A voi 5nk MCCYF civui tlamtlingte in an lim cang - Faiceu The Chin ...

Recommendations

Info

Faiceu the Chin Journal Vol 4, No 186 September 2, 2012 Zisuh A Kan Fialmi “Dawtnak Nun” Matthai - 22:37-39, Luka - 10:27-28 Evan - John Ceu Mang (Ruan) Na innpa cu nangmah naa dawt bantuk in na dawt lai, ti hi a si. Matthai - 22:39. Cucu va tuah law na nung lai, tiah a ti. Luka - 10:28. Zisuh Khrih nih zumtu hna kan nun ram ah si hna seh ti a kan duhmi le a kan fialmi hi, nihin zumtu hna nih kan tuah hna in ka nun ram ah kan inunpi hna maw, ichek tuah hna u sih. Zisuh nih a kan fialmi le siter a kan duhmi hna hi kan tuah rih hna lo i kan nun ram ah kan inunpi rih hna lo a si ahcun nihin zumtu Khrihfami hna kan nun hi a poi taktakmi thil ah kan cang ko lai. Bawipa Zisuh nih a kan fialmi “Dawtnak Nun” Zisuh nih cun, “Bawipa na Pathian cu na lungthin dihlak le na ruahnak dihlak le na nunnak dihlak in na dawt lai” ti hi a si. Cucu Zisuh nih “A nganbik le a biapibik nawlbia” ah a chiah. Zisuh bia bantuk tein kannih zumtu vialte nih Bawipa Pathian cu kan lungthin dihlak kan ruahnak dihlak kan nunnak dihlak cun kan daw taktak hna maw? Zisuh nih le amah Bawipa Pathian dawt hi a kan fialmi a si fawn, kannih zumtu Khrihfa vialte nih kan dawt lo a si ahcun zumtu Khrihfa kan sinak hi i ruah ngaingai kan hau lai. Zumtu Khrihfa vialte nih dawtnak nun hi kan ngeih khawh hna lo a si ahcun zeitindah Bawipa Pathian nih cun a kan dawt khawh ve lai i, dawtnak thluachuah cu kan hmuh khawh hna lai. “Pathian nih a ka dawmi cu ka khamh hna lai i a ka hngalmi cu ka huhphenh hna lai. An ka auh tikah ka leh hna lai i harnak an in tikah ka umpi hna lai. Laksawng ah nun sau ka pek hna lai i ka khamh hrimhrim hna lai, a ti. “Psalm 91:14-16” Cucaah dawtnak nun hi Pathian zong nih a kan duhpiakmi a si i a fapa Zisuh Khrih zong nih a kan duhpiakmi le a kan fialmi a si bantuk in le dawtnak nun hi a nganbik nawlbia le a sangbik ah an chiahmi a si caah, kannih zumtu Khrihfa vialte hna nih cun kan nunnak hrampi ah hin dawtnak nun cu kan ngeih ding le kan inunpi ding cu an si ko lo maw? Luka chung zong ah kan hmuh bantuk in - “Phungbia cawnpiaktu saya pakhat zong nih zungzal nunnak chung i a luh khawh nakhnga ding ah Zisuh kha bia a hal, Zisuh nih cun cathiang nih zeitindah zungzal nunnak chung i na luhkhawh nakhnga ding ah an chimh i, zeitindah a sullam naa laakning a si, tiah a hal- Mipa nih cun a leh i, “Bawipa na Pathian cu na thinlung dihlak na nunnak dihlak le na thazaang dihlak le na ruahnak dihlak in na dawt lai i, na innpa zong kha nangmah naa dawt tluk in na dawt lai a ti tiah a ti” Zisuh nih cun a leh i, “Na bialehnak a hmaan; cucu va tuah law na nung lai, tiah a ti” Hi bia hi mipa nih a chim khawh le cangka in Zisuh nih a lehmi cu- cucu va tuah law na nung ko lai a ti. Zisuh bia bantuk tein kannih zumtu vialte nih hihi kan tuah khawh hna i kan inunpi hna a si ahcun nunnak kan hmuh lai i Pathian dawtnak thluachuah cu kan nun ram ah a lang ko lai. Zisuh nih pakhatnak ah a kan fialmi cu amah Bawipa Pathian dawt hi a si i, pahnihnak ah a kan fialmi cu kan innpa dawt hi a si. “Bawipa na Pathian cu na lungthin dihlak le na ruahnak dihlak le na nunnak dihlak in na dawt lai” tihi a nganbik le a biapibik nawlbia a si. A hung changtu biapi nawlbia cu, cu bantuk ṭhiamṭhiam cu a si i, ‘Na innpa cu nangmah naa dawt bantuk in na dawt lai’ tihi a si. Zisuh nih hi dawtnak nun a kan fialmi hi kan tuah kho hna in kan innpa cung ah dawtnak cu kan ngei taktak hna in kan daw hna maw? Hika ah na innpa a timi hi khua kan saknak kan inn le kan lo i innpa le lopa khi a chim duhmi a si lo. Nihin kan pawng ah a um vemi kan hmuh zungzalmi hna kan hawinu kan hawipa hna le sifak santlailo, michambau le tlamtlinglo, mihrut le miaa, ngakṭah le nuhmei le pahmei hna khi an si. Cu hna cung ahcun kannih zumtu vialte hna nih Zisuh nih a kan fial bantuk in dawtnak thinlung le dawtnak nun cu kan ngei hna maw? Nihin ah Zisuh nih a kan fialmi amah Bawipa Pathian dawt le kan innpa dawt hna hi kan nun ah le kan thinlung ah le kan tuahsermi hna ah kan ngeih rih hna lo a si ahcun zumtu Khrihfa kan sinak hmual a ngei hrimhrim lai lo hih. Cucaah kannih zumtu Khrihfa vialte nih Zisuh nih kan nun ram ah a kan duhpiakmi le a kan fial bantuk in dawtnak nun le dawtnak thinlung hna hi ngeih izuam hna u sih law, mi cung ah dawtnak in an herhmi thil va tuah piak hi izuam hna u sih. Cucu kan thluachuahnak a si lai i kan ilawmhnak a si lai. Pakhatnak ah amah Bawipa Pathian daw hna u sihlaw a caah zumhtlak in nung zungzal hna u sih. Pahnihnak ah kan innpa- ngakṭah, sikfak, michambau, tlamtlinglo, hmuinu hmuipa, hi daw hna u sih. Cucu zumtu kan nun ram ah Zisuh nih a kan fialmi le a kan duhpiakmi a si. Pathian duhnak tuah kha nan duhnak nganbik i a chiami cu lunglawmmi nan va si dah; Pathian nih nan duhnak cu a tlinter lai. Midang cung ah zaangfahnak a ngeimi cu lunglawmmi nan va si dah; Pathian nih an zaangfah hna lai. Matt - 5:6-7 Pathian nih a bia a reltu vialte kan nunnak ah thluachuahnak kan pekpiak ko seh. Nang le Kei ṭhanchonak ah New Star Vawleipi a ṭhanchoning cu mithmuh kuttawngh a si. Minung kan pawngkam cu minung ṭhiam kan si i nunnak sullam kan timi zong cu minung sinak kha a si ko. Minung kan sinak ah kanmah duhnak le ruahnak lawng kan zoh sual a si ahcun rawhralnak lam a chuahpi khawh bang, zeihmanh duh lo, ruah lo ahcun ithihpi khawh a si fawn. A ṭhangchomi chanthar pakhat le pakhat ipehtlaihnak ah hin pawngkam thil sining le thil umtuning tampi zohchih a hauh caan a um tawn. Minung pahnih asilole tam deuh kar ah upatnak le theihthiamnak thinlungput a tlau ahcun rianṭuanṭi khawh a si ti hnga lo i nun khi sullam ngei loin ṭihnung tu a si hnga. Nifatin kan nunnak ah kan hmuh kan ton, kan theihmi thil hna hi a rak idang tuk cio lai. Mi pakhat nih a hmuhton, a intuarmi le a sining kha tuaktan huaha loin a cung ah fawi 4 tuk cun biachim ngam a si lai lo. Kan lungum bia kan chimmi hna hi a minung le thilsining zohthiam in chim khawh, chimthiam, langhter khawh a biapi ngai. A theitu, a ngaitu nih a inkhawh lomi fahnak bia hna kan chim sual ahcun thil dawh lo a chuak kho. Minung pakhat a lungdongh cang ahcun a taangmi hmai lei a nunnak lam caah lam tluang a si kho lo men. Cu ve bantuk in pakhat le pakhat forhfialnak he tinhmi a tlau lo ahcun aa thlengmi nunnak chung ah aa dawhmi le sullam a ngeimi nun a ngei ko lai. Cucaah pakhat le pakhat kar ah zeirellonak hrawh i-upatnak lungput he kan ipehtlaih a herh. Pakhat le pakhat ipehtlaihnak, ihawikomhnak, ihruainak ah hin thinlung ruahnak ikhah lo caan i kan buaibainak zong hi khatlei ruah ahcun ṭha deuh in itheihthiamnak caah lamsialtu zong a si ve. Hiti thil ka tuah ahcun amah le keimah kar kan tlamtling kho lai asilole zeitin dah ka tuah ah a ṭhat deuh hnga timi a kan ruahter. Ruahnak lungput aa khat lomi hi zoh in hmailei caan saupi tiang ihawikomh, ipehtlaih i rianṭuanṭi khawhnak ding caah lam thar kawl khawh a si fawn. Thil tampi kan hmuhton, kan theihmi lawng ruah i keimah ka hmaan ko tiah khawngton in i-al hna kan hmang ṭheo tawn. Ka hmaan ko timi lawng itlaih i khatlei i a thinlung a ruahnak zohpiak ti lo kha a poi ngaimi cu si. Ka hmaan timi hi mitei ah kan ruah tawn. Pakhat le pakhat duhsahte in ceihhmai buin khua kan khan ahcun a ṭhapi a si lo hmanh ah ṭhatnak lei cu a panh hrimhrim ko hnga. Minung hi kan ilawhnak a rak um hrim lo. Ziah dah kan ilawh hna hnga lo? Kan thinlung aa khat lo, kan ruahnak aa khat lo, kan hmuhning aa khat lo, kan herhmi zong aa khat lo i minung kan sinak kan bu kan ihruainak, kan ihruaidan zong aa khah lo caah a si. Cu ruang ah i-alnak a chuak tawn. Cucaah kaphnih thil ruahkhawhnak nih hin ṭhatnak lei a panh kho deuh. Kanmah hna thil pakhat khat ah kan rak palh komi kha kan palh ti thei loin midang kha va kal i keimah bantuk in nan ruat kho lo na palh tiah kan va ti hna tik ahcun a tenau tukmi thinglungput a si hnga. Cu ve ṭhiamṭhiam in kanmah thinlung ruahnak kha kan ichek dih hnu ah midang i a ruahnak, a lungput, a zumhnak pawl le a duh lomi pawl kha theih khawh ding in izuam ṭhan ahcun amah lei zong in a hmaannak a rak um ve ko kha kan hmuh thiam ve hnga. Minung cu a palhmi lawngte kan si kho lo i a hmaanmi lawng te zong kan si kho hlei fawn lo. Kanmah lei in zeitluk tiang in dah kan hmaan, kan palh timi mah le mah idothlatnak ngeih hmasa a herh ngaingai. Cu chung ahcun “Anih he cun caan saupi tiang pakhat le pakhat ipehtlai in kan ihawikom kho lai i rian kan ṭuanṭi kho lai,” timi lungput kha kan ingeihcia ngai a hau. Cuti kan tuah ahcun kan thinlung, kan ruahnak a ngan deuh lai i poipang kan ton caan zong ah ceihhmai buin kan tawlrel ahcun theihthiamnak a kau deuh ko hnga. Aa tlukmi le aa khatmi thinlung he pakhat le pakhat aa tlakmi hmuhṭi khawhnak thinlung a ngan chin lai. Cu tik ah kan sining zong kha a sang deuh ko lai. Upat ṭihzahnak lungput a karh deuh lai i kan ruahnak zong a hmaan lei ah a panh ko hnga. Cucaah cun thinlung ruahnak ṭhanchoter khawh kha chanthar nang le kei kan ṭhancho taktak a si ve ko tiah.
Faiceu the Chin Journal Vol 4, No 186 September 2, 2012 A voi 36nk Pyithu hluattaw meeting Pyithu hluattaw meeting cu August 30 ahkhan an tuah. Pyithu hluattaw lutlai Thura Shwe Mann le hmunkip in hluattaw aiawhtu MP 409 an itel kho i biahalnak 6 lehnak le upadi pakhat an fehter tiah The New Light of Myanmar thanhca nih a ṭial. (1) Patheingyi in hluattaw aiawhtu U Aung Thant nih zinan le mei vannak (bio fuel) hmannak kong ah hmailei timhtuahnak kong a halmi kha Deputy Minister for Energy vunci U Htin Aung nih “Hi kong hi kanmah Ministry of Energy, Ministry of Agriculture and Irrigation, Ministry of Science and Technology, Ministry of Environmental Conservation and Forestry and Ministry of Industry he ibawm in gasohol and biodiesel chuahnak, chiahnak le zuarnak ti bantuk cu ramdang bantuk in tuah khawh ve ding ah vunci zung in ruahnak petu hna le cozah a si lomi bu in mifim mithiam thluak-um (think tank) hna he bu pakhat kan ser. Cu nih National Energy Management Committee dirh ding ah timhtuahnak a ngei i mei lei (energy and electricity) ṭhanchoternak rian kha a ṭuan te lai. Kanmah Energy Ministry nih a herhning in kan bawmhchanh ve te lai” tiah a leh. (2) Wundwin in hluattaw aiawhtu U Than Myint nih ramkhel rianṭuan hna pension kong a halmi cu Union Minister at the President Office in U Soe Maung nih “Ramkhel rianṭuanmi hna sin in pension a sawkmi 166 ah 57 cu an hmuh dingmi pension hlawh kaiter an si cang i an sawkmi cohlanpiak ding ah a taangmi 109 chung ah 74 lawng hi President zung ah a phan, 35 ta cu a phanh rih lo caah anmah le an myone cio ah hlathlainak an tuah cio a herh tiah a leh. (3) Htigyaing in hluattaw aiawhtu U Soe Soe nih ṭhal ah cinmi fu le anhnah cinnak kong le (4) South Okkalapa in hluattaw aiawhtu U Aung Thein Lin nih lothlo le leituah pawl caah hmun lawngmi kha sawk ningcang le a dangdang ah hman duh tik ah form 39 le 105 sawk ningcang timi pawl an halmi cu Deputy Minister for Agriculture and Irrigation vunci U Khin Zaw nih a leh hna. A pakhatnak biahalnak ah; ṭhal ah cinmi fu te pawl caah anmah he aa pehtlaimi sehzung pawl nih an timhtuahpiak cuahmah lio a si i kannih cu Kawlram pumpi caah facang cinthlaknak a karh chinchin nakhnga phaisa chuahpiak ding hi kan timhmi a si rih caah hihi cu kan ruat rih lo tiah a leh. A pahnihnak; hihi cu anmah le pengtlang cio in nawlngeitu (respective region/state governments) hna lawng nih mah le hmunhma zohchun in an tuah khawh dingmi a si tiah a leh. (5) Padaung hluattaw aiawhtu U Khin Win nih zarhkhat ah voikhat lawng Yangon le Pyi a kalmi tilawng caah voi tam deuh kal ding timhtuahnak a um le um lo kong le (6) Kyangin in hluattaw aiawhtu Dr Tin Maung Kyaing nih Pyay le Danubyu kar ah Ayeyawady tiva pawng ah lung an laak ruang ah tilam a khamnak kong ah nawlngeitu lei nih dantatnak nan ngeih le ngeih lo kong, an halmi cu Deputy Minister for Transport vunci U Han Sein nih a leh hna. A pakhatnak; zeihmanh timhtuahnak kan ngei rih lo. A pahnih nak; cu bantuk in phungninglo in lung a lami hna cu ti lei tawlrelnak le zohkhennak lei upadi (water resources and water system conservation law) ning in dantatnak kan tuah cuahmah lio a si tiah a leh hna. Upadi fehter kong he pehtlai in a voi 32nk hluattaw meeting ah Economy and Commerce Development Committee nih an chuahpimi Kawlram mi nih phaisa thap in tuahkhawh venak upadi (Myanmar Citizens Investment Bill) cu pakhat hnu pakhat in ceihṭinak an tuah hnu ah fehternak cu an tuah. Obama nih Thei Sein visa a onh ṭhan Kawlram president Thein Sein cu a ralaimi thla chung ah tuah dingmi UN General Assembly va kai khawhnak ding ah US President Barack Obama nih a luancia nithum ni ahkhan visa onpiak ṭhan ding nawl a chuah. Asinain Thein Sein cu anmah nih ri an khiahpiaknak New York in UN headquarters hrawnghrang lawng ah chawhvahnak nawl pek a si te lai. Obama nih hitin biachahnak a tuah cu Thein Sein cozah nih thlennak a tuah cuahmahmi ruang ah le amah he naihniam in rianṭuanṭi kan duhnak langhternak caah a si. A bik in ramkhel kong le chawleh chawhrolnak kong ah fawi deuh in thlennak a tuah nakhnga ding caah kan ipehtlaihning kan ṭhawnter deuhnak hi a herh ngaimi a si tiah White House national security in biachimnak nawlngeitu Tommy Vietor nih a ti. Cun hi lio ah US democracy hruaining kha ṭhate in a theihfian khawhnak ding ah hruaitu cheukhat he phungning in tonnak nawl onh a si te lai ti zong a chim chap. Aung San Suu Kyi zong caankar a khualtlawnnak in Congressional Gold Medal va hlam ding in tu thla chung ah US kal ve colh ding a si caah Thein Sein zong Suu Kyi kal lio ah hnawh ngai in khualtlawn aa thawh ve lai tiah ruah a si. Kawlram uktu bawi le ralkap cu minung covo an buar caah US nih 2008 upadi ning in visa a phih piak hna. (Ref: DVB) India nih Rakhine ram caah bawmhnak a pek India cozah nih nitlak Rakhine ram ummi harsa pawl caah a pekmi phaisa US$ 220,000 cu Indian Ambassador Dr. V.S. Seshadri nih Kawlram Minister of Border Affairs and Industrial Development Lieutenant- General Thein Htay kut ah a pek cang tiah Indian media nih thanhnak a tuah. Rakhine ram buaibainak ruang ah minung 89 an thi i 116 hma an pu. 65,000 cu inn ngei loin dornak hmun a kawl cuahmahmi an si. Inn 4,822, Muslim biakinn 17, phungki siang 15 le sianginn 3 cu mei in khangh a si cang. (Ref: Mizzima) 5 Mitt Romney: America biakam ka tlinter lai Florida ah tuahmi party itonnak ah Mitt Romney nih Republican Party in America President icuh ding ah an thimnak cu a cohlan hnu ah America ram caah biakam cu ka tlinter ṭhan lai tiah bia aa kam. “President Obama nih a rian ah teinak hmu seh tihi ka saduhthah a si, ziah tiah cun, America hi teinak hmu seh ti ka duh. Sihmanhsehlaw nan theih bantuk in a ṭhabikmi ilungmuihnak he a caah me nan thlak i President a hun si tik ah a ṭuanmi a rian he pehtlai in palhnak a um” tiah Mitt Romney nih mipi sin ah a chim. “President Obama nih rili ti a kai nuarhter ding le kan vawleipi damter hramthok ding in bia an kamh hna. Kei ka biakam cu hihi a si. Nangmah le na chungkhar kha kan bawmh hna lai” tiah a ti. Rian ngei lomi 8.3% he nuam lo ngai in a kan umtertu kan sipuazi (economy) hi ka thlen lai i kum li chung ah American pawl rian nuai 12 (million) ka serpiak hna lai tiah bia aa kam. Kum 2020 ahcun America nih energy (gas, zinan, datsi tbk) he pehtlai in ramdang ihngatnak in ka luatter lai. Rampi hman ding phaisa rikhiahmi (deficit) zong kan tan lai i chawlehthalnak lungtlinṭinak a thar tuah ding zong ceihkhannak ka ngei lai tiah a ti. “President Obama nih President a sinak cu ngaihthiam hal in a thawk i kei cu President ka sinak cu rian he ka thawk lai” tiah a ti. Kan hawi a simi Israel kha harnak tang ah a hlonh i Iran kha zaangfahnak a pek tiah Romney nih President Obama kha a mawhchiat. “Keimah hruainak tang ahcun kan hawi a simi ram hna nih American zumhtlak a sinak kha tam deuh an hmuh lai i Russian President Putin zong nih America a dirhmun a feh deuhzia kha a hmuh lai” tiah a chim. Party itonnak ah a ummi republican pawl nih cun kanmah nih teinak kan hmuh ko lai tiah an izumhnak kha an chim i President Obama milunglaaknak ah manager a ṭuanmi Jim Messina tu nih cun Mitt Romney a chimmi hi thil tlawmte lawng aa tel i Oboma sual a phawtnak tu a tam deuh tiah a chim ve. (Ref: BBC) Japan ah Samsung nih Apple a tei Tokyo biaceih zungpi nih Samsung nih Apple nawl a cawng lo tiah biakhiahnak an tuah. Mah hi US ah Samsung nih Apple nawl a cawn (a fir) ti ruang ah $1 billion leng liamh ding bia an khiah tlawmpal ah a hung chuak vemi a si. Hi kong he pehtlai in Samsung lei nih Samsung nih Apple nawl a cawn hrimhrim lo timi caan sau buainak kong ah hitin biakhiahnak dik an tuahmi cung ah kan ilawm tuk tiah an chim. Agust 24 ah US biaceih zung nih Samsung cu Apple thilchuah pawl iPad le iPhone telh in phone lei thilri pawl aa cawn (a fir) tiin bia an rak khiah. Nain Samsung nih US biakhiahnak cung ah nawlnak tuah ṭhan ding in timhtuahnak a ngei. (Ref: BBC, Aug 31)
Page 1 and 2: Editor lungum; Malaysia Chin Khrihf
Page 3: Faiceu the Chin Journal Vol 4, No 1
Page 7 and 8: Faiceu the Chin Journal Vol 4, No 1

A voi 5nk MCCYF civui tlamtlingte in an lim cang - Faiceu The Chin ...

You also want an ePaper? Increase the reach of your titles

Delete template?

Save as template?