November 2011 - Terwispel

- - - - - - - - - - - - - - - - - - - - - - - - - - - - - -Wispelweagen november 2011 - - - - - - - - - - - - - - - - - - - - - - - - - - - -
TERWISPELER OM UTENS
Hendrik Liemburg
Foar minsken fan ûnder de fjirtich sil ik - bûten in tal kuorballers - in frjemden ien wêze.
Om´t ik yn 1970 al út Terwispel weigien bin, sille de minsken fan dêrnei net witte wa’t
Hendrik Liemburg is. Myn Heit en Mem, Jogchum en Griet, myn broers, Alt en Chris, en
myn suster Mettje sille by mear minsken bekint wêze.
Yn achtenfjirtich fan de foarige ieu bin ik berne op ’e Damslûs oan de polderdyk wer´t no
Jochem v.d. Bij wennet. Yn’e tiid dat ik berne bin, wie de slûs mei it Klidzerjucht en de
Wyde Wispel der noch. As wy foarhinne nei skoalle moasten dan gienen wy it
sintelpaadsje lâns nei de Klidze en dêrwei oer de Ald Dyk en Bregeleane. By Hiske lofts
ôfslaan en dan oer in klinkertdyk, dy´t by de âld legere skoalle útkaam. Yn it begjin hold
foar ús dêr de wrâld op. Myn skoaltiid is begûn by Juffrou Lindeboom en doe fia Juffrou
Rinsema en Master Zijlstra einige by Master Jongstra.
Earst trije jier op ’e âld skoalle en dêrnei trije jier op ’e nije skoalle.
Yn myn jongestiid ha ik in soad boarte mei Ultsje de Roos en Alle de Jong. Beide wennen
doedestiids op ’e Klidze. Ultsje is letter ek út Terwispel weigien en is yn it bankwêzen
telâne kaam. Alle sil no wol noflik genietsje kinne fan de opbringst fan syn molkkwotum
wat hja doedestiids krigen ha.
Nei de legere skoalle bin ik – nei dat ik noch fjouwer jier ambachtskoalle hân ha - oan it
wurk gong. Earst by Gouke Hylkema, dêrnei Rinze Dragstra en doe noch oardel jier yn
Terwispel by Hindrik Wanninge.
Underwilems hie ik ferkearing krigen en wienen we ek al ferhuze fan de Damslûs nei de
feart, wêr’t no Jan en Elske wenje
Wylst binne wy al telâne kaam yn 1970. Yn dat jier bin ik mei Geartsje - fan ’e Gordyk -
troud en nei de klaai ferhuze.
Op´e klaai binne wy yn Stiens kaam te wenjen. Ik kaam oan ’t wurk by Banga BV, in
lânboumeganisaasjebedriuw wêr’t ik oan de VUT ta - no trije jier ferlyn - wurke ha.
Wy hawwe achtsjen jier yn in hierwenning yn Stiens wenne en binne doe ferhuze nei in
keapwenning yn Britsum, wêr’t wy no noch wenje.
Stiens en Britsum kinne jo krektlyk besjen as de Gordyk en Terwispel, it leit tsjinmekoar
oan.
- - - - - - - - - - - - - - - - - - - - - - - - - - - - - - - - - - -10- - - - - - - - - - - - - - - - - - - - - - - - - - - - - - - - - -