´s grüne Blättle - evangelisch-reichenbach.de

Liebe Reichabacher!
Ond trotzdem sen do Maura zwischa Menscha
ond bloß durch Gitter gucka mr ons a.
Onser versklavtes Ich isch ein Gefängnis;
es isch gebaut aus Stoiner onserer Angscht.
So ähnlich hoißts doch en deam Lied, was mr bei
Hochzeite sengt.
Eigentlich kann mr bloß traurig seufza, wenn mr so ra Angscht-Mauer begegnet
ond merkt, wie jemand vor lauter Angscht gar net mit oim schwätza kann. Ond
wenn oim gar aufgoht, wie mr selber aus Angscht blind gewesa isch gegenüber
ma andere Menscha, no kennt mr gradweags heula.
Kennet Ihr des: Vor manche Haustüra liegts wie an großer Stoi oder wie
an großer schwerer Vorhang oder gar wie a Tarnkapp, die die Menscha dren
osichtbar macht. Mr lauft Johre lang ananander vorbei oder leabt neben anander
her – aber a osichtbare Barriere bremst oin ond mr fendet koi Wort, ond koin
Droht zu anander, sondern bleibt sich fremd.
Aber manchmol isch mirs scho passiert, dass i durch irgend oin Zufall net
anders kenna han, als dass e mit so jemand han schwätza müssa. Ond siehe
da: Der oder dui isch gar net so fremd, sondern an Mensch, der uf em gleiche
Erdboda romlauft und den de gleich Sonne bescheint, wie mi au.
Ihr kennet die Gschicht vom Rabbi Er hot seine Schüler gfrogt, wann der Tag
anfängt und d’ Nacht aufhört. Nochdem se lang gnuag grota hen hot er d’ Katz
aus em Sack glassa ond hot gsagt: „Wenn mr em andere Menscha da Bruadr
oder d’ Schwester erkennt no isch d’ Nacht vorbei ond dr Tag isch abrocha.“
Dieser Jud aus Nazareth, den se später wege seiner göttlicha Bruderschaft
mit älle Menscha liquidiert hen, der hot des jo tadellos vorgmacht: Selbst die,
wo total vom Weag abkomma waret ond von älle verachtet hot er mit ahne
komma lassa. Er hot sogar mit ehna gessa ond gfeiert. – Ond siehe da: Sogar an
stinkreicher Kollaborateur mit der Besatzungsmacht hot sich verändere könna
ond hot sei Geld loslassa könna. Soll mir niemand verzehla, d Menscha seiet
overänderlich. Mir Menscha kennet natürlich nioemand verändra. Aber wenn
dieser Jesus en jemand wohnt ond aus seine Auga raus an andere mit seim liaba
ond doch feschta Blick aguckt – über älle Zäun ond Maura, Gitter ond Berriera
weg, do kann koinr bleiba wie er isch. Entweder muaß er abgrond bös werda
oder muaß er den freundlicha Blick grad so freundlich erwidera.
Probierets aus – ond Ihr werdet Euer blaues – noi Euer geradezua
weihnachtlichs Wonder erleaba. Des isch mei Empfehlung zur Adventszeit.
Euer A-Sänger
30 31