DIE SAAIER WINTER 2020

Liewe Medewerker
WINTER 2020
NOMMER 227
Gebeure het onlangs ’n nare draai geneem en die
wêreld is skielik ’n skrikwekkende plek van groot
onsekerheid.
Ons veg teen ’n onsigbare vyand genaamd
SARS-Cov-2 wat die dodelike Covid-19-siekte tot
volg het. Soos hierdie hoogs aansteeklike virus
versprei bring dit ook ’n golf van wantroue, paniek
en vrees oor al die nasies. Daar is ’n magdom
inliging oor die virus wat alles van mediese modelle,
samesweringsteorieë en fopnuus tot doemprofesieë
insluit. Dit is alles net te veel om te verwerk en
om die waarheid van fiksie te onderskei, is naas
onmoontlik.
Maar as Christene staan ons ferm op die een ding
wat ons in ons harte weet is die absolute waarheid
– die Woord van God. In die Bybel, belowe God dat
hy ons nooit in die steek of alleen sal laat nie ongeag
die situasie waarin ons onsself mag bevind. Ons God
is nie verras deur enigiets wat gebeur nie en daarom
kan ons rus in die vrede dat Hy reeds ’n weg vir ons
gemaak het in hierdie onsekere tyd.
In die aanloop tot ons tweede eeufeesvieringe het
ons gebid dat 2020 waarlik ’n Jaar van die Bybel sou
wees. Hoewel hierdie pandemie ’n stokkie gesteek
het voor baie van vanjaar se beplande feestelikhede,
glo ek dat hierdie krisis baie mense weer na die
Bybel laat draai het as hul bron van vrede en hoop.
Dit is in tye soos die dat die Bybel se boodskap
van God se volmaakte liefde hard en duidelik die
vrees verdryf wat dreig om die wêreld te verswelg.
Laat ons daarom nog harder werk sodat hierdie
wonderlike Boek ’n deel kan word van elke persoon
se lewe.