NG Gemeente Stellenberg: As die winde van verandering waai

NG GEMEENTE STELLENBERG
As die winde van verandering waai…
BRAAM HANEKOM
Dr Braam Hanekom is leraar in Stellenberg en voorsitter van die Kerkraad.
Ouderdom van gemeente: 30 jaar
Lidmaattal: 6000
Leuse: Stellenberg reik uit oor alle grense!
Om Stellenberg se storie van verandering die afgelope aantal jare binne die bestek
van ’n bladsy of twee te vertel is haas onmoontlik. Daarom kyk ons net eers vir ’n
oomblik na wat die afgelope 10 jaar verander het:
Die herderkudde model is vervang met ’n liggaamsmodel waarin die erkenning van gawes en
ontwikkeling van bedienings sentraal staan.
Die predikantespan van vyf het gegroei na ses voltydse leraars en drie tentmakers.
Die kerkraad van 230 is verklein na 30.
Ouderlinge en diakens is vervang met ’n uitgebreide netwerk van wyksleiers en dienswerkers. Die
hoeveelheid dienende lidmate is so verhoog van 230 na 450.
Wyksbyeenkomste vind nog plaas, maar word aangevul met ’n groeiende netwerk van kleingroepe
– Bybelstudiegroepe en omgeegroepe.
Waar die gemeente voorheen met streng geografiese grense gewerk het, woon ongeveer 1000 lidmate
nou buite die grense.
Tien jaar gelede is die jeugbediening deur een van die predikante hanteer en vandag is daar ’n
voltydse jeugleraar.
Jeuguitstappies is vervang met jeuguitreike waarvan daar vanjaar drie was – na Namibië, Noord-
Natal en Transkei.
’n Geloofsoffersisteem is geskep wat die bestaande gemeentebegroting ten opsigte van uitreike
aanvul.
Die kerkraad het ’n baie spesifieke waarde as begrotingsriglyn aanvaar, naamlik dat 33% van alle
inkomste BUITE die gemeente spandeer moet word. Dit word gereflekteer in die groeiende
getal uitreik aksies
Die BKJA is vervang met ’n GenerasieX bedieniening of te wel: Kruisgenerasie. Hulle ledetal het tot
bykans 600 gegroei en het onlangs as ’n wyksgemeente gekonstitueer met ’n eie tentmaker
predikant.
’n Volwaardige seniorbediening is ontwikkel onder leiding van ’n emeritus predikant.
’n Bybelskool funksioneer die afgelope ses jaar met drie modules wat jaarliks aangebied word.
Tien jaar gelede het die gemeente een orrelis gehad en vandag is daar ’n orrelis/musiekdirekteur
en ses begeleidingsgroepe.
Die basaar is aangevul met ’n “Internasionale aand” en ’n Feesmark met ’n omset van meer as R3
miljoen.
Op kommunikasiegebied is die Stellenberger en bulletin aangevul met ’n Kommunikasiebeampte,
webblad en uitgebreide e-pos netwerk wat inligting weekliks aan lidmate besorg.
Huisbesoek is vervang met groepsbesoeke waartydens die leraars verantwoordelik is vir die
toerusting van lidmate
Diakens wat kollekteer, is vervang met ’n vrywillige koevertstelsel en ’n uitgebreide debietorderstelsel.
31

32
Die kantoorpersoneel het van drie na nege gegroei.
Daar is ’n jaarlikse begroting goedgekeur vir die ontwikkeling van predikante wat onder meer die
bywoon van internasionale konferensies insluit.
Die vyf “homogene” eredienste van 10 jaar gelede is vervang met ses eredienste waarvan die karakter
van al ses verskil. Diversiteit word graag gevier.
’n Groeiende hoeveelheid konferensies word deur die gemeente aangebied waaronder ’n aantal
netwerk-konferensies en Verantwoordelike Vernuwing, sekerlik van die belangrikste is.
Verantwoordelike Vernuwing het ’n geleentheid geskep vir vrywilligers in die gemeente om by ’n
energieke vernuwingsaksie betrokke te raak.
Indien mense sou vra wat van die sleutelmomente in die
transformasieproses was sou die volgende uitgelig kon word:
1. ’n Effektiewe beplanningskommisie waarin gewone lidmate ’n sleutelrol gespeel het. ’n
Paar jaar gelede het die leierskap besef dat kwynende stadsgemeentes ’n wrede werklikheid
is wat ook Stellenberg sou kon inhaal en het daarom indringend die vraag gevra
oor hoe die gemeente relevant en dinamies kon bly sonder om haar identiteit te verloor.
2. Die predikante is deurlopend blootgestel aan ander dinamiese gemeentes, sowel
plaaslik as internasionaal. Dit het ’n groot verruiming in denke meegebring,
3. Daar is ’n spesifieke keuse vir die liggaamsmodel gemaak. Terselfdertyd word deeglik
besef dat kontak met die gemeente en bepaalde versorgingsfunksies nie agterweë gelaat
kan word nie
4. Visionering en strategiese beplanning het deel van die kerkraad se brood en botter
geword terwyl die bestuursfunksies na ’n gemeentebestuurder en uitvoerende bestuur
afgewentel is.
5. Die kerkraad het 4 eenvoudige waardes aanvaar wat aksies, prediking, bedienings,
strategiese beplanning en die jaarlikse formulering van doelwitte rig. Die vier waardes is:
Nader aan God
Nader aan mekaar
Om ’n verskil in die wêreld te maak
Voortdurend te vernuwe
Dit alles beteken egter nie dat alles in die gemeente perfek is en dat daar nie
probleme is wat oorkom moet word nie. Die volgende
uitdagings is seker van die grootste wat ons tans in die gesig staar:
❑ Die uitklaring van predikante funksies en rolle binne ’n groter wordende gemeente en
liggaamsmodel. Sinergie en goeie samewerking tussen predikante bly van die hoogste
prioriteite in enige gemeente en baie energie en tyd word spandeer om daaraan goeie
gestalte te gee.
❑ Die geestelike groei van lidmate en veral die ontwikkeling van geestelike leiers bly ’n
groot uitdaging.
❑ So ook die ontwikkeling van kleingroepe om geestelike groei te stimuleer en veral die
onpersoonlike kant van ’n groot gemeente aan te spreek.
❑ Evangelisasie is vir ons ’n al dringender prioriteit
❑ Goeie kommunikasie bly ’n probleem in ’n groot gemeente
❑ Die gemeente het nog altyd ’n gerigtheid na buite gehad, maar worstel tans ernstig met
die vraag oor watter bydrae gelewer kan word om ’n wesenlike bydrae in SA te lewer.
Stellenberg wil baie graag ’n groeiende missionêre gemeente wees.
’n Kerk wat nie verstaan dat dit uit sondaars en vir sondaars bestaan nie, beland
spoedig in groot moeilikheid. Daarom bid ons dat ons bo alles ons verbondenheid aan
Christus en gerigtheid op die sentrale boodskap van die evangelie met steeds groter
erns sal omarm.