Mai 2012 - SV Sentilo Blumenau

29. Jahrgang Mai 2012 Heft 10
_______________________________________________________________________________________________________________
gesehen….. gehört…..
Geschichten vom Lurer
Grias Eich Mitanand,
ja i hob wida an haufa gseng und gheart.
Als ersts dad i song wer ma jetz amoi bei de Madln schaugn wos da so los is. De steckan ja no
mittndrin im Abstiegskampf und du mechst as ned glaubn, de kämpfa auf oamoi. Das se des
Kempfa lohnt hod ma an de letzten drei Spiele gsehn. Siebn Punkte aus drei Spiele habts ghoit
und an Anschluss an de voa eich wida hergstellt. I hoff blos das des ned ois z spät is. I glaub an
eich Mädls, so wia des eia Trainer da Werner a duat. Kämpfts weida na werds es scho schaffn,
das nexsts Jahr a in da Kreisliga spuits.
Bei da Jugnd machts a wida mera Spaß zum Zuaschaung, ned nur weis imma öfta gwinna
duarn, sonden a wie ma merkt, dass da de Leid guad zammahoiten und a supa Arbeit macha.
Vo allein kummt des ja a ned, da werda am Lucky und am Schmiedl sei Arbeit mid am supa
Team guad weida gführt, Respekt, des werda ma in de nächstn Joar no richtig merka. Wenn
mas jezad no schaffa dadn, dass ma moi wieda alle Mannschaftn homm, oiso a a A-Jugend,
dann kenna ma a moi wida a paar Jungs zu den Erwachsana nauf bringa.
De Zwoate derfat ausm gröbsten raus sei und wird de Klassn a hoidn. Des habds guad gmacht
buam. A wenns an Vodameyer und an Huaba an Haufa Nerven kost habts bis des endlich so
weid war. Machts weida so, dann moan i habts mim Abstieg nächsts Jahr nix zum doa und
vielleicht kennts ja amoi an de vordan Plätze hi riacha.
Jetzt ham ma überd Kreisliga und üba vordare Plätz gredt, na samma ja scho beim Thema. Am
Linnhuber und am Toker sei Haufa. De erste Mannschaft. Wos soi jetz i da sogn? Supa, weida,
hoits eich de Meisterschaft. Ihr habts es vadient. Freili war ned ois so supa wias jetz ausschaut,
aba des is Wurscht. Am end vo so a Saison frogt koa Sau danach ob in dera Saison ois guad
war. Wos zeid is das da SV Sentilo Blumenau seit 30 Jahr ind Kreisliga nauf wui und nia hams
es gschafft. Aba des Jahr wird ois andas. Pünktlich zum 40sten Geburtsdog kannts so weit sei.
Also reists eich zam und gwinnts no de vier Spui und dann werd gfeiert und gsuffa bis das da
Notarzt kimmt.
Jetz sog i eich no was, und des guid für alle. Ganz aloa schaffen da Linni, da Sona, da Manni,
da Oswoid und de Mannschaft des ned. Da muas scho da ganze Varein jetz no mid heifa.
Kummts doch alle zu de letzten zwoa Auswärtsspiele und schaugts eich a de zwoa Hoamspiele
o. Schreits und feierts eier Mannschaft o. Dann is für de a leichter.
So des wars scho wida vo mia. Nexts Monat schreib i eich na, was und wer bei da Moastafeier
ois ausgfalln is.
Hoff ma alle des Beste und druck ma alle drei Mannschaften de Damma, das ois so laft wia mia
uns des vorstelln.
Ah ja, no was, ois i am Hedernfeld war, hob i glabt i dram, ois i ins Varainsheim ganga bin. Da
san nach 30 Jahr auf oamoi naie Bilda drin und der Fenster hod`d Branka a gstricha – wobeis
entweda bsuffa oda valiabt war, ois de Farm rausgsuacht hod, des is ja rosa oda so was in dera
Richtung. Naja, wurscht, wenn de Erste aufsteign soit, muas nach da Feia ja eh renoviert
wern……
In diesem Sinne
Euer Lurer
18