O home de Camele - Asociación de Escritores en Lingua Galega

PAG: E02SR02 -- EDI: JAN02
Man
(o home)
O Día dos Santos Inocentes morría Man, ‘o Alemán’ de Camelle, un
dos artistas máis característicos da Costa da Morte, un home que
lograra fundir a súa vida coa vida propia de Camelle, a vila na que
residía desde 1961. A razón da súa morte, na asepsia científica do
parte médico, foi o agravamento da tromboflebite que o mantiña
desde había meses a tratamento, anque todos en Camelle saben
que a marea negra do ‘Prestige’ sobre o seu Museo foi a causa que
precipitou o desenlece. El, que se fundira pedra a pedra coa costa
encrechada de Camelle e coa historia dunha terra marcada polo
mar e o vento, non podía acabar doutro xeito e, a súa morte púxolle
final épico a unha vida chea a partes iguais por sangue e por
lenda. Man pertencía a esa caste de artistas afastados dos circuítos
comerciais e que lograran facer del mesmo unha obra de arte,
dentro da corrente máis contemporánea da plástica. O froito máis
visible desa reviravolta é o museo que, pouco a pouco, foi construíndo
en Camelle e que as primeiras valgadas de pichi sepultaron
irreversiblemente no pringue visgoñento do ‘Prestige’. Del
queda tamén a súa figura inmortalizada no dique de abrigo do porto
de Camelle, pois así o pediu el cando se construíu. Os operarios,
daquela, tiveron que realizar unha masa de cemento máis
mol, sobre a cal o ‘‘místico do mar’’ –como algúns o chamaron á
súa morte– se deitou para gravar a súa silueta. Previamente, o
proxecto do dique xa fora modificado para evitar que a súa construcción
afectase ó museo, unha das pezas máis entrañables e visitadas
da arte ó aire libre en Galicia. A supervivencia deste labirinto
de esculturas, calladas de círculos e cromatismo contundente,
é agora unha cuestión latente, así como a súa recuperación
como símbolo da reconstrucción que a Costa da Morte agarda tralo
paso da marea negra. O museo é a biografía de Man, pero tamén
a de Camelle e do propio mar, un triángulo que a arte fundiu con
mitoloxía lendaria, carne, sangue, salitre e algas.
2 O Correo Galego 2/1/03 O Correo Galego 2/1/03 3