AFrebba_Extrait

Dans la même collection
U mo Petru Cirneu, Ghjacumu Fusina, 2021
Qual’hè chì hà tombu à Gilac ?, Ghjacumu Thiers, 2019
Prix des lecteurs (CDC) 2020
Le dossier Félix Decori, Ghjacumu Fusina, 2018
Nunzia, Marie Guerrini, 2018
Austina, Pierre-Joseph Ferrali, 2017
Le balcon, Jacques Thiers, trad. Anne-Laure Thiers, 2017
Chì ùn sia fattu di guai, Marceddu Jureczek, 2016
U balcone, Ghjacumu Thiers, 2016
Le petit soldat, Jacques Fusina, 2015,
Prix de la CTC 2015
La cour des chats, Jacques Thiers, trad. Anne-Laure Thiers, 2015
Fintantu chì l’erba crescerà, Pierre-Joseph Ferrali, 2014,
Prix des lecteurs (CTC) 2015
I misgi, Ghjacumu Thiers, 2013,
Prix des lecteurs (CTC) 2014
Ieiettu, Guidu Benigni, 2013
L’Ortu di e mo brame, Ghjuvan Battistu Giacomoni, 2011
Ombre di guerra, Jean-Yves Acquaviva, 2011
Prix de la CTC 2012, Prix des lecteurs (CTC) 2012
et Prix Morellini (Conseil général de Haute-Corse), 2012

« Tous les pays qui n’ont plus de légende seront condamnés
à mourir de froid… »
Patrice de La Tour Du Pin

Maculeddu
In cima di i cimi i più inalpiddati, stani i dii di a
terra chì ùn poni pata u sguardu di l’omini. In i più
vechji libri arcani, hè scrittu chì u prima è l’ultimu
cristianu chì attippò culandi insù quiddi scatapechji
ùn poti sculinà nienti cacciati chjapponi, cantoni
è cotru.
Ma eiu, Maculeddu u Saviu, sguaratu da i misteri
è i sicreti di i dii di a terra, aviu da veda.
Ghjunsi da l’inghjò quant’è ad essa unu spirdatu :
t’aviu a dismania. Vuliu fighjulà i dii in ochju.
M’avviò dunqua versu u capu di u mondu. A me
sapienza abbastaria ad ammattà l’ira soia ?
Duranti setti ghjorni, mossi, inturniatu da u
silenziu di i zenni fasciati à ghjacciu chì più nimu
avia arruchjatu dipò u cumenciu di u mondu.
Pianu pianu, passu passu, andavu à capu insù,
scumbattendu cù i venti tonti, rimiscendu l’aria
cutrata da u me ansciu reiu.
5

Ogni tantu, quandu u muru grisgiu di i nivuli
è di a fumaccia m’accicava, quandu u mondu sanu
vinia bambaccia, m’aggrundavu in calchì sapara.
Tandu, dumatu da l’affannu, mumutulavu una
prighera à i dii crudi.
Dopu ad avè francatu l’ultimi strittoni di l’ultimi
forchi, in un bughju d’abbissu intesi i so canti.
Ad un trattu, fù stracciata l’ombra.
Eiu, Maculeddu u Saviu, aviu da rimirà quiddi
putenzi in a so superbia, i dii chì disprezzani
l’omini. Tandu, da una sponda à l’altra di a sarrera,
rimbumbedi unu scucculu spavintosu.
Isiè, eiu, Maculeddu u Pazzu, fighjulò in ochju
i dii pridaghji.
I me mani, criponi quiddi ochji maladetti chì
aviani vistu. I me mani tapponi quiddi arechji impii
ch’aviani intesu.
Ma da tandu in quà, indù vò ch’e vachi, l’ira
vindittera hè sempri à pressu à mè.
Pianament’è bè, l’ultimi sdrisgi di a me menti
si ni vani in pisticciuli.
Di maghju 2001

Sottu à i muraglioni
Erani accolti tutti quanti davanti à i porti di a
Cità antica, i vechji, i donni è i ziteddi. Era ghjornu
di u marcatu. I porti à livanti erani sbalangati. Era
a prima volta, dipoi ch’edd’erani mossi l’omini
appressu à u so rè da sottumetta paesi è regni
luntani.
Trè anni fà, facia trè anni dighjà, è ùn era
vultatu nimu.
À pocu à pocu, s’imbugnava u celi.
In quà è dà, à u pedi di i muraglioni di a cità,
uni pochi di banchi spachjavani i pustimi di i
campagnoli, u casgiu pasturecciu custuditu in i
muntagni di u vicinatu, u pannu grussulanu è scuru
tesu di lana picurina. I ricchezzi è i sbarsi di una
volta pariani calchì sonniu adduppiatu.
Indù erani scatuliti quiddi massi di dulciumi è
cibi chì vi mittiani a bocca in suchju à vedali è ad
annasalli.
7

8
Indù erani missi quiddi stofi magnifichi ghjunti
da i cunfini di u mondu, culuriti com’è a gioia,
ricamati d’oru è d’arghjentu, lebbii lebbii chì à
vestali, vi paria propiu d’essa nudu in cristu.
Indù erani quiddi trambusti di a piazza, i stridi
di i donni, i brioni di i rivindaroli, i retti di i ziteddi, i
ghjastemi di l’omini, … moltu più in tempu di fiera,
tandu sì chì si facia fistaccia duranti trè sittimani
da sottu à i muraglioni di a Cità, i più alti è i più
beddi di tuttu a Criazioni.
L’imperiu ùn era più l’Imperiu.
S’era appuculitu, arritruitu, aggrunchjatu,…
Da ciò ch’edd’era statu prima, ùn firmava più
cà a vechja Cità è i so muraglioni trafalati.
La ghjenti andava arriondu, animi persi nantu
à a piazza maiori guasgi cà biota.
Facci neri, boci ammutuliti, passi strascinati.
Mancu i più suldaghji ùn aviani voglia à prizzighjà.
Quidda piazza vi mittia a muca à u cori.
Un marcanti, in cerca di pratichi è da cacciassi
a picondria, arrittu annantu à u so carrettu, s’era
trappesu à rimirà u luntanu. Hè propiu tandu
ch’eddu u vissi. Quiddu nivulu foscu. Tamantu
nivulu lampatu à l’assaltu di u celi. L’omu briunò.
La ghjenti tutta quanta prisenti in piazza missi à
fighjulà cìo ch’edd’insignava di bracciu è di ditu
tesu. Ùn era più un nivulu, era una muntagna in
anda.

Timpurali
Un vintisgiolu rinfresca l’aria.
S’impanna u celi à la marina ;
Da sopra à no s’inturbidisci u sirenu.
Metti à piova i prima gocciuli.
L’armata di i nivuli s’hè data a mossa pà abbuttà
a vechja terra.
Da a sarrera à u mari, si sò accolti tanti è tanti
battaglioni, bianchi, grisgi è neri, da facci senta a
so furia.
Ùn pudiani più stà bassi è muti.
U celi, pari ch’eddu si ni falessi à pezzi.
Un’ accendita, annunciu di l’assaltu, sdrisgi
l’aria sopra à a muntagna ; ribomba u sonu com’è
ad essa par aria è sottu terra ad un tempu ; l’acqua
fala pittinata.
S’ammanta, un bughju di fin’ di mondu.
Prighemu pà chì u Supranu ùn fussi ancu stufu
di a so criazioni, è chì tarreni è parsoni ùn fussini
subaccati com’è in i tempi di una volta.
11

12
Tandu, i matrali d’insù s’erani rotti par bè
è l’acqui aviani corsu annantu à un mondu à a
malavia :
« Si tacchiedini sei ghjorni è setti notti,
Ma i scurrutoni di u diluru tribbulavani sempri
a terra,
I nivuli affascedini u mondu di un mantu pagnu
è neru.
U Settimu ghjornu,
I dirrusculi,
Fiacchi,
Stancedini.
U mari s’appacedi,
U ventu s’arrichitò,
U trostu di u timpurali si tacì.
Ùn si sintia un fiatu.
L’omini erani turrati pantaniccia.
L’acqui cupriani u capu di u mondu. »
Ma forsa chì par avali, ùn era ancu l’ora di
mandà à l’abissu l’omu è i so malfatti.
Eppuri, u celi sbarsa è arribocca a so piena
annantu à ‘ssa terra chì stupizzeghja, asciuta,
assitita, catusciata.
I stradioli chì corrini à capu inghjò versu i
fundali sò turrati veri ruscelli d’acqua ciangosa.
Acqua biata da l’insù.
Quantu tempu sè stata bramata chì a sicchina
di st’ultimi anni ci mittia à l’addisperu.
I fiumi, i ghjargali, i vadini ùn curriani à bona
via più è animali è cristiani erani in priculu di pata
a seti. I pisci di i funtaneddi t’aviani guai à misciulà.

Unu sbagliu giugrafficu
A strada di Roma, a noscia galassia nativa, hè
fatta à a sumiglia di una granitula di 100 000 anni
luci di diametru. Hè spessa 1300 anni luci.
Sò 100 milliardi i steddi à cumponala. Ogni
stedda fà ch’edda sarà un soli, ogni soli pò fà da
sistema cù parechji pianetta, ogni pianetta calchì
mondu…
Al dì là, un uceanu scuru, pagnu, strappuntatu
da 100 milliardi di galassii tali è quali a noscia.
Stufi di svultulà i schema discrittivi di u Mondu
ad ogni scuparta i scentifichi, ani pensu à a nuzioni
di « Universu Starminatu ». Cusì piantoni i liticheri
trà astrofisichi è mistichi.
Ghjacumu Zumbè, Pruligomina di una mudellazioni
di l’universu cunnisciutu.
Roccu era impiigatu mudellu ed anonimu.
Forsa ùn avarà mai intesu mintuvà ad Aristippu
di Cirinàica, discipulu sminticatu di Socrati, chì
15

16
appratindia chì una vita senza pinseri avviava l’omu
versu a saviezza è a sirinità ; eppuri Roccu, a so vita,
l’avia righjirata sicondu à quiddu anticu precettu.
Ùn dava da fà à nisciunu è nimu li dava da fà.
In tuttu si sapia misurà. Parlava cù una boci
dolci è lenta ; ùn s’impanzava micca ; biia ma mai ad
essa inturcatu ; riccu ùn era ma si stantava quiddu
picculu trattamentu chì li bastava da mantenasi.
Tinia à tutti è tutti u tiniani…
Funziunariu di u Ministeru di i Pruvinci Spaziali,
u so travagliu li andava propiu da bè. Micca ch’eddu
tiressi tanti salti à pichjà annantu à u so urdinatori
purtativu millaia di righi di cuurdinati galattichi, in
u so catagnu di scagnu, accortu à tanti altri scagni,
in un palazzu altu 111 piani, 10 ori à ghjornu, i
6 ghjorni di a sittimani (sicondu u tempu di Prima
Cintrali, à u cori veru di a galassia), ogni annu,
da nutriscia à vulenni più a Reta d’infurmazioni
giugraffichi di u Ministeru.
Anc’assà, c’era madamicella Rusalia, 33 anni,
ùn nasu finu ma finu chì basta, in u scagnu 157, à
vicinu à u soiu. À Rusalia, Roccu l’amava, ma micca
d’un amori tontu è scatavoltu, innò. U so amori era
patimu è riflittutu. D’altrondi, Rusalia mancu a
sapìa. Ùn li cunvinia cusì à Roccu ? Mancaria altru
ch’eddu si turbessi a vita cù una donna, chì forsa ci
saria vulsutu à spusalla, à dichjaralla à u Ministeru
di u Cuntrollu di i Citadini (12 cartulari da riempia,
s’era rinsignatu aghjà !), pò li saria tuccatu à chera
i 16 cartulari di u Ministeru di a Prucriazioni pà

Sunta
Maculeddu .............................................. 5
Sottu à i muraglioni ................................... 7
Timpurali ................................................ 11
Unu sbagliu giugrafficu ........................... 15
U museu .................................................. 23
U vechju populu....................................... 27
U miraculu di i ghjatti............................. 37
L’Ultimu .................................................. 43
Lucia ....................................................... 51
L’Anticariu in u Borgu ............................. 65
A battaglia .............................................. 73
A fruntiera .............................................. 85
Fidi ......................................................... 89
Un ghjornu dopu… ................................. 99
A Frebba .................................................. 103
157