Nikolaus- Rede - Reitverein Corona München Solln eV

Nikolausrede
8.12.2012
Des Jahr is fast rum, es is kumma die Zeit,
wo ma sich scho aufs Weihnachtsfest gfreit.
I hob einiges mitgriagt in der Vergangenheit,
dazu werd´ i was sag´n, griaß eich God, liabe Leit!
Thema für die Weihnachtsfeier im diesem Jahr
Is: „Circus meets Classic“ und des paßt, ganz klar;
Weil im CORONA g´lacht wird und gstaunt wird a
über d´ Klassiker in der Reitkunst, und net nur da!
Es geht ja drum, daß des Reiten aufm Pferd
an Spaß macht und sich des ned umkehrt,
daß sich der Reiter vom Pferd duad trenna,
weil d´ Hund´ mit de Glitzerketterl rumrenna.
Mei, Helmut, da muaßt hoit scho guad aufpassen,
und dir a ned die Butter vom Brot nemma lassen,
weil sonst des Pferdl auf amoi den Weg bestimmt,
wos für an´ Weg der Reiter in Zukunft nimmt!
Ja, Hubert, des gilt auch für di, hör nur guad zua,
für an Gruppenausritt da braucht ma ganz vui Ruah;
des ghört guad geplant und da setzt ma sich z´samm
da fragt ma erst die Rösser ob´s nix bessers vorham´!

Duast des net, und sie ham grad an Frust:
Machens des und da hams immer drauf Lust:
Sie renna los, da konnst nix mehr korrigiern,
mei, sie kenna höchstens an Reiter verliern!
Schauts, die Melanie de moan i hods richtig gmacht,
die hat a verdorbn´s Springpferd zum kaffa o´glacht,
jetzt san´s a Paar und ham alle 2 mit vui G´spür
entdeckt den Spaß am Reiten und des net wia!
I möcht net versamma die Wesen zu nenna,
de die Strenge des Reitens nur allzuguad kenna.
De Schulpferdl sans, die miaßn sich recht oft plogn,
und glaubts ma´s, de dan ganz gern manches sogn.
Aber ned nur draussen, sogar nachts im Stoi
San´ Pferdl hellwach und wissen wo überoi
Die Vorräte stehn und wia ma d´Boxentür aufmacht
Da speist dann d´“Denise“, der des Herz im Leib lacht!
Des oanzige was sie während dem Fressen stört,
is der Lärm vom Palm Beach, auf den koana hört,
er sagt ja scho dauernd, daß er diese Box net mog
mei, dann stellts n hoit um in de nächsten paar Dog!

Überhaupt miaßt´s scho richtig guad schaun,
daß die Rösser eich net den Stoi umbaun,
daß d´Koppeln san´ gsichert, dafür gibt’s an Strom
nur einschalten miaßt´sn a, des dad ja nix schod´n!
Dann kummat der „Cappucciono“ gar net auf die Idee,
ganz still und heimlich unterm Zaun durchzu geh´,
und sich ganz gmiatlich in Solln schaun sich um;
d´Vera, ärgert sich, oiso kümmert s´ eich drum!
A paar von eich war´n ja des Jahr auf´m Turnier,
des erfordert Disziplin und a a guads G´spür
erfolgreich habt´s eich im Wettbewerb g´schlagn,
des gfreit mi für eich des muaß i scho son´g!
Beim Verlod´n von de Pferdl, da braucht ma vui Gschick,
so geht des net, sich einfach verlassen auf´s Glück;
stellt´s den Hänger hin, überlaßt´s dem „Luis“ den Rest,
der hängt die Hängertür aus und hoits dawei fest.
Wenn die Rösser trotzdem gar net einsteig´n woll´n
Dann rat ich eich: Nemmts a Navi und reit´s von Solln
zum Turnierpatz, dann san die pferd´l a schee warm
die Aufgabe wird g´ritten und zruck mög´ns dann fahrn!
Wos moant´s ihr wie des die Pferde wer´dn schätzen,
bequem im Hänger und net durchs Unterholz hetzen,
der „Zedan“ haut net ab, des gibt’s dann net mehr,

dem reichts, dem san die Hax´n furchtbar schwer!
Solang´s g´schlossene Hänger gibt, is des koa Problem
Da müss´n die Pferde a net „oben ohne“ drin stehn!
Des war a der Karin klar, doch oamoi hat´s net denkt
und ihr Gspann in a vui zu niedriges Tunnel neig´lenkt.
A am heimischen Stall habt´s a Turnier ausg´richt´,
des war erfolgreich und ihr ward´s drauf erpicht,
daß ois perfekt abläuft und a da Umsatz stimmt
den ma nimmt, falls zu neuen Investitonen kimmt!
Damit kumm i zum Gerhard, der oiwei tüftelt und denkt,
nur des G´fühl zu de Traktoren ist ihm gänzlich fremd.
Bleib beim Verhandeln, und bei der Betriebswirtschaft,
des liegt dir, hast a des „go“ für d´neue Halle g´schafft!
Jetzt dank an die Engerl, die ham guad g´wacht,
ham aufn Stoi gschaut daß koa Feier entfacht;
Vergelts Gott, ihr liabn Pfleger und auch ihr Paten;
bleibts fleißig und brav, des möchte´ i eich raten!
Jetzt wißts, wos mia ois im Himmel erfahr´n,
und i kumm wieder, da seid´s eich im Klar´n;
jetzt muaß i weida, i übergib´s Mikrofon,
da irdische Vorstand mecht a no wos sogn.