Deklarate per shtyp mbi grupet e fokusuara zhvilluar nga NDI ...

PËR PUBLIKIM TË MENJËHERSHËM
27 Dhjetor 2012
Kontakt: Ana Kadovic, Drejtoreshë, NDI/Shqipëri
Rr. Sami Frasheri
Pallati Teknoprojekt
17/1, Kati VII
Tirana, Albania
Tel/Fax: +355 (04) 22771 281
Email: ndialbania@ndi.org
www.ndialbaina.org
HULUMTIMI I NDI NË SHQIPËRI KONSTATON SE EKONOMIA ËSHTË
PRIORITETI KRYESOR I QYTETARËVE
TIRANË – Pjesëmarrësit në hulumtimin e grupeve të fokusuara, të zhvilluar kohët e fundit nga
Instituti Demokratik Amerikan (NDI) dhe të publikuara sot me anë të kësaj deklarate për shtyp,
mendojnë se vendi i tyre po shkon në drejtimin e gabuar, duke përmendur çështje të tilla si
papunësia, çmimet gjithnjë e në rritje, rrogat e ulëta dhe korrupsioni, si faktorët që kanë ndikim
tepër të madh në nivelin e tyre të jetesës.
Megjithatë, rekomandimi i Komisionit Europian për t’i ofruar Shqipërisë statusin e kushtëzuar
kandidat për anëtarësimin në BE shihet nga pjesa më e madhe e pjesëmarrësve si një shenjë
optimizmi dhe përmirësimi, si dhe një nga treguesit kryesor për disa se vendi po ecën në rrugën e
duhur.
Raporti është hartuar në bazë të dhjetë grupeve të fokusuara të zhvilluara në Tiranë, Shkodër,
Fier dhe Korçë nga data 10 - 18 Tetor 2012. Hulumtimi tregoi se pjesëmarrësit në grupet e
fokusuara e kanë të qartë se çfarë duan – një të ardhme ku ligjet respektohen, rregullat zbatohen
njëlloj për të gjithë, standardet e jetesës janë më të larta, si dhe vlerat njerëzore çmohen dhe
nderohen. Ata shprehen se sistemi politik në vend nuk po arrin të adresojë nevojat e tyre më
themelore dhe është shumë larg pritshmërive të tyre. Pakënaqësitë e shprehura kanë të bëjnë
veçanërisht me distancën që qytetarët ndiejnë ndërmjet tyre dhe politikanëve dhe kërkojnë nga
këta të fundit që të tregojnë një shkallë më të lartë interesi ndaj problemeve të qytetarëve.
Rezultate të tjera kyçe përfshijnë:
● Pavarësisht se shumica e pjesëmarrësve mendojnë se vendi po ecën në drejtimin e gabuar,
kryesisht për shkak të situatës së zymtë ekonomike, shumë prej tyre, përfshirë këtu edhe
ata që pohojnë se vendi po shkon në drejtimin e gabuar, i pranojnë dhe i njohin zhvillimet
pozitive, duke përfshirë këtu infrastrukturën e rrugëve, shkollave dhe furnizimin me
energji elektrike gjatë viteve të fundit.
● Shumica e qytetarëve përgjithësisht fajësuan “ata që janë në pushtet” për situatën e zymtë
ekonomike në vend, pasi ajo përbën “çështjen më kryesore të jetës së përditshme.”
Gjithashtu, qeveria u vlerësua me nota të ulëta nga qytetarët për sa i përket çështjeve të
rëndësishme si hapja e vendeve të reja të punës dhe lufta ndaj korrupsionit.
● Korrupsioni, i konsideruar shpesh si një mjet i domosdoshëm për “të zgjidhur punë”
duket se përbën një pjesë të pandashme të jetës së qytetarëve. Pothuajse të gjithë

pjesëmarrësit në grupet e fokusuara ishin në gjendje të tregonin një histori personale ku iu
ishte dashur të jepnin ryshfet një polici, infermiere-je, mësuesi apo ndonjë punonjësi
tjetër të administratës publike për të marrë shërbimin e kërkuar. Megjithatë, një pjesë e
madhe e qytetarëve pranuan se gjithashtu edhe sjellja e tyre ka kontribuar në përforcimin
e fenomenit të korrupsionit, pasi shpesh vetë ata ofrojnë ryshfete apo përdorin “miqtë”
“për të kryer punë”. Zgjidhja për ta do të ishte vetëm zbatimi i plotë i ligjit, përpara të
cilit të gjithë qytetarët duhet të jenë të barabartë pavarësisht statusit të tyre social apo
lidhjeve personale/partiake.
● Pjesëmarrësit kryesisht pajtohen me faktin se gratë janë të nën-përfaqësuara në politikën
shqiptare si edhe shprehin dëshirën e tyre për të parë më shumë femra të angazhuara në
politikë. Për shumë prej pjesëmarrësve, dialogu politik do të bëhej më konstruktiv dhe më
etik nëse do të kishte më shumë gra në politikë. Megjithatë, pjesëmarrësit theksuan
nivelin e lartë të pabarazisë gjinore në shoqëri, pikëpamjet përgjithësisht konservatore të
njerëzve, natyrën agresive të skenës politike shqiptare dhe dominimin mashkullor në
kryesimin e partive si pengesa themelore për përfshirjen e gjinisë femërore në politikë.
● Edhe pse bien dakord se politika ka një ndikim shumë të madh në jetën e tyre të
përditshme, qytetarët ndihen shumë të distancuar nga përfaqësuesit e tyre të zgjedhur dhe
shfaqin pakënaqësi të theksuara për ndërveprimin e kufizuar me ta pas mbarimit të
fushatave elektorale. Pjesëmarrësit mendojnë se politikanët asnjëherë nuk kanë treguar
interes të sinqertë për problemet e përditshme të qytetarëve dhe pothuajse gjithmonë i
kanë zhgënjyer në mbajtjen e premtimeve elektorale. Ata i bëjnë apel politikanëve që të
tregojnë më shumë interes për problemet e tyre duke ju kërkuar të jenë më të
përgjegjshëm për premtimet e dhëna dhe vendimet e marra.
Ky hulumtim ka si qëllim të identifikojë shqetësimet e qytetarëve dhe t’ua përcjellë ato liderëve
politikë në prag të zgjedhjeve të përgjithshme që do të zhvillohen në 23 Qershor në mënyrë që t’i
ndihmojë në hartimin e politikave dhe të platformave që i përgjigjen nevojave të votuesve.
Grupet e fokusuara janë grupe diskutimi gjysmë të strukturuara që kanë për qëllim të eksplorojnë
dhe pasqyrojnë qëndrimet dhe jo t’i masin ato saktësisht ashtu sikundër metodat sasiore.
Ndërveprimi ndërmjet pjesëmarrësve në një grup të fokusuar ofron një pasqyrë të mendimit dhe
ndjesive të qytetarëve dhe përbën një mjet të dobishëm për të kuptuar se pse ekzistojnë këto
qëndrime.
Puna në terren e hulumtimit të grupeve të fokusuara u zhvillua nga IDRA Research & Consulting
dhe u financua nga Ndihma Amerikane për Demokraci (NED).
Instituti Demokratik Amerikan (NDI), është një organizatë jo-fitimprurëse, jo-partiake, joqeveritare
që punon për mbështetjen dhe forcimin e institucioneve demokratike kudo në botë,
nëpërmjet pjesëmarrjes së qytetarëve dhe përgjegjshmërisë në qeverisje. Për më shumë
informacion ju lutem vizitoni www.ndi.org.