel Campu Valdés, pel Vía Crucis de San Pedro p’allá,
siguiendo’l trazáu de la enterrada muralla romana y baxar pel otru llau, pela caye Artillería abaxo, pa salir a
Lequerique.» Páx. 52
«La mar que ruempe al oeste coles muralles de Camelot, ye la
mesma que tolos díes veo dende’l Muru de Xixón, pero equí llega
batida y revoltosa, rabiada yo nun sé si polo arispio de la costa o pol
frío que tiren equí les corrientes y los aires que vienen d’arriba, de
los xelos, y seque más rabiada habrá tar al oeste de la tierra d’Alba,
que queda cerca del Molín del Aire del Norte, que tría ñeve y por
eso vienen el xarazu y la ventisquiada, de los trapos qu’escapen ente
les ruedes del molín; siacasu hai díes como güei que la mar queda
espurrida y serena, igual qu’un platu y entós si se-y ve la mesma
color qu’al bañase en San Llorenzo, una color de cielu claru vistu
al través d’un filtru d’agua y arena y sombres d’ocle.» Páx. 74
«Depués d’una tremenda nueche de farra con Esther, Lauro,
Vera y Malcolm-Lluis Bande dalguién propón subir hasta la
Campa Torres a ver amanecer. Arriba, al pie de los impresionantes
depósitos de CAMPSA, tira un cutu que taraza y trai en rabeseres
rápides y firientes una picotera mezcla de xarazu y agua. La vista
dende ellí, siacasu, paga bien la pena’l tembleque de fríu y les ganes
de marchar cuanto primero a escalecer al somantu de la cama
de casa. Les primeres lluces del día empiecen a desvelar el neblinosu
rostru d’El Musel y yá s’acolumbra movimientu peles cubiertes
de los tres o cuatro barcos grandes qu’hai atracaos nos muelles del
puertu; enfrente del edificiu de l’aduana dos siluetes escures y ta-

amingantes enfilen en dirección a la cantina del Stella Maris, mientres allá a lo fondo la villa del Natahoyo
y inda más alluende la ciudá que s’asoma a los cais del Fomentu y a la Mar de San Llorenzo acuerda ventana
a ventana de la llarga nueche de sábadu. Al otru llau los terrenos d’Aboño espurriéndose a la primera mar y
darréu, abriéndose caprichosamente hasta Peñes, les playes, villes y puertos de Xivares, Carranques, Perlora,
Candás, Antromero, Lluanco, Bañugues y Llumeres.» Páx.104
«El fríu que tira ye cada vez más bárbaru y dicidimos volver hasta’l coche siguiendo’l mesmu camín
qu’enveredaron hai más de venti sieglos los antiguos pobladores de la Noega estraborniana; la estampa de los
murios y plantes de viviendes romanes reconstruyíos pal futuru parque arqueolóxicu de la Campa, devuélvennos
a les mañanes de la decadencia del pobláu, un sitiu enforma desabrigáu y fuera mano pa vivir aquellos
particulares astures romanizaos; la grosura de les paredes de les cases da una idea de lo arispio y rigoroso
que debió tirar el frío daquella ende, nesta campa allugada al bintestate de tolos vientos. Dende la cotariella
cimera de la Campa, asitiada más o menos a mitá de camín ente’l Faru y los depósitos de Campsa, pue siguise
a modu cola vista aquel camín de los astures que tiraba d l’antigua Noega pa contra l’Asturia Augustana enfilando
pel Monte Areo.» Páx.104-105
Marín Estrada, Pablo Antón
La ciudá encarnada
Conseyería de Cultura. Uviéu, 1998
«Andó un par de bocacalles en dirección a la calle Corrida y entró nun bar onde paraba de vez en cuando
enantes de dir a trabayar. Nun yera la clase de sitiu al que más-y prestaba dir, pero tenía un par de meses pa
sentase al llau de la vidriera que daba pa la calle y el dueñu, un paisanu morenu y trabáu al que-y faltaba un
brazu y que falaba arrastrando la “r”, llamába-y siempre “el periodista”; eso llegába-y mui fondo.” Páx. 19
“Funcionarios del Cuerpu de policía de la ciudá descubrieron ayer a primeres hores de la mañana’l cuerpu d’un home muertu nuna
finca de Cabueñes. Los axentes, avisaos por un vecín d’una parroquia cercana, desplazáronse hasta’l sitiu del afayu y atoparon el cadáver
medio tapáu por unos matos. Según fontes de la xefatura de policía de Xixón, que coordina les investigaciones del casu, el cuerpu del
fallecíu, del que se desconoz tovía la identidá, presentaba delles puñalaes y otres señes de violencia. Según estes mesmes fontes, les feríes
d’arma blanca pudieron ser les causantes de la muerte de la víctima. Güei a primer hora, nel cementeriu de Ciares, habrá practicáse-y
l’autopsia al cadáver col fin de determinar les verdaderes causes del fallecimietu del home alcontráu en Cabueñes. A espera de los resultaos
36 37
d’esta preba forense y demás investigaciones abiertes del casu, esti periódicu seguirá
informando de tan llamentable sucesu na so edición de mañana y en díes sucesivos. J.
M. Taboada.” Páx. 26
«El miradoriu, de forma semiesférica, alcontrábase orientáu
de talamiente que s’acolumbraba dende él prácticamente tola bahía
de Xixón, del Musel a la Providencia. Les llinies divisories de
la qu’había ser una magnífica panorámica a la lluz del día y agora
sólo yera un formidable llenzu d’escuridá borrinosa marcábenla
a un cabu los focos del espigón del Musel, cola llinterna del Faru
de Torres proyectando’l so rellumu como una espada xiratoria que
cortare en cada pasada la nueche nubla; la otra llende, marcábenla
les lluces desperdigaes de les cases de mariña de la Providencia y
los montes del Infanzón; de metanes, quedaben esllavazaes, como
desprendíes de la constelación de lluces de tierra, cuatro o cinco
puntos lluminosos perdíos na mar de los barcos qu’esperaben el día
pa entrar a puertu. Les faroles del paséu marítimu del Muru completaben
la perspectiva nocturna, dotándola d’una robra vistosa y
mundana, como’l traxe panamá d’Apolinar Del Busto.» Páx. 68
«Les cais de Cimavilla yera meyor andales de día y tando serenu.
Dende que saliera del “Shangai”, Taboada diba repitiéndolo
según se metía en cada calle y calleya ensin salida. Les compuestes, el Ribeiro de la cena y l’oruxo de la
sobremesa con Patuca, empobináranlu a un estáu mui raspiante cola borrachera. Mientres zapicaba pel
barriu vieyu de pescadores, diba componiendo en maxín un reportaxe del que lo único coherente que-y
aportaba yera’l titular: “El Llaberintu Cimavilla”. Metióse per un par de caleyones más ensin salida y a
la tercera acertó a salir a la corrada d’Atocha. Depués enfiló pela calle que salía a la Fábrica de Tabacos
y siguió per María Bandujo hasta’l camín que-y abultaba más conocíu pa llegar al Campu Valdés; d’ehí
continuó pa los que Mapache llamaba, cuando andaben los dos per Cimavilla, “territoriu civilizáu”. Debía
tar más borrachu de lo que pensaba porque a la vuelta una esquina nun vio a un home que baxaba a too
meter y chocó contra él como choquen dos coches que van col acelerador sueltu nun cruce y nun aparen
a mirar si vien otru de llau.» Páx. 82

«Xixón al mediudía, pasada la primer quincena d’agostu y si ta bono y a modu, caldia nes calles soleyeres
igual qu’una parriella. El que nun quiera morrer achicharráu tien de buscar la sombra solliviadora y l’aire
frescu que dexen peles calles más estrenches les corrientes que vienen faciendo la culiebra dende’l mar. Ye
sólo hasta la primer hora de la tarde; entós los vapores que fue filvanando’l chornu de la mañana pónense a
texer en cielu la so sombriella parda de nubes y si ye chornu, chornu, de lo qu’espatarra, a última hora de la
tarde cai agua seguro y con truena.» Páx.132
«-Señoría, eso ellí en Santa Bárbara sabíalo hasta Novalín de Mera, que ye’l tontu’l pueblu, y mui bon
rapaz tamién, dicho sea de pasu, qu’a mi y a tolos que vía d’uniforme siempre nos tuvo munchu respetu. Don
Acacio’l maestrín yera más mariquetu que’l merengue d’una tarta, señoría. Sabíalo tol pueblu y amás él nunca
nun lo disimulaba. Venía a Xixón tolos domingos a vese con otros mariquetos d’equí a mirar escaparates y a
aconceyase a esparabaniar nuna cafetería. Eso sabíalo too Santa Bárbara, señoría, tol conceyu.(…) Páx. 177
-Él paraba muncho pel café Dindurra y pel café Colón. La tertulia colos otros…mariquetos, teníala
fixa tolos domingos nel café Español. Ehí lu podía ver tol mundu sentáu colos otros mariquetos pa que la
xente lu viere. De los otros sitios qu’usté me mienta, nun –y sabría dicir. Yo sólo lu tengo visto nesos cafés
y mirando escaparates colos sos amigos pela calle los Moros y la calle Corrida. Yeren tres o cuatro. Toos col
clavelín na solapa, mudaos, que paecíen auténticos cromos…Bono, más bien paecíen Mariquita Pérez con
traxe y pantalones…» Páx. 352
Marín Estrada, Pablo Antón
Un café nel Dindurra
Esconderites. Ámbitu. Uviéu, 2002
«Falar del Café Dindurra nun ye facer propaganda comercial d’un establecimientu hosteleru; ye facer
mención d’ún de los pocos monumentos d’interés hestóricu que queden en Xixón.
Lo qu’acabo d’escribir suena a llugar común de guía turística, pero ún dizlo con fundamentu, qu’ayer
mesmo, de la que falaba con un conocíu que trabaya nuna axencia publicitaria, supo que la empresa del
Dindurra, que ye la mesma del Cafetón de San Miguel, ye una de les que menos gasten en propaganda
equí. Nun-yos fai falta. En Xixón tol mundu sabe ónde queden entrambos cafés. Fuera, raro ye’l mortal
38 39
qu’habiendo tao alcuando nesta villa y puertu nun sepa ónde cai,
polo menos, el más vieyu de los dos establecimientos. (…) Páx. 59
«El ciclu diariu del Dindurra ye abondo más prosaicu: pela
mañana hai munchu encorbatáu y maquillada almorzando’l curasán;
al mediudía entren dos docenes de borrachos mui presentables;
na sobremesa empiecen a sentar los sos reales enriba
los tableros los axedrecistes (tien el Dindurra bien a gala que
nél entamen partida diaria los meyores d’esti y del otru llau del
cordal); depués lleguen los estudiantes col so fardel d’apuntes,
llibros fotocopiaos y amores distrai-exámenes; a media tarde, la
hora de la merienda de les vieyes señores vildes, solteres o lliberaes
del home achacosu y repunante, de los pinchos corrompinaos
d’ensaladiella y el chocolate con churros o pastel colosal;
la nueche ye tiempu pa los que nun tienen priesa, pa bohemies
nada menesteroses y amigues de dar la parpayuela hasta que los
camareros se ponen a barrer.» Páx. 62
Martín Sánchez, Fonsu
La guagua
Lliteratura nº 19, seronda. ALLA. 2001
«Les últimes hores de la tarde estival van dexando na
penumbra’l mar de pumares qu’ente El Picu’l Sol y El Monte
Fano arrequexa’l pacetible valle de Llavandera. La calisma d’al mediudía y de parte la tarde agoniza y muerre
ante la sospecha de la prosimidá del frescor qu’aporta’l lluceru yá a les puertes de la nueche. Non tolos díes
son idílicos nin rescampla’l sol a les sos anches: hailos tamién murnios d’orbayu, muertos pal branu, que
tal paez que dalgún ser divín amargáu valtiara, a mou de maldición, les tiniebles sobre’l vallucu enantes mesmamente
qu’aporte l’alborada. D’ende surde la filosofía de les dos míseres caleyes que traviesen Llavandera;
hasta nun día de sol radiante amuesen la llamuerga como buelga d’un castigu que-yos imponen les tiniebles
del orbayu.» Páx. 10

Martínez Pérez, Carme
Chano
Muyeres que cuenten. Trabe. Uviéu, 1995
«El puestu la Guardia Civil taba asitiáu nel pueblu vecín, anque rara yera la vegada qu’un númberu de
la Benemérita apaecía per Quintana, si nun yera por mor de dalgún fueu o poles estampíes de dalgún furtivu.(…)
Páx. 33
«Macario diba per Quintana, dexábase cayer pela casa’l pescador. Atopábalu cuasi siempre iguando les
redes o remachando los calderos vieyos y les palancanes, que-y sirvíen pa recoyer la pulga. Macario chisbaba
al otru mentantu trabayaba, y facía milenta entrugues que Chano-y retrucaba de mala gana, pero ensin atrevese
a dexalu cola pallabra na boca. Nun yera home de munches pallabres, nin amigu de tertulies de chigre,
y eso que sabía abondes histories de meigas que conociere cuando tuvo en Galicia. Cuántes vegaes los vecinos
diben buscalu pa tomar unes pintes en Ca Delfín y esmucíase comu una anguila con cualisquier escusa…»
Páx. 34
Martínez Pérez, Carme
Vía d’escape
Trabe. Uviéu, 2003
«Y un día colamos pa Xixón. La casa yera un pisu con tres cuartos, unu de los cualos, el más grande, diba
ser destináu pa taller de costura. La cai taba casi a les afueres de la ciudá y nel colexu de monxes onde me metieron
nun conocía a naide. Dicíen que nun m’entendíen porque yo falaba raro. Foi por aquel entós cuando
descubrí que la ciudá nun yera de color rosa sinón más bien d’un color pastosu que tiraba a gris.» Páx. 29
«L’aire na mio cai nun golía a bardiales de lloréu y a verde, sinón a fumu de carbón y a muertu, y lo
mesmo pasaba nes otres cais del barriu. Ello debíase a la proximidá del cementeriu, qu’al tar asitiáu nun
terrén más altu que les cases, calistrando la vida entera d’aquel arrecendor, y sabiendo d’onde provenía tovía
se facía más irrespirable y repulsivu. Sicasí, el cementeriu atrayíanos a los rapacinos del barriu, que díbamos
munches tardes a dar una vuelta pelos sos pasiellos y escalinates como’l que va viendo escaparates peles cais
del centru.» Páx. 32
40 41
«Siguieron dempués, empobinando los pasos
hacia’l desarboláu Paséu Begoña y caminaron a lo
llargo de lo que fuera una avenida bordiada de grandes
pláganos. Al llegar a la cai Corrida, Raúl paro un
momentu enfrente del edificiu onde tuviera asitiáu’l
soberbiu Cine MªCristina.
- ¿Cómo ye que naide pudo evitar esto? ¿Y qué
foi del cine qu’había un poco más allá? – dixo señalando
un puntu de la mesma cai.
- ¿El Robledo? Pues que siguió’l mesmu camín
que l’Arango, l’Hernán Cortés, l’Albéniz, el Roma,
l’Avenida, el de Los Campos, el Brisamar, el Goya, el
Pumarín…y tolos demás.
- ¡Adiós al Cine, ésta ye la dómina de los “palomitódromos”!
- Y lo que ye peor, naquellos cines podíen vese una o dos películes distintes en cada unu y nos d’agora
repiten les mesmes en toos.
- ¿P’hacia ónde va una ciudá na que desapaecen los cines…?
- Nun t’esmolezas Raúl, yá sabes, “el don de Don Dinero”, que va per un llau, y la cultura per otru.
- Ties razón…Mira, vamos tomar daqué naquel café que nos prestaba tanto. ¿Cómo se llamaba….”El
Cafetón”…?
- Cuando aportaron vieron que’l Café San Miguel yá nun tenía nin el nome y nin l’apariencia, convertíu
nuna cafetería italiana.» Páx. 160
Martino Ruz, Xandru
La rocea abeya en nós
Rema con orpín en nueche de Seronda. Editora del Norte. Mieres del Camín, 1999
«Nun ye qu’a elli esti sistema de conocer xente-y prestara muncho, yera un rapaz convencional, de los
de barriu de tola vida, criyáu nel barriu d’El Cotu, cuando nun yera más que campes chiscaes por delles
pingarates colloraes de los teyaos de les cases de planta baxa que conformaben el paisax del barriu nos enta-

mos de los sesenta. Home poco dau a los cambios na so vida. Amigos, los de siempre, los del barriu y pocos
más, aquellos neños que deprendíen a vivir esguilando a los árboles, empuercando la ropa d’arrollicar pelos
praos, saltando d’oriella a oriella del ríu Piles nes pequeñes escursiones que facíen al vecín barriu de Viesques.
Los que diben con elli a clase al Héroes del Simancas onde-yos deprendíen qu’España yera una unidá
de destín no Universal, o daqué asina, qu’elli nun sabía mui bien lo que quería dicir; munchos años más
tarde siguía ensin sabelo pero siguía paeciéndo-y que s’enllenaba la boca al dicilo. De la escuela al institutu,
al Xovellanos, onde siguió calteniendo les mesmes amistaes, los collacios de tola vida, quiciabes dalgún de
fuera del so círculu pudiera ser qu’entrara nel grupu, pero aquello nun supuso un cambiu radical nes sos
amistaes. D’ehí pa la Escuela de Peritos que taba a doscientos
metros onde siguió estudiando y conviviendo colos tres collacios
que pudieron estudiar con elli. La so boda, con Nelina,
la vecina que vivía a seiscientos venti metros de so casa, n’otra
casa d’aldea del barriu. El trabayu n’Ensidesa onde munchos
de los compañeros yeren, polo menos, conocíos de la Escuela
de Peritos.
Con toos estos precedentes nun podía dicise que’l so círculu
d’amistaes camudara muncho en cuarenta años. La so
vida podría circunscribise a un radiu de tres o cuatru kilómetros,
y les sos amistaes, qu’agora vivíen espardíes pel Xixón
de los noventa, con mui poques esceiciones d’inmigración
dientru de la mesma Asturies, y dos o tres allende Payares,
aniciaran toes nun radiu de quinientos metros al rodiu de so
casa, o meyor dicho de casa los sos pas.
La hestoria d’ella yera asemeyada, d’orixe aldeanu, con
tolo qu’ello conllevaba, yera fía d’una parexa que viniera de
l’Asturies rural a la gueta del doráu de los setenta a una ciudá
industrial como Xixón. Cuando colaron del pueblu, ella entá
yera mui neña, quiciabes nin s’alcordara, y los recuerdos que
creyía tener nun fueran más que retratos de la so vida cuntaos
polos pas años más tarde, o quiciabes escenes vivíes años
más tarde nes fines de selmana nes que s’averaben al pueblu,
pero que la memoria s’encargara d’envieyecer. Estudios nel
42 43
Elisburu en plenu barriu de Pumarín, pasara la mocedá descubriendo la vida na Universidá Llaboral, d’u
pasó a trabayar, dempués de facer C.O.U, como alministrativa ausiliar nuna empresa d’un conocíu del pá.
Amistaes les de siempre, les del barriu, con dellos mocinos del mesmu barriu colos que saliera, pero que nun
la llenaron lo bastante como pa casase con ellos, y güei, pasando la barrera de los trenta nun tenía mui claro
si merecía la pena casase.» Páx. 122-123
«Sonaben les siete en puntu na ilesia de San Pedru, cuando ella enfocara la plaza dende’l Campu Valdés.
Acolumbró la terraza, toles meses taben ocupaes a lo menos por parexes, esceutu una muyer entrada n’años
de piel churrascao y un gordu mugorientu que sorbiaba un xeláu como si fuere lo último que fuera facer
enantes de que-y diere un infartu de miocardiu. Fixóse nelli, llevaba el reló na moñeca isquierda… Resopló…
y prefirió dar una vuelta pa ser ella la primera en ver al so partener.» Páx. 126
Martino Ruz, Xandru
De Ceuta a Sarayevo
Editora del Norte. Mieres del Camín, 1995
«Posó’l vasu enriba la mesa na que taben los apuntes y averóse a la ventana. Descorrió la cortina y abrióla.
Golió. Cómu-y prestaben les nueches de xunu, curties y lluminoses, llentes y calientes, sonores. Sólo-y
quedaben dos nueches pa facer l’esame del ventitrés. La nueche de San Xuan diba ser mui llarga, sí, sí…mui
llarga. Yá sabía que yera la nueche más curtia del añu, pero la “so” nueche de San Xuan diba ser mui llarga,
perllarga. Y mui movida, permovida. Y mui etílica, la más etílica de la so esistencia. Y el llistón taba mui altu
pa poder pasar penriba. Pues Sotomayor al so llau diba ser un principiante. Esa nueche suponía dexar atrás
diez años d’estudiu, o…bueno…diez años de…bueno…diez años…na Escuela.
Na claridá de la nueche les piedres de les muries de la Universidá Llaboral dibuxaben solombres de
forma que paecíen que la mitá de la muria taba arrañada. Enfrente de les ventanes internáu, la muria del
conventu dibuxaba una solombra grande que cubría’l prau que la rodeaba y comía parte de la carretera que
separtaba la Llaboral del Conventu. La ponte que les xuncía, dende la so ventana nun se vía. Enfrente, la casina
del antiguu guarda, a mediu perdese, paecía ser víctima d’un ataque de fame de los artos que la cubríen.
Daquién debería mandar que los podaran. Llonxe, na carretera xeneral, vió un grupu de xente que coyía camín
de La Carbayera de Santuriu. D’ente’l grupu, paeció-y reconocer la figura d’Ellen…Ellen Mcdermon,
asina se-y presentara esa mesma tarde na cafetería del centru. Yeren un grupu d’escoceses que taben en viax

d’estudios per Asturies, pel norte d’España comu ellos dicíen. Nun entendía
qué facíen ellí. El casu yera que paecía ser que daquién-yos cuntara
qu’en La Carbayera había ambiente peles nueches de xunu. ¡Qué enseguida
s’entera ún de les coses qu’interesen! Efeutivamente, empobinaben pa
Santuriu. Efeutivamente, ellí diba’l so problema. Efeutivamente, él sabía
que nun podía concentrase por culpa d’aquella rapazuca delgada, cásique
ensucha, ruína, ruana, pintalarama y cola melota xusto penriba de les oreyes,
de forma que nun-y llegaba a tapar, dexando al aire’l lóbulu les oreyes
que s’ufiertaba apetecible comu una uva fresca a mediaos d’ochobre.
Mirándola per detrás tenía un aquel que yera irresistible. Ente’l final de
la melota y el cuellu de la camisa amuesaba una nucla despeyada, cande,
enllena de peces que la facíen más deseyable. Esa tarde sintiera una especie
de “la cagaste con ventanes a la calle” que diba acabar col esame de
“mecánica de fluídos”, col so branu y con un pocoñín de suerte cola so
solicitú qu’entamaba a fadialu un pocoñín. Ellen gustába-y, y si nun taba
mui equivocáu a ella prestába-y que-y gustara. Tamién yera casualidá que
la rapaza s’apellidara como’l so güisqui preferíu. Diba ser cosa del destín.
Taba escritu que…nun aprobara l’esame.» Páx. 110-111
«Baxó pela cuesta que baxaba de la Llaboral a la xeneral, torció a la
mandrecha y cambió pa la mano izquierda de la carretera. ¡Menudu piescu
taba fechu Andrés! Nun daba puntada ensin filu. Faltára-y tiempu pa dir
colos escoceses a tomar daqué. De xuru qu’andaba detrás de dalguna rapaza
que-y prestara. ¡Menuda faba! Al aportar al cruce coyó camín de Santuriu
y entamó a sentir que’l coral baltiába-y con más fuerza. Cuandu-y faltaben
cosa de cientu cincuenta metros p’aportar al bar, xustu al altor de la Carbayera
sintió que la folixa que taben armando yera grande. Les rises debíen
sentise nun kilómetru na redolada. Aportando al bar vio qu’Andrés salía a
recibilu.» Páx. 115
44 45
Ochoa, Santi F.
Los párpagos de Buda
Trabe. Uviéu, 1994
«-Yo tengo dellos collacios n’Asturies- dixo la neña en cuestión.
-Sí, qué bien, igual los conozo. ¿D’ónde son?
-De Xixón pero nun creyo que los conozas.
-Yo tamién tengo collacios en Xixón pero tampocu creyo que los
conozas. Ún acaba salir d’El Cotu, otru mueve polvo en Cimavilla y otru ye insumisu.
-Los mios son de Somiedo o algo asina…
-Somió.
-Bono eso, “Somiú” y paren pel “Grupo”.
-Ta guai el «Grupo», muévese mucho mate per ehí.
-¿Mate?
-Sí, tema.
-Nun t’entiendo.
-Ye igual, ye mentira (en voz perbaxa).
-¿Qué dices?
-Non, que sí, que lo guai de «Somieu» ye que ta al llau de Xixón, y tienes ellí mesmo reserves d’osos y «la
puta su madre».
-¿Por qué fales tan mal?
-Ye una espresión d’ellí.
-¿Ye verdá qu’hai osos en Xixón?
-Home, en Xixón centru non, pero ehí en Somiú como tu dices, hai hasta celtes.
-Tengo la sensación de que tas riyéndote de min.
-Pues ye mentira, ves, depués dicís que los asturianos somos picaos-dixí yo con cara torcida.
-Bono ná, nun digo ná. Y
tu qué, ¿d’Antaxone, non?
-Sí, pero nun tengo perru
nin ná d’eso.
-Ah que «chupi», eso sabíalo
yo, y cadena y too eso.
-Entós sabrás la de carbón y
muyeres y yo pa “jodeles”.
-Tas fechu un poeta.»

Ostrowsky, Mark
L’home de la bolsa
Aldeanismos. VTP. Xixón, 2003
«Fueron estes reflesiones les que me llevaron a Xixón, a ver al “home de la bolsa”. Bueno, siempre lu
llamaba asina pol so rasgu más característicu: una bolsa de cueru, de forma rectangular, distinguida por una
pátina que namás se llogra con años d’usu, d’unes dimensiones aprosimaes de 30x20x20 centímetros, que
siempre llevaba posada enriba la tripa, enganchada con una correa al costazu.» Páx. 76
Ostrowsky, Mark
Más que dir volver
Aldeanismos. VTP. Xixón, 2003
«Xixón-Noreña: yera un trayectu que tenía fechu un montón de veces nos «vieyos tiempos», por causes
laborales, pa poner los garbanzos en platu. (…)
Nel asientu d’enfrente nun había nadie hasta que llegamos a La Calzada, onde subió un tipu rústicu, con
boina, cayáu y pantalones de pana, y, como nun diba vagame descubrir, arrecendiendo a vinu. (Yo diba más
o menos igual qu’él, pero faltábame la boina, el cayáu y el golor a vinu).
Llegamos a Veriña y subió más xente. Acabábemos d’arrancar otra vez cuando, d’esmenu, sintióse un ¡crac!
Y estalló una ventana. El tren paró en seco y, col impulsu del frenazu, l’aldeanu salió disparáu del asientu.
Menos mal que les manes me sirvieron pa parar el golpe y evitar, asina, que me diere un besu.» Páx. 79 y 80
Pérez, Boni
Aparecíos en México
VTP. Xixón, 1995
«Diréis que soi raru, pero a mi esi fulanu sonábame. Nun tardé nin tres segundos en decatame de qué:
conocíalu del cine Rivero, de La Calzada, d’abondos domingos a les tres de la tarde, na sesión pa neños, de
velu engarrase con otros de pintes parecíes o peores encariase a científicos enlloquecíos y vampires de quitar
l’hipu.» Páx. 9
46 47
Pérez, Boni
King-Kong en Santa Olaya
Esconderites. Ámbitu. Uviéu, 2002
«Cuando vivíemos na
guardilla, en Santa Olaya,
nesa tierra de nadie ente’l
Natahoyo y La Calzada, teníemos
cocina de carbón y,
claro, tamién teníemos cocaraxes,
les que veníen col
mineral pol mesmu preciu,
negres y gordes, d’eses que
morríen restallando cuando
les achaplabes col pie, auténtiques
cocaraxes carboneres,
non de les roxes d’agora, que parecen menos xabaces y son como d’antroxu tinerfeñu al llau d’aquelles
que, nes velees de la mio hermana, siempre se-y escondíen nes zapatilles cuando diba calzase.(…) Páx. 29
«Un día de branu lleváronme a ver les obres del pisu pal que nos díbemos mudar (ná, cinco minutos
llargos a bon pasu), mui cerca de Cuatro Caminos, enfrente les cases de la Constructora. Fice tol camín enfocicáu,
pensando nos mios collacios, colos que yá entamaba a xugar partíos na cai Ceriñola (y agora, cómo
diba arreglame tan llonxe d’ellos).”» Páx. 31
Riesgo, Xosé Nel
El cai nunca duerme
ALLA. Uviéu, 1989
«-”Diariu faláu de Radio Nacional d’España. Son les dos de la tarde. Noticies. Na alboriada d’ayeri,
una patrullera de l’Armada apresó un arrastreru que, según fontes de la Comandancia de Marina de Xixón,

empobinábase al puertu asturianu de Candás. Tres d’una llamada d’alvertimientu, ésti tuvo l’asomu de fuxir,
cosa que nun foi quien a llograr, siendo obligáu a conducise al Puertu de Xixón.”» Páx.77
Rivas, David
Xente de perende
Trabe. Uviéu, 2006
«Pero sigamos. Máximo tenía una fundición n’El Natahoyo, cerquina del sable d’El Tallerín. Cuando
llegaba’l bon tiempu facía’l camín a golpe de calcetu, dando un paséu llargu hasta casa, que taba al delláu de
Begoña. Raru yera’l día que nun-y pasara daqué nesi trayeutu, siendo mentira la mayor parte de les vegaes
lo que cuntaba como verdadero.
Nun vais creyer lo que me pasara güei. Venía yo andando pa casa, dempués de tomar una botellina colos
collacios en Casa Cholo, cuando, a l’altura d’un pocoñín pacá’l mataderu, llamóme una xitana que llevaba
en cuellu a un rapazucu de pocos meses, si ye que nun yeran selmanes lo que namái tenía’l caraxiyu aquél.
Tábamos al pie’l paredón de la estación, onde’l caleyón del norte. ¿Véislo, non? (…)
Cuando’l temperu yera malu, con lluvies y cutos de restallu, garraba’l tranvía d’El Musel que lu dexaba nel
Muelle, nos Xardinos de la Reina. Y tamién ehí, nel mesmu tresporte públicu, pasáben-y coses.» Páx. 54, 55
«Los Ceínos yeren dos hermanos percoñocíos en Xixón. Hai unos años que morriera el más mozu, que
ye al que quiero referime equí. Ésti yera un poco retrasáu yá él cuntaba que tenía esa tara porque a la so ma
atropiellárala’l tranvía d’El Musel cuando taba preñada. L’otru yera un paisanón de pelu blanco que vendía entraes
pa El Molinón na zona’l centru de Xixón, al rodiu’l restorán El Retiro, onde tenía cuartel xeneral.(…)
Pos resultó qu’un día d’aquel añu, pasara pela cai Xovellanos de Xixón un garrapiellu xente con banderes
azules y pancartes. Nun yeren munchos pero yeren abondos.
Ceínos que los ve dende la puerte’l bar, na cai Begoña, sal como un espuni pa escontra ellos.» Páx. 73
«Hasta los primeros años setenta hubiera un chigre na cai La Mercé, en Xixón, que tenía per nome
y blasón El Puntu, nome que nun yera cosa estremada que’l ñomatu’l so propietariu. N’agostu de 1926,
el periódicu xixoniegu El Comerciu falaba d’esti paisanu cuando convocaba a una espicha al traviés d’una
anuncia que rezaba asina:
48 49
Por última vez El Puntu,
Que se llama Ramón Riera,
Rompe un tonel en Somió
D’ocho pipes de primera.
Dende pequeñu que yo fora muncho, col mio güelu y col mio pá, a esi sitiu, el de la cai La Mercé, non
onde espichaben, qu’ésti yera un sitiu coñocíu como Casa El Canalín, na carretera nuea L’Infanzón. Yera
un chigre llargu, coles meses a la mandrecha y la barra a la manzorga, d’azulexos escuros y rellumantes, verdiazulaos
camiento, y suelu ñegruzu con serrín. Apegaos a la paré había escaños y bancos corríos de llistones
y, a la escontra, banquetes y unes poques siyes. (…)
L’istitutu taba n’El Parchís, cuasi al delláu d’El Puntu y yera fácile que don Senén tomara un par de
botellines dacuando mentres charraba d’Einstein colos ablucaos parroquianos.»
«Fermín sí que yera un paisanón de perende, pero pela banda necia. Ñaciera en Quintueles nel añu 1898.
Pariéralu la so ma, Ánxela, mentres los españoles taben perdiendo lo que quedaba d’aquel emperiu nel que
nun tapecía.(…)
Un asuntu que dexa a les clares como yera’l puntu en custión dátase nos primeros años trenta. Diba
Fermín col so uniforme municipal ya’l vergaxu na mano –el tolete nun-y gustaba- cuando vio un paisanu a
carrenderes persiguíu por un par de pescaderos de la rula. Tratábase d’un lladre coñocíu per Cimavilla, un
poquina cosa pero que-y tenía abondo apreciu a les billeteres de los demás. El casu ye que’l nuesu guardia
saliera tres d’él col envís de garralu. L’home que ve que Fermín ye’l que-y va detrás, tírase al augua, ñala hasta
los cais de Fomento y prefier entregase a los carabineros qu’a un municipal. ¡Vaya si lu coñocía!» Páx. 106
«Ye un paisanu en condiciones
que vive en Santa Olaya,
zona d’El Natahoyo, el primer
barriu obreru de Xixón. Yo
pasara con elli y col mio pá un
montón de tardes iberniegues
tomando sidra –bono, yo kas
de llimón- y mariscu –eso sí

me daben- nun chigre de los pocos que queden güei en pie y onde s’aconceyen
paisanones a canciar tonada, La Carreña.
Daniel d’esto van ya abondos años, yera un sufridor esportinguista de primera.
Diba a El Molinón con dos faries, ún pa fumalu ya otru pa comelu. Nel
primer tiempu fumaba más o menos selequino. Nel segundu tiempu, anque’l
Sporting ganara –porque hubiera tiempos nos que’l Sporting ganaba dellos
partíos- xintaba’l puru como si tala cosa.» Páx. 111
«El 19 d’abril de 1976 Xixón alborecía cola noticia de que, pela nueche,
asesinaran a Rambal na so casa de Cimavilla, nel Campu les Monxes. Alberto
Alonso Blanco, que tomara por alcuñu’l nome d’un actor de los años ventitrenta
del sieglu ya pasáu, un actor que taba especializáu en melodrames y
adautación de lliteratura popular nes tables de Madrid, cubriera como naide
la dómina d’un Xixón al mesmu tiempu folixeru y murniu, abiertu y reprimíu, tolerante y faxistoide, azul
de mar y gris de policía. Rambal yera’l marica oficial de la villa de Xovellanos.(…)
Al delláu del so ataude, acompangáu por miles de presones na ilesia San Pedru, lloramicaran hipócritamente
muncha xente que tola vida lu mirara mal, los homes y les muyeres d’una clas bien, ridícula
y faltona, que lu aplaudíen nos antroxos del barriu altu pero lu tachaben d’amoral, promiscu y poco
fiable.» Páx. 125
«Manolo Infante ñaciera en Xixón, na cai El Rosariu de Cimavilla nel 1901, fíu de Valerio, que yera
funcionariu l’ayuntamientu, y de Filomena, una maliayesa afincada nel barriu altu. Siempres presumiera de
que nun fora xamás a una escuela católica y dicía que yera de los pocos xixoniegos que nun foran oblilgaos a
daprender el catecismu.» Páx. 131
«En Xixón fo cortar el pelu a una barbería na cai Uría, onde, pa entrar, dexó les madreñes nel felpu y
sentóse en siyón enseñando unes zapatielles de cuadros marrones y roxos. Y, dempués, fuimos –col clasclás
de maera repilando pela Plazuela y la cai Cuadonga- tomar un cafetín al Dindurra, onde posara les madreñes
al delláu del paragüeru.» Páx. 196
«De tolos collacios del mio güelu Manolo del que yo más m’alcuerdo ye de Pumarín. Enxamás supe
cuálu yera’l so nome de verdá porque tol mundu lu llamaba Pumarín.
50 51
Yera d’esa zona rural xixonesa
que nos sesenta camudárase nun barriu
obreru y agora yá ta cuásique nel
centru la villa. Siempres lu maxino col
monu, un metru articláu nel bolsu la
culera y llápices nel peitu. Yera calvu y,
polo menos siendo yo neñu, paicíame
altu.» Páx. 209
«Casa Paco yera un tuguriu maurientu
que taba na cai Ruiz Gómez,
cuasi apegáu al cafetón de la plazuela
San Miguel, que nun ta dedicada al arcánxel,
anque bien lo merez por ser ún de los mitos paganos atlánticos más importantes, magar que cristianizáu-
sinón al xeneral Baristu San Miguel, el compositor de la marcha cola que Riegu s’alzó pola constitución y
que güei coñocemos como Himnu de Riegu. Toi falando, ta claro, de la villa de Xixón.» Páx. 220
Rodríguez, Xosé María
Tiempos de nublina
Trabe. Uviéu, 2004
«La selmana siguiente foi inolvidable pa los asturianos ya mui especialmente, pa los xixoneses. La radio
falaba de las batallas heroicas nel cinturón de la ciudá: de las amarradiel.las cuerpu a cuerpu nel Piles; de
la defensa a dentel.ladas del barriu Cimavil.la; de las encesas griescas nel altu Pumarín ya la Calzada. Pero,
sicasí, yera afarto difícil caltener la resistencia frente a una fuercia tan desigual.
-Remar ya remar nesi marnuetu pa morrer na oriel.la –marmul.laba don Xulianu cola oreya apegada
al aparatu.
El ventiún d’outubre los nacionales entranon finalmente en Xixón mientras pola radio falaban de la fin
de la República nel norte. Sin embargu, dalgunos frentes guerril.leiros resistienon n’amarraza nos cordales
montañosos del interior; ente los más temíos comandos alcontrábase’l de la sierra de Fonte Prieta. Había

varios grupos dixebraos pol monte. Nunu d’el.los aluchaba con valentía Reixu, que se movía como las alimañas,
atacando por sorpresa nel momentu menos esperáu.”» Páx. 101
Rodríguez Cueto, Milio
L’últimu volador
VTP. Xixón, 2004
«Onde yo vivo que ye un barriu de
Xixón d’esos que se dan mui bien les viviendes
sociales, punxeron va poco un
taller d’autoestima. Hai poques coses
na vida que s’estropien tan fácil como
l’autoestima y por eso ta bien lo de mandala
al taller, como medida preventiva,
por si llega’l día que nun pasamos la ITV
del psiquiatra.
«Debía ser iviernu, porque’l día taba claru nel muelle de Xixón, pero nun había turistes nin pasiantes
atascándolu: debía ser tamién un día d’entre selmana. Yera pela mañana, eso seguro. Yo, estudiante universitariu.
La prensa dio la noticia de qu’andaben rodando una película na ciudá, cosa d’un tal Garci, o Garcí, que
nun sabíemos ónde pone-y l’acentu; un puntu ensin ningún interés pal mediu pedante nel que me movía,
ku-klux-klan de rapazos sesudos que namás respetábemos los macizos coñazos del primer Wenders o los martirios
morales d’aquel otru Carlos Saura. Esi Garci nun prometía gran cosa, pero, por matar el tiempu, p’allá
fuimos un amigu (¿sería Boni Pérez?) y yo, hasta’l muelle, a ver el rodaxe. La cosa consistía nun travelling
de diez metros aprosimao. De la cuesta la Colexata, Ferrandis parábase a mirar, entre triste y señardosu, pal
agua que tenía delantre; depués d’unos segundos, abandonaba la baranda y baxaba unos pasos. Ehí siguíalu la
cámara. Apaecía un coche, subía y salía del campu. La cosa más tonta del mundu. (…) Páx. 17
«Los güeyos del actor vistiéronse con un ropón de murnia y perdiéronse nun falsu horizonte, más
suxerente que los bombones del gas de La Campa Torres y muncho más falsu, porque lo que tenía delantre,
a unos pocos metros, na cera del paséu, yera a un coru de diaños barriondos en práctiques, d’entre doce
52 53
y quince años, blincando como posesos, sescudiendo
cabeces, brazos y piernes, y berrándo-y al alto la lleva,
pero con compás dignu d’empresa más altu: “Hijo
puta, hijo puta”.
Ferrandis, inmutable. El mio amigu y yo, impresionaos.
Entendimos qu’eso de ser actor nun dexa de
tener méritu. Como si los diaños playos fueren tresparentes,
el tristayu Ferrandis apartó la mirada y empezó
a baxar la cuesta. Xusto entós, un comandu de los berrones,
formáu por dos unidaes sobre una única bicicleta,
irrumpe dientro’l planu y pasa per detrás d’él con gran aparatu de gritos y xestos obscenos. Escándalu
de rises entre los trunfantes boicoteadores. ¡Corten! Un mozu con pantalones vaqueros arrataos (lo mesmo
yera’l Garci) esprecétase enfadáu y da órdenes al equipu pa que-y cierren los accesos a la Plaza’l Marqués.
Ferrandis subió la cuesta la Colexata, serenu y calláu; aguantó los retoques de la maquilladora, apoyóse
otra vez na baranda, mirando pa la mar presa del muelle, y ignoró, numberosa de demónganos locales, tol
tiempu cola mano nel rabucu pa rompe-y los nervios y la concentración.» Páx. 31-32
Rodríguez Cueto, Milio
Románticu
VTP. Xixón, 1992
«Llevábemos bien andáu’l mes de noviembre y, ensin llegar tovía a ser el tiempu fríu que taba por venir
nos meses siguientes, corría per Xixón un aire sópitu y destempláu que sescudía les cañes medio seques de
los árboles nos parques y desfacía los montoninos de fueyes atropaes polos xardineros. La xente ya sacare los
paragües y apurábese peles cais, roceano coles nubes escures que tapaben tol cielu y escurecíen el mediodía.
Había charcos recientes y rapacinos brincando nellos en katiuskes (...)
Na primer foto que nos enseñaba, na paré de tres de la barra, víase al propiu chigreru, en metá de la
sidrería, échando-y un culín a Franco. Les siguientes yeren idéntiques na composición, pero pel culín
esperaben La Pasionaria, un antiguu alcalde de Xixón arrodiáu d’antiguos conceyales y mediu equipu del
Sporting de la temporada 79-80.» Páx. 80

«-Ná, pa esi día gloriosu too tien de volver a tar como ella lo vio al desterrase. Los sos caballeros tienen
de desembarcar na isla La Tortuga y d’ehí garrar, con armadures y cascos esllumantes, la sienda pindia que
sube pa La Providencia y Somió. Depués, les espades desnudes brillándo-yos na mano, tienen de baxar per
la carretera hasta la Lloca del Rinconín y el Piles, espantando a los automovilistes col so aspectu xabaz y sanguinariu.
Tovía tienen de percorrer tol Muru hasta la Escalerona, callaos y tan amenazadores que tol mundu
va apartase corriendo d’ellos y nin siquiera los neños van tener coraes pa siguilos berrando. En llegando al
Campu Valdés y a la Casona de Xovellanos, han facer una gran matanza y chiscar toles parés de sangre de
bedeles y funcionarios municipales.»
«Charrando d’esta manera, llegáremos ya a Xixón. Xunto la primer salida de l’autopista, la qu’entra pal
Puente la Braña en dirección a Pumarín, había tres coches apartaos na carril derecha y un piñu de persones
alredor d’ellos. Vimos baxar una ambulancia pela salida y parase al par de los vehículos accidentaos. La guardia
civil daba pasu a los que siguíemos más alantre, que circulábemos en primera, mui despacio.» Páx. 112
«Nun queríen atracar na Villa, cualquier quinqui ensin teoríes sabe qu’hai qu’actuar llueñe de casa.
Un homenaxe a aquella xeografía mítica de la que ya te falé, que me llevó hasta Marsella y hasta Nápoles
decidióme entós pel barriu marineru de Cimavilla, en Xixón. Prestábame que fuere un día llentu, a ser
posible d’orpín nel aire, y esperé hasta’l primeru d’eses característiques. Ya de nueche, llegué a la parte
occidental del barriu y empecé a dar paseínos de la fábrica de conserves a la rampla de la Colexata. Yera un
trayectu d’unos quinientos metros, más ilumináu, anque ensin excesos, nos dos extremos abiertos al muelle,
pero con un pasu intermediu ténebre pela cai laTrinidá. Yo vistía una cazadora negra y resultábame fácil, si
quería pasar desapercibíu contra les fachaes puerques de les cases. Depués d’un ratu sentéme a la puerta de
la Capilla la Trinidá a esperar. (…) Páx. 173
54 55
Rodríguez Medina, Pablo
Les vueltes, toles vueltes
ALLA. Uviéu, 2002
«Pa empezar bien l’escritu, y seguru que nun lo diba facer, tenía
que contar qu’al asaltante llegába-y un fedorucu mui desagradable
del Muelle, que lu facía torcer el focicu, y que la humedá y el
fresco la nueche, que-y entraben del contactu cola piedra na que
taba sentáu, obligábenlu a ponese de pies a cada poco y dar una vueltina
pelos alredores anque siempre acababa volviendo a la Capilla la
Trinidá.»
«Gosto sacó un duru, tirólu pa ente la niebla y punxo muncha
atención pa sentir el ruíu que facía. Yo nun sentí nada, y paezme
qu’él tampoco. Andando pel rompeoles, él delantre y calláu y yo a
tres pasos y reburdiando, fuimos acercándonos al final, a la Punta’l
Lique-Lique, brazu oriental de la barra del Muelle. Ellí, como saben
tolos xixoneses, el paséu muerre enanchándose nun círculu que,
contra la paré del rompeoles, tien unos bloques de cementu que valen
d’asientos pa ver entrar o salir lanches y botes nes tardes de bon
tiempu. Pero aquella nueche xelaba. Y, con eso y con too, según díbemos
llegando pela parte superior, empezamos a sentir voces y rises.
Suárez-Concheso tenía pocu interés na xente que pudiere haber ellí
a eses hores, siempre buscando nel borrín una ralura pa fisgar, y yo
fixi adréi por nun meter ruiu, ya asina lleguemos hasta la baranda
alta de la Punta tolo más callandino que podía ser. Gosto paróse mirando
pal agua y yo recoldéme de cara pal Muelle.» Páx. 204
«Yéremos mui neños cuando mos llevasti una nueche a conocer el mar; hasta Xixón. Ficiérasete imposible
que nun conociéremos qué yera’l mar, y que nun te creyéremos cuando mos desplicabes que yera como
una enllanada ensin un árbol, onde los güeyos nun atopaben dala cosa nel ámbitu.» Páx. 60

Rubiera, Carlos
Ñublu de mar y distancia
Conseyería d’Educación y Cultura. Xixón, 1983
«Mañana los praos de Ciares y Contrueces –paxizos, quemaos de la seca-, entamarán yá a verdecer un
pocu y los ñerbatos, tordos y raitanes encoplarán los sos cantares seroñegos peles amoyentaes viesques de
Caldones. Nos parques entamarán les fueyes muertes de los pláganos a texer la so llandia alfombra de foyarasca
y les ñubes pasarán prietes y arteres afalagando la cuguruta los montes.» Páx. 28
«Ansina caleyando subimos
hasta Deva, a un sitiu que llamen
“El Chabolu”, y ellí asitiémonos
fuera, nunes meses de piedra
qu’hai y xintemos una tortiella
y sidra. La tarde taba selina y
l’arbolíu del camín de la ponte y
de xunta la capiella diba desgranando
les sos fueyes musties de la
seronda col falagu la brisa. Nun
facía fríu y l’aire taba fresco y arumoso.
Fue munchu agradable tar
ellí charrando tola tarde, cuasimente hasta l’atapecía. Y hasta m’enteré de qu’en Deva, onde la ilesia, hebo
antiguamente un conventu ñomáu de San Salvador, del qu’entá hai una llábana grabada’n llatín sol dintel de
la puerte les muyeres; y qu’esi conventu yera munchu vesitáu polos pelegrinos que s’empobinaben dempués
a Valdediós y a Covadonga; y que’l ríu que sal debaxu la capiella de xuru ha venir por solatierra dende’l
Riosecu Caldones; y que dientru la Quinta’l Conde hai un grandísimu túmulu, que ye comu un cuetu
perfechu nel qu’enterraben a les presones prencipiales cuantísimaya enantes de los romanos… Y tou esto y
otres coses prestoses del pueblu súpiles por un mozu d’ellí que tuvo un cachu charrando con nós y que nos
dexó un llibretucu emprentáu de cuandu les fiestes del pueblu, que son en setiembre. Prestóme munchu
saber d’estes coses antigües, de cuandu la Edá Media, del conventu…¡Cómu me prestaba vivir naquella
dómina!…» Páx. 30-31
56 57
Rubiera, Carlos
Sapedraguirro
Cuentos de bona oreya. ALLA. Uviéu, 1988
«Nacho enxamás nun tuvo más caña que la de cañavera: dos palos d’un metru ochenta y puntera de bambú,
bien curaos a la solombra nel llagar de Trabanco, en Llavandera. Los aros facíalos él mesmu d’alambre
galvanizao y, p’arreyalos, nun quería otra cosa que nun fuere filu-vela; lo mesmo que so madre merca pa
marrar l’embutíu. Y referente al carrete, nun quería otru que’l «Sagarra» medianu. (…)
Ello ye que’l coche voltió y cayó al prau enriba un regatu que baxa de pa Roces, talamente al aniciar la
Cuesta la Piedra, ente Ciares y Granda.(…) Páx. 35
«Les sapes meyor organizaes teníen fama de ser les del Estañu. Cuantísimos años llevaben col vezu aconceyase
derriba La Llastrona –llugar grande y a salvu onde los hebia-y, quiciavis por eso, yeren les más arteres
y respetaes dende Xixón a La Villa. Ansina que, a esto de la repuntiada, -doblada yá la medianueche del sol-
había, so La Llastrona l’Estañu, el más grande conceyu de sapes qu’enxamás se viera: cerca les doscientesmil
sapes veníes de tolos peñeos, pielgos y calaes que van dende Serín a La Ñora.» Páx. 43
Rubiera, Carlos
El gaiteru
Cuentos d’estos díis. Uviéu, 1978
«El gaiteru de Xixón, resucita a cada hora, a cada siglu. Y con él, la eternidá. El gaiteru de Xixón, nun
tien nome, nun tien familia, nun tien edá. El gaiteru Xixón, como’l busgosu: home-gaita, home-cabritu.
El gaiteru Xixón, ye como’l vientu, sopla. Nun para. Pasa. El gaiteru Xixón, un mitu, una conseya: El
Gaiteru.
Foi un di cualquiera. Xixón, pigazaba sélemente col run-run d’una inescosable añá de fierru y orpín.
Yera gris el cielu, gris la tierra, gris la mar. Esa mar xabatina, que ruxe d’atapecía cuando’l ñuberu ta en
danza. Esa mar que gufa ente les llastres, baxo’l cantil; qu’espolleta n’espluma caresa y arrinca l’ocle nes
galernes seroñegues. Esa mar que, dacuando –cuando les foles talanten lo fondero y los ventolinos van pela
tremenda-, traga los homes qu’encarien nortiaes y galernes penriba les cabres esplumoses de la so parda
pelleya. Mar de Xixón tamién eterna.» Páx.27

Rubiera, Carlos
Y yera mayu
Antoloxía del cuentu triste. Ámbitu. Uviéu, 2003
«Y pasó la tarde y atapeció, como de costume, colos xiblíos del tordu y la ñerbata pela biesca’l Regatón. Y
les pites, que xubíen pela llosa p’arriba escargatando, al so piteru. Y yo, que diba afalar les vaques a la fonte’l
Güeyu, cuasimente al filu la nueche, dempués que tornaben les de Pilu, pa que nun s’escorniplaren unes
coles otres…(…)
Tornemos d’escuela aquel día, como de costume: coles carreres tres de les caparines pel Reburiu; les paredes
en tala o cuala saltadera; les xipres y les puxes d’unos pa colos otros tocante a cualquier cosa; la rocadina
de pasu per xunto a casa Colás (“¡Bon día, ¿eh neñinos?!”); la moyadina na fonte’l Güeyu y l’enfilar a bon
pasu pel camín de casa, baxo la solombra les ñozales y los fresnos de xunto al llagar.» Páx. 30, 31
Sánchez Vicente, Xuan Xosé
Cuentos de llingua afilada
ALLA. Xixón, 1984
«Dempués vieno’l cortexu. Maúros ya los dos – traenta y tres, tú, traenta ella -, ensin vagar pa retrolicar
y truñase como faen los xatos y los novios mozos, pa separase y volvese axuntar (devolviéndose les cartes
d’amor col enfotu secretu de tornar cariciales de nuevu día), les tardes de los domingos chábenles ún al
llau del otru, Ciares enriba, pa esñidiar la goyada peles castañes naranxes na seronda, camín de Granda y
Vega; abeyando pel muelle y pel muriu San Llorienzu en veranu, a saborguiar cola vista la espluma cuandu
degola la picalina les oles pa espardese n’arena; de xemes en cuandu – una vegada al mes na más porque
nun se podía espovisar el dineru: había qu’aforrar pa casase – somorguiándose en Marcelo o nel Infiernu
pa tomar el vermú y sentir ellí la calisma’l tabacu, el tastu perllariegu de los caldos, la gayola de les vozaes
domingueres.» Páx. 33
«Algamó la llastra y sentóse. Miraba agora pa la vallada, allá abaxu, onde la borrina, que nun s’espardiere
dafechu, nun dexaba acolumbrar ñidiamente. Más tardi sí. Más tardi veríense La Riega Los Beyos, La Campa,
La Granda, La Carbayera, El ríu Bedoya, El Sotu; y más lloñe, dempués d’una llanada de praos y eríes
58 59
separtaos por sebes y rayonales, el poblu. La casona El Barréu, de mano, y, más allá, la ilesia, les cases de La
Fana, El Cuetu Moñíu, Llavandera…» Páx. 50
«En Xixón tuviemos la suerte de dir ocupar una casina pal Cotu, nes Cases Barates. D’aquella’l Cotu
taba tovía nes afueres de Xixón, y nun yera más qu’un cuetu de barru santu, el cuartel y la carcel, y el restu
praos y caseríes. De mou y manera que yo topábame lo mesmo qu’en Cofiñu, con aquella llosina y tou que
teníamos al empar de la casa, que con un pocu xera pues tener a mano siempre llechugues, ayos, cebolles o
lo que te pruya plantar, y asina tienes coses de casa, de confianza, col enfotu que sabes lo que comes, y paez
que sabe d’otra triba lo qu’afalagues y arrimes tú mesma.» Páx. 96
Sánchez Vicente, Xuan Xosé
La muerte amiya de nueche
Conseyería d’Educación. Uviéu, 1984
«“Anunciada por un misteriosu infanzón que, nuna de les rames abaxa antainaoramente a la vallada y
pela otra va esñidiándose apigazadamente pelos últimos bordes de la rasa marina qu’entama, aprosimadamente,
enriba Llastres y vien, col nome mesmu de les Mariñes, a somorguiase nos antiguos esteros de los

íos Pilón, Piles y Cutis; acoricada pela llomba la Providencia –antigu nortiaderu de ballenes y esclucaderu
agora de purriques ayenes- y pela Atalaya consagrada a la santa de la ruelda, les cuchielles y cayó un
marineru al agua, tamién entós allugamientu d’agüeyaores de ballenes; pastoriada, allá nel requexu l’este,
polos cantiles del Rinconín y los regodones de Los Vagones; dempués d’un xiru de noventa graos onde la
carretera apiégase a les riegues marcaes pol sólu habitáu de muiles, contamináu y contaminanate Piles; solliviaora,
rixega, enfarxopetada de matrimonios, lligones, turistes, madrilanos de corexa escosa, morenos,
blanques, cadriles, mamielles, fedorizu a cremes y carne saliada, tortielles y toa triba d’hongos y ecemes,
espárdese, como si ella tamién s’estresare p’aprovechar los escasos momentos de sol cantábricu, la playa de
Xixón. Acorraxada per altos edificios qu’un día fueren l’enfotu d’anteriores corporaciones democrátiques
(Alexandros Manos que se ñeguen a facilitar el petite del Dióxenes-sable, que nun tien más enfotu que’l
d’asoleyase con vagar), pesie a ello, ente la llume de les veles, al rellugu de les llugaes, delantre’l verde
multipráu de la mar, el Leónides cantábricu, al aire’l pechu col so guedeyu de tiendes metanos d’él, sigue
enfotáu nel so ”meyor, asina saliariaresmosmos na solombra” cola que la operaria de Pumarín qu’aporta a
la hora de miriar les vaques, l’executivu antainaor y futiniegu de les ocho la mañana, la ma llendaora de les
once la mañana arreyante d’una riestra ñeños, el lligón goyerosu y musculáu que desendolca al sol –xuntu
cola resaca- la perprieta color del so pelleyu y la soltera trentañera con un daqué entovía naguatible pero
con un aquél más definitible entá de calter que s’acostina pa tola vida, blinquen, tuesten, glayen, esfrieguen,
miren al delláu, en tientes, ximiélguense, enseñen, cuerren, somórguiense, desarreyen los botones
y mueyen los pies y les ñalgues.”
«Asina, con esta descrición na tiesta que del sable de San Llorienzu fai’l nuestru escritor Carlos Priandi
(Guía meridiana de les playes d’Asturies. Llanes, 1981, fya. 221 a 222), crucé’l ríu Piles allá sobre les
dos de la tarde, col arrecendor del salitre, la llume dando barganazos nos tovía entecirraos güeyos y el
sabor entá de güisqui garrafón y llabios mercenarios nos de mio. Nun taba pa ná, o meyor dichu, necesitaba
espovisar el cansanciu y exugar les tosines pa poder poner, a dalguna hora o dalgún día, el mio
cerebru a funcionar correchamente, a fin de peñerar afayaicinamente tolos datos que verneraben na mio
conocencia. De mou y manera que busqué aparcamientu siguiendo la llarga riestra d’ocalitos y families con
fiambreres qu’estren l’avenida que lleva al Molinón, baxé y calecíu peles raxes de sol, enfrescaes de xemes
en cuandu pol espovisador nordés, averéme a la barandiella’l muru, dempués de caleyar hasta la escalera
númeru ocho.» Páx. 47-48
«Correchu, con rebusquinos de satisfación nes coraes, envede tirar pela calle San Bernardu, empobiné
pal Muru. La marea, baxando entós, dexaba al descubiertu una gran faza ente La Escalerona y el sable da-
60 61
rreamente ensuchu de la nueve. Baxé a la arena y entamé caleyar al borde la mar, que s’espurría so la playa en
foliquines seles, como pigazantes na nueche, mientres les llumes del muru allumaben dacuandu una charca,
dexaben ver una ocla o rellumaben na vara de dalgún piescaor qu’andaba a la furagaña y la chopa.» Páx. 49
«Empobiné y, perfilando tolos detalles, anduvi la Guía, el Parque, la Catalana, Los Campos y Begoña
casi como si me llevaren al carrapotu. Sólu cuandu m’esboroñé na cama fui pa dame cuenta de lo frayáu que
taba. A pesar d’ello punxe’l despertador pa les ocho, enfotáu en llevar alantre’l plan coles primeres hores de
la mañana.» Páx. 52
Sánchez Vicente, Xuan Xosé
Hestoria d’Equis
Antoloxía lliteraria. Atenéu Ubreru. Xixón, 2001
«Quería andar llimpiu tol día, ver cine, tomar copes, caleyar, nun tar atáu. Asina que dempués d’aquella
sufrencia y cinco años de mostrador viniérenme bien les vacaciones. Y los cuatro primeros meses fueren
asina, vacaciones. Llevantate cuando te petare, desayunar, salir o tar folgáu na cama lleendo, abeyar peles
calles, subiendo a La Calzada, a Pumarín, a Contrueces, entrando en chigres nuevos, oyendo andaluces o
xente de Cangues o Cangas o Niserias o Cualloto, a les muyeres falando al altu la lleva de ventana a ventana
o de la ventana a la calle. Aparase una hora a ver les grúes trabayando o les máquines echando galipote onde
antes nun yeren más que fondigones.» Páx. 78

Santori, Xuan
El fatum Astur
La heredá. VTP. Xixón, 2005
«Ye’l casu d’una tardiquina de primavera, na que los vieyos del barriu del Llanu de Xixón xugaben na
bolera que-yos instalaren nuna retonda de la nueva Avenida Juan Carlos I. Xugar, xugaben un piñáu d’ellos,
pero munchos otros apigazaben asoleyando quedinos y, de cuando en vez, charraben o achisbaben pa la
partida y pa la xente que pasaba. Col semáforu, llegó, toa azacanada, una rapacina entainando con decisión
ente los paisanos. Movíase garbosa a una cuarta del suelu sobre unos zapatos de plataforma, cuando se sintió
una voz carrasposa ente los xugadores:
-¡Ai, neñina, ten cuidáu, nun vaigas cayer de les subidories.» Páx. 85
Serrano, José Horacio
Privilexu d’aldea
Como tú quieras. Conseyería d’Educación, Cultura y Deportes. 1991
«El primer branu depués de casaos marchamos de viaxe pel extranxeru, y vinimos tan cansaos de coche
y monumentos que, a la torna, sentámonos con calma y decidimos que’l siguiente branu díbamos pasalu a la
vera casa. Y asina fue, eleximos una aldeína a les afueres de Xixón y p’allí fuimos durante tres branos seguíos
nel mes de xunetu. Como Rieres namás ye una aldea y non un llugar de vacaciones apenes dispón de los
servicios mínimos pa un habitante civilizáu de la ciudá, pero compensa le sos carencies cola proximidá y col
paisaxe; si tuviere mar…» Páx. 77
Serrano, José Horacio
Él
Como tú quieras. Conseyería d’Educación, Cultura y Deportes. 1991
«Enantes mentí. Alcuérdome d’un nenín mui pequeñín, siempre con veles, de tres o cuatro años, con
pantalones curtios, pasiando con so padre pelos praos d’una aldea a la vera Xixón, entrugándo-y qué ye
62 63
esto, y aquello, y corriendo, y sentándose xuntos baxo un árbol solitariu a mirar l’horizonte, y volviendo de
la mano a casa per caleyes de barru y piedres cola sensación de tar onde tienes que tar, de pasalo bien ensin
tener que dir al cine, al circu, o a comer hamburgueses…Pero tengo la impresión de qu’eso pasó poques
veces.» Páx. 150
Serrano, José Horacio
Th’espurrió la pata
Como tú quieras. Principáu d’Asturies, 1991
«Fai menos d’un añu qu’atopé a Marta pela calle. Yo algamara un bon destín en Xixón y dexárame ya
d’una puta vez d’andar atropando cargos na paxa pa un curriculum babayum; taba contentu y pasiaba pel
muelle chando un vistazu al nuevu aspectu del ex barriu pescadores, agora parking de señoritos.» Páx. 199
Solar, Andrés
Xuanín y Xuan
Muestra Llibrería. Editora del Norte. Xixón, 2004
«… Depués de salir de la escuela, dalgunes vegaes que nun-y petaba xugar colos collacios, garraba la merienda
y colaba pela caleya El Fondón, gustando miruéndanos peles veres y esclucando ñeros que s’afayaben
nos matos. A cada ñeru, fuere del páxaru que fuere, ponía-y nome d’escritor:
-Esti, guapu y bien tresnáu, voi nomalu’l ñeru d’Antón de Marirreguera…» Páx. 61

«La quinta’l Conde, toa ciarrada al rodiu con un paredón de piedra y barru, que por mor de la vieyera
qu’arrecostina ta tou esllavazáu y tronáu, lo mesmo que los condes d’anguaño, pero qu’entá sigue – y siguen-
de pies, siendo privilexu de los escollos y de los atrevíos el poder pasar adientro pa ver lo que s’afaya
na rotonda de la quinta: carbayos y umeros condergaos dende la so nacencia a dar solombra a los solombriegos
nobles; un palaciu de cuatro picos, afargatáu d’armadures, espades y escudos enllenos d’historia,
poder…» Páx. 85
Solar, Andrés
En chigre
Muestra Llibrería. Editora del Norte. Xixón, 2004
«La verdá –retruca Antón- ye que salí temprano de casa, cola escopeta, y dixi pa min: voi dir andando
pelos atayos; si cazo daqué, bien, y si non, poco ye lo qu’estorba. Cuando diba pela matona, vi un bandu
cigoreyes, morrocotudu; viles como se posaben nel prau la Rionda…» Páx. 19
Trejo Fombella, Helena
La siella verde de la playa nueva
Onde’l ríu besa la mar. Grupu Epona. Xixón, 2001
«Foi un trunfu. El
poder, atropando votos
pa les eleiciones, refervió
un proyeutu que basculare
la pesa pa ellos…: Una
playa. Home, sí, artificial,
of course. Pa desafogar la
otra y que la xente los barrios
averaos nun tengan
que dir hasta San Llorienzu.
Ghetto. ¡NON!. Nun
64 65
ye eso. Oye, ho, que n’otres ciudaes faenlo tamién. Otres ciudaes: Donosti. Sí, ye verdá; lleílo nel periódicu
cuando entamaba’l branu y yá van pela tercera o cuarta. Paez una moda. Denantes construyíen pantanos,
pero anguaño nun hai falta d’ellos. Nun llueve.
Y fexéronla. Playa Poniente, playa nueva, playa’l barriu, (Barriu Natahoyo). Playa de nós. Nós: vecinos
y vecines de Mariano Moré, Marqués de San Esteban, Mataderu Vieyu…
Escoyeron el pedreru. El de xunto a la casa grandona onde anicia la cai del Naval. El pedreru nel que
pesquen per esti orden: xubilaos, paraos, prexubilaos, regulaos. Miraos, columbraos, adicaos por: xubilaos,
xente aburrido, paseantes de perros, patinadores, sabichegos intentando dar conceyos de cómo hai que facer,
pa garrar un pexe curiosu, a pescadores de tola vida.» Páx. 39
Trejo Fombella, Helena
Ocle
Onde’l ríu besa la mar. Grupu Epona. Xixón, 2001
« - Les dos muyeres víen alloñase la muyerina, ximielgando los brazos de contino, lo llargo la muria San
Llorienzu y de sópitu, un airón de tristura y rocea cutió les sos neurones, cabilgando les posibilidaes de vese
asina dempués de dellos años.
Agora la paisanina yá taba delantre la Pescadería; menudina, de gris entero, dende’l so pelu, curtiu,
ruinu, ralu, hasta los zapatos deformaos del mal pisar, vieyos, pero llimpinos.
La so cara, enllena de milenta engurries, caltenía enagora una güeyada azulina empobinada pa la
playa y peles mangues de la batina flores grises, surdíen los brazos ensuchos, apinaos de repegones moraos,
que nun paraben d’esnalopiar penriba la barandiella.
La xente que pasaba mirábala ente satirosa y apenada pero a ella nun-y abultaba un migayu; los sos
esmolecimientos taben ellí, nel sable, nos homes curiosos, colos pantalones remangaos, pañando aquel ocle
que-yos apurría delles perruques.
- Miraila, ho, miraila – glayó ún d’ellos – yá tenemos dos lloques na playa: la ma l’emigrante y esta probe
muyer – finó riéndose al altu la lleva.
- Probe – dixo otru – paez que nos quier dicir daqué – al empar quedó mirando pa ella cola navayon
n’altu, el pelu roxu arrollando agua y sudu y les piernes enguedellaes en les cintes verdiprietes.
- ¡Pachu!. ¡¡¡Pachíííín!!! – la so voz pesie a tar esgastada polos años, oyóse en tola Escalerona.» Páx. 32

Triviño Vinck, Octavio
La promesa
El cuentu asturianu tres la guerra. Trabe. Uviéu, 1998
«Sí amiguín, sí…¿non sabes cómo ye?… La cosa escomencipió con la mesma canción de siempre, de
tolos díes. Tenía la culpa’l rapaz de la lancha, que gritando cola so voz de marica…«¡Truenu… a la mar!»
facíame dar un pilancu na cama cada madrugada que me dispertaba. ¡El demoniu de Mirlotín!… Llamábamoslu
asina por lo menuducu y pálidu que era. Y sentíalu dispués del segundo clarinazu…«¡Truenu…¡a la
mar!»… choclear corriendo calle Atocha arriba pa dir despabilando, como era el su menester, a tolos que
tripulaben “La Sonsina”.» Páx. 59
Vega, Xosé María
El branu más llargu
Los branos de nuestra vida. Ámbitu. Uviéu, 2003
«El neñu qu’ún fuera atópase siempre, en branu,
na playa San Llorienzu, nos «fondingones» del barriu
L’Arena, en Parque Isabel La Católica, nel ríu Piles, nel
Muelle y na punta “Liquerique” -como la nomábamos
nós-, nos cuetos d’El Coto y n’otros munchos llugares de
Xixón. Un Xixón anguaño más urbanizáu y arregladucu,
pero qu’a los xixoneses de «cierta edá» paeznos “menos”
Xixón. (…)
De toes formes: ¿quién nun va ser a acordase
d’aquella playa de de San Llorienzu y de los sos pedreros?
Una playa de galipote de verdá, non como’l d’agora que se quita con servilletes. Un arenal onde tovía
podíemos dir a “quisquilles” pa bañanos depués nel Piles usando de trampolín los pegoyos del puentín y
cayer encalmando ente cagayones y entrañables muiles. Quién, areneru sobre too, nun va ser a acordase de
les casetes que facíemos nos fondigones qu’anguaño son edificios y asfaltu y onde guardábemos ayalgues de
66 67
tou tipu amás d’una fauna considerable. El barriu de L’Arena en Xixón yera, entós, semirrural; nel parque
Isabel la Católica había una pila d’árboles y de matos –enantes de que se punxera de moda’l xardín xaponés
y la calvez arboricida-;nel Muelle había pescadores, marineros, playos y lanches marineres del Cantábricu y
golía a barcu calafatiáu y a pexe; el barriu d’El Coto yera cuasi una aldea –vaquera o apache pa los neños que
díbemos xugar ellí- y Viesques –en castellano “bosques”- yera una aldea dafechu que conservaba los rispios
de la viesca que debió ser nun hai muncho.» Páx. 49
Vega, Xosé María
Un sieglu de nós
VTP. Xixón, 1997
«La ensenada’l muelle local de Xixón taba tranquila. Lanches, botes y
chinchorros apigaciaben a eso de les primeres hores de la tarde. Un bergantín
de tres palos y coles veles a mediu recoyer entraba sele pel coldu que formaba
la punta Liquerica. Namái se sentía’l toque quedu d’una campana na Rula.
Nel edificiu de la Xunta d’Armadores de Buques Pesqueros, nel despachu del
xerente, sentíase vociar:
-¡Anarquistes! ¡Anarquistes! ¿Qué ye lo que quieren? ¿Morrer de fame?
Si nun se trabaya nun se come, tamos nesti mundu pa trabayar… ¡Y gracies
que tienen trabayu!» Páx. 16
«La nueche arrecendía a galipote y salmoria y el golor enllenaba tol rodiu
la dársena’l muelle de Xixón. Les lanches y los barcos cañicábense con sele
fluflú nel puertu local. Peles víes del tranvía qu’acorduraben el suelu a la vera
la Colexata, de camín ya pa Cuesta’l Cholo, diba un paisanu, paragües abiertu
y pasu zarapicu, andando peles tarranches de fierru comu un equilibrista nes
altures. Na man que-y quedaba llibre enganchada una botella vinu a mediu
vaciar: ¡«Alejós, alejós!», diba bisbisando.» Páx. 25
«Diba pa tres años, entós, que vivía en casa la madre llevando vida de señoritu
folgáu. Dalgunes veces facía trabayucos de contabilidá pa conocíos, por

iguar unes perres que, axuntaes a les que-y daba
Carme, llegáben-y pa dir tirando pela vida de
folganza. Xosé yera abondo conocíu en Xixón y,
mientres otros mozos del so tiempu trabayaben,
o estudiaben, o facíen les dos coses al empar,
Xosé taba mui enxeráu nel Grupu de Cultura
de Cuadonga, a onde diba peles mañanes a xugar
al tenis y onde, eso sí, collaboraba de baldre
nes xeres d’organización de la entidá deportiva.
Peles tardes y les nueches yera asiduu de cafés y
bailles onde s’axuntaba con otros folgaos, señoritos
de Somió… y del Llanu.» Páx. 59
«Y nun digamos facese sociu del Club de Tenis o del de Regates. Esti últimu sentíalu Xosé, el suañador,
comu daqué de la so propiedá, porque’l so pá, notra dómina, hubiere sío presidente de la sociedá. Pero los
sos posibles nun algamaben pa tanto como pa facese sociu.» Páx. 60
68 69
llistáu de textos atropaos
ÁLVAREZ, Paco, En poques pallabres, Trabe, Uviéu, 1998.
ÁLVAREZ MORÁN, Nel Ricardo, Otros cuentos d’estos díis, Conceyu Bable, Mieres del Camín, 1981.
AMARO, Nel, Novela ensin títulu, Azucel, Avilés, 1991.
AMARO, Nel, Prietu Jazz, Azucel, Avilés, 1993.
AMARO, Nel, Entós cuando ñevaba, Ámbitu, Uviéu, 2002.
ARBESÚ, Xulio, Misión Pelayo, ALLA, Uviéu, 2002
BANDE, Ramón Lluis, La muerte de los árboles, Ámbitu, Uviéu, 2006.
BELLO, Xuan, La cueva del olvidu, Ámbitu, Uviéu, 2006.
BERROS, Xulio, Maxa de branu. Editora del Norte, Mieres del Camín, 1996.
CALDEVILLA VEGA, Xosé Nel, Xulgáu d’instrucción númberu 1, Lletres asturianes 29, ALLA, Uviéu, 1988
CALDEVILLA VEGA, Xosé Nel, Para Pilar con todo el cariño, Lliteratura 12, ALLA, Uviéu, 1997
COBREROS, Berto, Abocaos, Trabe, Uviéu, 2004
COBREROS, Berto, Siete, Lletres Asturianes 48, ALLA, Uviéu, 1993.
COBREROS, Berto, Escritos en papel rosa, Editora del Norte, Mieres del Camín, 1994.
COBREROS, Berto, Les 4:30, Lletres asturianes 80, ALLA, Uviéu, 2002
CRESPO, Roxelio, Cuentos encantaos, Trabe, Uviéu, 2006
de FAUSTA, Sabel, Barriu Cimavilla, Lletres Asturianes 15, ALLA, Uviéu, 1985.
de FAUSTA, Sabel, Holografíes, Lletres Asturianes 20, ALLA, Uviéu, 1987.
de FAUSTA, Sabel, Mercáu de vida, mercáu de muerte, ALLA, Uviéu, 1987.
de FAUSTA, Sabel, El tren de medianueche y otros cuentos, Trabe, Uviéu, 1996.
FERNÁNDEZ, Xandru, El silenciu en fuga, ALLA, Uviéu, 1990.
FERNÁNDEZ, Xandru, El suañu de los páxaros de sable, Pricipáu d’Asturies, Uviéu, 2000.
GARCÍA OLIVA, Vicente, Diariu d’Enol, ALLA, Uviéu, 1988.
GARCÍA OLIVA, Vicente, El Norte, Llibros del pexe, Xixón, 1991.

GARCÍA OLIVA, Vicente, L’aire les castañes, Azucel, Avilés, 1989.
GONZÁLEZ, Humberto, Anatomíes de la mañana y otres histories escabroses, VTP, Xixón, 1995.
GONZÁLEZ ARIAS, Ismael, La boda del añu, Trabe, Uviéu, 2002.
GONZÁLEZ ARIAS, Ismael, En busca de Xovellanos, Trabe, Uviéu, 2006.
GONZÁLEZ, Mª Teresa, La casa y otros cuentos, Trabe, Uviéu, 1994.
MACO, Alca, Al final de la barra, Lletres asturianes 63, ALLA, Uviéu, 1997.
“MÁNFER DE LA LLERA”, Coses vivíes, Alborá llibros, Xixón, 1998.
MARÍN ESTRADA, Pablo Antón, Como seres humanos, Trabe, Xixón, 1992.
MARÍN ESTRADA, Pablo Antón, Agua que pasa, VTP, Xixón, 1995.
MARÍN ESTRADA, Pablo Antón, La ciudá encarnada, Principáu d’Asturies, Uviéu, 1998.
MARÍN ESTRADA, Pablo Antón, Nubes negres, Trabe, Uviéu, 1998.
MARTÍN SÁNCHEZ, Fonsu, La Guagua, Lliteratura 19, ALLA, Uviéu, 2001.
MARTÍNEZ PÉREZ, Carme, Vía d’escape, Trabe, Uviéu, 2003.
MARTINO RUZ, Xandru, De Ceuta a Sarayevu, Editora del Norte, Mieres del Camín, 1995.
MARTINO RUZ, Xandru, Rema con orpín en nueche de seronda, Editora del Norte, Mieres del Camín, 1999.
OCHOA, Santi, Los párpagos de Buda, Trabe, Uviéu, 1994.
OSTROWSKY, Mark, Aldeanismos, VTP, Xixón, 2003.
PÉREZ, Boni, Aparecíos en México, VTP, Xixón, 1995.
RIESGO, Xosé Nel, El cai nunca duerme, ALLA, Uviéu, 1989.
RIVAS, David, Xente de perende, Trabe, Uviéu, 2006.
RODRÍGUEZ, Xosé María, Tiempu de nublina, Trabe, Uviéu, 2006.
RODRÍGUEZ CUETO, Milio, Románticu, Llibros del Pexe, Xixón, 1992.
RODRÍGUEZ CUETO, Milio, L’últimu volador, VTP, Xixón, 2004.
RODRÍGUEZ MEDINA, Pablo, Les vueltes, toles vueltes, ALLA, Uviéu, 2002.
RUBIERA, Carlos, Cuentos d’estos díis, Conceyu Bable, Uviéu, 1978.
RUBIERA, Carlos, Ñublu de mar y de distancia, Principáu d ‘Asturies, Xixón,1983.
RUBIERA, Carlos, Cuentos de bona oreya, ALLA, Uviéu, 1988.
SÁNCHEZ VICENTE, Xuan Xosé, Cuentos de llingua afilada, ALLA, Uviéu, 1984.
SÁNCHEZ VICENTE, Xuan Xosé, La muerte amiya de nueche, Principáu d’ Asturies, Uviéu, 1984.
SÁNCHEZ VICENTE, Xuan Xosé, Antoloxía lliteraria, Atenéu Obreru, Xixón, 2001.
SANTORI, Xuan, La Heredá, VTP, Xixón, 2005.
70 71
SERRANO, José Horacio, Como tu quieras, Principáu d’Asturies. Uviéu, 1991.
TREJO FOMBELLA, Helena, Onde’l ríu besa la mar, Grupu Epona, Xixón, 2001.
VEGA, Xosé María, Un sieglu de nós, VTP, Xixón, 1997.
VV.AA., Esconderites, Ámbitu, Uviéu, 2002.
VV.AA., Muyeres que cuenten, Trabe, Uviéu, 1995.
VV.AA., El cuentu asturianu tres la guerra, Trabe, Uviéu, 2003.
VV.AA., Los branos de nuestra vida, Ámbitu. Uviéu, 2003.
Edita: Oficina Municipal de la Llingua. Ayuntamientu de Xixón
Coordina: Mª Xosé Rodríguez López
Diseñu: QTC s.l. Valentín Benavente
Semeyes: V.B. Djibb. José Suárez. Archivu
Fotomecánica: F. Principado
Imprime: Gráfiques Covadonga
Depósitu de Llei: AS/2853/2007